Aning nirya ara, anda Asyur mutuku nirya talibuka, ninye deiyok kibuka taliminye bira, anti opnamkiak ning ara, yatato ning deice arye, kwetebuka teleb kipdeipnamting do? Kume, aning ara, kum winipmanto. Tonda, an suse dilamkiliba, dila sakanamkil ning babye, pia kum kweteipnamkitinge. Dipkoprop dipnamlama atia. Aminyan talak ninye arye, ‘Kume, sik Asyur mutuku nang ara, sik mal olan nang arye, akunum obuka sirya dakmake,’ nyabuka, laka nyabikiba, yuk-yuk mutuku nang nirya arye, ayupu kekebikcopura, adiparyuk kanye deibuka, sik taruk tatang obuka, pin-pin kanye pia deipnamake. Deiyok ara, sik yuk-yuk mutuku nang nirya ara, sik Asyur mutuku nang arye, malye winilamluma ara, batakna kum deice arye, sik kanye imun weik, kanye bobuka ulamika ati, anggun mal olan nang arye, anggun Asyur nang opsikirye, sice buklopsikcopura, sik yuk-yuk mutuku nang nirya arye, ‘E, merekuka obuka sirya dakmakeʼ tenen, kanye pia deibikcak arye, sik taruk tatang boknamake.
Yesaya 27:7 - Eipomek7 Anggun tenipdelulume! Allah el mapu koprop ati ara, pia ikin deice aryuk wenebuk bukni, sik mal olan nang ati, mitik tonun aryuk wenebuk tenepmalum do? Kume, aning kum winibuk. Tonda, Allah arye Israel nang, sik mal olan nang obuka sirya dakuk touk, elce el mapu koprop Israel nang ati, weik tonun obuka sirya dakuk tenepmalum do? Kume, aning ton kum winibuk. El ti, ‘Nun like,’ tenenyak nang ara, pia ikin weik tonun wenebuk, tonda wenepnamlarya. Allah el mapu ara, wenelul bukni, pia kum obuka sirya daknamle. Gade chapit la |
Yesaya 27:7
17 Referans Kwoze
Aning ara, dipkoprob Allah Yahweh arye, ‘Winipnamne,’ nyabukce, anda Asyur mutuku weik deiyoknye biti, akunum nyapdeibuk. “An ap, ance taliminye nang ap, nirya ara, anggunce anggun mutuku noutam unamak nang arye, deibikceura, dadeipdanin yanganamak nang ara, pia kum kipdeipnamne. Anggun mapu ton kum deiplum ati, anggun noutam ara, anggun si babye ton, kum kipnamle. Tonda, anggun mutuku nang arye, ‘Nun ni,’ nyabuka, talye ning ati, si erenyak isa mer ap, aisa si erena ati, patung-patung memebuka delinyak ning nirya ara, narye obuka, sice buklopnamne. Winipnirye, sik isa si eren aik pum tam nirya ara, aning nirya kum kipdeipnamne. Tonda, Asyur mutuku noutam ara, ninye dibikiba weinamakak ara, na Allah aryuk, sik opnirye, sik nong weinamakak ara, kintinip deipnamsine. Winipnamna deiyok ara, anggun Asyur mutuku nang ara, pia malye-malyeuk ululume. Narye, anggunti, ‘Daupmalye, sikda na like,’ tenesinya ati, anggun nirya kum kam unamlume!” Allah Yahweh arye nyabuk.
Allah Yahweh arye nyabuk. “Ara narye Babel mutuku noutam unyak nang, sik malye weik winilamik touk, dengna ati opnamne ning ara, anggun babye biknamlume. Tonda, sik Kasdim mutuku ulamik nang aryuk, Yerusalem mutuku noutam ulamik nang ati, malye kililamikce, olamik. Sik Babel mutuku nang arye winilamika ati ara, sikti, wenepnirye opnamne. Na Allah Yahweh arye nyapmasina ati, aning ara dipkoprob nong upnamlarya!
Ura, min talak narye Sodom mutuku ap, Gomora mutuku ap, sik dana-dana tam ulamik nang ap, tonda sik amutuku-amutuku nang arye, taleamik ning ap, amutuku asik nirya ara, kum daneiamsise touk, Babel mutuku nang babye atonun, kum daneipnamne. Winipnyopura, Babel mutuku noutam nirya ara, aminyan talak yuk nang ton yanuka, amutuku noutam pia kum unamake. Kwaning patanauk upnamle. Ati nara, Allah Yahweh arye, akunum nyapdeipmasina ati, aning nirya ara, dipkoprob nong upnamle!
Bukni, asum ara, lukunyan talak ara, anggun mutuku yanamak yin talin nang ara, anggun mutuku tuba ulamice talak ara, sik anang dam ara weik ilil un ninguk winipbikceba, sik ilil weik upnamle. Bukni bereklyeura, sik ayin nang nirya akunum kum kipdopnamle. Awinipnamle ning nirya ara, nun ning alubuka dolosinyak nang, Allah arye sik deice deipnamle. Tonda, nunti, sice buklopnamsiak nang ara, Allah arye sik nong deice weik kanye ikin ning arepnamle.
Ati ara, Damsyik mutuku nang arye, ninye deiyok kibuka taleamikce nang ara, kum kipnamle. Winipnamneʼ’ talak ara, Efraim mutuku noutam arye, ‘Nun mal olan nang olyasicak tenen, weik kat keil arye cang poka dobuka ulamice mutuku babye, narye lo arepnyeura, yu yin nang arye aning nirya dakuka sice kiplopnamake. Sirya tam mutuku noutam unyak nang ara, pia weika arye oplopnamak bukni, amutuku tuba kam unamak nang ati, yuk nang eibikirye, ‘Se, sikda mitang nang unyake. Sikda mambul pia kume,’ nyabuka, malye nyanamake. Sik Siria mutuku nang ara, yuk Israel yala nang ati, akutubuka malye nyanyak touk unamake. ‘Aning ara, dipkoprob winipnamle, talye kum nyapne, biknamlumʼ tenen, na Allah Yahweh aning-aning nirya talibuka deice tam erebuka, mikip weik ununye birye akunum nyapdeipse. Nara im deice yin talin malaikat nirya, sik deiyoknye unune.
Raja Asyur bira utenebuka nyalul bukni, Allah ara, aning-aning eitam erebuka, mikip weik ululnye birye, tamubuka nyapsile. Na tenepse ning, Sion mutuku deice ap, tonda Yerusalem mutuku weik asik noutam unyak nang ap, sik wenena ati akunum wenepnirye opnyeura, naryuk tamubuka, Asyur mutuku talibuka ulul deiyoknye, Raja Asyur biti, weik arye wenepnamne. Ara, anye birye, el kanye eren deice arye, dipdanuka kwaliplyak arye, yupu weika arye nyalula ati, narye ikin weik ning dobuka, el nong deice deipnamnarya!
Allah arye, sik Israel yala nang ati, dirina atonun, kiplya deice arye sik melilule. Elda, sik Dirina Deiyoknye ulul bukni, aminyan talak ara, weik uku buk atonun upnamle. Allah ara, pia dipkoprob ululnye bukni, aminyan talak ara, yu weik upliba, elda weik uku buk atonun upnamlarya. Weik uku buk dilamle touk uplyopura, tonok sum arye, atalye palamle tace ning nirya ap, mutmuta nirya ap ara, el uku arye, atalye ning nirya dibuka, sirya dakdopnamle.
Winibuka yangaliba, sik Asyur mutuku unyak nang ara, Allah el yupu weik nyapliba kekebikcopura, ilil weik upliba sik yok sirimtalipnamle. Sik amutuku nang ara, Allah Yahweh arye, el kama taliplirye, sikti, weik tonun wenebuka opnamle talak ara, sik ilil upliba, talima daksaknamle. Winipnamle ning nirya ara, sik kel biknamake.
Asyur yu weik nang arye obuka sirya daknamsiyak bukni, aminyan talak ara, narye arepneba, yuk mutuku nang arye, amutuku nang babye obuka sirya daknamake. Bukni, Asyur mutuku nang nirya opnamak ning ara, talye tukwak ninye arye, parang ya dobuka olbalamaka atonunuk kume. Parang ya dobuka Asyur mutuku yu nang obuka sirya daknamak bukni, aning ara, talye ninye arye kume. Ara, na Allah mikip deice arye aninye wenebuka oplopnamne. Yuk nang unyak bukni, ‘Se, olyanamasiyake,’ tenebikirye, ilil weik upliba, Asyur mutuku nang nirya adiparyuk, ‘Lyepdatibye’ tenen, bai sakuka bikbik abuka bindopnamake. Winipnamak bukni, sik yuk pera mutuku nang arye, obisibikirye, tapu koubuka sik mutuku tamubuka bobikirye, Asyur mutuku wel nang nirya ara, sik anang amu tamuk deibikiba, sik talye pil melin nanguk unamake.
Asyur mutuku yu nang obuka sirya daknamne talak ara, yin talin nang sik deiyok nang nirya, ilil weik upliba, kwarabuka bikbik abuka bindopnamake. ‘Yuk mutuku nang arye, kum opnamsiyake’ tenen, domik keil aik nirya ara, batakuka bindopnamake. Tonda sik yin talina deiyok nang nirya arye, sikti, olyanuce nang bendera eibicopura, weik ilil upliba, sik ning nirya batakuka, bikbik abuka bindopnamake. Na Allah Yahweh arye ayupu nyapmasina ati, aning nirya pia dipkoprob upnamlarya. Na Allah ara, na weik mambul uku Sion mutuku noutamak tuba pakalule. Tonda, na weik mambul winira, Yerusalem mutuku noutamak tuba pakalule. Allah arye nyapdeibukba, nabi Yesaya birye sekeipsuk.