Yesaya 27:12 - Eipomek

¹² Allah arye tenyamlye talak akunum uplyopura, Allah arye, ‘Na mapu koprop, Israel yala nang ara, wibuka dopropnamneʼ tenen, keting kumulbalamle tam, Efrat mekin arye dipdongobuka, keting panalyangan tam banmoka ani, osirya tam Mesir mutuku wililongonak unyak nang nirya dipdelirye, malye ning batakuka, el mapu koprop Israel yala nang ara, tonok-tonok kibuka biyik nang ati, sik dobuka, amutuku tamubuka delilyanamle. Sik anang ati winipnamle ning ara, winipmanto atia, gandum duk teleb ning wibikirye, el kala wibuka koltakalamak touk, kala koplobuka wipnamle.

Yesaya 27:12 Referans Kwoze

Kejadian 15:18

Atulum welenmok makau ap, uku buk ap noutam bisik biyukce, asum aryuk Allah el si Yahweh arye, Abram biti, “Dipkoprop winipnamkine,” nyabuka nyalin yupu nyapdeibuk. Allah el si Yahweh arye, nyalin yupu nyabuk ning ara, ani. “Abramo, ance deipminba, dadeipdanin binamak mapu, an mapu nirya ara, aunmalam mutuku nirya arepnamsine. Ara, Mesir mutuku noutamak weik balamle mek arye, dukdongopbuka, pera otam weik balamle mek el si ara, Efrat mek ap, danoutam mutuku nirya ati nyapkine.

Yesaya 56:8

Aning ati ara, na Allah Yahweh arye, aning-aning nirya talibuka, deice tam erebuka, Pia Mikip Weiknye ununa ati, aning nirya tenepnye touk wininuna ati, dipkoprob aning nyapmasin touk, kunupnamlarya! Na Allah ara, Israel yala nang, sik mutuku koproba noutam arye bobuka, yuk pera mutuku bobinuka deiamikbuk, narye tamubuka dopnirye, asukumuk boyanamne. Ton ninye ara, akunum dobuka, asukumuk tamubuka delilyase. Bukni, aninye bobuka yanirye, na dam deipnirye, sirya daknyopura, yuk ninye babye bulubukapnirye, tonok kentinip deipnye sukumuk deipnamnarya! Ara, sik min talak akunum boyase ninye ap, aminyan talak boyanamne ninye ap ara, ansinibuka tonok kipdeipnyeba, teleb ubuka neika unamake. Aning nirya ara, Allah arye sik Israel ninye ati, laka nyabuk.

Nehemia 1:9

Bukni, winipnamsina babye, anggunce tamubuka na dam yamunce, narye, ‘Aning ara wininamlulume, aning ara kum wininamlulume,’ nyapse atonun kekebuka winipmunyopura, yuk mutuku nang arye obisipsikirye, pia yukak bobinamsitinga babye, anggun kwit capu mutuku sirya, im sirya, daunamting nang babye, narye bulubuka, tonokak deipnamsine. Ara, ‘Aunamlume,’ tenen, wibuka kintinip deiamsisak uk umunce, na si erenamnulume. Ara, ‘Na si asukum unamle’ tenen, ‘Kintinipse mutuku ati nyapsine,’ nyabuka, nyapdeipsulum yupu ati nyapkine na nio.” Nehemia birye nyabuk.

Yohanes 10:16

Adomba poka pum bisik na domba basam aunyak bukni, na talinun domba weik ton, yukak ton unyake. Apoka pum bisik kum unyake. Adomba basam babye, na adiparyuk dobuka boyanganamne. Adomba babye, na yupu nyabuka yukupnyopura, na yupu kekebikirye, na dam yanganamake. Sik ton akunum yakcopura, domba basam yupa tonok ansibikirye, neika unamake. Nara, sik weina deiyoknye tonok pia unamne.

Yohanes 6:37

Yata ninye do nirya, na ni koprop Allah arye arinilye ninye nirya ara, nati dib tenepnikirye, na dam yanganamniake. ‘Elcuk lyepnamsil’ tenen, na dam yanganamniyak ninye nirya ara, ‘Sikda na lik,’ nyabuka kum batakanamne.

Lukas 15:4

“Anggun kanye ara, yata tenepmalum do? Tonoknye bira, el domba basam 100 ulamiceura, tonok ning dem, yukak banmalya ani, tunimaplyopura, domba basam 99 ning abatakuka tunimap malye ning ati, elbalul do, ‘Dawaplye’ tenen, batakalul do? ‘Kume, tunimap malye ning eipnun’ tenen, epnin banmalya ani, eiplyopura, ‘Akunuma eipmane,’ tenelule.

Amos 9:9

Nyabukce, ayupu ton dukdongobuka nyabuk. “Ayupu nirya ara, narye urdem ati, kum nyapsine. Deiyok ara, na Allah arye anggun Israel ninye wenena ati, yupu nyapdeipnyopura, yuk pera mutuku unyak yu ninye yakirye, anggunti opnamsiake. Winipmanto ara, ninye arye, gandum duk wina ati, ‘Teleb ning ara, tukwak saknamle, bukni, malye ning ara, kumanya arye bobinamle’ tenen, gandum duk wilamak touk, narye na mapu Israel ninye ati, ‘Teleb ninye dan do, malye ninye dan do?’ tenen, wipnamsine. Yu nang yakirye, obuka sirya daknamsiyaka deice arye, anggunti wenepnamsine. Awipnamne talak arye, teleb ning nirya wipnirye, malye ning ara bataknamne. Bukni, teleb ning ara, tonok ning babye, kum kum danamle. Teleb ning ara, lyepnamnarya.

Yeremia 3:14

Allah Yahweh arye nyabuk. Se, na mapuo, anggun nirya pia malye ululum nang, tamubuka na dam yanamlume nyapsine. Anggunda ‘Naʼ tenen nang ululume. Narye Anggunda tamubuka boyanamsine. Ara, weik asik dobuka unyak mutuku noutam arye, ninye tonok ton dopropnamne. Tonda, tonok yala nang ulamikak arye, ninye bitinye nang dopropnamne. Winipnirye tamubuka, Sion mutuku konuk yanuka bodeipnamsine.

Yesaya 17:6

Atalak ara, sik Siria tam noutam unyak Israel yala nang ara, mitik tonunuk unamaka ati, Winipmanto ning ton nyapnusine. Ara, gandum duk akunum libikce talak ara, duk mitik tonun ton tukwak saklamle touk upnamake. Tonda, zaitun yo duk mouamlyak, weik tam dakdobikirye, ayo deice tam yo duk sirik ning bataklamaka touk upnamsiake. Ayo deice tam ara, yo duk bitinye atonun, winilye atonun tuba ulamle touk, atalak ara Siria tam mutuku noutam ara, Israel yala nang mitik tonunuk batakikceura, tuba kam unamake. Weik kume. Aning ara dipkoprob upnamle ati, nara Israel yala nang, anggun ni koproba Allah Yahweh arye akunum nyapsine.

Mazmur 72:8

Na ni Allah, ance nun ninye deiyoknye ati, melipminya deice arye, elda ninye deiyoknye Raja kibuka, talinamle talak arye, talinamle mutuku ara, keting yangan tam arye, dipdongobuka, keting wekelban tam nirya ap, talipliba, lo weik unamle. Ara atam, weik laut mekwen dam arye dipdongobuka, otam laut mekwen tam nirya ara, elce talinamle. Winipliba, anoutamak nirya ara, pia weik mutuku unamle. Aning atonun, keting yangan tam biyuk weik mek, el si Efrat mek dam arye, dipdongobuka, keting wekelban tam nirya ara, mutuku-mutuku nirya, ‘Ance melipminba, elcuk amutuku nirya talinamle’ tenen, moropkine.

Mazmur 68:22

Ati nun kele. Allah arye, elti, ‘Nun like,’ tenenyak nang nirya ara, sik kisok deice teikuka oplyeba, dibikceura, sirya daknamle. Diba, sik malye un ning tuba talikirye, malye-malye tuba wininyak nang nirya ara, Allah arye anang obuka, sirya daknamle!

Yesaya 49:5

Allah Yahweh arye, na min kum deiamnirik talak arye, ‘Na pil donamle’ tenen, wepdeiamnuke. Ara, Allah kanye deiamnukce, ‘Na pil melilamnuknye birye, na mapu Israel ninye nirya bulupdeipliba, sik nirya tamubuka na damuk yanamak’ tenen wiamnuke. Allah Yahweh arye, ‘Na pil melinamnilnye, ninye arye el si erenamak’ tenen, weik si sisibuka wepdeiamnuke. Na mambul pil donuna ara, Allah el mikip deice aryuk meliniliba apil donune. Ati, elda na melibuka mikip kilina deiyoknye unulule.

Yeremia 44:28

Bukni, sik ninye mitik tonun, kum dipnamak bukni, sik anang Mesir mutuku arye tamubuka, Yehuda mutuku noutam, sik mutuku koproba uk, binuka unamak nang ara, mitik tonunuk, tamubuka yanamake. Winibikcopura, atalak arye, sik Yehuda yala nang ara, moubuka biknamake. Ara, mince Yehuda mutuku batakamikce, Mesir mutuku yanuka ulamik nang ara, sikce nyalamik yupu nong akunum upmal do? Akumopura, na Allah arye, nyamsise yupu ara, nong akunum upmal do?’ tenen, ayupu teneipdekirye, biknamake.

Yehezkiel 20:34

Wini talak ara, anggun Israel nang ara, yuk-yuk mutuku nang noutam ansinibuka ululum bukni, aminyan talak ara, na pia mikip deice arye winipnyeba, anggun nirya bulubuka boyanamsine. Ara, na taruk mikip ap, na yu weik upmanilye deice arye, anggun nirya bulubuka deipsinirye, ila tamubuka bobuka, anggun mutuku koproba yanuka, bulubuka deipnamsine.

Yehezkiel 20:41

Narye anggun bobuka, pia teleb sukum deipnamsin talak ara, min talak anggun bai sakuka, yuk-yuk mutuku dana-dana tam, dabinamlum mutuku noutamuk, dobuka boyanamsine. Winipnamsin talak ara, anggunda yata mutuku, im sirya, mutuku sirya nirya noutam arye, yuk-yuk yala nang, kanye wisibuka unamlum noutam arye, anggun dobuka, Israel koproba tam, boyanuka bulupdeipnamsine. Anggun Israel nang nirya bulupdeipsinyeba, unamlum mutuku noutam, akunum umunyeura, na kanye deipnamsine. Winipmanto ara, ninye arye kam ning obuka, uku dabikceba, uku buk arye, meta ap, tup ap, diplyeura, nintong teleb ning welepnirye, ninye nirya kekebikirye, weik tonun kanye deilinyak touk, narye anggunti, kanye deibuka dopropnamsine. Ati, amutuku dana-dana tam unamak nang, yuk yala-yala nirya arye, anggunti eibicopura, biknamake. Ara, ‘Se, Allah el pia teleb ulula ara, anggun anang anggun talima noutam babye, akunum deibuka ati, sikce pia teleb akunum deibuk. Ati, Allah elda pia dipkoprob telebnyeuk ulule. Elda pia teleb leknye ulule,’ tenepnikirye, moubuka biknamniake.

Yehezkiel 39:25

Ati ara, nara Allah Yahweh, aning-aning nirya talibuka, deice tam erebuka, pia mikip weik ununye birye, ayupu nyapsine. Wini talak ara, narye sik Israel yala nang, sik pununanye Yakub birye deiamukba, dadeipdanin yangalamikce, aunyak nang ati, bico tenenamne. Winibuka tenipnyopura, anang mince pia teleb ulamik touk, tuba ton ap teleb kipdeipnamsine. Tonda, Israel yala nang nirya ara, sik malye ulamik ning ati, adiparyuk sik dekena ati, wenebuka optinirye, sirya dakmatinye bukni, aning kumce, bicoe tenepnirye, sikti, tuba tonap telebuk kipdeipnamne. Sik nirya ara, telebuk unamake. Tonda, ‘Tukwak nang arye na ap, na si ap ati, malye nyapninyakʼ tenen, na pia teleb ununa ap, na pia lek si ati, moubuka tenipnirye, kaliknyopura, sikce na si ati malye kum nyapnamniake. Na siuk pia erenamniake.

Yehezkiel 47:19

Ura, Tamar mutuku arye, iknapye tam (arah selatan) arye, wililonak arye dipdongobuka binamunya ani, keting komulban tam (arah barat) dabinuka wilipdopnamlume. Asik domik ning ara, Kades-Meriba mek pu arye, dipdongobuka wilibuka binamunya ani, minop talak mek balamukak bukni, akunum diprobuk dam arye dipdongobuka epdamunyak arye, dabinuka wilipdopnamlume. Anyapce, weik laut mekwen, keting komulban tam uamuk ning, el si Laut Tengah (Mediterania) Mesir mutuku damuk dipdongobuka wilipdopnamlume.

Zakaria 8:7

Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Na adiparyuk, na mapu koproba, Israel yala nang nirya ara, sikti, lyepnamne. Ara, minop talak yu nang arye, sik yuk-yuk dabinuka deiamikba, wini talak daunyak mutuku noutam nirya ara, tamubuka boyanirye, Yerusalem mutuku noutamuk deipniba, asukumuk unamake. Ara, keting palanyangan tam ap, keting kumulban tam ap arye, tamubuka boyanirye, asukumuk deipnamne. Winipniba, sik Israel yala nang nirya ara, na mapu koproba kibuka unamake. Nara, sik ni koproba, Allah pia ati unamne! Winipniba, nara sik ni koproba Allah unamne. Wininamne talak ara, naryuk na mapu koproba ati, kanye deipnirye, pia kum bataknamsine. Narye, “Winipnamsine,” nyapnye touk, dipkoprob winipnamne! Sik nirya ara, kanye deipdakirye, teleb kibuka diksukumuk unamake.”

Yosua 15:4

Tonda, Hakrahim tam arye, dipdongobuka, Asmon tam biyik nang ara, Mesir mutuku wilinak ara, mek lilun bisikuk ubuka biyik. Winibuka binmeka ani, pia weik laut mekwen, el si ara, Laut Tengah piripna biyik. Yehuda yala nang, sik mutuku tuku bokna ati ara, Allah arye nyapdeipmok touk, Yehuda yala ninye arye, dopropnamik mutuku, iknapye tam tuku wililonak ara, asukumuk.

1 Raja-Raja 8:65

Ati ara, Raja Salomo ap, sik Israel ninye nirya ap, ninye kum nukmanto, pia weik arye bulubukabikce, weik kwalina yubuka Allah ati si erenmekce, Allah el si eren aik bisik bublan kukik. ‘Wininamap’ tenen, yanmek nang ara pia weik. Ara, Hamat mutuku bana ati deiyok koubuka balamikak arye, anerye dukdongobuka otam nirya, Mesir mutuku weik mek balamukak arye bulubuka yanmek. Amutuku-amutuku nang nirya arye, like empat belas (14) sum deice arye, kwalina kwalinmekce, Allah el si Yahweh ati si erenmek.