Anda moubuka tenipdelyame! ‘Mesir mutuku yin talen nang arye melipnamniyakca,’ teneplumce ulyam do? Bukni, ance ateneminye ning ara, kum winipmanto. Winipmanto ara, nyapkine. ‘Kama bopnamapʼ tenen, kamuma yo winibuka bolamaka atonun upnamlame. Akama ara, subuka saklirye, an mining tarukuk luknamkile. Dipkoprop ning ara, Mesir nang talilulnye bira, aning atonun ulule. Ara, yuk mutuku nang aryuk, ‘El anye birye yanuka melipnamsile,’ tenenyak bukni, ninye deiyoknye Firaun bira, yuk mutuku nang babye melibuka kum lyeptue. Anti melipmanto kum uplyopura, aminyan ara, yata wiripnamlam do? nyabuk.
Yesaya 30:2 - Eipomek2 “Ara, anggunce nati, ‘Mesir mutuku ninye arye melipsiting, tenen, morolbitibye do?’ kum nyamnulum bukni, anggun dem aryuk morolbilume. Tonda, Mesir mutuku ninye deiyoknye Firaun birye, ‘Melibuka kalikinamsil’ tenen, el dam morolbilume. Anggunce, ‘Se, Asyur mutuku ninye arye olyanamsiyaka ati, yata wiriptibye do?’ teneplumce, ‘Mesir mutuku noutam duknulbipyeba, yu nang arye kum eipnamsiyak’ tenen, duknulbilume. Anggunda, ‘Allah arye melibuka lyepnamsil,’ tenepmatum bukni, na batakuka anggunce, Firaun dam nyalbiluma deice arye, anggun malye uplume. Gade chapit la |
Yesaya 30:2
26 Referans Kwoze
“Wini talak arye deiyok koubuka doryanamle talak nirya ara, Yosua adiparyuk na si eren aik pum tam pil dona deiyoknye, Eliazar dam binuka tikinamle. Wininamla deiyok ara, ani. Ara Imam Eliazar birye, Yosua winipnamle ning laka nyapnamla atia. Eliazar birye, Yosua aminyan winipnamle ning kel kina ati, na arepsise ning el si ara Urim ap, Tumim ap dobuka, na dam yalirye, aning bitinye dipdelirye biklyopura, Yosua biti laka nyanamle. Lak nyaplyeura, Yosua kekeplirye, Israel ninye ati laka nyapliba kekebikirye, dobolbanamake. Ara Yosua birye, ‘Binuyabe,’ nyaplyopura, banamak. Elce, ‘Aunuyabe, tonda tamubuka binamabe,’ nyaplyopura, aninguk kekebuka unamake. Ara, na Allah dam ululba, narye nyapnye ning kekeplirye, Israel ninye ati, ‘Allah arye nyalinilye yupu ani,’ nyapliba kekebikirye, bobuka binuka yanuka kinamle. ‘Winipnamle’ tenen, Yosua wibuka deiplyame,” Allah arye Musa biti nyabuk.
Allah Yahweh, elce, ‘Anye bira, ninye deiyok kibuka, ‘Naʼ tenen, nang Israel nang talibuka Raja unamleʼ tenen, wipdeiamuknye bira, nun mal olan nang arye tomobik. Nun Raja ati ara, nunce, ‘Kume, elda erebuka, nun deice tam atonun kiplyeba, nunda el amu tamuk unamabe. Elcuk kalekuka melinamsile. Winipsilyeura, yuk mutuku nang yala-yala nirya, sik noutam ubibya babye, telebuk unamabe,ʼ tenelamupu. Utenelamupu bukni, el babye, nun mal olan nang arye yanuka tomobik. Ara, ninye arye tuku pum tam weik bisik palibikceba, bai tam kam ning mangkau yangalamicak, atuku pum saklyeba tomolamak touk, tomobik.
Anggunce ayupu kum kekepmunyopura, anggunda pia malye weik kipdeipdanamlume. Anggun bidamang arye, anggun bidam nang ati, oplanamlume. Deiyok ara ani. Ara, anggunce nati, ‘Nun ni koproba Allah, el si erenyabe. Nun ni koproba Allah Yahweh ati, moropsilyame!’ nyabuka, moropmanulumba, aning nyapdeipmanuluma atonun, narye Allah moropsise. Tonda, anggunce, ‘Kume na nio, nunda Allah ati moropsiminba, elce nunti, nyapdeipnamsil yupu ara, moubuka kekebibyak arye, aninguk talibuka wininamabe. Malye tenenyap ning babye, teleb tenenyap ning babye, Allah arye nyapdeipsilye touk, moubuka talibibirye wininamabe,’ nyamnulume.
“Naio, an asing arye elisilyame! Min talak ara, ninye weik ulamupu bukni, wini talak ara, nun mitik tonun tuba unamabe. Ati, wini talak mitik tonun tuba aunmab nang, nunce anti, moropnukabe. Ati, nunce nyapnukiab yupu ara, nun ni ance kekepsimince, an ni Allah Yahweh, an si erelyamnye biti, tenipsimince, moropsilyame.
Atalak babye, sik Babel mutuku yin talin nang arye, ‘Yerusalem mutuku unyak nang nirya, obuka malye kipnamap’ tenen, yanuka warekmace talak ara, yuk ninye arye, anang ati, “Kume, anggun kekeplulume. Yuk mutuku ninye, Mesir mutuku talilul weiknye, el yin talin nang arye, Yerusalem mutuku ninye ona ati, yanganmake,” nyabuka, laka nyabik talak ara, sik Babel mutuku yin talin nang arye, ilil ubukba, adiparyuk Yerusalem mutuku asik domik ning batakuka, bai tam sakuka bindobik.
“Yeremiao, ‘Ance, Allah Yahweh ati asipdetumʼ tenen, moropkiyabe. Ara, nun Yerusalem mutuku unyap nang ara, yata wiripnamap do? Deiyok ara, Babel mutuku tam talibuka ulul ninye deiyoknye, el si Nebukadnesar, el ap, el yin talin nang ap, yanmakce, ‘Yerusalem mutuku nang opnamapʼ tenen, nun unyap mutuku dam yanuka warekmasiake. Ati, ‘Allah Yahweh arye, nun melibuka lyena ati, nun deice winipman kum pil dopsutua deice arye, Raja Nebukadnesar ap, el yin talin nang ap ara, namin kipturye, bataksitingba, sik mutuku tamubuka bitingeʼ tenen, ati moropmabe. Allah Yahweh arye, minop talak noutam, yata wiribukabarye talak ton, winipman kum pil domsuk deice arye lyepromsuka ati, ‘Aning ara, tuba tonap winipsutuʼ tenen, moropmabe. Ati, anda Yeremia birye nun melina ati, Allah dam moropnusilyame.” Yehuda mutuku tam ninye deiyoknye, Zedekia birye, ayupu nyapdeibukba, elce dopdeibuk bitinye nang arye, nabi Yeremia dam nyalbidik.
Anggunce yin talen nang yupa weik kum kintinip deiptuma ati ara, yata wiribuka arye, Raja Asyur el yin talen nang, sik deiyoknye tonoknye babye, obuka sirya daktum do? Aning kum winiptume. Tonda, nun Asyur mutuku talilul Raja, el amu tam pia mitikto nang babye, kum obuka sirya daktume. Aning lak usilya deiyok ara, ani. Sikda, ‘Se, Mesir mutuku nang arye, yin talen nang ap, kuda basam arye libuka bobanyak kereta perang ap, kuda basam ap, kuda basam balye deice bukikirye, ninye olbalamak yin nang ap, kaliksitingopura, adeice aryuk nun ap, sik ap, tonok kipdobibirye, Asyur mutuku yin nang olbitibye. Sik Mesir mutuku nang arye melipnamsiyakca,’ tenemunce, ululuma ati, nyapsine. Kume, angguncuk anggun tam nang ati, kum meliptume.
Sik anang arye, Yehuda yala nang ati, nyapnamake. “Se, nun winipmap ning ara, yata wiripnamap do? Anggunce, ‘Winiplulume,’ nyabuka, laka nyapsumunyak, kekepnuyabe. Anggunce nunti, melipsululume. Winipmanto ara, keting buppu arye dinmaliba, yo tikamlyak arye, lelilamle pia teleb kibuka, dongolye touk, anggunce nun mal olan nang ati, kalikuka melipsululume. Nunda nun mutuku arye bai sakuka bikbik abuka yapu nang unyabe. Ati, nun moropsiap ning ara, ‘Nun mal olan nang arye opsikcak ati, anggunce duknupdeipnusulumeʼ tenen, moropsiyabe. Anggunce, laka kum kipdeipnamsulume.
Bukni, aminyan talak ton, Hosea birye, Raja Mesir, el si ara So biti, “Ance na melipnutumba, Asyur mutuku ninye deiyoknye, el amu tam unmana ara, bataktinirye, elti, malye kiptinimnye,” nyabuka morobukce, sekin ning arye, surat sekuka deibukce, el mapu wipdeibukba, bobiyik. Tonda, Raja Asyur, el si Salmaneser biti, dekna weik ning bobinuka, keting tamun yupa pia weik deice, arelamuk ning ara, batakuka tonap kum arebuk. Asurat sekuka deibukba, yuk nang bikikce, Asyur ninye deiyoknye, laka nyabikba bikukopura, el Raja Asyur mutuku Salmaneser birye, Hosea tomobuka, wenen aik noutam binuka dongobuk.
Nyabik bukni, tace ning arye tamubuka ayo nirya ati nyabuk, “Yo anggunce dipkoprop, ‘Eluk nun deiyoknye Raja tiknamsile,’ tenepnumunyopura, adiparyuk anggun nirya bulubuka na amu tam tikilyanganamlulume. Bukni, anggunce, ‘El kum,’ tenepmunyopura, na tace noutamak arye, uku yalirye dipliba, weik cang yo, si ara aras yo, Libanon mutuku tikilye yo nirya uku dipnamle.” Adomon yupu nirya ara, Yotam birye Sikem mutuku ninye ati nyabuk.
Doupnamle talak ara, anggun ni koproba Allah arye, tamubuka mek kwen deice, kapal arye bobuka, Mesir mutuku bodeipnamsile. Mesir mutuku arye, bobuka binusuk talak ara, Allah arye, “Kume, anggunda, Mesir mutuku tamubuka kum yanamlume,” nyapdeiamsuke. Tonda nyabuk. “Mesir mutuku noutam tamubuka binamlum talak ara, anggunce, ‘Se, yata wiribuka kam uptibye do?’ tenen, anggun mal olan nang ati, “Nun sal babye, kilapu babye, yo bok deice arye deksumunye ura, anggun pil talyeuk dopnusiabe,” nyabuka, moropnamlum bukni, tonoknye babye, ton kum deknamsiake. ‘Anang ara, nun like, daupmalye,’ tenenamsiyake.
Anggunda, ‘Mesir mutuku nang arye, melipsikca deice arye, Asyur mutuku weiknye talisilya ara batakuka, elti, sirya bisipbuka yaniptibye,’ tenelul bukni, dipkoprob nyapsine, Mesir mutuku weiknye ap, el tam nang ap arye, melipsitinga babye, nati yanibuka sirya kum daknutume. Winipmanto ara, nyapnusine. Ninye banukce talak kama dunubuka balamikiba, akama ara seleplirye, el siring arye, atalipmalinye bira el taruk luklamleto, anggun Mesir nang babye wininamsiyake. ‘Mesir mutuku ninye arye, lyepnamsiyak’ tenen, sik tam kipdopmunce yupu sisikimunyopura, ikin weik unamsile. Ara, lai tace deice arye, olalulum touk, wininamsile, nyapne. Aning atonun, yata mutuku nang do nirya, ‘Mesir mutuku ninye deiyoknye Firaun birye, melibuka lyepsutue’ tenen, el deice uk sik kanye deibikirye, el tibuk tenebikcopura, aminyan talak ikin weik unamake.
Elce nunti, awinipnamsil ning ara, akunum tenilamsuka anya arye, yata deiyok ati, malye nang dam asilbalyam do? Ara, asing keten nang ap, diplamice nang kanye ati, yupu talilbanyak nang ap, ‘Aminyan yata winipnamsil do?’ tenen, asilbalulum ning ara, malye winilulume. Sik anang arye duknubuka, mur-mur anyak yupu ap, merye nyanyak yupu ap ara, yata ati kekelulum do? Nun kam tuba unyap ninye arye, akunum diamice ninye, kanye arye nyanyak yupu deice arye, aminyan winipnamsil ning ati, dipkoprob kel kiptibye do, kum do? Aning ara, kum winipmanto ati, anggunda yata ati, anggun ni koproba Allah ati, kum asilbalulum do?
‘Mesir mutuku nang arye melibuka lyepsiting’ tenen, ‘Mesir mutuku binamabe,’ tenepluma ara, nong teleb ning ton dopropnamluma ati binamlum do? Tonda, ‘Nil mek kwebuka dinamap’ tenen, binamlum do? Tonda aning atonun, ‘Asyur mutuku ninye sik dam bitibirye, moroptibyeba, telebe tenepsitingopura, sik Asyur mutuku nang arye melibuka lyepsiting’ tenen, anggun amutuku binamlum do? Asyur mutuku noutamak balamle mek, ‘Efrat mek kwebuka diptibye’ tenen, sik mutuku binamlum do? Mesir mutuku ap, Asyur mutuku ap, binuka moroptuma babye, ara nong teleb ning ton kum dopropnamluma ati nyapsine. Amutuku ninye arye, kum melipsitinge.
Ara, anggun Israel yala nang arye, “Kume, nunda amutuku tuba kum unamabe. Mesir mutuku uk, binuka unamabe. Mesir mutuku binuka upyopura, yuk mutuku nang arye nunti, kum olyanamsiyake. Tonda, yin talin nang arye, ‘Olbinamabʼ tenen, nun ap, yuk mutuku nang ap, opdanukca ati, ‘Kintininamakʼ tenen, terompet lelim nyanyak lelim babye, kum nyanyakba, nun ton kum kekenamabe. Tonda, din ton kum daliba, nun din babye, kum patanamsile. Ati, Mesir mutuku noutamuk pia aunamabe,” nyabuka, yanipnulumce, nyapnamnulum do?
Ati ara, sik Israel yala nang nirya ara, bicoe. Anang ara weik tonun wenebuka opnamna ati, sikda bicoe. Ara talye ati kum bukni, deiyok ara sikce nati, akunum bataknikce, luba kipnika ati nyapne. Tonda, sik anang nirya arye, na nyapdeipse yupu nirya kum kekepnikce, yaninyaka ati, adiparyuk anang obuka sice buklopnamne. Narye, ‘Sik nirya, ikin unyaka noutam ara, lyepnamne,’ tenyamse bukni, sikce nati talye yupu uk nyanyake.
Aning ara, talye ati kum nyapsine. Deiyok ara ani. Ara, winipmanto ara, keledai basam, bai talye kam daulamlirye, kisok kat kibuka ulamlirye, ‘Dan mutuku binun do, yata upnamne do?’ tenen, walwal kiplirye, obinapna, ayanapna kilamle touk, anggun Israel nang nirya babye, atonun ululume. Ara, anggun Israel nang arye, ‘Yata mutuku nang arye melipsiting do? tenen, anggun melina ati, Asyur mutuku nang dam binamlumce, morolamlume. Atonun ton, Efraim yala nang arye, ‘Yata mutuku nang arye, nun kwitcapu tenepsikirye, melipsiting do?’ tenen, yuk mutuku dabinuka dekelbinamike.
Sikda, yuk pera mutuku nang ati, ‘Melipnamsiakʼ tenen, dengna ap, teleb ning ara, weik tonun binuka arenyak bukni, wini talak ara, narye anang nirya bulukapnirye, tonokak deipnirye, sik anang ati wenepnamne. Wenepnamne talak ara, pia una kum bukni, adiparyuk sik yuk-yuk mutuku ninye deiyok Raja nang ap, sik amu tam deiyok-deiyok nang ap arye, ‘Nunti dengna weik tonun arelyanganamsulume,’ nyabuka, ikin ning, sik Israel nang deice deibikcopura, sikda, ‘Se, yata wiriptibye do?’ tenen, kanye imun weik bobikirye unamake. Deiyok ara, aminyan talak, Asyur mutuku ninye deiyoknye Raja arye, sikti, ‘Dengna weik arelyanganamlume,’ nyaplirye, sikti, ikin weik deipnamla atia.
Piblisite