Winipmanto ara, wel kil el kweirya dopmalye luba kilul do? Atonun, taruk morupnamace kilapu, ongolamak teleb baju ap, kweirya ning ap, taruk morupnuce talak ara, luba kiplirye kum ongolul do? Kume, ara kum winipmanto. Bukni, ‘Anggunda, ‘Naʼ tenen, ninye’ tenen, wipdeiamsise ninye arye, na Allah ati, pia akunum luba kipnulum talak nirya ara, keting tamun kum nukmanto, pia weik ubuk.
Yesaya 17:10 - Eipomek10 Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume. Gade chapit la |
Yesaya 17:10
48 Referans Kwoze
Pia ati Allah Yahweh, el tibuk diba tenebibirye, el tibuk talibibirye, el deiceuk nun kanye deilinamabe. Ara talye ati kuma. Deiyok ara, nun ni koproba Allah Yahweh, aning-aning deice tam erebuka, Mikip Weiknye ulula anya arye, pia melibuka kalikisiliba, el amu tamuk unamabe! Winipmanto ara, weik mutuku bukamlye keil, dama duknul bitibirye, pia teleb kibuka utibye touk, Allah aryuk nunti, melibuka kalikisulule. Allah ara, pia kum bataknamsile!
Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
Winipnamna deiyok ton, ani. Pia ouku weikto talak ara, sik Israel yala nang nirya arye, sik kwepdeiamuka deiyoknye biti, tenina kumce, akunum luba kipnarye, malyeuk unyake. Winibuka ukirye, sik unaka ati, pia teleb weik aik dokirye, anyaik noutamuk kanye deibuka unyake. Tonda, aning atonun, sik Yehuda mutuku noutam unyak nang arye, ‘Nun mal olan nang arye yanuka opsicakʼ tenen, kat weik keil arye deibuka, pia mikip weik asik donyake. Bukni, winilamika babye, narye uku dopkwetepnyopura, aweik asik ap, kat keil arye domik aik ap, urasin pia teleb istana aik domik ning nirya ara, uku buk arye dibuka, sirya daknamle. Tonda, sik unyak mutuku noutam dauamlye ning nirya babye, adopkwetepnamne uku arye diplirye, sirya daknamle. Na Allah arye nyapne.
Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.
Winipmanto ara, na mapu Israel nang arye gandum yala akunum dokik bukni, el duk kum daknamake. Talya taca ninguk kipdeipnamake. Imun kanye deice arye, sik wa akunum piribuka wibik ning ara, nong ton pia kum ubuk. Winibuka ati, sikce, ‘Se yata ati upsil do?’ tenen, taram talipdanuka, talima dakalsakalule. Sikce, ‘Aning libibirye, dekeipyopura, bona talin nang unamapʼ tenen, pirilamik bukni, nong pia kum ubuke. Ati, na Allah arye sikti, yu upniliba, sik deice ikin ning deipnyopura, sik wa winyak ning ara, nong ton libuka kum dipnamaka ati, alye weik dakdanamake. Allah arye, na Yeremia dam yanuka nyapnuk.
Sik talye tukwak nang ati, ilil kibuka ululum nang ara, nara, Allah Yahweh arye, anggun nirya kwepdeipsisopura, akunum lubakipnulume. Tonda, naryuk im deice tam wamlye ning nirya babye, bibikuka deipsirye memepdeipse. Tonda, tukwak mutuku amu tam deiyok ning babye, naryuk kwepdeipsirye tikipsinye, Allah ati akunum lubakipnulume. Lubakipnuluma deice arye, anggunda yata ning deiyok ati, asum-asum nirya ara, ‘Anggun opnuyapʼ tenen, kintinibuka deibikirye, yu weik arye olyanganamsiyak nang ati, ilil usulul do? Bukni, moubuka tenipdelulume! Dipkoprop, sik yu weik unyak nang arye, anggunti akunum olyanamsiyak do? Anang ara, dan sukum unyak do? Kume, anang arye, wini talak kum olyasitingce, min kum, kum kipdeipnamsiyake.
Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.
Bukni, sik daulamika ani, mitik tonun ton akunum ubukopura, Allah bira ninye arye ton winipman kum pil dolamuk ning ara, tamubuka luba kibik. Tonda, sikce, ‘E, minop ara, Allah arye, “Winipnamlume,” nyapsiliba, ‘Kekebibya deice arye wininamabeʼ tenen ning ara, tuba kum biklamika arye, sik min bikamik ning ara, luba kilamik.
Ati ara, kel kiplulume. Yuk mutuku nang arye, si erenyak ning ara, mikip kum ning bukni, nun ni koproba Allah mikipnye, weik mutuku yangan keil atonun ulule. Sik talye si erenyak ning atonun kume. Israel ninye, sik mal olan nang babye, aning nyanyake. ‘Kume, Allah el si Yahweh ara, dipkoprob mikip weiknye, el atonunye, yuk ton kum ulule,’ nyanyake.
Ati ara, nun si erekinyab Allaho, anda nun Lyena Deiyoknye usilyama ati, ‘Ancuk yanuka melipnamsilam’ tenen, moropkiabe. Ara, talye ati kuma. Deiyok ara, ance lyepropsiminyopura, yuk nang nirya eibikirye, anti, ‘Se, Allah Yahweh ara, dipkoprob mikip weik ap, teleb ap ulule,’ nyabikirye, an siuk erenamkiak tenena ati moropkiabe. Tonda, nun Israel nang ara, ‘Nunce malye weik wininyap ning nirya ara, mangkau kipsimince, aning nirya, kum kipdeipsiminyopura, nun ikin usilye ning ara, melibuka lyepnamsilam’ tenen, moropkiabe na nio. Aning babye talye ati kume. Deiyok ara, ance akunum lyepropsiminyopura, yuk nang nirya eibikirye, anti, sikce, ‘Se, Allah Yahweh ara, dipkoprob pia telebnye ulule,’ nyabikirye, an siuk erenamkiake.
Tonda ayupu ton nyanamlume. Nunce, “Diba, nun ni koproba Allah anda, nun lyenanye, nunti bico tenepsimince, lyepsilyame. Nun yuk mutuku nang, sik dam unyap nang ap, tonda nun malye kipsikce, yuk pera mutuku noutam bok binamsikba, unyap nang ap, nun nirya bulupdeipsiminba, nun nirya arye an si ati, “Anda pia teleb leknye,” nyabuka si erebuka kinamabe. Tonda, winipsiminyopura, an siuk erebibirye, pia kanye deibuka, ‘Se,’ tenebibirye, anti si erebuka unamabe.
Allah el ‘Naʼ tenen, ninye, Israel nang ara, aning-aning nirya dilamikba, sik nong nena ara, nong kalimna dongopna arye, weik arye nelamik. Aning-aning telebuk ulamuka ani, sik Israel ninye arye, malye kibuka, minop talak arye, sik kwepdeiamuknye Allah ati, ‘Nun like’ tenen, batakik. Tonda, sikti, lyepdomuknye Allah ara, el si yanibuka bataklamik. Ninye arye, ‘Yu nang arye opsicak’ tenen, tonda, ‘Weik mutuku pala keil leleipnamsil’ tenen, akeil donga duknulbalamik touk, sik lyena deiyoknye Allah ara, weik mutuku yangan keil atonun ulamsuk bukni, sikce elti, bataklamik.
Anggun ni koproba Allah, elce nyapdeipsuk yupu ati, diba kum tenemunya deice arye, anyapmasin ikin ning nirya ara, anggun dam yaliba dolonamlume. Anggun moun dilamunye kil ati, ‘Dopnuyap,’ tenepmunye talakuk, amoun dilamunye kil, yuk nang arye alubuka dobikirye, neika manamake. Tonda, anggun aik dopnalum bukni, adopmunye aik, kum unamlume. Tonda, anggun anggur wa wibuka koupnamlum bukni, el nong ara, anggunce libuka, kum dinamlume.
Musa birye, Israel ninye ati nyabuk. “Ura kekepnululume. Anggunce, anggun ni Allah el si Yahweh ati, talye kanye bobuka, luba kina meme. El ti pia dib kum tenepmunyopura, anggunce tuba tamubuka yuk talye ning ati, ‘Nun ni koproba,’ nyabuka, aning si erepmunce, aning dam gutam tuku dipdongopmunce, el siuk erebuka kipmunyopura, ikin weik upnamsile. Ara, anggunce, talye ning si tamubuka erepmunyopura, Allah arye anggunti, weik arye wenebuka oplopsiliba, dipmunce, anggun nong kum danamsile.
Aning-aning nirya teleb upsilyopura, anggun kanye talima erebuka, kwalina pia meme. Aning kum bukni, ‘Nun ni Allah luba kibibyak’ tenen, moubuka kalikdamunce, namin asa arye unamlulume. Kumopura, anggun talima pum tam erepdamunce, ‘Nunda pia teleb ninye,’ tenepmunyopura, anggun ni Allah luba kipnamlume. Ara, Mesir mutuku ulamlum talak ara, ikin pil weik, anggun nong deice delilamsikba, talye piluk dobuka, kanye imun kanye bobuka ulamlum bukni, Allah arye lyepsuke. Ati, anggunce pia tenenamlume, ‘Nun ni Allah, el si Yahweh arye, lyebuka boyanamsuke,’ tenebuka, pia unamlume. El ti, luba kina pia meme.
Musa birye, Israel ninye ati nyabuk. Anggunda, luba kina meme. Anggun ni Allah, el si ara Yahweh ati, pia tenebuka unamlume. Tonda, Allah arye, ‘Aning ara, wininamlulume. Aning ara, pia kum wininamlulume,’ nyapdeipse yupu ara, ‘Luba kipmunyak’ tenen, nyapsine. Allah arye nyasilye yupu, arup arye nyapmasin ning nirya ara, tonok babye ton, kum bataknamlulume. Pia tenebuka banamlulume.
Ati, arup nyapmasin touk, aning-aning nirya wininamlum talak ara, moubuka umunce, kintinibuka dinamlulume. Anggun ni koproba Allah ati, luba kina pia kume. Anggunda, Mesir mutuku ulamlumba, anggun nong deice ikin pil dilamsikba, dolamlum ning ara, ur talye pil dolamlum bukni, Allah el si Yahweh arye, dobuka lyepsukce, boyanamsuk ning ara, luba kina meme. Allah ati, pia teninauk unamlulume.
Winipnyopura, anggun mikip aryuk, pil domunce, wa wibuka koulenamlum bukni, anggun pil talyeuk donamlume. Ati ara, anggunce wa wibuka kounamlum tuku noutam nirya ara, teleb kibuka, nong ton pia kum unamsile. Aning atonun ton, yo duk moulamle yo yala yuk-yuk ning nirya babye, papnamle bukni, duk ton pia kum mounamle. Yo duk yuk-yuk ning nirya, kum libuka dinamlume.
Narye anggunti, “Wenenamsine,” nyapmasina ara, talye ati kum nyapmane. Ara, narye anggun wenena ati, anggun dam ara, kanye imun weik ning arepsinyopura, ilil pia weik unamsile. Ara, anggun nong nirya, buppu kibuka talin nakina uk, el si malaria ap, tonda ilong talibuka ngosokne talin ning ap, arepnamsine. Arepsinyopura, auk dilamsiliba, pia min kum lopnamsile. Winibuka disilyeura, anggun asing kuna deiyok uk ton dilamlya ani, asing malye kupnamsile. Tonda, bol malye bopmunye, uk dilamsilya ani, anggun nong nirya mitang upsilyopura, dibinauk unamlume. Tonda, anggun wenena ati, ikin ning ton, anggun dam deipnyopura, anggun wa wiplumce, ‘Din ning kouplum ning nirya ara, nong uplyeba, din dipnamapʼ tenen, wa wipmunce, kounamlum bukni, ‘Din ning yuk-yuk ning nirya ara, nong upliba dinamapʼ tenen, wa wipmunce kounamlum bukni, din ning nong ara dipkoprob libuka kum dinamlume. Deiyok ara, yuk mutuku yu nang, anggun mal olan nang yakirye, anggunti yanuka, obuka sirya daksikirye, anggun wa wibuka yala kouamunye ning nirya ara, libuka sirya dakdopnamsiake. Anggun mal olan nang aryuk, aning nirya libuka dinamake.
Nara, Allah arye lo arepnyeura, yu nang arye, sik maknya kintinilan nang, sik talinyak bona nirya ara, dalubuka dopropnamake. Tonda, sik nirya teleb aik doptinga babye, yu nang arye, sik donyak aik nirya babye, ulubuka batakikirye, sice buklopbikiba, tuba ton ap, anyaik nirya wekuka kum unamake. Tonda, sikce anggur wa wibuka kouamikca arye, talibuka unamak bukni, anggur duk el nong ara, libuka kum teikicak arye, anggur mek ton pia kum dinamake. Deiyok ara, sik aik babye, sik anggur wa babye, na Allah arye, kum daneipnamna atia.
“Aning-aning nirya, ikin kanye weik usulul ning, aupsutu babye, narye, na ni koprop Allah, an Yahweh tonok, kanye deibuka, an si diamuk erenamkine. Na ni Allah, anda lyepnulumnye ati, kanye ikin kum upnamnile. Anti ara, kanye deibuka, kel-kel kanye bobuka unamne. Anda Ninye Lyena Deiyoknye ulyama ati ara, narye an siuk erenamkine.”
Atonun anggunce talye bona utotoa talina kum ninye ati, ‘Sikda talye ninye unyake’ tenen, yanipdongobuka, sik gandum talye dalubuka dololulume. Sik ning ap, sik uang yo bok ap, ubula weik dololuluma anya arye, pia malye winilulume. Wininululuma ati ara, anggun aning winilulum ning ara, pia teleb keil arye dolalum aik ara, aminyan talak ara, anyaik pum tam, pia kum unamlume. Ara, anggun bidamnye arye, urasin pia teleb ubuka dolalum asik ara, anyasik pia kum unamlume, nyapsine. Tonda, anggun bidamnye mikip deice arye, wa wibuka koululum anggur duk moulamle tapu ara, duk dakmunce, aduk teikuka, anggur mek kwebuka kum dinamlume.
Na Allah arye, wipdeiamse ninye, na mapu koprop Israel ninye ara, wenebuka opnamne deiyok ara, ani. Sikce na Allah wininye ning ap, na nyasinye yupu ap, na si ap kel bikna kum atia. Israel ninye arye nati, walwal tuba unyaka deiyok ara, sik iman-imam nang atia. Anggunda, na si erenyak aik pum tam, pil dona deiyok nang ululum bukni, anggunce, na wininye ning nirya kel bikna ati, ‘Aning ara, nun like’ tenen, ‘Like,’ tenebuka ululuma ati, sik Israel ninye elisinyakce, ‘Nabi nang arye, malye winilyak touk, nun babye malyeuk wininamabe’ tenen, sik babye malyeuk wininyake. Ati ara, narye anggun imam-iman nang nirya ati, ‘Sikda, na si eren aik pum tam, pil dona deiyok nang dipkoprob kum unyake,’ tenesinirye, anggunti akunum bataknamsine.
Ati ara, Allah ance, ‘Na si eren aik dam yanganamak’ tenen, wipdeipsulum ninye nirya ara, pia weik arye, kanye deibuka unamake. ‘Na dam yakirye, na siuk erebuka unamak’ tenen, akunum welisilyam ninye nirya, nun an dam yabirye, aning-aning nirya, kintinip deipsulum ninguk, talibuka ubirye, weik kanye deibuka unamabe. Ara, Allah an si eren aik, an uminyak, pia teleb sukum yanuka unamabe. Ati nun nirya arye, pin-pin kanye bobuka unamabe.
Se, na ni koproba Allah Yahweh, anda, ‘Ikin ning na dam yanilyak’ tenen, ‘Ancuk nati, melibuka kalikinamnilam’ tenen, morokunune. Tonda, ‘Yu nang arye do, yuk ikin ning arye do, ikin upnilya babye, melipnamnilamba, alye kum daknamne’ tenen, morokunune na nio. Alye kum daknamne bukni, anda diksukum ulyam ning ap, ance nyapdeiamsulum yupu ap deice arye, na ikin unilye noutam arye, ‘An Allah arye melibuka lyepnamnilam’ tenen, moropkine na nio.
Allah Yahweh arye, ‘Ninye tukwak nang, mutuku sirya, im sirya nirya unyak nang arye, kel biknamak’ tenen, el ulul ning ara, akunum lak nyabukba, nunce elinyabe. Tonok ning ara, elce, ninye tukwak nang nirya ati, el yupu nyasilye touk, moubuka yupu lipsisikuka bokeipnamsile. Winipnamsila ati, sik talima noutam arye, malye wininyak nang ara, malye winina deiceuk unyakce, kintinilinyak ning ara, sik bidamnye tamubuka yanamle! Ara, sik taruk deice arye, malye wininyak ning ara, akunum kintinibika ati, sik bidamnye tamubuka yanamle!
Atalak akunum kiplyeura, Israel mutuku noutam weik asik dobuka ukirye, ‘Nun mal olan nang yanuka opsicakʼ tenen, cang keil poka dobuka, mikip kibuka deibikirye, kalikinyak mutuku nirya ara, narye lo arepnyeura, yu nang arye aning nirya dakuka, sice buklobikceura, aik olemuk upnamle. Winipmanto ara, min talak, Israel nang bayikak, Hewi yala nang ap, Amori yala nang ap, sik ulamik mutuku obuka, sice buklokbik touk, anggun mutuku babye atonun upnamle. Aning-aning nirya ara, sirya dakuka kum kipdeipnamne.
Bukni, anggur duk moun li akunum dam uplye talak ara, anggur duk min kum moupmalyebuk, el kita opmalya ani, dakde sakalamle bukni, anggur duk min kum ekmalyebuk, murukuk kibuka saklamle touk upnamle. Tonda, winipmanto ara, na Yahweh arye wa win ya dobukapnirye, anggur dola kwena ati, taruk mitik ning sekeltakanamne. Ara, na Allah arye, amutuku nang arye dobuka deipmanyebuk yanmace yin talin nang nirya ara, obuka malye kipnamake.
Aning babye talye ati kume. Deiyok ara, ance sik mikip mitang nang ap, aning-aning kum talikirye, pia bona utoto kum nang ap ara, ancuk sikti, kalikuka melinauk ulyame. Ati, ‘Elcuk melibuka kalikinamsilʼ tenen, an damuk wekelyanganyake. Aning-aning nirya patanauk unyak nang, sik bona utoto kum nang ara, sik kanye imun ning uplyopura, sikce an damuk wekelyakirye, tunim nyabuka talibukba, telebuk unyake. Weik kumanya ap, mok ap, yanganmalya babye, ancuk sik lelildongonanye ulyame. Tonda, keting buppu weik yu ning upmalya babye, ancuk sik lelilongonanye ulyame. Tonda, pia malye yu nang arye olyanamak talak ara, weik kumanya ap, mok ap arye yangalamle touk ubuka, olyanamak talak ara, ancuk sik mikip kum nang ati, kalikisilyame.
Bukni, anggun Allah el mapu koprop, Yudea tam ululum nang ara, kanye deipmunce, kanye deilin mot uk nyapnamlume. Ara, winipmanto ara, ‘Allah el si erebibirye, el si erenak, mutuku kon deice binamapʼ tenen, teleb kanye deipmakirye, kwalina lukunyan talak kwalibikirye, kanye deilin mot nyabuka balamak touk, anggun Yudea tam nang babye, atalak ara kanye deipmunce, kanye deilin mot nyapnamlume. Tonda winipmanto ara, sik Israel nang arye, Allah el si eren aik bunukca ati, bung-bung nyan ning el si seruling bopnarye nyapnin balamak touk, anggun Yudea tam nang babye, atalak uk aning atonun ubuka kanye deilin mot nyapnin banamlume.
Nun ni koproba Allah Yahweh ance bico tenepsimince, melinamsilame. Anda asum-asum nirya, pia talibuka usimince melibuka kalikinamsilame. Beren tam babye, sintam babye, atalak-atalak nirya, ‘Nun imun kanye usilye talak ancuk melibuka lyepnamsilam’ tenen, moropkiyabe. ‘Ancuk, dan talak arye lyepnamsilam do?’ tenen, dinauk unamabe.
Ati, na mapu anggunda ilil una meme. Minop talak do winipnin yangalamuka ani, wini talak winilul ning nirya ara, narye ‘Winipnamle’ tenen, pia moubuka kel bikamsirye, kintinip deipse ning kum winilula ati do? Anggunce na winilamse ning eibuka kel bikamnuluma ati, wini talak babye eibuka kel kinululume. Anggun patasulye ning ati melin nang ara, yuk nang ton usinyak ak, kel bikamtinyeura, dipkoprob kum ulula ati, bita kel kum bikse.” Allah arye nyabuk. Nara weik mutuku yangan keil pia abukukce, bukuk touk unamne. Aning atonun, na babye pia aunune. Na aryuk kalikuka melinamsine.” Allah arye nyabuk.
Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.
Na Allah Yahweh arye, “Im sirya, mutuku sirya, ara tukwak mutuku sirya, im sirya nirya, unyak nang nirya ara, ‘Ayupu kekepnamakʼ tenen, ayupu nyapdeipse. Anggun nirya ara, Sion mutuku unyak nang, ara Yudea tam nang nirya ati dilulume! Anggun lyena deiyoknye, Allah akunum yanmasile! Nara, menekuka yanamanba aminyan ara, na mapu koproba, min arye yuk pera mutuku bobinamik bukni, winida narye akunum lyepdopsi Israel nang, melibuka yanganmake! Sik Sion mutuku unyak nang nirya ati, ayupu lak nyapnamlume,” nyapsine.
Ati, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapne. Ance na ap, na si ap ati, aminyan kipdeipnulumce, batakuka lubakipnulume. Ance akunum batanuluma ati, anda, ‘Sal ap maptibyeʼ tenena ap, pia malye-malye weik una ap, malye un ning patana ap ulamluma ati, adeice arye, an yuk ikin deipdalume.
Tonda, yala ning nirya ara, wa wibuka kouptinga babye, ilim tuku deice anye arye, akunum sesal lebuka kolulonauk unamle. Tonda, gandum delina aik babye, moubuka kum deiptibye. Gandum nirya akunum kum danmala ati, adeice arye din ning delina aik ap, bon-bona delina aik ap ara, talye louk upmale. Winipmala ati, pia kanye imun upsile.
Aninguk kum bukni, yuk nang, anggun Yerusalem mutuku ululum nang kan-kan arye, “Ninye opdeipsululume,’’ nyabuka, dekenyak uang arebikceba doprobikirye, ninye ton onyake. Tonda, yuk nang arye, yo bok patan nang ati, “Anggun yo bok tia arepnusiap, bukni, min yuma ara, winibuka yo bok ton tabakuka arepnamnilyame,” nyabuka arinyake. Winyamikca ani, anye el uang kum upmalye buk, tamubuka min kum areptu talak ara, ila tamubuka, anggunce “Ati, wini talak aryuk, yo bok ton ap, weika tabakuka areplulume,” nyabuka, mikip arye moronyake. Tonda, anggun yala nang atibuk, “Uang ton arepsilyame. Kum arepsiminyopura, ikin ning weik, anggun nong deice arenamsine,” nyabuka, mikip arye moronyake. Winiluluma deice arye, anggun nirya arye, na Allah ati, akunum lubakinululume. Nara Allah Yahweh, aning-aning nirya deice tam erebuka, Pia Mikip Weik Deiyoknye ununye birye akunum nyapsine.
Piblisite