Allah ati, diba tenebik ning ara, ila tuba tamubuka bataktingopura, aning ara, min kum kum danaeipmanto anya arye, sikda weik arye ilil asauk unamake. Ilil asa unamaka deiyok ara, ani. Anang ati ara, Allah arye yupu bokuka weneplirye, opnamle ning ati, ilil weik unamake. Tonda, sikce Allah elti, ‘Nun like’ tenen, lik ulul ninye ati, uku buk weik arye dinamle ning ap ara, ‘Sirya daknamsil’ tenen, ilil weik unamake.
Yesaya 26:11 - Eipomek11 Se, na ni Allah Yahweh, ance sik malye weik unyak nang ati, yu tenipmince, ‘Anang wenepnamneʼ tenen, kintinip deipmalam ning ara, pia kum tenebikirye, kel bikuka kum elinyake. Ance an mapu ati, ‘Bicoe, sikda dipkoprob melibuka kalikinamne,’ tenipmince, melinamlam ning ara, sik amalye wininyak nang kum eilinyaka anya arye, ance aning lak kipdeipminba, eiptingopura, aminyan ara sikce, ‘Se, nun malye wininyabe,’ tenen, ilil upliba, alye dakanamake. Ance sik malyeuk wininyak nang ati, yu weik upkiliba, ance wenebuka opnamalam nang ara, akunum kintinip deipmalam ning ara, sikti, wenebuka opmince, uku buk dilamle touk, anang kum kipdeipnalame. Gade chapit la |
Yesaya 26:11
42 Referans Kwoze
Allah Yahweh arye, Israel ninye ati nyabuk. Aminyan talak ara, ninye deiyoknye ton erepdeipsiniba, anggun mal olan nang nirya obuka sirya daklirye, kum kipdeipnamle bukni, atalak noutam babye, anggun Israel ninye malye-malye ning tuba aupmasil ning babye, narye kum kipdeipnamsine, nyabuk. Ara, ninye olbana ati, anggun kuda basam balye deice bukuka balamlum kuda basam ara, kum kipdeipnamne. Tonda, anggun mal olan nang olbana ati, tuku deice balamlum ning, tapu kirikuka anggun kuda basam arye, tuku deice libuka balamlum ning, el si ara kereta kuda nirya babye kum kipdeipnamne.
Anggunda, Allah arye, ‘Aning ara, wininamlume, aning ara, pia kum wininamlume,’ nyapdeibuk yupu nirya, akunum bataklume. Tonda, anggun Israel yala nang, anggunce el si erelulum Allah ara, Pia Teleb Leknye, elce nyapdeiamsuk yupu ati, malye kilulumce, yaniltakalulume. Winiluluma ati ara, anggunda sisal ning ap, kel-kel alamle mutmuta ap, uku buk arye diplirye, kum danalilamle touk, anggun amalye ululum nang babye, Allah arye kum kipdeipnamsile. Aning atonun, ninye koulamak ning, yating wamlye ning bukni, yating lyupdopliba sesal selolamle touk, anggun babye kum kipnin banamlume. Tonda, bai tam kita ning, kita mouplirye, lapmalye ning tubuka lulsaklamle touk, anggun babye, Allah arye wenebuka sirya daknamsile.
‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.
Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.
Allah diba tenelulum ning, laka nyabuka deilinamlum talak nirya ara, weik yupu weika arye nyana kum bukni, yuk nang nirya ati, si erebuka nimalye arye, laka nyanamlulume. Yesus Kristus talima dukdongobuka teleb ubuka, diksukumuk unamlulum bukni, malye yupu nyabuka lululinamsiak ninye ara, ‘Ailye upnamle’ tenen, anggun kanye talima noutamak ara, malye ning duknuna kum arye, diksukumuk unamlulume. Winilulumopura, yu arye lululinamsiak bukni, anggun ap, Kristus ap talima dukdongobuka ululumba, teleb winin ning eipsikcopura, alye unamle.
Deiyok ara ani. Anang ara, sik talima kat akunum ubuka ati, ‘Ayupu kekebibyak’ tenen, amul kunukdongobuka unyake. ‘Nun dina like’ tenen, asing kulamak atonun unyake. Ara sik asing kum kuptingatoura, asing arye teleb kibuka eiptinge. Sik amul kum kunuktingtoura, amul arye teleb kibuka kekeptinge. Winiptingura, sik kanye talima noutamak tenena ara, teleb kibuka kel biktinge. Winiptinyeura, na tam kipdongobuka, narye sikti, kwetepnirye lyepnamsine. Allah arye nyapdeibukura, Yesaya arye sekuk. (Yesaya 6:9-10)
Nyapnyopura, na kwanim taruk tam deipnamne ninye ati nyapnamne. “Allah arye, ‘Aninye na like,’ tenebuka akunum bataksuk ninye ara, na dam arye yukak bilulume. Allah arye Isa Mutuku Dongonye ap, el pil donyak nang, sik malye malaikat atonun isa ap, nati bataknikce, malye ning talibuka, sik malye wininyak kili sal niryada, ‘Pia uku dipnamle’ tenen, uku din mutuku kintinibuka deibukak ara, anggun wekelbululume.
Allah Yahweh aning-aning nirya talibuka, im deice yin talin malaikat nirya, sik weik deiyoknye birye nyabuk. Dipkoprop, na tenepse sum, akunum uplyopura, malye unyak ninye ap, talima erelan deice arye, erepdanuka kwalinyak ninye ap nirya, narye wenebuka oplopnamne. Winipmanto ara, koluplirye, kel-kel alamle ning, uku dinibikiba, minopce uku buk paplirye, dilamle touk, sik amalye wininyak ninye nirya wenepnirye, obuka sirya daknamne. Atalak ara, sik amalye unyak ninye ara tonok ton kum bataknamle. Weik uku dinmalirye, yo deiyok ap, taruk ap, yating nirya ap, dibuka kum danalamle touk, sik amalye wininyak ninye nirya wenepnirye, obuka sirya daknamne. Atalak ara, sik amalye wininyak ninye ara, sirya ton kum bataknamne. Wimipnamne talak ara, sik yala ninye nirya babye, pia kum upnamake. Ati, doryanamle talak ara, amalye unyak ninye, sik yala nang arye, mapu ton deibuka kum punupnamake. Sik yala nirya kum danamake.
Bukni, sik ninye mitik tonun, kum dipnamak bukni, sik anang Mesir mutuku arye tamubuka, Yehuda mutuku noutam, sik mutuku koproba uk, binuka unamak nang ara, mitik tonunuk, tamubuka yanamake. Winibikcopura, atalak arye, sik Yehuda yala nang ara, moubuka biknamake. Ara, mince Yehuda mutuku batakamikce, Mesir mutuku yanuka ulamik nang ara, sikce nyalamik yupu nong akunum upmal do? Akumopura, na Allah arye, nyamsise yupu ara, nong akunum upmal do?’ tenen, ayupu teneipdekirye, biknamake.
Nyapnukba, na Yeremia birye tamubuka nyapse. “Se na ni Allah Yahweh. Na kele, ance, ninye ati, Yata wirinamak do?’ tenen, patakulul ning ara, anti diba tenebuka, pia dib yupu nyana ap, diksukum winin ning ap, yupu. Anda Allah arye, sik malye wininyak nang akunum wenebuka opsi bukni, sikda, ‘Dipkoprop Allah arye winisululeʼ tenen, ikin kanye bobuka kum unyake. Tonda, sik wenena ati, ikin ning weik deipsulumce, opsulumba, ninye weik akunum diamik bukni, aning babye sikce kel kum bikinyake. Sikda, kama weik tuba abuka deice arye, ance, ‘Aning wininamlume, aning ara pia kum wininamlume,’ nyapsuluma babye, aning kekena kum aryuk, sik malye wininyak ning ara, kum bataknamake. Winipmanto ara, sik urasin ara, kat keil atonun kibuka unyaka ati, ance nyasilyam yupu pia kum kekenyake. Sik malye wininyak ning batakuka, tamubikirye, diksukum winin bisik kum banyake,” nyapse.
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Allah arye nyabuk. “Ninye taruk deice aniryuk kintinibuka deibikirye, si erenyak ning nirya ara, deiyok ton kum ulule. Ara, talye ning atibuk “Nun ni koproba,” nyabuka si erenyake. Aning ara, kanye bona ap, kekena ap, kel bikna ap ara pia kume. Ara, talye ninguk ulule. Anya arye, sik aning talibuka unyak ninye ara, asing kun ninye atonun unyake. Pia walwal nanguk unyaka ati, sirya talak ara, alye weik dakdanamake.
Tukwak mutuku sirya im sirya nirya ululum nango, anggun nirya arye dipdelulume! Mal olan deiyok koubica ati, ninye nirya bulupnamak talak biklina ati ara, bendera weik mutuku deice ikuka deibikceba, anggunce moubuka eipnamlume. Tonda, anggunce pong-pong ning, el si terompet, lelim weik arye nyabikceura, kekepnamlume. Ayupu lelim kekepmunyeura, anggun tukwak mutuku ululum nang nirya arye moubuka kitininamlume.
Atalak ara, sik Israel yala nang nirya arye, Yehuda yala nang wininyak ning ap, talinyak ning ap ati, ‘Se, sik wininyak ning ap, sikce talinyak ning ap ara, nun ninguk upsutueʼ tenen, kanye uk dilamle ning ara, tuba kum wininamake. Tonda, sik Yehuda yala nang arye, Israel yala nang nirya ati, tuba ton ap kum mal pilanamake. Talya kanye bobuka, nama asa neika unamake.
Na nio, ‘Anda pia weik tonun bico tenepnimince, melipnamnilam ning ara, ‘Moubuka tenepnirye, biknamne’ tenen, patapnila ati, moropkine. Ati, ‘Ance bikilin ning ton arepniminya deice arye biktinyeʼ tenen, moropkine na nio. Adeice arye biknamne. Bikilin ning arepniminyeba, nati, ‘Nun like,’ teneninyak nang nirya arye, aning ebicopura, alye dakdanamake. Ara, sikce, ‘Se, dipkoprob Allah Yahweh arye, anye akunum melilule,’ tenebikirye, bikikcopura, alye dakdanamake. Na ni Yahweh, imun kanye bobuka unun talak nirya ara, ancuk na talima, kwa dinilyama ati, sik yu nang arye, aning eibuka bikikcopura, alye dakdanamake.
Aning ara, talye ati kuma. Deiyok ara, na Raja bira, ‘Allah aryuk melinamnil’ tenen, an Allah Yahweh ati, pia diba tenekinirye, na kanye talima nirya, an deiceuk delikunune. Allah anda aning-aning nirya deice tam erebuka, Pia Mikip Weiknye ulyame. Tonda, Allah ance nunti, “Anggunda, pia bico tenesinirye, pia telebuk kilinamsine,” nyabuka, nyalin yupu deice arye, akunum nyapdeiamsuluma ati, ikin upmasilya babye, ilil una ap, kanye telintona ap, pia kum unamne.
Winilula deiyok ara, ani. Ara, sik adeiyok-deiyok nang ara, Allah elce, “Aning wininamlume, aning ara pia kum wininamlume. Teleb un ning ara, ani,” nyapdeiamsuk ning nirya ara, anang arye akunum yaniltaklamik ati, olule. Diba, Allah arye nyalul yupu, moubuka kum talikirye, ‘Aning ara, talye yupu uka, dauplye,’ tenenyak ninye ara, Allah arye wenebuka olule.
Winipmunyeura, sapi basam bitinye arye, bobarikce talak ara, anggunda dinamalulume. Allah arye nyapdeiamuk yupu, Nyalin Yupu Marikna (Peti Perjanjian) pum libuka deibik ning bobanmarikca ani, ton tamubuka yangana kumce, tuba nong bisikuk banmarica ani, Israel yala ninye, sik tam bukni, mutuku si Bet-Semes mutuku asik dobuka, unyakak berikcopura, adeice arye anggun biknamlume. Ara, ‘Israel ninye, sik ni koproba, Allah arye, nun dam kanye imun ning deiamsukba, uk dilamsuka ara, akunum diplamupuʼ tenen, biknamlume. Bukni, Allah yupu nyapdeiamukba, libuka deibik Nyalin Yupu Marikna yo ap, (Peti Perjanjian) emas arye suse ap, kub mana urasin ato ning puturubuka, deipmamunye ning, asapi basam arye, libuka bobanmalye ning ara, sapi basam Bet-Semes bisik kum bilirye, tamubuka nun mutuku uk tuba yalyopura, ‘Se, nun deice ikin ning, yayukba dopromubu ning ara, Israel ninye sik ni koproba Allah, elce kum deipsuke. ‘Nun malye ububa deice arye, aning yayukba, ikin upsukʼ tenen, biknamlume.
Nyapmakin bukni, anda malye winibuka, na yupu kum kekepnimince, ‘Israel ninye bana kume,’ nyapminyopura, anggun mutuku noutamak nirya, na mikip deice arye kanye imun ning pia weika arye arepnamasine. Ara, an ap, an pil dona deiyok nang ap, anggun amu tam unyak ninye nirya ap, ikin weik unamlume. Winipnamna deiyok ara, an ap yuk ninye nirya ap, ‘Se, Allah ara, tukwak mutuku im sirya, mutuku sirya nirya noutamak ara, el atonunye ton kum ulule’ tenen, kel biknamnululuma atia.” Allah arye Musa biti, “Ayupu ara, Firaun dam laka nyalbanamlyame,” nyabuk.
Winipmanto ara, weik uku buk arye, aning-aning nirya dilamle touk, sik mal olan talak ara, Israel yala wel nang nirya ara, weik tonun, oltaklamikba, dibuka sirya dakik. Sik mal olan talak ara, Israel yala nang ara, yupa pia weik tonun oltakalamika ati, Israel yala wel kilapu ara, weik nelamik buk, ninye dopmanto nang kum ati, akilapu ara, ur talye dem nebuka ulamik.
Narye anggunti wenepnamsin talak ara, min yuma talak mikip weik nang ulamik bukni, sekne elima atonun unamake. Aning atonun, sekne panmaca ani, pubikiba, uku buk palamle touk, sik mambul pil dolamik ning nirya ara, winipnamle. Ara, narye sik malye wininyak ninye nirya wenepnirye, uku pakalyak dongopniba, uku arye dibuka, sirya daknamle. Amalye wininyak ninye ap, sik pil dolamice nang ap nirya ara, uku dipnamle. Auku ara ninye arye, kum tangaptinge. Pia dinamle.
Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.
Allah arye sikti, wenena weik ning arebuka deice arye, sikda kanye imun ubuk. Winipmanto ara, amutuku noutam, sik malye winilamik ning ara, talye palamle ning ap, tatce ning ap atonun ubukba, uku buk dilamlirye, atalye ning nirya, dilolamle atonun ulamik. Tonda, ninye arye, bai mutuku noutam, uku sekiceba, weik uku buk ara, bai mutuku nirya dilamlirye, weik tulum im tam bukuka welelamle touk, ubuk. Ara, Allah arye sik malye winilamik ning ap, sik ap, obuka kum kipdeibukce, winibuk.
Allah Yahweh ara, aning-aning nirya eitam ulirye, im deice unyak yin talin malaikat nirya talibuka, sik deiyoknye ulule. Allah elce, sik Israel yala nang ati, pia yu weik ubukba, anang wenebuk. Yu weik ubukba, amutuku ulamik Israel nang, sikti, wenebuka deice arye, weik uku buk dilamle touk ubukba, sik taleamik mutuku nirya, uku dibuk. Sik amutuku ulamik nang nirya babye, uku buk dinmalibuk, adeice yo webuka dongolamak touk ubikba, uku arye dibuka, sirya dakuk. Tonye birye, el kwit ati obuk. Tonoknye babye, ton kum bico tenepdayik. Sik nirya arye, olanauk ulamik.
Allah arye, sik Israel yala nang ati, dirina atonun, kiplya deice arye sik melilule. Elda, sik Dirina Deiyoknye ulul bukni, aminyan talak ara, weik uku buk atonun upnamle. Allah ara, pia dipkoprob ululnye bukni, aminyan talak ara, yu weik upliba, elda weik uku buk atonun upnamlarya. Weik uku buk dilamle touk uplyopura, tonok sum arye, atalye palamle tace ning nirya ap, mutmuta nirya ap ara, el uku arye, atalye ning nirya dibuka, sirya dakdopnamle.
Ara talye ati kuma. Deiyok ara, Yerusalem mutuku arye, tonda, Sion mutuku deice ap arye, ninye mitik tonun ton lyepliba, anang arye amutuku noutam arye banamake. Aning ara, Allah Yahweh elcuk apil donamle. Allah ara, aning-aning deice tam erebuka mikip weik ulirye, im deice malaikat nirya sik deiyoknye ulirye, el pia pi deibuka, mikip weik deice arye, elce, ‘Aning winipnamne,’ tenyamlye ning nirya, dipkoprob pil dopnamle. Allah arye nyabuka anya arye, aning nirya, dipkoprob nong upnamle!
Nara Allah Yahweh arye, ninye mal olan nang arye, ilil kum aniryuk, malye kiplirye sik bikuka mikip arye ninye olbalamaka atonun, unune. Nara, yin talina deiyok nang arye, sik mal olan nang ati, yu upliba, mikip arye, weik yupu deice nyabikirye olalbalamak touk unune. Na Allah ati, ‘Nun like,’ tenen, malye nyaninyak ninye nirya ara, mikip weik aryuk, olbanune.
Allah elda, el pia dipsukumuk ulula ara, winipmanto ara, yin talin nang arye, ‘Marapsikirye opsikcakʼ tenen, sik taram deice ara, ting kiniklamaka atonun ubuka, Allah el nong taram deice arye, diksukum winin ning deibuk. Winipmanto ning ton, sik yin talin nang arye, ‘Keil dopsikirye, nun kisok deice opsikcakʼ tenen, besi ning arye kat topi memepdeibikirye, galubuka ongolamak touk ubuka, Allah arye ninye lyena deiyok ning boyanuka, el kisok deice deibukce, ongobuk. Tonda, ninye arye, cang baju ongobuka balamak touk, Allah arye baju ongona atonun ubuka, sik malye-malye winilamik nang arye, teleb nang ati malye kipdeiamik ning ati, ‘Tamubuka kwang daknamnaryaʼ tenen, yayukce, anang ati wenebuka obuk. Winipmanto tonok ton, ninye arye tin baju dobuka, sik nong dam ongopnamak baju deice ongobikirye balamak touk, Allah arye, sik malye winin ninguk, talibuka ulamik nang ati, yu weik ubuk ning ara dobuka, el nong deice kwetep deibukabukce, sik amalye nang ati, yanuka wenebuka olamuk.
Diba nun ni Allah Yahweh, anda im deice alip tam pia telebak umince disilyame. Anda pia mikip weiknye ulyame. Malye ning tonok babye kum winiminya ati, weik erebuka eitam umince, im deice pia teleb mutuku ulyame. ‘Ance bico tenesimince, ilil kumce malya kibuka, nunti melisilyam ning ara, wini talak dan sukum ulul do? Tonda ance talye lukparabuka opsutum bukni, lyelosilyam ning ara, dan sukum ulul do?’ tenekinyabe. ‘Anda yata ning ati, nunti yukuna atonun winilisilyam do?’ tenekinyabe.
Aning ara, talye ati kume. Na Allah arye aning nirya winipnamna deiyok ara, ani. Ara dipkoprob, na Allah Yahweh arye, aning anggun wenena ati, uku bobuka yanamne. Tonda na yanamne talak ara, weik kumanya mikip asa yalirye, lelim weik nyalamle touk, tonda kuda basam arye libuka tuku deice bobalamle ning, el si kereta perang minopce bikbik abuka balamle touk, na Allah babye minopce yanamne. Aning nirya winipnirye, sik malye winin ning kwang dakna ati, na yu weik uamnuk ning dobuka, sikce nati, ‘Nun like,’ tenepnikirye, na yanininyak nang, sik dam deipniba, weik kanye imun ning upnamle. Sik ti wenepnamne ning ara, weik uku buk dilamlirye, tin weik ulamle touk, mikip weik arye anang wenebuka opnamne.
Yerusalem mutuku noutam yanuka ulamikca ani, na si erebikirye, akunum sirya dakikcopura, tamubuka anyasik noutam arye batakuka, Yerusalem mutuku sakuka, bai tam bakce talak ara, na yupu yanibuka, ‘Allah ara, nun like, el yupu moubuka kum talipnamabe,’ nyabuka, nati yanaipnamniyak nang bukni, akunum obuka batakniba dipmakiba, sik nong lak upmalaya eipnamake. Tonda, anang, sik nong bol lyulamlirye dinamle ku duk ara, pia donauk unamle. Wininamle ku duk ara, pia kum dipnamake. Aning atonun, tonda sik nong dinamle ku ara, pia kum bataknamle. Dinauk unamle. Aning nirya ara, narye oplopniba lyupnamle nang nirya dinamaka arye, amalye ulilamikba, opse nang ati, ilil weik dakna ning ara, pia ulamliba, tuba kam unamak nang nirya ara, ‘Nunce adipmek nang ara, nun like,’ pia teninamake. Allah arye sik Israel yala nang nirya ati, ayupu nyabuk.
Winipsiminyopura, ninye mutuku-mutuku nirya yuk daunyak ninye arye, aning eibikirye, alye dakdakirye, ilil unamle. Ara, sikce winibuka tenenamake. ‘Se, min yuma talak, nunda mikip weik ninye unyabe,’ tenelamupu bukni, dipkoprob nun mikip, mitik tonun usulule. ‘Allah elda, pia mikip weiknye ulule’ tenen, kel biknamake. Aning kel bikica deice arye, sik aninye nirya arye Allah ati, ‘Se, elda weik mambulnye ulule,’ tenebikirye, sik kanye deibikirye kipnamake. Winipnamle talak ara, ‘Nun mikip weik nang unyaba,’ tenelamik nang ara, sik talima pum tam kunukulongona ap, amul kunukna ap, tonda si bam bol lililongona ap, unamake.
Ati ara, Allah Yahweh aning-aning nirya talibuka eitam erebuka, mikip weik ululnye birye, im deice yin talin malaikat nirya, sik deiyoknye ulule. Asyur mutuku talibuka ulula deiyoknye, elce kanye eren deice arye, akunum kwalibuka aulula ati, Allah arye anye wenepnamle. Ara, Allah arye Raja Asyur, el amu tam mikip weik unyak yin talin nang ati, kanye ikin weikuk arepliba, sik nong bol deice nirya ara, malye upnamlarya. Sik nong noutam ara, kanye imun uk dipliba, sik nong mikip nirya ara, mitang kipnamle. Atalak ara, Allah arye Asyur mutuku nang nirya ap, sik talinyak bona nirya ap ara, malye kipdeipnamle. Winipmanto ara, ninye arye uku sekiceba, weik pou uku buk arye, aning-aning nirya dibuka, sirya daklamle touk, Allah arye sik Asyur mutuku nang kanye arye, ‘Aning ara mambule,’ tenenyak ning nirya, kum kipdeipnalamlarya.
Nabi Yesaya birye, sik Israel yala nang ati nyabuk. Allah Yahweh arye, akunum nyapdeipsuk yupu ara, moubuka kekepnamlume! Ara, yata nang do nirya, sikce Allah nyalul yupu moubuka kekenamak nang ati nyapsine. Allah Yahweh arye, ‘Aning ara, wininamlume, aning ara, kum wininamlume,’ nyabuka nyasulul yupu nirya ara, moubuka kekebikirye, ‘Se, malye ubibiba, Allah arye wenepsilyakʼ’ tenen, ilil upliba, sirim talibikirye, el yupu uk moubuka talibikirye, dobolbanyak nang ati, nyapsine. Anggunce nati, diba tenibuka, ilil tenebuka moubuka ululume. Anggunce ululum bukni, yuk Yudea tam unyak nang, anggun dam unyak nang ara, anang arye anggunti, malye yupu nyapsikirye, ‘Anggun arye, ‘Allah ara, ila mambulnye ulula ati, el yupu uk talibuka unamyabe,’ nyabuka ululuma ati, nunce anggun ati, nun like. Anggun ap neika una ara, nun like,’ tenepsikirye, nalisinyake. Sik anang ara, nalibikirye, nyanamsiyake. “Wini talak ara, nunce moubuka dinamabe. Allah el mikip weik ap, el teleb una ap deice arye, el dirina, anggun dam lak sukum kipdeipliba, weik tonun kanye deipmunyopura, nun ton aning nirya eilinamabe,’ nyabuka, nalibikirye, ikik-ikik nyanamsiyake. Nyasinyak bukni, dipkoprob aminyan talak ara, ayupu nyanyak nang ara, na Allah arye, sik tibuk wenepniba, sik diamuk alye dakdanamaka atia.
Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.
Piblisite