Winibuka winilulum bukni, Allah arye ikin ning arepsiliba, anggun nong deice ikin ning yalyopura, anggun malye nyamunce, ‘Se, nun ni koproba Allah Yahweh, ance lyepsilyame,’ nyabuka morolulume. Malye nyamunce, “Se, na ni ance melibuka lyepsilyame,” nyabuka moronamlum bukni, Allah Yahweh arye, anggun moropnamlum ning ati, kekebuka kum lyepdopnamsile. Anggunce, Allah ati moropnamlum babye, pia kum kekenamsile. Deiyok ara, anggun malye winin ninguk, talibuka winimunya deice arye, pia bataknamsile. Winipnamsil talak ara, anggunce Allah ati, moronamlum ning nirya babye, pia kum kekenamsile.
Yesaya 1:15 - Eipomek15 Tonda, anggunce taruk erebuka, Allah moromunye ning babye, narye moubuka kum dilisunune. Anggunce, ‘Winibuka melipnamsil’ tenen, moronumunye ning ara, na kum kekesunune. Aning deiyok ara, anggun taruk deice ara, ninye ining weik upsuka ati, nyapsine. Gade chapit la |
Yesaya 1:15
36 Referans Kwoze
Aminyan talak, ikin ning weik anggun dam yalyopura, anggunce nati, “Se, nun melibuka lyepsilyame,” nyabuka moronamnulum bukni, nara, “Aunmana ati ara, melipnusine,” kum nyanamsine. Anggunce moropnamnulum yupu ati, kekepnirye tamubuka kum nyapnamsine. Tonda, anggunce nati, ‘Se, nunda pia weik kel bikna deiyok ning patasulula ati ara, dobuka kel kiptibye’ tenen, epra banamnulum bukni, pia kum eipnamnulume.
Nyabukba, Allah Yahweh arye, ayupu ton dukdongobuka nyabuk. Israel nang nirya ara, na yupu pia kum kekelamikce, aninguk talibuka, kum ulamika ati ara, na Allah arye, ‘Anggunda, na yupu kekepnululume!’ nyapdeiamsise talak ara, sikce na yupu kum kekelamnik touk, sikce nati, ‘Se, nun ni Allah melibuka lyepsilyame!’ nyabuka, morolamnik talak babye, narye anggun yupu pia kum kekelamsise. Na, Allah Yahweh, im deice yin talen malaikat nirya talibuka, sik weik deiyoknye ununye birye, nyapsine.
Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.
Raja Salomo birye ayupu nirya akunum nyabuka sirya dakukopura, aning ton winibuk. Israel ninye nirya bulubuka tikmeka urasin dam tikilyayuk. Tonda, Allah el si Yahweh ati, kam ning obuka, el si erena ati, arenmekak arye, pala keil yangapdeiamik dam tikukce, Salomo el taruk bitinye erebuka im deice dinmokce, ayupu dukdongobuka nyabukce, Allah morobuk.
Tonda, ‘Teleb unamlum’ tenepse ning ara, atia. Anggun din ning aupmasilyopura, bokukapmunce sik din kum nang ati bokuka arepnamlulume. Tonda, bona utotoa kum ati talye bisikak balsusulamak ninye ap, ninye asik nang ap ati, ‘Nun aik wekuka yamunyeba, nun ap din neika dibuka unamabe. Nun aik manna teleb uka,’ nyabuka unamlume. Tonda sik baju ongona kumce, nong banang uk ulamak nang ati, anggun baju bokukapmunce, melibuka arepnamlume. Tonda anggun kwit capu ap, anggun yala nang ap, aning-aning nirya pataplyopura, sikti, batakna kumce melibuka arepnamlume. Winipmunyopura, na Allah arye anggunti kanye delinamsine.
Ikin weik talye karin arye sik dam yalyeba, ilil pia weik unamake. Winipmanto ara, mek opnin yangalamle touk, ubuka yalirye, anang nirya ara, dobuka bobinamle. Lukunyan noutam ara, weik kumanya, talye karin arye dobuka yalirye, koulyamlye yo tobuka talye bobalamle touk, sik malye weik wininyak bona talin nang ara, adiparyuk atonun bobinamle.
Salomo birye Allah el si Yahweh ati, moron yupu nirya akunum nyapnin banmoka ani, sirya moropnuyuk talak ara, tuba tonap tikuke. Ara, Allah el si Yahweh, el arena ati pala keil taplakuka yangapdeipmek urasin dam, kutam tuku dipdongobukce, tikuke. Allah ati moronmok talak ara el taruk bitinye im tam erebuka moronmoke. Atalak ara, sirya dakdongobuka Allah ati morobuk.
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Yakub birye deibukba, dadeipdanin balamika ani, deibik ninye nirya ara, Allah el si Yahweh arye, ‘Sik malye wininyak ning ara na like’ tenen, balye tamubuka, akunum batakmasile. Bukni, ‘Nun ni Allah Yahweh, dan talak tamubuka melipnamsil do?’ tenen, diba tenebuka, dinauk unamne. Nara, ‘Allah elcuk melipsutu’ tenen, Allah atibuk, diba tenebuka, el dam anyuk banamne. ‘Yuk ning arye, ton melipnutue,’ tenebuka, kum unamne,” nabi Yesaya birye, nyabuk.
Ining ning obuka, Allah arena ati uku dongon talak, akunum kibukopura, na talima sukupmanuka ati bukmasak arye, na ongopmase deice baju ap, na amu ongopmase baju ap, akwilikmase ninguk ongobuka, na kutam tuku deice dipdongobuk buksirye, ‘Se, yata wiripnuyap do?’ tenen, na taruk erebuka, na ni Allah Yahweh ati moropse.
Musa birye tamubuka, Firaun biti nyabuk. “Na minopce amutuku weik kota noutamak arye binuka, yukak binirye, na taruk erebuka, narye Allah ati moropnyopura, liman ap, dekne duk-duka purwu mok ap, adiparyuk kum danamale. Winiplya deice arye, an kel biknamlame. Ara, ‘Diba mutuku-mutuku nirya ara, Allah el si ara Yahweh, elcuk talibuka ulule’ tenen, kel kipnamlame.
Sik anang ara, yupu mikip arye ngalukuka, Allah ati moronyaka babye, talye ati moronyake. Deiyok ara ani. Ara, Allah pia deice tam erebuka, aning-aning nirya talibuka, mikip weik deiyoknye birye, sikti, eibuka batakalule. Tonda kekebuka batakalule. Ara, sikce pia malye winin ning talibuka unyak atia.
Allah Yahweh el mikip deice arye, el mapu koproba, sik Israel yala kilapu ara, sik malye winilamik ning nirya ara, mek likna atonun kibuka, amalye ning kum kipdeipnamle. Winiplirye, pia teleb kipdeipnamle. Tonda, atalakuk, Yerusalem mutuku weik asik pum tam, ninye weik olamika deice arye, ining weik uamuk ning ara, mek likdeiplyeura, telebuk upnamle. Winipnamle ara, ninye yupu bokeiplirye, malye winin ning nirya, kum kipnamle talak ara, weik uku arye, talye ning diproplirye, sice bulamle touk upnamle. Winiplyopura, amutuku ara, pia telebuk upnamle.
Tonda, anggun din dina kum arye si tebuka unmalumce, nati moronululum talak ara, dipkoprob ning ton kum winilulume. Aning winimunye sum aniryuk anggun mining nanguk, weik tonun malye yupu nyabuka waldamunce, anggun malye taruk arye olana uk ululume. Winimunye ning ara, pia malye ululuma anya arye, anggunce moronululum ning ara, im deice ununa arye, pia kum kekenamsine. Anggun tenemunya ara, ‘Nun moronyap ning ara, Allah arye kekebuka arepnamsilca,’ tenelulum bukni, winibuka umunyopura, kekenamsin do? Kume, anggun morolulum ning ara, pia kum kekenamsine.
Nun pia malye weik wininyap bukni, nun noutamak arye anti ‘Se, na nio yanuka melipsilyame,’ nyabuka, tonoknye babye kum morokinyabe. Tonda nunce anti ‘Naio, talye lukparabuka opsutum bukni, bico tenepsutumce, lyepsutum’ tenen, kanye deipkibirye kum morokinyabe. Nunce anti pia kum morokenyaba anya arye, ance nunti, ‘Lik’ tenen, duknubuka donga karikisilyame. Tonda, nun malye-malye weik unyaba deice arye, bataksimince, ‘Dauplye, aninye ara, malyeuk daunamak’ tenen, batakasiminba, malye winin ninguk upra banyabe.
Na Yeremia lengdar mapsa deice arye kekelamsak, anang ara, kilapu mi deipnukca ati, mi deiyok dinmaliba, donmakce talak, ngalukulamak atonun unmikce, engenmikak kekepse. Sik ngalukna ara wel kil winiryuk mi deipnamlirye, uk dinmalyeba, ngaluklamak atonun unmikce, engenmikak kekepse. Akekepse ning nong ara, ani. Ara, sik Yerusalem mutuku unyak nang nirya ara, isin welebuka, ngosoklamak touk, nyabikirye engenamake. Sik amutuku unyak nang ara, taruk erebikirye, nyapnamake, “Se, nun amutuku unyap nang ara, ikin upsile. Ara, nun mal olan nang arye, opnusiake,” nyabuka, weik yupu arye ngalunamake. Nabi Yeremia birye nyabuk.
Aning ati ara, na Allah Yahweh arye, anggunti ayupu nyapsine. Ara, sik malye weik wininyak ning ati, menenga deknirye, ikin ning dobuka, sik deice deipyeba doropnamake. Winipnirye, sik deice aikin ning deipnamaka ara, kum lyepdanmanto upnamake. Aikin ning ara dipkoprob, sik nong deice yanuka dopropnamake. Sikce, nati, ‘Se, nun ni Allaho, ance nun dam yanuka lyepsutume,’ nyabuka moropnitingce, engeptinga babye, ayupu kum kekepnamsine. Anggun ti, kum lyepropnamsine.
“Se, Yeheskiel, anda ninye sirika arye deipkikba ulyame. Anda, sik ayanuka asipmakiyak nang ara, sik talima noutam nirya ara, talye ning isa si erenyak nang unyake. Anang ara, sik si erenyak ning dobuka, sik asing dinak deibikirye, tuba-tuba si erenyake. Amalye unyak ning deice arye, tuba malye winilinauk unyake. Winipmanto ara, ninye arye bisik banmanbuk, keil arye yan kisok duklyeba, sakuka poulbalamak touk unyake. Wininyaka ati, sikce nati yanuka asipdenetinga babye, yata deiyok ati, sik anang arye moropnamak yupu, kekepnamne do?
Tonda, sik tukwak nang yuk yala nang nirya ara, moubuka biknamake. ‘Ara, yu nang arye Israel nang obikce, tapu koubuka yuk pera mutuku bobinamika deiyok ning ara, yuk ning ton kume. Israel nang, sik kanye aryuk, Allah dam malye-malye weik ulamikce, narye nyalilamse yupu yanibuka, malye un ninguk talibuka ulamika ati, kanye imun ning, sik deice yayuke. ‘Ninye yuk-yuk nang nirya ara, aning tenebikirye, biknamake. Sik Israel nang arye malye ulamika ati, narye sik wenena ati akunum batakamsirye, sikti, kum kaleklamse. Ati, sik mal olan nang arye yanuka olamikce, yanibuka malye kilamik.
Sik Yehuda tam ninye ap, Israel ninye arye, ‘Nun ni koprop Allah ati arenamap’ tenen, sikce kambing ap, domba ap, sapi ap bobuka, Allah arenak banyake. Sikce, ‘Akam ning nirya obibirye bobuka, Allah Yahweh ati arepipyopura, elce melinamsil’ tenen, arelbenamak bukni, na Allah arye, ‘Telebe,’ tenepsinirye, kum dinamsine. Atonun anggunce ton kum eipnamnulume. Anggunce, ‘Allah arye lyepnamsil’ tenen, kanye deibuka, pil donamluma babye, na kanye kum delinamsine. Narye anggun nirya ati, akunum bataksinirye, anggun dam ara, pia kum unamne. Leipdopnamsine.”
Tonok ning ara, kanye talima erelakirye, ‘Yuk nang ara, nunti, sikda pia weik nang tenesinyake,’ tenelakirye, anang sik asing erebukabikirye, ninye kisok dup-dup diprebakiba, Allah el lik ulule. Bitinye ning ara, sitang deice arye tilila yupu nyanyak ninye ara, Allah el lik ulule. Winilye ning ara, deiyok ning ton kum upmalibuk, ninye sik taruk deice arye, oltakanyak ninye ara, Allah el lik ulule.
Piblisite