Tonda, nun mal olan nang arye dolamik weik asik ara, ance akunum malye kibuka, sice bukloplume. Amutuku noutam ara, sikce keil memebuka taplakuka dolamik asik nirya ulubuka batakmunyeba, akeil nirya ara, talye tukwak deiplopmunyeba, aupnamle. Ati, anyasik dolamikak nirya ara, oldemuk upnamle. ‘Yu nang arye olyasikcakʼ tenen, mikip arye dolamik weik asik ara, akunum ulubuka dakloplume. Tonda, sik yuk pera mutuku yala nang arye, sik talibuka ulamuk ninye deiyoknye Raja arye malamuk aik ara, ulubuka daklopmunce, sice buklopbuka, kum kipdeipnamluma anya arye, anyasik ara, tuba ton ap lipsisikuka pia kum dopnamake.
Yeremia 9:11 - Eipomek11 Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk. Gade chapit la |
Yeremia 9:11
32 Referans Kwoze
Winipnyopura, sik Babel mutuku noutam ara, malye kibuka, sice buklopnyopura, asik oldem upnamle. Sik weik asik nirya, dakuka batakniba, sik domik asik keil nirya ara, tuku deice talye-talye deiplopniba, pia aupnamle. Narye, sik mutuku winibuka malye kipnyopura, bai tam kam ulamle kam arye, el duknun sukum kipdeipnamne. Winibuka deipnamne talak ara, sik Babel mutuku noutam unamle ning ara, yuk mutuku ninye arye, eibikirye, ‘Se, Allah arye, anang wenebuka obuka ara, weik mambuleʼ tenena ap, ilil una ap, unamle. Tonda, ninye tonoknye babye ton, amutuku noutam, pia kum unamake.
Wini talak anggun kekeplulume! Moubuka kekepmunce, anggun ton biknamlume. Weik lelim nyanmalak, kekenamaba ara ani. “Dabu tam arye (arah utara) unyak nang ara, kintinipmakirye, lelim weik nyanamake. ‘'Amutuku unyak yin talin nang arye, nun Yehuda tam unyap nang dam yakirye, nun weik asik dobuka, deiamupurye, aunyab mutuku nirya ara, yanuka kum kipdeipsikceba, din bulung unamabe. Tonda, amutuku nang ton pia kum upnamake. Nun mutuku nirya ara, asik oldem upnamsile. Winipyeura, nun mutuku ara, bai tam yu ulamle kam yanuka aunamake. Israel nang arye nyapnamake.
‘Nun mal olan nang yanuka opsikcakʼ tenen, cang weik keil arye domik asik nirya ara, takce-takce ning arye paplirye, anyasik nirya papnamle. Tonda, sikce keil arye kat asik dobuka ulamikak nirya babye, talye takce ning ap, yo mutmuta apuk, anyasik deice papnamle. Amutuku noutam ara, bai tam ulamle yu kam ap, sanip maka ap, bai basam apuk unamake.
Tonda, bai tam mutuku ulamle kam sisa, el si bai kam, ngalukna ap, bai kam atonun ning, sirigala nyalamak ning, sik aik pia teleb domikak wekuka ukirye, ngaluknauk unamake. Allah arye Babel mutuku dakuka bataklirye, sirya opnamle talak ara, akunum dam uple. Allah Yahweh arye, ‘Amutuku obuka sice buklopnamne,’ tenebuk talak, dipkoprob upnamle. ‘Amutuku tuba unamleʼ tenen, ninye arye yupu kum sektinge. Allah arye tenyamuk touk, amutuku kum kipdeipnalamlarya. Nabi Yesaya birye, nyabuka taruk piplubukce, anang nirya ati, wenebuk.
Ati, na nabi Mika birye nyapsine. Anggun weik malye winimunye ati, Sion mutuku ara, tuku palibuka, wa win dam atonun upnamle. Ara, Allah arye lo arepliba, Yerusalem mutuku noutam asik domik ning nirya ara, yuk mutuku nang arye yanuka, uluplobikiba, asik oldem upnamle. Winibikirye, Yerusalem mutuku noutam ulul asik nirya ara, uluplobikiba, sice butbuta atonun upnamle. Amutuku noutam dolamik asik nirya ara, kum danamle. Winiplyopura, aminyan talak yo mutmuta paplirye tiklyopura, talye bai mutuku atonun upnamle. Allah Yahweh, el si eren aik amutuku deice ulul bukni, aminyan talak, anyaik babye uluplobikiba, kum danamle. Amutuku deice ara, talye yo mutmuta palamla atonun upnamle. Na nabi Mika birye, anggun amutuku deiyok nang ati nyapsine.
Tonda, Allah arye, aning-aning nirya talilirye, pia mikip weiknye ulule. Elce, nun apu koproba Yakub, elce deibukba, dadeipdanin yangalamika ani, deibikba, Yehuda tam ulamik nang, amutuku noutam ulamik nang, sik aik dolamik ning ara, bico kum tenebukce, yu ubukura, sik aik tonok babye, ton kum batakuk. Sik aik nirya ulubuka, sice buklobuk. Ara, Allah el yu pia weik ubukura, uapsuka deice arye, amutuku asik dolamuburye ulamupak nirya ara, ulubuka bataksuke. Winipmanto ara, ninye arye, ‘Yu nang ati, malye kipsicak’ tenen, sik asik dana-dana tam, cang keil poka dobuka dolamik bukni, yin talin nang arye, aning nirya ulubuka bataklamaka touk, nunda teleb ulamupu bukni, Allah arye tonok aik babye, ton kum batakuk. Anirya ulubuka batakuk. Allah elce Yehuda yala ninye ati, ninye deiyok nang kibuka ulamik Raja nang ap, sik amu tam yuk-yuk pil ati, deiyok kibuka ulamik nang ap ati, nun amutuku nang nirya ati ara, ‘anggun malye,’ tenepsukce, amu kipdeipsuk.
Ara, na Allah Yahweh arye, ‘Winiplulume!’ nyabuka, yupu mikip arye nyapdeipnyopura, sik anang kekebikirye, anang ara, amutuku tamubuka yanamake. Ara, amutuku weik asik dolamlum ning, Yerusalem mutuku warikina ap, ninye ona ap, ukula dolona ap ati, tamubuka yanamake. Tonda, amutuku obuka doprobikirye, anyasik nirya uku dongopnamake. Aninguk kum bukni, na Allah arye, Yehuda mutuku noutam, weik asik dobuka unyakak nirya ara, mutuku kata atonun kiplopniba, oldem uplirye, ninye kum kum ulamne sukum atonun kipnamle. Na Allah Yahweh arye, ayupu akunum nyapmasina ati, aning ara, dipkoprob nong kipnamlarya, nyapsine!
Minop talak, Yehuda yala ninye ati, ninye deiyoknye kibuka taleamsuknye, el si ara Hizkia, elce taleamsuk talak noutamak ara, Allah yupu nyapdeipliba, laka nyananye, el si Mika, mutuku si Moresyet mutukunye birye, nyabuk. Atalak ara, nabi Mika birye, amutuku ulamik ninye ati, nyamuk. “Allah Yahweh, aning-aning nirya deice tam, weik erebuka ululnye birye, el yupu nyapdeipnukba, yanuka nyapsine. Allah Yahweh ara, aning-aning nirya talilule. Im deice yin talin malaikat nirya, sik weik deiyoknye ulule. Allah arye nyapdeipnuk yupu ara, ani. ‘Sion mutuku ara, wa win dam atonun upnamake. Tonda Yerusalem mutuku asik dobik ning ara, yu nang arye yanuka, uluplobikiba, asik oldemuk upnamle. Tonda, Allah el si erena ati domik aik, uluplobikiba, dauamlya ani, aminyan talak ara, amutuku dupak, talye palamle yo noutamak tiknamle. Anyasik uluplobikiba, talye aikuk upnamle atia.’ Allah arye nyapdeipnuk yupu nyapsine,” nabi Mika birye, nyabuk.
Deiyok ara ani. Anggun ululum mutuku nirya ara, na Allah arye namin kipdeipsinyopura, anggun mal olan nang arye, yanuka opsikirye, amutuku nirya malye kipdeipsikceba, sice buklopnamsiake. Winipsikcopura, anggun mutuku nirya ara, oldemuk upnamle. Mutuku kata sukumuk, ninye kum ulamikcak atonun upnamsile. Atalak ara, anggun Yerusalem mutuku ululum nang ap, anggun Yehuda mutuku nang ap, sik dana-dana tam unyak nang nirya ap ara, Raja Nebukadnesar birye, tapu koubuka, el mutuku, Babel mutuku binuka deipsilyeba, unamlum talak ara, keting tamun tujuhpuluh (70) tahun mapnamlume. Elce ikin pil disiliba, el amu tam umunce, el piluk donamlume.
Ninye si, Asaf birye, aMazmur mot yupu sekuk. Asaf birye, sekuk ning ara ani. Se, na ni Allaho, yuk pera mutuku nang ara, nun mutuku koproba yanuka, alubuka dopropmasiake. Ara, ance, ‘Israel nang ara, asukumuk pia aunamake,’ tenepsulumce, areamsulum mutuku ati nyapne. Anti diba kum tenenyak nang arye, an si erena ati, pia teleb lek aik ara, akunum weikikce, malye kipdeibik. Tonda, nun weik asik Yerusalem mutuku noutam nirya babye, obuka sirya dakikce, ulubuka sice buklopsikba, pia malye kiplobike.
Aning nirya winipnamlum bukni, nong kum upnamsila deiyok ara, anggunce Raja Omri ap, el mi Ahab ap, sik malye winilamdik ninguk talibuka, anggun babye, melibuka dobolbamunce, malyeuk winimunya ati, winipnamsine. Abitinye Raja nang arye, pia malye weik winilamdik touk, anggun wini talak ululum ninye babye, malye weik winiluluma anya arye, narye anggunti, wenepnamsine. Winipsinirye, anggun yala ninye nirya ara, pia malye kipdeipnamsine. Winipsinyopura, mutuku-mutuku nirya daunyak ninye eipsikirye, anggunti malye nyabuka nyalinamsiyake. Allah Yahweh arye, Israel ninye ati nyabuk.
Ati, na Allah Yahweh arye nyapsine. Samaria mutuku unyak ning nirya ara, dakuka bataklopniba, aik oldemuk upnamle. Tonok aik babye, ton kum bataknamne. Anyasik donyaka nirya daklopnirye, wa win dam atonun kiplopnamne. Tonda, amutuku nirya butbuta atonun kipdeipnamne. Tonda, amutuku noutam balamik bisik nirya ara, ninye arye anggur tapu duk wa wina ati, tuku palibuka, anggur tapu kounamake. Tonda, weik cang keil poka antanabuka domik ning nirya ara, daklopnirye, kum kipdeipnamne. Winipniba, aik oldem uplirye, oldem danamle. Winipnyopura, amutuku deice ubuk ning nirya bulubuka, tonok mutuku lyu utamuk, dopkwetepnamne. Winipnyopura, sikce keil poka ap, keil asik ap, domik ning nirya ara, amu tam deiamuk pala keil nirya ara, narye daklopniba, laka danamle. Anyasik nirya, pia weik keil deice domik bukni, akeil tuba aupmalye ning nirya ara, dakuka bataknamne.
Aninye arye, Yeremia tomobikce, mikip arye talibikopura, ayupu ton nyabik. “Anda weik mandipna kanye bopmalamce, Allah el si deice arye, ‘Yerusalem mutuku nirya ap, Israel yala ninye nirya ap, Allah el si eren aik ap ara, Allah arye malye ulinamsile. Ara, minop talak, Silo mutuku ulamik ninye wenebuka oplobuk touk, anggun amutuku ululum ninye babye, atonun upnamsile,’ nyapmasilam ning ara, yata deiyok ati do? Tonda ance, ‘Amutuku noutamak ara, yuk nang arye, obuka kum kipdeipsikiba, ninye ton kum unamake. Amutuku domunye asik nirya ara, asik oldemuk upnamsile,’ nyapmasilam ning ara, yata deiyok ati do? Nun kanye ara, ayupu nirya ara, talye nyamasilame, tenenyabe,” nyabik. Nyabikce, aunmek ninye nirya arye, yep-yep abuka malye nyanmekce, Yeremia el nong dana-dana tam bulubuka yayik. Ara, Yeremia unmokakuk, Allah el si eren aik dam, bulubuka yayik.
Ura, Allah el yu ati, anggur mek dibikiba, imun kanye bobuka unamak nang nirya ara, ani. Ara, weik asik Yerusalem mutuku unyak nang ap, Yehuda yala nang, sik mutuku unyak nang nirya ap, Yehuda mutuku noutam unyak Raja-Raja nang ap, tonda sik Raja-Raja amu tam pil dona deiyok-deiyok kibuka, unyak nang nirya ap ara, narye sikti, anggur mek arepnyopura, sikce dinamake. Anggur mek dibikcopura, sik mutuku-mutuku nirya ara, oldemuk upnamle. Ati ara, anggun mutuku urasin nirya ara, mutuku katauk kounyak ning koubikiba, teleb kibuka kum palamle touk, sik anang ap, sik mutuku nirya ara, pia malye upnamle. Pia malye kipdeiplyopura, yuk mutuku nang nirya arye, aning eibikirye, ‘Seʼ tenen, ilil upnamle. Yuk mutuku nang eibikirye, ‘Se, Allah arye, anang obuka, sice buklopmala ara, mambule. Allah arye amutuku nang akunum wenebukce subuke,’ tenebikirye, duk-duk abikirye, kum-kum dakanamake. Atalak ara, yuk mutuku nang nirya arye, Allah wenebuka opnamle nang ati, akutubuka nalibiceba, alye weik dakalanamake. Wini talak ayupu nyapmasin talak babye, aning akunum deiyok koubuka wininmale.
Bukni, na amu tam pil donyak nang, sikce nyanyak yupu ara, narye melipniba dipkoprob nong ulule. Aning atonun, narye wipdeipsiba, na nyanye yupu laka nyana deiyok nang, sik dipkoprob nabi nang ara, anang arye nyanyak yupu ara, narye melipniba dipkoprob nong ulule. Ati, na Allah Yahweh arye, “Yerusalem mutuku ati, minop talak ara, yu nang yanuka obuka sirya dakikba, amutuku batakamik bukni, ila tamubuka ‘Naʼ tenen, ninye tamubuka yakirye, Yerusalem mutuku noutam yanuka unamake,” nyabuka nyalinune. Tonda, “Yehuda tam noutam ulamik mutuku domik aik daklomik ning ara, tuba tonap tamubuka dopnamake,” nyabuka nyalinune. Yehuda mutuku noutam domik aik, yuk nang arye daklomikba, kum danamuk ning ara, naryuk lipsisikuka donamsine,” nyabuka nyalisunune.
Tonda el yala nang ap, Samaria mutuku yin deiyok nang ap nirya ati, binuka yupu bobiyukce, el mapu kekenmekak arye nyabuk. “Sik Yahudi nang mikip kum nang anya arye, yata tenebuka apil donmak do? Sikda walwal nang anya arye, Yerusalem asik buru tam keil poka ara, tuba tamubuka teleb ubuka keil deibuka dopting do? Tonda, adobikirye kam ning obuka, Allah el si erena ati, arenamak do? Apil nirya ara pia weik ati, like tonok sum arye, akunum sirya dakuka dopting do? Yerusalem asik ap, keil poka ap, yu nang arye uluplobikce, uku dongamik ning ara, tuba tamubuka teleb kipdeipting do? Kume, kum winiptinge,” nyabuka, nalibuka asipdeyuk.
El yupu ara, mikip weika arye ayupu nyabukba, kekepse. El yupu ara, ani. “Weik asik domika, el si ara Babel mutuku, aninye ati Allah arye malye kibuka oplopnule. Oploplirye, amutuku ap amutuku unyak ninye ap, amutuku noutamak, unyak isa nirya ap, Allah arye kum daneiplirye, sirya daknamle. Amutuku noutamak ara, isa ayala-yala nirya unyake. Tonda ninye unak kum ati, pia malye maka weik daunyake. Ara teleb wininyak nang arye, ‘Amaka yala nirya ara, pia malye maka anya arye, nun lik’ tenen, pia Kum dinyak maka yala nirya amutuku noutamak unyake.
Aninguk kum bukni, anggun unamlum mutuku nirya ara, naryuk pia malye kipdeipnamne. Awinipnyeba, aminyan talak, anggun mal olan nang arye, ‘Israel nang obuka sirya daknamapʼ tenen, anggun mening dam yacopura, narye anggun mutuku malye kipdeipnamsinak ara, eibikirye, ‘Se, amutuku ara, pia malye akunum upmale. Yata deiyok ati, upmal do?’ tenen, mambul kanye bobikirye, ‘Se, nun like,’ tenebuka lukuldanamake.
Tonda, nun kanye talima noutam ara, anti tenebibirye, nun amyok kanudongobuka, yuk tam kum banyabe. An tonok ati, diba tuba tenekinyabe. Tonda, an Allah arye, “Aning wininamlume, aning ara, pia kum wininamlume. Teleb diksukum winina ara ani, malye winin ning ara, ani,” nyapdeiamsulum yupu ara, nunce kum batakanyabe. An bisik ara batakuka, yuk talye bisik parapkabuka, kum banyabe.
Nyabukce, ayupu ton nyabuk. “Ara, na Allah arye utam unyak ninye ap, sik weik deiyok nang ap, sikti, yukupniba, yanamak talak ara, na mikip sik deice arepnibuk, aninye mikip weik deice yakirye, Yerusalem mutuku nirya yanuka, alabuka doprobikirye unamake. Aninye deiyok nang nirya arye, sik ninye deiyok nang bulamak ning bobuka, Yerusalem mutuku weik cang keil poka dobuka, antanap dongobik poka dam deipnamake. Ara, apoka bublan mikip kipdeibikce, wekelbace bisik bublan dam ara, sik bulamak ning deipnamake. Winibikirye, sik nirya arye, Yehuda mutuku noutamak asik donyak mutuku nirya ap, amutuku unyak ninye ap, akeil deibuka dobik ning ap ara, sik ayanamak yu ninye aryuk, yanuka alapdobikirye unamake. Wininamak talak ara, amutuku nirya ati, malya kipnamake.
Israel nang arye, ‘Nun ni koproba,’ nyabuka, sikce si erenyak Allah ara, na Yahweh arye nyapsine. Nara, im deice unyak yin talin malaikat nirya ara, sik deiyoknye ununa ati, na mikip weiknye birye nyapsine. Ura, anggun nirya moubuka tenipnamlume! Yerusalem mutuku ap, Yehuda mutuku noutam unyak nang nirya, sik asik dobuka unyak mutuku nirya ara, narye sik wenena ati, ikin ning arepsiba, imun kanye bobuka unyaka ara, anggun ton akunum elilulume. Wini talak ara, anggunce, amutuku tenipnamlume. Sik wenena ati, lo arepsiba, sik yuk mutuku yu nang arye, yanamikce, Yerusalem ap, Yehuda mutuku weik asik dobuka ulamik mutuku nirya ara, ulubukabikce, malye kibuka oplobikba, ton nang dibik, ton nang bobinamik. Ati ara, anggun mutuku koproba ara, oldemuk ulule. Ninye ton amutuku noutam kum unyake. Aning ara, na Allah arye ikin ning dobuka, sik deice deipseba, anggunce akunum eibuka biknamlume.
Winipnyopura, Hasor mutuku noutam nirya ara, amutuku nang opniba, kum dakcopura, sik mutuku ara, pia ati louk ubuka, oldem upnamle. Winiplyopura, amutuku noutam nirya ara, bai ulye kam dungnuna ati, amutuku uk yanuka unamle. Winipnamne mutuku noutam ara, ninye tonoknye babye, ton pia kum unamle. ‘Amutuku tuku babye, pia malye kipdeipnamne. “Nara, Allah Yahweh arye, akunum nyapdeipmana ati, aning ara, nong kunupnamle!” Allah arye nyabuk.
Aning nirya ara, talye ati kum nyapsine. Na Allah arye winipnyopura, utara, dabu tam arye, tonok mutuku yu nang ton yakirye, Babel mutuku noutam nirya warikilyanamake. Warikikirye, Babel mutuku noutam ubuk ning nirya ara, kum kipdeibikcopura, sik mutuku babye, pia malye dem upnamle. Narye anggun mutuku nirya, malye kipdeipnyopura, anoutam nirya ara, ninye ap, talye kam ulye ning nirya ara, bikbik abuka bindopnamake. Tonda, amutuku noutam nirya ara, ton pia kum unamake. Amutuku nirya ol dem upnamle. Allah arye, “Yuk mutuku nang yukupniba, Babel mutuku yanuka, amutuku nirya ara, sice buklopnamake,” nyabukba, na Yeremia birye ayupu sekdeipse.
Tonda, pia weik sum akunum dam uplye talak ara, ninye tonoknye babye, nun ni Allah, el aik dam kum yangalula atonun, ‘Sik mot nyanamak’ tenen, wipdeibik kam ninye nirya ara, malye kanye bobuka unyake. Tonda, Allah el aik siltong ning dobuka yayukba, uku dongonyak nang, sik imam-imam nang babye, ‘Se’ tenen, unyake. Sion mutuku weik bisik bublan noutamak, tonoknye tikuknye birye, pia bico kum tenepnamsile.
Allah arye ikin ning weik areplyopura, amutuku noutam unamak nang, sik wa winak teleb tuku nirya ara, tuku miklirye, kata dem kipnamle. Tonda, tong weik nyalamle ning, el si belerang ap, garam ap, weik tonun arenamle. Adeice arye, anggun wa tuku nirya ara, sice butbuta arye, atuku deice lipdongoplyeura, malye kinamsile. Aning deice arye, tuku malye uplye ning ara, atuku deice koupnamak ning nirya, kum papnamle. Tonda, tuku deice papmanto mutmuta babye, kum papnamle. Ara min talak Allah el yu weik ubukba, Sodom ap, Gomora mutuku ap, Adma mutuku ap, tonda Seboim mutuku ap nirya ara, kum kipdeiamuk touk, anggun unamlum mutuku babye, kum kipdeipnamsile.
Yatanye do, weik kel bikna deice arye, pia moubuka kel kipmantonye bira, anyapman yupu nirya teneplirye, moubuka kel kipnamle. Tonda, el anye birye, ‘Allah ara, dipkoprob aulule. Allah Yahweh arye, nun tukwak ninye ati, weik arye bico tenesilya ara, pia kum kum danamle’ tenen, moubuka tenenamle. Daud birye, ayupu nyabuk.
Ati, narye asipdene. Yata deiyok arye winibukba, na mutuku nang ara, wini talak babye, tuba uk dilul ning ara, min kum kwetep deipmanto ulul do? Tonda, ‘Gilead mutuku noutam ara, ninye kwetena kelnye tonok ning babye, kum ulirye, suse kwetepmanto ning ton kum ulul do? Tonda, yata deiyok ati, na tam nang, ikin weik unyaka noutam ara, Allah arye min kum lyepsukce, tamubuka teleb kum kipdeipsuk do?’ tenebuka nyanune. Nabi Yeremia birye nyabuk.
Ura, an Yeremia birye, anyapmakin yupu bobuka, amutuku nang sik kekenak binuka nyapminyopura, ayupu kekebikirye, sikce tamubuka asipdenamkiake. “Se, yata deiyok ati, Allah arye nun wenena ati, ikin weik ning dobuka, nun deice deipnamsil do? Tonda, yata malye winin ning winibupu ati, Allah arye wenepnamsil do? Tonda, yata malye winin ning ton, nunce, nun ni koproba Allah dam, yata malye wininyap do?” nyabuka, an Yeremia biti asipnamkiake.
Piblisite