Allah Yahweh arye, aning-aning nirya talibuka, im deice tam unyak yin talin malaikat nirya ara, sik deiyoknye ulule. Sik Israel yala nang arye, el si erebikirye, elti, si erebuka kinyake. Allah Yahweh arye, sik Moab mutuku noutam unyak nang ati, ayupu nyapdeibuk. Ayupu ara, ani. “Sik Moab mutuku noutam unyak nang ara, pia bicoe. Ara, Nebo mutuku unyak nang ara, opnamsiake. Amutuku ara, akunum uluplobuka, sice buklopnamsiake! Winibikcopura, Kiryataim mutuku unyak nang babye, obuka tomopnamake. Winibikirye, weik cang keil poka domik ning ara, uluplobuka, sice buklopnamake. Ati ara, sik amutuku unyak nang nirya ara, ilil uplyeba, alye dakdanamake.
Yesaya 15:2 - Eipomek2 Dibon weik asik unyak nang ara, sik isa si erenyak mutuku kon deice welebikirye, weik arye engenmake. Sik Moab mutuku unyak nang ara, sik mal olan nang arye, Nebo mutuku ap, Medeba mutuku ap, kum kipdeipmaka ati, pia bico uplyeba, ‘Seʼ tenen, weik yupu arye nyabuka, engenauk unamake. Tonda, sik kisok potong, delo kuknamake. Aning atonun, sik cang bam potong, akunum kopnamake. Ara, amutuku bitinye tenebikirye, bico uplyeba, tonap engenauk unmaka ati, bikilina ati, amutuku ninye nirya arye, sik potong kopnamake. Gade chapit la |
Yesaya 15:2
34 Referans Kwoze
Tonda, sik imam pil talibuka donyak nang ara, sik kisok potong batakanyak ning ara, dilo kum conamnyake. Tonda sik bam potong ton, kum konamanyake. Tonda, sik imam nang, sik kayapu nang dibikceura, ‘Se, nunda ikin kanye bobuka engenamapʼ tenen, sik nong deice, dila kum dolinamnyake. Winibikceura, sikce sik nong ati, malye kipdeipdanamake. Adeice arye, sik dipmakce nang ati, weika arye engenmakirye, sik nong deice, dila kum dolinamnyake.
Tonda, anggun Dibon mutuku noutam ululum nango, anggun pia telebak ululum mutuku arye, koulukuka yanululume. Koulukuka yamunyopura, alye dakdamunce talye tuku deice ap, butbuta deiceuk yanuka buknamlume. Minop talak ara, ninye nirya arye anggunti, ‘Se, sik babye pil teleb donyake,’ tenelamsik bukni, wini talak ara, kume. Deiyok ara ani. Moab mutuku noutam uamuk ning nirya ati, yanuka akunum kum kipdeiamuka deiyoknye bira, anggun dam ton akunum yanganamle. Akunum yalyopura, anggunce kat ning arye, weik asik dolulum ning, el si benteng nirya ara, ulubuka dakloplirye, sice buklopnamsile.
Allah arye, akwalibuka kimilanyak kilapu wenepnamle talak ara, sik kweirya teleb ning pununa ati, urasin malye ninguk arepnamle. Ati, sik akilapu tonok ara, wini talak nintong teleb len ning, sik nong deice likinyak bukni, dotalak ara, sik akilapu deice arye, lyun tong welepnamle. Sik akilapu deiyatinga koulongon ning, atalak ara, urasin teleb namin ning arye kounyak bukni, dotalak ara, pia malye kat tapu, basam turya atonun ning arye, punubuka deiyatinga ara, koupnamake. Atalak sik kisok potong siser arye, teleb kibuka lelekuka tapu kounyak bukni, dotalak ara, delo kumupnamle. Atalak ara, sik ongonyak baju ara, dekna weik, urasin pia teleb ning ongonyak bukni, dotalak ara, aning kwiriplobuka, pia malye baju, el si karung goni ato ninguk, ongopnamake. Ati ara, wini talak, sik Yerusalem kilapu ara, urasin pia teleb kilanyak bukni, dotalak ara, sik urasin ara, pia malye upnamaka ati, alye weik dakalamake.
Musa bira, weik lu mutuku noutamak, mutuku si Moab mutuku batakukabukce, yuk mutuku si Nebo mutuku dup welebuk. Nebo mutuku dup bukni, mutuku dup pia deice tam ara, asukum si ati, Pisga mutuku nyalamik. Pisga mutuku dup welebuk. Pisga mutuku dup ara, Yordan mekin bukni, keting panalyangan tam ulule. Asik si Yeriko mutuku ara, ninye asik weik domikak, Yordan mekin otam keting wekelbalamle tam ulule. Pisga mutuku dup arye, keting wekelbalamle tam ara, ninye asik dolamikak Yeriko mutuku elinyake. Amutuku deice akunum welebukopura, Allah arye, Musa biti nyabuk. “Ura, narye arepnamsin mutuku nirya ara, keting wekelbalamle tam, otam oupmala atia. Omutuku nirya dipdelyame,” nyabuk. Nyabukura, Musa birye, Nebo mutuku dup deice bukni, otam eibuk mutuku ara, ani. Ara, utam ara, Laut Garam mekwen aubuk bukni, amekwen deice tam mutuku si, Gilead mutuku tam eibuk. Abukni, pia dipdongobuka itam mutuku, pera tonun Galilea mekwen deice tam bukni, ninye asik dolamik mutuku si ara, Dan mutuku ton eibuk. Amutuku nirya eibuk.
Bukni, wini talak ara, nun Israel yala nang arye, Raja Sihon ap, sik Amori nang arye deipneba, dadeipdanin, banyak nang ap nirya ara, akunum obuka kum kipdeipmabe. Ara, eitam mutuku, Hesibon mutuku bisik banak arye dipdongobuka, outam mutuku, Dibon mutuku babye, amutuku-amutuku unyak nang ara, akunum malye kibuka, obuka sirya daknamabe. Tonda, Nasim mutuku arye dipdongobuka, Nopa mutuku dam ap, Medeba mutuku dam unyak nang nirya ap, obuka sirya dakukce, kum kipdeipmabe,” nyabik.
Winibikirye, sik Israel nang ulamak touk, sik nirya ara, ‘Se, pia ikin unamsilʼ tenen, lak kina ati, malye baju si, kain karung aryuk ongonamake. Tonda, sik nirya, ilil pia weik upliba, sik nong nirya ara, sirim talipnamle. Tonda, sik wininamak talak ara, alye weik dakdanamaka anya arye, sik urasin ara, pia alye upnamle. Tonda, sik Israel nang, pia imun kanye bobikirye, talima daksaknamle talak atonun, sik talima daksaknamle talak babye, sik kisok potong nirya ara, koubikiba, delo copnamle.
Winipnamne talak ara, sik Gasa mutuku noutam unyak nang nirya ara, weik imun kanye bobuka, alye dakalanamaka ati, sik kisok potong nirya, kobikcopura, delo nanguk unamake. Ara, yuk nang eipsikirye, ‘Se, sikda pia imun kanye bonmaka atia, tenenamsiak,’ tenena ati, wininamake. Aning atonun, sik Askelon mutuku nang babye, imun kanye boyakirye, ‘Seʼ tenen, yupu nyana kum, pia tunim abuka unamake. Winipnyeba, yupu pia kum nyanamake. Winipnyopura, anggun Pilistin nang, tuba mitik tonun aunamlum nang arye, adipnamak nang ati, ‘Bicoʼ tenen, engenamlum ning ara, ouku pia weik karin engenauk unamlum do?
Ati ara, na Allah arye nyapsine. Anggun Yerusalem mutuku ninye arye, ‘Se, nun malye unyabe,’ tenemunce, unamlume. Tonok ning ara, anggunce, ‘Nun malye wininyabe’ tenen, anggun kisok potong nirya, kobuka donoknamlume. Winipmunce, weik mutuku konak tikmunce, ngalukuka, malye nyapmunce, imun kanye bobuka, engena deice mot senamlume. Ara, urdem ati kume. Deiyok ara, anggun ni koprop Allah, el si Yahweh arye, anggun wini talak ululum ninye nirya ati, akunum bataknamasile. Anggunda, malye weik winiluluma deice arye, Allah el weik yu upliba, lik ati, anggun akunum bataknamasile. Anggun ti, tuba melibuka kum dinamsile. Anggun ti, akunum batakuka, luba kipnamsile.
Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Atalak ara, Allah arye anggunti nyapsuke. Ara, “Engepnulume, weik arye ngalukmunce, engepnamlume. Tonda, engepnamluma ati, anggun kisok potong koplulume! Koplopmunye ning ara, anggunce ikin kanye bopmunyakarye, malye baju el si karung koni ongopnamlume. “Aning nirya ara, ‘Se, nun babye malye ulamubuʼ tenen, bikilina ati aning winipnamlume,” Allah arye nyapdeipsuke.
Anggun Moab mutuku ululum nang ara, ‘Se, nunda yata wiriptibye do?’ tenen, pia palibuka, sik si erenyak isa si erena ati, mutuku deice welebikirye, ‘Melipsilyame,’ nyabuka, weik yupu deice morolamikce talak ara, mitang upnamle. Sikce nyabuka moronamak bukni, sikce moronamak ning nirya ara, dipkoprob nong ton pia kum upnamle.
Aning ati ara, sik Moab mutuku nang ara, nunce kum bico tenepnamabe. Sik yuk daununyake. Sikce malye nyabuka ngalukunyakce, weik arye engenamake. Tonda, sik Moab nang, dana-dana tam unyak nang eibikirye, sik Moab tam nang, ikin weik upnamak ning ati, ‘Se,’ tenebuka engenamake. Sik Moab nang ara, min talak Kir-Hareset mutuku ulamik nang arye, anggur duk dobuka, pia toh teleb din ning kintinibuka deiamikak, dilamlum ning ati, teneplumce, engenauk unamlume. Aning babye kum danamle. Nunce sik Moab mutuku nang batakibyeba, sik babye, ‘Se, se, nunda winilamupe,’ tenebikirye, bouku sukun-sukun deiceuk unamake.
Tonda, pia ikin kanye bobuka unmaka ati, amutuku bisik noutam, bakce nang nirya babye, sik baju ara, pia malye ning, karung koni baju ongobikirye banyake. Ara, ‘Amutuku bitinye dakuka sice buklopnamak ning ati,’ tenebikirye, ‘Bico uplyeba, engenmakirye, biknamake,’ tenena ati, abaju ongonamake. Ongopmakce ning ara, sik asik, kat ning arye, lu kibuka domikce, deice tam welebikirye, engenamake. Tonda, amutuku nang bulubuka yupu sisikinyaka babye, wekelbikirye, laka kibuka, asukum noutam arye engenamake. Tonda, sik aik koproba, pum tam arye engenamake. Amutuku noutam ara, tonoknye babye, talye kanye kum bolule. Sik nirya arye engenmakirye, sik nong nirya mitang upnamle.
Atalak anggun Pilistin mutuku noutam, weik asik dobuka ululum nang ap, anyasik dolamik bisik bublan wekelban dam bulubuka, yupu sisikilulum deiyok nang ap nirya ara, talima uk dipsilyeba, engepmunce, “Se, yatanye birye melipsutu do?” nyabuka, ngalunamlume. Deiyok ara, anggun mal olan nang, sik yin nang yupa weika arye, iknapye tam arye (arah utara) kintinibuka yangakirye, tuku deice yanibiceba, tuku buta welepnamle ning ara, dua bum kibuka, welelamle touk upnamle. Sik ayin nang ara, tonoknye babye, namin arye kum yanamle. Sik mal olan nang nirya, neikauk bikbik abuka yaceba, eipmunyeura, ilil weik upnamle.
Aning nirya akunum nyabikba, Ayub kekebukopura, el adiparyuk tikdobukce, weik imun kanye bopmuka ati, el cang baju ongopmok ning kwiribuka, kwiliklobuk. Tonda, el kisok potong lyeklobuk. Aning deiyok ara, ‘Yata deiyok ati, aikin kanye bon ning upmanil do?’ tenebukce, winibuk. Winibukopura, ‘Allah moropnun’ tenen, Ayub adiparyuk kanupdongobuka, gutam tuku dipdongobuka, Allah el si erebukce yupu nyabuk.
Musa birye, sik Israel nang ati, nyabuk. “Anggunce el si erelulum Allah Yahweh ara, elce wipdeiamsukce, el ‘Naʼ tenen, nang, el mapu koproba kipdeiamsuke. Allah mapu ululuma anya arye, ninye dipmalinye biti, ‘Se nun kwit dipmala anya arye, mambul kirikuka bouku peipnuyapʼ tenen, engepmunce, anggun nong bol deice dila dolana kume. Tonda, anggun asok dam potong kobuka, dilo kukuna kume. Ara, Allah el si kum biklamak nang arye, winilamaka atonun, kum wininamlume.
“Se nun ni yapu, atam dinmap mutuku si ara ani. Ara, Atarot mutuku ap, Dibon mutuku ap, Yaezer mutuku ap, Nimra mutuku ap, Hesyebon mutuku ap, Eleale mutuku ap, Sebam mutuku ap, Nebo mutuku ap, tonda Deon mutuku ap eipmabe. Asi nyapmap mutuku nirya ara, sapi basam weinak ati ara, amutuku pia teleb mutuku ulule. Ati, nun tenepmaba ara ani. Nun ni koproba Allah Yahweh arye meliamubukba, nun Israel yala nang arye, sik Midian mutuku nang nirya, amutuku noutam ulamik nang nirya ara akunum obuka sirya dakupu. Bukni, amutuku nirya ara, nunce weinyap kam ning ara, amutuku bobitibye ura, dipkoprob teleb upsutue. Deiyok ara, nunda anggun amu tam unyap nang ara, nunce weinyap ning ara, amutuku noutam arye weiptibyeura, pia weik upnamsile atia,” nyabik.
Winipmanto ara, sal kisok potong ap, kisok dana-danatiklamle potong ap, nirya ulubuka lyeksaklirye, dilo kipnin balyeura, adilo lak uplye ning ati, ‘Ara pukle suse dilirye ati, malye ulule,’ kum tenenamlume. Ato ning ara, talye uplirye, teleb upmalula ati, ‘Anye birye, Allah el dam tuba yanganamlule,’ nyanamle.
Min talak ara, Hesyebon mutuku arye, weik uku dilamuk. Ara, Raja Sihon birye taleamuk mutuku, Hesyebon mutuku noutam arye, weik uku dilamukba, ninye weik diplamik. Uku arye, amukutu nirya dilamuk ning arye welebukce, Moab tam bukni, mutuku si Ar mutuku dolamik asik nirya ara, uku dibuka, sirya dakuk. Tonda, Arnon mek duman uamuk bukni, adeice tam bukamuk mutuku kon nirya babye, weik uku mikip arye dibukce, sirya dakuk.
Nyabikura, ninye deiyoknye Raja Hanun birye, ‘Diba,’ tenebuka ati, Daud wipdeipmokba yanmek nang nirya ara, tomobuk. Anang nirya tomubukce, ‘Pia alye weik unamakʼ tenen, sik ban potong dana tam ning ara, koplobuk. Tonda, sik ongopmek baju, der noutam arye diprongobuka, outam nirya ara, sekuka batakuk. Winibuka ati, sik bukuka tukwakuk kibukura, alye weik unmek. Winibukopura, anang nirya ati, “Wini talak ara, binululume,” nyabukba, weik tonun alye ubukura, sik mutuku tamubuka biyik.
“Na Allah Yahweh arye nyapsine. “Anggunda moubuka dipdelulume. Winipmanto ning nyapsine. Ara, arah utara, dabu tam arye, weik mek obuka yanamle. Tonda amek ara, mikip weik arye opnin yalirye, welelamle touk, kiplirye amutuku nang nirya ap, amutuku ubuk ning nirya ap ara, opnamle. Atonun, Yerusalem mutuku noutam talibuka unyak nang ap, amutuku ulul ning nirya ap ara, mek weik obuka dipnamle. Winipnamle talak ara, amutuku nang nirya ara, ‘Se, nun ni melipsilyame!’ nyabuka, weik yupu deice arye morobikirye, engenamake. Aning atonun, Yudea tam mutuku noutam unyak nang nirya arye, engenauk unamake. Aning nong ara, sik ona ati, yu nang ara, yin talin nang, pia yupa weik tonun, olyanamsika ati, nyapsine.
Moab mutuku unyak nang ati wenepnamne talak ara, na Allah Yahweh arye, Moab mutuku noutam, siltong ning boyakirye, sik isa si erena ati, mutuku kon deice, uku dongonyakak nirya ara, kum kipdeipnamne. Tonda, sik atalye ning, isa si erena ati, kam ning obuka, uku dongonyakak ap, isa si erenyak nang ara, kum kipdeipniba, sikce isa si ton, tuba kum erenamake. Ati, nara Allah Yahweh arye, akunum nyapdeipmasina ati, aning nirya ara, dipkoprob nong upnamle.
Tonda, sik Tirus nang atibuk tenipdekirye, ‘Se, nun kayapu nang nirya dipnamakeʼ tenen, sik kisok potong nirya ara, kopnamake. Winibikirye, sik urasin teleb baju kwiriplobikirye, malye ning karung koni kain aryuk, pakubukabikirye, anggun Tirus mutuku nang ati tenibuka, malye nyabuka, engenamake. Winilamikirye, sik Tirus mutuku nang atibuk, pia tenibuka, engena ap, malye nyana ap, malye kanye bona apuk, unamake.
Se, anda ninye sirika arye deipkiknye ulyame. Tonda, ance aminyan winipnamle ning ati, laka nyapnamlyame. Ara, Mesir mutuku nang kekenamakak ara, ance nyapnulyame. Ayupu ara, Allah Yahweh aning-aning nirya talibuka, deice tam erebuka, pia mikip weiknye birye nyapmasil yupu ara, ani. Weik kanye, imun kanye bon sum yanamle anya arye, anggun nirya arye, ‘Se,’ nyabuka, malye nyana ap, engena ap, mambul kanye bona ap, unamlume. Aning ara, biknamlulume.
“Tonda anggun talima malye ning, tuba upmasilibuk, kwalina kwalibuka dipmunce, na si erenululum talak nirya ara, na lik ati, narye aweik sum nirya kum kipdeipnamne. Winipnirye asum ara, anggun engen sumuk kipdeipnamsine. Tonda, kanye teleb mot, teleb-teleb selulum ning nirya ara, tamubuka engelamak ning atonun kipdeipnamsine. Aning atonun, narye anggun kisok potong nirya kobuka, kum kipdeipsiniba, kisok delo ninyeuk unamlume. Ikin ning weik, anggun nong deice deipsiniba, anggun nirya arye, imun kanye bobuka unamluma anya arye, malye baju arye, pakupdanuka bukmunce, engenamlume. Winipmanto ara, el lin ap, el li ap arye, sik min yuma deiamdice mi ati, dipliba engelamak tonun, ikin ning weik, anggun nong deice deipsinyopura, engenamlume. Atalak ara, kanye imun deiceuk unmamunba, akunum sirya daknamle.” Allah arye, sik Israel ninye ati nyabuk.
Nyabikura, ninye deiyoknye Raja Hanun birye, Daud wipdeipmokba yanmek nang nirya ara, tomobuk. Winibuka sik anang bam potong, ton tam nirya ara kobuka batakuk. Tonda, sik ongopmek baju der dam adiparyuk sekuka batakuk. Winibukopura, sik anang nirya ati, “Wini talak ara binulume,” nyabukba, tamubuka biyik.
Se, Moab mutuku noutam bukni, anggun Hesyebon mutuku ululum nango, malye nyabuka, engepnamlume! Deiyok ara, anggun mutuku dam uamuk mutuku, Ai mutuku babye, yu nang arye, akunum obuka sice buklopmake! Aning atonun, anggun weik asik Raba mutuku noutam ululum kilapu nirya babye, weik yupu arye engenauk winipnamlume! Ngalukuka engelamunyak arye, anggun nong bol deice, parang arye sekuka opdanamalume. Winipmunyopura, ‘Se, nun tam nang akunum opmakeʼ tenen, anggun teleb baju ongolulum ning ara, kwiriplobuka, pia malye baju uk, kain karung ongonamlume. Ara, ‘Nun tam nang ati bicoeʼ tenen, lak kina ati, malye baju uk ongopnamlume. Winipmunyopura, imun kanye bona ap, kanye walwalabuka nyana ap, kipmunce, bikbik abuka otam binmana, atam yanmana, kinamlume. Winibuka wininamluma deiyok ara, ani. Ara, anggunce si erelulum isa, el si Milkon ap, el si erena ati deiyok nang, sik isa si erenyak imam-imam nang ap, apil dona ati melin nang ap, anggun mutuku obuka sice buklopnamsiak nang arye, anang nirya tapu koubikirye, sik mutuku tamubuka bobinamaka ati, anggun nirya engenauk unamlume. Anang bobuka bikirye, yuk mutuku delilbikceba, daunamake!
Piblisite