Yesaya 13:6 - Eipomek6 Sik wenepnamne mutuku noutam ululum nang ara, imun kanye bopmunyakarye, weik arye engenamlume. Ara, na Yahweh arye anggunti, ‘Wenebuka opnamsineʼ tenepse talak ara, akunum dam upmala atia. Atalak ara, na Allah arye, aning-aning nirya talibuka, deice tam erebuka, mikip weik ununye birye, na tenepse nang nirya ara, obuka kum kipdeipnamsin atia. Gade chapit la |
Yesaya 13:6
39 Referans Kwoze
Nabi Sefanya arye, ayupu nyabuk. Allah Yahweh aning-aning nirya talilirye, weik tonun erebuka, Pia Mikip Weik Deiyoknye ulule. Elce, ‘Tukwak mutuku unyak nang nirya ati, sik wininyak ning ara, teleb do, malye do?’ tenen, dipdesilirye, wenepnamsil talak, akunum dam upmala ati, anggun tukwak nang nirya arye, kekeplulume! Ara, Allah Yahweh, el dam yamunce, yupu nyana pia kumce, pia tunim abuka unamlume. El Allah arye, tukwak nang nirya, yupu bokeipnamle sum, akunum dam upmala ati, elce tenyamukce, akunum wiamuk nang nirya ati, akunum kintinip deipmale. Ara, winipmanto ara, ninye arye, ‘Allah ati, si erenamap’ tenen, sikce talye kam un ning, domba basam do, kambing basam do, obikirye, uku dongolamak touk, Allah arye anggun Israel yala ninye ati, atonun winipnamsile. Allah arye, ‘Anang ara, ‘Naʼ tenen, nang unyaka ati, na si erena ati, wenebuka opnirye, sirya daknamne,’ akunum tenebuka ati, aning ara, adiparyuk winipnamsil ati, anggunda, Allah el dam yamunce, tunim abuka unamlume. Ara, sik malye-malye weik wininyak nang ara, Allah arye sikti, weneplirye, opnamla ati, akunum kintinipmale.
‘Allah Yahweh arye, malye unyak nang wenepnamle sum ara, nun kanye deibabe,’ talye ati nyaltakalulum ninye ara, bicoe. Dipkoprop, anggun malye winilulum diparyuk, na Allah arye opnamsinarya. Anggun malyeuk winilulum bukni, yata deiyok ati, ‘Se, Allah Yahweh arye, dan sum yalirye, malye ninye wenepnamle do?’ tenen, kanye deibuka dilulum do? Anggun walwal aryuk winilulume. Asum ara, dirina sum kuma. Pia kunukna sum ati, anggunda, ‘Asum ara, minop yatue,’ tenena meme.
Anggun nirya moubuka dinamlulume! Na Allah Yahweh arye, tenepse nang, amutuku-amutuku nang nirya wenepnamne talak ara, akunum dam kipmale. Atalak akunum kiplyeura, anggun nong deice, weik ikin ning deipnamsina ara, ninye ati, bico pia kum tenenamne. Yu pia weik upnilyeura, sik unyak mutuku nirya, malye weik kipnirye, amutuku nang nirya obuka, sirya daklopnamne. Ara, narye malye ning talibuka, malye unyak nang nirya ati, wenebuka opnirye, kum kipdeipnamne atia. Winipyeba, anggun mutuku noutam ara, ninye una kumce, maning dem upnamle.
Allah arye akanye imun ning weika arye, Babel mutuku ninye sik nong deice dopkweteplibuk yalyopura, ikin kanye bobikirye, ‘Se’ tenen, weika arye engebuka donmakiba, yuk mutuku Raja nang nirya arye, yukak arye tikuka eibikirye, ayupu nyapnamake.” ‘Se, Se. Amutuku ara, weik mambul mutuku, pia teleb ulamuk. Babel mutuku ulamlum ninye ara, mikip weik ap, pia teleb ap ulamlum bukni, wini talak adiparyuk tonok keting noutamak ara, Allah arye wenepmasilba, akunum kum daneipmasile,’ nyabuka engenamake.
Atalak, Allah Yahweh el yupu ara, liman oplirye, lelim lelamle atonun, lelim weik leplirye, el mapu mal olbanuce nang ati, ‘Winiplulume,’ nyabuka, yupu arepnamle. Ninye olbinamak nang ara, yupa pia weik, nukmanto kum upnamaka anya arye, sik anang ara, Allah elce nyaplye touk, ubuka mal olbinamake. Dipkoprop nyapne. Allah Yahweh arye, ‘Yehuda tam ninye malye ulamik ning dekna ati wenepnamne,’ tenebuk sum, akunum uplyopura, tonoknye babye, kum darapdongobuka dakeiyam asa, kum uptinge. Ara, pia kanye imun sum kipnamla ati, nyapsine. Nabi Yoel birye nyabuk.
Winilamik bukni, wini talak winipmanto ara, namin mek makau deiplobikiba, colamle atonun winipnamake. Ara, yuk mutuku yu nang arye, Babel mutuku nang, talye karin arye obikcopura, Babel nang ara, weik tonun dipnamake. Winipmanto ara, namin mek makau sakukaplirye, copliba donoklamak touk, Babel mutuku nang nirya opnamake. Ati ara, anggun Babel mutuku nang, pia weik dipnamaka ati, engenamlume. Tonda, Babel mutuku nang, sik weik suse dila ap, engena ap, sik suse dila kwetena ati, obat salep arye kwetepnamlume. Winipmunyopura, yatanye birye kel biktu do? Sik walwal bukni, na Allah arye, sik Babel mutuku nang ati, kwetebuka teleb kipdeipnamne do, kum do?
Aning ara, talye ati kum nyapsine. Allah arye akunum tenyamuk touk, asum akunum uplyeura, Allah Yahweh aning-aning nirya eitam erebuka, im deice yin talin malaikat nirya, sik weik deiyoknye ulula ati, sik kanye erebuka, kwalibuka unyak nang nirya ara, amu tam kipdeipnamle. Tonda, tukwak nang mutuku sirya, im sirya nirya arye, ‘Se aning ara, weik mambul, aning tonok ara, pia telebeʼ tenen, dipdakirye, kwalibuka talima erenyak nang nirya ara, Allah arye aning nirya yaniplirye, pia amu tam kipdeipnamle. Tonok ning babye, kum bataknamle.
Bukni, anyapnusin yupu moubuka kekepmunce, ‘Dan talak winipnamle do?’ tenen, dinauk unamlulume. Ara, ‘Weik imun ning winipnamle’ tenen, kintinip deipse sum, na Allah Yahweh arye ninye nirya ati, yupu lipsisikuka bokeipnirye, malye wininyak nang wenepnamne sum, min kum upmalye talak ara, minopce narye na yupu lak lenanye, nabi Elia dopdeipniba, anggun dam minopce yanamle.
Allah Yahweh elce, ‘Tukwak mutuku unyak nang nirya ati, sik unyak ning ara, teleb do, malye do?’ tenen, dipdelirye, wenepnamle talak, akunum dam upmale. Asum ara, dipkoprob minop yanuka winipnamsile. Asum deice arye, Allah Yahweh arye, tukwak nang unyak ning nirya ati, dipdelirye, sik nirya arye, malye ning winilamika ati, wenebuka opnamle. Asum ara, dipkoprob minopce yanamle. Asum ara, kanye imun weik ning yanamla ati, pia weik tonun engenamlume. Tonda, sik mandipna kanye bobuka, mal olana kel weik bikamik nang babye, ‘Se, yata ati, aning winipmasil do? Wini talak yata wiriptibye do?’ tenen, ikin kanye bobuka, sik babye engenamake.
Nabi Yoel birye nyabuk. Se, Allah Yahweh el si eren aik koproba noutam talibuka, Allah si erena ati, kam ning obuka, uku dongolalum nang, imam-imam nang nirya arye, malye kanye bobuka engepnamlume. Anggun Allah si eren aik noutam, ongobuka pil dolulum baju kwiribuka batakmunce, malye baju arye, kisok kwatibuka malye yupu nyapmunce, engenamlulume. Ara, lukunyan noutam nirya ngalukuka, malye yupu nyabuka engenamlume. Deiyok ara, sul kwising arye, anggun wa kouamunye ning nirya, dibuka sirya dakanmaka ati, Allah arin ning ati, gandum ap, anggur mek ap, kum arelyanganamaka ati, malye yupu nyabuka, engenamlulume.
Atalak anggun Pilistin mutuku noutam, weik asik dobuka ululum nang ap, anyasik dolamik bisik bublan wekelban dam bulubuka, yupu sisikilulum deiyok nang ap nirya ara, talima uk dipsilyeba, engepmunce, “Se, yatanye birye melipsutu do?” nyabuka, ngalunamlume. Deiyok ara, anggun mal olan nang, sik yin nang yupa weika arye, iknapye tam arye (arah utara) kintinibuka yangakirye, tuku deice yanibiceba, tuku buta welepnamle ning ara, dua bum kibuka, welelamle touk upnamle. Sik ayin nang ara, tonoknye babye, namin arye kum yanamle. Sik mal olan nang nirya, neikauk bikbik abuka yaceba, eipmunyeura, ilil weik upnamle.
Ati, se anggun wa wibuka yala koululum ninye nirya ap, anggur tapu talilulum ninye nirya ap ara, malye kanye bopmunce, ngalukuka engeplulume. Tonda, wa wina kel bikimunce, wilulum nang nirya babye, engeplulume. Ara, anggun kouamunye ning, gandum ap, jelai ap, duk moupliba lilulum ning nirya ara, malye kiplirye, kum lipnamlume ati, engenamlulume.
Aning ati ara, ninye arye deipkiknye, Yeheskiel anda, ngalukuka malye nyamince, weik arye engenamlyame. Aparang ya ara, na mapu koproba, Israel nang ap, sik talina ati, ninye deiyok talibuka, unyak deiyok-deiyok nang ap, anggun nirya ona ati, aparang ya akunum kintinipse. Israel nang talibuka unyak deiyok nang ap, sik amu tam talinyak nang, anirya ap ara, sik yu nang ara, aya arye lukuka obikceba, dipnamake. Ati Yeheskiel, anda ‘Seʼ tenen, malye kanye bopmince, bikilina ati, anggun Israel nang ulamlum touk, an keil deiceuk taruk arye, opdanulyame. Winipminyeba, ninye nirya eibikirye, ‘Se, kanye imun ning yanamsila ati, el ikin kanye bobuka egenmale,ʼ tenebuka, biknamkiake.
Se, Moab mutuku noutam bukni, anggun Hesyebon mutuku ululum nango, malye nyabuka, engepnamlume! Deiyok ara, anggun mutuku dam uamuk mutuku, Ai mutuku babye, yu nang arye, akunum obuka sice buklopmake! Aning atonun, anggun weik asik Raba mutuku noutam ululum kilapu nirya babye, weik yupu arye engenauk winipnamlume! Ngalukuka engelamunyak arye, anggun nong bol deice, parang arye sekuka opdanamalume. Winipmunyopura, ‘Se, nun tam nang akunum opmakeʼ tenen, anggun teleb baju ongolulum ning ara, kwiriplobuka, pia malye baju uk, kain karung ongonamlume. Ara, ‘Nun tam nang ati bicoeʼ tenen, lak kina ati, malye baju uk ongopnamlume. Winipmunyopura, imun kanye bona ap, kanye walwalabuka nyana ap, kipmunce, bikbik abuka otam binmana, atam yanmana, kinamlume. Winibuka wininamluma deiyok ara, ani. Ara, anggunce si erelulum isa, el si Milkon ap, el si erena ati deiyok nang, sik isa si erenyak imam-imam nang ap, apil dona ati melin nang ap, anggun mutuku obuka sice buklopnamsiak nang arye, anang nirya tapu koubikirye, sik mutuku tamubuka bobinamaka ati, anggun nirya engenauk unamlume. Anang bobuka bikirye, yuk mutuku delilbikceba, daunamake!
Ati, wini talak ara, ‘Naʼ tenen, ninye yata wiribuka unyak do? Nara Allah Yahweh arye, nyapsine. Malye nang arye nati nyaninyak ning ara, pia malye ati, na lik weik unulule. Ara, Babel mutuku nang arye, yanuka obuka sirya daksikce, anggun ning nirya yanduka alabuka dopromsik ning ara, anggun dekna ati, Babel ninye arye nati kum arelamnike. Winilamikce, ‘Israel ninye pia talinamap’ tenen, kanye talima erelakirye, na Allah ati yep-yep anikirye, na si ati, malye yupu nyaninyake. Asum-asum nirya, na si deice pia malye nyaninyake. Nara, Allah Yahweh arye, nyapsine.
Tirus mutuku nang wenebuka malye kipdeipnamle ning ati, Allah arye na Yesaya dam yanuka nyapdeipnuke. Ayupu ara, ani. Weik laut mekwen deice balamle kapal, Tarsis pia mambul kanye bobuka engenamlume. Deiyok ara, Tirus mutuku weik asik domik ning ara, akunum ulubuka daklobikce, sice buklobik. Sik laut mekwen deice kapal talin nang ara, otam laut mekwen dana-dana tam dukdongamuk mutuku, el si pulau Siprus arye binamuka, Siprus mutuku dam mekwen deice yanuka deipmek talak ara, Siprus mutuku nang arye anggunti, “Se, otam keting kumulban tam, weik asik Tirus mutuku ara, akunum obuka bataklopnamake,” nyanmikak kekenmek. Tonda, “Tirus mutuku laut mekwen deice ban kapal delilbanak ap, amutuku ninye aik nirya ap ara, dakuka sice buklopnamak,” nyanmekak, sik Tarsis mutuku kapal laut talin nang arye, ayupu kekebuka bikik.
Ati ara, se, sik deiyok-deiyok nang nirya ara, bicoe! Anggun nirya ara, engepmunce, uku diplyeba, sice buklopmalyak, tuku deice mapra engenamlume. Winipmanto ara, Allah el domba basam atonun nang, talibuka weilulum nango, Allah el tenebuk sum, akunum kiplyopura, anggun nirya ara, wenebuka opnamsilca. Akumopura, ton nang ara, anggun ulamlum mutuku noutam arye, yakuka donoksiliba, yuk pera sukumuk, sakuka bindopnamlume. Winipmanto ara, kira tuku arye dobuka, teleb uka bikirye deibikiba, urasin pia teleb mek makau memamikiba, tukwak sakuka poulbilirye, colamle touk ubuka, wenepsilirye opnamsile. Ati ara, anggun nirya malye nyabuka, tukwak mabuka ninikmunce, ngalukuka engenamlume.
Allah arye anggun nirya ati, wenepnamsil talak ara, anggunda yata wiripnamlum do? Tonda, anggun wenena ati, lo arepsilirye, ikin ning dopdeipsiliba, pia pera mutuku, yu nang arye mal piyanamsiyak talak ara, anggunda yata wiripnamlum do? Allah arye lo arepsiliba, pera mutuku arye, mal piyanamsiyak nang arye yakceura, anggunda dan mutuku nang arye mikip kiptingba, sikce amutuku nang dam binuka, ‘Se nun ton melipsululume,’ nyabuka, moroptum do? Tonda yata tonye biti, ‘Melipsilyame,’ nyabuka moropnamlum do? Tonda, anggunce talibuka umunce, bona talin nang umunye ning nirya ati ara, ‘Duknubuka deiptibiba, ubula kum dopropnamsiyakʼ tenen, dan mutuku duknupnamlum do? Kume, aning kum winipnamlume.
“Anggun tuba ilil kum unamsile,” nyapsin ning ara, talye ati kum nyapsine. Deiyok ara, na Allah arye, anggun Israel nang arye, malye weik ulamlum ning ati, na yu tenepsise ning ara, mitik tonunuk tuba upmal bukni, aminyan talak min kum upnamle. Sik Israel nang ati, yu ton tuba kum upnilyeura, na yu weik tuba aupnamnil ning ara, sik Asyur mutuku nang ati, sik nong deice deipnirye, anang nirya wenepnirye, obuka kum kipdeipnamne. Allah arye nyapsuke.
Babel mutuku ara, na Allah Yahweh arye, malye kipdeipyeba, ninye pia kum kibuka, lo uk uplyeba, malye mek kwen lu kipdeipnyeba, amutuku noutam ara, ninye una kumce, kout maka dem unamake. Winipmanto ara, Babel mutuku dana-dana tam nirya ara, amsuna bun ning arye, buta welelamle touk winipnamne. Winipnyeura, amutuku noutam wamlye ning nirya ara, kum kipdeipnirye, sice buklopnamne. Ayupu ara, na Allah Yahweh aning-aning talibuka, deice tam erebuka, mikip weiknye unirye, im deice yin talin malaikat nirya, sik deiyoknye unune. Narye ayupu ara nyapsine ati, aning nirya ara, dipkoprob winipnamne.” Allah arye nyabuk.
Ara, talye ati kum nyapsine. Deiyok ara, Allah Yahweh arye, mutuku sirya, im sirya nirya, unyak nang ap, anggun mapu silip nirya ap, anggun yin talin nang yupa weik unyaka ap, anggun nirya ati, Allah arye yu tenesulule. Allah elce sik anang nirya ara, oplirye kum kipdeipnamle. Ara, lo arepliba, yu mal olan nang arye yanuka, sik nirya obuka, sirya daknamake.
Anggun talima erelamunya deice arye, aning nirya tenelamlum bukni, wini talak ara anggun Babel mutuku nang ara, pia ikin ning, kanye imun weik ning, anggun deice yasiliba dopropnamlume. Aikin unamsil ning ara, anggun mutuku asing len nang arye, pia teleb pil doptinga babye, aning arye kum yanuka melibuka yupu seknamsile. Allah arye anggun deice ikin un ning ati dopdeipnamsil ning ara, anggunce, ‘Aning ara yupu sekdongopnamabe,’ teneptuma babye, aning kum winipmanto. Dipkoprop anggun nong deice yanamsilca! Kum bikmamunye talak arye anggun dam kanye imun weik ning yasiliba, dopropmunyopura, anggun ap, anggun un ning ap, anggun mutuku noutam ulye ning nirya ara, malye kibuka sikce buklopsilirye, kum kipdeipnamsile. Tonda aning min kum winipmalye talak arye, ‘Aning-aning winipnamle ning ara, winibuka winipnamsileʼ tenen, pia moubuka kum biknamlume.
Allah tenibukce wipdeipnuk ning ara, Allah Yahweh arye, ‘Aninye, sikti, lyen talak akunum dam ubuka ati nyalbinamlyame,’ nyapnuke. Ara, imun kanye bonmakirye, engebuka unyak ninye ati, ‘Talima kwa baribuka melinamsile,’ nyabuka laka nyanamlyame. Tonda, anggun mal olan nang ati, ‘Kwang dakanamsile,’ nyabuka laka nyanamlyame. ‘Nyabuka nyalbanamle’ tenen, Allah arye nati wipdeipnuke.
Anggun tilila yupu nyalulum nabi-nabi nang arye, malye weik ululum ning ara, nyapnusine. Winipmanto ara, ninye arye, sik asik dana-dana tam antanap dongobuka domik keil poka noutam ara, yuk mutuku nang arye, ‘Anang opnuyap’ tenen, bisik botopdeiamika ara, adiparyuk abisik lipsisikuka dolamak touk, kum ulule. Tonda, yin talin nang arye, akeil poka deice tam welebikirye, amutuku nang ati, moubuka melibikirye, kaliklamak touk, anggunda kum winilulume. Anggunda, ‘Israel nang malye kibikcak’ tenen, moubulka, melibuka kum kalikilulume. Ati, na Allah Yahweh arye, tukwak nang nirya, sik malye uning wenena ati, aning nirya akunum opnyeba, daksaklyopura, olyanamsil talak ara, Israel yala nang ara, teleb kibuka kum tiknamake. Sik ti, wenepniba, ikin weik unamle. Ara, Allah Yahweh arye, ninye nirya ati, wenen sum akunum dam upnamle ati, nyapsine.
Allah Yahweh, elce tukwak nang, im sirya mutuku nirya, anggun wenen sum akunum dam uple. Ati ara, minop talak, sik mal olan nang arye, anggun Yerusalem mutuku ululum nang obikce, anggun talilamlum bona nirya alubuka dopromik ning ara, narye dopropnirye, anggun Yerusalem mutuku nang ati, ila tamubuka arepnamsine. Aning-aning nirya ara, narye anggun nirya ati, bokuka yuk-yuk arepnamsine. Aning nirya ara, anggun asing arye eipnamlume. Bukni, doupnamle talak arye winipnamne.
Anang oplopmana deiyok ara, ani. Ara, minop talak arye na tenelamse touk, wini talak akunum upmala ati, na mapu Israel ninye ati obuka sirya dakik nang kwang dakmane. Na tenen ninye Israel ninye ati obuka sirya dakikce, ‘Tapu koubuka deiamika noutamak arye, lopnirye lyepnamne,’ tenelamse talak akunum upmoa ati, amalye winin nang opmanue.
Allah arye, ‘Na tenen mutuku’ tenen, Sion mutuku wibuka, el si Yahweh nyabuka, Sion mutuku deice deibuka ati, elda amutuku ulule. Ati, yanuka tikmunce, pong-pong ana, el si terompet, lelim nyapmunyopura, amutuku ninye arye, ‘Se, mambul sum ati, pitin-pitin kinmake,’ tenepnamake. Se, anggun Yehuda yala ninye nirya ara, awinipnamle ning eipmunce, ilil upsiliba, yok sirim talipnamsile. Ara, urdem ati kume. Allah Yahweh arye, nun malye winin ning dekna ati, ‘Wenepnamne,’ tenebuk sum, akunum dam upmala ati, ‘Se, ikin ning nun dam upmale’ tenen, imun kanye bobuka unamlume.
Piblisite