Allah arye, teleb kipdeipnamsil talak ara, akunum dam uplyopura, sik dana-dana tam ninye, yuk-yuk pera mutuku daunyak ninye nirya tamubuka yana bulupnamake. Sik aninye unyak sukum ara, iknapye tam, Asyur mutuku ton unyak bukni, sik kanye delina ati dilyanamsiyake. Tonda, sik dabu mutuku tam unyak ninye nirya babye, Mesir mutuku noutam unyak ninye arye, anggun kanye delina ati, dilyanamake. Ati, dabu tam unyak ninye ap, anyapce iknapye tam, Efrat mek dam unyak ninye ap, sik kanye delina ati, dilyanamake. Tonda, keting panalyangalye tam, weik laut mekwen otam arye dipdongobuka, otam keting wekelbalye tam, otam weik laut mekwen deibuk tam unyak ninye babye, sik nirya yanganamake. Tonda pera mutuku dabinuka unyak ninye, weik mutuku noutam unyak ninye babye, aninye nirya bulubuka, anggun dam anyuk dilyanamsiyake.
Yesaya 11:11 - Eipomek11 Aning nirya lakak upnamle talak ara, Allah ara, aning-aning nirya talibuka, mikip weik ululnye birye, el taruk bibiklirye, tupa ton ap bitinye talak deice, Israel yala nang taliplirye, el mapu koproba lyeplirye, sik dana-dana tam unamakak arye, sik mutuku tamubuka bobanamle. Ara, Asyur mutuku ap, Mesir mutuku ap, Patros mutuku noutam ap, Sudan mutuku ap, Elam mutuku ap, Babel mutuku ap, Hamat mutuku ap, tonda weik laut mekwen lilun ap, daunyak mutuku, pia lowak ap, tuba ton aunamak Israel nang ara, tamubuka, sik mutuku koproba, noutam bobanamle. Gade chapit la |
Yesaya 11:11
69 Referans Kwoze
Allah tenyamuk touk, talye buru tam unyak ninye yupa pia weik lyeplyopura, aminyan talak sik Israel yala ninye nirya lyepnamle. Allah yupu noutamak ara, nabi Yesaya birye sekamuk touk winipnamle. Ayupu ara ani. ‘Ninye Lyena Deiyoknye bira, Sion mutuku noutamak arye yanamle. Yalyopura, Yakup birye deibukba, dadeipdanin yangalamik Israel yala ninye arye, Allah ati, ‘Nun like,’ tenebuka malye ulamikce ning nirya ara, kum kipdeipnamle.
Aminyan yanamle talak ara, Allah arye Israel nang, sik deice ikin ning deiplyeura, ninye weika arye dipnamak bukni, sik aning kum dopropnamaka nang, tuba kam unamak nang ara, mitik tonunuk unamake. Minop talak ara, yuk karin mutuku ninye deiyoknye, Raja Asyur biti, ‘Elcuk lyepropnamsile,’ tenebikce, elti, morobik bukni, anye birye, sik tam nang weika arye, obuka sirya dakuk. Anye birye, sik obuka yaniplobuk bukni, mitik tonun tuba kam unmak nang ara, elti, ‘Elcuk melibuka lyepropnamsile,’ kum tenenamake. Atonun, Yakub birye deibukba, dadeipdanin yangalamika ani, mitik tonun tuba unyak nang ara, anye biti, ‘Melibuka lyepsutue,’ pia kum tenenamake. Ara, Israel nang nirya, sik ni koproba Allah Yahweh ati, pia dipkoprob diba tenenamake. Allah ara, pia diksukum ulirye, malye ning tonoknye babye pia kum ululnye, Pia Leknye Allah ulule.
Winipmanto ara, talye daulamle maka arye, ilil weik upliba, nong nirya lukulalamle touk, na mapu ara, Mesir mutuku noutam arye, na dam tamubuka yanganamake. Winibuka yangace talak ara, sik nong nirya sirim talinamle. Aning atouk, Merpati maka nyalamak atonun, tonda yalma maka mer weik arye, neika balamak touk, na mapu koprop Israel ninye arye, Asyur mutuku noutam arye batakuka, sik nong nirya sirim talinamleba, na dam tamubuka yanganamake. Winibuka yace talak ara, narye anggun aik ap, anggun mutuku ap, tamubuka yanuka deipnamsine. Na Allah Yahweh arye nyapsine ati, anyapmasin yupu ara, dipkoprob nong upnamle ati, nyapsine. Allah arye nyabuk.
Na Allah arye abulubuka deipnamne nang ara, unamak noutam ara, ‘Na mikip kel biknamakʼ tenen ati, ton lak kilin ning kintinibuka deipnamsine. Winipniba, anggun anang kan-kan arye, ton nang kum oplopniba, tuba kam unamak nang ara, wibuka deipnyopura, sik anang nirya arye, na yupu ap, na unye ning ap ati, bobikirye, aning nirya min kum kekelamik nang dam binuka, lak nyalbinamake. Dopdeipniba, lak nyalbikcopura, na pia teleb unye ning ap, mikip weik arye pil dolamse ning ap, na weik eren unun ning ap nirya ara, sikce eibikirye, kekebuka kel biknamake. Ara, narye dopdeipnamne nang arye, sik dana-dana tam unyak nang dam binuka, na pia teleb unye ning nirya lak nyalbinamake. Sik nyalbinamakak ara, ani. Ara, Tarsis mutuku ap, Pul mutuku ap, Lud mutuku ap, Mesek mutuku ap, Rosh mutuku ap, Tubal mutuku ap, Yawan mutuku ap, Spanyol mutuku ap, Yunani mutuku ap, binuka lak nyalbinamake. Amutuku-amutuku nirya unyak nang dam lak nyabikiba, na pia teleb unye ning ap, na mikip weik unilye ning ap ara, kekebikirye, moubuka kel biknamake.
Elda teniltona deice una ap, bulul takana kanye bona ap, pia kumce diksukum kanye uk bobuka, dipkoprob ninguk unamle. El pil min kum sirya dakmalye talak ara, ninye arye elti, yupu kum sektinge. Tonda, elti, kum optinge. Pil diksukumuk dopra balamlya ani, diksukum una deiyok ning akunum teleb kibuka pil doplyopura, pil bataknamle. Weik laut mekwen lilunak unyak ninye ara, ‘Se, elda dan talak nun mutuku yanuka peterenamsil do?’ tenen, elti, pia kanye deibuka dinauk unamake.
Aning ati ara, anggun keting palanyangan tam ululum nang nirya babye, Allah Yahweh ati, si erelulumce, ‘Naio, anda pia telebe nyabuka, el siuk erenamlulume. Aning atonun, weik laut mekwen lilun tam ululum nang babye, Israel nang kalikuka melilul nye, anggun ni Allah el si Yahweh atibuk, ‘Anda pia telebe, pia mikip weik mambul pil dolyame,’ nyabuka, el siuk erenamlulume.
Na ap, na yin talin nang ap, nunce weik asik ulamik nang weika arye, akunum malye kibuburye, obuka sirya dakupu. Ara, Kalno mutuku ap, Karkemis mutuku ap, Hamat mutuku ap, Arpad mutuku ap, Samaria mutuku ap, Damasyik mutuku ap ulamik nang nirya ara, akunum obuka sirya dakamupu. Winyamupu touk, sik Israel tam unyak nang babye, obuka sirya dakmabe.
Aning ara talye ati kume. Israel ninye, sik malye winilamikba, Allah arye tia talak ati, Israel yala ninye batakuka deice arye, lo wamsukba, wini talak yuk mutuku ninye im sirya, mutuku sirya nirya arye, Allah yupu kekebikirye, lyena ning doprobica deice arye, Allah el ap, sik ap, kanye talima dukulongolule. Allah arye akunum dibilamice ninye kam bukdeipliba, kam bukuka teleb kibuka ulamak touk, wini talak ara, Israel yala ninye akunum dibilamik ninye atonun unyak bukni, Allah arye sikti, kanye deibuka weika arye lyeplyopura, diamice ninye tuba tamubuka kam ulamak touk, unamake.
Allah Yahweh arye, Hamat mutuku babye, talilule. Ara, Hadrak mutuku ap, wilibuka dana-dana bokolanak unyak ninye nirya babye, Allah arye, talilul ninye unyake. Aning atonun, amutuku nang arye, weik kel kina deiyok ning nirya, kel bikamik nang unyak mutuku, Tirus mutuku ap, Sidon mutuku ap nirya ara, Allah arye talilule.
Nyapsiba, amalaikat arye, tamubuka nyapnuke. “Kume, sikda Babel mutuku birake,” nyabuk. “Birikirye, amutuku noutam ara, sik isa el si erena ati binuka, mambul weik aik ton dopnamdake. Ati ara, amalye winina deiyok ning, akil el si erenak ara, dobuka sirya dakdikcopura, akeranjang kat aling ara, dobuka asukumuk deipdikiba, amutuku unyak nang arye, aning si erenamake,” nyapnukba kekepse.
Ati ara, na Allah Yahweh arye, sik Pilistin mutuku unyak nang ati, yu arye wenepnyopura, sikda ilil pia weik unamle. Tukwak mutuku, im sirya, mutuku sirya nirya, noutam unyak nang arye, talye isa ati, ‘Nun ni koproba,’ nyabuka, si erenyak talye ning ap, isa-isa nirya ara, na Allah arye obuka, sirya daknirye, malye kiplopnamne. Winipnyopura, tukwak mutuku sirya, im sirya nirya, weik laut kup-kup unyak nang ap, laut mekwen noutam arye, antanap dongobuk mitik mutuku, pulau-pulau deice unyak nang nirya ara, Allah Yahweh dam ngangkanudongobikirye, kutam tuku dipdongobuka, na Allah ati, si erenamniake. Ara, sik nirya, mutuku yuk-yuk daunyak touk, sik talibuka unyak mutuku noutam aryuk, na Allah siuk, erenamniake.
Aning nirya, na Allah arye akunum wipnyopura, Yehuda tam unyak ninye ap, Israel yala ninye ap ati, yuk mutuku ninye arye, bisibuka, pia pera mutuku bobikiba, unamakak ara, batakikirye, tamubuka amutuku uk yakirye, unamake. Winibikirye, sik tonok ansinibuka ukirye, sik ninye deiyoknye una ati, tonoknye ton wipdeibikiba, anye biryuk, sik amutuku unamak ninye nirya ati, taliplibuk neikauk teleb unamake. Aning nirya akunum wipnyopura, ninye nirya arye, ‘Se, wini talak ara, Yisreel el weik sum akunum upmale,’ nyapnamke. Ayupu nyapnamak talak ara, Allah arye, el ‘Naʼ tenen ninye, Yehuda yala ninye ap, Israel yala ninye ap, tuba dobukaplirye, sik mutuku anoutamuk, tamubuka deipliba, apia unamake.” Allah arye, nabi Hosea biti nyabuk.
Aning akunum winipdeliba, nong kum uplyopura, Siria mutuku Raja arye, Mesir mutuku batakuka, otam mutuku, weik laut mekwen, el si Laut Mediterania, aweik mekwen lilun tam unamak nang ati, sik dam binuka, ‘Optinyeʼ tenen, piripdenamle. Otam bilirye, el ap, el yin nang arye, amutuku-amutuku unamak nang weik tonun, malye kibuka obikirye, sik mutuku alubuka dopropnamake. Winipnamle bukni, yuk mutuku noutam arye, tonok ninye deiyoknye ton tiklirye, amutuku deiyok kibuka taliplirye, el ap, el yin talin nang ap arye, Siria mutuku Raja ati, obuka sirya danamake. Winipnamaka deice arye, Siriya mutuku Raja arye, ‘Nara pia mikip weiknye unune,’ tenen, maknya kintininamlanye ap, pia malye tenenamle ning nirya ap ara, kum kipdeipnamake. Dipkoprob ning ara, Siria deiyoknye maknya kintinilana ap, talima erelana ap tenelamle ning nirya ara, tamubuka, el atenelamlanye, el nong deiceuk upnamlarya.
Aning atonun, na Allah arye, Mesir mutuku arah selatan, iknapye tam ara, Nil mek lilun wamlye mutuku, el si Patros mutuku noutam wamlye ning nirya ara, kum kipdeipnamne. Winipnyeura, oldemuk upnamle. Tonda, Nil mek bukni, keting panalyangan tam, weik asik domik ning, el si Soan mutuku ara, uku dongopniba, amutuku dibuka sirya daknamle. Atonun, weik asik domik ning, el si kota Tebe mutuku ara, amutuku unyak nang arye, malye ulamik ning ati, sik wenena ati, ikin ning dobuka, sik nong deice deipnamne. Tonda, Tebe mutuku talilamak bona nirya babye, kum kipdeipnamne.
Amekwen deice balamuk kapal, el mek bukna ati yo ara, Basan mutuku noutam kat weik yo tikamuka deice arye, kintinibuka domik. Aning atouk, akapal el ninye tikinak ap, bunak ap, tikuka banak ati, lan yo ara, Siprus mutuku arye, keipyal yo boyanuka domik. Tonda, keipyal yo lamik deice ara, el urasin teleb una ati ara, gaja el yang arye, urasin teleb ning memebuka, aning dobuka, yo labik deice deibuka domik.
Allah Yahweh arye, Damsyik mutuku noutam unyak nang ati, nyapdeibuk yupu ara, ani. Ara, Damasyik mutuku dam bukni, Hamat mutuku noutam unyak nang ap, tonda Arpad mutuku unyak nang arye, engen yupu kekebiceura, sikce, ‘Se, aning ara mambule,’ tenena ap, ilil una ap, unamle. Ara, yuk nang arye, Damsyik mutuku nang, akunum opnamake,’ nyabuka, engen yupu ton nyabikiba, kekebikirye, malye kanye bobuka, teniltonauk unamake. Sik anang talima noutam ara, nemalyap arye, dakeiam asa kum unamake. ‘Se, yata wiripnamap do?’ tenen, imun kanye bona ap, ilil una ap, kanye windung-wandung ana ap, unamake. Winipmanto ara, kumanya mikip arye dopliba, weik laut mekwen deice, mek kait mikip weik arye welelamle touk, upnamake.
Mutuku-mutuku nirya ululum ninye nirya ara, Allah el si Yahweh arye nyasilye yupu kekeplulume. Tonda, anggunce Allah nyalye yupu dopropmunce, weik laut mekwen koubuka, otam mutuku babye, laka nyalbinamlume. Sik laut mekwen kup-kup unyak ninye nirya babye kekenamake. Ayupu nyanamlulume. “Minop talak ara, anggun wenena ati, Israel ninye ayala-yala nirya, akunum wangapsinyamukba, yuk-yuk mutuku dabinuka ulamik ninye nirya, atalak ara tamubuka, sik mutuku koproba uk, boyanuka deipnamle. Winipmanto ara, domba basam weina deiyok nang arye, sik domba basam ati, teleb kibuka kaliklamak touk, Allah arye sik Israel ninye nirya ati, moubuka kalikinamsile.” Ayupu bobuka laka nyalbinamlame.
“Na Allah Yahweh arye, anggun Israel ninye ati nyapsine. Israel ninye sikce na si ereninyaknye bira, pia diksukum pia Teleb koprop Unanye unune. Narye anggun kwepdeiamsisirye, tuba kalikuka melisunune. Mesir mutuku ninye wa wiamikirye libuka delinyak ning ap, tonda, Etiopia mutuku ninye sik dekna ati, kintinibuka delinyak ning ap, Syeba mutuku ninye sik cang arye nenyak ninye, sik bon-bona ap weik tonun arelyanganamsiake. Amutuku nang ap, sik talinyak ning nirya ara, anggun dam boyakiba anggun diamuk dopropnamlume. Winipmunce, sik aninye ara taruk balye tam bisik dobuka tapu koubikiba, sikda anggun Israel ninye uk dobolyanamsiake. Sik anang nirya anggun dam yakirye, anggun si erena ati, urasin kanupdongopnamake. Sikce, ‘Allah el tonok ulirye, sik Israel ninye pia melilul’ tenen, kel bikikirye, ‘Sikce nun kum onamsil,’ tenena ati, moronamsiake. ‘Israel nang arye si erenyak Allah ara, pia dipkopropnye ulule. Yuk Allah ton kum ulule,’ nyanamake.” Allah arye nyabuk.
Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.
Aminyan talak ara, Allah arye aning-aning nirya winipnamle talak arye, Allah el mapu koproba, Israel nang ton, tuba kam unamak nang ara, Asyur mutuku arye, weik bisik yok kintinibuka deiplyeura, sikda abisikuk yanamake. Ara min talak, Allah el mapu koproba Israel nang, Mesir mutuku noutam ikin weik ulamik bukni, Allah arye sik bobuka yanamuk atonun, aminyan talak babye, aning atonun ton ap winipnamle.
Abram bira, Hebron mutuku binuka ulamuk talak ara, ton tam deiyok nang arye, yuk tam nang deiyok nang ati, yu ubukba olalamik. Sik ninye deiyok nang si ara, ani. Ara, Sinar mutuku taleamuknye, Amrafel ap, Elasar mutuku taleamuknye, Ariok ap, Elam mutuku taleamuknye, Kedolamer ap, Goyim mutuku taleamuknye, Tideal ap, sik nirya neika bulubukabikce, yuk mutuku nang ati olbiyik.
Weik ninye deiyoknye Raja Ahasyweros ara, ‘Amutuku ninye arye, ikin pil donamake. Tonda, na melina ati, pajak kina ati, uang yo bok ap, dekna weik ning ap, bulubukabikirye, nati talye arenamniake,’ tenebukce, amutuku ninye ati ikin pil aruklamuk. Ara, elce taleamuk mutuku-mutuku nirya noutamak arye, dipdongobuka, otam mutuku weik laut mek kwen dam ulamik ninye nirya babye, sikti, “Apil talyeuk dopnululume,” nyalamukba, pil talye dona uk ulamik.
Allah el si Yahweh arye im deice yin talin nang, malaikat nirya talibuka ululnye birye kum melipmasutopura, sik yu weik nang arye, nun yala ninye nirya akunum obuka sirya dakmasitinge. Ninye mitik tonun babye ton kum bataksutue. Nun yala nang nirya, obuka sirya dakmasitingba, nunda Sodom mutuku ap, Gomora mutuku ap nirya, obuka sirya dakamuk touk, winipmasitinge. Bukni, nun ni koproba Allah Yahweh arye, ninye mitik anun ton lyepsukba, tuba unyabe.
Atalak ara, Allah Yahweh, elcuk, ‘Sik Mesir mutuku unyak nang arye, nati biknamakʼ tenen, sik dam laka kipdeipnamle. Adeice arye, sik Mesir mutuku nang arye Allah Yahweh el si ap, el winilul ning ap, bikikirye, el siuk erenamake. Sik Mesir mutuku nang arye Allah el si erena ati, domba ato ning obuka yakirye uku dongolyanganamake. Tonda, el si erena ati, teleb ning bobuka, el tibuk arelyanganamake. Mesir mutuku nang, sikce Allah Yahweh ati, ‘Ura na nio, an damuk unamabe. An si erena ati, winipnamabe, winipnamabe,’ nyabuka nyalin yupu nyapdeibikirye, ‘Winipnamabe,’ nyabuka nyapdeibikce touk, dipkoprob sikce wininamake.
Allah Yahweh arye Mesir mutuku nang, sik malye un nang ati obuka wenepnamle. Akunum obuka weneplyeura, elcuk tamubuka sikti, ila tamubuka teleb kiplirye kweteipnamle. Mesir mutuku nang ara, tamubuka Allah damuk yanuka moropnamake. Sikce Allah ati, ‘Naio, melipsilyame,’ nyabuka moropnamak talak ara, elce sik melina ati, sik ikin ning kum kipdeiplirye, sikti, kwetelinamle.
Aning atonun, anggun Yehuda yala nang ara, Asyur mutuku yin nang arye yupa weik tonun opnamak bukni, kum sirya dakanamsiyake. Sik tuba kam unamak nang ara, aning-aning nirya weik tonun upliba, kanye teleb deice aryuk unamake. Winipmanto ara, ninye arye sik koun ning koubikiba, el yating tuku noutam bilyopura, tuku deice tam teleb ubuka palamlirye, duk weik tonun moulamle touk ubuka unamake.
Winipnirye, anggun unamlum sukum nirya, teleb kipdeipnamsine. Tonda, anggun unamlum tam ara, anggun mutuku koproba nuksiniba, Mesir mutuku uk ulamluma ara, eitam iknapye dam tam, arah selatan, anggun ulamlum mutuku noutam, tuba tonap unamlume. Ara, weik asik deiyok kibuka ulamluma ara, Patros mutuku unamlum bukni, wini talak ara, anggunda mitang nang, amu tamuk unamlume. Mambul weik mutuku nang, kum unamlume.
Tonda, Elam mutuku yin talin nang ap, sik amutuku ulamik nang babye, min arye ninye olanak arye obikba dipneura, weilamikak, asukumuk yayikce aunyake. Asukum manyaka dana-dana tam, dukdongobuka deipmekak, diamik nang ton, asukumuk unyake. Sik anang nirya ara, mal olanmeka ani, obikura diamik. Sik nirya ara, Allah ati diba tenena kum nang ati, deiamikba, asukumuk Sheol mutuku yayik. Sik Elam mutuku diamik nang ara, tuku palibuka wiamik bukni, sikda pia malye-malye weik ulamik nang ati, Sheol mutuku pia amu noutam binuka deiamik. Sik anang kam tuba ulamik talak ara, amutuku-amutuku noutam ulamikce, yuk ulamik nang ati, yu kibuka, malye weik ulamika ati, sik dana-dana tam ulamik nang nirya ara, sik anang ati, ilil pia weik ulamukba, sik nong sirim talilamuk. Bukni, sik yuk nang mal olanak arye opniura, dipnarye, wekelbalamikakuk, Sheol mutuku biyik. Ati ara, Elam mutuku nang ap, amutuku akunum min arye yayik nang ap, sik nirya babye, alye dakdayik.
Asum-asum ap, wala ap, yata wiribuka do, mitik tonun ton akunum mapminyopura, narye anti ‘Wini talak winipnamlume, yuk mutuku binuka anang obuka sirya daknamlume,’ nyapnamkine. Aminyan dounamle talak ara, nyapkiniba, atalak ton tonok weik asik dam binamlume. Ara, amutuku ulamak nang ara, minop talak, anggun mal olan nang arye mal olamikak arye inipdobikce, obuka bobinamikba, pera mutuku noutam daulamika ani, keting tamun weik akunum ubukura, lopdeipsiba, tuba tamubuka sik mutuku yayikba, narye teleb kipdeipse. Ara dana-dana tam mutuku noutam, yuk nang ap ansinibuka, daulamepya ani, narye tuba sik weik asik ol dem uamuk bukni, tamubuka yanuka anyasik dobukabikce, Israel mutuku noutam daulamikce, yanuka kanye deibuka tunim abuka, telebuk ulamik. Minop talak ara, anang ara sik mutuku noutam kum ulamik. Pera mutuku noutam yuk-yuk ulamika ani, sik mutuku koproba ara asik oldemuk ulamuk bukni, narye anang bobuka, sik mutuku boyanuka deipseba, sik asik lipsisikuka dobikce daulamika ani, wini talak babye amutuku noutamuk tuba ukirye, talye kanye deibuka telebuk unyake. Wini talak ara, anggun mal olan nang ton kum yanganyake.
Tonda, Allah arye nyapdeibukba, Yoyakim Yehuda yala ninye, sik ninye deiyoknye, talibuka ulamuk mutuku nirya, yanuka warikikce, obuka sirya dakik. Obikopura, Allah yupu aik pum tam deiamuk bona weik, yanuka doprobike. Winibikopura, Allah el si eren aik deiamuk ning, weik tam tonap, ninye ap bobukabikce, Babel mutuku bobiyikce, amutuku noutamak bukni, mutuku si Sinear mutuku noutamak, Nebukadnesar, Isa Mutuku Dongonye si erelamuk aik pum tam, binuka deibik. Deibik aik ara, aisa el mem ning delilamuk aik deibik.
“Naio, Israel ninye ara, ance pia tenipnamlyame. Allah ance, ‘Na mapu unamake. Na tenen ninye pia unamak’ tenen, wiamsulumce, Mesir mutuku noutamak, an mikip deice arye bobuka yanamlume. Ati, ‘Anang pia kum opnamlyame’ tenen, moropkine. Na Musa birye Allah ati moropse. “Nyabuka moropsa ati ara, wini talak ara, na Musa birye, anggun Israel ninye ati, ayupu laka nyapsine. Ayupu nyabukapsirye, Allah ati morolamsise. Musa birye Israel ninye ati, laka nyabuk.
Israel ninye ara, Raja Asyur birye malye kibukce, tomobuka el mutuku tamubuka, wenen aik bobinuka deibukce, Israel yala ninye, Samaria mutuku noutam ulamikak uk, lo ubuka ati, sik punubuka una ati ara, el tam ninye dobuka, Kanaan tam mutuku nirya dopdeibuk. Ara, Asyur tam ara, Babel mutuku ap, Kuta mutuku ap, Awa mutuku ap, Hamat mutuku ap, tonda Sefarwaim mutuku ap, ulamik ninye nirya ati, “Sikda Israel yala ninye ulamik mutuku noutam lo weik upmalak ara, binamlume,” nyabukba, Samaria mutuku dolamik asik nirya ara, biyikce, asukum ulamik.
Na Yesaya lengdar mana deice arye eipse ning ara, na ilil upnuke. Alengdar mapsa deice eipse ning ara, yuk mutuku yu nang arye, Babel mutuku nang ara dobuka, sik mal olan nang deice deipnamaka ati eipse. Ton nang arye, yuk nang ati, tenebuka arye tilila yupu nyalamik touk, atalak ara, tuba tenen arye tilila yupu nyanamake. Alengdar mapsa ning ara, ton tam nang arye, yuk mutuku nang ati, sik bona nirya ara, ubula dolamik touk, atalak babye yakirye, ton mutuku nang talinyak bona nirya alubuka dopropnamake. Aning nirya ara, wininmokak eipse. Tonda, Elam amutuku ara yin nang yakirye, Babel mutuku nang olyanamake. Tonda Madai amutuku yin nang yakirye, Babel mutuku nang yanuka, warikuka opnamake. Ara, Babel mutuku nang arye, yuk mutuku nang nirya, ikin ning sik nong deice delilyeba, kanye ikin ulamuka ati, Allah arye Babel nang ati, sik mitang kipdeipnamle.
Sik Siria mutuku yin talin nang ara, ninye olbana ati kuda balye deice bukikirye yanamake. Ton yin nang ara, kuda basam arye libuka, tuku deice banyak ning, el si kereta perang, deice bukukabikirye yanamake. Atalak uk, sik Elam mutuku nang babye, mal ap, yin ap kintinibuka boyanamake. Tonda sik Kir mutuku yin nang babye, ‘Nun mal olan nang arye marapsicakʼ tenen, sik nong lelin ning, el si perisai, kintinibuka bobikirye, yanamake.
Allah arye, ayupu nyabukce, ayupu ton dukdongobuka nyabuk. ‘Na tenen ninye ara, tuba tamubuka, na damuk yanamak’ tenen, nara weik singa kuse arye, yupu weik nyalamle touk nyanamne. Yupu weik arye nyapnyopura, keting wekelban tam mutuku noutamak daukirye, na mapu malye kanye bobuka, ‘Se nun ni Allah Yahweh, el bira mambul weiknye ulule’ tenen, morobikirye, na damuk tuba tamubuka yanganamake. Sikce minop yakirye, yanuka nong kanupdongobuka, na damuk tamubuka yanganamake.
Na Allah Yahweh, im deice yin talen malaikat nirya ara, sik weik deiyoknye unune. Narye nyapsine. Na adiparyuk, na mapu koproba, Israel yala nang nirya ara, sikti, lyepnamne. Ara, minop talak yu nang arye, sik yuk-yuk dabinuka deiamikba, wini talak daunyak mutuku noutam nirya ara, tamubuka boyanirye, Yerusalem mutuku noutamuk deipniba, asukumuk unamake. Ara, keting palanyangan tam ap, keting kumulban tam ap arye, tamubuka boyanirye, asukumuk deipnamne. Winipniba, sik Israel yala nang nirya ara, na mapu koproba kibuka unamake. Nara, sik ni koproba, Allah pia ati unamne! Winipniba, nara sik ni koproba Allah unamne. Wininamne talak ara, naryuk na mapu koproba ati, kanye deipnirye, pia kum bataknamsine. Narye, “Winipnamsine,” nyapnye touk, dipkoprob winipnamne! Sik nirya ara, kanye deipdakirye, teleb kibuka diksukumuk unamake.”