Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.
Yeremia 9:16 - Eipomek16 Dipkoprob anggun Israel nang ati, wenepnamsina ara, ani. Narye sik amutuku unyak nang ara, dobukapnirye, sik apu yapu nang babye, pia kum bikamik mutuku nang, yuk pera mutuku nang deice deipnamne. Ara, narye yuk pera mutuku nang ati, lo arepnyopura, anang arye, sik Israel nang dam yanuka obikirye, dobuka tapu koubikirye, sik yuk pera mutuku tamubuka bobinamake. Tonda, mal olan talak arye, ‘Se, nun nirya obuka, sice buklopnamsiak’ tenen, ilil weik upliba, bai sakuka bindobikirye, bokdanuka mutuku yuk-yuk balona ati, bikbik abuka banamake. Bukni, narye yin talin nang ton, tuba dobuka deipniba, Israel nang yuk pera mutuku dabinamak nang nirya ara, ninye on parang ya arye, obuka sirya daknamake. Ara, yin nang dopdeipniba, yanuka opnamaka ara, sik asa arye kum wininamake. Ara, Israel nang, sik wenena ati, na Allah arye mikip weik arepniba, adeice yuk mutuku yin talen nang arye, yanuka obuka sirya daknamake. Allah arye nyabuk. Gade chapit la |
Yeremia 9:16
29 Referans Kwoze
Winipmince, daulaminya ani, ‘Asum-asum ulye touk bukni, keting tamun 390 deice arye, Israel nang pera mutuku noutam arye, ikin unamak ning, tenebuka biknamakʼ tenen, anda like 390 sum deice arye, an kwanim tam taruk tuku deice mapdeipmaminya ani, atalak akunum uplyopura, winipnamlyame. An kisok potong, minop talak sekaminye ning bokuka, winilye bokdeipnamlam ning noutam bukni, tonok ning sepertiga ton dopropnulyame. Apotong dobuka, batu bata keil deice kintininyamlum gambar, Yerusalem mutuku gambar noutam deipmince, uku sekuka dongopnulyame. Winipminyopura, an potong sekamlum ning ara, sepertiga ton, Yerusalem mutuku gambar kintiniyamlum ning ara, dana-dana tam antanap dongobuka deipnulyame. An kisok potong sepertiga akunum deipminyopura, an parang ya dobuka, apotong deice akunum winipminyopura, lak kilina ati winipnalam bukni, el nong deiyok ara, ani. Ara, narye lo arepkiniba, Yerusalem mutuku nang, sik olan talak yin talin nang yakirye, parang ya arye opnamake. Tonda, an kisok potong min arye kopmaminye ning ara, sepertiga ton sirik ning ara, kum doplirye yamubuka dopkwetepminba, kum arye bobinamle. Winipnamlam ning ara, lak kilina ati ‘Wininalam bukni, aning el deiyok ara, ani. Ara, Israel nang arye, ‘Nun mal olan nang arye opsikirye, sirya daknamsiyakʼ tenen, bikbik abuka yukak binamaka babye, narye lo arepniba, sik mal olan nang arye, tuba olyanganamake. Sik Israel nang, pia weik tonun opnamake.
Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Aninguk kum bukni, anggun Israel nang arye, nati, ‘Elda nun like ati, elce nyapdeipsuk yupu ara, kum kekebuka talinamabe,’ teneplumce, na yupu tuba yaniplopnumunyopura, na Allah arye, anggun unamlum mutuku nirya ara, olana deiyok ning arepnyeba, yuk mutuku yu weik yin talen nang arye, sik parang ya ap, olan ning nirya ap bobikirye, anggun dam yanuka, obuka sirya daknamsiake. Obuka sirya daksikirye, anggun nirya tapu koupsikirye, anggun babye, pera mutuku bobinamsiake. Aning winipsikcopura, yuk pera lo mutuku yu nang arye, anggun Israel nang ara, dana-dana tam mutuku bobinamsiake. Atalak noutam ara, tonok mutuku ak, kum unamlume. Dipkoprob, malye kanye bonamlume. Malye kanye bopmunce, yuk mutuku ninye asik nang ulamak touk unamlum talak ara, anggun wa windam nirya babye, malye kipdeipnamsine. Tonda, anggun unamlum asik, weik kota mutuku nirya ara, batakmunyeba, talye louk uplyeura, dimbulanguk, walang yo uk upnamle ati, nyapsine.
Tonda, na Allah arye, anggun Israel yala nang ati, moubuka eipsinirye, tuba dinamsin bukni, ara, ‘Anang ati, teleb kilinamne,’ kum tenenamne. Aning kum bukni, narye anggun aululum nang ati, ‘Anang ati, malye kipdeipniba, ikin weik unamakʼ tenen, moubuka dinamsine. Ara, talye ati kum nyapsine. Anggun Yehuda mutuku, mince ulamlum bukni, amutuku batakuka, Mesir mutuku yanuka, wini talak unmalum nang ara, ikin kanye uk bobuka, ulamunya ani, anggun nirya ara, mal olan deice ap, uk weik arye dilirye, dakdongopdanin ban uk din deice arye, dipnamlume. Winibuka mitik ninye mitikto, dem kipnin banmamunya ani, sirya talak ara, anggun nirya, sirya dakmunyopura, kum danamsile. Atalak ara, anggun yalanye tonok babye, Mesir mutuku noutam, pia kum unamle.
Ura, sikce na yupu nyapdeiamse ning nirya ati, kum kekelamnika ati, sik dekna wenena ati winipse. Winipmanto ara, weik kumanya mikip yalirye, pu aplyeba, aning-aning bobuka, yuk mutuku dana-dana tam bobalamle touk, na mikip weik arye, sik Israel nang nirya ara, dobuka, yuk pera mutuku dopkwetepsiba, yu nang yanuka obikce, tapu koubukabikce, yuk pera mutuku noutam dabinuka deiamikba, ikinuk daulamike. Sikda, ninye asik nang atonun ulamika ati, sik mince kum bikamik mutuku nang kan-kan noutamuk, ikin kibuka daulamike. Narye winilamsa deice arye, anggun mutuku ara, min talak, pia telebuk ulamuk bukni, atalak noutam ara, yuk amutuku tuku noutam, pia teleb sukum tuku uamuk bukni, narye aning nirya ara, kum kipdeipsiba, anggun mutuku ara oldiamuk uamukba, amutuku noutam ara, ninye ton kum ulamikce, abinuka, oyanuka kum winilamikba, amutuku noutam nirya ara, pia malye dem upnin balamuk. Aning nirya ara, na Allah deice uka! Allah arye nyabuk. Allah arye nyabukba, nabi Zakaria kekebukce, sekdeibuk
Anang obuka, kum sirya dakse bukni, sik amutuku noutam ara, padang pasir mutuku tuba unmek talak arye, sikti, nyapse. Dipkoprob, na si deice arye, nyalin yupu arye nyapse. Ara, “Kume, anggun atalak ululum nang nirya ara, yakuka dopkwetepniba, mutuku sirya, im sirya nirya, dana-dana tam unyak nang noutam arye binuka, daunamlume. Yuk-yuk pera mutuku nang ap, neika unamlume. Narye dopkwetepsinyopura, anggunda dana-dana tam mutuku noutamuk, binuka unamlume. Tonok sukum neika kum unamlume,” nyapdeipse
Winiptu ura, telebe. Winipmanto ning ton nyapnune. Aning atonun, arup lak nyapmanu mutuku atonun uptopura, naryuk, “Amutuku noutam ara, ninye ona ati, yu yin nang dopdeipnyeura, amutuku noutam nirya ara, ninye nirya obuka, sirya daknamake. Ara, ninye nirya, sikce weinyak kam ning ap, talye bai tam kam ulye ning ap nirya ara, obuka sirya daktinge.
Ati ara, an Yeheskiel birye, nyabuka lak nyanamlyame. Nara, Allah Yahweh, aning-aning nirya talibuka, pia deice tam erebuka, Pia Mikip Weik Deiyoknye unirye, nyapsine. ‘Naʼ tenen, nang, sik Israel yala nang nirya ara, anggun yuk pera mutuku noutam, bobinuka deipyamsise nang ara, wini talak narye, sik anang nirya, yuk-yuk mutuku aulamlumak arye bulupdeipsine. Anggun tuba kam ululum Israel yala nang bobuka, anggunti areamsise mutuku koproba, Israel mutuku noutamuk yanuka, tamubuka deipnamsine.
Na Allah Yahweh arye, im deice unyak yin talin malaikat nirya sik deiyoknye unirye, anggunti ayupu nyapnusine. Dipkoprob amutuku tuba ululum nang nirya ati, ninye mal olan ning ap, din patan ning ap, tonda uk dina deiyok ning weik arepnyeba, uk yala dakdongopdanin ban ning ap, anggun Yehuda mutuku ululum nang deice deipnamsine. Narye akanye imun ning nirya dobuka, anggun nong deice deipyopura, anggun ikin weik asa unamluma ati winipmanto yupu ton nyapnusine. Ara, ninye arye kwarang duk dakuka, ‘Dipnuyapʼ tenen, dakikirye, deipmake bukni, lyubuka tong pia weik nyaliba, dipmanto kum upliba, anang arye ayo duk batakuka donoklamak touk, na Allah arye anggunti atonun winipnamsine.”
Na lengdar mapmasa talak ara, Allah arye na Yeremia biti, nyapnuk. “Ance amutuku-amutuku nang nirya ati, nyapnulyame. Anggunda, moubuka kekeplulume! Nara, Allah Yahweh, im deice unyak yin talin malaikat nirya, sik deiyoknye unune. Anggun Israel nang arye, ‘Nun ni koproba,’ nyabuka, na siuk erenululume. Nara, pia mikip weiknye birye nyapsine. Anggun nirya ara, na yu weik unulul ning ati, anggur mek dipmunyeba, anggun kanye wangabuka, dukna dukunamlume. Anggun kanye walwal upsiliba, tuku deice poupnamlume. Atalak ara, tonap kum bataknamlume. Ara, na Allah arye, anggun mutuku noutam nirya ara, mal olan ning dopropnamsine. Winipniba, yu nang yakirye, anggun aululum nang nirya ara, opsikiba dipnamlum ning ara, tonap tamubuka, kam kum buknamlume. Pia dibinauk upnamlume.
Aninguk kum bukni, narye, sik Yehuda mutuku ulamik nang, yuk-yuk mutuku binuka unamak mutuku noutam nirya ara, na Allah arye ninye olan ning deiyokuk arepnyeba, yuk nang ap olanauk wininamake. Tonda, din patan ning arepnyeba, din patana deiceuk unamake. Tonda, ‘Ninye weik tonun diptingʼ tenen, wenen ning, sik dam deipnyopura, sik weik tonun dipnamake. Winipnamne bukni, akunum winipnyopura, yuk-yuk mutuku noutam bukni, sik Yehuda mutuku unamak nang nirya ara, dibuka sirya daknamake. Winibikceba, minop talak, narye sik apu yapu nang ati, ‘Amutuku arepnamsine,’ nyalin yupu deice arye nyalamsa ani, amutuku anggunti arepsise mutuku ara, Yehuda yala nang, ninye tonok babye, tuba kum unamake. Sik nirya kum kipdeipnamnarya! Allah arye nyabukba, na Yeremia birye kekepsirye, asukum sekeipse.
Tonda, Allah arye nyabuk. “Sik Israel yala nang arye deibikiba, dadeipdanin banamak nang nirya ara, wenepnirye, bokuka yuk-yuk deipnirye, amutuku noutam arye yakniba, sik nirya ara, yuk-yuk mutuku noutam unyak nang kan-kan uk binuka unamake. Tonok teleb mutuku noutamuk, kum unamake,” nyapdeibuk. Winibuka ati ara, Allah arye sik Israel nang nirya bokukce, amutuku noutam arye yakuka, sikda yuk-yuk mutuku ulamik nang kan-kan donokukba, amutuku binuka, anang ap neika ulamik.
Anggun ap, anggun deiyoknye ap ara, Allah Yahweh arye bobuka, yuk mutuku nang unyakak ara, anggun walwal mutuku bobinamsiake. Tonda, anggun apu yapu nang babye, sik bikina kum mutuku bobinamsiake. Winipsiliba, amutuku noutam binuka umunce, amutuku nang sikce, keil ap, yo ap dobuka, ninye urasin atouk kibuka, ‘Nun ni aniʼ tenen, talye ning, isa si erelamik touk, anggun babye, atalye ning, isa si erenamlume.
Tonda, anggun ni koproba Allah Yahweh arye, nyapdeibuk yupu kum kekepmunce, batakmunyopura, elce anggun bataksiliba, anggun ona ati, yuk asik nang yakirye, obuka sirya daknamsiyake. Winipsikceura, anggunce anggun mal olan nang ati, ‘Optibyeʼ tenen, moubuka kalikmunce, tonok bisik arye kalikil binamlum bukni, anggun mal olan nang aryuk yakirye, opsiksiceba, ilil weik upsiliba, bikbik abuka, yuk-yuk tekbarye bisik, bokwalwalap danuka, bindopnamlume. Winipmunyopura, anggun mutuku dana-dana tam unyak nang arye, anggun malye winimunye ning eipsikirye, ‘Se, aning ara, dipkoprob, sikda malye winilamik deice arye winibukʼ tenen, sik kanye pum tam tenenamsiake.
Tonda, malye winipmunyopura, Allah el si Yahweh arye, anggun talye bataksilirye, amutuku noutam arye, yuk mutuku dopkwetepsiliba, anggunda mutuku-mutuku nirya unyak ninye noutamak binuka unamlume. Talye tikilyangan nang atonun unamlume. Yuk mutuku noutamak unamlum talak, ninye pia weika arye dipnamlum bukni, anggun yupa mitik tonun dem kam unamlume.
Anggun amutuku noutam ululum nang nirya ara, kekeplulume! Amutuku noutam nirya ara, dam arye do, pera arye do, dana-dana tam arye, na mutuku nang arye, malye nyabuka ngalukuka, engenyaka deice arye, sik asing mek sakalule. Sik weik arye engenmaka ara, nun nirya kekenyabe. Ati, anggunce, “Se, se, Yerusalem mutuku noutam ara, nun ni koproba Allah Yahweh, akunum bindobukce, asukum tuba kum ulul do? “Wini talak amutuku ara, ninye deiyoknye Raja kibuka talepsuknye, Allah ara, akunum batakuka bindopsuk do, kum do?” nyabuka asinyake. Nyaceba, ninye deiyoknye Allah arye, tamubuka nyapsile. “Se, yata deiyok ati, ‘Naʼ tenen, nang, sik Israel nang arye, talye ning, pia nong kum ning ati, ninye urasin atonun puturubuka deiamice, isa siuk erelamik ning ara, tuba erenyak do? Yata deiyok ati, yuk karin ninye asik nang arye, talye ning ati, si erenyak ning dobuka, yana deibikba, ‘Naʼ tenen, nang arye, aisa ati, ‘Nun ni ani,’ nyabuka, si erelamik ning ara, tuba wininyak do? Wininyaka ati ara, na yu weik upnukba, na talima uk pia dinulule,” Allah arye nyabuk.
Winipnalam talak ara, an weik mutuku dup welebana ati ikin upkilirye, ilil weik unamkile. Tonda an nong ara wiring-waring apdanin bamince, ‘Saknyak’ tenen, ilil weik unamkile. Tonda, an kul potong papkilye talak ara, yo kita oplirye, kurulamle touk upnamkile. Winipkilyopura, sul kwising dipnulye talak pol tengelamle touk unamkile. Pia wisi daminyopura, ‘Aminyan talak winipnamne, aning winipnamne,’ tenen ning ara, kum tenenalame. Aning atonun, ‘Kil ap neika maptinimnye,’ kum tenenalame. Aning nirya akunum upsilyeba, nun nirya ninye dibikirye wekelbanyak mutuku binamabe. Winibibiba sik kam tuba unamak nang arye, nunti tenekirye, weik bisikak nirya engepnin banamake.
Ati ara, na Allah arye nyapsine. Anggun Yerusalem mutuku ninye arye, ‘Se, nun malye unyabe,’ tenemunce, unamlume. Tonok ning ara, anggunce, ‘Nun malye wininyabe’ tenen, anggun kisok potong nirya, kobuka donoknamlume. Winipmunce, weik mutuku konak tikmunce, ngalukuka, malye nyapmunce, imun kanye bobuka, engena deice mot senamlume. Ara, urdem ati kume. Deiyok ara, anggun ni koprop Allah, el si Yahweh arye, anggun wini talak ululum ninye nirya ati, akunum bataknamasile. Anggunda, malye weik winiluluma deice arye, Allah el weik yu upliba, lik ati, anggun akunum bataknamasile. Anggun ti, tuba melibuka kum dinamsile. Anggun ti, akunum batakuka, luba kipnamsile.
Anggun malye weik winilamluma ati ara, nara Allah Yahweh, Pia Mikip Weik Deiyoknye unirye, im deice yin talin nang nirya talinunye bira, na Allah Yahweh aryuk nyapsine. Ara, weik asik dobikirye, anoutam bulubuka yupu wekenyak ninye nirya ara, engenauk unamake. Tonda, anyaik dobikce, anoutam banyak bisik nirya ara, sikce, ‘Se yata ning ati, malye ulamupu do?’ tenen, tenebikirye, sik kanye talima pia engenauk unamake. Sik nirya arye, ‘Se, wenepmasila ara, nun like,’ tenebikirye, malye yupu nyanamake. Sik kota mutuku noutam unyak ninye arye, bai tam talye wa wena deiyok nang yukubikiba, yacopura, “Sik ton neika engenamabe,” nyanamake. Tonda, sik engenman talak, weik kel bikamikce, mot senyak ninye ara, yukubikiba, yacopura, “Sikce ton, malye yupu nyabuka, sen mot ton nyabuka engeplulume,” nyanamake. Sik nirya ara, imun kanye bobuka unamaka ati, engenauk unamake.
Anggun erepdanuka kwalina deice arye winilamunyeura, narye ikin weik ning, anggun nong deice deipsiniba, dopropmunyopura, yuk ninye arye nyanamsiyake. “Kume, sikda teleb kibuka ulamikce, erepdanuka kwalilan nang bukni, wini talak ara, ikin ning dopropmake,” nyabuka, yep-yep nyapsikirye, malya kibuka, akutunamsiyake. Ton ning ara, sik akutunamsiak ninye arye, anggun malye winilulum nang ati, amot senamsiyake. “Sik malye weik winilamik ninye ara, Allah Yahweh, el mikip weik deice arye, sik ulamik mutuku nirya doprobuke. Aning atonun, sikce talibuka winilamik ning nirya ara, dalubuka doprobuke. Sik ulamik mutuku ap, sik talibuka winilamik ning ap, dalubuka doprobukce, sikti, ikin pil dibik nang ati, sik deice arebukba, wini talak ara, sik malye nang talilamik ning nirya ara, yuk ninye arye talinyake. Allah arye winibuka deice arye, sik malye weik winilamik ninye ara, ikin weik ning, sik nong deice delilule.” Nyabuka nyabikirye, sik bona kum ninye arye, sik bona utotoa talin nang ati, mot weibuka sepsikirye, akutunamsiyake.