Yesaya 27:9 - Eipomek9 Winibuka weik tonun, Israel nang arye malye weik winilamik ning ara, namin kibukce, kum kipdeibuk. Yakub el yala nang malye weik ulamik ning nirya ara, Allah arye pera mutuku inibuka donokuka deice arye, sik malye-malye weik winilamik ning nirya ara, akunum kum kipdeibuk. Tonda, Allah arye sik minop talak isa mer si erena ati, keil pala taplakuka deiamikce, mesba moubuka kintinip deibikce, isa si erelamik ning ara, sikce buklopbukba, talye tuku deice butbuta atonun kipdeibuk. Tonda, sikce isa kil el Si Dewi Asyera, el urasin atonun puturubuka memepdeiamik ning ap, tonda ‘Isa arye nun moronyap ning moubuka kekepnamsiyakʼ tenen, isa si erenak bukni, siltong teleb ning uku dongonyakak, el si mesba dup ap, aning nirya dakuka bataklyopura, aning nirya kum kipdeipnamle. Gade chapit la |
Yesaya 27:9
36 Referans Kwoze
Anggun moubuka tenipdelulume! ‘Na tenen nang telebuk unamakʼ tenen, anggun akunum lak kina ati, narye kanye imun weik ning areamsisiba, ikin weik ulamlume. Winipmanto ara, ninye arye, dekna teleb ning perak dobuka, uku dongobikiba, uku buk arye dinmalya ani, malye wamlye ning kum danin baliba, perak pia teleb ninguk uplyopura, aninguk wibuka delilamak touk, narye ikin ning anggun deice deibuka piripdesise. Winipse bukni, uku pum tam kum dongopsise, kanye imun ninguk arepsisirye, piripdesise.
Ura, atalak ara, sik kel weik bikuka unamak nang kan-kan, ton tam nang, malye nang arye anang ati, obikcopura dipnamake. Bukni, Allah elti, dipkoprob tenebikce, el tam nang unyaka ati, adipnamaka deice arye, Allah arye anang teleb kipdeipnamle. Allah arye anang ati, malye winina ning pia kum, pia teleb nang kibuka, telebuk kipdeipnamle. Tonda, sik malye nang arye, opnamak kel weik nang ara, Allah arye anang, sik minop talak malye ulamik ning nirya ara, namin kiplirye, pia kum kipdeipnamle. Sik malye nang arye, Allah el mapu opnamak bukni, Allah el tam nang unyaka ati, aning nirya ara, sik mikip kilina ap, ‘Telebuk wininamak do, kum do?’ tenen, asilena ap ati upnamle. Ikin ning yalyeba, asilen ning ara, aminyan sirya daknamle talakuk, Allah arye aning nirya kum kipdeiplirye, el tam nang, tamubuka teleb kipdeipnamle. Tonda, Allah arye, ‘Ikin weik unamle ning ap, aning-aning nirya, kum kipdeipnamak ning nirya ap ara, atalakuk, min kum kum winipnamle,’ akunum tenebuk. Aning-aning kum kipdeipnamle talak ara, kabula. Aning ara, minop talak Allah arye, ‘Atalakuk, aning nirya kum kipdeipnamnarya,’ tenen akunum kintinip deiamukce, tenyamuk touk winipnamle.
Atalak ara, sik ninye nirya ara, sik taruk deice arye, memebuka delinyak ning, isa si eren ning ati, ‘Nun ni koproba melipnamsilarya,’ kum tenenamake. Tonda, atalye ning si erena ati, mesba-mesba moubuka deibikirye, kam ning obuka, uku dongolamicak, ton kum tenenamake. Sik taruk arye memebuka deiamica nirya ap, siltong teleb ning, isa ati uku dongonyakak ap, tonda isa si Asyera, aisa kil el urasin atonun memebuka deibikirye, si erenyak ning babye, tuba diba tenebuka kum unamake.
Aning ara, talye ati kum nyapne. Deiyok ara, Allah arye bico tenebuka, el kanye delilul ninye nirya ati ara, ‘Teleb wininamak do, kum do?’ tenen, asilesilirye, wenebuka peteresulula ati nyapsine. Tonda, Allah arye, ‘Na mi ani’ tenen, dololulnye biti ara, malye upliba, wenebuka ikin ning arilule. (Amsal 3:11-12)
Yesus arye, “Anggun malye ning ani,” nyabuka yupu lipsisikuka bokeipsilirye, nun nong deice ikin ning delisilya ara, ‘Na mapu ati, wini talak yupu bokipnirye, wenepyopura, aminyan talak ara, Allah arye, talyeukirye dib kum tenenyak ninye nirya ati, yupu lipsisikuka bokuka weneplirye, oplopnamle talak ara, na mapu ap tabakuka, Allah arye, kum oplopnamle’ tenen, wini talak Yesus nimalye arye, wenesulule.
Atalak ara, atam mutuku nirya, na Allah, mikip weik deice arye, isa si erenyak ning nirya ara, kiliplopnamne. Winipnyeura, ninye nirya arye, aisa si nirya, tamubuka tonap, pia kum bikinamake. Lubakinuk unamake. Tonda, yuk nang arye, ‘Na Allah arye nyalul yupu, laka nyana deiyoknye, nabi unune,’ nyabuka nyanyak bukni, sik anang ara, isa siuk erenyake. Anang ap, isa nirya ap ara, amutuku nirya, narye yaknamne.
Ati ara, anggun Israel ninye ati nyapsine. Anggunce talye ning memebuka deiamlumce, aning si erelamlum ning ara, bataknamlume. Atalye ning arye, anggunti kum melipsitinge bukni, naryuk anggun patasilye ning melibuka aresunune. Winipmanto ara, kwarang yo tiklirye, bok teleb ubuka, sulum-sulum alamle atonye bira, na unune. Tonda lemon yo duk aketing tamun, aketing tamun duk mounauk ulamle touk, upnin banamsine. Ati, narye anggunti, pia melinamsine. Wininamna ati, anggunce nati, ‘Elcuk aning-aning nirya ara, Allah elcuk melinamsile’ tenen, na siuk erenamnululume. Na Allah Yahweh arye nyapsine.
Aning atonun, anggun anang kan-kan nirya arye, na yupu ati, ‘Nun like. Aning kum winipnamabe,’ tenenyak nang ap, na yupu yanibikce yu nang nirya ara, sik ninye asik nang atonun unyak kan-kan arye wibuka, dopnirye, Israel nang unyak mutuku dam deipnamne. Sikce nati, ‘Nun lik,’ tenenyak nang ara, tiya talak ati, na dam deipnamne bukni, sik anang ara, Israel yala nang aminyan talak unamak mutuku noutam ara, pia kum binuka unamake. Anang ara, wenepnirye, yakdonoknamne. Winipnyeura, anggun tuba aunamlum Israel yala nang arye, nati, ‘Se, nun ni Allah ara, dipkoprob Yahweh ulule. Elda dipkoprob tonokaʼ tenen, biknamnulume.
Anggun yuk-yuk pera mutuku noutam arye, boyasinirye, tamubuka asukumuk, akunum deipnyopura, anang nirya arye, Yerusalem mutuku nirya ara, tuba tamubuka, teleb kilinamake. Ara, amutuku dam akunum tamubuka yakceura, anggun atam ululum nang arye, ‘Nun ni ani’ tenen, talye ning talibuka, si erelulum isa ap, isa si erena ati, memebuka deiplum ning ap, sik aik ap, sik patung ap, pia malye yupu nyalulum ning ap, yu kanye bolulum ning ara, kum kilinamake. Ara, na Allah arye, ‘Aning nirya ara, na pia lik,’ tenenun ning nirya ara, atalak yanganyak nang arye, aning nirya obuka, sice buklopnamake. Sikce aning nirya ara, adiparyuk bataknamake.
Allah Yahweh el mikip deice arye, el mapu koproba, sik Israel yala kilapu ara, sik malye winilamik ning nirya ara, mek likna atonun kibuka, amalye ning kum kipdeipnamle. Winiplirye, pia teleb kipdeipnamle. Tonda, atalakuk, Yerusalem mutuku weik asik pum tam, ninye weik olamika deice arye, ining weik uamuk ning ara, mek likdeiplyeura, telebuk upnamle. Winipnamle ara, ninye yupu bokeiplirye, malye winin ning nirya, kum kipnamle talak ara, weik uku arye, talye ning diproplirye, sice bulamle touk upnamle. Winiplyopura, amutuku ara, pia telebuk upnamle.
Ninye arye, malye winibikiba, ninye deiyok nang arye, sik nong deice wenena ning weik deibicopura, adeice arye weika arye kel bikinyake. Sik min arye malye ninguk talibuka winilamice ning batakanyake. Wenena deice arye ninye talima teleb kililule. Aning atonun, ninye ton malye winin ninguk winibuka ululnye bira, deiyok nang arye, tomobuka wenepra ikin ning weik, sik nong deice delinyake. Winibicopura, amalye ninguk talibuka ululnye, kel kiplirye aminyan talak telebuk unamle. Deiyok nang arye, elti, wenenyaka deice arye, el talima pum tam tenelamlye, malye ning nirya ara, kum danapnamle.
Dipkoprop malye weik winilamse ati, ance nati, wenepnulumce, ikin ning weik, na nong deice deiamnulum bukni, winipnuluma deice arye, ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu nirya ara, moubuka bikamse. Ati, ikin ning arepnulum ning ara, teleb kililamnuke.
Aninguk kum bukni, sik Babel mutuku yin talin nang, winibik ning ara, Yerusalem weik asik keil poka dobuka aknapdongomik ning ara, uluplobik. Tonda, Allah Yahweh, el si eren ati domik aik ap, tonda, amutuku ninye deiyok nang nirya, sik un aik nirya ap, tonda weik mambul ning, ninye deiyok nang, sik ulamik aik nirya ap, tonda amutuku noutam tuba awamuk dekna teleb ning nirya ap ara, dakuka batakik.
Yosia birye, ‘Winiplulume,’ nyapdeibukba, el pil melibuka don nang arye, Bahal si erena ati, kam ning opnarye, uku dongolamikak nirya ap, aning deice tam deiamik siltong teleb ning danak ati, kintinibuka delilamik ning ap nirya ara, ulubuka batakikce, mitik tonun kapak ya arye, sekuka batakik. Tonda, isa si Asyera nyabuka, el si erena ati, cang yo iklamik ning nirya ap ara, lokuka batakukce, teikuka kum kipdeibik. Aning atonun, aisa mer nirya ati, “Nun ni,” nyabuka, si erelamik ning nirya babye, ninye urasin atonun kibuka memebuka deipnarye, si erelamik ning nirya babye, Raja Yosia birye nyapdeibukura, el mapu ap, sik nirya arye, aning ulubukabikce, kum kipdeibik. Winibikba, aning sakuk ning ara dobuka, aning ati si erelamik nang bukni, akunum diamik nang, sik nong weilamik tuku deiceuk yamupdeibik.
Allah diba tenena kum nang arye, isa si erena ati, mutuku kon deice arye, isa si erelamik asik nirya ap, isa ati morona ap, si erena ap ati, siltong teleb ning uku dongonak nirya ap, dakuka, sice buklobukce, kum kipdeibuk. Amalye ning nirya ara, Yehuda mutuku arye loplubuka, yuk karin mutuku deibuk. Winibuk ati ara, el Asa birye Yehuda mutuku talebuka ulamuk talak nirya ara, amutuku noutam nirya, yuk mutuku nang olana kumce, namin aryuk ulamik.
Nebukadnesar birye, Yerusalem mutuku yayukce, Allah el si Yahweh, el si eren aik domik ning ara, uku dongobuk. Tonda, Yehuda tam ninye deiyoknye el weik aik ton uku dongobuk. Aning atonun, Yerusalem mutuku noutam anyaik-anyaik dolamik ning nirya ton uku dongobukba, anyaik nirya uku dibukce kum dayuk. Aninguk kum bukni, Yerusalem mutuku weik aik nirya uku dongobuka sirya dakik. Tonok ning babye, kum batikik.
“Anya arye aning ara, winina kum bukni, anggunce amutuku bimunce sik Isa Mutuku Dongonye, el si Asyera, el si erena ati dobik aik ap, yo deiyok iklamak ning ap, kam ning obuka, Isa Mutuku Dongonye arena ati, keil pala dobuka, pala keil bulubuka yakdeibik ning ap, tonda, sik isa si erena ati, puturubuka delilamik ning nirya ap, weplopnalulume,” Allah arye nyabuk.
Aning atonun, anggunce mutuku kon deice memebuka deiplumce, anggun ning nirya bobuka, mutuku kon deipmunce, isa si erena ati, uku dongolulumak nirya ara, narye uluplopnamne. Tonda, isa si erena ati, kin-kin tong ning dobuka, uku dongolbalamlumak nirya ara, dakuka uluplopnirye, kum kipdeipnamne. Winipnyeura, isa si erena ati, weilbalamlum ning, anggun si eren ning nirya ara, sik nong nirya dakukapnirye, donoknamne. Anggun ton oplopsinyeba, dipmunyopura, anggun nong dopropnirye, anggun talye ning si erelulum ning ap, isa si erena ati, memebuka delilulum ning, el si patung ap, dakukapnirye, adeiceuk, anggun nong dobuka, adeice deiplopnamsine. Na kanye talima noutam ara, pia malye weik winilulumba, na lik unulule ati, dukmanto kanye unirye, aning nirya ati ara, ‘Anang ap, aning ap nirya ara, na like,’ tenenune.
Amutuku binuka wekmunye talak ara, amutuku unyak ninye arye, ‘Isa si erepnamap’ tenen, pala keil lelebuka yangapdeibikirye, kam ning obuka, Isa Mutuku Dongonye ati arinyak sukum ap, ‘Isa asukum ulul’ tenen, cang keil tikilinyak sukum ap, Isa Mutuku Dongonye kil, el si Asera, el si erena ati, cang yo ikilamice sukum ap, ninye urasin atonun puturubuka deibikce, si erenyak patung ap, aning-aning nirya daklopmunce, uku dongopmunyopura, amalye ning nirya sirya daknamlume. Amutuku ninye arye, talye ning ati, si erenyak ning nirya binuka obuka, sirya dakuka, sik si kiliplopmunce, kum daneipnamlulume.
Ara, anggunce isa si erena ati, kam ning obuka uku dongolulumak, el si mesba-mesba ap, tonda, ‘Nun moronyap yupu kekenamsiyakʼ tenen, anggunce siltong teleb ning dobuka, uku dongomunyak babye, uluplopnamake. Tonda, adiparyuk anyaik ap, auku dan kata ap, nirya ulubuka bataklopnamak talak aryuk, isa si erenak unamak nang nirya babye, aisa si erenyakak urasin dinmakce tamuk, anang obuka sirya daknamake.
Tonda Raja Yosia birye winilamuk. Amutuku nirya isa si erelamik ning uluplobukce, isa si Asyera si erena ati, ikamik cang yo nirya weblobuk. Tonda, sik isa si erelamik nang arye, talilamik keil, akeil talibuka sik isa sisibuka si erelamika nirya Yosia birye, dobuka teikuka batakuk. Winibukce, atue kiplobuk. Aning-aning si erelamika nirya ara, ninye yok uk yamubukabukce weik ubuka langdibuk. Winyamukce ninye yok uk erelamuk. Deiyok ara, ‘Amutuku-amutuku nirya ara, tuba tonap, ninye yanuka isa si kum erenamak’ tenen, winibuk.
Anggunce, ‘Nun ni koproba ani,’ tenen, kam kum ulul ning, isa si erena ati, isa urasin atonun puturubuka deipmunce, si erelulum ning nirya ara, malye kipdeipmunce, donoknamlume. Ara, aisa si eren ning patung-patung ara, sik bol deice ara, urasin pia teleb dekna weik ning, el si emas ap, tonda perak ap arye, taplakuka deipmunce, si erelulu ning ara, pia malye kipdeipnamlame. Ati, anggunce, ‘Aning ara pia malye ning,’ tenepmunce, aning dobuka donokmunce, “Sik isa ap, patung ap ara, nun dam pia kum deipnamabe. Sik isa mer nirya ara nun dam batakuka yukak bilulume” nyabuka, donoknamlume. Kwalye bok boyanuka, pia malye ning kilipmunce, bai tam donokolulum touk, aisa si eren ning babye, bobinuka yukak donoknamlume.
Yerusalem mutuku unyak ninye nirya ati, teleb yupu lamapdongobuka arye nyapnamlulume. Anggun malye-malye weik ulamlum ning ara, anggun wenena ati, ikin ning anggun nong deice delilamsisiba, wini talak ara, akunuma. Anggun malye winilamlum ning dekna ati, akunum arelamsise ning ara akunuma. Nara Allah, na si Yahweh arye, anggun malye winilamlum ning wenena ati, ikin ning weika arye anggun deice delilamsise. Tonok malye ning ati ara, wenena ning like bitinye deice arye arelamsise. Bukni aning nirya ara akunuma. Winipmanto ara, ninye arye malye winibikiba, wenena aik pum tam dongobikiba, daulamikca ani, wenen talak akunum kiplyopura, loltaklamak touk, anggunti lyepsinirye, ila tuba tonap, tamubuka teleb kipdeipnamsine.
Tonda, asing keten nang arye dibilamice ninye, sik kanya elilamak ning nirya ara, narye kum kipdeipnamne. Asing keten nang nirya oplopnamne. Aning atonun lengdar mabikirye, eipmace ning ati, nyabikiba, “Dotalak ara, winipnamkile,” nyabuka, talye laka nyanyak nang nirya babye, pia oplopnirye, kum kipdeipnamne.
Piblisite