Yesaya 12:4 - Eipomek

⁴ Atalak akunum kiplyopura, anggunce nyapnamlulume. “Nun nirya arye, Allah el tibuk, telebe,” nyabuka, el siuk erepnuyabe! Tonda, ‘Elcuk melibuka lyedopnamsilʼ tenen, el tibuk morobibyakarye, el siuk erenamabe. Tonda, Allah el mikip weik arye, mambul pil dolul ning nirya ara, ‘Yuk mutuku nang nirya kekepnamakʼ tenen, aning laka nyalbinamlulume. Tonda, “Nun ni koproba Allah, mambul weiknye ulula ati, el pia teleb siuk, pia telebe,” nyabuka, erenamabe. Ati ayupu nyabuka, laka nyalbinamlume.

Yesaya 12:4 Referans Kwoze

Mazmur 105:1

Allah ati, ‘Telebe,’ nyapmunce, el weik mambul yupu nyabuk ning ara, ninye mutuku-mutuku nirya ukcak, laka nyanamlulume.

1 Tawarikh 29:11

Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.

Yesaya 25:1

Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.

Yohanes 17:26

Narye na mapu ati an winiminye ning nirya peterelamsiba, kel bikinyake. Aning akunum winilamse touk, sikti, tuba unamne. Deiyok ara ani. Ara, ance nati, weik arye kanye deiamnulum touk, ance sikti, kanye weik arye delinamlyame. Tonda na ap, sik ap, talima dukdongobuka neika unamabe. Nara, sik talima ak unamne. ‘Aning-aning nirya, moropmakin ning nirya winipnamle’ tenen, akunum moropkine, naio.” Yesus arye ayupu nyabuka, el li Allah ati morobuk.

Yeremia 50:2

Ara, tukwak mutuku im sirya, mutuku sirya nirya unyak nang, sik yala yuk-yuk nang nirya ara, ‘Sik ton kel biknamakʼ tenen, na nyapnukin yupu bobinuka, laka nyalbinamlyame! Tonda, Babel mutuku noutam awamuk ning nirya ara, amutuku unyak nang ap, Allah arye obuka sirya daknamle,’ nyabuka, laka nyan yupu ara, kum duknunamlyame. Ayupu uk, laka nyana ati, lak kin ning, el si spanduk sekuka erepdeipmince, lak sukumak deipminyeba, dana-dana tam unyak nang nirya eibikirye, bikinamake. Ara, ‘Yuk mutuku yin talin nang yakirye, Babel mutuku nirya ap, Babel tam umunye nang nirya ara, opsikiba, anggun nirya dipnamlume. Anggun isa kil, el si Bel, erenyak isa babye, alye weik dakdanamle,’ nyalbinamlame! Ati, aning ara dungnuna kume! ‘Anggun olyanamsiak nang arye, Babel nang arye, si erenyak isa kil, el si Merodak babye, anggun mal olan nang arye, aning dakuka, atu atonun buklopnamake. Tonda, aisa kil bukni, el si bitinye ning ara, dewa Bel, ninye urasin atonun kibuka deiamikce, si erenyak patung nirya ara, sik olyanamak nang arye, aning coplobikiba, yuk-yuk kipnamle. Ati ara, aisa kil Bel ap, el si erena ati, patung talinyak nang nirya ap, alye weik dakdanamake. Aisa atibuk, ‘Nun deiyok kil,’ nyabuka, si erenyak nang nirya ara, imun kanye bobuka ukirye, ‘Se, yata wiripnamsil do?’ tenen, teniltonamake. Dipkoprop aisa si erena deiyok ning nirya ara, sice buklopnamake.

Mazmur 57:5

Pia yu nang arye, ‘Anye opnuyaba ati, dan mutuku ulul do?’ tenen, akunum eninyake. Winipmanto ara, bai tam kam ulamle ning, el si ara, yu weik singa kus arye, ‘Ninye obuka dipnun’ teneplye touk, sik yu nang arye, na ona ati ara, atonun kibuka unyake. Na ona ati, winipmanto ara, anang sik si tatce ara, ninye on mal ap, ninye on yo balang ap, atonun ulule. Tonda, ayu nang arye, sik si tang deice arye nyanyak yupu nirya ara, ninye on parang, el si weik tonun, yu weik ulamle touk unyake.

Mazmur 18:46

Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.

Nehemia 9:5

Atalak ara, Lewi yala nang arye deiyok koubuka, Allah ati moronmek. Moronmek nang sik si ara ani. Yesua ap, Kadmiel ap, Bani ap, Hasapnia ap, Serebya ap, Hodia ap, Sebanya ap, tonda Petahya ap arye, moronmek. Moronmekce, nyanmek, “Anggun nirya tiklulume. Anggun ni koprop Allah, el si Yahweh ati, si erepnamlume. Yahweh ara, minop arye aulamuka ani, wini talak babye, doyanamle talak babye, apia unamlanye, Allah el si erenamlume,” nyanmek. Sikce nyanmek yupu ara ani. “Nun ni Allah, an si weik mambule. An ap, an si ap ati, pia telebe. ‘Ninye mutuku-mutuku nirya, an si biketinge’ tenen, nyapkiyabe. Yuk-yuk ning, ance arisilyam ning nirya ati, ‘Aning ara mitik mambule’ tenen, ‘Telebe,’ nyaptibye bukni, an tonok ati ara, pia weik arye an si erenyabe. Yuk teleb ning nirya ara, an amu tam uliba, anda weik si erenanye deice tam ulyama anya arye, ‘Anda weik mambule,’ nyapkiyabe. Yuk ning nirya ara, mitik mambul uka. Ati ara, anti pia si erenamkiyabe,” nyabuka si erenmek.

Keluaran 33:19

Nyabukura, Allah el si Yahweh arye tamubuka nyabuk. “Na mikip ap, pia teleb wininye ning ap, weik mambul ning ap, an dam winipnin banirye, na si koprop Yahweh laka nyapnamakine. Tonda, ‘Naʼ tenen, ning ap, na kanye delin ning ap, bico tenenamne ning ap ara, na wibuka deipnamne ninye ati, aning arepnamne. Aning atonun, sik malye winibiceba, adiparyuk oploptinye bukni, bico tenepnirye, namin kipnamne ninye babye, na dem aryuk wipnamne. Nara Allah ununa ati nyapkine,” Allah arye nyabuk.

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Yesaya 66:19

Na Allah arye abulubuka deipnamne nang ara, unamak noutam ara, ‘Na mikip kel biknamakʼ tenen ati, ton lak kilin ning kintinibuka deipnamsine. Winipniba, anggun anang kan-kan arye, ton nang kum oplopniba, tuba kam unamak nang ara, wibuka deipnyopura, sik anang nirya arye, na yupu ap, na unye ning ap ati, bobikirye, aning nirya min kum kekelamik nang dam binuka, lak nyalbinamake. Dopdeipniba, lak nyalbikcopura, na pia teleb unye ning ap, mikip weik arye pil dolamse ning ap, na weik eren unun ning ap nirya ara, sikce eibikirye, kekebuka kel biknamake. Ara, narye dopdeipnamne nang arye, sik dana-dana tam unyak nang dam binuka, na pia teleb unye ning nirya lak nyalbinamake. Sik nyalbinamakak ara, ani. Ara, Tarsis mutuku ap, Pul mutuku ap, Lud mutuku ap, Mesek mutuku ap, Rosh mutuku ap, Tubal mutuku ap, Yawan mutuku ap, Spanyol mutuku ap, Yunani mutuku ap, binuka lak nyalbinamake. Amutuku-amutuku nirya unyak nang dam lak nyabikiba, na pia teleb unye ning ap, na mikip weik unilye ning ap ara, kekebikirye, moubuka kel biknamake.

Yesaya 33:5

Allah Yahweh, elda pia eitam telebuk ululnye birye, im deice ulul bukni, elce anggun dam, Sion mutuku yanuka melisilya deice arye, pia teleb winin ning ap, dipkoprob yupu lipsisikuka bokolina deiyok ning ap, pia diksukum una deiyok ning ap, arenamsile. Arepsiliba telebuk unamlume.

Yesaya 24:15

Aning ati ara, anggun keting palanyangan tam ululum nang nirya babye, Allah Yahweh ati, si erelulumce, ‘Naio, anda pia telebe nyabuka, el siuk erenamlulume. Aning atonun, weik laut mekwen lilun tam ululum nang babye, Israel nang kalikuka melilul nye, anggun ni Allah el si Yahweh atibuk, ‘Anda pia telebe, pia mikip weik mambul pil dolyame,’ nyabuka, el siuk erenamlulume.

Yesaya 12:1

Allah arye, aning nirya akunum winiplyopura, anggun Israel nang arye, mot nyapnamlulume. Anggunce nyanamlum ning ara, ani. “Se, nun ni Allah Yahweh, nunce antibuk, teleb nyapkiyabe. Ara, ikin kanye bobuka ulamupu bukni, ance nun kanye kwa dipsulumce, mikip kipdeipsulume. Minop talak ara, ance nun malye ulampu ning ati, yu upkukba, weik arye wenyamsulume. Bukni atalak ara, ance nunti, yu tenyamsulum ning ara, akunum kum kipmakila ati, kanye deipsilame.

Yesaya 2:17

Allah arye, aning nirya winipnamla deice arye, sik kwalibuka kiminyak nang ap, tonda kanye erena deice arye, kwalinyak nang ap ara, amu tam kipdeipnamle. Kanye eren nang nirya, wibuka amu tam kipdeiplyopura, atalak ara, ninye mutuku sirya, im sirya nirya arye, yuk nang ati, si kum erenamak bukni, sik nirya arye, Allah el tibuk, “Se, mambul kibuka, pia teleb ululnye bira, el uka,’’ nyabuka, Allah el siuk erenamake.

Yesaya 2:11

Na dipkoprob nyapsine. Yata nang do nirya, sik kanye erebikirye, sik asing erebuka dilenyak nang ap, tonda, ‘Nunda pia mambulʼ tenen, kwalinyak nang ap ara, Allah arye, sikda amu tam kipdeipnamsile. Winipsiliba, anggun alye dakdamunce, ikin kanye bobuka unamlume. Atalak akunum yalyopura, Allah arye weneplirye, kanye erena deice arye, kwalinyak nang nirya ati, wibuka amu tam kipdeiplye nang, mutuku sirya, im sirya nirya arye, Allah el tibuk, “Se, mambule, pia teleb ululnye bira, el uka,” nyabuka, Allah el siuk erenamake.

Mazmur 113:5

Ati ara, yatanye ton, nun ni koproba, Allah Yahweh atonun ulul do? Kume, ara nun tukwak nang ara, pia kum winipmanto. El tonoka! Yahweh elda, aning-aning nirya, pia deice tam buklirye, aning-aning nirya talilula atia.

Mazmur 107:22

Tonda, sikce Allah Yahweh ati, weik kanye deibikirye, “Telebe,” nyabuka, kam ning obuka, el si erena ati, boyanuka arenamake. Aning atonun, tonda Allah elce ninye kum winipmanto pil dolul ning nirya bobuka, yuk ninye damak laka lebuka, peterepra banamake. Ayupu laka lelbanamak talak ara, Allah ati kibuka don mot wibikirye, yuk ninye, sik damak laka nyalbinamake.

Mazmur 97:9

Diba, sik anang nirya arye, kanye pia deibuka unyaka deiyok ara, ani. Ara, Allah Yahweh, anda, tukwak mutuku noutam ulye ning nirya, talibuka deice tam umince, weik deiyoknye ulyame. Tonda, ninye tukwak nang arye, talye ning ati, ‘Nun ni bira ani’ tenen, isa mer nirya ap, mitikto mikip ulye ning nirya ap, talye yuk-yuk yala ning nirya ati, si erenyake. Bukni, dipkoprob ning ara, Allah anda, aning-aning nirya, sik deice tamuk ulyame. Tonda, an pia mikip weiknye ulyame.

Mazmur 96:3

Ati, ‘Ninye mutuku-mutuku nirya kekenamak’ tenen, el pia teleb ulul ning ap, mikip weik arye, pil dolul ning ap ati, laka nyanamlulume. Ara, yata ninye do, ayala-yala nirya arye, ‘Allah el mambul weik winilul ning ati, kekenamak’ tenen, Allah arye ninye kum winipmanto ning ulye ning nirya babye, yuk yala ninye nirya kekenmakce sukumak, laka nyanamlulume.

Mazmur 73:28

Bukni, nara pia dipkoprop, na ni Allah, an dam anyuk unamne. Aninguk tenebuka ununa ara, teleb uka. Na kanye talima pum tam arye, akunum tenepse. Ara, Allah Yahweh arye, aning-aning deice tam talibuka ulirye, Weik Erena Deiyoknye ulirye, ‘Wininamne,’ tenelye touk, aning nirya dipkoprob winilulnye bira, ‘El dam anyuk unamne. El diparyuk melibuka lyelonamnile’ tenen, unamne. Na ni Allah, ancuk tuba kalikuka melinilyamnye winiminya ati ara, ance mambul pil dolyam ning nirya ara, yuk ninye, sik kekena ati, laka nyabuka peterelbanamne.

Mazmur 46:10

Ninye yu deice arye, mal olalamaka ara, Allah arye, ‘Akunuma,’ teneplye talak ara, yupu sekelule. Tonda ninye sik olan yin ap, mal ap nirya lakuka, batakalule. Tonda ninye ona ati, ketelinyak yo tace nirya, kau kibuka celtakalule. Tonda, ‘Mal dobikiba, na nong deice yanuka biknilyak’ tenen, lelilongon ting aning babye, dobuka uku dongolule. Allah ara, Pia Mikip Weiknye ulula atia.

Mazmur 40:5

Yatanye do, kanye talima eren ap, tilila yupu nyana ap, kum ulirye, ‘Allah el si Yahweh, elcuk lyelonamnil’ tenen, Allah atibuk, diba tenebuka ululnye bira, Allah arye melilamliba, el winin ning nirya ara, telebuk wininamle. Pia kanye delinamle. Atonye bira, elce talima erena deice, kwalilamak ninye ati, ‘Melipnamniak’ tenen, kum morolule. Tonda, talye ning ap, isa si ap erenyak ninye, sik isa si erenyak touk, kum winilule. Tonda, aninye ap, neika kum ulirye, ‘Sikda teleb unyake’ tenen, kum morolul bukni, Allah Yahweh atibuk, diba tenebuka winilule.

Mazmur 34:3

Na kanye talima pum tam nirya arye, na ni Allah Yahweh ati, ‘Elda pia telebuk winilule. El winilul ning atonun ning, yuk nang arye ton, pia kum wininyake. Elda tonoknye ulule,’ nyabuka, el si pia erenamne. Winipniba, ikin pil arukunyakba, imun kanye bobuka unyak ninye kekebikirye, sik babye, pin-pin kanye bobuka, unamake.”

Mazmur 22:31

Dotalak unamak ninye arye, sikce deipnamak mapu ati, “Nun ni koproba Allah arye, pia diksukum ubuka, ninye winipmanto kum pil dolamsuk ning ara ani,” nyabuka, laka nyanamake. Winipnamaka deice arye, sikce deibikceba, dadeipdanin banamak mapu nirya babye, sik nirya arye, Allah el siuk erenamake.

Mazmur 21:13

Deiyok ara, an Allah arye, anang sikti, yakuka donoknalame! An Allah arye, sik malye wininyak nang ati, wenebuka oplopnalyame. Winipmanto ning ara, an mal ap, yin ap arye, sik malye wininyak nang nirya ati, adiparyuk obuka, sirya daknalame.

Mazmur 9:11

Se, nun ni Allah Yahweh, an si ati akunum bikamik nang arye, an siuk tenebikirye, anti diba tenebuka, telebuk unamake. Aning deiyok ara, ani. Ara, yata nang do nirya, sikce anti, ‘Elcuk melipsutue’ tenen, anti ekinyak nang ara, ance pia kum bataklume. Tuba tenepsimince, pia melisilyame.

1 Tawarikh 16:8

Anggun Israel nang nirya kekepnululume. Anggun nirya arye Allah Yahweh ati, ‘Nun ni Telebe,’ nyapmunce, Allah arye mambul weik pil dolamuk ning ara, ‘Ninye mutuku sirya im sirya nirya unyak nang kekepnamakʼ tenen, ayupu bobuka, mutuku sirya, im sirya nirya, laka nyalbinamlume.

Mazmur 148:13

Telebe, sik nirya arye, Allah Yahweh el siuk erebikirye, “Allah anda pia telebuk ulyame,” nyabuka, elti, si erenamake. El si erenamaka deiyok ara, ani. Ara, Allah Weik Erenanye uliba, tukwak mutuku unyak ninye nirya arye, ‘Se, el si ara, weik mambul si ulule. Elda pia mikip weiknye,’ tenenyake. Im deice ap, tukwak mutuku, im sirya, mutuku sirya ap ara, mitik teleb ulul bukni, Allah el pia teleb ubuka ulye ning ap, dirina weik ulya ap ara, aning nirya deice tamuk, erebuka ulule.

Yesaya 26:8

Nun ni koproba Allah, ance nunti, “Anggunda aninguk wininamlume, aning ara, pia kum wininamlume,” nyabuka nyalisiminye ninguk, talibuka dobolbanyabe. Tonda nunce, ‘Se, nun ni Allah, el ap, elce mambul weik pil dolul ning ap, ninye mutuku sirya, im sirya nirya kel biktinge,’ teneplirye, nun kanye talima ap, nun tenen ning ap nirya deice arye, antibuk patasiliba, tuba-tuba tenikinyabe.

Yesaya 42:12

Tonda, weik laut mekwen kup-kup ululum ninye, anggun nirya arye, ‘Nun ni Allah elda pia telebe. Elda dirin ap, si Weik Erenanye ap ulule,’ nyabuka, mot senamnululume. Ninye mutuku-mutuku nirya arye, na Allah ati, ‘Telebe,’ nyabuka, mot nyabikirye, si erebuka, na si erenamniyake.

Yesaya 48:20

Ati ara, anggun Israel yala nang ara, Babel mutuku arye batakuka, bikbik abuka bimunce, yuk-yuk mutuku nirya binuka unamlume. Anggun nirya ara, Kasdim mutuku batakuka, bikbik abuka bindopnamlume. Narye nyapnusin yupu ara, boyanuka, weik yupu deice arye, ayupu nyabuka, dana-dana tam nirya banamlume. Anggun kanye pin-pin deice arye, “Ayupu nyapnamlume. Ara ani. Nun ni Allah Yahweh arye, el amu tam pil donanye Yakub, elce deiamukba, dadeipdanin yangalamikce deiamik nang, Israel nang ara, akunum lobukaplirye lyepdopnamal atia!” nyabuka ayupu weik tonun nyapnamlume.

Maleaki 1:11

Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.

Mazmur 68:5

Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.