Yeremia 6:16 - Eipomek

¹⁶ Aning ati ara, Allah el si Yahweh arye, el mapu koprop Israel yala ninye ati, nyabuk. “Anggunda bisik kwak tikmunce, asipdenamlume. ‘Abisik binuyab do? Abisik binuyab do?’ tenen, moubuka tenipmunyeura, ‘Min talak nun apu yapu arye, balamik teleb bisik dan do?’ tenen, moubuka asipdamunce, tenipnamlulume. Teleb bisik akunum eipmunyeura, abisikuk dobolbalulume. Winipmunyaura, anggun ikin kanye bona kum diparyuk, kanye deibuka, telebuk kam wininamlume. Na Allah arye, Israel ninye ati nyapse bukni, sikce, ‘Abisik teleb upmatu babye, abisik ara, pia kum banamabe,’ nyabuka, bataknik.

Yeremia 6:16 Referans Kwoze

Yesaya 30:21

Atalak noutam ara, anggun nirya ara, bisik banmamunce, walwalapdamunye talak ara, anggun balye tam arye do, anggun urasin tam arye do, dibuka kekepmunyopura, Allah arye anggunti, “Teleb banumunye bisik ara atia, abisikuk melibuka banamlume,” nyabuka lak nyapnamsile. Ati el yupu nyapliba, kekenamlume.

Yeremia 18:15

Ara, na Allah arye wipdeiamse ninye, ‘Naʼ tenen nang, Israel ninye nirya arye, nati akunum batakalongoninyake. Wininyakce, talye ning ati, ‘Nun ni koproba anye,’ nyabuka, dipkoprob kum melipmanto ning bukni, sik nirya arye, Isa Mutuku Dongonye siuk kibuka, si erenyakce, siltong teleb ning ap, kam ning ap dobuka, uku danyake. Minop talak, narye sikti, ‘Abisik teleb ubuka banalyame,’ nyabuka, peterelamse bisik ara, batakuka, talye malye winin bisikuk banyake. Winipmanto ara, weik karayong bisik, diksukumuk una ati, teleb bisik yabuka deiamse ning batakuka, talye bai tam kwalin bisikuk banyake.

Ulangan 32:7

Ati ara, minop talak anggun nong ninye winilamik ning, tuba tonap tenilenamlulume. Minop talak ulamik ninye ati, tenilenamlulume. Tonda, anggun kel kina ati, anggun ni yapu ap, sik wisi-wisi nang ap, ulamik talak Allah arye pil dolamuk ning ati, asipdemunba, sikce laka nyapnamsiake.

Yeremia 7:23

Atalak ara, narye anggun apu yapu melibuka boyangalamsirye, nyapse yupu ara, ani. Nara, anggun ni koproba Allah ununa anya arye, narye nyasinye yupu uk kekepmunce, moubuka talinamlume. Narye nyasinye yupu talibuka winimunyeura, narye anggunti, pia melinamsine. Adeice arye, ‘Anggunda, na mapu koprop unamlume,’ nyalamse. Tonda, narye anggunti, “Abisik binamlume, abisik kum binamlume. Aninguk wininamlulume. Aning ara, pia kum wininamlume,” nyabuka nyalilamse yupu, ‘Dipkoprop ninguk winipmunyopura, anggun wininamlum ning nirya ara, telebuk unamsile,’ nyalamse. Na Allah arye, anggun apu yapu ati, ayupu uk nyalamse. Winilamsi buk, ayupu kekebuka yangalamik talak ara, pia telebuk winipnin yangalamik.

Kolose 2:6

Ura, ‘Yesus Kristus ara, nun weik deiyoknye unamsil’ tenen, elti, dib tenelalumura, el ap, talima dukdongopsuka atonun, wini talak babye, Kristus dib tenepmunce, el ap talima dukdongopmunce, el yupu nyasilye touk pia diksukumuk unamlume. ‘Yesus Kristus elda, nun Weik Deiyoknye pia unamsile’ tenen, el yupu uk kekenamlulume.

Yesaya 2:5

Ati, se, Yakub birye deibukba, dadeipdanin yangalamlum ninye nirya ara, yamunba, nun nirya Allah el dirin deiceuk, talibuka unamabe.

Yohanes 12:35

Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.

Yeremia 18:12

Nyabukce, ayupu ton nyabuk. Ance anyapman yupu binuka, nyapnalam bukni, sik aninye arye, tamubuka nyanamkiyake. ‘Kume, ance nyapsilam yupu ara, kum kekepnamkiyabe. Yata deiyok ati, anyapmasilam ning ara, kekebuka wininamap do? Nunda nun bidamnye tenenyap ninguk wininamaba. Tonda, nun mandipna kanye bobuka, weik unyap ninye anya arye, nun bidamnye tenebibye touk, adiparyuk, nun yuk-yuk malye wininamabe,’ nyapnamkiyake. Allah arye nyabuk.

Yeremia 22:21

Anggun tuba pia telebuk wininmalum talak, aning-aning nirya talibuka, kanye deibuka, telebuk wininmalum talak ara, na Allah arye, ‘Anggunda kanye mouplulume! Malye winin ning ara, bataknamlume,’ nyabuka, akunum yanuka nyapsisirye, wenen yupu nyapdeiamsise. Bukni, anggunce, na yupu kum kekamnulume. Anggun minop talak arye, winipnin yangalamlum touk, wini talak babye, aninguk tuba winilulume. Anggunce, ‘Allah ara, dipkoprob nyasulule,’ kum tenelulume.

Yeremia 44:16

Kume, ance nunti, Allah Yahweh el si deice arye nyapmasilam yupu ara, nunce, ‘E, dib nyapmasileʼ tenen, kum kekepnamabe.

Ibrani 11:2

Nun apu yapu arye Allah ati, weik arye diba tenenlamikba, Allah arye sikti, kanye deiyamuka deice arye, teleb updeiyamukce, ‘Anang ara, na dokola ninye unamak,’ tenebuke.

Yohanes 13:17

Na Yesus ara, weik mambulnye unun bukni, arup ilikmasin atonun, ‘Anggunda na dong tam ululum ninye arye atonun wininamlum’ tenen, nyapsine. Winira, aning nirya akunum kekenmaluma anya arye, dipkoprop anyapmasin touk winimunyopura, Allah arye melibuka teleb ulinamsile. Yesus arye nyabuk.

Maleaki 4:4

Ati ara, na amu tam ulamukce, na pil dolamuknye Musa elda, na ap, Sinai mutuku deice epdanumurye, narye elti, ‘Israel ninye ara, aning wininamake, aning ara, kum wininamake,’ nyapdeiamsiba, sekamukce peterelamsuk ning ara, moubuka tenepmunce, aninguk talibuka unamlulume. Ara, na mapu anggun Israel ninye ayala-ayala nirya ati, nyapdeiamse yupu nyapsine.

Ibrani 6:12

Nunce anggunti, ‘Sikda lik uplyeba, pil nirya batakuka, talya-talyauk winipmunyak’ tenen, kanye moubuka unamlulume, nyasinyabe. Aning ara kum bukni, ton nang ara, diba tenena ap, minyuma batakna kum arye, pia pi dobuka, pil dona ap deice arye, pil dopra balamikca ani, aminyan talak, ‘Allah arye nyalilamuk ning dipkoprop dololamak touk, anggun atalak ululum ninye babye, anggun ton dopropnamlulum’ tenen, nyapsine.

Yesaya 8:20

Anggun ton moubuka tenipnululume. Allah arye, nati nyapnukba, sekeipmasin yupu atonun, tenibuka kum nyanyak nang nirya ara, talye nong yokuk unyake. Dan nang do nirya, na sekeipmasin yupu atonun tenebuka, kum nyanyak nang nirya ara, aminyan talak sikda dirina ak kum unamake. Sik nirya ara, dipkoprob kum winipnamake.

Lukas 16:29

Nyabukura, Abraham arye tamubuka nyabuk. “Kume, Allah arye, ‘Wininamlume, aning ara kum wininamlume,’ nyabukba, Musa arye sekamuk yupu ap, Allah yupu laka nyalamik nang, nabi-nabi nang arye sekamik yupu ap, aupmal ati, ayupu uk kekeptinge,” Abraham arye nyabuk.

Yesaya 28:12

Minop talak ara, na Allah arye anggunti, nyalamsise. ‘Anggun dikdik sena ati, pia teleb mutuku akunum kintinip deipmasine. Mikip kumce, mitang asa umunye nang ara, asukumuk dikdik sebuka unamlume.’ Ayupu ara, narye nyalamsise bukni, anggunce na yupu kum kekelamnulume.

Yohanes 5:39

Allah arye nyapdeiamukba, seklamik yupu buku nirya ara, anggunce, ‘Kume, ayupu kel bikibirye, moubuka talibibya deice arye, pia kam una deiyok ning dopropnamabe’ tenen, ayupu nirya weik arye, moubuka kel kilulume. Bukni, ayupu seklamik nirya ara, dipkoprop nati lak nyanulul ning ara, moubuka dib kum tenelulume.

Rasul 17:11

Berea mutuku ninye ara, sik Tesalonika ninye mitik teleb ulamika atonun kum ulamik. Sik Berea mutuku ninye ara, Pia telebuk ulamik. Sik talima kintinibuka deililamikce, Paulus arye laka peterebuk yupu teleb kibuka kekelamik. Pia kanye deibuka kekelamikce, ‘Paulus nyanmasil yupu ara, pia dipkoprop do, kum do?’ tenelamikce, asum-asum nirya sik Allah yupu buku doprobik akarye wibuka deililamik.

Roma 4:12

Aning atonun, nun Yahudi yala ninye babye, nun apu kopropa Abraham arye den bam bol sekna pil min kum doprobuk talak bukni, Allah ati weik arye diba tenyamuk touk, nun babye diba tenebibyopura, dipkoprop, “Nun apu kopropa Abraham usulule,” nyaptibye. Den bam bol sekenyap ning awamsilya babye, aning ara nong bol deice ninguk ulula ati, aning ara weik mambul kume.

Yeremia 2:25

Ati Israel ninyeo, anggunda bikbik abuka kwemdina, Isa Mutuku Dongonye si erenak ati, pia epra bana uk umunyopura, ikin weik unamsile. Winipmanto, pia bikbik abuka balamak nang, sik yan uk dilamliba, aik bulamak touk, upnamlume. Tonda mek patana pia weik patalamle touk ululume. Ara, talye Isa Mutuku Dongonye si tuba eremunyopura, ikin weik unamsile. Ikin upsilye talak atibuk, anggunce nyalulume. ‘Kume, aisa atibuk si akunum erenyaba anya arye, pia tuba kanye deibuka, aisa si erenamapa ati, kum bataktibye. Anggun uk melibuka dobolbanamabe,’ nyalulume. Allah arye, Israel ninye ati nyabuka wenebuk.

1 Raja-Raja 8:36

Winibikcopura, an im deice arye kekepmince, ‘Israel nang sik malye winin ning nirya ati namin kipmince, lyepnamlam’ tenen, moropkine. Winipmince, ancuk sikti, ara, ‘Teleb bisik ara ani, teleb wininamlum ning ara, ani,’ nyapminba, sik abisikuk dukdongobuka banamake. Winibikiba, ance nunti, ‘Amutuku talibuka upnamak’ tenen, areamsulum mutuku, amutuku deice arye, ‘Mok arepsiminyeba, pia cenamsil’ tenen, moropkine.”

Mazmur 116:7

Allah el si Yahweh arye, akunum melipnuka ati, na kanye talima lamapdongobuka arye, el amu tamuk unamne. Ati winipnirye, pia kum teniltonamne.

Yeremia 12:16

Winipnyopura, sik dana-dana tam unyak yuk-yuk yala nang, yuk mutuku unyak nang nirya, sik talima noutam arye, moubuka tenebikirye, na mapu koproba, sik Israel nang, sikce nati, si erenikirye, teleb kibuka unyakce, dipkoprob bisik balamak touk, bikikcopura, ayuk-yuk yala nang babye, teleb kipdeipnamne. Ara, na mapu koproba, ‘Naʼ tenen nang arye, ‘Nun ni koproba Allah Yahweh, el si deice aryuk wininamabe,’ nyalin yupu arye nyapne touk, sik yuk yala nang arye, aning bikikirye, talibuka winibikopura, narye anang babye melinamne. Tonda, sik yuk-yuk yala nang arye, minop talak, na mapu koproba, Israel nang ati, ‘Nun ni koproba isa Bahal, el si deice aryuk nyalin yupu nyanamlume. Eluk talibuka unamlume,’ nyabuka petelamik touk, sikce isa Bahal batakikirye, na siuk erepnikcopura, ayuk yala nang babye melinamnarya. Ara, sik nirya arye, “Allah Yahweh anda, kam una deiyoknye pia ulyame,” nyapnamniake. Nyapnikirye, na siuk erepnikcopura, narye sik anang babye, na mapu Israel nang kan-kan uk, boyanuka tabakdeipniba, neika unamake.

Yeremia 31:21

Nyabukce, ayupu ton nyabuk. “Anggun balamunye bisik nirya ara, lak lelin ning ati, yo bata cepdeipnamlume. Winipmunce, anggun minop talak yangalalum bisik ara, ‘Dan bisik arye yanamupu do?’ tenen, moubuka teninamlume. Ara, aning moubuka kel bikamunyopura, anggun Israel ninye nirya ara, na kanye deilin kil atonun ululuma anya arye, anggun minop ulamlum mutuku uk tamubuka, yanuka unamlume, nyapsine.”

Yeremia 42:3

Nun patapsila ati, moropkiap ning ara, Allah Yahweh ati moropnusilyame. Moropsiminba, elce nunti, ‘Sikda amutuku bina unyake,’ nyapsilye touk, amutuku binamabe. Tonda, elce, “Aninguk wininamake,” nyapsilye touk, aning kekebibirye, aninguk wininamabe,” nyabuka, laka nyabik.

Yeremia 50:5

Sik anang ara, ‘Nun mutuku tamubuka binuyabʼ tenen, bisik banmakcak arye, aulamice nang ak, ‘Sion mutuku balamak bisik ara, dan sukum ubuk do? Anggun ton laka nyapsutum do?’ nyabuka, asipnamake. Asibikiba, ‘Sion mutuku balamak bisik ara, ani,’ nyabuka, laka nyabikcopura, sik Israel yala nang nirya ara, abisik eibikirye, abinamake. Winipnamak talak ara, sik anang arye, ‘Allah Yahweh ap, nun ap neika pia unamabeʼ tenen, narye, “Aning ara, wininamlume, aning ara pia kum wininamlume. Na yupu moubuka kekepnumunyopura, narye pia teleb kipdeipnamsine,” nyabuka, nyalin yupu deice arye, akunum nyapnyopura, anyapdeipnamne ning ara, sik anang arye, luba kum kipmanake. Sikce, ‘Diba ance nyapmasilam ning ara, pia moubuka talibibirye, wininamabe,’ nyabuka, nyalin yupu arye nyanamake.

Hakim-Hakim 2:17

Allah arye winibuka meliamukba, elce areamuk deiyok nang arye, Israel ninye lyebuka miliamik bukni, sik Israel ninye arye anang ati, sik yupu kum kekelamikce, tuba tamubuka tonap anang ati bataklamik. Sik deiyok nang bataklamika atouk, sik ni koproba Allah ati bataklamikce, yuk isa si erena ati, gutam tuku dipdongobukapna arye, isa si talibuka si erelamik. Minop talak ara, sik apu yapu, Allah el si Yahweh arye, ‘Aning ara wininamlulume, aning ara kum wininamlulume,’ nyapdeiamuk yupu kekebuka, diksukum bisikuk upra balamik bukni, atalak ulamik ninye ara, sik atonun kum winilamik. Sik aninye ara, sik apu yapu diksukum bisik balamik atonun kum winilamikce, malye-malyeuk winipra balamik. Winipna arye, Allah el yupu batakikce kum kekebuka dobolbalamik. Malye-malye diamuk winipra balamik.

2 Tawarikh 19:11

Tonda, sik imam-imam nang, sik weik deiyoknye, el si Amarya ara, anggun deice tam deiyoknye unamsile. Yata winin ning do nirya, Allah Yahweh el dam yupu lipsisikuka bokolinalamlum ning nirya ara, anye birye melinamsile. Aning atouk, amutuku taleamuk deiyoknye, Raja biti aning nirya ara, Yehuda yala nang, sik deiyoknye Zebaja, elce anggun deiyoknye uplirye, melinamsile. Zebaja el li bira, Ismael ulamuk. Tonda, sik Lewi yala nang arye, sik deice tam kina ati, sik deiyok nang atonun unamsiyake. Sikce talipsikcak arye, ‘Aning ara winipnulume nyan yupu ara nyanamsiake. Ati ara, narye sik yupu bokolina deiyok nang wibuka deipmasin nang nirya ara, Ilil una kumce, anggunce kanye talima eren deice, mikip weik arye apil talebuka unamlume. Teleb kibuka umunyeura, aning winibikce nang ati, Allah Yahweh ara, anggun ap neika unamlume. Elce anggun kanye talima noutam arye melinamsile.” Yosafat birye, sik Yudea tam yupu lipsisikuka bokolina deiyok nang ati nyabuk.

Yesaya 46:9

Ara, minop talak na Allah arye pil dolamseba, winipra yangalamuk ning tuba tonap, aning nirya moubuka tenepmunce, kel kinamlulume. Winipmunce, ‘Allah ara el tonok ulule. Elcuk aning nirya winyamuk’ tenen, na siuk kel kipnumunce, erenamnulume. Ara, na ununa atonye bira, yuk Allah ton kum ulule. Na tonok unune,” Allah arye nyabuk.

Yesaya 57:2

Akunum dibice nang ara, sikda teleb aryuk, dikdik selbanyak ati, ikin kumce, teleb ukirye, talye kanye bobuka, tunim abuka unamake. Yata nang do nirya, sikda, Allah arye, ‘Aning ara wininamlume, aning ara pia kum wininamlume,’ nyasilye yupu moubuka talibikirye, diksukumuk unyak nang ara, ikin kanye bona ap, kanye tenina ap pia kumce teleb ukirye, sik mapmace talak ara, sik amsuna deice arye, dikdik sebikirye, teleb kibuka manyake.

Yeremia 7:3

Ayupu nyapdeipsilanye bira, Israel ninye ati kalikuka melilulnye, anggun ni koproba Allah, mikip weik ulirye, aning-aning nirya talibuka deice tam, Weik Erenanye birye nyapsile. Elda, im deice unyak yin talin malaikat nirya talibuka, sik weik deiyoknye ulule. Elce nyapsile. Anggunce malye-malye weik winilulum ning nirya batakmunce, telebuk winimunyopura, anggun ap, na ap anyaik ansinipdabirye, teleb ubuka neika utibye. Kumopura, kume.

Yeremia 7:24

Bukni, anggun apu yapu arye, na nyalamse yupu kekebuka, kum dobolbalamik. Narye nyapdeiamse touk, kum winilamik. Narye nyalamse yupu talibuka, yangalamting toura, pia telebuk winipnin yangalamting bukni, sikce sik bidamang kanye tenepman touk, winipnin yangalamik. Sikda pia mandipna kanye dobuka, kekena kumce, kat kanya bon nang winilamikce, malye-malyeuk winipnin yangalamik. ‘Sik anang ara, telebuk wininamak,’ tenelamse bukni, tuba tamubuka, malye winin ninguk tenelamikce, malye winin ninguk talibuka, malye winipnin yangalamik. Aminyan teleb upnamle ninguk tenipting bukni, aning batakuka minop talak malye ninguk winipnin yangalamik. Winibuka winilamika ati, aminyan talakuk, “Aning wininamlulume. Aning ara, pia kum wininamlume,” nyabuka, mem yupu ton tabakuka, sik deice deiamse.