Yesaya 1:27 - Eipomek

²⁷ Na Allah Yahweh ara, malye ning tonok babye, kum wininirye, diksukumuk unune. Ati, narye, Yerusalem mutuku unyak ninye arye, ‘Se, nun dipkoprob malye winilamupu,’ nyabikirye, sik malye un ning batakikcopura, aninye ati lyepnamne.

Yesaya 1:27 Referans Kwoze

Yesaya 63:4

Anang oplopmana deiyok ara, ani. Ara, minop talak arye na tenelamse touk, wini talak akunum upmala ati, na mapu Israel ninye ati obuka sirya dakik nang kwang dakmane. Na tenen ninye Israel ninye ati obuka sirya dakikce, ‘Tapu koubuka deiamika noutamak arye, lopnirye lyepnamne,’ tenelamse talak akunum upmoa ati, amalye winin nang opmanue.

Yesaya 62:12

Na Allah arye nyapsine. Yerusalem mutuku tamubuka yanamak nang ara, narye winiryuk si arepniba, anang mutuku sirya, im sirya nirya ara, sik si ati nyanamake. “Allah arye akunum Lyepdobuk Nang, ‘Sikda ‘Naʼ tenen, nang unamakʼ tenen, akunum wipdeibuka ati, sikda, ‘Pia Lek Nang,’ nyabuka, si sinamsiake. Tonda, ‘Allah Yahweh arye, ikin noutam arye, Lobukabukce Lyepdobuk Nang,’ nyabuka, si kum sinamsiake. Dipkoprob, anggun Yudea tam nang ati nyapsine. Ninye mutuku sirya, im sirya nirya ara, anggun winiryuk si ati, ‘Anggunda, Allah arye pia epsukce, Eibuka Lyepdopsuk Nang,’ nyabuka, si kum sinamsiake. Tonda, Yerusalem mutuku ati ara, ninye nirya ara, amutuku ati, Allah arye, ‘Min batakuk mutuku,’ nyabuka, si sinamake. Allah arye, anggun Yudea tam Israel yala nang ati, aminyan winipnamuk ning ati, nyabuk.

Yesaya 5:16

Malye winin nang nirya wininamak bukni, nara kume. Nara Allah Yahweh, aning-aning eitam erebuka, mikip weik ununye, nara pia teleb pil dopnye deice arye, na si laka kipdeipnamne. Nara Allah arye, sik malye unyak nang nirya ati, diksukum kibuka, ninye yupu bokdeipnirye, sik malye winilamak touk, akunum wenepnyopura, yuk mutuku nang nirya eibikirye, ‘Se, Allah Yahweh ara, el siuk erenamabeʼ tenen, unamake. Aning atonun, na Allah ara, malye winin ning tonok babye winina kumce, pia diksukum piluk donamne deice arye, yuk mutuku nang nirya eibikirye, ‘Se, Allah Yahweh ara, elda dipkoprob diksukum un ninguk winilirye, Pia Telebnye ulule. ‘Elda malye un ning tonok babye, pia kum winiluleʼ tenen, moubuka bikinamyake. Aning nirya ara, laka kipdeipnamne.

Titus 2:14

Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.

2 Korintus 5:21

Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.

1 Korintus 1:30

Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.

Yesaya 35:9

Abisik dam ara, bai kam yu ning do, bai singa kuse yu ning do, ninye olamle ning aning-aning nirya ara, pia kum unamake. Amalye ning nirya pia abisik noutamak kum unamak bukni, Allah arye lyepdeibuk ninye uk abisik banamake.

Yesaya 35:10

Winibuka unamake ati, Allah Yahweh el tenelamukce, lyepdeiamuk ninyeuk, abisik bakirye, Sion mutuku tamubuka binamake. Sikce, ‘Yerusalem mutuku weknamap’ tenen, abisik banyak talak ara, sik nirya teleb aryuk kanye deibuka, Allah el si erena ati, mot nyanamake. Ikin kanye bona pia kum diparyuk, pin-pin kanye bobuka, pia unamake. Allah arye sikti, kanye bona deiyok ning arepliba, sik kanye talima pum tam arye, ‘Pia dipkoprob akunum upmasile’ tenen, kanye deibikirye, tonok kanyeuk bobuka unamake. ‘Se,’ tenen, teniltona ap, ikin kanye bona ap, ton pia kum unamake. Allah arye, aning-aning nirya kum kipdeipnamle. Nabi Yesaya birye nyabuk.

Yesaya 51:4

Ati ara, se, na mapu koprop atonun ululum nango! Anggun nirya ara, na nyapnusin yupu moubuka kekenamnulume! Tonda, narye wibuka akwamsise nang, ‘Naʼ tenen, nang ara, anggun moubuka kekepnululume! Anggunce na moubuka kekepnamnulum ning deiyok ara, ani. Ara, narye anggun nirya ati, ‘Aning wininamlume, aning ara, pia kum wininamlume,’ nyabuka, lak peterenamsine. Tonda, narye, ‘Diksukum una ning ara, ani. Pia teleb una ara, ani, malye ning ani,’ nyabuka, lak peterepnamsin yupu ara, ninye mutuku sirya, im sirya nirya ati melipnamne. Winipmanto ara, narye nyapnusin yupu ara, tukwak nang mutuku sirya, im sirya nirya unyak nang ati ara, sik weisa atonun upnamle. Aning kekebuka kel kibikirye, ‘E, teleb winin ning ara ani,’ tenen, moubuka kel biknamnyake. Na yupu arye anang nirya ara, dirina upliba dirina deiceuk, teleb unamake.

Yesaya 52:3

Wininamluma ara, talye ati kum nyapsine. Deiyok ara, na Allah Yahweh arye, na mapu anggunti nyapsine. Anggunda dekna kumce urdem arye dunubuka bobinamsik touk, na babye dekna kumce, talye diamuk lopdeipsinirye, lyepnamsine. Ara, dekna yo bok do, yuk mambul ning do, arena kumce, talye diamuk lyepnamsine.

Yesaya 54:14

Anggun mutuku ap, anggun Israel ninye ap talibikirye, ninye deiyok nang unamak nang ara, diksukumuk unamake. Anggun mal olan ninye ara, pera sukumuk unamake. Kum olyanganamsiyake. Wininamaka ati, anggunda talye kanye bobuka telebuk unamlume. Winibuka unamluma anya arye, ilil kum tenenamlulume.

Hosea 2:19

Na arye anggun dopropsinirye, pia ati, na kil atonun kipdeipnamsine. Ara, narye anggunti, dipkoprob kil dolamak atonun, kipnamsina deice arye, diksukum winin ninguk kipdeipsinyopura, telebuk unamlume. Tonda, narye teleb kipdeipsiniba, ninye nirya arye, yuk nang nirya ati, diksukum yupu uk nyabikirye, dipkoprob yupu uk, bokolilanamake. Tilila yupu ap, minina yupu ap ara, kum danamle. Tonda, na Allah arye, anggun Israel ninye ati, pia bico tenepsinirye, tuba-tuba melinamsine. Aning nirya ara, pia kum kum danamle. Pia ati, telebuk unamlulume.

Mika 6:5

Tonda, na mapu koproba, Israel ninyeo, anggunce akunum luba kiplum do? Anggun tuba tonap, moubuka tenepnululume. Ara, Moab mutuku ninye nirya taleamuknye, Balak birye, ‘Israel ninye nirya ati, wenepnirye opnamsine,’ tenepmasuk buk, Beor el mi Bileam biti yukubukba, yayukce, ‘Israel ninye luba kina meme,’ nyabuka morobuk bukni, Bileam birye, el dam yata yupu nyamuk do? Bileam birye, anggun Israel ninye ati, teleb yupu nyapsuk deice arye, telebuk upsuke. Tonda, minop talak Sitim mutuku arye batakuka, bisik balamlum ani, Gilgal mutuku noutam bilum talak ara, anggun melina ap, kel bikna ap ati, pil weik tonun dolamsise ning ara, akunum luba kiplum do? Kume, anggun Israel ninye ara, ‘Se, nun ni koproba, Allah Yahweh arye, nun lyena ati, pia dipkoprob mambul weik pil dosulul’ tenen, ‘Kel biknamlum’ tenen ati, narye weik mambul pil dolamsise ning ara, akunum luba kiplum do? Anggun aning nirya moubuka tenipdemunce, kel biknamlulume. Na Allah arye, dipkoprob lyepromsise.