Yesaya 14:2 - Eipomek2 Minop talak, sik Babel mutuku ulamik nang arye, Israel nang obuka, Babel mutuku bobinamik bukni, aminyan talak ara, yuk mutuku nang weika arye, sik Israel nang melibikceba, sik ni Allah arye, sikti, min arye areamuk mutuku tamubuka yanamake. Atalak ara, sik Israel nang arye, sik bobinamik nang ati, sik amu tam deibiceba, Israel nang, sik ikin pil melibuka donamake. Tonda, sik mutuku koproba, neika unamak talak ara, yuk yala ninye asik nang, sal babye, kilapu babye, sik Israel yala nang ati, sik amu tam kibikcopura, dekna dolona kum aryuk, talye pil melibuka donamake. Ara wini talak, Israel nang ati dobuka, wenen aik dongobikce nang ati ara, kwang dakuka tomobikirye, sik amu tam deibikceba, daunamake. Tonda, Babel mutuku nang arye, Israel nang ati, ninye deiyok kibuka taleamikce, ikin ning, sik nong deice delilamikba, kanye imun asa ulamik touk, aminyan talak ara, sik Israel nang ninye deiyok kibuka talibikirye, sik Babel tam nang deice, ikin ning deibikirye, darapnamake. Gade chapit la |
Yesaya 14:2
34 Referans Kwoze
Minop talak ara, anggun obuka sirya daksikce, anggun nong deice ikin ning delilamsik nang, sikce deibikba dadeipdanin yanganamak mapu nirya ara, anggun dam yakirye, anggun tibuk si erena ati, kisok kanupdongobuka kinamsiyake. Tonda anggunti malya nyabuka yep-yep alamsik nang nirya ara, anggun damuk yanuka kekebuka weknamake. Winipsikirye anggun mutuku Yerusalem mutuku ati nyanamake. “Se, amutuku ara dipkoprob Allah Yahweh elce wipdeiamuk mutuku, el ‘Naʼ tenen, mutuku ulule,” nyabuka nyanamkiyake. Tonda, “Se, Sion mutuku ara, malye ning tonok ning kum ulirye, Pia Lyena Deiyoknye Allah ara, Israel ninye kalikuka melilulnye, el amutuku ati kanye delilule,” nyabuka, Yerusalem mutuku ati nyanamake.
Bukni, wini talak ara, anggun ati dobuka alupdomsik nang nirya ara, narye sikti, alubuka dopnamne. Tonda, anggun mal olan nang arye, ‘Israel nang nirya obuka, sice buklopnamabʼ tenen, olyangalamsik nang nirya ara, narye obuka, sice buklopnamne! Aning atonun, narye lo arepninyeba, anggun mal olan nang nirya ara, yuk mutuku nang arye obikirye, tapu koubuka, sik pera mutuku bobinuka deipnamake. Naryuk, anang yakuka donoknamne. Tonda, anggun mutuku yanuka opsikce, anggun talilamlum bona nirya alubuka doprobikce, bobinamik nang nirya ara, yuk mutuku nang arye, anang obikirye, sik talinyak bona nirya, alubuka bobinamake. Atonun, yata mutuku nang do nirya, sik Israel nang ati, ‘Ayala nang ara, opnamabe,’ tenyamse nang nirya ara, narye lo arepniba, yuk-yuk mutuku nang arye, anang ati, sik dam yanuka opnamake. Deiyok ara, anggun deice ikin ning delisinyak nang nirya ara, na Allah arye, sik deice tamubuka ikin ning delinamne.
Wininamak bukni, weik Erena Ulul Deiyoknye, Allah arye aning-aning nirya deice tam ulirye, elce wibuka deiamukba, el mapu koproba ati ara, ‘Sikce na talinun ning nirya, pia talinamak’ tenen, ninye deiyok ning arepnamle. Areplyopura, el mapu arye, adeiyok ning dobuka, talibikirye unamaka ara, pia ati, sik kam unamak ara, min kum dipnamake,” nyapnuke. Ayupu ara, im deice unmoknye birye, na Daniel ati, nyabuka laka nyapnuke.
Yuk mutuku ninye arye, sik mapu ap, sik kilmapu ap dobuka delilyanganamak talak ara, yuk pera mutuku, sik ninye deiyok kibuka taleamik Raja nang arye, Israel yala ninye sik mapu ati, melibuka kalikinamake. Tonda, aRaja nang sik kilapu, weik deiyok kilapu kibuka ulamik bukni, wini talak ara akilapu arye, Israel yala ninye sik mapu ati, melibuka kalikinamake. Sik yuk mutuku Raja nang ap, sik kilapu ap, sik Israel yala ninye sik amutuku tam uk unamake. Winipsikirye anggun, Israel ninye si erena ati, anggun dam yakirye kanupdongobuka si erenamsiake. Sik yuk mutuku weik deiyok ninye, mambul nang ulamik bukni, wini talak ara, talye ninye uk unamake. Anggun Israel ninye dam yakirye, anggun si erena ati, kisok kanupdongobuka tuku deice mabikiba, anggun yan deice upmalye tuku butbuta sik sitang deice palinamle. Sik ninye deiyok nang arye anggun Israel ninye ati, anggun amu tam ubikirye, si erenamsiake. Aning winipsikca deice arye, anggun Israel ninye ara kel biknamnulume. Ara, na si Allah Yahweh nati kel biknumunce, ‘Se, dipkoprob Allah el dem arye apil dopmasile,’ tenenamnulume. Tonda, ‘Allah elcuk melinamsile,’ tenen, natibuk moropnikirye, na si ereninyak ninye ara, malye kanye kum bonamake. Narye aninye ati, dipkoprob melipnamna anya arye, alye kum dakdanamake.
Sik yuk nang arye, “Nunda, dipkoprop Yahudi yala ninye, Allah el mapu kopropa unyabe,” nyabuka, talye nyaltakalamak bukni, dipkoprop ara, anang ara, Isa Mutuku Dongonye arye talilulba, el siuk erenyake. Aninye ara, tilila yupu nyana ninyeuk unyaka anya arye, na mikip deice nyapniba, amalye nang arye, sik yan dam gutam tuku dipdongobuka bunamake. Winibicopura, anggun Piladelpia mutuku diba tenelulum ninye ati, “Kume, anggun Piladelpia nang ati ara, dipkoprop Allah weik arye bico tenebuka melisulule,” nyabuka lakak nyapnamake.
Sik nirya arye kanye deibuka yo bok bulubuka delilamik bukni, na kanye ara, ‘bita moubuka delilamik ara, pia telebe,’ tenepse. Ara sik Yahudi yala ninye, sik diba tenelamik ninye arye, Allah yupu dobuka, sik Yahudi yala kum ninye unyak mutuku binuka peterelamik. Makedonia mutuku ninye ap, Akaya mutuku ninye ap, sik nirya ara, Yahudi yala kum ninye bukni, peterelamik yupu kekelamikce, diba tenelamik. Ati, sik Yahudi yala kum ninye arye, Yahudi yala diba tenelamik ninye kan-kan bukni, Yerusalem mutuku unyak bona utotoa kum ninye melina ati, yo bok bulubuka delilamik. Abulubuka delilamik ning ara, bita moubuka delilamik. Wini talak ayo bok arepnamak ning ara, telebe nyapne. Winibuka wininamake ati, na kanye deipne.
“Atalak aryuk amutuku nang arye, pia teleb aren ning bobuka, Allah Yahweh ati arelyanganamake. Anang sik urasin ara, pia teleb bol bobuka unyak nang ap, tonda nong weik cang arye nebuka unyak nang ap, mikip weik ap, ninye onyak nang unyakak ati, ninye ona ati weik kel deice arye kama ap bonyaka deice arye, yuk mutuku nang nirya arye anggunti, ilil weik usululule. Sik anang unyak mutuku ara, mek arye wilipnin biyuka deice arye, sik mutuku yuk-yuk bokuka unyake. Sikce teleb aren ning bobuka boyanamak mutuku ara, Allah Yahweh aning-aning nirya deice tam, mikip weik arye erebuka ulula ati, elda im deice yin talin malaikat nirya talilule. El ti aning arenamake. Ara Sion mutuku, Allah Yahweh arye, Na si asukumuk deipnamne. Amutuku ara ‘Naʼ tenen, mutuku,’ nyapdeiamuk mutuku dam boyanamake. Allah Yahweh ara, aning-aning nirya deice tam mikip weik arye erebuka ulula ati, elda im deice yin talin malaikat nirya talilule. El Allah atibuk bobuka arelyanganamake,” nabi Yesaya birye nyabuk.
Allah el pia mikip weik ulula ati, winipmanto ara, ninye olyangana ati, kuda basam arye libuka, tuku deice balamle ning, el si ara kereta perang, yupa pia weik ribuan aulula ati, nunce kum nuktibye. Akereta perang ap, Allah ap, Sinai mutuku arye batakuka, Yerusalem mutuku noutam bukni, el pia teleb lek unamle aik dam ara, akunum yanmale. Allah bira aning-aning nirya talibuka, mikip weik ulya deiyoknye ulule.
Winibuka arisilya ati ara, Allah yupu noutam ton ayupu sekik. Ayupu ara, ani. ‘Allah arye, nyabuk. “Elda im deice welebuk talak ara, el minopce biyukba, el mikip arye, akunum bisibuka yaniplobuk nang nirya ara, el aminyan tam banmek. Im deice biyukopura, sik tukwak mutuku unyak ninye ati, pil dona deiyok ning yuk-yuk bokuka aribuk,” nyabuk.’ (Mazmur 68:18)
Ura, na weit yapu atonun ninyeo, Allah arye nyapsuka deiyok ara, ‘Tapu kouamuk ning lopdeipniba, mem pil dona kum arye, talye kanye bobuka diksukumuk unamak’ tenen, lobuka lyepsuke. ‘Wininamak’ tenen, lobuka lyepsuk bukni, anyapnusin yupu atonun kum tenenamlume. Ara, ‘E, winira Yesus arye akunum lyepsuka anya arye, nun kanye aryuk tenenyap ning ap, nun nong patasilye ning ap, aninguk tenebuka talya luparabuka malye unamap’ tenen, kum wininamlulume. Aning pia kum bukni, anggun nirya arye, yuk ninye nirya ati, bico tenepdamunce, melilanauk unamlulume.
Winibuka unyap talak ara, Allah yanin ninye nyanyak yupu nirya ap, sikce, ‘Yuk nang Allah dib tenepnamak’ tenen, sik bidamang kanye erebuka tenepce arye nyanyak yupu ap nirya ara, bisibuka, kum kibuka delinyabe. Winibuka pil donyapa deice arye, nun kanye tenena ap, yuk ninye sik kanye tenena ap, tamupsilyopura, Kristus arye, ‘Wininamake,’ tenesilye touk, ansinibuka tenebibirye, el yupu kekebuka, aninguk talibuka elti, dobolbanyabe.
Tonda, anang, sik pil melin nang ap neika yanuka ulamik. Ara, sal ap, kilapu ap, pil dona ati melibuka yayik nang nirya ara, sik yupa ara, pia weik, tujuh ribu tiga ratus tiga puluh tujuh (7.337) nang yayik. Tonda, mot nyana kel weik nang ara, sal ap, kilapu ap nirya ara, dua ratus (200) nang ton neika yayik.
Akumopura, apil deiyoknye birye nyaplyeura, kekebuka pil dolinye bira malye uplirye, malye uptopura, ‘Kume, na deiyoknye akunum biyukce daulula anya arye, sik asa okiting tamunuk yanamle,’ teneptue. Utenepturye el ap pil donyak nang ap, kilapu ap ati, bokuka oplirye, kanye wangalamak mek din nang ap, neika dibuka utopura, ‘Na deiyoknye, el aketing yanamle,’ kum tenepturye, talye kanye boblye sum ara, el deiyoknye tamubuka yanamle.
Asyur yu weik nang arye obuka sirya daknamsiyak bukni, aminyan talak ara, narye arepneba, yuk mutuku nang arye, amutuku nang babye obuka sirya daknamake. Bukni, Asyur mutuku nang nirya opnamak ning ara, talye tukwak ninye arye, parang ya dobuka olbalamaka atonunuk kume. Parang ya dobuka Asyur mutuku yu nang obuka sirya daknamak bukni, aning ara, talye ninye arye kume. Ara, na Allah mikip deice arye aninye wenebuka oplopnamne. Yuk nang unyak bukni, ‘Se, olyanamasiyake,’ tenebikirye, ilil weik upliba, Asyur mutuku nang nirya adiparyuk, ‘Lyepdatibye’ tenen, bai sakuka bikbik abuka bindopnamake. Winipnamak bukni, sik yuk pera mutuku nang arye, obisibikirye, tapu koubuka sik mutuku tamubuka bobikirye, Asyur mutuku wel nang nirya ara, sik anang amu tamuk deibikiba, sik talye pil melin nanguk unamake.
“Na Allah Yahweh arye, anggun Israel ninye ati nyapsine. Israel ninye sikce na si ereninyaknye bira, pia diksukum pia Teleb koprop Unanye unune. Narye anggun kwepdeiamsisirye, tuba kalikuka melisunune. Mesir mutuku ninye wa wiamikirye libuka delinyak ning ap, tonda, Etiopia mutuku ninye sik dekna ati, kintinibuka delinyak ning ap, Syeba mutuku ninye sik cang arye nenyak ninye, sik bon-bona ap weik tonun arelyanganamsiake. Amutuku nang ap, sik talinyak ning nirya ara, anggun dam boyakiba anggun diamuk dopropnamlume. Winipmunce, sik aninye ara taruk balye tam bisik dobuka tapu koubikiba, sikda anggun Israel ninye uk dobolyanamsiake. Sik anang nirya anggun dam yakirye, anggun si erena ati, urasin kanupdongopnamake. Sikce, ‘Allah el tonok ulirye, sik Israel ninye pia melilul’ tenen, kel bikikirye, ‘Sikce nun kum onamsil,’ tenena ati, moronamsiake. ‘Israel nang arye si erenyak Allah ara, pia dipkopropnye ulule. Yuk Allah ton kum ulule,’ nyanamake.” Allah arye nyabuk.
Na Allah Yahweh arye nyapsine. Nara aning-aning talibuka deice tam unirye, Weik Erena Deiyoknye unune. Narye, ‘Winipnamne,’ tenenye touk wininune. Na mapu Israel yala ninye ati nyapsine. Narye ninye yuk mutuku ninye, Israel yala kum ninye ara, sik unyakak laka kipniba, sik Israel mapu ara, yuk nang arye dobuka bobinamikbuk, sik noutamak dabinuka unyak mapu nirya ara, tamubuka amutuku uk iribuka boyanganamake. Tonda sik kilmapu ara, amakuka boyanganamake.
Bukni, na Allah Yahweh arye nyapsine. Asipdenulum ning ara, diba narye winipnamne. Mal olana deiyok nang arye, anggun Israel ninye obuka sirya daksikce, tapu koubuka bobinamsik bukni, amikip nang awininmaki buk, narye sik Israel ninye ati dopropnamne. Tonda yu nang arye kalikmakibuk, narye sik dam binuka dopropnamne. Ara, dipkoprob na Allah aryuk, sik mal olan nang arye, anggun Israel yala ninye obuka sirya daksik nang ati, narye kwang dakna ati, sik dam binuka obuka sirya daknirye, Israel ninye sik mapu nirya lyepnirye tamubuka boyanamne.
Ton deiyok ara ani. Ara, anggunce ‘Lo tonap tabaknamabe,’ tenepmunyopura, kwanim tam taruk ap, sirik tam taruk ap, yuk-yuk talibuka lipdopmunyeba biknamlule. Winipliba anggunce deipmunyeba, dadeipdanin banamak ninye ara, weik upra bakirye, yuk mutuku unyak ninye ayala-ayala weik, mutuku-mutuku nirya, malye kibikirye, amutuku noutama uk unamake. Tonda, ton tam nang arye, ton tam nang ati, obuka sirya dakikiba, ninye una kumce, bipla pabuk mutuku ara, ‘Naʼ tenen, ninye, Israel yala ninye binuka unamake.
Ati ara, na Allah Yahweh arye, ayupu dipkoprob nyapsine. Na tenepse sum akunum yalyopura, weik yupu arye nyapniba, Amon mutuku unyak nang, sik Amon yala nang ati yuk mutuku yu nang arye olyanamake. Narye lo arepniba, amutuku noutam, ‘Nun deiyok mutuku ani,’ tenenyak asik, el si Raba mutuku, weik mutuku obuka, sice buklopnamake. Tonda, amutuku noutam nirya, ninye aik nirya ap, desa-desa talibuka, unyak mutuku nirya ap, ayu nang arye, uku dabikiba, uku arye anyasik nirya dibuka, sirya daknamle. Winiplyopura, Amon yala nang unyak mutuku nirya ara, asik oldemuk upnamle. Winibikca deice arye, minop talak, yuk mutuku nang arye, Israel nang taleamik tuku alubuka dopromik touk, amutuku tuku nirya ara, Israel nang tuba tamubuka dopropnamake. Na Allah Yahweh arye, akunum nyapmasina ati, aning nirya ara, dipkoprob nong upnamlarya!
Ati ara, sik Israel nang arye uku dongona ati yo ara, bai kum dolbinmake. Tonda, ‘Nun aik yo patapsilʼ tenen, yo kan-kan ton kum wepnamake. Tonda, sik wa win dam kum bol banamake. Sik mal olan nang arye, ninye ona ati bomikce ning nirya, pia weik aupnamla ati, Israel nang arye, aninguk bulubuka, deibikca deice aryuk, sik asik yo ati, uku donamake. Tonda, God mutuku nang ap, sik melilamik nang ap arye, Israel nang, sik ning nirya alubuka dololamik ning, ara Israel nang, sik bona nirya ubula dopromik ning ati, kwang daknamsiyake. Ara, Gog ap, el yin nang ap, sik ning nirya ara doropnamak bukni, atalak ara, Israel nang arye, sik Gog tam nang taleamik ning nirya, tamubuka alubikirye dopropnamake. Na Allah Yahweh, aning-aning nirya talibuka, deice tam erebuka, pia mikip weik ununye birye, akunum nyapdeiamsa ati, aning nirya dipkoprob nong upnamlarya!
“Ara, talye ati kum nyapsine. Na tenen ninye tamubuka boyanyeura, kwang dakna ati, narye sik yuk pera mutuku ninye, sik sal mapu ap, sik kilmapu ap nirya dobukapnirye, Yehuda ninye damuk bobiniba, aninye arye, sik mapu nirya dekenamake. Dekicak arye, ila tamubuka, Israel ninye arye, sik mapu dopdobikirye, yuk weik pera mutuku, Syeba mutuku unyak nang damuk, bobinuka dekenamake. Syeba mutuku ninye arye, sik Tirus mutuku mapu ap, Sidon mutuku mapu ap, Pilistina mutuku mapu ap, dekikirye, pia ikin weik pil arukunamake. Ara, urdem ati, kum nyapsine. Nara, Allah Yahweh arye, nyapsina anya arye, aning ara dipkoprob nong upnamle.” Allah arye nyabuk.
Bukni, Sion mutuku kon unamak nang kan-kan noutam ara, ninye mitik tonun, ton lyepdopnamne ati, ton tam nang ara, kam tuba unamake. Tonda, Sion mutuku ara, ‘Naʼ tenen, pia teleb lek mutuku unamle. Winiplyeura, Yakub birye deibukba, dadeipdanin yangalamik nang, sik mal olan nang arye, amutuku alubuka dobukabikce, anang yakuka dopkwetebikba, bindobik bukni, aminyan talak ara, Yakub el tam nang arye, sik apu yapu yakuka, dopkwetebik nang, sik Edom tam nang ati, tamubuka yaknamake. Winibikceura, amutuku batakuka bindopnamake. Winibikceura, Yakub el tam nang, sik mapu koproba arye, sik apu yapu taleamik mutuku, amutuku uk, tamubuka yanuka talibikirye, pia asukumuk unamake.
Ati ara, anggun nirya kekeplulume! Wini talak ara, na Allah arye, sik yuk mutuku-mutuku nang arye, na mapu koproba ati, ikin ning delilamik nang ati, opnirye wenepnamnarya! Amutuku-amutuku nang nirya, akunum opnirye, sirya daknyopura, sikce minop talak obukabikce, tapu koupdongobuka bobinamikce, pia ikin pil dilamik nang, anang arye tamubuka, sik Babel mutuku nang ap, yuk mutuku yu nang ap, obuka sirya daknamake. Sik minop talak arye, ikin ning boyanuka delilamikba, kanye imun ulamuk nang arye, tamubikirye, sik bobinamik mutuku deiyok nang ap, sik tam nang ap obikirye, sik amu tam deipnamake. Allah arye nyabuk. Tonda, Allah arye laka nyapdeipnukba, narye anggun kekena ati, laka nyapmasinanye, nabi Zakaria, nati ton moubuka biknamnulume. Ara, Allah arye, ‘Winipnamne,’ nyabuka, laka nyapnuk yupu nirya, akunum nong uplyopura, anggun aululum nang nirya arye, na Zakaria biti biknamlume. Ara, anggunce, ‘Se, dipkoprob, im deice unyak yin talen malaikat nirya talibuka, ulula deiyoknye birye, nabi Zakaria dobuka, nun dam dopdeipsukba, elce laka nyapsuk yupu nirya ara, akunum nong upliba eipmap atia,’ tenemunce, nati, ‘Yo, elda dipkoprob Allah aryuk, dopdeibukba, nun dam yanuka, laka nyapsuke,’ tenepmunce, diba tenepnamlume. Nabi Zakaria birye nyabuk.
Bukni, ‘Nun pil melina ati, talye pil don nang deknamabe,’ teneprumunyopura, anggun neika ululum Israel yala nang, tonok yala nang ululum ati, yo bok deice arye dekna pia meme. Aning patapsilyeura, anggun pil donanye do, pil don kilapu do, tonda, ‘Yo bok deice arye dekuka doprobibyeba, pil talye melibuka donamsiake,’ tenepmunyopura, Israel nang mamun ara, kum dekenamlulume. Aning kum bukni, anggun unamlum mutuku dana-dana tam aryuk, talye daunyak nang, yuk yala nang ara, yo bok deice arye dekna teleb uka. Ara, sal do, kilapu do, sik pil melibuka dona nang ati dekuka deipmunce, talipmunyeba, sik nirya arye, anggun pil melibuka donamsiake.
Ati, anggun dipdelulume. Sik dana-dana tam arye, ‘Yata wiripmal do?’ tenen, ninye yupa pia weik tamubuka anggun dam anyuk yanganamake. Ara, anggunce sal mapu deiamlum ning weik tonun, pia pera weik mutuku arye anggun dam yanganamake. Tonda anggun kilmapu weik, anggun melin kilapu arye iribuka talibikirye, boyanganamake.
Aning nirya ara, talye ati kum nyapsine. Deiyok ara ani. Ara, na Allah Yahweh arye, ayupu nyapsina anya arye, nong dipkoprob upnamlarya. Winipnamsina ara, ani. Narye anggun Yerusalem mutuku nang ap, amutuku nirya ap ati, tuba tamubuka pia teleb kipdeipnyopura, aning-aning nirya ara, yamubuka arepnamsine. Winipnamsin ning ara, winipmanto yupu nyapsine. Ara, weik mek pia celona kumce, mek mikip arye balamle atonun, narye anggun ati, aning-aning nirya weik tonun arenamsine. Tonda, yuk-yuk mutuku nang, yala-yala nirya ara, pia teleb bona weik tonun, Yerusalem mutuku dam boyanuka arenamsiyake. Winipnamaka ara, mitik tonun kuma. Weik mek oplirye, mikip arye pia balamle atonun, anggun dekna weik ning yala-yala nirya boyanuka, Yerusalem mutuku dam boyanuka arenamsiyake. Winipmanto ton ning ara, mapu el lin irina deice moubuka bulamakba, kanye deibuka unyaka atonun, anggun babye atonun unamlume. Tonda, mapu iribukabikirye, moum arebikiba, bouplirye, kanye delilamak atonun, narye anggunti atonun winipnamsine. Kilapu arye, sik mitik mapu dobuka sik keil deice deibikirye, lulukulongokiba, sik mapu kanye delilamak touk, narye anggun tibuk atonun winipsinirye, kanye deibuka telebuk unamlume.
Aning nirya ara, anggun tukwak mutuku, im sirya, mutuku sirya, noutam ululum nang nirya ara, pia dakeiam asa arye, tunim abuka, Allah el dam tamupmunce, yanuka unamlume. Yupu nyana ara, kume. Deiyok ara, Allah Yahweh el dam ara, wininamlume! Allah Yahweh, el pia teleb, lek diamuk ulamukak, im deice akunum buklirye, yanuka lyepropnamsila ati, anggun nirya ara, yupu nyana kumce, tunim abuka unamlume! Na Zakaria birye nyapsine.
Piblisite