Bukni, ‘Na tenena ninye unamak’ tenen, wiamse ninye, sik Israel ninye ati, ‘Narye sikti, melinamsine’ tenen, na taruk yangalilamseba, sikda talima kat ninye anya arye, na yupu kum kekepmanto ulamnike. Sikda, mandipna kanye bobuka malye-malyeuk unyakce, sikce ‘Wininamabe,’ tenenyak ninguk wininyaka anya arye, malye weik unyake.
Yesaya 30:1 - Eipomek1 Allah Yahweh arye nyabuk. “Yehuda yala ninye arye mikip asa unyaka ati, sik bicoe, nyabuk. Anang ara, ‘Yata wiripnamap do?’ tenen, sik mining kanye aniryuk yupu talanyak ning ara, deiyok ton kum upnamle. Ara, narye, ‘Winipnamlulume,’ kum nyapdeipse buk, sik dem aryuk yupu talibika ati, nyapsine. Sikce tenenyak ning ara, ‘Teleb tenenyake,’ kum tenenune. Aning ara, sik dem aryuk, ‘Mesir mutuku nang arye melipsitinge,’ tenebikce, yupu talilbanyaka ara, na Dib Kanye arye, ‘Winiplulume,’ kum nyapdeibuk bukni, sikcuk yupu talilbiyike. Winibika deice arye, sik malye ning weik tonun, tabakuka winipre banyake. Min arye malye winilamik ning ara, akunum aubuk bukni, wini talak ara, tonap weik tonun tabakuka malye wininyake.” Gade chapit la |
Yesaya 30:1
48 Referans Kwoze
Nabi Yesaya birye nyabuk. Se, Allah Yahweh arye, mambul yupu akunum nyapmasila ati, anggun nirya kekenamlulume. Anggun tukwak mutuku umunce, malye winimunye ninye nirya ara, moubuka kekenamlulume. Anggunda pia bicoe. Im deice ululum ninye nirya ara, moubuka kekenamlulume. Se tukwak mutuku ululum ninye nirya ati, Allah el si Yahweh arye nyabuk yupu ara, ani. Se, sik Israel ninye ara, ‘Na tenen ninye unamak’ tenen, wipdeiamsirye, pia melinun bukni, mitik mapu arye, talye-talye yupu nyaltakalamak touk, sikce nati batakaninyake. Sikce nati yaniniyake.
Ati ara, sik Israel yala nang nirya ara, bicoe. Anang ara weik tonun wenebuka opnamna ati, sikda bicoe. Ara talye ati kum bukni, deiyok ara sikce nati, akunum bataknikce, luba kipnika ati nyapne. Tonda, sik anang nirya arye, na nyapdeipse yupu nirya kum kekepnikce, yaninyaka ati, adiparyuk anang obuka sice buklopnamne. Narye, ‘Sik nirya, ikin unyaka noutam ara, lyepnamne,’ tenyamse bukni, sikce nati talye yupu uk nyanyake.
Bukni, na kayapo. Anggunce, anggun malye umunye ning nirya ati, batakmunyopura, Allah arye namin kipsilirye, kum wenepnamsile. Bukni, anggun ilil pia kum kanye dobuka, anggun kanye talima kat upliba, anggun malye ning kum batakmunyopura, malye ninguk tuba winimunya deice arye, Allah weika arye tonap tabakuka wenepnamsile. Tuba-tuba malye winimunya deice arye, anggun bidamang arye anggun bidamang ati, malye ulilalulume. Ninye arye sik mambul ning ati, ‘Tonap weik unamsil’ tenen, dokola delilamak touk, anggun malye-malye winiluluma deice arye, anggun bidamang arye, anggun bidamang nong deice ikin ning weik delilanmalume. Allah tenyamuk talak akunum uplyopura, lakak aniryuk ninye nirya ati, lipsisikuka yupu bokeipsilirye, wenepnamsile. Wini talak ara, anggun tuba malye winilulum ninye ati, weik arye wenepnamsile. Anggun malye winin ning batakna kumce, talima kat kibuka, ‘Malye wininupyap tenena kum deice arye, malye umunya ati ara, Allah weik arye wenepnamsile.
Ura, Allah arye anggun nirya ati wenepnamsil ati, anggunda bicoe. Ara, anggunce, ‘Kume, nunce nyanyap yupu ara, Allah arye, kekebuka kum biktue. Anggunce, ‘Aning ara, winipnamap’ tenen, duknubuka yupu nyanyap ning babye, Allah arye, nun nyabibye ning ara, kum kekeptue. ‘Elce nun eibuka kum kekepnamsila atia,’ teneplum arye, aning nirya ara, duknunauk ululume. Tonda, anggunce, ‘Kume yata nang do nirya ara, ninye yuk nang ton kum elisinyaka ati, nun nyananyap yupu ara, kum bikisinyake. Sik anang aryuk tenebikirye duknunyake.’ Utenebuka winilulum bukni, anggun dam ikin ning yalyeba, dopropnamluma ati, anggunda bicoe.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
Bisibuka winilamak touk, an babye, atonun kipdeipkine. Winibuka wininamlama deiyok ara, sik Israel ninye arye, an yupu yaniptapnamkiyaka ati, ance keil kat bulamla atonun uminyopura, sikce anti kum bisipnamkiyake. Ati, sikce lik tenebuka, yu upliba, anti nyapkikirye, pia malye kanye bonamkiyaka babye, ance, ‘Se, yata wiriptinye do?’ tenen, ilil asa kum unamlyame. Sik Israel yala ninye ara, nati, ‘Nun like’ tenen, na yupu yanininyak ninye ati nyapkine,” Allah arye, na Yehezkiel ati nyapnuke.
Anda ninye arye deipkiknye bira, narye wipdeipkina ara, talye ati kume. Israel ninye nirya arye, na yupu yaniptabuka mandipna kanye bobuka, malye weik unyak ninye ati, ‘Sik noutamak ulamince, na yupu dobuka, sikti, peterenalam’ tenen, wipdeipkine. Tonda, minop talak arye diprongobuka, wini talak nirya babye, sik apu yapu arye, na yupu yaniptabuka malye upnin yangalamik touk, wini talak unyak Israel ninye babye, aning atonun tuba wininmake. Narye nyalinye yupu yanibuka wininyake.
Bukni, anggun Israel nang ara, mandipna kanye bobuka, malye weik winilulume. Winipmunce, anggun kisok ara, kat keil bulamle atonun nang ululume. Anggun kanye talima noutam ara, ‘Kume, Allah arye nyasilye yupu, pia kum kekenamabe,’ tenelamukce, mandipna kanye weik bolulume. Tonda, na Allah arye, ‘Aning wininamlume. Aning ara, pia kum wininamlume,’ nyalisunun yupu ara, kum kekelulumce, ayupu yanibuka winilulume. Aning winimunya deice arye, pia malye winilulume.
Winibuka sekenamlulume. Amutuku ninye ara, kekena kumce, Allah ati malye kibuka, bisina uk unyak ninye anya arye, sikda talye kanye bobuka, Allah arye, ‘Winiplulume,’ nyabuka, peteresilye yupu kekebuka kum unyake. Aninye ara, tilila yupu uk nyalanyake. Tonda, na Allah Yahweh arye, ‘Winiplulume,’ nyaptinya babye, na yupu pia kum kekeninyake.
Anggun ayan bukuka kekenmalumak, Allah elce, “Malye ning si erebikce nang ara, ikin ning dopnamake,” nyabuka, nyalin yupu deice arye, ‘Aninguk wininamakʼ tenen, mikip arye nyapsuk ning nirya ara, anggunce kekeplume. Anyalin yupu akunum kekeplum nang ara, ‘Nunda, ayupu akunum kekebabe ati, aminyan talak ara, nun babye patapsilye touk, talye malye wininamabe. Aning ara, teleb uka,’ pia kum tenenamlume. Anggun mining kanye tenepmunye ninguk, dekmunyeura, anggun dam babye, ikin ning yalyeura, dopropnalume. Ara, Allah arye, sik malye wininyak nang ati, weneplirye, deken ning arepsilyeura, teleb un ning babye, malye winin ning babye, ikin ning yalyeura, sik nirya ikin ning dolonamake. Atouk, malye winin ninguk talibuka winilamlinye bira, ikin ning yalyeura, dolonamle.
Winibikirye, Yerusalem mutuku nang ona ati, ninye arye wa win dam kaliklamaka atonun winipnamake. Sik ona ati, antanap dongobuka warikdongopnamake. Aning winipnamaka deiyok ara, sik Yehuda mutuku unyak nang ap, Yerusalem weik asik unyak nang ap, na Allah dam pia malye winikirye, nati bataknikirye, na nyanun yupu pia kum kekeninyaka ati, na Allah arye wenepnamsine.
Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.
Allah kanye arye ton ap, Yerusalem mutuku asik bukni, amutuku kon deice, Sion mutuku kon eitam, im noutam arye, mambul ning bitinye deipnamle. Ara, Sion mutuku dup yanuka bulubuka weknamak nang nirya, sik alip ara, Allah arye keting noutam talak, weik dua atonun kipdeipnamle. Lukunyan talak ara, uku sekiceba, tulum weleplirye, uku dilamalyak dirina ulamle touk, kibukaplirye, tulum ap, uku buk dirina ap, amutuku deice uplyeura, yanuka melinamle. El Allah mikip ap, teleb kina ap arye, weik dirina atonun uplyeba, amutuku deice arye erebuka ulirye, amutuku nang meliplyeba, sikda el amu tamuk unamake.
Sik Efraim yala ninye arye, aning tuba wininyake. Wini talak babye, tuba malye-malyeuk wininyake. Ara, sik Efraim yala ninye arye, sik taruk deice arye, dekna weik ning, el si ara perak dobuka, sik tenebice ning kintinibuka deibikirye, “Nun ni bira ani,” nyabuka, si erebikirye, kam ulul ning obuka, uku dongonyake. Winibuka unyakba, yuk mutuku ninye arye, sik Efraim yala ninye wininyak ning eibikirye, ‘Se, aninye ara, talye ning ati, “Nun ni koprop ani,” nyabuka, si erebikirye, sapi basam urasin atonun ning, puturubuka deibikirye, aning si erena ati, mutunyake. Tonda, sik isa si erenyak ning arena ati, sikce yuk ning obukabikirye, aisa si erena ati, arelbanyake,’ tenenamake.
Ton nang ara, tilila yupu uk, tuba-tuba talye nyaltakanyake. Aning wininyaka ara, winipmanto nyapnusine. Ara, talye yupu weik nyanyak nang ara, ninye arye tuku deice ban ning, el si gerobak, ikin ning gerobak pum tam libikirye, tapu kirikuka libuka, bobalamak touk wininyake. Sikce tilila yupu nyakirye, malye un ninguk tuba-tuba wininyak nang ara, bicoe! Sik nong deice ara, pia ikin ning, cakman tenepmanto kum kanye, ikin ning upnamle!
Ura, tenipdelulume! Ninye arye nyalamak yupu ara, anggun ton akunum kekebuka kel bikamlume. Ara, ‘Maptinye,’ teneplinye bira, el amsuna deice mapdelye bukni, el amsuna ara pia bumang ati kum wekukamatue. Tonda elce, ‘Na galun ning selimut uptu ura, na nong galubuka maptinye,’ teneplye bukni, el nong galubuka sinipdongopliba, selimut ara pia bumang ati, el nong kum galubukamatue. Aning atonun, sikce, ‘Omutuku Mesir tam nang arye, nun dam yanuka melibuka lyepdopsitinge,’ tenyamlum bukni, sik kum melipnamsiyake. Asyur mutuku nang arye yanuka bisipsikirye malye kipnamsiyake.
Anggunda teleb kanye bobuka dilamunce, ayupu nyanululume. “Kume, nun ap, Mesir mutuku ninye ap, akunum yupu talipdabirye, tonok ansinipnamaba ati, yuk pera mutuku yu weik nang arye, obuka sirya kum daknamsiyake. Yuk nang yupa weik tonun nun dam olyasitinga babye, obuka sirya kum daksitinge.” Anggunce utenelulume. ‘Nunda, talye tilila ati nyan yupu ap, tenebuka arye weik yupu ap, Mesir mutuku ninye ap, duknubuka nyapdapu yupu deice arye, telebuk unamabe. Sik Asyur mutuku yu nang arye, kum opsitinge,’ tenelulume. Utenebuka nyamunya ati, ayupu nyapnusine.
Elce nunti, awinipnamsil ning ara, akunum tenilamsuka anya arye, yata deiyok ati, malye nang dam asilbalyam do? Ara, asing keten nang ap, diplamice nang kanye ati, yupu talilbanyak nang ap, ‘Aminyan yata winipnamsil do?’ tenen, asilbalulum ning ara, malye winilulume. Sik anang arye duknubuka, mur-mur anyak yupu ap, merye nyanyak yupu ap ara, yata ati kekelulum do? Nun kam tuba unyap ninye arye, akunum diamice ninye, kanye arye nyanyak yupu deice arye, aminyan winipnamsil ning ati, dipkoprob kel kiptibye do, kum do? Aning ara, kum winipmanto ati, anggunda yata ati, anggun ni koproba Allah ati, kum asilbalulum do?
Musa birye Israel ninye ati, nyabuk. Anggunda, luba kina meme. Tuba teninamlulume. Mesir mutuku arye batakuka yangalalumce, ninye kum mutuku noutamak balalumce, Yordan mek dam yanuka, keting yangalamle tam, tuba ulalum talak nirya ara, malya kibuka malye-malye winilalumce, Allah el si Yahweh ati, malye kilalumba, anggunti lik ubukba, el yu weik ulamuk. Atalak ara, Musa birye, Yordan mek otam batakuka, Yordan mek koubuka, keting wekelbalamle tam, min kum binamlum tam ati, nyapne. Anggunce Allah el si Yahweh, el yupu yaniptabuka, malye ulamsuk buk, anggun kanye talima erelalumce, el yupu kum kekelalume.
Ati dipkoprob nyapsine. Anggun wini talak ululum nang atouk, minop talak babye, anggun ni yapu arye, Allah nyapdeiamuk ning, pia kum kekelamik atouk, anggun Ruben yala nang ap, Kat yala nang ap, anggun babye kum kekelamlume. Adeice arye, malye kiplumce Allah el yupu yaniplumakarye, pia malye weik kiplume. Ati anggun babye, anggun ni yapu malye ulamik atonun anggun babye wininulume. Adeice arye Allah Yahweh, el yu ara mitik tonun aubuk bukni, wini talak ara el yu ara weik tonun tonap upliba, anggun Israel nang deice ikin ning weik tuba-tuba upmasile.
Ura anggun Yerusalem mutuku talibuka ululum ninye deiyok nang nirya ara, na yupu bisimunce, ubula don nang ap neika ululume. Anggunce ninye ati, yupu lipsisikuka bokolin talak ara, malye wininyak diparyuk, ‘Nun patasilye ning ara arepsitingopura, sik tenenyak touk, yupu lipsisikuka bokeipnuyabe,’ tenemunce, winilulume. Utenemunya deice arye, youwak kilapu ap, kwaknamne mapu kilmapu ap ati, sik ikin uplya babye, diksukum yupu kum lipsisikuka bokolilulume. Anggunda, ‘Nun patasilye touk arepsitinge’ tenen, winimunya ati nyapsine.
Na Allah Yahweh arye nyapsine. Nara anggun ni koproba Allah Yahweh unun bukni, anggunce bataknulumce, ninye koproba atibuk, ‘Sik mikip deice arye melipnamsiakca,’ tenemunce, talye tukwak nang ati, ‘Sik yuk mutuku nang aryuk, melibuka lyepsitinge,’ tenelulume. Aning atonun tenebikce nang nirya ara, narye wenebuka opnirye, kanye imun weik ning, sik deice deipnamnarya! Deiyok ara, sikce nati, diba tenena kumce, sik kanye talima noutam arye, tenibuka batakaninyake.
“Zedeikia birye, wibuka deipmokba, an dam yanuka moropkirik nang ati ara, ayupu nyapnulyame. Ara, Yehuda yala ninye nirya, sik ninye deiyoknye ubuka aninye talilulnye, el dam birumunce, anyapnusin yupu laka nyalbinamdurume. Ara, Yudea mutuku talilulnye birye, na Allah ati, ‘Se, nunti bico tenepsutumce, lyepsutume,’ nyabuka morobuknye biti, ayupu nyapdeipnamdurume. Anggunce nyapnamarum yupu ara, ani. ‘Mesir mutuku yin talin nang, sik Yudea tam unyak ninye ap, an ap, anggun melina ati yanganmongo nang ara, bisik noutamak arye tamupmakce, sik mutuku, Mesir mutuku uk, tamubuka binmake,’ nyabuka, nyapdeipnamadurume,” Allah arye nyabuk.
Nyapmasila ati, na Yeremia birye anggunti, ayupu tonap nyapsine. Anggun nirya moubuka kekepnululume! Allah Yahweh arye, anggun Yehuda mutuku tuba aululum nang nirya ati, akunum nyapmasile. Allah arye, anggunti, ‘Sikda Mesir mutuku bana kume!’ nyabuka, akunum nyapdeipmasile. Ati ara, na Yeremia birye anggunti, asum deice arye, akunum laka kibuka nyapmasine. ‘Allah arye wenebuka opsilirye, sirya daknamsilʼ tenen ati, anggunda Mesir mutuku bana kume,’ akunum nyapsine.
Atalak ara, Allah arye, na Yeheskiel biti nyapnuk, “Se, Yeheskiel, anda ninye sirika arye deipkiknye, Yerusalem mutuku noutam ati, amutuku nang yanuka, malye-malye yupu nyarurak ning ara atia. Ance aning ara, eipmalame. Tonda, sik anang arye, ‘Malye weik un ning winiptibye’ tenen, amutuku nang dam yarikirye, ‘Winipnamap, winipnamap,’ nyabuka, malye yupu ap, talye yupu ap, weik tonun nyarurake.
Na kayapu Israel nang, Babel mutuku ululum bukni, sik batakamlumba, Israel mutuku noutam, tuba unyak nang ati, nyapsine. Sikce na yupu kum kekenyakce, nati lik uplyeba, batakaninyake. Ati, anda Yeheskiel, domon yupu tonok ton, na Allah arye, anti nyapkinyeba, ance sik Israel nang ati, nyalbinulam yupu ara, ani. Na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, anggunti, winipmanto yupu deice arye, laka nyapnusine. Ara, din yun makau pum tam, mek kwebuka dikdongopmunce, amek makau ara, uku deice deipnamlume.
Israel mutuku nang ara, aminyan talak ikin uplyopura, ‘Se, sik Mesir mutuku nang, sikcuk nun ton yanuka melipsiktingce, lyepdopsitinge,’ nyabuka, tuba ton ap, pia kum moronamake. Deiyok ara, aminyan talak ara, Israel nang arye, tamubuka tenebikirye, ‘Se, nun mal olan nang yangalamik talak ara, nunce, ‘Se, Mesir mutuku nang aryuk, melibuka lyepdopsitinge,’ tenebupu talak ara, malye weik ububa anya arye, aning ara ton ap kum winipnamabe. Atalak ara, yata ning deiyok ati, ‘Mesir nang, sikce nun ton yanuka melipsululume,’ nyabuka, morolamupu do? Aning ara, walwal arye wamupube,’ tenenamake. Atalak ara, Israel nang arye, ‘Kume, Allah Yahweh elda aning-aning talibuka, deice tam erebuka, pia mikip weiknye ululeʼ tenen, nati, pia moubuka biknamniake.
Amalaikat arye, na Zakaria biti, nyapnuke. “Anda, ninye si Zerubabel dam binuka, elti, Allah Yahweh arye, nyapdeibuk yupu ara laka nyapnulyame,” nyapnuke. Ara, ance elti, nyapnalam yupu ara, ani. “Zerubabel an teleb winipnamlam ning ara, an mutuku yin talen nang, sik mikip weik deice arye, mambul pil kum dopnamlame. Aning atonun, ancuk mikip deice arye, kum winipnamlame. Aning kum bukni, na Allah Yahweh arye, na mikip weik ulul Pia Teleb, Lek Dip Kanye, el mikip weik, an deice deipkiniba, aning aryuk, narye, ‘Anye apil dopnamnile,’ tenepkise mambul ning ara, winipnamlame. Nara, Allah Yahweh, im deice unyak yin talen malaikat nirya, sik deiyoknye ununa ati, anyapmakin yupu ara, dipkoprob nong upnamlarya!
Anggunda, ‘Mesir mutuku nang arye, melipsikca deice arye, Asyur mutuku weiknye talisilya ara batakuka, elti, sirya bisipbuka yaniptibye,’ tenelul bukni, dipkoprob nyapsine, Mesir mutuku weiknye ap, el tam nang ap arye, melipsitinga babye, nati yanibuka sirya kum daknutume. Winipmanto ara, nyapnusine. Ninye banukce talak kama dunubuka balamikiba, akama ara seleplirye, el siring arye, atalipmalinye bira el taruk luklamleto, anggun Mesir nang babye wininamsiyake. ‘Mesir mutuku ninye arye, lyepnamsiyak’ tenen, sik tam kipdopmunce yupu sisikimunyopura, ikin weik unamsile. Ara, lai tace deice arye, olalulum touk, wininamsile, nyapne. Aning atonun, yata mutuku nang do nirya, ‘Mesir mutuku ninye deiyoknye Firaun birye, melibuka lyepsutue’ tenen, el deice uk sik kanye deibikirye, el tibuk tenebikcopura, aminyan talak ikin weik unamake.
Tonda anggunce ‘Yata wiripnuyap,’ teninmalum do? Anggunda Mesir mutuku yin nang arye, nun melina ati, yin nang bukni, kuda basam balye deice bukuka balamak nang ap, kuda basan arye, kirikuka tuku deice balamle ning, el si kereta kuda ap, yanuka melipsikiba, anggun Asyur mutuku nang olana ati, melipsitingopura, ‘Asyur nang obuka sirya daktibye,’ tenelulume. Bukni, Mesir nang arye, anggunti, aning nirya arepsitinga babye, nun Asyur mutuku nang ati kum obuka bisibuka sirya kum daktume. Na deiyoknye Asyur mutuku ninye deiyoknye, el amu tam pil dona deiyok nang noutamak, tonok mitang uplye ning babye, anggunce kum obuka sirya kum daktume. Anggunce nun tam nang ton, ‘Obuka kisikdopnuyap,’ tenepmasulum do? Aning ara, pia kum winiptume.”
Ati, sik malye wininyak ninye ara, bicoe. Sik donirye deipdanin yangalamik ninye arye, malye ning weik tonun winipra yangalamikce, na yupu yaniltalamnike. Aning atonun, sik mapu babye, malye-malyeuk wininyake. Na Allah Yahweh, aning-aning nirya talibuka, deice tam Weik Eitam Ununye birye, na nyanun touk unune. Nara, pia telebnye, malye una kumnye birye, Israel ninye ati, pia kalikuka melinun bukni, sikce batakaninyake. Sik nirya ara, na dam kum unyakce, nati donga aninyakce, yuk pera sukumuk unyake.
Allah arye nyapdeibukba, nabi Yesaya birye sekeipsuk. ‘Yuk mutuku nang arye olyanamsiyak talak, nun melibuka lyepnamsiyak’ tenen, Mesir mutuku nang dam morolbanyak nang ara, pia bicoe. Sikce utenenyake. ‘Se, Mesir mutuku yin talin nang ara, yuk ninye olana ati kuda basam deice bukikirye, minopce bikbik abuka bana ati, mikip dobuka banyaka anya arye, sikda weik mambule. Tonda, se, Mesir mutuku yin talin nang pia weik tonun unyake. Sik kuda tuku deice libuka banyak ning ara weik mambule,’ tenenyake. Bukni, winibuka tenenyak nang ara, Allah Yahweh aning-aning nirya talibuka deice tam ulirye, Pia Diksukumuk ulirye Israel ninye melibuka kalikilinye biti, ‘Nun ton melipsilyame,’ nyabuka kum moroninyake. Winibuka unyak ara, walwal arye wininyake, nyapsine. Allah arye nyabuk.
‘Mesir mutuku nang arye melibuka lyepsiting’ tenen, ‘Mesir mutuku binamabe,’ tenepluma ara, nong teleb ning ton dopropnamluma ati binamlum do? Tonda, ‘Nil mek kwebuka dinamap’ tenen, binamlum do? Tonda aning atonun, ‘Asyur mutuku ninye sik dam bitibirye, moroptibyeba, telebe tenepsitingopura, sik Asyur mutuku nang arye melibuka lyepsiting’ tenen, anggun amutuku binamlum do? Asyur mutuku noutamak balamle mek, ‘Efrat mek kwebuka diptibye’ tenen, sik mutuku binamlum do? Mesir mutuku ap, Asyur mutuku ap, binuka moroptuma babye, ara nong teleb ning ton kum dopropnamluma ati nyapsine. Amutuku ninye arye, kum melipsitinge.
Israel ninye tuba malyeuk ucopura, pera mutuku ninye arye yakirye, Israel ninye aik dobikce, unyak mutuku noutam nirya, yanuka wariknamsiyake. Wariksikirye, parang ya arye opnamsiyake. Wariksikirye, anyasik-anyasik nirya antanabuka, domik keil poka noutam bublan botopdeiamik ning nirya, kat yo ap, besi ning ap arye domik ning nirya, uluplopnamake. Winibikirye, sik Israel ninye ayala-ayala nirya arye, ‘Aminyan talak ara, wininamabe, wininamabe,’ tenelamak ning nirya, kum daneipnamake. Ara, pera mutuku yin talin nang arye, Israel ninye nirya malye kibikirye, sik amu tam deibikcopura, sik nong deice ikin ning deibikirye, sik tenenyak ninguk, pil donamake.
Piblisite