Allah Yahweh aning-aning nirya talibuka, im deice yin talin malaikat nirya, sik weik deiyoknye birye nyabuk. Dipkoprop, na tenepse sum, akunum uplyopura, malye unyak ninye ap, talima erelan deice arye, erepdanuka kwalinyak ninye ap nirya, narye wenebuka oplopnamne. Winipmanto ara, koluplirye, kel-kel alamle ning, uku dinibikiba, minopce uku buk paplirye, dilamle touk, sik amalye wininyak ninye nirya wenepnirye, obuka sirya daknamne. Atalak ara, sik amalye unyak ninye ara tonok ton kum bataknamle. Weik uku dinmalirye, yo deiyok ap, taruk ap, yating nirya ap, dibuka kum danalamle touk, sik amalye wininyak ninye nirya wenepnirye, obuka sirya daknamne. Atalak ara, sik amalye wininyak ninye ara, sirya ton kum bataknamne. Wimipnamne talak ara, sik yala ninye nirya babye, pia kum upnamake. Ati, doryanamle talak ara, amalye unyak ninye, sik yala nang arye, mapu ton deibuka kum punupnamake. Sik yala nirya kum danamake.
Yesaya 2:12 - Eipomek12 Aning ara, talye ati kum nyapsine. Allah arye akunum tenyamuk touk, asum akunum uplyeura, Allah Yahweh aning-aning nirya eitam erebuka, im deice yin talin malaikat nirya, sik weik deiyoknye ulula ati, sik kanye erebuka, kwalibuka unyak nang nirya ara, amu tam kipdeipnamle. Tonda, tukwak nang mutuku sirya, im sirya nirya arye, ‘Se aning ara, weik mambul, aning tonok ara, pia telebeʼ tenen, dipdakirye, kwalibuka talima erenyak nang nirya ara, Allah arye aning nirya yaniplirye, pia amu tam kipdeipnamle. Tonok ning babye, kum bataknamle. Gade chapit la |
Yesaya 2:12
42 Referans Kwoze
Kume dipkoprop, yuknye birye kume. Allah Yahweh, elcuk, aning-aning deice tam erebuka, mikip weik ulirye, im deice yin talin malaikat nirya talibuka, weik deiyoknye ululnye birye, aning ara dipkoprob winipname tenyamukce nyapdeibuk. Aning winibuka deiyok ara, talye ati kume. Deiyok ara, elce, ‘Sik kanye erepdakirye, kwalinyak nang nirya ara, na Allah arye amu tam kipdeipnamne,’ tenyamuk. Tonda sik tukwak mutuku nang arye, ‘Se, anang ara dipkoprob mambul weik nang unyake,’ tenebikirye, ninye si erenyak nang nirya ara, na Allah arye amu tam kipdeipnyeba talye nanguk unamake,’ tenyamukce, aning nirya akunum winipsuke.
Ara talye ati kum nyapsine. Yata ninye do nirya, sikce sik bidamnye ati erelilalamak nang ara, aminyan talak Allah arye anang dobuka amu kipdeipnamle. Bukni sik talima darapdongobuka amu tam ulamice nang ara, aminyan talak Allah arye anang erebuka teleb ak deipnamle.” Yesus arye nyabuk. Nyabukopura, Yesus arye el bukmok aik deiyoknye biti nyabuk.
Ninye nirya, sik kanya deilin erebuka ukirye, kwalinya nang ara, Allah Yahweh arye, ‘Anang ara na like,’ tenelule. Ara, dipkoprob elce, sik anang ati tenelye ning ara, ton pia luba kum kinamle. Nunda aning pia dipkoprob bikinyabe. Allah arye sik aninye ati, ‘Na like,’ tenelamlya ani, kum daneipnamle. Dipkoprop yuk talak ara, aninye ati weik arye wenebuka oplopnamle.
Ara, ‘Isa Mutuku Dongonye arye, anye talibuka, el nong deice pia ikin ning deiamliba, el nong ap, el malye winilul ning nirya ap, kulabuka oplopnamle bukni, nun Deiyoknye Yesus tamubuka tukwak mutuku yanamle talak arye, el kanya arebuk ning tonok ara, tuba lyebuka dopropnamle’ tenen, anye dobuka, Isa Mutuku Dongonye areplulume nyapsine. Na Paulus arye, nyapsine.
Bukni, anyapnusin yupu moubuka kekepmunce, ‘Dan talak winipnamle do?’ tenen, dinauk unamlulume. Ara, ‘Weik imun ning winipnamle’ tenen, kintinip deipse sum, na Allah Yahweh arye ninye nirya ati, yupu lipsisikuka bokeipnirye, malye wininyak nang wenepnamne sum, min kum upmalye talak ara, minopce narye na yupu lak lenanye, nabi Elia dopdeipniba, anggun dam minopce yanamle.
‘Allah Yahweh arye, malye unyak nang wenepnamle sum ara, nun kanye deibabe,’ talye ati nyaltakalulum ninye ara, bicoe. Dipkoprop, anggun malye winilulum diparyuk, na Allah arye opnamsinarya. Anggun malyeuk winilulum bukni, yata deiyok ati, ‘Se, Allah Yahweh arye, dan sum yalirye, malye ninye wenepnamle do?’ tenen, kanye deibuka dilulum do? Anggun walwal aryuk winilulume. Asum ara, dirina sum kuma. Pia kunukna sum ati, anggunda, ‘Asum ara, minop yatue,’ tenena meme.
“Ati ara, wini talak ara, na Nebukadnesar birye, im deice ulul ninye deiyoknye Raja ara, Allah el tonoke. El siuk erepnirye, unamne. Ara, urdem ati kume. El pil dolye ning nirya ap, el ulul ning nirya ap, pia dipkoprob diksukum ninguk winilule atia. Tonda, ninye kanye talima erepdakirye, kwalinyak ninye ati ara, Allah elce amu tam kililule,” Nebukadnesar birye nyabuk.
Anggun tilila yupu nyalulum nabi-nabi nang arye, malye weik ululum ning ara, nyapnusine. Winipmanto ara, ninye arye, sik asik dana-dana tam antanap dongobuka domik keil poka noutam ara, yuk mutuku nang arye, ‘Anang opnuyap’ tenen, bisik botopdeiamika ara, adiparyuk abisik lipsisikuka dolamak touk, kum ulule. Tonda, yin talin nang arye, akeil poka deice tam welebikirye, amutuku nang ati, moubuka melibikirye, kaliklamak touk, anggunda kum winilulume. Anggunda, ‘Israel nang malye kibikcak’ tenen, moubulka, melibuka kum kalikilulume. Ati, na Allah Yahweh arye, tukwak nang nirya, sik malye uning wenena ati, aning nirya akunum opnyeba, daksaklyopura, olyanamsil talak ara, Israel yala nang ara, teleb kibuka kum tiknamake. Sik ti, wenepniba, ikin weik unamle. Ara, Allah Yahweh arye, ninye nirya ati, wenen sum akunum dam upnamle ati, nyapsine.
Winipnamalum bukni, na Allah Yahweh arye, anggun nirya ati nyapsine. Nara Allah, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ayanamle talak ara, ‘Na Allah ati, ‘Nun lik,’ teneninyak nang nirya ara, wenepnirye, obuka sirya daknamne’ tenen, na akunum tenyamse talak, mambul weik talak akunum dam uple. Atalak noutam ara, mutuku sirya, im sirya nirya unyak nang arye, ‘Allah ara, nun lik’ tenen, na yupu yaninyak nang nirya ati, na yu weik upnuka deice arye, anang nirya wenebuka opnamna ati, sik nirya ati, kwang daknamnarya! Nara Allah, na ninye on ya arye dobuka, anang wenena ati, onmanya ani, sik ining pia weik banamle. Na ya arye sik ining dinmalya ani, akunum winiplirye boupnamle. Winipnamla deiyok ara, ani. Awinipmanto ara, nati akunum diba tenebuka bikamnik nang arye, ining ning obikirye, na si erena ati, aning boyanuka, uku dongolbalamak touk, anang olan talak ara, na Allah ati, ‘Nun lik,’ tenenyak nang nirya, akunum opnyopura, na Allah arye, ‘E, akunuma, na kanye deipne,’ tenepnamnarya! Ati atalak noutam ara, nara Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye unune. Nara im deice unyak yin talin malaikat nirya, sik deiyoknye unune. Ati, na Allah ati, ‘Nun lik,’ teneninyak nang ara, utam dabu tam binamuk mek, el si ara Efrat mek dam, amutuku noutam, yin talin nang yupa pia weik tonun opnamaka ati, narye, ‘E, akunuma, na kanye deipne,’ nyapnamnarya!
Anggun nirya moubuka dinamlulume! Na Allah Yahweh arye, tenepse nang, amutuku-amutuku nang nirya wenepnamne talak ara, akunum dam kipmale. Atalak akunum kiplyeura, anggun nong deice, weik ikin ning deipnamsina ara, ninye ati, bico pia kum tenenamne. Yu pia weik upnilyeura, sik unyak mutuku nirya, malye weik kipnirye, amutuku nang nirya obuka, sirya daklopnamne. Ara, narye malye ning talibuka, malye unyak nang nirya ati, wenebuka opnirye, kum kipdeipnamne atia. Winipyeba, anggun mutuku noutam ara, ninye una kumce, maning dem upnamle.
Sik wenepnamne mutuku noutam ululum nang ara, imun kanye bopmunyakarye, weik arye engenamlume. Ara, na Yahweh arye anggunti, ‘Wenebuka opnamsineʼ tenepse talak ara, akunum dam upmala atia. Atalak ara, na Allah arye, aning-aning nirya talibuka, deice tam erebuka, mikip weik ununye birye, na tenepse nang nirya ara, obuka kum kipdeipnamsin atia.
Allah elce malye unyak nang ati, yupu bokeiplirye, pia malye unyak nang ati, pia wenebuka opnamle talak ara, yata deiyok ati, elce, “Asum ara ani, atalak ara ani,” nyabuka, kum laka nyasulul do? Aning atonun, Allah arye, nyasulul yupu, moubuka talinyakce, diksukumuk teleb unyak nang mutuku-mutuku nirya babye, Allah arye, pia malye nang ati, yupu bokeiplirye, anang ati wenebuka opnamle talak ara, ‘Asum anyeʼ tenen, kum biktinge. Sikce atalak kum dinyaka ara, yata ati do?
Israel nang ara, weik sum akunum uplye talak ara, Yerusalem mutuku welebanamak talak ara, amutuku nyanamake. Anyanamak mutuku ara, Mazmur mot nyanamak ati, Daud birye sekuk. Na ni Allah, na kanye talima nirya ara, maknya kintinibukapnirye, kum erelanirye, pia kum wininune. Tonda, na urasin erepnirye, ‘Nara telebnye,’ tenelana kumce, kum kwalinune. Tonda, mambul weik pil ap, pia mikip weik ning ap ati, ‘Naryuk aning nirya ara, winiptinye’ tenen, kum pirinune. Aning ara, narye pia kum winipmanto ning ati, batakanune.
Na tenen ninye lyelona ati, ninye arye aik dakuka uku sice kiltakanyak touk, na Allah arye weik mutuku ap, mitik mutuku kon ap, malye kipdeipnirye, kum kipdeipnamne. Amutuku deice unyak ning ap, talye butukuka palamle ning ap nirya ara, kolupdeipniba, kum danamle. Tonda mutuku-mutuku balamle mek ap, mekwen ap nirya, kum kipdeipniba, sesal seplirye mutuku nirya ara lak kiplopnamle.
Allah tenibukce wipdeipnuk ning ara, Allah Yahweh arye, ‘Aninye, sikti, lyen talak akunum dam ubuka ati nyalbinamlyame,’ nyapnuke. Ara, imun kanye bonmakirye, engebuka unyak ninye ati, ‘Talima kwa baribuka melinamsile,’ nyabuka laka nyanamlyame. Tonda, anggun mal olan nang ati, ‘Kwang dakanamsile,’ nyabuka laka nyanamlyame. ‘Nyabuka nyalbanamle’ tenen, Allah arye nati wipdeipnuke.
Sik malye winin ning deiyokuk talibuka unyak nang ap, ‘Nunda mikip nang unyabe,’ tenenyak nang ap, pia malye weik wininyaka ati, Allah el si Yahweh arye nyasulule. Kume, anggun pia malye-malye weik winimunya ati, narye anggun wenena ati, anggun nong deice, ikin weik ning delinamsine. Aikin ning anggun nong deice deipnamsin talak ara, anggunce lyepdamunce, ton kum binamlume. Anggun bidamang kum lyepdatume. Anggunce, bona utotoa talina kum ninye nirya ati, ikin ning, sik nong deice delilamlum touk, narye anggun nong deice babye, ikin weik ning deipnamsine. Anggun malye winilulum ninye nirya ara, ikin ninguk dolonamlulume. Kanye imun weik ning arepsinyopura, aminyan talak nirya ara, anggun kanye talima erena deice erepdanuka kwalibuka erelamunye touk, tuba tonap pia kum wininamlulume. Anggun malye winilulum ninye nirya ara, anggun malye kanye bobuka, alye dakdamunce, unamlume.
Tonda, asing keten nang arye dibilamice ninye, sik kanya elilamak ning nirya ara, narye kum kipdeipnamne. Asing keten nang nirya oplopnamne. Aning atonun lengdar mabikirye, eipmace ning ati, nyabikiba, “Dotalak ara, winipnamkile,” nyabuka, talye laka nyanyak nang nirya babye, pia oplopnirye, kum kipdeipnamne.
Atonok sum noutam ara, pia yu nang yakirye, weik pong-pong nyan ning, el si terompet lelimuk nyabikcopura, weik lelim deice arye, “Yehuda noutam unyak nang ap, Yerusalem mutuku weik asik noutam unyak nang ap, olyanuyabe,” nyabikirye, adiparyuk minopce olyanamake. Ura, sik mutuku dana-dana tam nirya ara, ‘Nun mal olan nang arye olyasicakʼ tenen, sik kalikna ati, weik cang keil poka dukdongobuka dobik ning babye, cang keil aik donyaka babye, ayu nang arye, kum bataknamake. Sikda, ninye mal olan kel weik nang yakirye, weik yupu nyabuka, warikmasikirye, opnamsiake. Allah Yahweh arye nyabuk.
Atalak noutam ara, se, na mapu nirya arye, aning akunum winipnamlum talak ara, min talak anggunce, na dam malye winilamnulum ning ati, ton alye kum dakdanamlume. Deiyok ara, aning ati ara, tuba kum wenemnamsina atia. Tonda, anggunce talima erebuka, kwalilamlum talak, narye nyapdeiamsise yupu, yaniplobuka, nati batakamnulumce, malye winin ninguk winilamlum ning ati, alye kum dakalanamlume. Deiyok ara, ani. Ara, anggun unamluma dam arye, anggun talima erepdakirye, pia kwalinauk unyak nang nirya ara, anggun kan-kan arye akunum yaknamne. Winipnyeura, anggun tuba asukumuk unamlum nang ara, na pia teleb lek mutuku dup deice dam ulamluma ara, talima erebuka kum kwalinamlume. Ati, na dam ara, malye winin ning ara, ton ap pia kum wininamluma tia.
Bukni, sik amalye wininyak nang ati, Allah elcuk tenelya ara, ‘Akunum dipna dam unamak nang’ tenen, Allah arye amalye wininyak ninye ati, nalibuka akutulule. Ara, talye ati kume. Elce, ‘Aninye ati, ninye yupu lipsisikuka bokeipnirye, aninye wenebuka opnamne talak ara, akunum dam upmala,’ teneplirye, aninye ati, akutulule.
Na Allah arye, aikin ning, sik deice akunum deipye, nang nirya ara, amu tamuk deipnamne. Yata mutuku do nirya, im sirya, mutuku sirya nirya unyak nang ara, malye updakceura, alye asa unamnyake. Tonda, yata nang do nirya, sik kanye erena deice arye, kwalibuka unyak nang ara, tamubuka amu tam kipdeipnamne. Sik nirya ara, ‘Seʼ tenen, ikin kanye bobuka unamake.
Raja Asyur bira utenebuka nyalul bukni, Allah ara, aning-aning eitam erebuka, mikip weik ululnye birye, tamubuka nyapsile. Na tenepse ning, Sion mutuku deice ap, tonda Yerusalem mutuku weik asik noutam unyak nang ap, sik wenena ati akunum wenepnirye opnyeura, naryuk tamubuka, Asyur mutuku talibuka ulul deiyoknye, Raja Asyur biti, weik arye wenepnamne. Ara, anye birye, el kanye eren deice arye, dipdanuka kwaliplyak arye, yupu weika arye nyalula ati, narye ikin weik ning dobuka, el nong deice deipnamnarya!
Asyur mutuku yin nang arye, ‘Winipnuyapʼ tenen, kintinipmak bukni, anggun nirya dilulume! Allah Yahweh aning-aning nirya talibuka, deice tam mikip weik ululnye bira, im deice yin talin malaikat nirya, anggun deiyoknye birye, melipnusile! Ara, sik Asyur mutuku yin nang nirya arye, ‘Yerusalem mutuku nang opnuyapʼ tenen, kintinipmak ning ara, yupu seklirye, anang ati, amu tam kipdeipnamale. Winipmanto ara, Allah mikip weiknye birye, weik cang yo tikamukak weleplirye, taruk nirya yangabuka, tukwak dolkwetelamle touk winipnamle. Ara, Allah elce sik Asyur mutuku nang, sik kanye erebuka kwalinyak nang ara, sik wenena ati amu tam kipdeipnamale.
Na Allah arye, tukwak mutuku im sirya, mutuku sirya nirya noutam, pia malye-malye weik wininyak nang ati ara, ninye yupu bokeipnirye, wenepnamne. Tonda, sikce pia malye ninguk talibuka, malye wininyak nang ati, wenebuka opnamne. Tonda, sik kanye eren nang ara, amu tam kipdeipnamne. Aning atonun, kwalibikirye, malye wininyak nang babye wenebuka opnyeura, sik kwalibuka erelanyak ning nirya, kum kipdeipnamne. Aning nirya ara, pia amu tam kipdeipnamne.
Tonda tukwak mutuku nang arye, ‘Nun weik deiyok nang unamak’ tenen, wilinyak deiyok nang ap, Raja nang ap ara, ‘Sikda mikip weik nang, pia mambul nang,’ tenenyak bukni, na Allah arye, adeiyok nang nirya malye kipnirye, kum kibuka delinune. Tukwak mutuku ninye deiyok nang kibuka, weik mutuku talinyak nang nirya ara, na mikip aniryuk anang kum kilinune. Sikce, ‘Wininamabe,’ tenenyaka nirya ara, sirya daknirye, kum kilinune. Sik babye talye nang uka.
Narye sik Israel mutuku noutam unyak nang ati winipnamna ara, winipmanto ning nyapnune. Ara, ayam bulubuka, tonokak unmakiba, maka on ning arye, ‘Ayam maka yanuka obuka dipnunʼ tenen, yangalamle touk ubuka, ‘Naʼ tenen nang, sik mal olan nang arye, olyanganamake. Tonda, winipmanto ara, bai mutuku dana-dana tam talye kam ulye ning, yala nirya ara, narye yukupnirye, lo arepniba, yakirye, sik anang nirya obuka, sirya daknamake. Atonun, narye lo arepniba, Israel nang, sik mal olan nang yala-yala nirya arye, olyanganamake.
Tonda, anggun Babel mutuku ululum nang nirya ara, talima erepdanuka ulamlumce, kwalin nanguk ululuma ati, na Allah Yahweh arye, anggunti wenebuka opnamsine. Ati na Allah arye, anggunti wenepnamsin talak ara, akunum dam upmasile. Nara Allah Yahweh, aning-aning nirya talibuka, deice tam unirye, na tenenun ning nirya ara, dipkoprob unune. Nara im deice unyak yin talin malaikat nirya, sik deiyoknye ununa ati, nara Pia Mikip Weiknye unirye nyapmasina ati, aning nirya ara, dipkoprob nong kunupnamle!