Yesaya 26:10 - Eipomek

¹⁰ Malye ulamlinye biti, bico tenebuka, el malye ulamlye ning ati, kum wenebikirye, elti, telebuk kipdeibikcopura, amalye ulamlinye birye, ‘Teleb winin ning ara ani,’ tenebuka, nukuka kum kel biknamle. Diksukum teleb kibuka ulamak mutuku noutam, yuk nang arye teleb ulamaka babye, pia malye ninguk wininamle. Allah el pia teleb weik winilye ning ap, el mikip weik winilye ning ap ara, moubuka kum kel biklirye, Allah el si kum erenamle.

Yesaya 26:10 Referans Kwoze

Hosea 11:7

Na kele. Na mapu koprop arye, sik bidamnye winin ning atibuk tenebuka wininyakce, na batakaninyake. Sikce, ‘Kume, nun ni koprop Allah arye nyasilye yupu kum kekenamabe. Nun bidamnye tenenyap ninguk, ubuka wininamabe,’ tenenyake. Ati ara, anggun dam ikin ning weik yalyopura, anggunce nati, ‘Se nun ni koprop Allah, anda aning-aning deice tam umince, Weik Erenanye ulyama anya arye, nunti melipsilyame,’ nyabuka moropnice babye, pia kum kekenamne. Sikda pia malye winin ninguk, talibuka unyaka anya arye, na Allah arye sikti, lyepnirye, tuba tonap kum erepdeipnamne. Sikda yuk ninye amu tamuk unamake. Allah arye Israel ninye, sik wenena ati nyabuk.

Wahyu 2:21

‘Akil el malye winin ning nirya bataklirye, urasin tamubuka diksukumuk unamle’ tenen, lo areamse bukni, akilce, ‘Kume, na malye un ning pia kum bataknamne,’ tenelule. Elce kekena kumce, malye weik ulule.

Mika 2:10

Amalye-malye weik winilulum ning nirya ara, malye winiluluma ati, wini talak ara, anggun ululum mutuku noutam nirya ara, batakuka bindopnamlulume. Ara, anggun malye winimunye ning dekna ati, anggun wini ulamlum mutuku nirya ara, akunum dopropsine. Amutuku noutam kanye deibuka ulamlum bukni, wini talak ara, amutuku ati, ‘Nun mutuku koproba ara, asukum’ tenen, kum nyanamlume. Ara, urdem ati, kum nyapsine. Anggun pia malye winimunya deice arye, amutuku noutamak nirya ara, malye ning weik, delilulume. Ara, na yupu yanilamluma deice arye, anggun ululum mutuku nirya ara, anggunce akunum malye kililamlume. Ati, anggunda amutuku noutam ara, pia kum unamlume. Amutuku ati, ‘Nun mutuku koproba asukum,’ nyabuka, tuba kum nyanamlume. Na Allah arye, amutuku dalubuka dopropnamsina ati, nyapsine. Winipnamsen talak ara, imun kanye bobuka unamlume.

Yeremia 2:7

Na Allah arye, sik apu yapu utotoa weik teleb ubuka palamuk mutuku uk, boyanuka deiamse. Ara, ‘Winipnibuk, amutuku ukirye teleb kanye bobikirye, yala ning ayala-yala nirya koubuka dinamake’ tenen, teleb mutuku boyanamsise. Bukni, amutuku noutamak ara, malye ninguk talibuka ulamikba, narye arepsise mutuku ara pia malyeuk ulilamike. Ara, ‘Na tenena ninye arepneba, pia unamake’ tenen, arepsise mutuku, sik apu yapu arye pia malye ninguk talibuka ulamika deice arye, amutuku malye ulilamik.

Penghotbah 3:16

Na kam ulamse talak noutamak ara, dilamsirye na bikamse ning ton ani. Na kele, tukwak mutuku noutamak, keting amu tam mutuku-mutuku nirya ara, ninye yupu lipsisikuka bokolinak ara, Allah arye ‘Diksukumuk unyakce, teleb unamak,’ tenepsuk bukni, ninye tukwak mutuku nang arye, aning batakuka, tilila yupu nyana ap, malye un ning winina ap, aninguk pia unyabe. Aning atonun, Allah arye, ‘Pia diksukumuk unamak,’ tenelamsuk ning nirya ara, ninye tukwak nang arye, malye winin ninguk unyabe.

Amsal 1:32

Aning ara, talye ati kum nyapsine. Teleb un ning nirya ati, moubuka tenina kumce, walwal arye malye winin ninguk, talibuka unamak ninye nirya ara, sik bidamnye arye, malye wininyaka deice arye, olana atonun unamake. Sik bidamnye arye, sik bidamnye ati malye unyaka deice arye olanamake. Aning atonun, sik pia walwal uk unyak ninye ara, aning-aning nirya kel bikna kumce, ‘Weik kel bikna deiyok ning ara, nun like. Ayupu ara, talye yupu ati, dauplye’ tenen, unyak ninye nirya ara, sik walwal arye unyaka deice arye, opdanamake. Sik malye wininyak ning dekna arye, sik bidamang nanguk, malye kililanamake.

Mazmur 106:43

Atalak nirya, sik yuk-yuk nang arye, Israel yala nang talilamikba, ikin weik ulamik bukni, Allah arye, sik dam yayukce, lobuka lyeprobuk. Allah arye, Israel nang lyeprobuk bukni, tuba tonap, sikce sik bidamang talima noutam, ‘Allah arye nyasilye yupu, tuba kum kekepnamap’ tenen, Allah yaniltanauk winilamik. Tonda, sikce malye weik winilamika deice arye, Allah arye sikti, wenebukce, pia amu tam kipdeibukba, ikin deiceuk ulamik.

Ulangan 32:15

Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.

Keluaran 9:34

Atalak babye, Firaun dinmokba, weik dekne duk-duka purwu mok ap, talye mok ap, liman ap, adiparyuk tunimabukba eibuk. Eibukopura, pia mandipna kanye dobuka kum kekamna atonun malye kibuk. Ara, el ap, el amu tam pil dona deiyok nang ap, pia malye kibuka, winibuka talima kat ubik.

Keluaran 8:15

Anirya winibuk bukni, weiknye Firaun birye, yakai nirya akunum dibikba eibuk. Eibukopura, ‘Naie, winira kanam asa upsile,’ tenebukce, Allah arye winipmok ning kum tenebukce, el talima tuba kat kibuka malye kibuk. Allah arye, “Firaun malye kibuka wininamle,” nyabuk touk, Musa ap, Harun ap, sik nyaprik yupu kum kekebuk. Tuba talima kat kibuka, mandipna kanye bobuk.

Hosea 13:6

Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.

Hosea 9:3

Se, anggunda, Israel mutuku noutam ululum nango. Anggun ni Allah Yahweh arye, ‘Pia teleb mutuku arepsiniba, asukumuk unamlume,’ nyabuka, kintinipsukce areamsuk mutuku noutam ara, pia asukumuk kum unamlume. Efraim yala nang arye deiamikba, dadeipdanin yangalamikce, delinyak nang ara, amutuku kum unamlum bukni, anggunda adiparyuk tamubuka, Mesir mutuku uk binuka unamlume. Tonda, anggun yala nang bukni, yuk nang bokuka, Asyur mutuku bobisikiba, amutuku noutam arye, malye kwaning dinamlume. Ara, na Allah arye, ‘Na mapu ara, adin ning pia kum dinamake,’ nyapdeiamsisirye, ‘Aning dina ara, meme. Aning dipmunyopura, na dam ton kum yanamlume,’ nyapdeiamsise ninguk, talye mangkau asa dobuka dilulume.

Yeremia 31:23

Israel ninye, anggun ni koprop Allah Yahweh, aning-aning nirya talilulce, im deice yin talin malaikat nirya, sik weik deiyoknye kibuka ululnye birye, ayupu nyabuk. “Nara, Israel ninye ati, pia kalikuka melilamsise. Na mapu Israel ninye minop talak taleamse atonun ubuka talipnamne. Winipnyopura, Yehuda yala ninye unyak mutuku noutamak bukni, Yehuda mutuku asik dobuka, unyak ninye nirya ara, tuba tonap tamubuka nyanamake. ‘Se, Allah el si Yahweh arye, teleb kipdeipsiliba, nun winin ning nirya ara, pia telebuk winilinamsile. Yerusalem mutuku ara, malye winin ning ton kum ulule. Pia diksukum winin ninguk winilule.’ Amutuku ara, Allah arye, ‘Na tenen mutuku ani’ tenebukce, wipdeiamuk anya arye, ‘Amutuku ara, pia telebe,’ nyanamake.

Yesaya 27:13

Atalak ara, weik lelim nyalamle ning, el si terompet, lelim weik tonun pong-pong nyaplirye, yukupliba, sik Israel nang, minop talak Asyur mutuku noutam bobinamikba, daulamika ani, sik bisik wangamuk nang ap, tonda Israel mutuku noutam, Allah arye sik apu yapu malye ulamik ning ati, inibuka donokamukba, bindomikce, Mesir mutuku noutam binuka ulamik nang ap, sik anang nirya ara, terompet lelim kekepnamake. Kekebikirye, adiparyuk tuba tonap tamubuka, Yerusalem mutuku weik asikuk yakirye, pia teleb lek aikuk, Yerusalem mutuku deice tamubuka yakirye, sik ni koproba Allah Yahweh, el siuk yanuka erenamake.

Yesaya 24:5

Tukwak mutuku nirya ara, malye kipdeipnamle. Akunum winiplyopura, tukwak mutuku unyak nang nirya, amalye kipdeiplye mutuku tuku deice uk unamake. Ikin weik unamakak ara, talye ati kume. Deiyok ara, Allah arye, “Anggunda, na nyapdeipsise ning ara, ‘Aninguk pia talibuka unamlume. Aning ara, pia kum wininamlume. Tonda, teleb winin ning ara ani, malye winin ning ara ani,’ nyapdeiamse yupu ara, tukwak mutuku nang nirya arye, aning batakuka unyake. Narye, ‘Aning ara pia ati talibuka unamluma ati, tonoknye babye kum bataknamlume. Tuba talibuka upnamlume nyapdeiamse yupu ara, tukwak mutuku nang nirya arye, aning batakuka wininyake. Wininyaka deice arye sik unyak mutuku nirya ara, mining dam arye, malye kipdeipnamne.” Allah arye nyabuk.

Yesaya 5:12

Sik anang arye, weik kwalya kwalibuka dinmace talak ara, mot sena ati, lelim len ning, el si kecapi ap, gambus ap, tonda rebana ap, suling ap onmakirye, kanye wangalamak mek, anggur mekuk dinyake. Wininyak deice sikce, ‘Se, nun ni Allah Yahweh, elce amambul pil donamleʼ tenen, sikce elti, moubuka bita tenebikirye, el taruk arye mambul pil dolamuk ning ati, si kum erenyake.

Yesaya 2:10

Se, anggun amalye weik winilulum nang ara, mutuku kon bukamuka, amu tam keil bukamukak do, keil deiya pum tam do, amu tamuk weknamlume. Akumopura, sik anang ara, butbuta noutam arye amupdongopmunce, duknupnamlume. Deiyok ara, anggun amalye ululum nang arye, ‘Se, nun malye winin ning ati, Allah el yu weik ning deipsilirye, nun nong deice supnamsilʼ tenen, ilil weik unamlume. Tonda, ‘Allah el mikip weik ap, pia teleb ulya ap adeice arye, el dirine weik ulul ning, nun dam yanuka opsilyakʼ tenen, ilil kanye weik bonamlume.

Mazmur 143:10

Tonda, Allah ance, ‘Anye birye winipnamle ning ara, ani-ani,’ akunum tenelamnulum ning ara, ‘Ance peterepnutumba, biktinirye, aninguk talibuka wininamtinye’ tenen, moropkine na nio. Aning patapnila ara, talye ati kume. Deiyok ara, anda na ni Allah ulyame. An tibuk si erekiniba, ance na talinilyame. Ati, an pia teleb ulyam Pia Teleb, Lek Dip Kanye arye, elcuk, “Wininalyame, wininalyame,” nyabuka, peterepnuturye, menekuka balibuk, nara el aminyan tam yanuka, abisikuk banamne na nio. Elce peterepnilyopura, ikin ning ara, na dam kum yanamle. Teleb bisikuk banamne.

1 Samuel 15:17

Anyabuk touk, Samuel birye, Saul biti nyabuk. “Ura, minop talak ara, ance an bidamang ati, ‘Se, nara talye urdemnye,’ tenelalalum bukni, Allah arye, erebuka tikeipkukba, Israel ninye ayala-ayala nirya, sik ninye deiyoknye, Raja min wipdeipkuk do, kum do? Allah arye, ninye deiyoknye tikeipkukba umince, Israel ninye unyak mutuku nirya, talibuka ulyame.

Yesaya 32:6

Aning nirya bataknamluma ara, talye ati kume. Deiyok ara, nyapnusine. Ara, malye yupu uk nyalulnye bira, el talima pum tam ara malye ninguk ulul ati, kanye bona kumce talye yupu uk nyaltakalule. Aninguk kum bukni, tonda, yata ning do nirya, el winilul ning ap, nyalul ning ap nirya ara, Allah el si Yahweh ati, tilila yupu uk nyalulba, walwal nang kekebikirye, ‘Aning ara diba,’ tenenyake. Tonda, tenepce arye talye tilila yupu uk nyalula deice arye, din patanmaliba imun kanye bobuka unyak ninye ati din kum arelule. Aning atonun, mek patalibuk imun kanye bobuka unyak ninye ati, mek kum arelirye, mangkau kilolongana uk ulule. Anang nirya batakalongona uk ulule.

Matius 4:5

Nyabukopura, Isa Mutuku Dongonye arye, Yesus bobuka, Yerusalem mutuku Allah ati arelbalamikce, el si erelamik aik aruma deice deibuk.

Keluaran 9:30

Aning winipnamne bukni, na kele, an ap, an pil dona deiyok nang ap, anggun nirya ara, ‘Allah, el mikip weik ulule’ tenen, el Yahweh ati ilil kum usulule.” Musa arye, Firaun biti nyabuk.

Mazmur 69:27

Na ni Allah, aning ara, talye ati kum nyapkine. Deiyok ara, an mapu dib tenebice nang ati, “Malye upmale,” nyabuka, nun nong deice ikin ning deipsikirye, nalibuka akutusinyak nang ara, sik wenena ati, ikin ning delilyame. Tonda, an mapu wenepminba, sik nong deice ikin ning ulul ning ati, amalye wininyak nang arye, akutubuka malye nyasinyaka ati, ‘Aninye ara, weik arye wenepnalam’ tenen, moropkine.

Yesaya 32:7

Tilila yupu nyanyak nang ara, sik wininyak ning ap, tenenyak ning ap nirya ara, malyeuk wininyake. Sikce ‘Winiptibye,’ tenenyak deice arye ninye ati malye winilikirye, bona utotoa talina kum ninye ati wilibuka bokolinyake. Sik talye bona utotoa talina kum ninye arye, ‘Nun ton melinamsulume,’ nyabuka morobibye ning teleb ning uptua babye, kum melinyake.

2 Raja-Raja 13:6

Allah arye, Israel ninye ati, melibukba teleb ulamika babye, sik Israel ninye arye, malye winilamik ning ara, pia kum batakamik. Tuba malye wininauk ulamik. Ara, Raja Yerobeam elce taleamuk talak arye, malye upnin yangalamukba, sik babye malye winilamik ninguk, pia tuba aninguk talibuka, malye winilamik. Amalye winilamik ninguk, sikce taleamikce, talye isa ati, ‘Nun niʼ tenen, tuba si erepnin yangalamik. Adeice arye, isa si Asyera, si erena ati, cang yo dobuka, urasin teleb ubuka, puturubuka deiamikce, ikamik ning ara, tuba Samaria mutuku noutam awamuk.

Penghotbah 8:11

Aning ton eipsirye kel bikse. Ara yata deiyok ati, tukwak nang nirya arye, sik talima noutam ara, ‘Malye un ning ap, yu arye malye un ning ap ara, talye luparabuka winiptibye,’ tenen, wininyaka deiyok ara ani. Ara, sikce malye weik ubikiba, deiyok nang arye anang tomobuka, ninye yupu lipsisikuka bokolinak ara, minopce kum bobanyake. Tonda, sik malye ulamik ning wenen ning nirya ara, ‘Winipnamsiabe,’ nyabuka, talye nyanyak bukni, dipkoprob ning ara, minopce sik nong deice ikin ning kum delinyake. Ati, sikce talye mangkau arye malye ninguk tuba wininyake.

Yesaya 1:21

Minop talak Yerusalem mutuku ulamlum ninye nirya ara, ‘Na ka,’ tenebuka tonok kanye bobuka, nati kanye talima dukdongobuka ulamnulum bukni, wini talak ara, na bataknulumce, talye-talye yolalamak kilapu atonun ululume. Minop talak ara, diksukumuk ulamlumce, pia telebuk ulamlume. Ninye ati yupu lipsisikuka bokolilamlumce, teleb yupu uk nyalamlum bukni, wini talak ara, olan ninye uk ululume.