Amapo, Allah ati, batakna kumce, pia diba tenebuka, eluk tuba talilum nang nirya ara, nun ni koproba Allah Yahweh ati, kanye delin mot nyapmunyakarye, el siuk erenamlume. Tonda, nun ni Allah ara, malye un ning tonok babye kum ulirye, pia teleb, Leknye ulula ati ara, elti, ‘Telebe,’ nyabuka, si erebuka kinamlume.
Yesaya 12:1 - Eipomek1 Allah arye, aning nirya akunum winiplyopura, anggun Israel nang arye, mot nyapnamlulume. Anggunce nyanamlum ning ara, ani. “Se, nun ni Allah Yahweh, nunce antibuk, teleb nyapkiyabe. Ara, ikin kanye bobuka ulamupu bukni, ance nun kanye kwa dipsulumce, mikip kipdeipsulume. Minop talak ara, ance nun malye ulampu ning ati, yu upkukba, weik arye wenyamsulume. Bukni atalak ara, ance nunti, yu tenyamsulum ning ara, akunum kum kipmakila ati, kanye deipsilame. Gade chapit la |
Yesaya 12:1
55 Referans Kwoze
Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.
Malye weik winilalumba, narye anggunti yu upnukba, bataklamsise. Anggun malye weik ulamlumba, yu weik upnukba, tia talak ati mitik tonunuk bataksisirye, na donga anibuka anggun ton kum dililamsisirye, kum melilamsise. Bukni, wini talak ara, na yu upnuk ning batakuka, narye anggunti bico uniliba, tuba teninamsine. Pia kum bataknamsine. Aning ara, talye kum nyapsine. Anggun ni koproba Allah, na si Yahweh, anggunti dekuka lyepromsisinye birye nyapsine.
Aning nirya akunum winiplyeura, atalak ara, Allah Yahweh arye, mutuku sirya, im sirya unyak nang ati, ninye deiyok kibuka, Raja ulirye, tukwak nang nirya talenamle. Atalak ara, tukwak mutuku nang nirya arye, biknamake. Ara, ‘Se, diba, nun ni koproba Allah ara, el tonok ulule. Allah el si Yahweh ara, eluk ululeʼ tenen, moubuka tenebikirye, el siuk erenamake.
Nabi Hosea birye, sik Israel ninye ati, nyabuk. Ara, na kayapu, anggun Israel ninye ati nyapsine. Wini talak ara, nun nirya arye, nun malye wininyap ning batakuka, tuba tamubuka, nun ni koprop Allah Yahweh, el damuk binuyabe. Nun malye wininyap ning wenena ati, weik arye wenyamsuke. Bukni, nun malye wininyap ning batakibirye, el dam tamubuka bibyopura, Allah arye kanye deipsilirye, kwetelinamsile. Tonda, nun wenena ati, pia kanye imun weik suse areamsukba, suse dilamsuk ning nirya babye, elcuk suse kweten ning arye likdongobuka, kitipdongopnamsile. Winipsilirye, nun suse kwetelinamsile.
Ati ara, anggun atalak ululum Israel nang babye, moubuka tenipdenululume. Dipkoprop, na Allah Yahweh arye, anggun Yerusalem weik asik noutam ululum nang ati, aminyan talak anggun talima kwa dipnamsine. Naryuk anggun kanye ara, teleb kipdeipnamsina deice arye, anggun Israel yala nang nirya ap, anggun mal olan nang arye, malye kibuka sung-sunga bultakalamik mutuku nirya ap babye, tuba ton ap teleb kipdeipsiniba, anggun nirya telebuk unamlume. Tonda, naryuk anggun aik oldem ubuk ning nirya ap, anggun wa wina ati tuku ap, anggun mutuku noutam pia malye ubuk tuku ap, mutuku ap nirya ara, tuba ton ap teleb kipdeipnamsine. Ara, anggun oldem nirya ara, minop talak Eden mutuku, pia teleb uamuk touk, teleb kipdeipnamne. Tonda, anggun Israel tam ninye unmeka ara, na Allah Yahweh, na pia teleb wa tuku dam, pia telebak atonun kipdeipnamsine. Winipnyopura, anggun mutuku noutam ara, anggun Israel nang nirya ara, kanye deipmunce, pin-pin asa kanye deiceuk kintinipmunce, ‘Nun ni Allah telebe,’ nyapmunce, kanye lon mot pia nyapnamnulume.
Winibuka unamake ati, Allah Yahweh el tenelamukce, lyepdeiamuk ninyeuk, abisik bakirye, Sion mutuku tamubuka binamake. Sikce, ‘Yerusalem mutuku weknamap’ tenen, abisik banyak talak ara, sik nirya teleb aryuk kanye deibuka, Allah el si erena ati, mot nyanamake. Ikin kanye bona pia kum diparyuk, pin-pin kanye bobuka, pia unamake. Allah arye sikti, kanye bona deiyok ning arepliba, sik kanye talima pum tam arye, ‘Pia dipkoprob akunum upmasile’ tenen, kanye deibikirye, tonok kanyeuk bobuka unamake. ‘Se,’ tenen, teniltona ap, ikin kanye bona ap, ton pia kum unamake. Allah arye, aning-aning nirya kum kipdeipnamle. Nabi Yesaya birye nyabuk.
Anggun Israel nang nirya ara, kekeplulume! Dipkoprob minop talak ara, Babel nang arye opsikce, weik ikin ning dobuka, anggun nong deice delilamsikce ati, imun weik kanye bobuka, ikin pil weik donamlum bukni, aminyan talak ara, Allah arye akunum teleb kipdeipsilyeba, kanamuk unamlume. Min talak ara, yuk mutuku nang arye, anggun Israel nang ati, anggun deice ikin pil deiamsikca ati, weik ikin kanye bobuka ulamlum bukni, aminyan talak ara, anggun ni Allah Yahweh arye, aning kum kipdeiplyeba, anggunda dikdik sebuka, telebuk unamlume.
Winipnamaka ati, im ap, tuku ap, mutuku-mutuku nirya ara, anggunce, kanye deipmunce, pia kanye lon mot nyapnamlulume. Wininamluma deiyok ara ani. Ara, Allah arye ‘Na mapu koprop’ tenen, wipdeiamse ninye ara, yu ninye arye obuka sirya dakuka tomobice, ikin piluk aruklamikba, apiluk dolamikce imun kanye bolamika ati, wini talak ara na Allah arye ‘Naʼ tenen, ninye ati teleb kin ning arepnamne. Ati pin-pin kanye bobuka mot nyanamlume.
Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!
Aning ara talye ati kume. Israel ninye, sik malye winilamikba, Allah arye tia talak ati, Israel yala ninye batakuka deice arye, lo wamsukba, wini talak yuk mutuku ninye im sirya, mutuku sirya nirya arye, Allah yupu kekebikirye, lyena ning doprobica deice arye, Allah el ap, sik ap, kanye talima dukulongolule. Allah arye akunum dibilamice ninye kam bukdeipliba, kam bukuka teleb kibuka ulamak touk, wini talak ara, Israel yala ninye akunum dibilamik ninye atonun unyak bukni, Allah arye sikti, kanye deibuka weika arye lyeplyopura, diamice ninye tuba tamubuka kam ulamak touk, unamake.
Atalak aryuk, sik kuda basam deice, lelim nyan ning el si ara, lonceng-lonceng nirya babye, urasin teleb kibuka deibikirye, alonceng nong deice ara, puturubuka sekeipnamake. Sikce, ‘Aning ara, Allah Yahweh el tonok, aning wibuka deibupu,’ nyabuka, sekuka delinamake. Tonda, Allah Yahweh, el si eren aik pum tam delinyak yun makau ara, el si panci-panci, nirya ara, Allah el tenen ning ulula ati, ‘Aning nirya ara pia teleb lek ning,’ tenenamake. Aning atonun, yuk mek din makau, el si mangkok-mangkok nirya ara, na aren sukum, el si mesba dam delinyak mek makau babye, sikce, ‘Aning ara, Allah Yahweh el tonok, aning wibuka deibupu,’ tenenamake. ‘Aning ara, el ‘Naʼ tenen, ning,’ tenenamake. Amek makau ara, ‘Kam ning opnarye, Allah ati arenamabʼ tenen, mesba domik dam delinyak mek makau ati, aning tenenamake. ‘Aning-aning nirya ara, Allah el ninguk ulule,’ tenenamake.
Nyabukopura, ayupu tonap dukdongobuka nyabuk. Allah arye, ‘Se, anggun malye winimunye ning ati, wenenamsine,’ tenesunun bukni, na kanye mitik anun teniltona tuba unulule. Ara, narye anggunti utenesunune. Se, Efraim yala ninye ara, yata wiribuka narye sikti, bataktinye do? Bataksineba, yuk pera mutuku unyak yu nang arye obuka, sirya daknamsiyak do? Aning atouk, anggun Israel yala ninye babye, yu arye bataksineba, yu nang arye obuka, sirya daknamsiyak do? Tuba bico tenesununa ati nyapsine. Tonda, sik wenena ati, Adma mutuku ulamik ninye ap, Zeboim mutuku ulamik ninye ap ati, weik arye wenebuka oplopse touk, anggun babye aning batakuka wenepnamsin do? Narye, ‘Diba malye weik wininyaka anya arye, weik arye wenepnamne,’ tenenye deice arye, na kanye bokoltonulule. ‘Aning winipnamne do, kum do?’ tenen, kanye bokoltonulule. Ara, urdem ati kume. Na Allah arye, anggun Israel ninye ayala-yala nirya ati, weik arye bico tenesununa ati, nyapsine. Bico tenesununa deice arye, na talima noutamak ara, tamunulule. ‘Malye weik winibikirye, anggun ati batakuka wenepnamsine,’ tenepse bukni, weik arye bico tenesununa anya arye, wini talak ara, na kanye tuba ton yuk tenepne.
Tonda winipmanto ara, kilapu arye, sik mapu engenmakce talak ara, amapu moubuka bobikirye, namin yupu nyabikirye, kaliklamak atonun, na Allah arye, anggun Yerusalem mutuku ululum nang nirya ati, anggun melisinirye, melibuka kalikinamsine. Yerusalem mutuku noutam arye melipsinyopura, anggunda kanye deibuka, talye tunim nyabuka, pia teleb-telebuk unamlume. Allah arye nyabuk.
Allah arye tenyamlye talak akunum uplyopura, Yehuda mutuku noutam unyak nang arye amot nyanamake. Nun weik asik dobuka unyap mutuku ara, Allah el mikip aryuk nunti, melibuka kalikisulule. Nun lyena akuk kintinibuka aresulule. Ara, ninye arye asik dobikirye, dana-dana tam nirya, cang weik keil poka antapdongobuka domikce touk, Allah aryuk, nunti kalikisilirye, lyelosulule.
Aminyan talak ara, Allah arye aning-aning nirya winipnamle talak arye, Allah el mapu koproba, Israel nang ton, tuba kam unamak nang ara, Asyur mutuku arye, weik bisik yok kintinibuka deiplyeura, sikda abisikuk yanamake. Ara min talak, Allah el mapu koproba Israel nang, Mesir mutuku noutam ikin weik ulamik bukni, Allah arye sik bobuka yanamuk atonun, aminyan talak babye, aning atonun ton ap winipnamle.
“Anggun tuba ilil kum unamsile,” nyapsin ning ara, talye ati kum nyapsine. Deiyok ara, na Allah arye, anggun Israel nang arye, malye weik ulamlum ning ati, na yu tenepsise ning ara, mitik tonunuk tuba upmal bukni, aminyan talak min kum upnamle. Sik Israel nang ati, yu ton tuba kum upnilyeura, na yu weik tuba aupnamnil ning ara, sik Asyur mutuku nang ati, sik nong deice deipnirye, anang nirya wenepnirye, obuka kum kipdeipnamne. Allah arye nyapsuke.
Na dipkoprob nyapsine. Yata nang do nirya, sik kanye erebikirye, sik asing erebuka dilenyak nang ap, tonda, ‘Nunda pia mambulʼ tenen, kwalinyak nang ap ara, Allah arye, sikda amu tam kipdeipnamsile. Winipsiliba, anggun alye dakdamunce, ikin kanye bobuka unamlume. Atalak akunum yalyopura, Allah arye weneplirye, kanye erena deice arye, kwalinyak nang nirya ati, wibuka amu tam kipdeiplye nang, mutuku sirya, im sirya nirya arye, Allah el tibuk, “Se, mambule, pia teleb ululnye bira, el uka,” nyabuka, Allah el siuk erenamake.
Anggunce, ‘Se, nun ap, nun talinyap bona ap, duknuptibyeura, sik nun olan mutuku yu nang arye, ubula kum dopropsitinge. Nunda ninye olanak bipyeba, nun ton kum opnamsiake. Tonda, nun ton tomopsikiriye, tapu koubuka, kum bobinamsiyake,’ tenepmalum do? Kume, aning winipsilye babye, Allah arye anggunti, ‘Se, anggunda bicoʼ tenen, kum lyepropnamsile. Tuba wenenauk wininamsile. Ura, Allah arye sik Israel nang ati, ikin ning weika arye, sik nong deice deipnamle bukni, akunum winiplyopura, elce, ‘Yo, akunumaʼ tenen, el yu ara, min kum upnamle. Elce tuba yu upliba, el taruk erebuka, anggun Israel yala nang ati, tuba wenenamsile.
Na kanye ara, ‘Allah dam tiknirye, na wininye ning nirya laka nyaptinyopura, Allah arye ikin ning, na deice deipnuk ning ara, ila tamubuka doplirye, kum kipdeipnamleʼ tenepne. Winipnya deice arye, nara lyelanamne. Tonda, sik pia malye winiyak nang ara, ‘Allah arye nyasulul yupu, pia kum kekepnamapʼ tenen, mania kanye bobuka, Allah ati yaninyaka ati, el dam dipkoprob kum yanamake.
Minop talak Nuh ulamuk talak ara, tukwak mutuku ninye arye malye-malye weik ulamik bukni, na Allah arye, weik mok arelamsiba, mekwen sirika diamuk. Winibukopura, narye Nuh biti nyapse. ‘Ance deipminba, dadeipdanin banamak nang, unamak talak nirya ara, narye tonap weik mekwen arepneba, deibuka tukwak mutuku nirya kum dipnamla anya arye, anggun nirya tuba tonap kum opnamsine,’ nyapdeiamse. Aning atonun, wini talak ara, narye anggun Israel ninye ati, nyapsine. ‘Na yu upniliba, wenebuka kum opnamsine,’ nyapdeipsine.
Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.
Sikce Allah an nyapsulum touk diba tenebikirye, kanye deibuka an yupu moubuka talibuka diksukumuk unyak nang ati, ance melibuka yangasilyame. Bukni, Allah ance, ‘Wininamake, aning ara kum wininamake,’ tenesiminye ning ara, nunce, ‘Nun lik’ tenen, an yupu yanilamuburye malyeuk ulamupuba, an yu ulamkuke. Winibuka yu ulamkuka anya arye, nun wenena ati ikin ning weik nun deice delilamsulume. Nunda, pia malye un ninye unyaba ati, wini talak ara, yata wiribuka lyepsutumce, ila tamubuka teleb kipdeipsutum do?
Winiryuk ning nirya kwepdeipnamne ati, ‘Se, minop ninguk upsutue’ tenena kume. Aning kum bukni, winiryuk ning kwepeipnamne ning ati, anggun Israel ninye pia telebuk umunce, kanye deibuka unamlume. Yerusalem mutuku pia teleb ning, winiryuk kwepeipniba, amutuku unamlum ninye ara, kanye deibuka pin-pin asa arye unamlame.
Amutuku noutam unamak nang ara, pia kanye deibuka, weik yupu tabikirye, sikce nati, ‘Naio telebe,’ nyabuka, si erepnikirye, kanye kil-kil mot nyanamake. Narye sik teleb kipdeipniba, yuk mutuku nang nirya ara sikti, ‘Se, sikda dipkoprob mambul nang,’ nyabuka, si erenamake. Tonda, sik Israel nang ati, ‘Sikda malyeuk unyake, dauaplye,’ nyabuka, malye yupu pia kum nyanamake. Tonda, minop talak ara, ninye yupa ara, mitik kipnin balamik bukni, aminyan talak ara, narye sikti, teleb kipdeipniba, anang sik yupa ara, nukman kumto, pia weik upnin banamake.
Bukni, minop talak anggun mal olan nang arye olamsikce, tapu koubuka, yuk pera mutuku bobinamsikba, ikin weik ulamlum talak ap, yuk pera mutuku batakuka, amutuku tamubuka yamunce, na si eren aik lipsisikuka dona ati, ayukumna yo min kum iklum talak ap, narye anggun Israel nang ati winilamsise ning ara, akunum batakse. Wini talak arye dipdongobuka, dounamle talak ara, aning atouk kum winipnamsine. Wini talak, amutuku tuba kam unmalum nang nirya ara, teleb kipdeipnamsinarya. Na Allah Yahweh, im deice yin talen malaikat nirya, sik deiyoknye unirye, mikip weik ununa ati, narye ayupu nyapmasina ara, dipkoprob nong upnamle!
Ayupu ara ani. Anggun Yehuda tam ululum nang ap, Yerusalem mutuku ululum nang nirya ara, pia bico tenelalulumce, ‘Nun ap, nun kwitcapu ap, olana kumce, kanye deibibirye, namin arye teleb asa neika unamabe,’ tenelanamlume. Tonda, pia bico tenepdamunce, talye yupu walana kumce, diksukum yupu dem, nyalanamlume. Winipnamluma ati ara, na si erena ati, din dina kumce, din si tebuka unamlum talak ara, anggun kanye deipdamunce, pin-pin kanye bobuka unamlume. Ara, wala dumbarye ap, wala pamubarye ap, wala tekbarye ap, wala takubarye ap, asum-asum nirya deice arye, din si tebuka, nati moropnumunce, na siuk erenamnulume. Ati, nati din si tebuka, unamlum talak nirya ara, anggun Yehuda mutuku nang ap, Yerusalem mutuku nang ap, anggun nirya teleb kanye tenipmunce, pin-pin asa uk, unamlume. Ati ara, anggunce dipkoprob nyan yupu ap, pia bico tenepdamunce, namin aryuk, teleb kibuka epdanuka neika unamlume, nyapsine.
Nyabikura, Nehemia birye sik Israel ninye nirya ati, nyabuk. “Anggunda kum engenamlum bukni, pia teleb din ning ap, to ning ap, teleb mek ap, dilbinamlume. Winipmunce, yuk tam nang ara, ateleb dina kum kintinipmace nang ati, dobuka arepnamlume. Arup ara, Nun ni koprop Allah, el si Yahweh, el weik mambul sum upmasile. Ati, wini talak ara, engena kume. Nun ni Yahweh arye, el melisilya deice arye, kanye pin-pin usulule. Ateleb kanye talima arisilya deice arye, mikip kilisulule. Ati ara, asum engena kume,” nyabuk.
Tonda, malye winin ning nirya, akunum batakminyopura, atalak an ikin ning dopropmince, kanye imun ukulul ning nirya ara, tonap pia kum teninamlame. Ikin ning nirya tenina kumce, luba kipnalame. Winipmanto ara, mek onmaliba, ninye arye eibibye bukni, akunum cepdopmalirye, sisal leplyopura, otalak ton tuba ton ap kum teninamlyame. Pia lubakina uk unamlame.
Na nio, ‘Anda pia weik tonun bico tenepnimince, melipnamnilam ning ara, ‘Moubuka tenepnirye, biknamne’ tenen, patapnila ati, moropkine. Ati, ‘Ance bikilin ning ton arepniminya deice arye biktinyeʼ tenen, moropkine na nio. Adeice arye biknamne. Bikilin ning arepniminyeba, nati, ‘Nun like,’ teneninyak nang nirya arye, aning ebicopura, alye dakdanamake. Ara, sikce, ‘Se, dipkoprob Allah Yahweh arye, anye akunum melilule,’ tenebikirye, bikikcopura, alye dakdanamake. Na ni Yahweh, imun kanye bobuka unun talak nirya ara, ancuk na talima, kwa dinilyama ati, sik yu nang arye, aning eibuka bikikcopura, alye dakdanamake.
Allah arye Yerusalem mutuku unamak ninye ati nyabuk. “Anggun mutuku antanabuka weik cang keil poka doplumba, yu nang arye, ulubuka uku sice kiplomik ning ara, narye nyapniba, yuk pera mutuku unyak ninye arye, yanuka tamubuka dopnamake. Tonda, pera mutuku unyak ninye, sik ninye deiyok nang, Raja-Raja nang weik tonun, anggun Israel ninye ati melinamsiyake. Aning ara urdem ati kum nyapsine. Deiyok ara, anggun malye-malye weik winilamlumba, na yu wamnukba, minop talak narye anggun wenena ati, kanye imun ning arelamsise. Anggun malye winilulum ning ati opsitinye bukni, wini talak ara, anggunti narye tamubuka tenenirye, bico uniliba, pia teleb kipdeipnamsine.”
Atalak ara, ikin kanye bona, pia kum diparyuk, kam kilapu nirya, kanye deibuka mot senamake. Winibikiba, wisi nang ap, kam nang ap, sik neika kanye delinamake. Yeremia birye nyabuk. Nyabukce, ayupu ton nyabuk. Allah arye nyapsile. “Na Allah arye sik Israel ninye ati, kanye teleb kipdeipnamne. Ara, minop talak ara, ikin ubukba, malye lebuka engelamik bukni, wini talak ara, narye sik melipniba, kanye deibuka telebuk unamake. Atalak ara, imun kanye bonyak ning ara, narye tamubuka teleb kipdeipniba, kanye telebuk unamake. Tonda, malye kanye bonyaka ara, narye tamubuka, pin-pin kanye kipnibuk, telebuk unamake. Ara, narye sik kanye talima kwa dipniba, sik kanye deibuka unamaka ati, nyapne.
Ati ara, na Allah Yahweh arye nyapsine. Wini talak ara, na adiparyuk tamubuka, Yerusalem mutuku binuka unamne. Sik amutuku unyak nang ati, bico tenepnirye, pia melinamne. Winipnyopura, narye lo arepnyeba, na si erena ati ara, sik mutuku, Yerusalem mutuku noutamuk boyanuka deipnamake. Winipnamak talak ara, sik aik dona kel weik nang arye, anyasik-anyasik lipsisikuka dona ati, ‘Amutuku pala ara, yata wiribuka ulul do? El cang ara, yata barye ubuk do?’ tenen, cang tapu arye, kiklipdenamake. Winipnamne talak ara, Yerusalem mutuku nirya ara, tamubuka tuba teleb kipdeipnamne.” Allah arye nyabuk.
Piblisite