Tonda, anggun unamlum mutuku noutam arye, malye yupu nyapdakirye, olana uk kum unamake. Aning atonun, anggun unamlum mutuku ati, yuk pera mutuku yu nang arye, ‘E, Yerusalem mutuku ara, daklobibiba, kum datu’ tenen, ‘Aninye olbibirye, sik mutuku asik olonga uk kipdeipnamap’ tenen, kum unamake. Talye kanye bobuka unamlume. Amalye yupu ton nyabikiba, kum kekenamlume. Tonda, anggun mutuku Yerusalem asik antanabuka dopnamlum cang keil poka noutam ulamuk ning ara, ‘E wini talak ara, nun dana-dana tam apoka ulul touk, nun ni koproba Allah arye pia kalikuka lyesulule,’ nyabuka kanye delinamlulume. Tonda, anggun poka noutam potokolulum bublan wekenamak ninye nirya arye, ‘Se, Allah pia teleb ulule,’ nyabuka el si erebikirye, sik anyaik dam anyuk wekelyanganamake.
Yesaya 26:1 - Eipomek1 Allah arye tenyamlye talak akunum uplyopura, Yehuda mutuku noutam unyak nang arye amot nyanamake. Nun weik asik dobuka unyap mutuku ara, Allah el mikip aryuk nunti, melibuka kalikisulule. Nun lyena akuk kintinibuka aresulule. Ara, ninye arye asik dobikirye, dana-dana tam nirya, cang weik keil poka antapdongobuka domikce touk, Allah aryuk, nunti kalikisilirye, lyelosulule. Gade chapit la |
Yesaya 26:1
34 Referans Kwoze
Na Allah Yahweh arye, “Im sirya, mutuku sirya, ara tukwak mutuku sirya, im sirya nirya, unyak nang nirya ara, ‘Ayupu kekepnamakʼ tenen, ayupu nyapdeipse. Anggun nirya ara, Sion mutuku unyak nang, ara Yudea tam nang nirya ati dilulume! Anggun lyena deiyoknye, Allah akunum yanmasile! Nara, menekuka yanamanba aminyan ara, na mapu koproba, min arye yuk pera mutuku bobinamik bukni, winida narye akunum lyepdopsi Israel nang, melibuka yanganmake! Sik Sion mutuku unyak nang nirya ati, ayupu lak nyapnamlume,” nyapsine.
Bukni, keil poka antanap dongopnamak ning ara, kum patapnamle. Deiyok ara, na Allah Yahweh arye, naryuk amutuku noutam ara, talibuka unirye, weik keil poka tembok antanap dongolamak touk ubuka, uku buk dilirye, antanap dongobuka ulamle touk winipnamne. Ara naryuk, amutuku ap, amutuku unamak nang nirya ap ati, melibuka kalikinamne. Tonda, amutuku noutam ara, na mikip weik ap, na teleb weik unilye ning ap, na weik dirina ap, deice aryuk, pia mambul mutuku unamle. Allah arye nyapnuke.
Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!
Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!
Ati ara, Sion mutuku unyak nang nirya ara, kanye deibuka unamake. Tonda, Yehuda noutam unyak nang nirya ara, kanye deibuka, ‘Telebe,’ nyanamake. Ara, talye ati kum bukni, deiyok ara ani. Sikce, an pia teleb kibuka ulyam ning nirya ati, moubuka tenepdekirye, ‘Se, Allah ara, elce, ‘Aning ara, wininamlume, aning ara, pia kum wininamlume,’ nyapdeiamsuk yupu atonun, ubuka ulule,’ tenebikirye, anti kanye delinamake.
Na nio, anti diba tenekinyak nang nirya ara, an dam dungnup deipsimince, ancuk dungnubuka kalikinamsilame. Ara, ‘Malye wininyak yu nang arye, ‘Naʼ tenen nang obikcak’ tenen, anti diba tenekinyak nang nirya ara, an damuk dobuka deipsiminba, telebuk wininamabe. Winibuka, an damuk deipsiminyopura, yu nang arye, malye yupu yanuka, kum nyapsitinge.
Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.
Allah arye, aning nirya akunum winiplyopura, anggun Israel nang arye, mot nyapnamlulume. Anggunce nyanamlum ning ara, ani. “Se, nun ni Allah Yahweh, nunce antibuk, teleb nyapkiyabe. Ara, ikin kanye bobuka ulamupu bukni, ance nun kanye kwa dipsulumce, mikip kipdeipsulume. Minop talak ara, ance nun malye ulampu ning ati, yu upkukba, weik arye wenyamsulume. Bukni atalak ara, ance nunti, yu tenyamsulum ning ara, akunum kum kipmakila ati, kanye deipsilame.
Tonda, asum akunum winiplyopura, ninye nirya ara, sikce talilamik dekna weik kat ning, perak ap, emas ap, dopromikce, ‘Isa si erepnamapʼ tenen, aning deice arye, ninye urasin atonun kibuka, memepdeiamik ning, isa si erena ati, talye ning nirya ara, adiparyuk batakuka bindopnamake. Winipnamaka ara, sik anang ulamicak ara, yamba maka ap, bai tam balamle ayam mana ap ulyakuk, isa si erena ati, memebuka delinyak patung ara, batakuka bindopnamake.
Na dipkoprob nyapsine. Yata nang do nirya, sik kanye erebikirye, sik asing erebuka dilenyak nang ap, tonda, ‘Nunda pia mambulʼ tenen, kwalinyak nang ap ara, Allah arye, sikda amu tam kipdeipnamsile. Winipsiliba, anggun alye dakdamunce, ikin kanye bobuka unamlume. Atalak akunum yalyopura, Allah arye weneplirye, kanye erena deice arye, kwalinyak nang nirya ati, wibuka amu tam kipdeiplye nang, mutuku sirya, im sirya nirya arye, Allah el tibuk, “Se, mambule, pia teleb ululnye bira, el uka,” nyabuka, Allah el siuk erenamake.
Winibikopura, Allah el si Yahweh ati kanye deibukabikce, “Allah ara, pia teleb ulula anya arye, ‘Telebe,’ nyababe,” nyabuka, el si erebuka mot senmek. Amot noutamak senmek yupu ara ani. “Nun ni Allah, anda pia teleb ulyame. Ance nun Israel ninye ati, pia kum batakasimince, bico tenebuka melisilyamnye,” nyabuka mot senmek. Mot akunum sebikopura, Allah el si eren aik ayukumna ati, weik pala keil yangabuka, tuku pum bisik ayukumna yo deibik. Akunum deibikopura, anyaka bulubuka unmek Israel ninye nirya arye, sik ni koproba Allah, el si Yahweh ati, weik yupu arye el si erebikce unmek.
Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.
Atalak anggun Pilistin mutuku noutam, weik asik dobuka ululum nang ap, anyasik dolamik bisik bublan wekelban dam bulubuka, yupu sisikilulum deiyok nang ap nirya ara, talima uk dipsilyeba, engepmunce, “Se, yatanye birye melipsutu do?” nyabuka, ngalunamlume. Deiyok ara, anggun mal olan nang, sik yin nang yupa weika arye, iknapye tam arye (arah utara) kintinibuka yangakirye, tuku deice yanibiceba, tuku buta welepnamle ning ara, dua bum kibuka, welelamle touk upnamle. Sik ayin nang ara, tonoknye babye, namin arye kum yanamle. Sik mal olan nang nirya, neikauk bikbik abuka yaceba, eipmunyeura, ilil weik upnamle.
“Narye nyapniba, yu nang arye olyanamsiyak bukni, aminyan talak lyepnamsinarya. Winipmanto ara, Bip maka ona arye, el mi waluk deiamlyak kalikna ati, lakuka balamle touk, na Allah arye, anggun Yahudi yala ninye nirya ati, kalikuka disunune. Tonda, maka arye duk deibuka irilamlirye, el pol arye siknilongolamle touk, na Allah arye, anggun Yerusalem mutuku umunye ninye ati, pia melibuka kalikinamsine. Winibuka melinamsina ati, anggunda yuk pera mutuku nang arye, anggun nirya obuka sirya kum dakanamsiyake. Yupa mitik tonun tuba kam unamlume. Na Allah Yahweh, aning-aning nirya talibuka deice tam unirye, pia mikip weik erena deiyoknye unune. Nara, im deice yin talin malaikat nirya, sik weik deiyoknye ununa ati, ‘Na tenena ninye kum danikcak’ tenen, anggun Yerusalem mutuku noutam umunye ninye noutamak arye, ninye yupa mitik tonun diamuk lyepnamsine.” Allah arye nyapdeibukba, Yesaya birye sekuk.
Asyur mutuku yu nang obuka sirya daknamne talak ara, yin talin nang sik deiyok nang nirya, ilil weik upliba, kwarabuka bikbik abuka bindopnamake. ‘Yuk mutuku nang arye, kum opnamsiyake’ tenen, domik keil aik nirya ara, batakuka bindopnamake. Tonda sik yin talina deiyok nang nirya arye, sikti, olyanuce nang bendera eibicopura, weik ilil upliba, sik ning nirya batakuka, bikbik abuka bindopnamake. Na Allah Yahweh arye ayupu nyapmasina ati, aning nirya pia dipkoprob upnamlarya. Na Allah ara, na weik mambul uku Sion mutuku noutamak tuba pakalule. Tonda, na weik mambul winira, Yerusalem mutuku noutamak tuba pakalule. Allah arye nyapdeibukba, nabi Yesaya birye sekeipsuk.
Allah arye anggun Israel mutuku ninye ati melisilya deice arye, pia teleb kibuka unamlume. Ilil una pia kum diparyuk, kanye lamapdongobuka unamlume. Elce arenamsila deiyok ning ara, mitik tonun kum bukni, pia weika arye arenamsile. Ara, ninye lyena deiyok ning ap, aning nirya kel kina deiyok ning ap, ‘Wininamaba,’ tenebikirye, dipkoprob una deiyok ning ap arenamsile. ‘Aning nirya doproptibnye,’ tenepmunyopura, anggun ni koproba Allah Yahweh atibuk, ilil upsiliba, el siuk erebuka kisal donamlulume. Winibuka umunyopura, aning nirya arenamsile. Kumopura, kume.
Sikce aning nirya akunum winibikcopura, nara, Yerusalem mutuku noutam bukni, na si eren aik pum tam arye, ‘Sik si ap, sikce winilamik ning ap ara, ninye nirya tuba teninamakʼ tenen, lak bikilin ning ton deipnamne. Yuk nang nirya ara, aning eibikirye, bikikcopura, ‘Se, sik asi sekeiamuk nang ara, dipkoprob mambul teleb weik nang ulamik. Allah el mapu koproba babye, mitik mambul unyak bukni, dipkoprob anang ara, pia teleb mambul weik nang ulamik,’ tenenamake. Tonda ‘Teleb ning ara, nunce mapu ap, kilmapu ap, deiptibyeba, nun si pia tuba aupnamsil bukni, dipkoprob weik mambul ning ara, Allah arye anang, sik lak kilin ning deibuka ati, sik si pia tuba tenenamabe,’ tenebuka nyanamake. Na Allah arye, sik anang si dobuka, na aik pum tam deipniba, anggun si aupmasilyopura, tuba bikinamsine. Winibuka anggun si akunum deipnyopura, narye anggunti, kum bataknamsine, Pia ati, aupnamsile, nyapsine.
Anggun Yerusalem mutuku ululum nango, anggunda, Yerusalem weik asik arye batakuka, bai tam bisik bana ati, bublan bisikuk kutuksakuka banamlume. Anango, anggun ululum mutuku batakuka, bai tam bana ati bisik bublan ara, kukmunce, kirikuka bai tam binamlume. Tonda, anggunce tuku palipmunce, erebuka teleb pala bisik yapdeipnamlume. Ayapdeipnamlum bisik noutam wamlye keil kurukmunce, yukak donoknamlume. Deiyok ara, pera mutuku nang arye, ‘Yerusalem mutuku unamak nang ati, batakikirye, melibuka boyanamakʼ tenen, anggun Yerusalem nang babye, ululum mutuku yanganamaka ati, pala bisik noutam belebuk keil ara, kwinibuka dongopnamlume. ‘Pera mutuku nang yanuka eipnamakʼ tenen, “Yerusalem mutuku yangan bisik ara, ani,” nyabuka, sekmunce, lak kina ati, pala kain deice sekmunce, abisik deice spanduk bibikuka deipnamlume.
Nyapnukba, narye aning nirya dinmasirye, eipse ning ara, ani. Allah el si eren aik dam bukni, bai tam dana-dana tam nirya ara, cang weik keil poka akunum dobuka antanap dongamikba eipse. Dinmasiba, awelnye birye, cang weik kiklin pina bopmuk ning, el cang ara 3.12 meter bopmuk. Abopmok pina arye, ‘Akeil poka el cang ara, tukwak arye dipdongobuka eitam ara, yata barye ubuk do?’ tenen, tukwak arye, akeil poka deice tam kiklinmok. Tonda, ‘Akeil poka ara, el pala weik ning deibuka domik ning, tebal nyalamaka ara, yata barye ubuk do?’ tenen, apoka pala ati kiklinmok. Wininmokba, akeil poka, tukwak arye dipdongobuka deice tam, el cang ara, tonok pina arye kiklipdeyukura, 3.12 meter kibuk. Atonun, apoka el pala babye, tonok pina arye kiklipdeyukura, 3.12 meter kibuk.
Ati ara, anggun nirya kekeplulume! Wini talak ara, na Allah arye, sik yuk mutuku-mutuku nang arye, na mapu koproba ati, ikin ning delilamik nang ati, opnirye wenepnamnarya! Amutuku-amutuku nang nirya, akunum opnirye, sirya daknyopura, sikce minop talak obukabikce, tapu koupdongobuka bobinamikce, pia ikin pil dilamik nang, anang arye tamubuka, sik Babel mutuku nang ap, yuk mutuku yu nang ap, obuka sirya daknamake. Sik minop talak arye, ikin ning boyanuka delilamikba, kanye imun ulamuk nang arye, tamubikirye, sik bobinamik mutuku deiyok nang ap, sik tam nang ap obikirye, sik amu tam deipnamake. Allah arye nyabuk. Tonda, Allah arye laka nyapdeipnukba, narye anggun kekena ati, laka nyapmasinanye, nabi Zakaria, nati ton moubuka biknamnulume. Ara, Allah arye, ‘Winipnamne,’ nyabuka, laka nyapnuk yupu nirya, akunum nong uplyopura, anggun aululum nang nirya arye, na Zakaria biti biknamlume. Ara, anggunce, ‘Se, dipkoprob, im deice unyak yin talen malaikat nirya talibuka, ulula deiyoknye birye, nabi Zakaria dobuka, nun dam dopdeipsukba, elce laka nyapsuk yupu nirya ara, akunum nong upliba eipmap atia,’ tenemunce, nati, ‘Yo, elda dipkoprob Allah aryuk, dopdeibukba, nun dam yanuka, laka nyapsuke,’ tenepmunce, diba tenepnamlume. Nabi Zakaria birye nyabuk.