Allah el kanye aryuk lyepsukce, teleb kipdeipsuka ati ara, Kristus ap, talima dukdongopsuka deice arye, winiryuk ninye atonun kipdeipsukba, unyabe. Lyepsukce, winiryuk ninye atonun kipdeipsuka deiyok ara, ani. Ara, minop talak Allah arye, nun dib tenenyap ninye ati, ‘Teleb winin ning yala-yala nirya pil dobuka unamake,’ tenyamsuka ati, Kristus deice arye, winiryuk ninye kipdeipsukba, unyabe. Na Paulus arye, nyapsine.
Yesaya 26:7 - Eipomek7 Allah ance nyasiminye yupu talibuka, dipsukumuk unyak nang ara, sikda teleb ulye bisikuk banyake. Welepmana, koulukmana bisik kum banyake. Dipkoprop, anda, pia telebuk, diksukum ulamlinye bira, an yupu talibuka telebuk unyak nang ati ara, Allah ance, sik anang bisik bana ati, akunum telebuk yalilyame. Gade chapit la |
Yesaya 26:7
30 Referans Kwoze
Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.
Na mapu sik asing kuamlye ninye ati, narye melibukapnirye sik min balamikirye bita kum bikamikce bisik ara, narye sik taruk talipnirye, menekuka banibuk, sik banamake. Kuna sukumuk balamice ninye ara, sik binamak sukum narye dirina kipdeipniba, dirin arye eibuka teleb ubuka banamake. Tonda, ‘Kanam aryuk binamak’ tenen, kot dam bisik nirya teleb kipdeipnamne. Winipnyopura, talye lukparabuka teleb bisikuk banamake. Diba aning-aning nirya ara, narye sikti, winibuka melinamsine. Na wipdeiamsiba, ‘Naʼ tenen, ninye, Israel yala ninye ara, pia kum bataknamne. Kalikuka melinauk unamsine.
Ura ton ninye ara, Allah el mapu unyake. Bukni, ‘Yuk ninye ara, Isa Mutuku Dongonye el mapu unyake,’ tenebuka, kel kinyap deiyok ning ara ani. Ara, Allah el yupu nyalye touk, kekebuka kum dobolbanyak ninye ara, Allah el mapu kum unyake. Tonda, aning atouk, yata nang do, nirya, sikce yuk ning ati, bico tenena kumce, kum melinyak ninye ababye, Allah el mapu kum unyake. Na Yohanes arye nyapne.
Malye ning nirya bataklirye, pia diksukumuk ululnye bira, malye ning tonok ning babye, talibuka kum ulule. Teleb uk ulule. Ati ara, elce deipnamle mapu ara, teleb un ninguk talibuka unamake. Allah arye anye ap, elce delinamle mapu nirya ap ati, Allah arye sikti, teleb kibuka delilula deice arye, diksukum unyakce, telebuk unamake.
Aning winipnala deiyok ara, talye ati kume. Deiyok ara, Yahweh el kanye talima noutam ara, pia diksukum winin ninguk winilula ati, ninye arye wininyak ning ereplirye, kanye delilula ati, elce, “Aning ara, wininamlume. Aning ara, pia kum wininamlume,” nyapdeipsuk yupu deice nyasilye touk, wininyak nang ati, el kanye pia delilule. Ati, diksukumuk wininyak nang ara, sirya talak ara, el dam yakirye, el urasin ton eipnamake. Allah arye, sik anang ati, bico teneplirye, kanye deipnamle.
Aning ati ara, nun nirya ati nyapsine. Allah arye, ‘Yesus tamubuka tukwak yanamla ati, atalak ani’ tenen, wepdeibuk sum min kum upmalye talak nirya noutamak arye, yata winin ning do nirya ati, “Aning telebe, aning malye,” nyabuka, yupu lipsisikuka kum bokeipnamlume. Aning nirya daupmaliba, ‘Nun Deiyoknye Yesus dan talak yanamle do?’ tenen, dinauk unamlulume. El yalyopura, elcuk yupu lipsisikuka bokeipnamsile. Yesus tamubuka yalyopura, aning-aning nirya ati, yupu lipsisikuka bokeipnamsile. Yata ning do nirya, kunuknak duknulamak ning nirya ara, dirinak deibuka, lak kipdeipnamle. Ninye sik talima noutamak arye, ‘Winipnamne, winipnamne’ tenen, deiyok ning duknulamak ning nirya ara, laka kipdeipnamsile. Tonok ning babye, kum duknupmantoe. Anirya laka danamle. Winibuka akunum laka kipdeipsilyopura, atalak aniryuk, Allah arye, ninye nirya ati, sik winilamice ning auplye touk, yupu lipsisikuka bokeipnamsile. Teleb winin ning ati ara, “Telebe,” nyapnamsile. Malye ning ati ara, “Malye,” nyabuka wenepnamsile.
Asukum ara, weik bisik aunamle. Abisik el si ati Pia Diksukum una ati Banamak Bisik nyanamake. Malye ning wininyak ninye ara abisik ara, pia kum binamake. Tonda aning-aning nirya ati walwal upliba, moubuka bita kel kum bikinyak ninye babye, abisik bakirye, abisik ara kum walwalapdanamake. Allah arye abisik yapdeipnamsile, ‘Na ti dib teneninyak ninye uk, abisik banamake’ tenen, yapdeipnamsile.
Anyapmasin yupu ara, talye ati kum nyapsine. Deiyok ara, el kanye talima lamapdongobuka arye, Allah amu tam ulirye, diksukumuk winilulnye bira, Allah Yahweh arye melibuka kalikilirye, aninye ati, teleb winililule. Bukni, malye winin ninguk tenebuka, upre bace ninye ara, wenebuka opnamle ati, kintinililule. Sik malye winin ninguk talibuka, wininyak ninye ap, sik wininyak ning ap nirya ara, Allah Yahweh arye kum daneipnamle.
Na Daud birye akunum kele bikamse. Na ni koproba Allah, ninye nirya sik kanye noutamuk deipmince, asilelyame. Tonda, el talima noutam pia teleb ulamlanye bira, diksukum ulamlanye biti, kanye pia delilyame. Ati, narye aning nirya ara, na kanye pia teleb deice aryuk talye arepkine. Tonda wini talak ara, narye an mapu koproba, abulupmak Israel nang babye, akunum eipmane. Ara, asukum yanmakce, aning nirya, sik kanye talima noutam arye, ‘Se, nun ni Allah ara pia telebeʼ tenen, teleb kanye bobuka, pin-pin deice arye, aning boyanuka arepmak nang ara, akunum eipmane.
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Bukni, nun ni Allah, el si Yahweh bira, aning-aning nirya talibuka, ninye deiyoknye ulirye, el mikip ara, pia weik ulule. Allah Yahweh, aning-aning nirya talilulak ara, im deice arye, pia teleb takhta deice bukuka, yupu bokolisulule. Ati ara, yata ning do nirya, elcuk disulule. Ati, tukwak mutuku unyak nang nirya, sikce wininyak ning, yuk-yuk ning nirya babye, elcuk elilirye, bikisulule.
Se, na ni Allah Yahweh, ance, ‘Aning ara, wininamlume, aning ara, pia kum wininamlume,’ nyapdeipsulum yupu, ‘Peterepnutumba, moubuka biktinirye, aninguk talibuka wininamne’ tenen, ‘Ance melipnamnilam’ tenen, moropkine na nio. Tonda, ‘Teleb winin ning ara ani, malye winin ning ara, ani,’ nyabuka, peterepnutumba, ‘Aning moubuka biknirye, an bisikuk banamne’ tenen, moropkine na nio.
Atonun, Allah ance, “Diksukum winin ning ara, ani,” nyabuka peterepnimince, ‘An minop menekuka baminyopura, nara an aminyan tam moubuka dobolbanamne’ tenen, moropkine na nio. Deiyok ara, ancuk, melibuka lyelonilyama ati, Allah an siuk erekunune. Atalak-atalak nirya ara, beren tam arye dukdongobuka, keting noutam nirya ap, lukunyan talak ap ara, ‘Allah ancuk, lyenamnilam’ tenen, morokunune na nio.
Anggun banumunye talak ara, kwepdanin bana meme. Tonda, dobolkirikinmakce nang kwepdanin balamak touk kum wininamlulume. Aning kum winipnamluma deiyok ara, anggun ni Allah Yahweh arye, anggun dam melipsilirye, bobuka banamsile atia. Anggun Israel ninye ati pia kalikuka melisulul Allah arye, ‘Dana-dana tam arye yanuka anggun malye updeiplyak’ tenen, aning ati, kalikuka melinamsile. Ati kwepdanin bana meme.
Akunum dibice nang ara, sikda teleb aryuk, dikdik selbanyak ati, ikin kumce, teleb ukirye, talye kanye bobuka, tunim abuka unamake. Yata nang do nirya, sikda, Allah arye, ‘Aning ara wininamlume, aning ara pia kum wininamlume,’ nyasilye yupu moubuka talibikirye, diksukumuk unyak nang ara, ikin kanye bona ap, kanye tenina ap pia kumce teleb ukirye, sik mapmace talak ara, sik amsuna deice arye, dikdik sebikirye, teleb kibuka manyake.
Na ni Allah, na kele, tonoknye babye, el mikip aryuk, el wininamle ning kum taliptue. El babye, ‘Winipnamne, aning ton winipnamne. Tonda teleb winina ati, abisik binamne. Tonda, winipnamsil ning ara, ani,’ teneptu bukni, dipkoprob ning ara, tukwak nang, sik mikip deice arye, aning nirya kum talinyake. Tonda, moubuka kum kel biktinge. Sik bisik binamakak ara, moubuka kum teneptinge.
Yatanye do nirya, sik weik kel bikinyak nang ara, aning nirya, weik kel bikna arye, nong noutam ning babye, tenebuka kel kinyak nang ap, anyapnusin yupu akunum moubuka tenenyake. Ara, na Allah Yahweh arye wininun ning nirya ara, pia diksukumuk unune. Ati, yata ninye do nirya, ‘Nunce teleb bisikuk binamabe’ tenen, pataliba, na Allah arye, “Aning wininamlulume, aning kum wininamlulume,” nyalisunun yupu ara, moubuka talinyakce, dobolbanyake. Bukni, sik yuk nang ara, mandipna kanye bobuka unyakce, na nyasinye yupu amul deice aryuk kekenyak bukni, moubuka kum talinyake. Aninye ara, pol-pol asa bakibuk, yan dum dukliba, sakuka tukwak punyak touk, ubuka sakanyake. Na Allah arye, dipkoprob nyapsine.
Na ni Allah Yahweh, ance, ‘Diksukum bisikuk binuka unamle,’ tenepniminyopura, nara, ‘Abisikuk binamne,’ tenen, pia patanulula ati, ance nyapdeipnulum yupu deice arye, abisik peterepnamnilame. Ara, nati, ‘Anye bira nun lik,’ tenen, na mal olan nang unyaka ati, ‘Diksukum un bisikuk peterepnamnilamʼ tenen, moropkine na nio. Winipmanto ara, ninye arye teleb bisik yabukabikirye, pia punguk ulamle touk, nara, ‘Ance melipniminya deice arye, dipkoprob bisik diksukum arye unamne’ tenen, morokunune.
Yata pil do nirya, dopmunyopura, Allah ati moropmunce donamlume. Tonda, yata wirin ning do nirya, ‘Allah melisilya deice aryuk apil donamabe,’ tenenamlume. Tonda, ‘Allah el si erena ati, apil donamabe,’ tenebuka unamlulume. Allah ati, si eremunyopura, elce, “Pia diksukum un bisik ara, ani,” nyabuka peterenamsile. Winipsilirye, anggun wininamlum ning nirya ara, telebuk ulinamsile.
Ninye ton teleb un ninguk, talibuka ululnye bira, el banamle bisik nirya ara, pia diksukumuk ulule. Diksukum bisikuk banamle. Bukni, malye winin ninguk talibuka ululnye bira, el balamle bisik nirya ara, kwalin bisik anya arye, el malye winin ninguk, talibuka ulye deice arye, malye kililalule. Malye wininyak ninye arye, sik mining atibuk, malye winililanyake.
Malye winin ninguk ati, pia tuba tenebuka unyak ninye arye, dipkoprob malye unyaka ati ara, sikda kwanim bisikuk banyake. Sikce, yuk ninye ati, talye yupu uk nyaltakanyake. Bukni, pia diksukumuk ubuka unyakce, pung bisikuk banyanyak ninye ara, pia telebuk unyake. Sikce wininyak ning ati, ‘Malye ning ani,’ kum nyaptibye.
Nyabukce, ayupu ton dukdongobuka nyabuk. “Anggun malye winimunye ning ati, kanye imun weik ning yanamsil bukni, na Allah Yahweh arye anggunti, tuba tenesununa ara, ‘Aninye ara bicoe, na kanye aniryuk melibuka lyepsitinye,’ tuba tenesunune. Na Allah arye tenelamsinya ani, ‘Atalak winipnamne,’ tenyamse talak akunum kiplyopura, bico tenepsinirye, melibuka lyepnamsine. Winipnamsitinya ara, talye ati kume. Deiyok ara, Na Allah Yahweh, pia diksukumuk ununye birye nyapsine. Ati, yata ninye do nirya, ‘Allah el dem arye melibuka lyepnamsil’ tenen, diba tenebuka dinauk unyak ninye ara, narye teleb kipdeipnamsine. Winipsinyopura, telebuk unamlume.” Allah arye nyapdeibukba, nabi Yesaya birye sekeipsuke.
Piblisite