“Allah el si Yahweh, aning-aning talibuka, deice tam erebuka, Pia Mikip Weik Deiyoknye birye, ayupu ton nyapkile. Ara, ninye deiyoknye Raja Mesir biti, ayupu binuka nyapnulyame,” nyapdeipmanile. An Firaun bira, an kanye talima noutam ara, utenelyame. ‘Kume, na mikip pia weiknye, ununa anya arye, weik laut mekwen pum tam ulamle mikip weik ning, Nil mek pum tam malamle yu weik buaya atonun, unune. Nara, aninguk tenebuka nyanune. ‘Kume, weik balamle mek, el si Nil mek ara, naryuk kwepdeipse. Na kanye delina ati, Nil mek kwepdeipse. Nil mek deiyoknye bira natia,’ nyabuka ance nyabuka, an talima erelalyame.
Yesaya 27:1 - Eipomek1 Allah arye tenyamlye talak akunum yalyopura, Allah Yahweh arye, el ona ati, pia mikip weik tatce parang ya taleplirye, Lewiatan nyanyak yu weik kam ning ati opnamle. Ara, cakuka balirye, binuka kwanibuka, weik kwatima babye, yalirye wenebuka opnamle. Tonda elcuk, el si Naga Kwatima nyalamak ning, laut kwen noutam ulul kwatima babye, wenebuka opnamle. Gade chapit la |
Yesaya 27:1
30 Referans Kwoze
Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.
Akil eipse talak aryuk, tonok weik mambul ning ton kutukuka tikilyayuk. Aning el urasin ara, yu weik mem kwatima atonun dayuk bukni, ining bi uamukba eipse. El kisok ara, tekbarye ubukba, akisok deice ara, weik ninye deiyok nang arye, sik kisok deice kalunyak ning el si ara mahkota, kisok kalun ning taku barye ubukba eipse.
Aning babye talye ati kum nyapsine. Dipkoprob, na Allah Yahweh arye, yata nang do nirya, sik malye winilamak ning ton eipnyopura, na uku buk ap, na ninye on parang ya ap arye, sik malye wininyak nang, tukwak mutuku sirya, im sirya nirya noutam arye, yupu bokeipsinirye, amalye un nang nirya, obuka sirya dakamne. Aning nirya akunum winipnyopura, atalak ara, na Allah Yahweh arye, ikin ning deipnirye, wenebuka opniba, yupa ninye pia weik tonun, parang ya arye oplopniba, adiparyuk dipnamake.
Tonda, laut mekwen pum tam, weik nong weik mekwen pum bal el si ara, Lewiatan, ance kwepdeiplumba, laut mekwen noutamak arye, mikip dobuka balule. Tonda, ance kwepdeipsulum laut mekwen deice tam, ninye dobikirye, weik mek lia yo, el si ara, kapal laut, akapal pum tam wekikirye, laut mekwen deice banyak ning babye elinyabe.
Atonun, im noutam uamuk dua nirya ara, im noutam uamuk ning nirya leleipdongamuk bukni, Allah el isin arye pubuka deice arye, adua nirya kipdobukce, im yoka diamuk ulule. Tonda, Allah el mikip weik taruk arye, weik laut mekwen pum tam ulamuk yu kwatima, el si ara Naga babye, talibuka obukce, kum kipdeibuk.
Kolukukce, adiparyuk, weik Mem Kwatima Urasin Atonye, ara minop talak kwatima atonun dayuknye, el si ara Isa Mutuku Dongonye, tonda Setan nyanyapnye ati, amalaikat mikip arye talipdongobuk. Malaikat arye Isa Mutuku Dongonye talibukce, weik rantai tapu arye tapu koupdongobuk. Ara, ‘Keting tamun yupa weik 1.000 tahun deice arye, pia lopmanto kum unamle’ tenen, amalaikat arye, Isa Mutuku Dongonye tapu koupdongobuk.
Ati, pia Malye Kam Ulirye, ap, Tilila Yupu Nyana Deiyoknye, tilila yupu nyan nabi ap, uku pia dilamuka pum tam dopkwetebik. Kurun kuda balye deice buka balulnye, el yin talin malaikat arye amalye deiyok nang bitinye, sik amu tam malye nang nirya ap, sik yin talin nang nirya ap, oplobik. Oplobikba im noutamak bulubuka yanmek maka nirya arye, sik nong nirya dinmekbuk, boubuk. Aning nirya wininmokak na Yohanes arye eipse.
Aminyan talak ara, Yerusalem mutuku noutam nirya unyak nang arye nyanamake. “Se, sik Babel mutuku nang arye, nunti, adiparyuk malye kibuka, sice buklopmasiake. Tonda, Babel mutuku talibuka, ninye deiyoknye Raja Babel birye, obuka, sirya dakmasile. Winipmanto ara, weik laut pum tam ikan arye, mitik ikan obuka diplirye, sirya daklamle touk, nun Yerusalem mutuku ninye nirya, akunum obuka sirya dakmasile. Nun mutuku noutam teleb uamuk ning nirya, alubuka doprobukce, kum kipdeipmasile. Winipmanto ning ton, weik yu kam arye, pia weik ning arye, mitik kam ning obuka dilamle touk, Yerusalem mutuku nirya ara, kunum dipmasile. El mun pum tam arye, amutuku noutam teleb ning nirya ara, dopropnamle bukni, elce, ‘Na like, teneple ning ara, dukuka batakmasile.”
Na Allah arye, nong weik kam ulye ning yuk-yuk ning ton, yupa pia weik tonun kwepdeiamse bukni, yuk ning nirya ara, mikip mitikto unyak bukni, aning ara, mikip weik ap, yu ap ulule. Ati, na Allah arye, aning nirya kintinip deipse deiyoknye, naryuk pou weik kam ulye ning ara, optinye. Yuk nang nirya arye, aning kum optinge.
Lak nyapnukce, ayupu tonap dukdongobuka laka nyapnuke. “Arup sum Talye Yolana Deiyok Kil, weik mek dara bukmokak, eiplum ning babye, laka nyapnune. Weik mek dara ara, winipmanto ulul bukni, amek sik nong ara, ninye ayala-ayala nirya ap, yupu yuk-yuk nirya nyanyak ninye ap, weik mutuku noutamak yuk-yuk nirya unyak ninye negara-negara ap, yupa pia weik ati bikinyabe.”
Sik tekbarye malaikat, ara karu mek makau talipmek malaikat noutamak bukni, tonoknye na dam yanuka domona yupu deice arye nyapnuke. “Anda yalyame. Allah arye pia malye kil, talye yolamak kil, ninye nirya kel kiyamik kil ati, wenebuka opnamle ning kapdeipkiniba, eipnulame,” nyapnuk. Ayupu nyapnuka nong ara ani. Ara weik mek dana-dana weik asik domik mutuku, Babel mutuku noutamak ulamik ninye ara, Allah ati bataklamikce, pia malye weik winilamika ati, talye yolamak kil atonun ulamik.
Aning eipsopura, isa winilinye birye, yakai urasin atonun ubukce, yanganmekba, eipse. Tonok ning ara, Mem Kwatima Urasin Atonye tikukba, el si bam bol pum tam arye ayakai kutukuka yayuk. Bitinye ning ara, Pia Malye Ning Kam Ulul ning, laut mekwen noutamak arye kutukuka tikilyayuknye, el si bam bol pum bisik arye yakai kutukuka yayuk. Aning atonun, winilinye ning ara, Tilila Yupu Nyana Deiyoknye, el si bam bol pum bisik arye yakai kutukuka yayuk. Aisa yakai urasin atonun danmekce yanganmekak eipse.
Mem Kwatima Urasin Atonye birye, laut mekwen pum tam arye yanmoknye biti, el mikip weik aribuka anya arye, tukwak mutuku ninye weik arye Mem Kwatima Atonye biti si erelamik. Tonda tukwak nang weik arye, laut mekwen pum tam yanmok malye ning kam ulul ning ati, ‘Se, yata ning nirya ara, el ulul touk ulul do? Kume, el pia yuk ulirye, mikip pia weiknye ulula anya arye, yata ninye arye mikip uptuba, anya biti malye kibuka opnuyap’ tenen, ‘El ti obisipting do? Kume, anye bira kum optinge ati, el si babye erenamabe,’ tenenmekce, el si erenauk ulamik.
Allah Yahweh arye, sik Babel mutuku tam unyak nang ati, ayupu ton akunum nyapmale. “Anggunda, teleb mutuku noutam ara, bona utotoa weik nang ululume. Anggun mutuku dam ara, weik mek ton balule. Bukni, wini talak ara, anggun kam un talak ara, akunum sirya daknamsine. Narye, anggun kam una deiyok ning dopropnamsine. Winipnyopura, anggun nirya, adiparyuk dibinauk upnamlume.
Ati sik Pilistin nang weik yupu deice arye ngalukuka nyanamake. Ara, “Se, Allah Yahweh an mikip weik deice arye, an yu parang atonun unyak nang, nun ninye ona nang ara, parang ya bobuka, olyanamsiaka ara, dankaren ton, tuba olyanamsiak do? Dan talak arye, anang ati, ance, ‘Winida bataklulume,’ nyapnalam do? Winipmanto ara, yin talin nang arye, sik yu parang ara, el lin aling pum noutamuk moubuka lipdongobikirye, talye kanye bobuka bulamak touk, an babye, dan talak arye nyapnamsilam do? Ance nun olyanamsiak nang ati, “Anggun batakuka! Bindoplulume!” nyaptumopura, sikda bindopnamake. Winiptumopura, nun babye, talye tunim abuka unamtibye.
Yerusalem mutuku winiryuk ning kwepdeipnye talak ara, domba mi ap, weik kuse atonun yu ning el si singa kus ap, sik neika maning bok dinamdake. Tonda sapi basam maning bok dilamle touk, pia yu weik kuse el si singa kus babye, yuk kam ning obuka kum dinamle bukni, el babye maning wa bun mutmuta dinamle. Ton ning ara, ninye opliba, kulanyak kwatima nirya ara, tukwak mutuku aubuk kel-kel an tuku uk dinamake. Abal nirya ati, mikip ara mitang kipniba, yu kum unamake. Ara, na Allah Yahweh mikip weiknye unamne mutuku deice nirya ara, na dam arye yu ulamle ning ayala-yala nirya ap, ninye ati malye ulul ning nirya ara, mitanguk kipdeipnamne. Pia malye ning ton, tonok babye, kum unamla anya arye, pia teleb ninguk unamle,” Allah arye nyabuk.
Aning ara, talye ati kuma. Deiyok ara, Allah Yahweh, el unak im deice arye tukwak mutuku yalirye, amutuku unyak nang arye, malye weik unyak ning ati, yanuka wenebuka oplopnamle. Tonda, sik atukwak mutuku unyak nang arye yuk nang ati, duknubuka oltakanyak ning ap, tenipnarye oltakanyak ning ap ara, yanuka lak kipdeipnamle. Tonda, sikce obuka tuku pum weinyak nang babye, Tuku pum danyuk kum unamake. Ton nang arye, yuk nang ati duknubuka olamik nang nirya ara, lak kipdeipliba, ninye nirya ara, kel biknamake. Ninye omikak arye, lak kipdeipnamle.
Allah arye Ayub biti, nyabuk. Anda mikip weiknye ulamtumopura, mek pum tam ulul bal ikan youn ning si arye, tapu kirikdongobuka, weik laut mekwen pum bisik dopkweteptumce, weik mou bal, el si Lewiatan, taleptuba dobuka optum do? Winiptumopura, amou bal, el sitang si kan-kanya ara, koulongon tapu ban arye darapdongobuka, tapu kouptum do?
Kanye talima kat ulamsuka deice arye, malye weik ulamluma ati, narye obuka sirya dakanamsine. Wenebuka opnamsina deiyok ara ani. Ara, narye anggunti yukulamsise talak nirya ara, anggunce na yupu kum kekelamnulumce, bataklamnulume. Aning ati narye anggunti, yupu nyalilamsise talak nirya ara, anggunce na yupu kum kekelamnulume. Narye, ‘Aning ara mem ning ati, winina meme,’ nyapdeiamsise ning ara, tuba winilulume. Aning atonun, narye, ‘Aning ara na like,’ nyabuka laka nyalamsise ning ara, anggunce tuba winilulume. Winilamluma deice arye, narye nyalamse yupu mitik kililamnulumce, anggun bidamang winin ning atibuk weik kepropnin, balamlumce, nati yanibuka malyeuk kilalume. Ati, narye nyapniba, yuk pera mutuku yu ninye arye, sik nirya obuka sirya dakanamake.”
Aning atonun, sikce Karmel mutuku konak duknulbitinga babye, narye binuka ebukapnirye, dopropnamne. Tonda sikda, ‘Allah eipsilirye, opsilyak’ tenen, weik laut mekwen duk-duk amu tam duknulbitinga babye, narye aweik mekwen pum tam ulul naga kwatima ati, ‘Aninye ara, ance si tobuka oplyame,’ nyabuka laka kipdeipniba, elce aninye nirya, si tobuka opnamle.
Piblisite