Sik Yahudi yala ninye ara, ikin weik ulamikba, sik yala ninye ara, mitik kipnin balamuka ani, kum danmanto ulamik bukni, Allah ance, sikti, meliamluma deice arye, wini talak ara, sik ninye yupa weik tabikirye unamake. Tonda, ance winipminba, kanye weik deibuka, telebuk upnin banamake. Ance sikti, meliamluma deice arye, kanye deibuka pia teleb unmake. Winipmanto ning ara, ninye arye wa wibuka, sik koulamak ning nirya, akunum nong weik uplye talak ara, aning nirya libuka deibikirye, pia kanye deibuka teleb ulamak touk, wini talak ara, sik Yahudi yala ninye kanye deibuka, pin-pin asa arye unyake. Winipmanto ning ara, ton tam nang arye, yuk tam nang ati, obuka sirya dakikirye, amutuku talilamikce ning nirya, dalubuka doprobikirye, kanye weik tonun deibuka, pin-pin asa arye ulamak touk, wini talak ara, sik Yahudi yala ninye arye, kanye deibuka unyake.
Yesaya 26:15 - Eipomek15 Bukni, nun ni Allah Yahweh, ance nunti, an mapu koproba ara, akunum melilamsulumba, nunda tabakuka ton ap akunum teleb kipdeipsiminba, weik unamabe. Nunda Yudea tam unyap nang ara, akunum meliamsuluma deice arye, nunda ton ap tabakdeipsiminba, nun yala nang weik tonun upnin babiba, ninye nirya ara, ‘Se, Allah ara pia telebuk ulule. Elce pil dolul ning ara, mambul pia weike,’ tenebikirye, an si erekinyake. Tonda, nun talinyap mutuku tuku ara, ance weik tonun ton, tabakuka arepsiminyeba, nun tam weik ton upliba, talinyabe. Ati, nun babye, an siuk erekinyabe. Gade chapit la |
Yesaya 26:15
33 Referans Kwoze
Yesus arye ayupu nirya akunum nyabukopura, el urasin erebuka im deice tam dipdeyukce, Allah morobuk deice arye ayupu nyabuk. Naio, winira, na tenyamnulum talak akunum upmale. Ance an Mi Koprop nati, ‘Ninye nirya arye, na si erepnamak’ tenen, mambul pil dopnamnilyame. Winipniminyopura, ninye arye na si erenamniyake. Winipniminyopura, ‘Ninye tukwak nang nirya arye, an pia teleb winiminya kel bikikirye, anti kibuka si erebikirye, an si pia erenamkiyake’ tenen, narye mambul pil donamne. Na mambul pil dopnaman deice arye, an si erepdeipniba, yuk nang eibikirye, sikce an si erenamake. Ati ance nati teleb kipdeipnamnilame. Winipniminyopura, an Mi Koprop na pil dopnaman deice arye, ‘Ninye nirya an si weik arye erepdeipkikirye, si erenamak’ tenen, moropkine.
Anggur tapu duk teleb ubuka moulamle atonun, na mapu anggunda, duk pia weik mounamsile. Teleb ubuka winimunya deice arye, yuk ninye nirya arye, ‘Kume anang ara, Yesus el mapu unyake’ tenen, kel kipnamake. Ninye weik akunum kel kibicopura, winimunya deice arye, na Ni Koprop Allah ati, ‘Allah ara pia telebe,’ nyabuka, el si erebikirye, elti, kinamake.
Na Allah arye, mambul pil donamna ara, ani. Sik yuk mutuku nang arye, anggun Israel ninye tapu koubuka, yuk-yuk dabobinamsikba, ninye asik nang atonun ulamlum bukni, wini talak ara, narye anggun bobuka, anggun mutuku koproba tamubuka boyanamsine. Dan mutuku do nirya, dabinuka ulamunya babye, narye bulubuka anggun mutuku koproba, tamubuka deipsinirye, anggun mutuku koproba boyanamsine.
Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.
Narye sik amutuku unyak nang nirya, sik wenena ati, yakdonokniba, yuk mutuku nang unyak mutuku tikilbinuka, ikin weik daulamica ani, aminyan doyanamle talak ara, sik nirya, narye tamubuka, anggun mutuku uk boyanuka deipnamsine. Wini talak ara, na yu weik uniliba, lik unilya ati, narye sikti, yakuka donokamniba, yu nang arye, sik tomobuka, tapu koubuka, pera mutuku yukak bobinamake. Bukni, doyanamle talak ara, narye tamubuka boyanirye bulubuka, asukumuk deipnamne. Narye sik tamubuka, sik mutuku koproba, asukumuk boyanuka, teleb kipdeipnamne. Boyanirye, sik anang teleb kipdeipniba, olana kumce, kanye deibuka, talye dakeiam arye, pia amutuku uk unamake.
Amutuku noutam unamak nang ara, pia kanye deibuka, weik yupu tabikirye, sikce nati, ‘Naio telebe,’ nyabuka, si erepnikirye, kanye kil-kil mot nyanamake. Narye sik teleb kipdeipniba, yuk mutuku nang nirya ara sikti, ‘Se, sikda dipkoprob mambul nang,’ nyabuka, si erenamake. Tonda, sik Israel nang ati, ‘Sikda malyeuk unyake, dauaplye,’ nyabuka, malye yupu pia kum nyanamake. Tonda, minop talak ara, ninye yupa ara, mitik kipnin balamik bukni, aminyan talak ara, narye sikti, teleb kipdeipniba, anang sik yupa ara, nukman kumto, pia weik upnin banamake.
Yerusalem mutuku talibuka unamlum ninye nirya ara, pia telebuk ukirye, diksukumuk unamake. Tonda sik unamak mutuku ara, min kum kum danamle, bukni pia atuba wamliba talibuka unamake. Ara, talye ati kume. Ninye arye ‘Nun koun ning koubikiba, aminyan paplirye, weik papnamle’ tenen, mitik yala ning doklamak touk, narye anggun Israel ninye ara, na bidamang Allah aryuk koulamakto wamsa atia. Anggunda pia teleb-teleb unamluma ara, na bidamang taruk ap, na bidamang mikip deice ap arye, mambul pil dolamseba, sirya talak ara, pia teleb unamlume. Aning nirya pil dolamse ning deiyok ara, ‘Ninye mutuku-mutuku nirya arye, na siuk erenamniyak’ tenen, pil dolamse. Ati, aning ara dipkoprob nong upnamlarya.
“Ura, im deice ulul ning nirya ap, tukwak mutuku noutam ulul ning nirya ap ara, na Allah Yahweh arye apil nirya dolamse ati, na si erebuka kinamnululume. Aning atonun, mutuku-mutuku nirya ap, yo palpal ap, talye palamle yo ap nirya ara, kanye deibuka mot sepmunce, na si erenamnulume. Wininamluma deiyok ara, na Allah Yahweh arye, Yakub yala ninye nirya ara, akunum lobuka lyelamse. Akunum lyelamsisa ati, na si erenamnulume. Na teleb kibuka dirina weik unilye ning ara, Israel ninye noutam lak kilinune.” Allah arye nyabuk.
Ance meliamluma deice arye, Israel ninye sik mapu pia weik arelalumba, kurya im deice tiklamle atonun, aninye arye mapu weik delilamikba, yupa weik kipnin balamik. Tonda, ance nun ni yapu ati, “Teleb mutuku arepnamsine. Amutuku wekmunce talibuka unamlume,” nyapdeiamsulum mutuku, sik delilamik mapu ati areplume. Areplumba doprobikce, amutuku telebuk pia ulamik.
Anggun apu yapu yupa ara, bitinye keba nakub dikin nanguk, ninye 70 uk ulamikce, Mesir mutuku binuka wekamik bukni, anggun ni Allah weika arye meliamsuka deice arye, wini talak Israel ninye, anggun ninye yupa ara, kurya im deice kum nukmanto tiklamle touk ululume. Aning nirya ara, Allah elcuk aning nirya arepnamsile. Musa birye, Israel ninye ati nyabuk.
Yakub birye deiamukba dadeipdanin, deipkirik danin yanganyak ninye, sikda kum nukmanto, pia weik unyake. Winipmanto ara, tuku bisik bakibuk, uku sice butbuta welelamla atonun kibuka yanganyake. Ati, yatanye birye, aninye nirya nukturye, laka nyaptu do? Kume, sik ninye yupa ara, pia kum nukmanto atia. Aning atonun, asukum atikmance, sik Israel ninye nirya, kum eiptinye. Sik cang kambing bol doltakna aik deipmekak, noutamak bokuka dumbarye deipmekbuk, amutuku deice arye, tonok ninguk eiptinye. Israel ninye, sik yupa ara, kum nukmanto unyaka ati, sik dipkoprob mambul weik. Allah arye sikti, weika arye meliamuka ati, ‘Sik diksukum unyak touk, na babye uptinye’ tenen, patapnile. Sik diksukum unyak touk, unmanya ani, aminyan talak, ‘Sik dipnamak touk, na babye atonun diptinye’ tenen, se, tenenune. Sikda, pia teleb ninye unyaka ati, na kanye ara, ‘Sik unyak touk, na babye uptinye,’ nyapmana ati, aninye ati ara, yata malye yupu nyaptinya kume.” Bileam birye nyabuk.
Nyabukce, anyalin yupu tonap dukdongopbuka nyabuk. Allah arye, Abram biti nyabuk yupu ara, ani. “Narye anti, pia teleb kipkinirye, narye melilamkiniba, ance deipminyeba, dadeipdanin balamica ani, deipnamak nang, pia weik upnin banamake. Aninye nirya ati, sik apu koproba kibuka unalame. Na mikip deice arye, an si weik arye, ereipkiniba, ninye nirya arye, anti kekepnamake. Narye melipkineba, an deice arye, yuk nang weika arye, teleb updeipnamne.
Amutuku yanuka obisipnamak nang arye, Yahudi yala ninye weik parang ya arye olonamake. Ton nang ara tapu koubukabikirye, yuk karen mutuku bobikirye pil dinamake. Yerusalem asik dokcak nirya ara, Yahudi yala kum ninye arye, ‘Amutuku ara mambul ak,’ tenena kum aryuk, talye yan yanibuka unamake. Winibuka daulamiceura, Yahudi yala kum ninye weik ninye deiyok nang kibikirye, mutuku-mutuku nirya pia talinamake. Allah arye tenyamuk talakuk wininamake.
Minop talak ara, Israel nang ara, pia weik, laut mekwen kup-kup keil wininga pia weik ulamle touk ulamik. Bukni, aminyan yanamle talak ara, aninye obuka bobinamikce, tapu koupdongamik mutuku arye batakuka, mitik tonunuk, Allah dam tamubuka yanamake. Allah arye, ‘Asyur mutuku nang wenebuka opnamne,’ tenyamuk talak ara, akunum dam kibuk. Allah ara, dipkoprob pia diksukumuk ululnye ati, dipkoprob amutuku unyak nang ara, sik babye malye unyaka dekena ati, Allah arye, anang wenebuka opnamle.
Winipyopura, na Allah Yahweh arye nyapniba, yuk pera mutuku yu nang arye, Israel ninye unyak mutuku nirya, yanuka obisibikirye, amutuku unyak ninye nirya ara, tapu koubikirye, pia yuk mutuku uk bobinamake. Na Allah Yahweh arye, amutuku unyak ninye yakuka dopkwetepniba, sik mutuku nirya, oldiamuk kipnamle. Sik wenena ati, aning nirya akunum winipnyopura, amutuku nirya ara, louk upnamle.
Winilamuka ati ara, Allah el si Yahweh arye, sik Yehuda yala ninye ati nyabuk. “Israel yala nang arye, pia malye weik ulamikba, bataksirye na dam arye, yakuka bai tam donokse touk, sik Yehuda yala ninye babye ati, wenepnirye, na dam arye donoknamnarya. Tonda narye, Yerusalem mutuku ati, ‘Amutuku wibuka deipne,’ nyapdeiamse bukni, amutuku bataknamnarya. Aning atonun, na bidamnye arye, Yerusalem noutam domik aik ati ara, ‘Anyaik ara, na si dobuka anyaik pum tam dongopnamne,’ nyapdeiamse bukni, na si eren aik babye, bataknamnarya,” nyabuk ara, Allah arye, yu weik ubuk ati, ayupu nyabuk.
Ati ara, Allah Yahweh arye, sik ulamikak ara, pia moubuka kum kaliklamukce, ‘Sikda na dam ton kum unamake. Bataknyopura, sik yukakuk unamake,’ tenelamukce, lo ton kum areamukba, sik Asyur tam nang arye, yanuka obuka sirya dakik. Winibika deice arye, ‘Sik aninye teleb mutuku unamakʼ tenen, areamuk mutuku noutam ara, bobukabukce, donokuk. Ara, min talak, Allah el yupu nyapdeiamuba, kekebikce, el yupu laka nyalamik nang, sik nabi-nabi nang ara, sik deice wenen yupu nyapdeiamukba, sikce Israel ninye dam yanuka, laka nyalamik bukni, aning kum kekelamikba, ayupu nyapdeiamuk touk ubuk. Ara, “Israel ninye anggunce, na nyapdeiamsise yupu moubuka kum talipmunyopura, anggun dengna ati ara, anggun nong deice ikin ning yaliba, dopropnamlume,” nyaibukba, nabi nang arye, laka nyalamik touk winibuk. Ati ara, Israel mutuku ulamik ninye ara, Asyur mutuku yu weik nang arye, tomobuka tapu koubukabikce, sik mutuku tamubuka, wenen aik dongona ati, Asyur mutuku bobinuka delilbiyik. Abobinuka delilbinamikak ara, aulamik touk, abuku sekmap talak babye, tuba aunamake.
Aninguk apia winilamuka ani, aminyan talak yayuk keting tamun ara, Samaria mutuku ulamik ninye ati, obuka malye kibuk. Ara, Raja Hosea birye, ninye deiyoknye kibuka, Israel tam taleamukce, mapnin balamuka ani, keting tamun toupne barye (9) kibukura, Asyur mutuku Raja arye, amutuku noutam binuka, alubuka doprobukce, el ap, el yin talin nang ap arye, amutuku ulamik ninye nirya tomobik. Anyasik nirya doprobikce, Israel tam ulamik ninye nirya tomobuka, tapu koubuka, sik bidaman mutuku Asyur mutuku bobiyik. Raja Salmaneser birye nyapdeibukba, el yin talin nang arye, Asyur mutuku noutam bukni, Israel ninye bokukabikce, ton tam ninye ara, bokuka Hala mutuku noutam delilbiyik. Ton tam ninye ara, Gozan mutuku noutam bukni, balamuk mek si, Habor mek lilun dam delilbiyik. Ton tam ninye ara, bokukabikce, Madai mutuku asik dobuka, ulamik mutuku dam delilbiyik.
Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Tonda, anggun ni koproba Allah Yahweh arye, nyapdeibuk yupu kum kekepmunce, batakmunyopura, elce anggun bataksiliba, anggun ona ati, yuk asik nang yakirye, obuka sirya daknamsiyake. Winipsikceura, anggunce anggun mal olan nang ati, ‘Optibyeʼ tenen, moubuka kalikmunce, tonok bisik arye kalikil binamlum bukni, anggun mal olan nang aryuk yakirye, opsiksiceba, ilil weik upsiliba, bikbik abuka, yuk-yuk tekbarye bisik, bokwalwalap danuka, bindopnamlume. Winipmunyopura, anggun mutuku dana-dana tam unyak nang arye, anggun malye winimunye ning eipsikirye, ‘Se, aning ara, dipkoprob, sikda malye winilamik deice arye winibukʼ tenen, sik kanye pum tam tenenamsiake.
Narye meliamsiniba, ance deipminyeba, dadeipdanin banamak nang, an yala nang nirya ara, pia weik upnin banamake. Tukwak mutuku ulye keil wininga atonun, ance deipminyeba, dadeipnamak nang atonun, nukmanto kum, pia weik upnin banamake. Ninye arye, keil wininga nukmanto kum ulamak tonun, an mapu silip ati, ton kum nuknamake.
Tukwak mutuku noutam, ninye yuk-yuk ukiba, ton mutuku unyak nang ara, Allah arye mikip kipdeiplyeba, ninye ap, mikip ap, weik kipnin banyake. Winilamiki bukni, aminyan talak ara, Allah arye teneplye talak aryuk, anang bukni, mikip kum kipdeiplirye, tamubuka, sik nirya obuka, kum kililule. Tonda, Allah elcuk, ton nang unamak tam nirya ara, lo kipdeipliba, ninye yupa weik ton upnin bakirye, mikip ap, teleb ap unyake. Winilamikca ani, Allah elce tenyamlye talak yalyopura, anang bukni, sikti, bataklyeba, sik mikip ap, sik yala nang nirya ara, pia mitik diamuk upnin banyake.
Aning nirya akunum winipmunyopura, Allah el pia teleb ulya ap, el dirina weik ulye ning ap ara, lakak uplyopura, ninye tukwak nang nirya arye elinamake. Allah el dirina weik lakak kibuka yanamle talak ara, ninye mutuku-mutuku nirya arye, neika eipnamake. Aning ara ‘Winipnamle do, kum do?’ tenena kume. Allah el si Yahweh, elcuk, ‘Winipnamle,’ nyabuka, ayupu akunum nyapdeipmasila ati, ‘Aning nirya ara, dipkoprob winipnamle,’ tenenamlulume.