Yesaya 23:1 - Eipomek1 Tirus mutuku nang wenebuka malye kipdeipnamle ning ati, Allah arye na Yesaya dam yanuka nyapdeipnuke. Ayupu ara, ani. Weik laut mekwen deice balamle kapal, Tarsis pia mambul kanye bobuka engenamlume. Deiyok ara, Tirus mutuku weik asik domik ning ara, akunum ulubuka daklobikce, sice buklobik. Sik laut mekwen deice kapal talin nang ara, otam laut mekwen dana-dana tam dukdongamuk mutuku, el si pulau Siprus arye binamuka, Siprus mutuku dam mekwen deice yanuka deipmek talak ara, Siprus mutuku nang arye anggunti, “Se, otam keting kumulban tam, weik asik Tirus mutuku ara, akunum obuka bataklopnamake,” nyanmikak kekenmek. Tonda, “Tirus mutuku laut mekwen deice ban kapal delilbanak ap, amutuku ninye aik nirya ap ara, dakuka sice buklopnamak,” nyanmekak, sik Tarsis mutuku kapal laut talin nang arye, ayupu kekebuka bikik. Gade chapit la |
Yesaya 23:1
32 Referans Kwoze
Aning nirya winipnamla deiyok ara ani. Atalak ara, na Allah arye arepnyeba, sik Pilistin nang nirya ap, amutuku noutam ubuk mutuku ap nirya, kum kilin talak akunum dam yanamle. Ati ara, sik Tirus mutuku nang ap, Sidon mutuku nang ap ati, sik melilamik nang ara, ton ap pia kum melipnamake. Ati nara, na Allah Yahweh arye, sik Pilistin nang nirya ati, olyanamne. Sik Pilistin nang mitik tonun tuba, kam kum unamake. Sikda min talak, sik Kaftor mutuku arye yanuka, Pilistin mutuku noutam unyak nang nirya babye, narye obuka kum kipdeipnamne.
Tonda, yata nang do nirya, sikce, ‘E, nunce weik kapal laut mekwen deice balamle ning ap, tonda pia urasin teleb kapal nirya ap ara, aupmasile ati, aning arye, bona weik libikirye, yuk mutuku bobinuka dekipyopura, bona pia weik talin nang unyabe,’ tenenyak nang nirya ara, Allah elce dakuka bataklirye, laut mekwen arye diplyeura, elce anang dobuka, pia amu tamuk deipnamle.
Keting wekelban tam, Siprus mutuku bukni, weik laut mekwen kup-kup tam dilbinamlulume. Winipmunyeura, ninye ton Wibuka deipmunba, pera mutuku el si Kedar mutuku, keting yangan tam dilbinamlule. Dilbilyopura, amutuku-amutuku noutamak nirya moubuka dipdelirye, kel biknamlule. Ara, anggun Israel ninye arye pia malye ulamluma atonun, yuk mutuku ninye babye, atonun malye wininyak do? Yata mutuku ninye arye, anggun malye ulamlum touk unyak do? Tukwak mutuku nirya dipdebuka elbitum bukni, anggun malye ulamlum atonun ninye ton, anggunce pia kum eipnamlume.
Allah arye ayupu nyabuk. “Se, anggun Sidon mutuku nango! Anggun ton kanye deibuka, pin-pin asa arye kum unamlume. Anggunda akunum obuka bataksise. Anggun Sidon mutuku ululum nang nirya ara, ikin ning weik, anggun nong deice akunum deiamseba, weik ikin kanye bobuka ululume. Anggunda, ‘Yuk karin mutuku bibirye, otamuk teleb uptibye tenen, anggun mutuku batakuka, otam mutuku, laut mekwen antanap dongobuk mutuku, pulau Siprus mutuku binuka unamluma babye, amutuku noutam ton, dikdik sebuka telebuk pia kum unamlume. Ikinuk unamlume.
Tonda, Yosafat birye nyapdeiamukba, el pil don nang arye weik laut mekwen deice balamuk ning, el si kapal laut ton memelamik. Akapal-kapal weik memelamikce, bona libuka Ofir mutuku bikirye, ‘Dekna weik ning, kat ning el si emas, dopropnamaka’ tenen, kintinibuka memepdeiamik bukni, dipkoprob Ofir mutuku kum binamik. Deiyok ara, Yosafat birye malye ubuka ati ara, Allah arye nyapdeibukopura, mutuku si Esion Geber mutuku ara, ninye arye akapal laut nirya ulubuka batakik. Ati, akapal nirya ara, laut mekwen deice dipkoprob kum binamik.
Ara, Salomo el Tarsis mekwen deice kapal ap, Hiram mutuku deiyoknye mekwen deice kapal ap, keting tamun winilye noutam bukni, like tonok kat keil urasin teleb ning el si ara emas ap, tonda kat ning urasin teleb ning bukni, mitang ning ap, tonda gaja basam atonun ning ap, bai tam ulamlanye el si kira ap, merak maka ap, bobuka yangalamuk.
Siria mutuku taleamlye Raja arye, Mesir mutuku kum obuka, sirya daknamla deiyok ara, ani. Ara, Sitim mutuku nang ara, Siprus mutuku arye mekwen deice balamle kapal bukuka yakirye, el Siria mutuku Raja ati, yanuka obikiba, el ilil weik upnamle. Ilil weik uplyopura, Mesir mutuku bataklirye, tamubuka bindopnamle. Bukni, elda yu weik uplyopura, Israel nang unamak mutuku tamubuka binamle. Winiplyopura, el yu ati, ‘Allah el si erenyak aik pil dona deiyoknye, imam-imam nang, sik deiyoknye biti, adiparyuk obuka, kum kipdeipnamle,’ tenyamuk ning tuba teneplirye, Yerusalem mutuku tamubuka benamle. Tonda, Allah ati diba tenena kum nang, amutuku noutam unamak nang arye, Raja ati nyapnamak yupu kekeplirye, ‘Sikda teleb,’ tenebuka, sikce nyanyak yupu kekeplirye, anang ati melibuka unamle.
Na Yeremia bira, ton talak ton, lengdar mapmasirye dinmasiba, Israel nang, sik si erenyak Allah Yahweh, el taruk deice bopmuk mek makau ara, anggur mek lipdongobuka, bopmuk. Abobanmok anggur mek ara, Allah el yu weik un ning atonun upmokba, el taruk deice bopmuk. Winipmokce, na Yeremia biti nyapnuk. “Yeremiao, anggur mek libuka deipman ning ara, na yu weik unulul ning uple. Ati, na taruk arye, talipman anggur mek makau ara, ance doproplyame. Dopropminyopura, na Allah arye, anti, ‘Amutuku-amutuku nang nirya, sik dam bobinuka arelbinulyame,’ nyapdeipkin mutuku ara, anggur mek makau bobinuka arelbinulyame. Anggur mek bobimince, amutuku ulamikce nang nirya ati, ance, ‘Anggur mek diplulume!’ nyapminba, sikce aning dobuka, dipnamake.
Kume, ara mekwen deice balamle weik mek liya yo, Tarsis mutuku ninye arye talibuka balamak mek liya yo, narye nyapsiba akunum kintinibuka deiamika ati, Israel ninye sik mapu libuka boyanganamake. Ara, pia pera mutuku, mekwen dana-dana tam sekdongamuk mutuku noutam, unyak Israel ninye ara, Tarsis mutuku talinyak mek liya yo wekikirye, Israel mutuku tamubuka boyanganmaka ara, anggun nirya dilulume. Tonda, dekna weik ning emas ap, perak ap dobuka, boyanganmaka ara anggun nirya dipdelulume. Wininmaka deiyok ara, ani. Ara, anggun si erelulum Allah, anggun ni koproba Allah el si Yahweh ati arenamake. Tonda Israel ninye pia kalikuka melilulnye, Pia Teleb Una deiyoknye, na Allah Yahweh, na si erena ati, boyanganmaka ara anggun dipdelulume. Wininamaka deiyok ara, ani. Ara, na Allah arye, anggun Israel ninye ati, pia teleb kipdeipsiniba, eibikirye, ‘Se, aning ara mambul weike’ tenen, sik si erebuka arelbana ati, aning boyakirye, nati arenamniake.
Weik asik dobuka unyak mutuku noutam nirya ara, aning-aning nirya pia malye uplyeura, amutuku nang nirya ara, ‘Se, yata wiriptibye do?’ tenen, nyalakirye, malye nyabuka, ngalukuka banyake. Ati, anyasik-anyasik dobuka anoutam unyak nang ara, ilil weik uplyeba, ‘Yuk nang arye nun aik weksicak tenen, sik babye malamikce aik nirya ara, bublan nirya akunum tirikdongobikirye, kunci kipdogobikceba, yuk nang nirya ara kum wekmanto unyake.
Dan tam do nirya, Moab mutuku noutam unmak nang nirya ara, weik arye engenmakceba, anggun tam tuku wilinak ara, pia karenak, iknapye tam (arah selatan) unmak nang babye, dabu tam (arah utara) unmak nang babye, kekenmake. Ninye ngalukuka malye nyanmakirye, engena lelimuk nyanmaceak, kekebikirye, ‘Seʼ tenen, malye kanye bobuka, unamake. Angalukuka engenmace lelim ara, Eglaim mutuku ap, Beer-Elim mutuku unyak nang ap nirya ara, kekepnamake.
Tonda, Salomo birye, ‘Nara yuk pera mutuku binuka, teleb ning deknamne. Opera mutuku ninye ap, na ap, dekelanamapʼ tenen, el mekwen deice bana ati kapal ara, kapal laut, weik memelamik. Akapal laut ara, mikip weik arye pera Tarsis mutuku binmanto kapal laut uk memamuk. Huram mutuku deiyoknye, Raja arye nyapdeibukba, el mutuku kel nang arye, mekwen deice ban ning, kapal laut memebuka domik. Memebuka deiamika ara, keting tamun winilye akunum upneura, akapal arye like tonok karin aryuk pera mutuku arye, Salomo un dam berekelyangalamik. Akapal pum tam ara, teleb ning emas ap, kat ning urasin pia teleb ning, kat ning perak ap, weik gaja basam yang belyamuk ning ap, tonda maka si merak maka ap, dopnarye, Salomo biti arelyangalamik.
Ura Tirus mutuku taleamuknye Raja Hiram bira, tuba-tuba Raja Daud ap kanye deipdanamdik ati, yuk nang arye, “Raja Daud el dolamuk pil yok pununa ara, el mi Salomo anyuk tikmale,” nyabikba kekebukce, Raja Hiram birye el melin nang dopreibukba, Salomo dam nyalbiyik. Biyikce, “Nun ni Hiram birye, anda Raja kipmalama ara, ‘Telebe,’ nyapmakile,” nyabuka nyalbiyik.
Asyer yala nang, sik mutuku wilinak ara, asukum arye, dipdongobuka binamuka ani, Rama mutuku tam binukabukce, tamubuka Tirus mutuku binamuk. Tirus mutuku ara, weik cang keil poka dobuka, antanapdongamik mutuku, anyak binuka dakdongamuk. Winibukce, amutuku arye tamubuka, Hosa mutuku birikce, mutuku sirya wilinak ara, weik laut mekwen deiamuka dam arye, binuka sekdobuk. Tonda, amutuku noutam wilinak ara, Mahalap mutuku ap, Akhsip mutuku ap,
Tonda weik laut mekwen deice arye, weik mek liya yo, el si ara kapal laut, Kitim mutuku arye yanamake. Anang uk bukni, ton si ara Siprus mutuku nang nyanyake. Anang yacopura, Asyur mutuku ninye ap, Heber mutuku ninye ap ati, obuka sirya daknamake. Winipnamak bukni, aminyan talak, sik Kitim mutuku yin talina nang babye, kum upnamake. Ara, dotalak sik Israel ninye arye, amutuku nang nirya obuka sirya dakikirye, bisipnamak ati nyapkine,” nyabuk. Bileam birye nyabuk.
Nyabukce, ayupu ton dukdongobuka nyabuk. “Anggun Korasin mutuku umunye nang ap, Betsaida umunye nang ap, Allah arye opnamsile ati, anggunce, ‘Se,’ tenebuka, mambul kanye bopnamlume. Anggun dilamlum talak ara, anggun mutuku noutamak ninye winipman kum pil dolamsa ara, Tirus mutuku ap, Sidon mutuku ap, noutamak pil dolamtinyetoura, sik amutuku ulamik nang nirya arye, mambul kanye bobukatingce, sik malye ning batakra kanye tamubuka, nati diba tenelamnitinge. Bukni, aning nirya kum elilamika ati, diba kum tenelamike.
Anda, ninye tukwak nang arye deipkiknye, moubuka kekepnulyame. Tirus mutuku noutam unyak nang nirya arye, kanye weik deipmakce, Yerusalem mutuku nang ati, nyapnamake. “Se anango, anggunda bita dilulume! Ninye mutuku sirya, im sirya nirya, unyak nang arye, patalamuk bona dobuka, asukum arye, yuk pera mutuku weik tonun, dolkwetelamikba, dopromik. Yerusalem ara, dekna weik deiyok arye, yuk mutuku-mutuku weik donoklamikak bukni, wini talak ara, yuk mutuku yu yin nang arye, Yerusalem weik asik akunum ulubuka batakmakba, anyaik domik cang poka wekelban bisik bublan memamik bisik bublan ara, el si ara, Pintu Gerbang ara, akunum uluplobik. Ati, nun min arye talye lukparabuka, Yerusalem mutuku wektibye. Tonda, wini talak ara, sik dana-dana tam mutuku noutam unyak nang arye, nun Tirus mutuku unyabakbuk, yakirye, aning-aning nirya winibikceura, nunda bona talin nang unamabe,’ nyabik.
Amekwen deice balamuk kapal, el mek bukna ati yo ara, Basan mutuku noutam kat weik yo tikamuka deice arye, kintinibuka domik. Aning atouk, akapal el ninye tikinak ap, bunak ap, tikuka banak ati, lan yo ara, Siprus mutuku arye, keipyal yo boyanuka domik. Tonda, keipyal yo lamik deice ara, el urasin teleb una ati ara, gaja el yang arye, urasin teleb ning memebuka, aning dobuka, yo labik deice deibuka domik.
Aning nirya, akunum winibikcopura, sik anang nirya arye, anggun mutuku ortam dinmakirye, anggun ikin un ning ati, eibuka engenamake. Tonda sikce, ‘Se, yata ati do?’ tenena ap, kisok taledanuka engenamake. Tonda, sik Israel yala nang winilamak touk, ‘Nun imun kanye bobuka, unmabeʼ tenen, sik anang nong deice ara, tuku butbuta dobuka, sik kisok deice deibikirye, engena ap, tonda nong nirya tuku butbuta damuk bongokirye, engenamake.
Nyabuk bukni, Yunus bira, Allah el si Yahweh arye nyapmok yupu batakuka, ‘Allah dinmanil sukum ara, kum unune. Tarsis mutuku uk binune,’ tenebuka, yuk bisik banmok. Bisik banmoka ani, laut kup-kup mutuku si, Yopa mutuku biyukce, ‘Laut mekwen deice bana ati, kintinyamik mek lia yo weknirye, Tarsis mutuku binun’ tenen, el bana ati, yo bok akunum dekukopura, Yunusda laut mekwen deice bana ati, el si kapal, amek liya yo aik welebuka bukuk. Bukukopura, amek liya yo deice, el ap yuk nang ap, laut mekwen deice biyik. Yunus bira, Allah arye nyapmok yupu kum kekebukce, ‘Allah dam ara, kum unamne,’ tenebukce, ‘Tarsis mutuku binuka unamne’ tenen, biyuk.
Piblisite