Allah arye, ‘Ninye nirya, olana kum arye, teleb kanye bobuka, yuk ninye ap, neika teleb unamak’ tenen, teleb una ati deiyok ning arisululnye ulula anya arye, elcuk melisilyeba, yuk ninye ap teleb ubuka neika unamabe. Allah arye, “Na ap, ninye ap, teleb ubuka neika unamabe,” nyabuka nyalilamsuk yupu, ninye lyena yupu ara, Yesus el ining biyuka deice arye, sirya dakuka ansinipdeipsuke. Yesus obikba dibuk bukni, Allah arye Yesus tamubuka kam bukdeibukba, Yesus ara, kam tuba ulule. Allah arye nun lyena ati, nyalilamsuk yupu ara, kume kum danamle. Aning ara, pia aunamle. Winipmanto ara, sik domba weina deiyok nang arye, sik domba ati, teleb-teleb kibuka weilamak touk, Yesus arye nun diba tenenyap ninye ati, pia teleb kibuka melibuka kalikisulule.
Yesaya 24:5 - Eipomek5 Tukwak mutuku nirya ara, malye kipdeipnamle. Akunum winiplyopura, tukwak mutuku unyak nang nirya, amalye kipdeiplye mutuku tuku deice uk unamake. Ikin weik unamakak ara, talye ati kume. Deiyok ara, Allah arye, “Anggunda, na nyapdeipsise ning ara, ‘Aninguk pia talibuka unamlume. Aning ara, pia kum wininamlume. Tonda, teleb winin ning ara ani, malye winin ning ara ani,’ nyapdeiamse yupu ara, tukwak mutuku nang nirya arye, aning batakuka unyake. Narye, ‘Aning ara pia ati talibuka unamluma ati, tonoknye babye kum bataknamlume. Tuba talibuka upnamlume nyapdeiamse yupu ara, tukwak mutuku nang nirya arye, aning batakuka wininyake. Wininyaka deice arye sik unyak mutuku nirya ara, mining dam arye, malye kipdeipnamne.” Allah arye nyabuk. Gade chapit la |
Yesaya 24:5
49 Referans Kwoze
Winipnamle talak ara, el anye birye, Weik Erena Deiyoknye Allah, aning-aning nirya deice tam ululnye, Allah ati, malye yupu nyanamle. Malye yupu nyaplirye, Allah el wipdeiamuk nang ati, pia ikin ning, sik nong deice tuba delinamle. Winiplirye, Allah arye, ‘Aning wininamlulume. Aning ara, pia kum wininamlulume,’ nyapdeiamuk mem yupu ati ara, amalinye birye yanipnamle. Tonda Allah arye, ‘Na tenyamse talak ani,’ nyabuka, el si eren ati nyapdeiamukba, el mapu arye, el si erenamak keting tamun ap, wala ap, asum ara, ‘Kum kipdeipnamle’ tenen, piripdenamle. Winibuka unamle talak noutamak ara, Allah arye, el mapu dobuka, amalye weik deiyoknye ati, arepnamle. Ara, pia diba kum bukni, tia talak ati, Allah el mapu pirilena ati, anye el amu tam deipnamle. Atalak ara, keting tamun winilye ap, tonok ning noutamak ap deice arye, amalye deiyoknye birye, Allah el mapu talinamle.
Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk.
Amalye-malye weik winilulum ning nirya ara, malye winiluluma ati, wini talak ara, anggun ululum mutuku noutam nirya ara, batakuka bindopnamlulume. Ara, anggun malye winimunye ning dekna ati, anggun wini ulamlum mutuku nirya ara, akunum dopropsine. Amutuku noutam kanye deibuka ulamlum bukni, wini talak ara, amutuku ati, ‘Nun mutuku koproba ara, asukum’ tenen, kum nyanamlume. Ara, urdem ati, kum nyapsine. Anggun pia malye winimunya deice arye, amutuku noutamak nirya ara, malye ning weik, delilulume. Ara, na yupu yanilamluma deice arye, anggun ululum mutuku nirya ara, anggunce akunum malye kililamlume. Ati, anggunda amutuku noutam ara, pia kum unamlume. Amutuku ati, ‘Nun mutuku koproba asukum,’ nyabuka, tuba kum nyanamlume. Na Allah arye, amutuku dalubuka dopropnamsina ati, nyapsine. Winipnamsen talak ara, imun kanye bobuka unamlume.
Nun ni Allah an nyapdeiamsulum yupu kekebuka, kum wininyabe. Se, nun ni Allah Yahweh, ance, ‘Aning ara, wininamlulume. Aning ara, pia kum wininamlulume,’ nyapdeipsulumba, an amu tam pil don nang, an yupu lak lena nang, nabi-nabi nang arye, nun dam laka nyalamsik bukni, nunce aning nirya kekebuka, kum winilamupu touk, tuba kum wininyabe.
Ara talye ati kume. Aning nyapsa deiyok ara, ani. Sik Israel nang nirya ara, ‘Allah arye nyasilye yupu ara, nun like,’ tenelamikce, na yupu moubuka kekena kumce, yaniltanauk ulamike. Tonda narye, “Aning ara, winina teleb ning, aning ara winina mem ning,” nyapdeipse yupu ap, “Anggun nirya arye, ayupu moubuka taliplumak arye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, bataklamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning mambul weik,’ tenena kumce, asum noutam arye, pia malye weik winilamikce, malye ulamik. Tonda, anggun apu yapu arye, talye ning ati, si erelamik isa si eren ning, patung-patung dobuka, si erelamik ning atibuk, sik babye, ‘Aisa aryuk melipnamsiakʼ tenen, dilamikce, aning siuk erelamik.
Aning-aning nirya nyapdeipse bukni, sik Israel nang nirya ara, aweik kata mutuku noutam, padang pasir mutuku noutam arye balamik talak nirya ara, ‘Allah nyasilye yupu, nun like,’ tenelamikce, na yupu moubuka kekena kumce, yaniltanauk ulamik. Tonda narye, “Aning ara, winina teleb ning, aning ara, winina mem ning,” nyapdeipse yupu nirya ara, “Anggun nirya arye, ayupu moubuka taliplumakarye, moubuka tenipmunya deice arye, anggun pia kam tuba unamlume,” nyapdeiamse yupu nirya ara, batakanauk ulamik. Tonda, narye, “Amambul sum, Sabat sum noutam ara, talye pil dona kumce, dikdik sebuka, na siuk erenamnulume,” nyapdeipse sum ati ara, ‘Aning ara, mambul weik,’ tenena kumce, asum noutam arye, malye pia weik ulamikce, malye winilamik. Malye weik winilamik ati ara, narye, ‘Ura akunuma, apata mutuku noutam aryuk, anggun malye winin ning ati, yu weik usilye ning ara, sik nong deice deipnirye, sikti, weik tonun wenebuka oplopnirye, sirya daknamne,’ tenipsirye, akunum kintinipse.
Sik anang ara, ‘Nun mutuku tamubuka binuyabʼ tenen, bisik banmakcak arye, aulamice nang ak, ‘Sion mutuku balamak bisik ara, dan sukum ubuk do? Anggun ton laka nyapsutum do?’ nyabuka, asipnamake. Asibikiba, ‘Sion mutuku balamak bisik ara, ani,’ nyabuka, laka nyabikcopura, sik Israel yala nang nirya ara, abisik eibikirye, abinamake. Winipnamak talak ara, sik anang arye, ‘Allah Yahweh ap, nun ap neika pia unamabeʼ tenen, narye, “Aning ara, wininamlume, aning ara pia kum wininamlume. Na yupu moubuka kekepnumunyopura, narye pia teleb kipdeipnamsine,” nyabuka, nyalin yupu deice arye, akunum nyapnyopura, anyapdeipnamne ning ara, sik anang arye, luba kum kipmanake. Sikce, ‘Diba ance nyapmasilam ning ara, pia moubuka talibibirye, wininamabe,’ nyabuka, nyalin yupu arye nyanamake.
Na Allah Yahweh arye anggun Israel ninye, na mapu ati, nyapsine. Se, Israel ninyeo, anggunda na mapu koproba ululum bukni, anggunce tenemunya ara, ‘Allah arye nun akunum bataksuke,’ tenelulume. Ati winipmanto yupu deice nyapnune. Ara, el akanye birye, el domlye kil bataknulye ati, laka nyabuka sekelin surat, sekuka areplirye talye bataklamle touk, anggunti bataklamsise do? Winibuka batakamsitinye toura, domice kil bataknukca ati laka nyabuka sekelin surat sekuka delilamakto ning ara, dan sukum do? Aning kum ulule. Yuk domon yupu ton nyapnune. Ara, el li birye, ‘Yuk nang ning arepnamsinca,’ nyapdeipliba, aning deiyoknye birye, ‘Minopce arepnilyame,’ nyabuka moropliba, el yo bok kum anya arye, aning pununa ati, el mi uk dobuka arelbalamak touk, anggunti winilamsise do? Aning ara dipkoprob kum winilamsise. Bukni, anggun bidamang malye ulamluma deice, narye nyapsiba, yu nang arye anggunti obuka sirya daksikba, ikin ning dololamlume. Anggun minop talak malye ulamluma deice, yu nang arye anggun Israel ninye tapu koubuka bobinamsike. Ara, urdem ati kume. Anggun malye ulamluma deice arye dekna arelamsise.
Na kayapu Israel nang ara, sikce na nyamse yupu kum kekenyakce, narye, ‘Teleb winin ning ara ani,’ nyanun yupu nirya babye, yaniltakanyaka ati, Asyur mutuku nang dopdeipsinyeba, Israel tam nang olbinamake. Israel nang arye, malye weik unyakba, na yu weik upnuka ati, narye sik Asyur mutuku nang ati, “Sik Israel nang ara, adiparyuk olbinulumume,” nyabuka, sik Asyur mutuku nang dopdeipsiniba, na mapu koproba Israel nang ati, obuka sirya daknamake. Tonda, sik anang obikirye, sik talinyak bona ara, binuka dalubuka dopropnamake. Sik Asyur mutuku nang arye, na mapu koproba Israel nang ara, talye bisikak buta yanilongolamuk touk kibuka, obuka yanipnamake.” Allah arye nyabuk.
Tonda anyapdeiamuk yupu uk, ‘Tuba aupnamle’ tenen, ila tamubuka Allah arye Yakub el dam yayukce, “Minopce nyapkise yupu ara, dipkoprob nong upnamle,” nyabuka, tuba tonap nyapdeibuk. Ara, Israel ninye nirya arye, ‘Ayupu uk pia moubuka tuba-tuba tenena arye, teleb kipdeipnamsine’ tenen, yanuka nyapdeibuk.
Allah arye nyamuk bukni, Manasye pil dolamuk ning deice arye, Yehuda tam mutuku nang nirya babye, ‘Kume, nun deiyoknye winilul touk, nun ton winipnuyapʼ tenen, winilamik. Ati, Manasye birye, Allah dam malye weik ulamukak, ‘Aning ara, na like,’ tenelamuk. Bukni, Israel mutuku nang, Kanaan mutuku wekikura, Kanaan mutuku ninye ara, Allah arye, “Yuk mutuku binulume,” nyapdeiamuk nang nirya ara, walwal arye mitik malye ning ulamik bukni, asum arye, amutuku ulamik nang arye, dipkoprob pia malye weik winilamik.
“Tenipdelulume. Narye deipseba, dadeipdanin yangalamik nang, na yala ninye ara, Allah arye sikti, ‘Telebe,’ tenebuka, kanye kum delilul do? Anggun kele, Allah arye nati, “Winipnamsine,” nyabuka, nyalina yupu nyalilamsuk yupu ara, kum bataknamle, pia aunamle. Allah arye, ‘Wininamne,’ tenelamnuk ning nirya ara, tonok ning babye kum bataknamle. Elce tenepnuk ning nirya, dipkoprob na ap, na yala ninye ap ati, winipnamsile. Aning atouk, elce lyepnamnil ning ara, dipkoprob winipnamle. Tonda, na patalamnil ning nirya ara, elce tonok ning babye kum bataklirye, nirya arepnamnile. Nyalilamnuk ning nirya ara, kum bataknamle, aning nirya akunum kintinibuka arepnamnile.” Raja Daud birye nyabuk.
Atalak noutam ara, Yosua birye Sikem mutuku unmek talak, Allah arye Israel ninye ati, ‘Wininamlum, wininamlum,’ nyapdeiamuk yupu ton, sekuka arebuk. Ayupu deiyok ara, ‘Sik ap, Allah ap, pia teleb kibuka niktoto unamak’ tenen, ayupu sekdeibuk. Ara, ‘Allah el yupu nirya nimalye arye, kekebuka unamak’ tenen, winibuk.
Yu ubuka ati ara, Allah arye nyapsuk. Sik dam arye, na nong ara duknupniba, sik tonap kum eipnamniake. Winipniba, sikda upra balamikca, sirya talak ara, ‘Yata wiripnamak do?’ tenen, dinamne. Sik bataknamna ara, talye ati kum bukni, deiyok ara, sik wini talak unyak nang ara, dipkoprob ning ton, kum wininyake. Malye mapu arye, sik ni yapu kum kekekirye, malye ninguk winilamak touk, atalak ninye arye, na batakuka, na nyapse atonun kum dukdongobuka unyaka ati, narye sik bataknamne.
Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.
Aning ati ara, na Allah Yahweh arye nyapsine. Narye, “Aning ara, wininamlume. Aning ara, pia kum wininamlume,” nyapdeipsise yupu moubuka talepmunyeura, telebuk unamlume. Kumura, anyapdeipmasin ning talipmunyakarye, malye winipmunyopura, ninye duklamak atonun, narye bobuka, Kanaan mutuku bin deipsinyeba, unamlum mutuku noutam arye, yakniba yukak binamake.
Bukni, nun malye wininyap ninye ara, Allah ance nunti, “Aning winina meme,” nyapsulum bukni, aninguk tamubuka wininyabe. Tonda, ance, “Aning ara, wininamlulume. Aning ara, pia kum wininamlulume,” nyapsulum yupu yaniltabirye, batakanyabe. Winibya deice arye, an nyapdeiamsulum ning nirya ara, akunum batakupe.
Na Allah ap, sik Israel ninye nirya ap, ansinibuka telebuk una ati, nyalina yupu tonok ning nyapdeipnamne. Ayupu ara, pia min kume kum danamle yupu anya arye, pia aunamle. Winipnyopura, narye sikti, pia melibuka kaliklamniba, pia telebuk unamake. Nara, sik dam unirye, sikti, melinamna deice arye, sik yupa weik arye, tonap tabakuka upre banamke. Aunamak mutuku noutamuk, na si eren aik dopdeipniba, pia ati asukumuk unamle. Na siuk pia erenamniyake.
Ati ara, Allah Yahweh arye, amutuku ulamik wel nang nirya ap, amutuku noutam ulamik youwak kilapu ap, amutuku ulamik kwaknamne mapu ap nirya ara, Allah arye, ‘Se, sikda na bico ati, amutuku nang kum wenepnamne,’ kum tenebuk. Akum bukni, sik nirya ati talye wenebuk. Winibuk ning ara, talye ati kuma. Deiyok ara, sik atalak ulamik Israel nang nirya ara, malye winin ninguk talibuka ulamikce, Allah ati kum tenelamik. Elce, ‘Aning wininamlume, aning ara, pia kum wininamlume,’ nyapdeibuk yupu nirya ara, kekena kumce, yaniltalamik. Tonda, sik nirya ara, talye-talye yupu ap, deiyok ton una kum yupu ap, talye nyalamik. Ati, Allah bico kum tenebukce, el yu ubukba, anang nirya ati wenebuk. Allah arye, sik Israel nang ati, ikin ning weika arye, sik nong deice deiamuk bukni, narye, ‘Yo, akununaʼ tenen, el yu ara, kum bapdongamuk. Elce tuba yu ubukba, el taruk mikip arye, Israel yala nang ati, tuba wenelamuk.
Winibuka sekenamlulume. Amutuku ninye ara, kekena kumce, Allah ati malye kibuka, bisina uk unyak ninye anya arye, sikda talye kanye bobuka, Allah arye, ‘Winiplulume,’ nyabuka, peteresilye yupu kekebuka kum unyake. Aninye ara, tilila yupu uk nyalanyake. Tonda, na Allah Yahweh arye, ‘Winiplulume,’ nyaptinya babye, na yupu pia kum kekeninyake.
Wini talak ara, weik bisik balamicak nirya ara, talye lo uk upmale. Wini talak ara, anggun mutuku noutamak nirya, ‘Asyur mutuku nang arye opsicak’ tenen, abisik-abisik nirya talye lukparabuka kum balulume. Bisik nirya kum banyaka ara, urdem ati kume. Ara, Asyur mutuku deiyok nang arye, ‘Kume obuka sirya kum daknamsiabe,’ nyabuka, minina yupu deice arye nyapdeiamik bukni, ayupu akunum batakikirye, ‘Dauplye, anang ara olbinuyabe,’ tenenyake. Sikce nyalilamik talak ara, yuk nang ton kekelamik bukni, ‘Aning ara mambule,’ tenena kum diparyuk, batakanye.
Allah arye, sik Israel yala nang ati nyabuk. Ura, dipkoprob nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye birye nyapsine. “Ara, anggun Yerusalem mutuku ululum nang, anggun wenena ati, weik ikin bobuka, anggun deice deipnamsine. Aning ara, angguncuk, pia malye weik winilamlum ning deice aryuk, wenepnamsine. Anggunda, pia malye winilamlum touk, narye pia ikin weik ning kipdeipsinya deice arye, wenepnamsine. Min talak ara, narye anggun Israel yala nang nirya ati, ‘Winibuka melipnamsine. Tonda, narye, ‘Aning ara, winipnamlume. Aning ara, pia kum winipnamlume,’ nyapdeipsinyeura, aninguk talibuka winipmunyeura, weik tonun ton melinamne,’ nyabuka, nyalin yupu deice arye nyapdeiamsise. Nyapdeiamsise bukni, angguncuk aning nirya ara bataknulume. Narye nyalin yupu arye nyapdeiamsise ning ara, anggunce, ‘Aning ara, nun like. Aning nirya kum talibuka wininamabe,’ nyaplumce, yanilamnuluma deice arye, malye weik ululume.
Ati, anggun min talak taleamlum mutuku nirya ara, dikdik sena atonun talye daunamle. Anggunda, amutuku talibuka ulamlum talak nirya ara, Sabat sum deice dikdik sena atonun, keting tamun kum arelamluma ati, amutuku deice ara, wa wina ap, yala kouna ap, pana ap, dola wena ap, lina ap, pia winilamlume. Ati, wenen ning, anggun deice deipsinyopura, yuk pera mutuku bobisikiba, daunamlum talak nirya ara, anggun mutuku dikdik sena atonun talye daunamle.
Winipmanto ara, Israel nang anggunce, Allah Yahweh arye nyapdeipsuk yupu moubuka kum talipmunce, ayupu batakuka, yuk talye isa si erepmunce, yuk yala nang arye, talye si erenyak ning do, yuk mikip ning do, anggunce, ‘Aning ara, melipsitingeʼ tenen, sik dam binuka, sik si erena ati, kutam tuku dinik dongobuka, kipmunyopura, nun ni Allah Yahweh arye, anggunti yu upleba wenepsilirye, ikin ning anggun nong deice deipnamsile. Ara, akaren aryuk, Allah arye anggunti, “Teleb mutuku unamlume,” nyapdeiamsuk mutuku, akunum arepsuk bukni, aululum mutuku noutamuk, Allah Yahweh aryuk, wenebuka opsilirye, kum kipdeipnamsile. Yosua birye, sik Israel nang, yala-yala nirya ati, ayupu nyabuk.
Ati ara, na anggun ni koprop, Allah Yahweh arye, anggunda ‘Naʼ tenen, kanye deiamse ninye, yala-yala nirya ara, anggun Yehuda tam ululum ninye babye, Israel tam ululum ninye babye, nara anggunce, na si erenamnulum, na Yahweh arye nyapsine. Weik ikin ning dobuka, sik Yehuda yala ninye deice ap, Yerusalem mutuku unyak ninye ap ati, sik deice deipnamne. Winipniba, aning eibikirye, ninye arye, yuk ninye ati eibikiba, kekebikirye, ilil weik upliba, imun kanye bobuka unamake.
‘Aning nirya ara, wininamlarya,’ nyapmasina ara, talye ati kum nyapne. Deiyok ara, narye, na mapu koproba Israel ninye ati wenepnirye, sik deice ikin ning deipnamne ara, sikce na dam malye un ninguk, pia talibuka unyaka atia. Ara, Israel ninye ara, sik apu yapu ati, Mesir mutuku noutam ikin weik ulamikba, narye lyebuka bobinamse bukni, atalak arye dipdongobuka, wini talak babye, sik ap, sikce deibikba, dadeipdanin balamik ninye arye, malye weik ukiba, na dam ati, yu kililamnik touk, sik atalak unyak ninye arye, tuba na damuk tuba yu kilininyake. Ati, sik dam arye wenebuka, kanye imun weik ning deipnamne.
Ura, min talak anggun apu yapu arye, na nyapdeiamse yupu moubuka kum taleamikce, malye kanye doubuka, malye-malye winilamik touk, sik asukum unyak nang babye, atonun akunum malye wininyake. Ara, sik anang arye talye ning ati, ‘Nun ni koproba ani,’ nyabuka, isa si erenyaka deice arye, narye sik apu yapu ati, ‘Aninguk winilnamlume,’ nyapdeiamse nyalin yupu ara, akunum yaniltaknuk wininyake. Sik ayupu moubuka talibikirye, kum dobolyanganyake. Ara, sik Israel yala nang babye, Yehuda yala nang babye, sik apu yapu ati, “Aning-aning talibuka, wininamlume,” nyapdeiamse yupu ara, sik asukum unyak nang arye, akunum batakuka yanilongonyake. Wininyaka deice arye, narye nyapdeiamse yupu akunum yanibuka bataknike.
Bukni, min yuma talak ulamuknye, Adam bira, narye, “Aning wininamlame, aning ara, pia kum wininamlame,” nyapdeipse yupu ara, elce aning yanibukce, malye ulamuk touk, anggun Efraim yala nang ap, Yehuda yala nang ap ara, anggun babye, na nyapdeipsise yupu akunum bataklume. Abitinye yala nang arye, na nyalin yupu deice nyapdeiamse yupu, moubuka talina kumce, malye winin ninguk talibuka winilamik.