Yesaya 17:12 - Eipomek

¹² Anggun kekeplulume! Anggunda bicoe! Yuk-yuk mutuku unyak nang ara, yupa pia weik bulubuka wekelbikirye, yupu weika arye nyapnamak! Sik abulupka wekmace nang ati, yupu weik arye nyapnamaka ara, winipmanto laut mek ombak weleplirye, anggun dam yanuka saklyeba, lelim weik nyalamle touk upnamake. Kekeplulume! Sik abulupka wekmace nang arye, yupu nyapnamaka ara, winipmanto, mok pia weik cenmalyeura, weik mek oplirye, lelim pia weik nyalamle touk nyapnamake.

Yesaya 17:12 Referans Kwoze

Lukas 21:25

Im deice tam ulul ning ara, keting ap, kurya ap, wala ap deice arye, weik mambul ning laka nyana ati winipnamle. Laut mekwen nirya ara, mekwen weik arye lonting-lonting ablirye, mekwen mikip weik arye langdibuka weleplirye, weik lelim nyaplyopura, tukwak mutuku ninye mutuku sirya im sirya nirya arye, ‘Mekwen dipsilyak’ tenen, weik kanye imun uplibuk, ‘Yata wiripnamap do?’ tenen, pia teniltonauk unamake.

Yeremia 6:23

Anggun Israel ninye ona ati, sik bopmak ning ara, ninye on yin ap, ninye olamak yo tace ap, kintinibuka bopmakce, olyanamsiyake. Sik anang ara, pia yu ninye anya arye, sikce yuk ninye ati, bico tenebuka, kum batakanyake. Olan talak ara, ninye nirya obuka, sirya dakanyake. Sikda pia bisina weik nang unyake. Ati, sik kintinibuka yangakirye, yan lelim lepnamla ara, weik kumanya arye, weik laut mekwen deice doupliba, amekwen nirya, longteng-longteng alamle tonun, yanganamake. Sik ayanamak talak ara, lelim weik arye, nyapliba kekenamlume. Sik ninye olbinuca ati, kuda basam balye deice bukuka balamake. Sik yin talin nang nirya ara, ninye olamak ning nirya bobikirye, kat baju ongobuka yanamake. Urdem ati, kum yanamak bukni, anggun Israel yala ninye nirya ona ati, Yerusalem mutuku bukni, tonda Sion mutuku nyabuka, si nyalulum mutuku noutamak unyak ninye babye, olyanamsiyake.

Mazmur 18:4

Anda, pia teleb ulyama ati, nun nirya arye anti, “Se nun ni Allah Yahweh anti, pia teleb ulyame,” nyabuka, an siuk erekinyabe. Ati, na ikin unulul talak nirya ara, anti, “Naio yanuka melibuka lyepnilyame!” nyabuka morokunune. Na mal olan nang arye, ‘Anye opnuyap’ tenebikirye, na dam olyanamniak talak ara, narye anti morokununa ati, ancuk na lyelonamnilame.

Wahyu 17:15

Lak nyapnukce, ayupu tonap dukdongobuka laka nyapnuke. “Arup sum Talye Yolana Deiyok Kil, weik mek dara bukmokak, eiplum ning babye, laka nyapnune. Weik mek dara ara, winipmanto ulul bukni, amek sik nong ara, ninye ayala-ayala nirya ap, yupu yuk-yuk nirya nyanyak ninye ap, weik mutuku noutamak yuk-yuk nirya unyak ninye negara-negara ap, yupa pia weik ati bikinyabe.”

Wahyu 17:1

Sik tekbarye malaikat, ara karu mek makau talipmek malaikat noutamak bukni, tonoknye na dam yanuka domona yupu deice arye nyapnuke. “Anda yalyame. Allah arye pia malye kil, talye yolamak kil, ninye nirya kel kiyamik kil ati, wenebuka opnamle ning kapdeipkiniba, eipnulame,” nyapnuk. Ayupu nyapnuka nong ara ani. Ara weik mek dana-dana weik asik domik mutuku, Babel mutuku noutamak ulamik ninye ara, Allah ati bataklamikce, pia malye weik winilamika ati, talye yolamak kil atonun ulamik.

Yehezkiel 43:2

Winipnuk talak arye, dinmasibuk, keting panalyangan tam arye, anyaik dam weik dirina yayuka ara, meldang-dang abuka yayukak, narye dipdenmanto kum upse. Weik dirina yayuk ning ara, Israel yala nang sikti, kalekuka pia melilulnye, Allah Yahweh, asukum yanmoka ati, lak kilina ati, adirina arye winibuk. Tonda, weik laut mekwen longteng aplirye, mek kait welepmalya ani, koulukliba, lelim weik nyalamle touk, Allah anyaik wekmok talak ara, alelim nyalamle touk, nyanmokba kekepse. Tonda, Allah yanmok deice arye, el dirina weik ubuka ati, mutuku sirya im sirya nirya babye, dirina weik ubukba eipse.

Yesaya 28:17

Narye winipnamne ning ara, pia dipkoprob ninguk winipnamne. Winipmanto ara, aik dona kel nang arye, ‘Cang ara ani, pala ara anye’ tenen, tapu deice arye kiklelamak touk, narye pia diksukum winilen deice arye, ‘Sikda teleb nang do, malye nang do?’ tenen, kiklipdenamsine. Weik mok ceplirye, mok purwu weik ning, el si ara es, saklirye, aning nirya yanuka olamle touk, anggun malye winimunye ning nirya kum kipdeipnamsine. Ara, weik mok ceplirye, mek weik tonun deibuka oplirye, aning siknibuka dilamle touk, anggun tilila yupu nyabuka, duknulamunye ning nirya ara, na Allah arye wenebuka kum daneipnamsine. Allah arye sik Israel yala ninye ati nyapdeibukba, Yesaya birye sekeipsuk.

Yesaya 9:5

Tonda, sik yin talin nang arye, yan ongon ning sepatu ap, baju ap, ongopna arye, ninye olamikba, ining pakuk ning nirya ara, uku dapnamabe. Uku dongobipyopura, aning nirya uku arye dipnamlarya.

Mazmur 29:3

Allah Yahweh arye, nyalul yupu ara, weik laut mekwen deibuka, deice tam arye nyalule. Allah bira, mambul weik una ap, pia teleb una ap ululnye birye, laut mekwen noutam, el yupu weik tonun nyaplyopura, bebeya lakana ap, weik liman lelim ap, nyalamle touk, nyapliba kekenyake.

Bilangan 10:35

Allah arye nyapdeiamuk yupu liamik yo lakase, mambul marikna bobuka bana ati, banuyik talak nirya ara, Musa birye nyalamuk. “Nun ni Allah Yahweh, an mikip arye memepropmince, ‘Anti yu tenenyak nang ap, nunda an ‘Naʼ tenen, ninye ap ati, yu tenesinyak nang ara, ance melipsiminyopura, nun mal olan nang, nun dam arye ilil upliba, kwarabuka bindopnamak’ tenen, moropkiyabe,” Musa birye nyalamuk. Ayupu nyapnaba, Israel ninye bisik balamik.

Mazmur 83:2

Se nun ni koproba Allah, nun ikin ning talibuka unamap talak ara, ‘Anda talye tunim abuka, kum unamlam’ tenen, moropkiyabe! Se nun ni koproba Allah, yupu nyana kumce, tunim abuka pera una atonun, pia kum unalam bukni, ‘Adibaryuk, yanuka melipnamsilam’ tenen, moropkiyabe.

Yesaya 8:9

Allah elcuk nyabuk. “Awinipnamle ning ati, mutuku-mutuku nirya, daumunye ninye ara, ayupu kekepmunce, kanye kum deipnamlulume. Anggunce, ‘Ninye olbinamap’ tenen, kanye deibuka, weik yupu nyabuka, kulmana lulamlum bukni, na Allah arye wenebuka opnamsin ati, kanye imun bobuka unamlume. Anggun yuk pera mutuku daumunye ninye ara, kekeplulume. ‘Ninye olbinuyap’ tenen, yin ap, mal ap, ya ap, aning-aning nirya kintinilinamlum bukni, na Allah arye wenebuka opnamsin ati, imun kanye bobuka unamlume. Narye anggun nirya obuka, sirya daknamsine.

Yesaya 13:4

Anggun nirya dilulume! Mutuku eitam arye, lelim weik nyanmaliba, kekepnamlume. Alelim ara, mutuku kon deice, ninye yupa pia weik bulubuka wekmakirye, sik yupu weik arye nyalamak touk, nyanmakibuk, kekepnamlume. Anggun nirya kekeplulume! Ayupu ara, dana-dana tam unyak nang ap, sik ninye deiyok nang ap, yupa pia weik bulubuka, neika wekmakirye, yupu weika arye nyamakibuk, lelim weik lelamle touk, anggun ton kekepnamlume. Anang yupa pia weik bulupmakirye, lelim weik nyanmacak ara, talye ati kum lelule. Deiyok ara, na Allah aning-aning nirya deice tam erebuka, im deice unyak yin talin malaikat, sik deiyoknye unune. Naryuk, yin talin nang kum nukmanto, yupa pia weik, nang olbana ati bulupdeipniba, kintinipnamake.

Yesaya 54:17

Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.

Mika 4:11

Dipkoprop wini talak ara, yuk pera im sirya, mutuku sirya nirya, daunyak ninye arye, bulubuka, Yerusalem mutuku yakirye, ‘Aninye nirya opnamabe’ tenen, yanuka warikinamsiyake. Anggunda, amalye wininyak ninye arye, ‘Se, Sion mutuku ara, weik mambul mutuku nyanyak bukni, nunce amutuku nirya ap, amutuku noutam ulul ning nirya ara, malye kipdeipnamabe. Israel ninye arye, ‘Aning weik mambule’ tenen, Sion mutuku noutam duknubuka deiamik ning ap, Allah el si eren aik ap ara, nun asing koproba arye, mining dam elinamabe,’ tenenyake.

Daniel 7:2

Daniel birye sekuk ning ara, ani. “Na Daniel lukunyan mopmanu buk, alengdar mapsirye, eipse ning ara, ani. Weik kumanya outam tonap, itam ap, tonda otam ap, atam ap, im deice arye yayuk kumanya ara, weik mekwen deiamukak yan dobukba, amekwen weik arye, lonting-lonting abuk.