Ati ara, Allah Yahweh arye, amutuku ulamik wel nang nirya ap, amutuku noutam ulamik youwak kilapu ap, amutuku ulamik kwaknamne mapu ap nirya ara, Allah arye, ‘Se, sikda na bico ati, amutuku nang kum wenepnamne,’ kum tenebuk. Akum bukni, sik nirya ati talye wenebuk. Winibuk ning ara, talye ati kuma. Deiyok ara, sik atalak ulamik Israel nang nirya ara, malye winin ninguk talibuka ulamikce, Allah ati kum tenelamik. Elce, ‘Aning wininamlume, aning ara, pia kum wininamlume,’ nyapdeibuk yupu nirya ara, kekena kumce, yaniltalamik. Tonda, sik nirya ara, talye-talye yupu ap, deiyok ton una kum yupu ap, talye nyalamik. Ati, Allah bico kum tenebukce, el yu ubukba, anang nirya ati wenebuk. Allah arye, sik Israel nang ati, ikin ning weika arye, sik nong deice deiamuk bukni, narye, ‘Yo, akununaʼ tenen, el yu ara, kum bapdongamuk. Elce tuba yu ubukba, el taruk mikip arye, Israel yala nang ati, tuba wenelamuk.
Yesaya 10:6 - Eipomek6 Na kayapu Israel nang ara, sikce na nyamse yupu kum kekenyakce, narye, ‘Teleb winin ning ara ani,’ nyanun yupu nirya babye, yaniltakanyaka ati, Asyur mutuku nang dopdeipsinyeba, Israel tam nang olbinamake. Israel nang arye, malye weik unyakba, na yu weik upnuka ati, narye sik Asyur mutuku nang ati, “Sik Israel nang ara, adiparyuk olbinulumume,” nyabuka, sik Asyur mutuku nang dopdeipsiniba, na mapu koproba Israel nang ati, obuka sirya daknamake. Tonda, sik anang obikirye, sik talinyak bona ara, binuka dalubuka dopropnamake. Sik Asyur mutuku nang arye, na mapu koproba Israel nang ara, talye bisikak buta yanilongolamuk touk kibuka, obuka yanipnamake.” Allah arye nyabuk. Gade chapit la |
Yesaya 10:6
38 Referans Kwoze
Yehuda yala nang wipdeipnirye, mikip arepneba, sikda mal olan deiyoknye birye deiyok kiplirye, yuk nang ap mal olalamica ani, ninye nirya obuka, sirya daknamake. Aoplobice nang, sik nong deice ara, talye bental deice yanibuka balamak touk wininamake. Ara, na Allah Yahweh arye sik Yehuda yala nang ati melipniba, sik mal olan nang ati, nirya obuka sirya dakanamake. Aning atonun, yuk mutuku ninye, sik yin talin nang arye, kuda basam balye deice bukuka yanganmace nang babye, ayin talin nang ara, nirya obuka, sirya dakanamake.
Ara, na Allah Yahweh arye, ‘Winiplulume!’ nyabuka, yupu mikip arye nyapdeipnyopura, sik anang kekebikirye, anang ara, amutuku tamubuka yanamake. Ara, amutuku weik asik dolamlum ning, Yerusalem mutuku warikina ap, ninye ona ap, ukula dolona ap ati, tamubuka yanamake. Tonda, amutuku obuka doprobikirye, anyasik nirya uku dongopnamake. Aninguk kum bukni, na Allah arye, Yehuda mutuku noutam, weik asik dobuka unyakak nirya ara, mutuku kata atonun kiplopniba, oldem uplirye, ninye kum kum ulamne sukum atonun kipnamle. Na Allah Yahweh arye, ayupu akunum nyapmasina ati, aning ara, dipkoprob nong kipnamlarya, nyapsine!
Ati ara, narye outam unyak nang, yuk-yuk nirya ati, “Yehuda mutuku nang olyalulume,” nyabuka, yukupnamne. Tonda, na pil dopnamnilanye bira, Babel mutuku nang, sik ninye deiyoknye, Raja Nebukadnesar biti yukupnamne. Yukupnyeba, sik nirya neika yanamake. Narye lo arepnamna deice arye, olyakirye, Yehuda mutuku unyak nang nirya ap, Yerusalem weik asik noutam ululum Israel nang ap, sik ulumik dana-dana mutuku bukni, anggun dam unyak yuk-yuk yala nang nirya ap ara, yanuka, obuka sirya daknamsiake. Narye anggun nirya ati, lakakip deipsinyeba, anggun mal olan nang arye yanuka opsikirye, sice buklopnamsiake. Winibikceba, yuk nang nirya arye aning eipnamake. Eibikirye, ‘Se, yu nang arye anang obuka sice buklopmaka ara, ilil upsile,’ tenebikirye, yok kum-kum dakanamle. Atalak arye dipdongobuka, doyanamle talak nirya ara, yuk nang nirya arye, anggunti, akutubuka nalisikceba, anggun opnamsiak nang nirya ara, alye weik dakanamlume. Aning ara, pia kume kum danamsile. Na Allah Yahweh arye aning akunum nyapmasina ati, aning nirya ara, dipkoprob nong upnamle!
Atalak ara, Mesir mutuku unamak nang ara, Yehuda mutuku noutam unamak nang ap, amutuku nang arye wininamak ning ap, kekebikirye, ilil uplyeba, sik yok sirir birbir apnamle. Ara, sik Mesir mutuku nang arye tamubuka tenepnamake. ‘Se, Allah Yahweh elda aning-aning nirya talibuka, deice tam erebuka ulul mikip weiknye birye, im deice yin talin malaikat talilula ati, nun Mesir mutuku nang ati, obuka wenepnamsile. Allah arye tenyamuk ning nirya, dipkoprob nun deice deipnamsila atia,’ tenebikirye ilil pia upnamle.
Nyabukopura, ayupu ton nyabuk. “Allah el yupu laka nyalamuknye Yesaya arye anggunti nyapdeiamsuk ning ara, dipkoprop nyapsuke. Anggunda talye yupu nyabuka, malye ululum nang anya arye, Yesaya arye anggun malye winilulum touk wininyak nang ati, sekdeiyamuk yupu ara anyapnusine. Allah arye nyapdeibukba, nabi Yesaya arye sekamuk yupu atia.”
Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.
Na yu weik upnuka deice arye, im sirya, mutuku sirya nirya malye winilamik ninye obuka yaniptapmanue. Winipmanu ara, na yu weik upnuka ati, sik aninye nirya ati ninye kanye wangalamak ning arepmanuba, sik nong nirya ikin upmoa deice arye, na ton tamubuka opmanto kum upmanunge ati, naryuk sikti, obuka sirya dakmanue. Winipmanu arye, sik ining dobuka, tuku deice diklopnuba banmoe.
Nyabuka asipdeyukbuk, ayanganmoknye birye tamubuka nyabuk. “Nara anggur tapu duk dakuka mek purunmangu sukum unmace nang, sik baju deice ining bi, bol pilamle touk, nara malye-malye winin nang weik onmanu talak ara, na baju deice ara ining bol pipmanile. Amalye nang onmanu talak ara, yuk pera mutuku nang ton kum melipmanunge. Na aryuk amalye nang obukapnurye sirya dakmane. Ati aining bol pipmanil ning ara, anggur mek ining bi kume. Ara, ninye ining bol pipmanile. Ara, ninye mutuku-mutuku nirya malye winiceba, na yu unulul ninye nirya ati, obuka yaniptapmanba, sik ining ara aupmanil atia. Sik ining weik unmoa anya arye, na baju nirya ining bol pipmanile,” nyabuk.
Anggun Israel ninye ara, malye weik winimunya ati, narye anggun wenena ati, anggun ululum mutuku arye dipdongobuka outam mutuku ululnye, yu weiknye ati yukupniba, yanamlarya. Nyapnyopura, elda keting panalyangan tam arye yanamlarya. Anye birye, ‘Winipnamlulume,’ nyapnamle yupu noutamak ara, na si ton nyapnamle. Anye bira, yuk yala ninye nirya obuka malye kipnamlanye ulula anya arye, winipmanto ara, kel nang arye kira tuku yanibikirye bental upliba dobuka sik tenebice ning memenyak touk, ayu deiyoknye birye, yuk mutuku deiyok nang ap, Raja nang ap ati, yanibuka darapsiliba, sirya daknamsile. El tenelye touk talye lukparabuka winipnamlarya.
Aning ara urdem ati kum nyapsine. Deiyok ara, sik Sion mutuku noutamak unyak ninye, pia malye unyak ninye nirya ara, ilil uplirye lukdanuka sirim talipnamle. Tonda, na Allah arye, ‘Wininamlulume, aning ara kum wininamlulume,’ nyalisinyak yupu ati, ‘Ayupu ara daupmalye’ nyabuka, batakanyak ninye nirya babye, ilil ati sirim talipnamle. Ilil weik uplyopura, sikce nyanamake. ‘Allah arye sik malye wininyak ninye ati, ‘Weik arye wenepnamne’ tenen, weik uku dilamle touk, imun kanye ning arepnamsil ning ara, winibuka arepsiliba, yata wiribuka tuba kam uptibye do?’ tenen, malye nyanamake. Aning atonun, ‘Uku pia dinamle ning atonun arepsilyopura, yatanye birye kam tuba uptu do? Kume, winibuka arepsiliba, yata wiribuka kam uptibye do?’ nyabuka, mambul kirikuka, sirim talilule.
Aning-aning nirya ati, Pia Mikip Weik ulye deiyoknye Allah arye, na Yesaya biti nyapnuk. Sik Israel nang ara, yupu deice aryuk, na si ereninyake. Bukni, dipkoprob ara, sik kanye talima noutam arye, nati pia moubuka kum teneninyake. Nati, walwal nang unyaka ati, sikda pia pera ninye asik nang atonun unyake. Tonda, sikce talibuka, si erenyak ning ara, talye nang sik kanye aryuk, ‘Aning-aning talibuka, si erenamlume,’ nyanyak ninguk, sik asok deice deilinyak bukni, sik talima noutam ara, nati moubuka kum tenepnikirye, na si dipkoprob kum ereninyake.
‘Nun ka el kanye kwadipnuyabeʼ, kum tenepnamluma deiyok ara nyapnusine. Ara, Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Dipkoprob nyapsine. Elce akunum tenyamuk sum tonok ton kipnamle. Asum akunum uplyeura, Yehuda yala nang nirya ara walwal kiplyeba, yupu pia weik nyapnamake. Ara, sik olan yin nang ara, yupa weika arye, Yerusalem mutuku wekuka yakirye, amutuku nang nirya obuka bataklopnamake. Tonda, alu mutuku nirya ara, pia malye kipdongopnamake. “Aning ara dotalak winipnamle ati, nyalyangalul mutuku, lu sukum arye upnamake. Sik mal olan nang yakirye, amutuku antanap dongobuka, dana-dana tam weik cang keil poka dobik ning nirya ara, ulubuka dakiceura, bataknamake. Atalak ara, Yerusalem mutuku unyak nang arye, “Se, melilyasilyame!” nyabuka, ngaluknamak ning ara, mutuku deice unmace nang babye kekepnamak bukni, kum yanuka melipnamake.
Allah Yahweh ara, aning-aning nirya eitam ulirye, im deice unyak yin talin malaikat nirya talibuka, sik deiyoknye ulule. Allah elce, sik Israel yala nang ati, pia yu weik ubukba, anang wenebuk. Yu weik ubukba, amutuku ulamik Israel nang, sikti, wenebuka deice arye, weik uku buk dilamle touk ubukba, sik taleamik mutuku nirya, uku dibuk. Sik amutuku ulamik nang nirya babye, uku buk dinmalibuk, adeice yo webuka dongolamak touk ubikba, uku arye dibuka, sirya dakuk. Tonye birye, el kwit ati obuk. Tonoknye babye, ton kum bico tenepdayik. Sik nirya arye, olanauk ulamik.
Sik pera mutuku arye yanamak yin talin nang ara, sik yupu weik arye, nyapnamaka ara, yu gus atonun ning, singa kus, el dina oplirye, yupu weik kamulamle touk, yupu weik nyapnamake. Sik aninye arye, ninye tomopnamak ning ara, singa kus arye, el dina obuka dipnulye ning, oplirye weik yupu nyalamle atonun ubuka, anang arye Israel nang bobikirye, sikce abatakikce nang, adiparyuk bobuka bindopnamake. Winipnamak talak ara, yuk mutukunye tonoknye babye, sik Israel yala nang ati, yanuka kum lyepnamle. Ayu nang arye, tonoknye ton kum batakuka binamak. Sik nirya bobuka binamak.
Anggur duk malye ninguk moulamnuka ati, winipnamak ning ara, nyapnusine. Ara, anggur wa wiamsak dana-dana tam nirya, keil poka dobuka denepse ning ara, dakuka uluplonamne. Winipnyopura, anggur wa malye upnamle. Keil poka dobuka denepse ning ara, dakuka daluplopnyopura, yuk malye nang wekikirye, amutuku nirya yanuka yanipnamake. Winibuka yanibikirye, uku sice kiplopnamake.
Allah arye el mapu koproba, anggun Israel nang ati, yu uplye ati, uapnamsile. Ara, weik uku buk dilamle touk, yu weik upliba, anggunti wenepnamsilarya. Elce anang wenebuka opnamle ati, ‘Aninye opnunʼ tenen, el taruk erebuka, akunum kintinibuk. Winiplye talak ara, mutuku-mutuku nirya luluknamle. Tonda, sik anang opliba dipnamak nang, sik tuku luknamakak ara, talye bisik lilunak donokamikiba, nirya lyulamlirye, tong weik welenamle. Winiplye babye, Allah arye sik anang, sik wenena ati, ‘Adekna,’ kum tenepnamle. Elce sik malye wininyak ati, weik yu uplyeba, tuba wenenauk unamlarya.
Ara, na Allah Yahweh arye, winipnamaka ara, laka nyapnukine. Narye nyapniba, sik Asyur mutuku ninye arye, an ap, ance talilyam ninye ap, an ni birye deibukba, dadeipdanin yangalamik ninye ap, an mapu koproba ap, aninye nirya ati, anggun nong deice, ikin ning weik deipsikiba, imun kanye bonamlume. Sik Efraim yala ninye ap, Yehuda yala ninye ap, kanye talima wilipdanamikce, bokuka yuk-yuk kiyamik talak ara, ‘Aning ara, weik mambule,’ tenelamlum bukni, aminyan ikin upnamsil ning ara, weik ikin ning unamsile. Ara, na Allah Yahweh arye, Asyur mutuku yu nang ap, sik ninye deiyoknye ap, dopdeipniba, anggun Efraim yala ninye ululum mutuku ap, Yehuda yala ninye ululum mutuku ap yakirye, obuka sirya daknamsiaka ati, nyapkine.
Mek deibuka obukaplirye, okibuka, akibuka kilirye, tonok mutuku nirya mek aryuk obuka dilamle touk, Asyur mutuku yin talin nang arye, anggun Yehuda yala ninye umunye mutuku nirya yanuka wariksikirye, langdipnamsiake. Winipmanto ning ara, mekwen pum tam wekikiba, kisok dam ulamsil touk, kipnamsiake. Winipnamsiaka ara, anggunce kum lyepdatume. Tonda, maka pol arye, tonokak obuka elilamle touk, Asyur mutuku yin talin nang arye, anggun ululum mutuku nirya, alapdopnamsiake. Aning nirya winipnamsiaka ati, anggunce nyapnamlume. “Se, Imanuel, Allah nun ap neika uptibirye, melipsetue,” nyabuka, malye kanye bobuka engenamlume. Allah arye na Yesaya biti, nyapnuke.
Tukwak mutuku nirya ara, malye kipdeipnamle. Akunum winiplyopura, tukwak mutuku unyak nang nirya, amalye kipdeiplye mutuku tuku deice uk unamake. Ikin weik unamakak ara, talye ati kume. Deiyok ara, Allah arye, “Anggunda, na nyapdeipsise ning ara, ‘Aninguk pia talibuka unamlume. Aning ara, pia kum wininamlume. Tonda, teleb winin ning ara ani, malye winin ning ara ani,’ nyapdeiamse yupu ara, tukwak mutuku nang nirya arye, aning batakuka unyake. Narye, ‘Aning ara pia ati talibuka unamluma ati, tonoknye babye kum bataknamlume. Tuba talibuka upnamlume nyapdeiamse yupu ara, tukwak mutuku nang nirya arye, aning batakuka wininyake. Wininyaka deice arye sik unyak mutuku nirya ara, mining dam arye, malye kipdeipnamne.” Allah arye nyabuk.
Aning nirya bataknamluma ara, talye ati kume. Deiyok ara, nyapnusine. Ara, malye yupu uk nyalulnye bira, el talima pum tam ara malye ninguk ulul ati, kanye bona kumce talye yupu uk nyaltakalule. Aninguk kum bukni, tonda, yata ning do nirya, el winilul ning ap, nyalul ning ap nirya ara, Allah el si Yahweh ati, tilila yupu uk nyalulba, walwal nang kekebikirye, ‘Aning ara diba,’ tenenyake. Tonda, tenepce arye talye tilila yupu uk nyalula deice arye, din patanmaliba imun kanye bobuka unyak ninye ati din kum arelule. Aning atonun, mek patalibuk imun kanye bobuka unyak ninye ati, mek kum arelirye, mangkau kilolongana uk ulule. Anang nirya batakalongona uk ulule.
Allah arye nyapdeibukba, nabi Yesaya birye sekeibuk. Se, nun mal olan nang, sik Asyur mutuku ninye arye, sik yuk mutuku unyak ninye ati, sik mutuku dakuka uku sice kiploplum bukni, yuk mutuku ninye arye, anggun talilulum ning nirya babye, dakuka kum uku sice kiplopsulume. Anggunce, yuk mutuku ninye sik nong deice, pirilen ning delilulum bukni, yuk mutuku ninye arye sik Asyur mutuku ninye nong deice pirilen ning kum delinyake. Ati ara, wini talak anggunce ‘Naʼ tenen, ninye ati, sik mutuku ulubuka uku sice kiploplum bukni, aning winibuka akunum sirya dakmunyopura, aminyan talak, yuk mutuku ninye arye, anggun talilulum ning nirya babye atonun, ulubuka uku sice kiplopnamsiake. Tonda, anggunce, yuk mutuku ninye, sik nong deice, pirilen ning delilulum bukni, aning winibuka akunum sirya dakmunyopura, aminyan talak yuk mutuku ninye arye, anggun Asyur mutuku ninye ati, anggun nong deice pirilen ning delinamsiake.
Bukni, na Allah Yahweh arye nyapsine. Asipdenulum ning ara, diba narye winipnamne. Mal olana deiyok nang arye, anggun Israel ninye obuka sirya daksikce, tapu koubuka bobinamsik bukni, amikip nang awininmaki buk, narye sik Israel ninye ati dopropnamne. Tonda yu nang arye kalikmakibuk, narye sik dam binuka dopropnamne. Ara, dipkoprob na Allah aryuk, sik mal olan nang arye, anggun Israel yala ninye obuka sirya daksik nang ati, narye kwang dakna ati, sik dam binuka obuka sirya daknirye, Israel ninye sik mapu nirya lyepnirye tamubuka boyanamne.
Deiyok ara, na Allah arye, Raja Nebukadnesar biti, ‘Mesir mutuku nirya obukaplirye, malye kipdeipnamleʼ tenen, elti, wipdeipsiba, Mesir mutuku wenena ati, na tenepse ning ara, el Nebukadnesar ap, el yin nang ap, sikcuk pil dolamnike. Sikce weik pil dolamnika ati, sik deken ning ara, Nebukadnesar arepnamne. Nara, Allah Yahweh, aning-aning nirya talibuka, deice tam erebuka unirye, pia mikip weik ununye birye, nyapsina anya arye, aning nirya ara, dipkoprob nong upnamlarya.
Ance, winibuka kintininamlyame. ‘Nunda, sik amutuku noutam unyak nang arye delinyak bona ara, nuncuk alubuka dopropnamabe. Winibikceba, amutuku ara asik oldemuk ulamuk bukni, anang ara tuba yanuka, asik dobuka unyake. Aning, sik talinyak ning nirya ara, dopropnamlume. Amutuku yanuka wekelbikirye unamak nang ara, min talak amutuku ulamik bukni, yuk mutuku nang arye, inibuka donokamikba, yuk mutuku nang, dana-dana tam binuka, sik kan-kan dabinuka ulamika ani, tamubuka yayikce, bona ap, kam ulamle ning, sapi ap, domba basam ap, weilamikirye amutuku unamake. Bukni, aminyan talak ara, an ap, an melin nang ap arye, amutuku noutam unyak nang obuka sirya daknamlume. Sik amutuku unyak ninye arye, ‘Kume, nunda tukwak mutuku im sirya, mutuku sirya nirya aupmaliba, nunda, dipkoprob amutuku unyabe,’ tenenyake.
Syeba mutuku ap, Dedan mutuku ap, Spanyol mutuku noutam bukni, weik asik el si Tarsis mutuku ap, amutuku noutam unyak nang nirya ap, tonda Tarsis mutuku tam bona yuk-yuk ning nirya dekelanyak deiyok nang ap, tonda, anyasik-anyasik dana-dana tam unyak mitik mutuku unyak nang ap arye yanuka asipdenamkiake. “Se anggunda, yin talen nang yupa pia weik bulupmumce, yin bobinamluma deiyok ara, Israel nang sik bona nirya ubula dolona ati binmalum do? Tonda, sik delinyak dekna weik ning, el si emas ap, perak ap, tonda sikce weinyak ning, domba ap, sapi ap nirya ara, ‘Alubuka dopropnamabʼ tenen, binmalum do? Bona yuk-yuk ning nirya, pia weik tonun alubuka dopropnamlum do?” nyabuka asipnamkiyake.
Na ni Allah Yahweh, anda mikip weiknye minop talak arye, aning-aning min kum kwepdeialum talak arye, an akunum aulalume. Tonda, anda kam pia unalame. An siuk erekunune. Anda, Pia Malye Ning Winina Kumnye, Pia Teleb Leknye ulyame. Ati, narye moropkine. ‘Nun Yehuda tam unyap Israel nang ara, lyepsutumba, nun kum dipnamabe’ tenen, moropkine. Na nio, ancuk nunti, yupu bokeipsutumce, nunti wenepsutum bukni, dipkoprob sik Kasdim nang ara, ance, ‘Wininamake’ tenen, wipdeipluma anya arye, sikce nunti, wenepnamsiyake. Anda, weik mutuku yangan keil atonun ulyama anya arye, an amu tam lelipdongopsutumce, kaliksutum bukni, ance tenealum touk, Kasdim mutuku nang wipdeipmunba, sikce nunti, wenebuka olyanganamsiake.
“Aninguk ton kume. Tonda, anggunce nunti, ‘Kume sik Asyur mutuku nang ap, anggun weik deiyoknye ap arye, nun Yeduda tam unyap nang ap, weik asik Yerusalem noutam unyap nang ap ati, olyanganmasuluma ara, sik kanye aryuk unyake,’ tenesulum do? Aning ara, kume nyapsine. Allah el si Yahweh arye, Asyur mutuku deiyoknye biti, ‘Israel ninye olbilyame,’ kum nyapdeiptopura, elcuk mangkau arye, anggunti olyasutu do? Kume, Allah el si Yahweh arye, el bidamnye arye, nun deiyoknye ati nyabuke. ‘Yehuda tam unyak ninye ap, weik asik Yerusalem unyak ninye ap ati, olbilyame,’ nyapdeibuka deice arye, yanuka olyasiyabe. Nun kanye deice aryuk kume. Allah arye, ‘Telebe,’ kum tenelul ning unyap do? Kume. Allah arye, nun deiyoknye nyapdeibukba, anggun mutuku ninye nirya ara, obuka kum kipdeipnamapce.” Ayupu nirya ara, Asyur mutuku weik deiyoknye, el yin talin nang, sik deiyoknye birye, sik Yehuda tam nang, ninye si ton, Elyakim ap, Sebna ap, Yoah ap, ati nyabuk.
Ami si nyapnamlama ara, urdem ati kume. Ara, ami min kum nepsilirye, ‘Na nin, na ni,’ min kum nyapnamle talak ara, Asyur mutuku ninye deiyoknye birye, amutuku noutam yalirye, Damsyik mutuku ap, Samaria mutuku ap yalirye, sik talinyak ning aning-aning nirya, dalubuka doproplirye, el mutuku koproba tamubuka bobinamle.” Allah arye, na Yesaya biti nyapnuk.