Yesus arye ayupu nyabukopura, kirikuka ayupu tonap, Musa sekamuk yupu peterena deiyok nang ati nyabuk. “Allah arye wenebuka opnamsile ati, anggun bicoe. Anggun malye umunye ning ara, nyapnusine. Ninye arye, ‘Aik weknuyap’ tenen, aik buplan kukne ning, kunci arye buplan kukuka weklamak touk, ‘Allah diba tenena, kel bikna deiyok ning doproptibirye, kel kipnuyabe,’ tenenyak ning ati, kunci ato ning akunum ubula dopropmalume. Allah el yupu nirya kel kina ati, deiyok ning kum laka nyabuka laka nyalulume. Ati anang tuba walwaluk tuba unyake. Tonda anggun babye, Allah arye ninye lyeplirye, sik kanye talisilya ara, dib tenebuka kum wekmalumce, anggunce na bataknulume. Tonda, yuk ninye arye, ‘Se, nun Allah kel kina deiyok ning kel kiptibirye, Allah talinamsilak weknuyabe,’ tenenyak nang ara, yupu sekeldongolulume. Tonda, ‘Nun dib tenebuka Allah talinamsilak weknamabe,’ tenenyak nang babye, anggun Yahudi yala deiyok nang arye, malye winimunya deice arye, yuk nang ati yupu sekeldongolulume.” Yesus arye Farisi nang ap, Musa sekamuk yupu peterena deiyok nang ap ati nyabuk.
Yesaya 10:1 - Eipomek1 Allah arye nyabuk. Sik amutuku noutam talibuka ulamik ninye deiyok nang, sik yupu bokolina deiyok nang arye, na mapu Israel nang ati, anggunce, “Aning-aning winiplulume,” nyabuka, pil dipmunyakarye, anang dipkoprob wininyak touk, yupu kum bokolilulume. Deiyok kum upmalibuk, sik nong deice, ikin ning dobuka delilulumce, malye weik ululume. Ati anggun babye, ikin ning weik dolonamlume. Gade chapit la |
Yesaya 10:1
39 Referans Kwoze
Musa sekamuk yupu peterena deiyok nang ap, anggun Farisi nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bola deiceuk teleb ululume. Winiluluma ati, anggun bico, Allah arye wenebuka opnamsile. Anggun malye winimunye ning ara, ani. Aning-aning nirya ara, ‘Allah elcuk aresulule’ tenen, pia mitik ning bukni, kuma ap, babok ap, erica ap bokuka, seper sepuluh dobuka, Allah el si erena ati ton, arerurume. Winilulum bukni, weik mambul winin ning ara, batakalongolulume. Anggun batakamunye ning ara, ninye bico tenebuka talima arena ap, ‘Na kayapu’ tenen, batakana kumce, kanye deibuka pil dana ap, ninye arye dipkoprop winipmakce touk, yupu bokolina ap, yupu bokolin talak diksukum yupu nyana ap, anirya ara, batakalulume. Allah yupu noutamak ara, ayupu nirya aubuk bukni, anggunce aning nirya batakalulume. Ati, ‘Teleb nang tenepnamsiyak’ tenen, mitik ning dobuka, Allah ati, seper sepuluh bokuka aremunya ara, teleb bukni, aning batakna kumce, weik mambul ning babye winiptume. Weik mambul ning babye, winipmunyopura, ‘Telebe,’ nyapsitinye bukni, anggunce weik mambul ning batakalulum ati, ‘Anggunda tuba malye winilulume,’ nyapsine.
Nyabukba, sik Yahudi yala nang, Allah arena ati, weik deiyok nang ap, sik amu tam pil dolamik nang ap, Yesus eibikce, nyabik. “Yesus ara, wanwanun yo deice deibuka opdeipsilyame,” nyabuka, weikto arye nyanmek. Nyanmek bukni, Pilatus arye, “Nara, ‘El malye winibuka deice arye, ninye olamak deiyok ning anye’ tenen, kum kel kipmana ati, deiyok kum upmala ati, narye anye bira, kum opdeipnamsine. Anggun bidamnye aryuk, anye bira bobuka olbilulume,” nyabuk.
Ara, asing kuamuknye, el li ap, el lin ap ayupu nyaprika deiyok ara ani. Ara, sik Yahudi yala deiyok nang arye nyabik. “Yata ninye do nirya, ‘Allah arye wipdeiamuknye, ninye lyepnamle’ tenen, Kristus ara, Yesus aulule. ‘Elda Ninye Lyenanye ulule,’ tenebikirye, nyabikcopura, nunce wenepnamabe. Ara, nun Allah yupu kekenyap aik, tuba tamubuka tonap kum yatinge. Nunce anang batakibiba, sik talyeuk unamake,” nyabik. Ayupu nyabik ning ara, anye el li ap, el lin ap akunum kekebuka kel bikamrik ati, sik ilil ati, asum nyapmarik yupu nyaprik.
Allah arye nyabuk. “Sik pia malye wininyak ninye nirya babye, Kasdim mutuku nang babye, yuk ninye arye, anang nirya ati, aminyan talak ara, ngilik-ngilik abuka, nalina yupu nyanamake.” Anggun malye weik winilulum nang ara, anggun babye, ikin ning delildalamlume. Aminyan talak ara, Allah wenepsilirye, obuka sirya daknamsile. Anggunce, yuk mutuku ninye, sirya obuka daklumce, sik ning dalubuka dololamlume. Tonda, winilamlumce, tilila yupu nyaplobuka, yuk ninye ning ubula dololamluma deice arye, bona weik dobuka, anggun mutuku tamubuka delilbalulume. Winibuka bona weik talilulum bukni, aminyan talak ara, anggun babye, imun kanye bobuka unamlume. Anggun malye-malye weik winilamlum ning ati, Allah arye wenepnamsilca.
Anggun malye ululum nang ara, Allah arye wenepnamsila ati, anggunda bico. Ara, anggunce, anggun aik akunum doplum bukni, yuk talye kankan nang arye domik ning ara, anggunce dekna ap, alubuka dolona ap arye, doproplumce, anggun ninguk weika arye, tabakuka delilulume. Atonun, anggun wa tuku akunum aubuk bukni, yuk nang arye wilamak wa tuku ton, alubuka doproplum nang ara, malye winilulume. Angguncuk, sik yuk nang talilamik ning ap, ulamik mutuku ap nirya ara, akunum doproplumba, anang yukak bendobikura, angguncuk amutuku talibuka, anggun yuk aunmamlume. Winilulum ning ara, malye weik winiplume. Allah arye nyabuk.
Sik anang ara, pia bicoe, Allah arye anang wenepnamla ati, sik anang ikin upnamle. Sikda Kain arye Allah nyabuk yupu kum kekebukce, malye winibuk touk wininyake. Tonda, minop talak Bileam arye, ‘Ayupu ara, tilila yupu,’ akunum bikmokcuk, “Yo bok weik arepnukiabe,” nyabikura, kekebukce, ‘Yo bok weik doproptinye’ tenen, patabuka ati, tilila yupu peterebuk. Tilila yupu peterebuk touk, sik anang babye, ‘Yo bok weik dolonamap’ tenen, malye wininyake. Tonda, minop talak Korah arye, ‘Allah arye nyapdeibukura, Musa nyalamuk yupu kum kekepnuyap’ tenen, deiyok koubuka, el yanibuk touk, sik anang babye, Allah arye nyasulul yupu yaniltanyake.
Allah yupu laka nyalamik nang, sik nabi-nabi nang arye, nati sekamnik touk, nara Ninye Mi Koprop Atonunye bira, malye nang arye opnikceba dipnamne. Sik Allah yupu laka nyalamik nang, nabi nang arye laka lyalamik touk, amutuku nang arye winipnamniyak bukni, nara Ninye Mi Koprop Atonunye yupu delilbinamnilanye bira, elin, el li birye kum deiamtiringtoura, telebe. Bukni, el lin, el li birye anye deiamrika ati ara, yupu deiyaliba opnikcopura, Allah arye delilbinamnilanye biti weik arye wenebuka opnamle. Ati anye bira pia bicoe,” Yesus arye nyabuk.
Se, anggun Farisi nang ap, Musa sekamuk yupu peterena deiyok nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bol deiceuk teleb winilulume. Allah arye wenebuka opnamsila ati, anggun bicoe. Allah yupu laka nyalamik nang, nabi nang olamikba weilbalamikak ara, sik si erena ati, teleb aik dolulume. Tonda, sik diksukum ulamikba olamik nang weilbalamaikak ara, sik si erena ati, urasin teleb ning deililbalulume.
Se, anggun Farisi nang ap, Musa sekamuk yupu peterena deiyok nang ap ara, anggun talima noutamak malye ning aupmasilibuk, ‘Teleb nang tenepnamsiyak’ tenen, nong bola deiceuk teleb ululume. Allah arye wenebuka opnamsila ati, anggun bicoe. Ninye dibikceba, keil deiya pum weibikirye, buru tam keil deibikirye, aik likne kurun mek likikcopura, buru tam ara urasin pia teleb ulule. Bura tam urasin teleb ulamle bukni, akeil deiya pum bisik ara, ninye nong lyuplirye, tong ap, yok ap, amalye ninguk ulule. Aning ara, pia malye ulamle touk, anggun winin ning babye, pia malye winilulume.
Anggun mal olan nang nirya ap, sik Kasdim mutuku nang ap ara, ninye weik oplumce, aik nirya ubula doproplumce, amutuku nang talilamik ning ubula dobuka, sik aik dakalulum nang ara, bicoe. Winibuka pia malye weik winimunya deice arye, anggun omunye nang, ining deice arye, anggun aik dolulume. Anggun aning atonun winilulum ninye nirya ara, imun kanye bobuka, unamluma anya arye, anggunda bicoe. Na Allah arye, wenebuka opnamsina ati, nyapsine.
Yata nang do nirya, anggunce, ‘Nun ap, nun kayapu nang ap, nun kilapu ap, mapu ap ara, kanam aryuk unamap’ tenen, yuk nang ati obuka, sirya daklumce, sik ning ubula dololulum nang ara, bicoe. Weik imun kanye bonamlume atia. Tonda, anggunce, yuk nang ning ubula dololamlum deice arye, anggun aik unyak ninye ap, anggun ap, bona talinanye kibuka, telebuk ulamlum nang ara, bicoe. Anggunce utenelulume. ‘Kume, nunda bona weik talin nang unyaba anya arye, ninye yupu bokolina deiyok nang arye, nunti kum wenepnamsiyake. Nun ak, ‘Dauplye,’ tenen, bataknamsiyake,’ tenelulume. Bukni, anggunda bicoe. Weik ikin ning, anggun nong deice yanamsile atia.
Aning nirya winipnamlum bukni, nong kum upnamsila deiyok ara, anggunce Raja Omri ap, el mi Ahab ap, sik malye winilamdik ninguk talibuka, anggun babye, melibuka dobolbamunce, malyeuk winimunya ati, winipnamsine. Abitinye Raja nang arye, pia malye weik winilamdik touk, anggun wini talak ululum ninye babye, malye weik winiluluma anya arye, narye anggunti, wenepnamsine. Winipsinirye, anggun yala ninye nirya ara, pia malye kipdeipnamsine. Winipsinyopura, mutuku-mutuku nirya daunyak ninye eipsikirye, anggunti malye nyabuka nyalinamsiyake. Allah Yahweh arye, Israel ninye ati nyabuk.
Anggun Korasin mutuku umunye nang ap, Betsaida mutuku umunye nang ap, Allah arye wenebuka opnamsila ati, anggun bico. Anggunce, ‘Se,’ tenebuka mambul kanye bonamlulume. Anggun dilamlumba, anggun mutuku noutamak sirya dana pil ap, ninye kum winipmanto ning pil ap dolamsa ara, Tirus mutuku ap, Sidon mutuku ap noutamak pil dolamtinyetoura, sik amutuku bitinye unyak nang nirya arye, mambul kanye bolamtingce, sik malye ning batakuka balye tamubuka, nati akunum diba tenelamnitinge. Bukni, amutuku bitinye noutamak ara, apil kum dolamsiba, aning nirya kum elilamika ati, diba kum tenepnike.
“Aning atouk, yata ninye do nirya, sik ninye arye memamice yo ati, si erebikirye, ayo ati, ‘Kam buklyame,’ nyabuka moronyak nang ara, sikda bicoe. Narye awininyak ninye ara, wenepnamna ati nyapne. Aning atouk, kam kum ulul ning, keil ato ning ati, ‘Naio, bukdoplyame, kam unalame,’ nyabuka, si erenyak ninye ati ara, na weik arye wenepnamne. Ati, sikda bicoe. Aning ara, kat ning doprobikirye, puturubuka delinyakce, dekna weik ning emas ap, perak ap, uku dapmakibuk, mitang uplyopura, sik si erenyak ning ara, bol deice palibuka, delinyake. Wininyakba, urasin teleb ulul bukni, aning arye, ‘Teleb un ning ara, ani. Aning wininamlulume, aning ara, pia kum wininamlume,’ nyabuka, aning arye, sik melibuka petereptu do? Kume aning ara, kam ulul ning kum anya arye, kum winipmanto ulule. Tonda, aning-aning nirya ara, isin kum pulirye, kam kum ulule. Aning ara, dib kanye kum ning atibuk, si erena kume.
Raja Yoahas, el weit koproba Raja Yoyakim, el babye malye weik winilamuk. Ati, anye bira bicoe. Ikin ning, el dam yanamlarya! Yoyakim el aik tonap, aik tabakuka dobuk talak ara, weik aik, pia urasin teleb ubuka dobuk bukni, el dana-dana tam ulamik nang ati, sik pil dona ati, arena kumce, anang ati pia mikip arye, ikin pil dilamukba, pil dolamik. Yoyakim el alip aik, tabakuka domuk ning babye, elce apil dolamik nang, sik dengna ara, kum arebuk. Elce sikti, ‘Pil talye dopnululume!’ nyabuka, ikin ning, sik deice deiamukba, el pil ara, talyeuk pil dolamika ati, Yoyakim birye, winilamuka deice arye, pia malye winibuk.
Ton nang ara, tilila yupu uk, tuba-tuba talye nyaltakanyake. Aning wininyaka ara, winipmanto nyapnusine. Ara, talye yupu weik nyanyak nang ara, ninye arye tuku deice ban ning, el si gerobak, ikin ning gerobak pum tam libikirye, tapu kirikuka libuka, bobalamak touk wininyake. Sikce tilila yupu nyakirye, malye un ninguk tuba-tuba wininyak nang ara, bicoe! Sik nong deice ara, pia ikin ning, cakman tenepmanto kum kanye, ikin ning upnamle!
Bukni, sikce malye ninguk, talibuka winilamice nang ara, nyapnamlulume! “Anggunda bico, anggun wenena ati, ikin ning ton dopropnamlume. Anggunce yuk nang ati, ikin ning delilalum touk, anggun babye, ikin ning anggun dam yalyopura, dopropnamlume. Tonda, anggunce malye-malye pil dolamlum touk, anggun dam ara, ikin pia ning yanuka, anggun nong deice deipsilyeura, doropnamlume,” nyabuka wenepnamlyame.
Anggunda bicoe, weik arye wenebuka opnamsina atia! Ara, anggun Israel yala nang kan-kan arye, ton nang ara, beren tam koproba arye, bukikirye, ‘E, adiparyuk kanye wangalamak mek dilbinuyabe,’ tenebikirye, unyake. Ton nang ara, beren tam arye dipdongobuka, anoutam talak ap, lukunyan talak ap ara, sikce yu mekuk pia dinyaka deice arye, amek el yu arye, sik kanye pia wanganyake.
Nabot yanuka deipmekak ara, malye un nang bitinye ton dobuka, el bukmoka urasin dam yanuka deipmek. Tilila yupu nyana ati deipmeknye birye, “Nabot bira, el bidamnye arye Allah si deice ap, nun mutuku ninye deiyoknye Raja si deice arye, malye yupu nyapmoba kekepmaupe. Ati opnamabe,” nyanmarik. Nyanmarika ani, batakrikura, Nabot adeipmekak arye dobuka, buru tam bobiyikce, keil bopmeka arye el nong deice binuka donokuka obikba dibuk.
Aning atonun, sik ninye deiyok kibuka, Allah el mapu koproba ati, talikirye, Raja unyak nang ap, tonda sik wisi-wisi nang ap ati ara, Allah Yahweh arye, sik anang ati, yupu nyaplirye, weik arye wenepnamle. Allah arye sik anang ati, “Teleb ulamlum ning ara, ani. Malye weik winilalum ning ara, ani,” nyabuka, wenen yupu nyapnamle. Yupu bokeipnamle talak ara, ayupu ton nyapnamle. “Ninye arye, anggur wa wibuka kouamikca ani, duk weika arye mouplyeura, yuk nang arye yanuka, anggur duk nirya dalubuka dolamak atonun, sik deiyok nang babye, na mapu koproba, sik Israel nang ati ara, akunum malye kipdeiplume. Tonda, anggunce talye kankan nang, sik bona nirya, dalubuka dololamlum ning ara, anggun aik pum tam dungnuba deiplumba, anggun aik ara langdibuke,’’ nyapnamle.
Tonda, anggun anang aryuk, anggunce namin kilongon yo bok dopropmunce, dipkoprob malye winipmalinye biti, ‘Kume daupmalye, elda malye kum winipmale,’ nyabuka, teleb kipdeipmunce, kum wenelulume. Aning atonun, dipkoprob malye pia kum winipmalinye biti, namin kilongon yo bok dopropmunce, ‘Elda malye winipmale,’ nyabuka, el nong deice ikin ning deipmunce, wenelulume.
Tonda, ninye yupu lipsisikuka bokolin ati bulubikce talak ara, deiyok kum upmalibuk, sikce yuk nang ati, ‘Sikda malye winipmake,’ nyabuka, lululanyak nang, tonda, malye winipmak nang ati, ‘Sikda teleb winipmake,’ talye nyanyak nang ap ara, Allah arye, anang wenepnamle. Tonda, sik mutuku wekelbana ati, bisik bublan dam bulubikirye, ninye yupu lipsisikuka bokolin ati, pil teleb kibuka kum donyak deiyok nang ati, ‘Aning opnuyabe’ tenen, malye yupu tanyaka deiyok nang ap, Allah arye, sikti, kum kipdeipnamle. Tonda, malye kum winipmacebuk, ‘Sik anang arye morobikce yupu ara, pia kum kekenamabe,’ nyabuka, yanibikirye, lululanyak nang babye, Allah arye, anang ati wenebuka, kum kipdeipnamle. Aminyan talak ara, Allah arye malye wininyak nang nirya ara, obuka sirya daklyeba, kum danamake.
Tonda, anggunce yuk nang ati derelalulumce, ninye deiyok nang, yupu lilsisikin nang dam bimunce, sikti, ‘Yupu kekesumunce, yupu bokuka lipsisik deipnusulume,’ nyabuka morolulum bukni, dipkoprob ning ati kume. Anggun kan-kan arye tonoknye babye, diksukum un ning ati, ayupu nyabuka kum morolulume. Anggun nirya arye, yupu lipsisikina deiyok nang dam bimunce, tilila yupu ap, minin yupu apuk, nyalulume. Yupu bokolina deiyok nang dam bimunce, ‘Aning ara, malye upmake,’ nyabuka, binuka nyalulum bukni, ara dipkoprob yupu kum nyalulume. Aning kum bukni, anggunce, ‘Kume, nunce anang deice ikin ning deibipyopura, malye un ning ton tabakuka winipnamapca,’ tenelulume. Anggunce ayupu sisikinmamunya deice arye, ‘Aning-aning ton winipnin banamabe,’ tenepmunce, yuk malye wini ning ton tenemunce, aninguk talibuka ululume.
Nun dam, akunum malye ulilamnyap bukni, ance, ‘Winipnamlume,’ nyapdeipsulum ning ara, batakaltakanauk unyabe. Tonda, yuk nang dam ara, nunce, ‘Kume, Allah Yahweh ara, nun walwale, el bisik kum dobolbanyabe,’ nyabuka batakanyabe. Nun ni Allah, an siuk erelamupu bukni, wini talak ara, an dam mal pipkuburye, nunda mandipna dobuka unyapce, pia yuk kwalin bisikuk akunum banyabe. Malyeuk winibibirye, yupu lipsisikuka bokolina deiyok nang dam bibirye, yuk nang ati, malye kum winipmakibuk, ‘Kume, sikda malye winipmake,’ nyabibirye, ‘Deiyok nang arye, anang wenepnamakʼ tenen, minin yupu arye nyanyabe. Allah anti, kum melibuka dobolyangakinyabe. Nunce yuk nang ati, nun kanye pum tam tenebibirye, ‘Ikin ning, sik deice akunum deilinamabeʼ tenen, yupu bokolina deiyok nang dam binuka, tenepce arye, talye tilila yupu uk nyabibiba, anang deice wenepnarye ikin ning delinyake. Adeice arye, an yupu yaninyabe.
Tonda, talye bona utotoa kum talenyak ninye arye, dipkoprob malye winipmace nang ati, yupu lipsisikuka bokolina deiyok nang arye, ‘Sik malye winipmace ning ati, yupu lipsisikuka bokolinamapʼ tenen, aik boyacopura, na mapu anggunce bico tenepmunce, ‘Kume, amalye winipmace nang ara, kankan nang unyaka ati, daupmalye, malye dem wininamakeʼ tenen, anggunce “Kume, anang ara dipkoprob malye kum unmake,” nyabuka, tilila yupu deice arye melibuka kum nyanamlume. Yata nang do nirya ati, sik malye winipmace atouk ubuka, yupu lipsisiknamlulume.
Anggun mutuku noutam arye, bona utotoa kum ninye ati, yupu bokolin nang dam bobikiba, ‘Yupu lilsisikna deiyok nang arye, teleb ubuka yupu lipsisiknamakʼ tenen, sikce abona utotoa kum ninye ati, dipkoprob yupu dem, nyapmunce melinamlume. ‘Kume, sikda bona utotoa kum ninye ati, dauplule,’ kum tenenamlulume.
Tonda, ninye arye, tuku mikamlye deice yanibuka balamak touk, sik Israel ninye arye, bona utotoa talina kum ninye ati, weik ikin pil dibikiba, pia imun kanye bobuka unyake. Aning atouk, uk dilamliba, mikip kum mitanguk unyak ninye ati, ‘Sik anang ara, awaplye’ tenen, yaniltakakirye, pia kum melinyake. Tonda, sik ni yapu ap, sik mapu arye, tonok wel kil ulamliba, akiluk sik bitinye binuka, dobuka neika marurake. Amalye ning nirya wininyaka deice arye, na Allah malye una kumnye, na si malye kilininyake. Sik malye wininyak ning, yuk ninye ton eibikirye, na Allah ati, “E, el ‘Naʼ tenen, nang ara, pia malye wininyak ninye anya arye, sik ni Allah babye, atonun ulule,” nyabuka, na si malye kibuka yaninyinyake. Malye weik wininyaka anya arye, narye Israel ninye nirya wenepnamne.