Tonda, minop talak, yu nang arye, na mapu Israel yala nang yanuka obikce, tuba kam unmek nang nirya, tapu koubuka bobinamikce, pia pera sukum Sudan mutuku bukni, otam mutuku noutam, dabinuka tuba unyak nang nirya ara, na dam tamubuka yanganamake. Aninye tamubuka yakirye, sikce na si erena ap, na arena ap ati, teleb arin ning bobuka, arelyanganamniake.
Yesaya 11:12 - Eipomek12 Allah Yahweh elce sik Israel yala kum nang, im sirya, mutuku sirya nirya unyak nang eibicopura, kel biknamakʼ tenen, laka kilina ati winiryuk ninye deiyoknye erepdeipnamle. Ara winipmanto, ninye arye, ‘Asukum ara, ninye nirya bulubuka dilyanamakʼ tenen, bendera cang weik yo arye ikuka, im dup noutam delilamak touk, Israel yalanye ton, winiryuk ninye deiyoknye erepdeipnamle. Tonda, min talak yu nang arye, Israel tam ulamik nang ap, Yehuda tam ulamik nang ap, obikce bobuka yuk pera mutuku bobinamikba, tukwak mutuku dana-dana tam nirya daulamik. Bukni, Allah arye, im sirya, mutuku sirya dana-dana tam ulamice sukum arye, anang dobuka, sik mutuku boyalirye, yanuka bulubuka deiplyeura, tonok kibuka unamake. Gade chapit la |
Yesaya 11:12
33 Referans Kwoze
Aning ati ara, na Allah Yahweh arye, aning-aning nirya talibuka, deice tam erebuka, Pia Mikip Weiknye ununa ati, aning nirya tenepnye touk wininuna ati, dipkoprob aning nyapmasin touk, kunupnamlarya! Na Allah ara, Israel yala nang, sik mutuku koproba noutam arye bobuka, yuk pera mutuku bobinuka deiamikbuk, narye tamubuka dopnirye, asukumuk boyanamne. Ton ninye ara, akunum dobuka, asukumuk tamubuka delilyase. Bukni, aninye bobuka yanirye, na dam deipnirye, sirya daknyopura, yuk ninye babye bulubukapnirye, tonok kentinip deipnye sukumuk deipnamnarya! Ara, sik min talak akunum boyase ninye ap, aminyan talak boyanamne ninye ap ara, ansinibuka tonok kipdeipnyeba, teleb ubuka neika unamake. Aning nirya ara, Allah arye sik Israel ninye ati, laka nyabuk.
Wininamna ati, narye nyapniba, outam mutuku unyak ninye ap, itam mutuku unyak ninye ap, malye kipsikce, tomobuka bobinamsik ninye ara, bataknamake. Narye, ‘Minopce bataklulume,’ nyapniba bataknamake. Narye, ‘Na mapu ara, pia pera mutuku arye boyanamlulume,’ nyapnyopura, batakikceba yanganamake. Aning atonun, narye, ‘Na kilmapu ton, mutuku sirya, im sirya bobinamikba daunyak mutuku arye boyalulume,’ nyapnyopura, batakikceba yanganamake. Kum tunim apnamake.
Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.
Na Allah arye, Yehuda yala nang ati, sik mikip kipdeipnirye, Israel yala ninye ara, lyepropnamne. Ara, Yusup birye deibukba, dadeipdanin yangalamik ninye ati nyapsine. Winipnirye, sik aninye nirya ara, na bico anya arye, yuk mutuku ninye arye malye kibikce, tapu koubuka, sik mutuku koproba bobinamik bukni, narye ‘Naʼ tenen, ninye nirya dobuka, yanirye sik ulamik mutuku uk, tamubuka bobinamne. Minop talak sik malye winilamik ning ati, aninye batakamse bukni, narye, “Sik lyepropnamsine,” nyabuka, nyalin yupu deice nyapdeiamse yupu ara, kum bataktinye. Ati wini talak ara, sik anang malye winilamik ning ati, namin kipnirye, lyelonamsine. Winipnyopura, anang ara, ‘Se yata ati batakamsuk do?’ tenen, imun ulamuk ning ati, teniltona kumce, luba kinamake. Na tenen ninye nirya melipnamna deiyok ara, na sik ni koproba Allah Yahweh uniba, sikce nati moropnicopura, narye melibuka lyelonamne.
Yerusalem mutuku weik asik dolamik ning ara, yuk mutuku nang arye uluplobik bukni, wini talak ara, Allah Yahweh arye, amutuku nirya lipsisikuka doplirye, teleb kanye bobuka donmale. Pera mutuku yu nang arye, Israel nang omikbuk, tuba kam ulamik nang ara, tapu koubuka, sik mutuku tamubuka bobinamik bukni, Allah arye Israel nang melilirye, tamubuka Israel yala nang sik mutuku boyanganmale.
Atalak ara, weik lelim nyalamle ning, el si terompet, lelim weik tonun pong-pong nyaplirye, yukupliba, sik Israel nang, minop talak Asyur mutuku noutam bobinamikba, daulamika ani, sik bisik wangamuk nang ap, tonda Israel mutuku noutam, Allah arye sik apu yapu malye ulamik ning ati, inibuka donokamukba, bindomikce, Mesir mutuku noutam binuka ulamik nang ap, sik anang nirya ara, terompet lelim kekepnamake. Kekebikirye, adiparyuk tuba tonap tamubuka, Yerusalem mutuku weik asikuk yakirye, pia teleb lek aikuk, Yerusalem mutuku deice tamubuka yakirye, sik ni koproba Allah Yahweh, el siuk yanuka erenamake.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
Anggun Yerusalem mutuku ululum nango, anggunda, Yerusalem weik asik arye batakuka, bai tam bisik bana ati, bublan bisikuk kutuksakuka banamlume. Anango, anggun ululum mutuku batakuka, bai tam bana ati bisik bublan ara, kukmunce, kirikuka bai tam binamlume. Tonda, anggunce tuku palipmunce, erebuka teleb pala bisik yapdeipnamlume. Ayapdeipnamlum bisik noutam wamlye keil kurukmunce, yukak donoknamlume. Deiyok ara, pera mutuku nang arye, ‘Yerusalem mutuku unamak nang ati, batakikirye, melibuka boyanamakʼ tenen, anggun Yerusalem nang babye, ululum mutuku yanganamaka ati, pala bisik noutam belebuk keil ara, kwinibuka dongopnamlume. ‘Pera mutuku nang yanuka eipnamakʼ tenen, “Yerusalem mutuku yangan bisik ara, ani,” nyabuka, sekmunce, lak kina ati, pala kain deice sekmunce, abisik deice spanduk bibikuka deipnamlume.
Tukwak nang mutuku sirya, im sirya nirya ara, Allah arye sik malye winilamik ning ati, wenebuka opnamle. Akunum winiplyopura, keting kumulban tam unyak nang arye, aning eibuka, kel bikikcopura, Allah Yahweh el mikip weik nyalul si ap, el ap ati ara, ilil weik unamake. Aning atonun, sik keting panalyangan tam unyak nang nirya ara, Allah Yahweh, el pia teleb ulye ning ap, el weik dirina ap ulya ara, eibikirye, ilil weik unamake. Allah Yahweh, el bikbik abuka yanamla ara, winipmanto, weik balamle mek deice, weik kum mikip yalirye, yanuka lontik abliba, mek silong bukuka welelamle touk ubuka, mikip arye bikbik abuka yanamle. Aning nirya ati ara, tukwak nang mutuku sirya im sirya nirya ara, elti, ilil weik unamake.
Tukwak mutuku sirya im sirya nirya ululum nango, anggun nirya arye dipdelulume! Mal olan deiyok koubica ati, ninye nirya bulupnamak talak biklina ati ara, bendera weik mutuku deice ikuka deibikceba, anggunce moubuka eipnamlume. Tonda, anggunce pong-pong ning, el si terompet, lelim weik arye nyabikceura, kekepnamlume. Ayupu lelim kekepmunyeura, anggun tukwak mutuku ululum nang nirya arye moubuka kitininamlume.
Aning nirya eipsopura, aminyan eipse ning ton nyapnusine. Ara malaikat dumbarye nang arye, tukwak mutuku koluka biyik. Ton malaikat ara, mutuku sirya im sirya bukni, keting yangan tam tikilbiyuk. Tonye bira keting wekelban tam tikilbiyuk. Tonye bira outam, tonye itam bukni, mutuku sirya im sirya tikilbirik. Sik malaikat dumbarye nang arye, dana-dana tam nirya yangalye kumanya ati, talibuka kalikil biyik. Ara, kumanya arye tukwak mutuku deice ap, yo kan-kan noutamak ap, laut mekwen tam nirya ap, ‘Min doplyak’ tenen, kumanya kalikil biyik.
Se, nun ni Allah, ance lo arepsulumba, nun mal olan nang arye yanuka onmasiceba, ilil pia weik usulule. Winipmanto ara, pia weik mutuku lokmanto ulye talak ara, mutuku kon nirya daraplirye, tokna pakuka saklyeba, ninye nirya ilil weik uplyeba, imun kanye bolamak touk, unmabe. Ati nun ni Allah, ‘Ance nyaptumba, mutuku lulukna nirya, tunim aptu ura, aning ara, pia telebe. Tonda, nun mutuku kon nirya lokukce, tokna pakukabukce, tukwak mutuku nirya opnin balamuk ning nirya ara, ‘Ance tamubuka teleb kipdeipsutume,’ tenen moropkiyabe na nio. Na ni Allaho, ‘Ance tonap tamubuka teleb kipdeipsutuba, nunda min talak teleb ulamupu touk, tonap winiptibye’ tenen, moropkiyabe, nun ni Allah.
Anggunda, yuk-yuk mutuku, pia pera mutuku, yuk ninye noutamak bobinamsikba, ulamlumce, ninye asik nang atonun ubuka ulalumba, Allah elce akunum lyepsukce, bulubuka deiamsuk. Ara, keting yangan tam ap, keting wekelban tam ap, tonda utam ap, eitam ap, dana-dana mutuku nirya ap, dabinuka ulalumba, bulubuka tonok sukum deipsuke. Ati, Allah el si erebuka kinamlulume.
Mutuku sirya, im sirya tam arye, Allah el pia teleb ulul ning ap, mikip pil dolul ning ap ati, yuk-yuk mutuku nang arye, el si sibuka erebikceura, nun Yudea mutuku noutam unyabuk, Allah elce talibuka usulul Israel nang arye kekenamabe. Allah ara, malye un ning tonok ning babye kum ulirye, pia Teleb Diksukum Ulinye ulula ati, dopera mutuku nang arye, el si erenamake. Winipnamak bukni, na Yesaya bira, weik ikin kanye bopnirye, ngalukuka tuba engenamne. Malye kanye bobuka engenamabe, bol malye bopnamnarya! Ara talye ati kume. Deiyok ara, anggun tenena arye tilila yupu nyakirye, yuk nang ati malye weik nyabuka uanyake. Dipkoprob, sik malye unyak nang arye, tuba-tuba tilila yupu nyabica deice arye, yukupdobikcak arye, yuk nang ati malyeuk kilinyake.
Allah Yahweh arye, na min kum deiamnirik talak arye, ‘Na pil donamle’ tenen, wepdeiamnuke. Ara, Allah kanye deiamnukce, ‘Na pil melilamnuknye birye, na mapu Israel ninye nirya bulupdeipliba, sik nirya tamubuka na damuk yanamak’ tenen wiamnuke. Allah Yahweh arye, ‘Na pil melinamnilnye, ninye arye el si erenamak’ tenen, weik si sisibuka wepdeiamnuke. Na mambul pil donuna ara, Allah el mikip deice aryuk meliniliba apil donune. Ati, elda na melibuka mikip kilina deiyoknye unulule.
Na Allah Yahweh arye nyapsine. Nara aning-aning talibuka deice tam unirye, Weik Erena Deiyoknye unune. Narye, ‘Winipnamne,’ tenenye touk wininune. Na mapu Israel yala ninye ati nyapsine. Narye ninye yuk mutuku ninye, Israel yala kum ninye ara, sik unyakak laka kipniba, sik Israel mapu ara, yuk nang arye dobuka bobinamikbuk, sik noutamak dabinuka unyak mapu nirya ara, tamubuka amutuku uk iribuka boyanganamake. Tonda sik kilmapu ara, amakuka boyanganamake.
Ati, anggun dipdelulume. Sik dana-dana tam arye, ‘Yata wiripmal do?’ tenen, ninye yupa pia weik tamubuka anggun dam anyuk yanganamake. Ara, anggunce sal mapu deiamlum ning weik tonun, pia pera weik mutuku arye anggun dam yanganamake. Tonda anggun kilmapu weik, anggun melin kilapu arye iribuka talibikirye, boyanganamake.
Na Allah arye abulubuka deipnamne nang ara, unamak noutam ara, ‘Na mikip kel biknamakʼ tenen ati, ton lak kilin ning kintinibuka deipnamsine. Winipniba, anggun anang kan-kan arye, ton nang kum oplopniba, tuba kam unamak nang ara, wibuka deipnyopura, sik anang nirya arye, na yupu ap, na unye ning ap ati, bobikirye, aning nirya min kum kekelamik nang dam binuka, lak nyalbinamake. Dopdeipniba, lak nyalbikcopura, na pia teleb unye ning ap, mikip weik arye pil dolamse ning ap, na weik eren unun ning ap nirya ara, sikce eibikirye, kekebuka kel biknamake. Ara, narye dopdeipnamne nang arye, sik dana-dana tam unyak nang dam binuka, na pia teleb unye ning nirya lak nyalbinamake. Sik nyalbinamakak ara, ani. Ara, Tarsis mutuku ap, Pul mutuku ap, Lud mutuku ap, Mesek mutuku ap, Rosh mutuku ap, Tubal mutuku ap, Yawan mutuku ap, Spanyol mutuku ap, Yunani mutuku ap, binuka lak nyalbinamake. Amutuku-amutuku nirya unyak nang dam lak nyabikiba, na pia teleb unye ning ap, na mikip weik unilye ning ap ara, kekebikirye, moubuka kel biknamake.
Narye anggun deiyok-deiyok nang nirya, akunum wenepsinyopura, naryuk na mapu yuk pera mutuku-mutuku nirya, daunyaka noutamak arye dobuka, na dam tamubuka boyanamsine. Ara, sik malye weik winilamikba, sik wenena ati, lo arepsiba, yu mutuku ninye arye bisibuka, tapu koubuka bobinamikce, dabobinuka bataklobikba, yuk-yuk mutuku daunyake. Sik Israel ninye nirya tamubuka, sik mince ulamik mutuku uk, bulubuka boyaniba, amutuku unamake. Winipnyopura, amutuku uk yanuka ukirye, sik mapu deibikirye, dadeipdanin bakiba, ninye pia weik upnin banamake. Na Allah aryuk, aninye bulubuka deipnamne.
Aning-aning nirya winipnamna deiyok ara, ani. Ara, anggunti mal piyanamsik nang arye, ‘Kume, sik Israel nang ara, pia malye nang ati, yuk-yuk mutuku nang nirya ara, sikti, ‘Anang ap neika kum unamabe. Sik yuke! Allah arye anang akunum bai mutuku donokuke! Tonda, sik Sion mutuku unyak nang ara, yuk mutuku nang nirya arye, ‘Nun likeʼ tenenyaka ati, pia moubuka kum bikinyake,’ nyabuka, nalilamsike. Nyabuka, malye yupu nyalamsik bukni, wini talak ara, na Allah arye anggun Israel nang ati, tamubuka teleb kipdeipnamsine. Tonda, anggun ikin usulul ning ap, anggun suse disulul ning nirya ara, naryuk obat arepsinya deice arye kwetepsiniba, lopropnamsile. Allah arye sik Israel nang ati, nyabuk.
Allah Yahweh arye, Yeremia biti nyabuk. Yuk mutuku nang arye, Babel mutuku nang nirya obicopura, anoutam arye, Israel yala nang ap, Yehuda yala nang ap, sik neika, sik mutuku koproba, tamubuka yakirye, engepnamake. Engebikirye, ‘Se, nun si erenyap Allah, el si Yahweh ara dan sukum ulul do? ‘Yata yupu nyapsiliba, kekebuka unamap do?’ tenen, sik mutuku tamubuka yakirye, na sik ni koproba Allah Yahweh ati, yanuka enamniake.
Nara Allah, na si Yahweh arye nyapsine. Nara, aning-aning nirya talibuka, deice tam erebuka, Pia Mikip Weik Deiyoknye ununa anya arye, narye nyapsine. Minop talak, narye Israel nang, yuk-yuk mutuku donoksiba, sik mal olan nang arye, tapu koubuka bobinamik bukni, narye sik biyik nang bulubuka, sik mutuku uk boyanuka, tuba asukumuk deipnirye, na pia teleb lek ning ap, telebuk kunuknak ap, sik talima pum noutam deipniba, telebuk ubicopura, yuk-yuk yala nang, dana-dana tam nirya arye, eibicopura, bikinamake. Na mikip ara, sik dam akunum pil dopnamna deice arye, biknamake. Tonda, winipyopura, na si erebuka, na amu tam pil donanye Yakub biti, ‘Amutuku dobuka arepnamkine,’ nyabuka, nyalin yupu deice elti, arepse mutuku uk, elce deiamukba, dadeipdanin yangalamika ani, wini talak unyak Israel nang ati, amutuku nirya arepnyopura, tuba tamubuka, sik mutuku uk, yanuka unamake.
Aning nirya, na Allah arye akunum wipnyopura, Yehuda tam unyak ninye ap, Israel yala ninye ap ati, yuk mutuku ninye arye, bisibuka, pia pera mutuku bobikiba, unamakak ara, batakikirye, tamubuka amutuku uk yakirye, unamake. Winibikirye, sik tonok ansinibuka ukirye, sik ninye deiyoknye una ati, tonoknye ton wipdeibikiba, anye biryuk, sik amutuku unamak ninye nirya ati, taliplibuk neikauk teleb unamake. Aning nirya akunum wipnyopura, ninye nirya arye, ‘Se, wini talak ara, Yisreel el weik sum akunum upmale,’ nyapnamke. Ayupu nyapnamak talak ara, Allah arye, el ‘Naʼ tenen ninye, Yehuda yala ninye ap, Israel yala ninye ap, tuba dobukaplirye, sik mutuku anoutamuk, tamubuka deipliba, apia unamake.” Allah arye, nabi Hosea biti nyabuk.
Allah Yahweh arye, akunum tenebuka ara, ‘Babel mutuku nang obuka, sirya daknamne,’ tenebuk. Ati ara, anggun yuk-yuk mutuku yin talin nang arye, Babel mutuku nang cang weik keil arye domik keil poka dam binuka, bendera ikdeipnulyame. Ara, ‘Nunce Babel mutuku nang ati, olyanamapʼ tenen, laka kin ning ara, ninye on talak iklamlum bendera ton, ongonamlume. Tonda, anggun yin talin nang ara, tonap tabaknamlume. Winipmunce, anggunce nyamunyeba, Babel mutuku dana-dana tam domik keil poka dam tikikcak arye, kaliknamake. Tonda, ‘Babel mutuku bai tam nirya ara, duknupmunce, kintinipnalume. Ara, ‘Babel mutuku nang mangkau kanye bobuka, abisik bace talak ara, talye karin arye, opnamapʼ tenen, kintinipnamlume.
Na mapu Israel ninyeo, anggunce na batakanululuma ati, winipmanto yupu nyapnusine. Wini talak ara, anggunda na kil atonun kum ululume. Tonda, na ara anggun akanye kume. Ati ara, talye-talye yolamak kilapu arye, ‘Urasin teleb kilapu tenepsikirye, se, akilapu ara yoptibye, tenenamsiyak’ tenen, sik asok deice mil ning ap, bi ning ap likdakirye, teleb baju ongolamak touk, anggun Israel ninye arye, malye weik winilulume. Talye-talye yolamak kilapu arye, ninye yuk nang ap, talye yoldakirye, sik akanye yapu bataklamaka touk, anggunce malye winin ninguk tenibuka umunce, na batakuka, talye ning, Isa Mutuku Dongonye siuk, ‘Nun ni koproba’ tenebuka, isa si erelulume. Awinimunye ning nirya ara, batakanamlulume.
Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Na adiparyuk, na mapu koproba, Israel yala nang nirya ara, sikti, lyepnamne. Ara, minop talak yu nang arye, sik yuk-yuk dabinuka deiamikba, wini talak daunyak mutuku noutam nirya ara, tamubuka boyanirye, Yerusalem mutuku noutamuk deipniba, asukumuk unamake. Ara, keting palanyangan tam ap, keting kumulban tam ap arye, tamubuka boyanirye, asukumuk deipnamne. Winipniba, sik Israel yala nang nirya ara, na mapu koproba kibuka unamake. Nara, sik ni koproba, Allah pia ati unamne! Winipniba, nara sik ni koproba Allah unamne. Wininamne talak ara, naryuk na mapu koproba ati, kanye deipnirye, pia kum bataknamsine. Narye, “Winipnamsine,” nyapnye touk, dipkoprob winipnamne! Sik nirya ara, kanye deipdakirye, teleb kibuka diksukumuk unamake.”
Piblisite