Yesaya 12:2 - Eipomek

² Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.

Yesaya 12:2 Referans Kwoze

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Mazmur 27:1

Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

Mazmur 118:14

Allah Yahweh elcuk melinulula anya arye, elda na mikip kilinanye ulule. Ati, narye el tibuk, “Telebe,” nyabuka kinamabe. Ara, talye ati kume. Allah elcuk, nara akunum lyepromnuka ati, nyapne.

Wahyu 7:10

Wininmekce, weik yupu deice arye nyanmek. “Weik Ninye Deiyoknye bun ning deice bululnye, nun Ni kopropa Allah ap, Domba Mi Atonye ap, sik bitinye ara Ninye Lyena Deiyok nang ururake. Sikcuk lyesururake.”

Yunus 2:9

Wininyak bukni, na Yunus bira, mot weibuka sena deice arye, “Nai Allah ance melipnulum ning ati, telebe nyapkine,” nyabuka, mot sena deice arye, si erenamkine. Tonda, an si erena ati, kam ning obuka arenamkine. Narye anti, “Wininamkine,” nyapse ning nirya ara, dipkoprob wininamne. Ninye lyen ning nirya ara, Allah an si Yahweh deice aryuk lyesilyame. Yunus birye nyabuk. Ayupu nirya ara, Yunus mek pum ikan mun pum tam ulamukce, morobukba nyabuk.

Yesaya 45:17

Bukni, Israel ninye nirya ara, Allah Yahweh arye lyepnamle. Winipliba pia kam uk unamake. Tonda yuk mutuku ninye arye, anggun Israel ninye ati, malye yupu nyabuka anggun deice kum lululinamsiake. Ati, pia alye kum dakdanamake.”

Yeremia 23:6

Narye wibuka deipnamne Diksukum Una Deiyoknye birye, amutuku talinamle talak ara, Yehuda yala ninye nirya lyepnamle. Tonda, Israel ninye ayala-yala nirya ara, ‘Nun oldan nang arye olyanamsiyak do?’ tenena pia kum diparyuk, talye kanye bobuka, kanye deibikirye, teleb ubuka neika unamake. Ilil una ap, oldana ap, kum unamake. Ninye deiyok kipnamlanye biti ara, nyanamaka ara, ani. Ara, ‘Allah Yahweh ara, nun Diksukum Ulisulul Deiyoknye ulule,’ nyanamake.” Allah arye nyabuk.

Yeremia 3:23

Weik mutuku kon kumamlyak welebuka buknirye, Nun ni koproba Allah usulule,” nyabuka, talye nong kum ning ati, pin-pin kanye bobuka, tuba-tuba si erelamupu. Israel nang ati, melilamuka deiyoknye bira, yuknye ton kume, Allah Yahweh el uka.

Mazmur 83:18

Na ni Allah, narye moropkin ning ara, ani. Ance sik anang ati, wenebuka opminyeura, sik nirya ara, alye weik daknamake. Tonda, ance arepminyeura, ‘Sik kanye boktopyeba, kanye teniltonauk unamake’ tenen, moropkine na nio. Allah ance anang opminyeba, akunum dibikceura, aminyan talak yuk-yuk mutuku nang nirya arye, anang nirya ati, ‘Sikda daupye, sikda malye nang ulamik,’ tenenamake. Utenena ati moropkine na nio.

1 Timotius 3:16

Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.

Roma 1:16

Ura, yata mutuku ninye do nirya, yuk nang arye Allah el laka teleb yupu, ninye lyen yupu peterebikiba, kekebikirye dib tenebicopura, Allah el mikip deice arye aninye lyelule. Allah el yupu ati tuba-tuba dib tenenyak ninye ara, Allah arye aninye ati lyelule. Minyuma ning ara, Yahudi yala ninye lyelule. Aminyan talak ara, Yunani yala ninye babye kekebuka dib tenebicopura, lyelule. Ati ara, ‘Allah el lak teleb yupu, ninye lyena yupu dobuka peterenamne do, kum do?’ tenen, alye kum dakalanune. Teniltona kum diparyuk, kanye deipnirye, pia pi dobuka peterenauk unune.

Hosea 1:7

“Na Allah arye, Israel yala ninye ati, bico tenebuka kum melinamne bukni, sik Yehuda mutuku unyak ninye ara, bico tenebuka lyelonamne. Nara, anggun ni koproba, Allah Yahweh arye nyapne. Sik Yehuda tam unyak ninye arye, sik mal oldan ninye ati, malye kipnamake. Ara, kuda basam deice bukuka binarye mal oldana ap, parang ya arye ona ap, yuk mutuku yin talin nang arye melibuka, on deice arye kume. Na Allah mikip arye sikti, melipnamna deice aryuk, anggun oldan ninye nirya, malye kipnamne.” Allah arye nyabuk.

Yesaya 62:11

Na Allah Yahweh arye, “Im sirya, mutuku sirya, ara tukwak mutuku sirya, im sirya nirya, unyak nang nirya ara, ‘Ayupu kekepnamakʼ tenen, ayupu nyapdeipse. Anggun nirya ara, Sion mutuku unyak nang, ara Yudea tam nang nirya ati dilulume! Anggun lyena deiyoknye, Allah akunum yanmasile! Nara, menekuka yanamanba aminyan ara, na mapu koproba, min arye yuk pera mutuku bobinamik bukni, winida narye akunum lyepdopsi Israel nang, melibuka yanganmake! Sik Sion mutuku unyak nang nirya ati, ayupu lak nyapnamlume,” nyapsine.

Yesaya 32:2

Sik adeiyok nang arye, yuk ninye nirya ati, teleb kibuka melilana uk unamak anya arye, winipmanto ning ara nyapnusine. Ara, pia mikip weik kumanya yaliba, lelimboka tam tikilbalamak touk, wininamake. Tonda, mok cena kum yini mutuku noutamak arye mek pu dobuka batuba, ninye nirya arye kanye deipting touk, wininamake. Tonda, yini mutuku noutamak ara, yo pia kum anya arye, keting tin weik upliba, weik keil deiyok keting koa bulbalamak touk wininamake. Ara, sik diksukum unamak deiyok nang arye, yuk talye ninye nirya teleb kibuka melinamaka ati nyapsine.

Yesaya 7:14

Ati, wini talak ara, Allah elcuk apeten kina ning ara, anggun dam pitin kipnamsile. Aning ara ani. Dipkoprop ninye dona kum wel kil tonok arye, mi bomlya ani, sal mi deipnamle. Akunum deiplyopura, ami el si ara, Imanuel nyanamake.

1 Samuel 2:1

Ura Hana bira, Allah ati morobukce, nyabuk. Allah Yahweh elcuk, na kanye pia teleb kipdeipmanilba, na talima pum tam kanye deipmane. Apil elce dopmanila deice arye, na kanye malye ulamnuk ning ara, teleb kipdeipmanile. Adeice arye, na kanye deipnarye, na tenepmana ara, ani. Na kanye ara, ‘Allah Yahweh elce, mikip kipdeipmanil,’ tenepmane. Adeice arye, yu teneninyak nang ati, malye nyapnamne. Na mal olan nang ati, na si bambol deice arye, malye nyapnirye, ‘Na lik,’ tenepne. Deiyok ara, na akunum bikmane. Dipkoprop Allah arye nati, akunum melipmanile.

Ayub 13:16

Na kanye ara, ‘Allah dam tiknirye, na wininye ning nirya laka nyaptinyopura, Allah arye ikin ning, na deice deipnuk ning ara, ila tamubuka doplirye, kum kipdeipnamleʼ tenepne. Winipnya deice arye, nara lyelanamne. Tonda, sik pia malye winiyak nang ara, ‘Allah arye nyasulul yupu, pia kum kekepnamapʼ tenen, mania kanye bobuka, Allah ati yaninyaka ati, el dam dipkoprob kum yanamake.

Mazmur 112:8

Diba, Allah ati pia diba tenebuka, diksukumuk wininyak nang nirya ara, ilil tenena kum aryuk, sik kanye talima noutam nirya ara, pia tunim abuka, mikip uk unyake. Sik kanye tenen ning ara, punubuka, yuk-yuk kum tenenyake. Ati, ilil kumce, pia diba tenebikirye, daulamica ani, aminyan talak ara, sik mal olan nang nirya ara, kum upnamake. Allah arye, sik mal olan nang ara, obuka kum kipdeipnamlarya!

Yesaya 10:24

Allah Yahweh, im deice unyak yin talin malaikat nirya, sik deiyoknye ulule. Elce nyapdeipsuke. “Na kayapu koproba, Israel nang bukni, sik Sion mutuku noutam unyak nang ati nyapsine. Sikda, Asyur mutuku nang ati, ilil kum unamlule. Sik Israel nang ara, minop talak Mesir mutuku ulamikba, sik deice ikin ning deibikce, yo kama dobuka, sik nong deice olamik touk, sik Asyur nang babye, atonun winipnamsiak talak ara, anang ati ilil kum unamsile.

Yesaya 17:10

Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume.

Yesaya 27:5

Bukni, narye Israel yala nang, sik mal olan nang kum opnyopura, akumopura, sikce nati, ‘Elda erebuka uptuba, nunda el amu tamuk uptibyeʼ tenen, nyaptingopura, aning ton kekeptinye. Sikda, na amu tam uptingba, na ap, sik ap tonok ansinibuka telebuk unamabe. Dipkoprop, na amu tam teleb aryuk na ap, tonok nun neika pia unamabe.”

Yesaya 49:5

Allah Yahweh arye, na min kum deiamnirik talak arye, ‘Na pil donamle’ tenen, wepdeiamnuke. Ara, Allah kanye deiamnukce, ‘Na pil melilamnuknye birye, na mapu Israel ninye nirya bulupdeipliba, sik nirya tamubuka na damuk yanamak’ tenen wiamnuke. Allah Yahweh arye, ‘Na pil melinamnilnye, ninye arye el si erenamak’ tenen, weik si sisibuka wepdeiamnuke. Na mambul pil donuna ara, Allah el mikip deice aryuk meliniliba apil donune. Ati, elda na melibuka mikip kilina deiyoknye unulule.

Yesaya 50:10

“Anggun noutamak noutam ara, yata nang arye Allah Yahweh ati, ‘Se el weik mambulnye’ tenen, el si erelulum do? Tonda Allah arye wipdeibukba, el pil dolulnye nyalul yupu ara, anggun noutamak arye, yata ninye arye ayupu kekebuka diksukumuk ululum do? Yata ninye do nirya, kunukna bisikuk bamunyeba, dirina kum usilye ninye ara, Allah el si Yahweh ati diba tenebuka unamlume. Tonda, ‘Nun ni koproba Allah elcuk melinamsil’ tenen, anggun kanye nirya el deice uk delinamlulume.

Yesaya 61:10

Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.

Yesaya 65:18

Winiryuk ning nirya kwepdeipnamne ati, ‘Se, minop ninguk upsutue’ tenena kume. Aning kum bukni, winiryuk ning kwepeipnamne ning ati, anggun Israel ninye pia telebuk umunce, kanye deibuka unamlume. Yerusalem mutuku pia teleb ning, winiryuk kwepeipniba, amutuku unamlum ninye ara, kanye deibuka pin-pin asa arye unamlame.

Daniel 3:28

Winibukopura, Raja Nebukadnesar birye nyabuk. “Sadrak ap, Mesak ap, Abednego ap, sikce si erenyak Allah ati, ‘Telebe,’ nyabuka, si erepne. Sikce si erenyak Allah arye, el malaikat dopkwetepmalba, el pil don nang Sadrak ap, Mesak ap, Abednego ap lyepmala ati bikne. Sikda na nyapse yupu yanipnikce, sik tenepmeka ara, ‘Nun opsitinga babye, teleb uka. Ara, nun si erenyap Allah arye lyepnamsila atia,’ tenebik. Utenebika ati, na yupu yanibuka, sik Allah ati, diba tenebik.

Yoel 2:23

Aning atonun, anggun Sion mutuku ululum ninye nirya, weik kanye deipmunce, pin-pin asa arye unamlume. Ara, anggun malye winin ning nirya kum kipdeipniba, teleb kibuka winimunya deice arye, na Allah disinirye, anggun nong deice kanye deibuka, teleb kilisunune. Tonda, narye li ning arisinye touk, dou arepmasinya ani, ton talak ara, mok aresunune. Aning atonun, ton talak ara, mok arepmasinye touk, dou li ton aresunune. Ara, min yuma talak, narye melibuka arelamse touk, wininamsine.

Habakuk 3:18

“Aning-aning nirya, ikin kanye weik usulul ning, aupsutu babye, narye, na ni koprop Allah, an Yahweh tonok, kanye deibuka, an si diamuk erenamkine. Na ni Allah, anda lyepnulumnye ati, kanye ikin kum upnamnile. Anti ara, kanye deibuka, kel-kel kanye bobuka unamne. Anda Ninye Lyena Deiyoknye ulyama ati ara, narye an siuk erenamkine.”

2 Samuel 7:24

Ancuk, ‘Israel ninye na mapu, ‘Naʼ tenen ninye unamak’ tenen, Israel yala nang ati, wipdeiamsulumce, an ‘Naʼ tenen ninye pia unamabe. Na nio, an si Yahweh, nun ni koprop Allah pia unamsilame.” Daud birye, Allah ati nyabuk.

Mazmur 65:6

Allah ance pia kum batakasilyame. Nunce, ‘Nun ni koproba Allah melinamsil’ tenen, moronyap yupu nirya ara, ance kekebuka melisilyame. Ance nunti, ‘Dauplye’ tenen, pia kum batakasilyame. Anda, dipkoprob nun Lyena Deiyoknye ulyame. Tonda, Allah ancuk ninye arye kum winipmanto pil domince, nunti lyesilyame. Tonda, yata ninye do nirya, dan aunyak ninye babye, pia pera mutuku noutamak daunyak ninye nirya babye, ‘Allah elcuk melibuka, lyebuka dolyanamsile,’ tenekinyake. Ara, mutuku sirya, im sirya, daunyak ninye babye, weik laut mekwen deice, kapal laut deice bukuka balamak ninye nirya babye, aninguk tenekinyake.

Mazmur 68:20

Nun nirya arye, nun ni Allah Yahweh aning-aning nirya talibuka, weik mikip ulya deiyoknye ulule. Tonda, nun mal olan nang arye, ‘Opsikcak’ tenen, Allah arye nun nirya ati, lobuka lyelosulule. Ati na ning ara, Allah Yahweh ati, “Naio anda pia telebuk ulyame,” nyabuka, el si uk erenamabe. Tonda, Allah arye asum-asum nirya, nun ikin usulul ning ati, eibuka, melisulule.

Mazmur 68:21

Nun mal olan nang arye, ‘Israel nang opnuyap’ tenen, olyangasikce talak nirya ara, nun ni Allah aryuk, lyelosulule. Nun mal olan nang arye, talye lukparabuk obuka sirya daksiting bukni, nun ni Allah aning-aning nirya talilirye, mikip weik ulya deiyoknye ulula ati, elcuk lyepsilyeba, kum dibinyabe.

Mazmur 118:21

Ati nara, Allah an siuk, pia erenamkine. Ara, talye ati kume. Na ni Allah, na morokunun ning nirya ara, kekebuka melinilyama atia. Tonda, na mal olan nang nirya, obuka bisilalumce, nati pia lyelonilyama ati, “Telebe,” nyapkine.

Yesaya 33:22

Anyapman yupu ara, talye ati kum nyapne. Deiyok ara, nun ni Allah Yahweh, elda nun ninye deiyoknye unamsile. Allah el mikip weik deice arye melibuka kalikinamsile. Allah Yahweh elda, nun weik deiyoknye unamsila ati ara, el dem arye lyebuka teleb ulinamsile.

Yesaya 38:20

Ati ara, na kanye ara, ‘Na ni Allah Yahweh arye, dipkoprob lyepnilirye, kanye tamubuka teleb kipdeipnamnile,’ tenenune. Akunum teleb kipdeipnilyopura, anggun ap, na ap, nun nirya kam tuba unamap talak nirya ara, neika mot nyanamabe. Ara, mot lelim nyana deiyok ning nirya, bung-bung nyana, el si kecapi ap, gitar ap arye, nun kam unamap talak noutam nirya ara, mot nyanamabe. Ara, Allah Yahweh, el si eren aik dam bipyopura, elti, ‘Telebe,’ nyabuka, neika mot nyabibirye, el siuk erenamabe. Raja Hizkia birye, ayupu nirya nyabuk.

Yesaya 51:12

Allah arye, sik Israel nang ati nyabuk. Nara Allah aunune. Narye ayupu nyapsinirye, anggun kanye talima melipsinirye, teleb unamlume. Naryuk anggun nirya ati, kanye pia teleb kipdeipnamsine. Winipnane ati ara, anggunda, yata ning deiyok ati, tukwak mutuku noutam malye unyak nang ati, ilil usulul do? Tukwak nang nirya ara, dibinauk unamake. Winipmanto ara, talye yo mutmuta, keting tin arye opliba, sesal sepmalye touk, unyaka anya arye, sik talye tukwak nang ati, ilil una kume.