Na Yesaya lengdar mana deice arye eipse ning ara, na ilil upnuke. Alengdar mapsa deice eipse ning ara, yuk mutuku yu nang arye, Babel mutuku nang ara dobuka, sik mal olan nang deice deipnamaka ati eipse. Ton nang arye, yuk nang ati, tenebuka arye tilila yupu nyalamik touk, atalak ara, tuba tenen arye tilila yupu nyanamake. Alengdar mapsa ning ara, ton tam nang arye, yuk mutuku nang ati, sik bona nirya ara, ubula dolamik touk, atalak babye yakirye, ton mutuku nang talinyak bona nirya alubuka dopropnamake. Aning nirya ara, wininmokak eipse. Tonda, Elam amutuku ara yin nang yakirye, Babel mutuku nang olyanamake. Tonda Madai amutuku yin nang yakirye, Babel mutuku nang yanuka, warikuka opnamake. Ara, Babel mutuku nang arye, yuk mutuku nang nirya, ikin ning sik nong deice delilyeba, kanye ikin ulamuka ati, Allah arye Babel nang ati, sik mitang kipdeipnamle.
Yesaya 24:16 - Eipomek16 Mutuku sirya, im sirya tam arye, Allah el pia teleb ulul ning ap, mikip pil dolul ning ap ati, yuk-yuk mutuku nang arye, el si sibuka erebikceura, nun Yudea mutuku noutam unyabuk, Allah elce talibuka usulul Israel nang arye kekenamabe. Allah ara, malye un ning tonok ning babye kum ulirye, pia Teleb Diksukum Ulinye ulula ati, dopera mutuku nang arye, el si erenamake. Winipnamak bukni, na Yesaya bira, weik ikin kanye bopnirye, ngalukuka tuba engenamne. Malye kanye bobuka engenamabe, bol malye bopnamnarya! Ara talye ati kume. Deiyok ara, anggun tenena arye tilila yupu nyakirye, yuk nang ati malye weik nyabuka uanyake. Dipkoprob, sik malye unyak nang arye, tuba-tuba tilila yupu nyabica deice arye, yukupdobikcak arye, yuk nang ati malyeuk kilinyake. Gade chapit la |
Yesaya 24:16
41 Referans Kwoze
Allah arye nyapdeibukba, nabi Yesaya birye sekeibuk. Se, nun mal olan nang, sik Asyur mutuku ninye arye, sik yuk mutuku unyak ninye ati, sik mutuku dakuka uku sice kiploplum bukni, yuk mutuku ninye arye, anggun talilulum ning nirya babye, dakuka kum uku sice kiplopsulume. Anggunce, yuk mutuku ninye sik nong deice, pirilen ning delilulum bukni, yuk mutuku ninye arye sik Asyur mutuku ninye nong deice pirilen ning kum delinyake. Ati ara, wini talak anggunce ‘Naʼ tenen, ninye ati, sik mutuku ulubuka uku sice kiploplum bukni, aning winibuka akunum sirya dakmunyopura, aminyan talak, yuk mutuku ninye arye, anggun talilulum ning nirya babye atonun, ulubuka uku sice kiplopnamsiake. Tonda, anggunce, yuk mutuku ninye, sik nong deice, pirilen ning delilulum bukni, aning winibuka akunum sirya dakmunyopura, aminyan talak yuk mutuku ninye arye, anggun Asyur mutuku ninye ati, anggun nong deice pirilen ning delinamsiake.
Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame.
“Yata deiyok ati, nun unyap mutuku noutam ara, pia malye nang wininyak ning, tuba elinun bukni, ance aning kum danaibuka, kum delilyam do? Amalye nang arye, malye-malye weik wininyak bukni, ance aning namin kibuka kum wenelyama ara, deiyok yata ati do? Atalak-atalak nirya ara, malye nang arye, sik asik nirya uluplobuka, yuk nang ati onyakce, ikin ning weik, sik nong deice delinyake. Tonda, dana-dana tam nirya ara, ton tam nang arye, ton tam nang ati, yupu deice arye waldana ap, yu arye yupu nyaldana ap, dipkoprob oldana ap, unyake. Aning nirya tuba daunyak bukni, yata deiyok ati, aning kum kibuka, kum delilyam do?”
Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.
Bukni, min yuma talak ulamuknye, Adam bira, narye, “Aning wininamlame, aning ara, pia kum wininamlame,” nyapdeipse yupu ara, elce aning yanibukce, malye ulamuk touk, anggun Efraim yala nang ap, Yehuda yala nang ap ara, anggun babye, na nyapdeipsise yupu akunum bataklume. Abitinye yala nang arye, na nyalin yupu deice nyapdeiamse yupu, moubuka talina kumce, malye winin ninguk talibuka winilamik.
“Anggun Israel ninye ap, Yehuda tam ululum ninye ap, anggun nirya arye, na Allah Yahweh ati, kanye deibuka kum unululumce, batakanululume. Dipkoprop anggunce, diksukumuk kum ululume. Anggunce nati duknululumce, delilulum mapu nirya ara, dipkoprob na mapu kume. Aning ati ara, isa si erebikirye, wala tikilongon talak, aisa ati weik kwalina kwalibuka dilamice ning ara, sik bidamang ati malye ulinamake. Wini talak ara, sik wenena ati, sik ap, sik wa win mutuku ap nirya, malye kipdeipniba, kum kibuka sirya dakdanamne.” Allah arye nyabuk.
Asum lukunyan nirya ara, nyabuka el bico ubukba, engenmoka ani, el asing maka sakuka, el katum deice bilikuka poul biyukce, el nong deice palilbiyuk. Wininmok talak ara, el kwit capu nang ton pia kume. El kwit capu nang, sik neika ulamik nang nirya ara, batakikirye atalak aryuk tamubuka, el ap mal olan nanguk unamake.
Ura, an du yapu ap, an weit yapu ap, tonda an tam nang ap, sik nirya arye, an nyalyam yupu kum kekekirye, ‘Elda nun lik ati, Yeremia eluk opnamabeʼ tenen, yupu talikikirye, ‘Olyanamabe,’ nyakinyake. Ati ara, sik anang arye, an dam yanuka, teleb yupu nyapkikca babye, sik yupu kekepmince, diba tenena kume! Allah arye na Yeremia biti, nyapnuke.
Yerusalem mutuku talibuka unamlum ninye nirya ara, pia telebuk ukirye, diksukumuk unamake. Tonda sik unamak mutuku ara, min kum kum danamle, bukni pia atuba wamliba talibuka unamake. Ara, talye ati kume. Ninye arye ‘Nun koun ning koubikiba, aminyan paplirye, weik papnamle’ tenen, mitik yala ning doklamak touk, narye anggun Israel ninye ara, na bidamang Allah aryuk koulamakto wamsa atia. Anggunda pia teleb-teleb unamluma ara, na bidamang taruk ap, na bidamang mikip deice ap arye, mambul pil dolamseba, sirya talak ara, pia teleb unamlume. Aning nirya pil dolamse ning deiyok ara, ‘Ninye mutuku-mutuku nirya arye, na siuk erenamniyak’ tenen, pil dolamse. Ati, aning ara dipkoprob nong upnamlarya.
Allah Yahweh arye ninye mutuku-mutuku nirya anggun dinak, el mikip laka kibuka kiklipdebuka, mikip weik pil dopliba eibikirye, kel biknamake. Pia malye ton winina kumnye birye, mikip weik donamle pil ara kum duknupnamle, laka kibuka pil dopliba elinamake. Ati, mutuku sirya im sirya, mutuku-mutuku nirya unyak ninye, nun ni Allah arye ninye lyen ning arepsiliba eibikirye, kel biknamake.
Na kele, anggunce anyapnusin ning nirya ara, min arye pia kum kekelamlume. Aning nirya ara, min kum bikamlume. Minop talak arye dipdongobuka, wini talak noutam nirya ara, ninye arye kum nyalamika anya arye, kum kekelamlume. Tonda, anggun kanye talima noutam ara, ‘Allah arye nyasilye yupu ara, kanye deibuka adiparyuk moubuka kekepnuyabe,’ pia kum tenelulume. Anggun amul arye ayupu kekepmanto deiyok ning ara, min arelamsisa anya arye, ayupu ara kum kekepmanto ulamlume. Deiyok ara, ani. Na kele, anggunda diba tenen nang kum ululume. Anggun apu yapu arye deiamikba, dadeipdanin yangalamika ani, anggunti deipsikba, anggun mitik mapu ulamlum talak arye dipdongobuka, wini talak babye, anggunda deiyok nang arye nyanyak yupu kekepmanto nang kum ululume. Anggunda, deiyok nang arye nyanyak yupu yaniltan nanguk ululume. Tonda, anggunce, ‘Deiyok, ance nyasilyam ning ara, talibuka unamabe,’ nyaptuma babye, aning ara dipkoprob kum wininamlum bukni, yaniltana uk umunya ati, ayupu kum lak nyapsise. Nyaptinya babye ara, tonok babye anggun amul pum tam kum weksutue.
Atalak ara, anggun Israel ninye arye, kanye deibuka dilalum ning nirya, akunum kum dasilyopura, Allah el si Yahweh aning-aning nirya talibuka, im deice yin talin malaikat nirya, sik weik deiyoknye bira, el tibuk tenepmunce, el siuk erebuka kinamlulume. Winipmanto ara, sik mutuku weik nang yakiba, kait ning dobuka arebikiba, kanye delilamak touk, sik yu nang arye obikirye, tuba bataknamsiyak nang ara, mitik tonunuk unamlum bukni, Allah Yahweh ati, el siuk erebuka umumce, kanye deibuka unamlulume.
Bukni, nun ni Allah Yahweh, ance nunti, an mapu koproba ara, akunum melilamsulumba, nunda tabakuka ton ap akunum teleb kipdeipsiminba, weik unamabe. Nunda Yudea tam unyap nang ara, akunum meliamsuluma deice arye, nunda ton ap tabakdeipsiminba, nun yala nang weik tonun upnin babiba, ninye nirya ara, ‘Se, Allah ara pia telebuk ulule. Elce pil dolul ning ara, mambul pia weike,’ tenebikirye, an si erekinyake. Tonda, nun talinyap mutuku tuku ara, ance weik tonun ton, tabakuka arepsiminyeba, nun tam weik ton upliba, talinyabe. Ati, nun babye, an siuk erekinyabe.
Atalak kiplyeura, Yakub birye deibukba, dadeipdanin yangalamik nang, sik Israel nang talilamik bona ap, bona talilamik ning ap, pia teleb kibuka pil dolamik ning nirya ap ara, na Allah arye kum kipdeipnamne. Winipnyeura, sikda pia talye kankan nang ukirye, bol malye bopnamake. Winipmanto ara, pia weik uk taleamlinye bira, bol malye bolamle touk upnamake.
Ati ara, Allah Yahweh aning-aning nirya talibuka eitam erebuka, mikip weik ululnye birye, im deice yin talin malaikat nirya, sik deiyoknye ulule. Asyur mutuku talibuka ulula deiyoknye, elce kanye eren deice arye, akunum kwalibuka aulula ati, Allah arye anye wenepnamle. Ara, Allah arye Raja Asyur, el amu tam mikip weik unyak yin talin nang ati, kanye ikin weikuk arepliba, sik nong bol deice nirya ara, malye upnamlarya. Sik nong noutam ara, kanye imun uk dipliba, sik nong mikip nirya ara, mitang kipnamle. Atalak ara, Allah arye Asyur mutuku nang nirya ap, sik talinyak bona nirya ap ara, malye kipdeipnamle. Winipmanto ara, ninye arye uku sekiceba, weik pou uku buk arye, aning-aning nirya dibuka, sirya daklamle touk, Allah arye sik Asyur mutuku nang kanye arye, ‘Aning ara mambule,’ tenenyak ning nirya, kum kipdeipnalamlarya.
Tonda, Allah arye, “Anggun ti, bico weik tenesununa ati, pia melisinirye, pia teleb kilinamsine,” nyalin yupu deice arye, nyapdeipsuk ning ara, akunum lak kibuka peteresulule. Atonun, Allah arye nunti, “Winibuka melinamsine. Anggun ti wininamsine,” nyasilye yupu atonun, batakna kumce, aninguk dipkoprob, tuba wininamsile. Ati ara, mutuku sirya, im sirya daunyak nang nirya ara, Allah arye, lyelosulul ning ara, akunum laksukum arye elinyake. Diba, nun Israel nang arye, si erenyap Allah ara, elce melibuka lyelamsuk ning ara, yuk mutuku nang nirya elilamikce, akunum biknamike.
Diba, mutuku im sirya, mutuku sirya nirya, unyak ninye nirya arye, antibuk, “Telebe,” nyabuka, an si erenyakce, kanye deibuka, mot nyanyakce, si erenamkiyake. Winibuka ubicopura, nun ni koproba Allah arye, kanye delisilirye, tuba melisilyeba, ninye koulamak ning ayala-ayala nirya, pia teleb kibuka panamle. Ninye arye, wa wibuka koulamikce ning nirya, teleb kibuka panamla ara, urdem ati kume. Deiyok ara, nun ni koproba Allah arye, nunti, bico tenesimince, aning-aning nirya tabakuka arisilyamba, aning nirya, weika arye linyabe.
Tonda, winipmanto ara, mitik yun mek makau ara, weik uku dinmalya deice deibikiba, pia minopce buppu ulamle touk, ‘Ance amalye una deiyok nang ati, minopce obuka sice buklopnalam’ tenen, moropkine na nio. Tonda, weik uku arye, maning nirya minopce diplyeba, kum danalamle touk, ‘Ance amalye winina deiyok nang ati, minopce wenebuka opminyopura, kum danamak’ tenen, moropkine na nio.
Yatanye do? Ninye arye, ‘Aning ara Allah atonun’ tenebikirye, yuk ning si erenyak ning nirya ara, an Yahweh uminya atonun kum uptinge. An winilyam touk, yuk Isa Mutuku Dongonye, sik mikip koproba deice arye, kum winiptinge. Tonda, yuk nang nirya ara, an winiminya atonun kum wininyake. An tonok ara, pia diksukumuk ulyame. Pia telebuk ulyame. Pia telebnye, dirina weiknye umince, ninye kum winipmanto ning, mambul pil, ninye winipmanto kum pil weik dolyame. Yata ning do nirya, an winiminya atonun kum wininyake.
Na Yeremia birye, tenenun ning nyapnukine. Na ni Allah Yahweh, narye anti, ‘Aning ara, yata deiyok ati uple do?’ tenen, na malye kanye bopnyopura, anti morokiniba, ance tuba-tuba teleb ubuka, diksukum ning nyanilyame. Bukni, na kum bikinun ning ara, anti asipdenukine. Ara, yata deiyok ati, sik malye wininyak nang ara, sik wininyak ning nirya ara, nong tuba kiliba, telebuk unyak do? Tonda, yata ati, diksukum koprop kum wininyakce, malye ninguk talibuka wininyak nang ara, sik dam ikin ning yalyeba, kum dolonyak do?
Winibuka obiceura, mitik tonun kam tuba unamlum nang ara, anggun mal olan nang kan-kanuk umunce, malye kanye bobuka unamlume. Aunamluma deiyok ara, anggunce babye, malye winilamlum ning ap, anggun apu yapu nang ap, punun nang ap ton, malye winilamikce ning ap, adeice arye, ikin ning weik, anggun nong deice yanuka upsilyopura, malye kanye bobuka, malye unamlume. Kanye teleb bobuka, kum unamlume.
Ancuk weik laut mekwen longteng-longteng alamle ning ap, mek langdibuka weik arye welelamle ning ap ara, an mikip deice arye, amekwen mikip kum kililyame. Aning atonun, tonda yata mutuku unyak ninye do nirya, Allah ancuk, ninye mutuku-mutuku nirya daunyakce, ‘Olanauk uptibye,’ tenenyak bukni, ance aninye nirya, mikip kum kipdeipminyeba, tunim abuka unyake.
Allah Yahweh elce sik Israel yala kum nang, im sirya, mutuku sirya nirya unyak nang eibicopura, kel biknamakʼ tenen, laka kilina ati winiryuk ninye deiyoknye erepdeipnamle. Ara winipmanto, ninye arye, ‘Asukum ara, ninye nirya bulubuka dilyanamakʼ tenen, bendera cang weik yo arye ikuka, im dup noutam delilamak touk, Israel yalanye ton, winiryuk ninye deiyoknye erepdeipnamle. Tonda, min talak yu nang arye, Israel tam ulamik nang ap, Yehuda tam ulamik nang ap, obikce bobuka yuk pera mutuku bobinamikba, tukwak mutuku dana-dana tam nirya daulamik. Bukni, Allah arye, im sirya, mutuku sirya dana-dana tam ulamice sukum arye, anang dobuka, sik mutuku boyalirye, yanuka bulubuka deiplyeura, tonok kibuka unamake.
Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.
Wininalam bukni, na nio, anda malye winin ning ayala-yala nirya ap, malye unyak nang ap ara, kanye deibuka kum elilyame. Anda, pia Teleb koprop, uk ubuka, pung ulyamnye binya arye, an pia teleb asing arye, malye ning ati, kanye deibuka kum elilyame. Aning atonun, malye wininyak nang ara, ance aninye eibuka, ‘Dauplye’ tenen, kum batakalongolyame. Na nio, anyapman touk ulyamnye bukni, yata deiyok ati, wini talak ara, anda malye wininyak nang, sik Kasdim nang ati, kum wenepmalam do? Tuba dinmasemince, bico tenesilyam bukni, yata deiyok ati, sik malye wininyak nang, Kasdim yala nang arye, nun Israel ninye teleb ubuka unyap nang ati, olyanganamsiak do? Habakuk birye Allah ati, malye nyabuka morobuk.
Winibukba narye nyapse. ‘Se, bicoe. Nara daopnutuba, diptinye. Aning ara, talye ati kum nyapne. Deiyok ara, pia mambul ning eipman bukni, nara malye yupu nyananye unune. Tonda, na unye mutuku noutam neika unyap ninye nirya babye, malye yupu uk nyapdabirye, malyeuk unyabe. Wininyap bukni, na malinye birye, na asing arye pia mambulnye elinmane. Na malye ning aunilye bukni, aning-aning deice tam ulirye, ninye deiyok talibuka ululnye, Weik Raja akunum eipmane. Ara, aning-aning nirya talilirye, im deice yin talin malaikat nirya, sik weik deiyoknye ulirye, weik erena ap, mikip weik ap ululnye, Allah el si Yahweh akunum eipmana ati, na dipnamne,’ nyapse.