Allah Yahweh arye nyapdeibuk yupu ara ani. “Narye tukwak mutuku noutamak unyak ninye sik wininyak ning nirya ati elinunce, Hadrak mutuku ap, Damsyik mutuku ap, unyak ninye malye wininyak ning ati wenepnamne,” nyapdeibuk. Ara, sik Israel yala ninye unyak mutuku noutam atibuk kume. Ayupu ara talye ati kum nyapsine. “Deiyok ara, pia weik mutuku noutam el si ara, Siriya mutuku noutam ninye deiyok nang unyak mutuku babye, na Allah Yahweh elinunce talinune,” nyapdeibuk.
Yesaya 17:1 - Eipomek1 Allah arye, Yesaya dam yanuka nyabuk, “Damsyik mutuku ara, weik asik dobuka tuba unyabe,” kum nyanamake. Deiyok ara, aminyan talak ara, narye anyasik domikce nirya ara, ulubuka sikce buklopnirye, kum kipdeipyeba, asik oldemuk upnamle. Anyasik nong nirya ara, kum kipdeipyeba, talye keil yoka upnamle. Gade chapit la |
Yesaya 17:1
24 Referans Kwoze
Tonda, nun mal olan nang arye dolamik weik asik ara, ance akunum malye kibuka, sice bukloplume. Amutuku noutam ara, sikce keil memebuka taplakuka dolamik asik nirya ulubuka batakmunyeba, akeil nirya ara, talye tukwak deiplopmunyeba, aupnamle. Ati, anyasik dolamikak nirya ara, oldemuk upnamle. ‘Yu nang arye olyasikcakʼ tenen, mikip arye dolamik weik asik ara, akunum ulubuka dakloplume. Tonda, sik yuk pera mutuku yala nang arye, sik talibuka ulamuk ninye deiyoknye Raja arye malamuk aik ara, ulubuka daklopmunce, sice buklopbuka, kum kipdeipnamluma anya arye, anyasik ara, tuba ton ap lipsisikuka pia kum dopnamake.
“Ance ‘Ur ninye tongolbilyame,’ nyapnutumce, ninye tongon surat weik arye sekdeipnutumopura, asurat deice arye dobuka, Damsyik mutuku noutamak Yahudi yala nang Allah yupu peterena aik betinirye, Yesus el yupu dib tenebuka, Yesus bisik dobolbanyak nang nirya ara, tapu koptinirye, Yerusalem mutuku wenena aik dongoptinye. Ara, sal babye, kilapu babye nirya, Yerusalem mutuku wenena aik dongoptinye,” Saulus arye anye dam biyuk akarye morobuk.
Ati, na Allah Yahweh arye nyapsine. Samaria mutuku unyak ning nirya ara, dakuka bataklopniba, aik oldemuk upnamle. Tonok aik babye, ton kum bataknamne. Anyasik donyaka nirya daklopnirye, wa win dam atonun kiplopnamne. Tonda, amutuku nirya butbuta atonun kipdeipnamne. Tonda, amutuku noutam balamik bisik nirya ara, ninye arye anggur tapu duk wa wina ati, tuku palibuka, anggur tapu kounamake. Tonda, weik cang keil poka antanabuka domik ning nirya ara, daklopnirye, kum kipdeipnamne. Winipniba, aik oldem uplirye, oldem danamle. Winipnyopura, amutuku deice ubuk ning nirya bulubuka, tonok mutuku lyu utamuk, dopkwetepnamne. Winipnyopura, sikce keil poka ap, keil asik ap, domik ning nirya ara, amu tam deiamuk pala keil nirya ara, narye daklopniba, laka danamle. Anyasik nirya, pia weik keil deice domik bukni, akeil tuba aupmalye ning nirya ara, dakuka bataknamne.
Ati ara, na Allah Yahweh arye, ayupu dipkoprob nyapsine. Na tenepse sum akunum yalyopura, weik yupu arye nyapniba, Amon mutuku unyak nang, sik Amon yala nang ati yuk mutuku yu nang arye olyanamake. Narye lo arepniba, amutuku noutam, ‘Nun deiyok mutuku ani,’ tenenyak asik, el si Raba mutuku, weik mutuku obuka, sice buklopnamake. Tonda, amutuku noutam nirya, ninye aik nirya ap, desa-desa talibuka, unyak mutuku nirya ap, ayu nang arye, uku dabikiba, uku arye anyasik nirya dibuka, sirya daknamle. Winiplyopura, Amon yala nang unyak mutuku nirya ara, asik oldemuk upnamle. Winibikca deice arye, minop talak, yuk mutuku nang arye, Israel nang taleamik tuku alubuka dopromik touk, amutuku tuku nirya ara, Israel nang tuba tamubuka dopropnamake. Na Allah Yahweh arye, akunum nyapmasina ati, aning nirya ara, dipkoprob nong upnamlarya!
“Ayupu ara, talye ati kum nyapkine. Deiyok ara ani. Aram mutuku ninye deiyok nang unyak sukum ara, Damsyik mutuku unyake. Ati Aram mutuku deiyok ara, Damsyik mutuku mikip mitik tonun ulul touk, sik Aram mutuku ninye nirya babye, mikip mitik tonun unyake. Tonda, Damsyik mutuku babye atonun, mikip weik kum ulule. Amutuku talibuka, ninye deiyoknye Resin bira, el mikip mitik tonun ulul touk, el ulul mutuku Damsyik mutuku deiyokak babye, mikip mitik tonun ulule. Aminyan talak, keting tamun enam puluh lima (65) tahun ton, akunum kiplyopura, narye nyapniba, yuk nang arye, Efraim yala ninye nirya obikirye, sirya dakmanto upnamake.
Bisik banmeka ani, alukunyan noutamak ara, Abram birye, nyapdeibukba, el ap olbanmek nang arye, sik noutamak bokukabikce, “Sik dumbarye nang deiyok nang ap, sik mapu silip ap ati, dana-dana tam arye, oplulume,” nyapdeibukba, olbiyik. Olbanmekce banmeka ani, Damasyik mutuku deice tam, mutuku si Hoba mutuku biyik.
Ati, na nabi Mika birye nyapsine. Anggun weik malye winimunye ati, Sion mutuku ara, tuku palibuka, wa win dam atonun upnamle. Ara, Allah arye lo arepliba, Yerusalem mutuku noutam asik domik ning nirya ara, yuk mutuku nang arye yanuka, uluplobikiba, asik oldem upnamle. Winibikirye, Yerusalem mutuku noutam ulul asik nirya ara, uluplobikiba, sice butbuta atonun upnamle. Amutuku noutam dolamik asik nirya ara, kum danamle. Winiplyopura, aminyan talak yo mutmuta paplirye tiklyopura, talye bai mutuku atonun upnamle. Allah Yahweh, el si eren aik amutuku deice ulul bukni, aminyan talak, anyaik babye uluplobikiba, kum danamle. Amutuku deice ara, talye yo mutmuta palamla atonun upnamle. Na nabi Mika birye, anggun amutuku deiyok nang ati nyapsine.
Bukni anda bicoe. Anda min talak arye ayupu ton kum kekelamlum do? Dipkoprop ning ara, aning nirya ara, na Allah Yahweh arye, ‘Aning ton, aning ton winipnamne,’ akunum teninyamse. Winibuka akunum tenibuka nyapdeiamse anya arye, wini talak ara, anyapdeiamse ning ara, akunum nong kibuka pil donyake. Narye anti, ‘Winipnamlarya,’ tenyamkise touk, mikip areamkisirye, lo arekiseba, an ap, an yin talin nang ap arye, apil dolulume. Ara, yuk mutuku nang arye, ‘Nun mal olan nang olyasikcakʼ tenen, cang weik keil poka domik ning, an ap, an yin talin nang ap arye, akeil poka ulubuka sung-sunga bultakalamlume. Na mikip deice arye amutuku nirya ara akunum obuka sirya dakamlume. An mikip deice arye kuma!
Ayupu ara, Mesir mutuku unyak nang ati, Allah arye, na Yesaya dam yanuka ayupu nyapnuke. “Na Allah Yahweh ara, sike pia kum bukni, pola balamle dua deice welebuka buknirye, Mesir mutuku dam bikbik abuka yanamne. Mesir mutuku nang arye, isa urasin atonun kibuka memebuka deibikirye, isa si erenyak ning nirya ara, na Allah ati ilil weik uplyeba, sirim talipnamle. Tonda, sik Mesir mutuku unyak nang nirya ara, pia ilil weik uplyeba, sik talima dakalsakanamle.
Moab mutuku unyak nang ati, Allah arye, “Winipnamne,” nyadeibuk. Ara, “Se, anggun Moab tam ululum nang ara, bicoe. Weik asik dobuka ulamikcak, Ar mutuku ara, tonok lukunyan noutam aryuk, yuk mutuku yin nang arye yanuka, obuka sice buklopmaka ati, Moab tam unyak nang nirya, kanye ikin unamake. Aning atonun, Kir mutuku babye, obuka sice buklopnamaka ati, Moab mutuku ara, akunum malye kipdeipmake. Winibikceba, Moab mutuku noutam ara, ninye tonok babye, amutuku ton kum unamake. Sik mutuku ara, nirya kum kipdeipnamake.
Na ap, na yin talin nang ap, nunce weik asik ulamik nang weika arye, akunum malye kibuburye, obuka sirya dakupu. Ara, Kalno mutuku ap, Karkemis mutuku ap, Hamat mutuku ap, Arpad mutuku ap, Samaria mutuku ap, Damasyik mutuku ap ulamik nang nirya ara, akunum obuka sirya dakamupu. Winyamupu touk, sik Israel tam unyak nang babye, obuka sirya dakmabe.
Ami si nyapnamlama ara, urdem ati kume. Ara, ami min kum nepsilirye, ‘Na nin, na ni,’ min kum nyapnamle talak ara, Asyur mutuku ninye deiyoknye birye, amutuku noutam yalirye, Damsyik mutuku ap, Samaria mutuku ap yalirye, sik talinyak ning aning-aning nirya, dalubuka doproplirye, el mutuku koproba tamubuka bobinamle.” Allah arye, na Yesaya biti nyapnuk.
Elce malye weik winilamuk ning ara, ani. Ahas el tenebuka ara, ‘Siria mutuku noutam bukni, pia mambul weik asik, el si ara, Damsyik, amutuku unyak nang arye, sik si erenyak isa mikip deice arye, malye kipnika ati, narye aisa ati, domba basam ato ning obuka arepnirye, el si erepnya deice arye, sik anang meliplyeba, mal olan ning atouk, na babye aning winipnyeba, melipnamnile,’ tenebuk. Utenebuk bukni, dipkoprob ning ara, Siria mutuku nang, sik si erelamik ninguk, Ahas birye, si erebuka deice arye, el ap, Yehuda mutuku noutam ulamik ninye nirya ap, tonda Israel tam ulamik ninye nirya ap, Allah arye kanye imun weik ning arelamukba, doprobikce, ikin asa ulamik.
Raja Ahas el isa si erelamukce, malye weik ulamuka deice arye, el si erelamuk Allah Yahweh arye wabukce, lo arebukba, Siria mutuku taleamuknye Raja birye obuka, sirya dakukce, Yehuda mutuku nang weik tonun tomobuka, Damasyik mutuku delilbinamuk. Tonda, Allah Yahweh arye, Ahas biti kum melibukopura, Israel mutuku taleamuknye Raja Remalya, el punubuknye, el mi Pekah birye, yuk talak ton yanuka, obuka sirya dakukce, tonok sum arye adiparyuk Yehuda mutuku yin talina mikip weik nang yupa ara, seratus dua puluh ribu (120.000) nang obuk. Deiyok ara, Yehuda tam ulamik nang arye, sik deipkirikdop nang si erelamik Allah ara, batakikce, yuk tam kipdobika atia. Winibika ati, Allah arye, sik kum melibukce, batakuk deice arye, aning ara winibuk. Ara, Yehuda mutuku ulamik nang nirya arye, Allah nyabuka touk, kum winibuka deice arye, sik deice uk ikin ning yayukba doprobik.
Winibukopura, Ahas bira, Asyur mutuku taleamuknye, Raja Tiglat-Piliter biti, ‘Melibuka lyepnutume,’ nyabuka, morobuk ning ara, kekebuk. Winibuka kekebukopura, aninye deiyoknye birye, yanuka obuka sirya dakukce, Siria mutuku taleamuknye, Raja Rezin malye kibukce oplobuk. Tonda, Damasyik mutuku ara, malye kibukce, Damasyik asik ap nirya, atam tuku ap, alubuka doprobuk. Winibukce, amutuku ulamik ninye ara, tomobukabukce, tapu koupdongobukce, ‘Aninye ara, na ikin pil dipniba, na pil talye donamniyakʼ tenen, amutuku ninye nirya, bobinuka wenen aik bukni, Kir mutuku delilbiyuk.
Nyabukura, Abram birye tamubuka nyabuk. “Se, na ni Allaho. Anda aning-aning talibuka umince, ‘Wininamne,’ tenelyam touk winipmince, aning nirya deice tam erebuka, Weik Deiyoknye ulyam bukni, narye mi ton kum deiapsa ati na dipnyeura, Damasyik mutukunye, el si ara Elieser birye, na talinun ning nirya dopropnamle. Ati, yata ning arepnutum do, na nie,” nyabuk.
Minop talak ara, Raja Daud ulamuk talak, el ap el yin talin nang ap arye, Zoba mutuku nang obuka sirya dakik. Atalak ara, anye Rezon birye amutuku malye nang weik yukubukba, el dam yayikopura, el ap neika ulamikce, ‘Amutuku ninye deiyoknye obuka sirya daktibirye, nun diamuk amutuku taleptibye,’ tenelamik. Rezon bira, el kayapu nang weik bulubuka deiamukce, mutuku si Damasyik mutuku binuka amutuku ulamik nang obuka sirya dakikce, amutuku talibuka anoutam ulamik. Atalak ara atam nang arye, ‘Rezon bira nun ninye deiyoknye upnamle’ tenen, elti, erepdeibikba, amutuku talilamuk.
Amutuku noutam asik dobuka, ulamice nang, sik taleamice ning nirya ara, adiparyuk bulubuka, ninye nirya dinmacebuk, yanuka lak kibuka, bululinamlume. Aning nirya yamunce, bulubuka, tonok sukum deipmunyopura, sik amutuku asik dobuka, ulamice nang ap, sik talibuka ulamice ning nirya ap, anggun adiparyuk dobuka, Allah el si eren ati, aning nirya ara, uku dongopmunyeba, uku arye dibuka sirya daknamlule. Tonda, anyasik dolamicak ara, asik tamubuka kum donamlume. Batakmunyeura, asik oldemuk upnamlule.
Aning nirya, min kum winiplye talak ara, ance, ‘Se atam nang ara, mikip weik nang arye, obukapsikirye, sirya daksicak’ tenen, ilil ulye nang nirya ara, na Allah arye kum kipdeipnamne. Ara, Aram mutuku ninye ap, Pekah birye talilul Israel ninye ap nirya ara, narye wenepnirye, kum kipdeipnamne. Amutuku-amutuku nirya ara, malye kipdeipnamne.
Piblisite