Sik Israel ninye arye, pia malye weik tuba wininyaka ati ara, na si ara, Allah Yahweh arye nyapsine. Nara, aning-aning nirya deice tam talibuka, Weik Erena Deiyoknye ununa anya arye, narye, ‘Winipnamne,’ tenepnye touk, wininune ati ara, na weik arye wenepnamsine. Nara sikti, lik kanye bobuka, yu weik unulula anya arye, amutuku unyak ninye ap, amutuku ap ati, mikip weik deice arye, wenena ning weik arye arenamsine. Weik mek makau arye, mek kwebikirye, tonok talak aniryuk amek nirya dikiltaklamak atonun, sik deice wenen ning weik arye, aninye ati arenamne. Ara, na si erena ati dobik aik ara, weik yu deice arye, dakuka bataknamne. Tonda, amutuku noutamak unyak ninye ap, amutuku unyak kam ning nirya ap, bai tam palamle yo nirya ap, tonda ninye arye koulamak ning nirya ap, ninye arye weinyak kam ulul ning ayala-yala nirya ap, kum kipdeipnamne. Na yu ara, weik uku dinmalirye, kum tangapmanto ulamle touk, weik uku dopkwetepniba, amutuku noutam ulul ning nirya, uku dinamle. Auku ara, ninye arye kum tangapnamake. Pia dilamlya ani, aning nirya diplyak arye, sirya daknamle. Allah arye, Yeremia biti laka nyabuk.
Yeremia 44:6 - Eipomek6 Ati ara, anggun malye ulamlum ning ati, na yu weik upnukba, wenen ning dobuka, anggun deice deipsise. Tonda, Yehuda mutuku noutam ulamik nang, sik asik dobuka ulamik sukum ap, Yerusalem mutuku, weik asik noutam ulamik nang, sik bisik yamikce balamikak nirya ara, na yu upnukba, amutuku nirya ara, obuka sice buklopseba, oldemuk ubuk. Winipmanto ara, ninye arye, uku sekikirye diplyeba, tuku nirya silal selamle atonun, wini talak Yehuda mutuku nirya, eibuka biknamlume. Gade chapit la |
Yeremia 44:6
34 Referans Kwoze
Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.
Nara Allah Yahweh, im deice unyak yin talin malaikat nirya ara, sik deiyoknye ununa ati, na mikip pia weike. Anggun Israel nang arye, na siuk erenululum Allah unune. Ati, narye anggunti, dipkoprob nyapsine. Na yu weik upnukba, sik Yerusalem mutuku weik asik noutam ulamik nang, sik deice deiamse touk, wini talak anggun Mesir mutuku binuka aunamlum nang babye, na yu weik anggun deice deipnamsine. Winipsinirye, wenebuka opsinyopura, yuk mutuku nang nirya arye, awinipnamsin ning eibikirye, ‘Se, Allah arye, Israel nang, sik wenena ati, weik tonun obuka sice buklobuk ning ara, pia mambul weik ulule. Sikda, pia malye wininyake,’ nyabuka, ilil upliba, anggunti malye yupu nyanamsiake. Tonda, yuk mutuku nang arye, anggun Israel yala nang ati, akutubuka nalinamsiyake. Nalisikirye, anggunti malye weik nyanamsiake. Atalak ara, yuk mutuku nang, walanmakirye, “Anda na lik ati, Allah arye Israel nang ati, wenebuka malye weik kipdeibuk touk, ‘An babye wenebuka opnamkilʼ tenen, supkine. Sik Israel nang ikin ning dolonyaka atonun, ‘An babye, ikin upnamkilʼ tenen, supkine,” nyabuka, malye yupu nyalanamake. Tonda, atalak arye dipdongobuka, dounamle talak nirya ara, anggun Israel yala nang ara, anggun mutuku koproba, tamubuka yamunyakarye, pia kum eipnalume.” Allah Yahweh arye, sik Israel nang ati nyabuk.
Dipkoprop nyapsine. Nara Allah, naryuk, anggun Yerusalem mutuku ululum nang ati, opnamsine! Ara, na mikip weik taruk deice aryuk, anggunti yanuka opnamsine. Tonda, tuba-tuba narye anggunti, yu weik unulul ning ara, pia weik tonun, mek langdilamle atonun unulule. Narye anggunti, yu weik unulula ati, derepsinirye, wenebuka oplopnamsine.
Aninguk kum winipnamne. Tonda, sik Israel ninye wenena ati winipnamne ning ara, ani. Ara, sik unyak mutuku nirya noutamak ara, ninye arye kanye deibikirye, mot senmakirye, lelim nyalamak ning ap, kanye deibuka, akutunyak ning ap, pin-pin kanye bobuka, lelim nyalamak ning nirya ara, tuba tonap nyakiba, kum kekepnamake. Weik kanye imun ning arepnamsine ati, nyapsine. Tonda, Yerusalem mutuku noutamak ap, Yehuda yala ninye talibuka unyak mutuku noutamak nirya ara, tuku pia malye kipdeipnamne. Winipniba, aning-aning nirya koluplirye, aning nirya kum danamle. Amutuku ara, weik kanye imun ning dopdeipnamna anya arye, amutuku noutamak nirya ara, sal ap, kilapu ap, pia kum dolanamake. Sal ap, kilapu ap, dopdace talak, kanye deibikirye, lelim nyalamak touk, atalak ara, lelim nyakiba, pia kum kekenamake. Tunim abuka unamake. Narye arepneba, amutuku nirya malyeuk unamle ati, nyapsine. Na Allah arye nyapne.
Se, anggun Yerusalem mutuku ululum nango, anggunda bicoe. Anggunce deiplum mapu nirya ara, mikip pia mitang ubukba, kanye tenina kumce, tukwak sakuka poulbiyike. Dan bisik do nirya, dana-dana tam bisik bana ati, deiyok koubuka banyak bisik nirya, anggun mapu tuku deice sakuka pounyak rusa basam arye, mangkau kanye bobuka banmakirye, ninye arye wemikce jaring atonun ning, kum eipmakiba, youlamle touk, unyake. Yata wiripting do, kume. Anggunce deiamlum mapu nirya ara, sik malye-malye winilamik ning ati, Allah Yahweh arye, yu weik ubukba, sik deken ning wenebuka, sik deice weik tonun arebuka anya arye, aning nirya akunum dopromikba, winipmanto kum unyake.
Kekepnululume! Anggun Yerusalem mutuku noutam ululum ninyeo, adiparyuk buklulume! Anango, anggun nirya buklulume! Anggun Yerusalem ululum nang ara, tikuka kintiniplulume! Nara Allah, na yu upnukba, kanye imun ning deice arye, wenelamsise ning ara, anggunce akunum doproplume. Winipmanto ara, yu weik mek, kanye wangalamak ning arepsisiba, aning nirya dibuka, sirya daklamlume. Mitik tonun babye, kum dikdongobuka batakmalume. Aning nirya akunum dinmaluma ani, anggun kanye walwalaplumba, tukwak sakmanto ulume.
Nyabukopura, narye tamubuka asipdese. “Se, na ni Allah, kum kekepmanto unamak talak ara, yata talak arye talima kat ninye uk unamak do?” nyabuka asipdese. Asipdesiba, Allah arye, tamubuka nyapnuk. Amul arye kekena kum ap, asing arye el lina kum ap, talima kat ap unamak ara, weik tonun tonap pia aunamake. Ilil kum asa winilamice buk, sik wenena ati, narye nyapniba, yuk mutuku yu nang arye yacopura, sik aik dolamikce ning nirya, dakuka atu kiplopnamake. Sik aik ulamikcak nirya ara, ninye una kum ati, asik oldemuk upnamle. Sik wa wilamik ning nirya ara, yu nang arye alapdobikirye, yaniptabikiba, tuku nirya babye, malyeuk upnamle. Sik koulamak ning tonok ning babye, teleb ton kum upnamle. Aning nirya ara, kum danamle.
Allah Yahweh arye, tenelamuk ning ara, ani. Ara, ‘Tukwak mutuku unyak nang ara, yuk talye ning do, isa si do nirya ara, sikce atalye ning, pia si kum erenamake,’ tenelule. Ati ara, yata nang do nirya elti, ‘Nun likʼ tenen, talye ning si erenyak nang ati, wenelule. Tonda, yupu deice bisinyak nang ati ara, wenebuka ikin ning deipnamle. Ara, elti, malye kanye bobuka, ulamikce nang nirya ara, yu weik arye, pia weik tonun wenepnamle. Sik malye unyak ning ati, ‘Daupmalyeʼ tenen, kum namin kipnamle bukni, elti, yaninyak nang ara, kanye imun ning areplirye, yu weik arye wenepnamle!
Ati ara, Allah ance nun ninye deiyok nang ap, nun Israel yala ninye nirya ap ati, “Na yupu yanipmumnyopura, dipkoprob wenepsinirye, ikin ning weika arye arepnamsine,” nyabuka, nyalin yupu deice nyamsulume. Ayupu nyapsulum touk, malye winilamupu ati, weik ikin ning, pia weik nun nong deice delilamsulume. Ara, Allah ance, Yerusalem mutuku noutamak unyak ninye nirya ati, weik kanye imun wenena ning wenyamsuluma deice arye, malye nang arye, Yerusalem mutuku ninye obuka sirya dakikce, amutuku aik ap, amutuku ning nirya ap dakuka, atu kiplomik ning ara, tukwak im sirya, mutuku sirya nirya unyak ninye noutamak ara, awinyamuk ning atonun ton, kum winiplume.
Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.
Nara Allah pia kam tuba ununye birye, nyapsine. Nara Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti nyapsine. Ara, narye anggun wenena ati, na mikip weik taruk ara, na yu upmanilye deice arye, anggun Israel nang ati, moubuka talipsinirye, anggun deiyoknye unamsine. Ninye deiyok talipnirye, anggun deice tam Raja unamsine. Anggunda, na amu tamuk ulamunce, na yupu uk kekenamlume.
Anggun anang nirya ara, yu kanye tenepsinirye, anggun deice ikin weik ning deipnamsina deice arye, kel biknamake. Winibikirye, yata nang do nirya, yuk pera mutuku noutam daunyak Israel nang ara, kanye imun weik uk, dinamla deice arye dipnamake. Yerusalem mutuku tuba sik damuk unyak Israel yala nang ara, yuk mutuku yu yin talin nang arye, sik dam yakirye, parang ya bopmaca arye oplopnamake. Sik Israel yala nang bukni, akanye imun ning bitinye deice arye, biknamak bukni, sik kum dipnamak nang arye biknamake. Ara, batakniba, sik tuba kam unamak nang ati, sik mutuku noutam kanye imun weik din patana deice arye, dibinamake. Aning-aning ikin ning nirya ara, na yu weik upnamnila deice arye, sikti wenen ning arepnamne.
Akunum oplopsicopura, narye anggunti, yu weik upnilyopura, kum danamle. Narye anggun malye ululum ning ati, kanye imun weik wenen ning akunum arepsiniba, ninye weik akunum opnyopura, wini talak yu weik upnilyopura, aminyan talak kum daniliba, na kanye lopnamnile. Bukni, na yu weik upmanilya deice arye, sik tibuk, akunum wenebuka opnyopura, adeice arye, sik moubuka biknamake. Aning nirya akunum winipnyopura, anggun Yerusalem mutuku ululum nang arye, nati utenepnamnulume. Ara, ‘Se, elda Allah Yahweh, aning-aning talibuka, pia mikip weiknye birye, deiyok kum uamukba wenepsuka kuma. Deiyok ara, nun bidamnye malye ulamupu ning ati, yu weik ulamuka deice arye wenepsuke. Wenepsuka deiyok ara, elce, ‘Se, sikda yata deiyok ati, malye-malye unyak do?’ tenepsukce, kanye imun kanye bobukce, wenena weik ning dobuka, nun deice uk deipsukeʼ tenen, anggunce moubuka bikinamlume.
Na walwal bukni, ayupu nyapnalam sum ara, kekebikirye, ‘Se, nun dipkoprob malye unyabe’ tenen, sik aninye malye wininyak ning nirya bataktingce, Allah ati moropnamak do, kum do? Ara, sik aninye nirya arye, ‘Se nun ni Allah, nun malye wininyap ning batakikirye, an damuk tamubuka yanamabe. Ance nun malye ning kilipsutumce, lyepsutum tenen, moropkiyabe,’ nyabuka, Allah ati, moropnamak do, kum do? Nun walwal bukni, dinauk unaname. Ara, urdem ati kum nyapkine. Sik Israel ninye ap, Yehuda yala ninye ap arye, pia malye weik wininyaka ati, Allah el yu weik upliba, ‘Sik wenena ati, ikin weik ning, sik nong deice deipnirye, sikti, opnamne,’ nyapdeibuk ning ara, mitik kume. Weik wenen ning kintinipmala ati, nyapkine. Ati ara, Allah arye nyapdeipnukba, laka nyapmakinba, ance sekmalam yupu dobuka, Allah el si eren aik binuka yinipnalyame, nyapkine,” Yeremia birye, Baruk biti nyabuk.
Raja Daud birye deiamukba, dadeipdanin yangakirye, deiyok kibuka, talilulum nang nirya ara, diksukum un ninguk wininamlume. Ara, asum-asum nirya, pia pi dobuka, teleb piluk donamlume. Mikip ukirye, sik amu tam talinyak nang, sik ning dopropnamakca ati, anang ikin ning deibikirye dolonyak ning ara, anggun deiyok nang arye, teleb kibuka, yupu lipsisikmunce, amalye unyaka ara, bataknamake. Asum-asum nirya ara, ninye yupu teleb kibuka lipsisikuka bokeipnamlume. Aning tuba kum winipmunyopura, anggun amalye upmunya deice arye, na Allah ara, anggun malye tuba winimunya ati, na yu weik unulul ning ara, uku buk weik dilamle atonun unilirye, anggun malye winilulum nang ati, auku dipnamsile. Anggun tuba malye winilulum ning ati, yu weik upniliba, uku buk dilamle touk ning ara, min kume, kum danapnamle. Pia dinauk upliba, anggun nirya dibuka, sirya daknamsine.
Anggunce na anggun ni koproba Allah dam, nyalin yupu nyapdeiamuk ning moubuka talipnamlume. Tonda se, sik Yehuda yala nang ap, Yerusalem mutuku ululum nang ati, ayupu nyapsine. Anggunce, ‘Nara Allah el ninguk wininune,’ tenenamlume. Aning kum winipmunyopura, na yu, uku buk dilamle touk unilye ning ara, anggun deice deipnamsine. Winipsinyeba, uku buk dilamle touk unamle ning ara, ninye yuk nang arye, tangapmanto kum upnamake. Winipnamak ning nirya ara, anggun malye un deice aryuk, ikin anggun dam yanganamsile.
Winimunyopura, aning dekna ati, narye weik tonun wasinerye, wenebuka ikin weik ning, anggun nong deice deipnamsine. Ara, anggun malye winimunye ning dekna ati, tekbarye deice arye wenepnamsine. Ara, ‘Tujuh kali lipat deice arye,’ nyalamak atonun, pia weik kanye imun ning, weika arye arenamsine. Ara, ikin ning min talak yambul anun areamsise ning atonun kum bukni, aminyan ning ara, pia weik imun kanye bonuk, na Allah aryuk, kanye imun weik ning, na Allah aryuk arepnamsine.
Tonda, anggun umunye asik, kota noutam nirya, anggun aik weik domluma nirya ara, narye malye kibuka uluplopnirye, kum kipniba, talye louk kipdeipnamne. Anggunce, teleb sukum teneplumce, domba basam ato ning opmunyakarye, isa si erena ati, arelulumak nirya ara, narye daklopnamne. Tonda, na si erena ati, arelyanganamnulum ning nirya ara, arepnutuma babye, narye siltong kum kekenirye, dipkoprob kanye deibuka, kum dolonamsine. Aning ara, batakniba, talye daupnamle.
Aning atonun, anggun mutuku nirya ara, yuk pera mutuku yu weik nang arye, akunum opsike. Anggun aik dolamlum ning nirya ara, akunum uku dongopsikba, uku dibuka sirya daksuke. Yuk pera mutuku ninye arye, anggun taleamlum mutuku dalubuka dopropsikce, anggun wa wibuka kouamlumba, palamuk ning nirya ara, alabuka dololanyake. Anggun mining dam dinmamunyak arye, malye winilisinyake. Anggun ning nirya dibuka sirya dakanyake. Winibikirye, anggun mutuku nirya obuka atu kiplopsike.
Ara, urdem ati kum nyapkine. Yeremia an asing arye, Yehuda yala ninye asik dobuka unyak mutuku noutamak, sik malye-malye ning pia weik wininyaka ara, kum elilyam do? Tonda, Yerusalem mutuku noutamak bakirye, malyeuk wininyak ning nirya ara, kum elilyam do? Aning elilyam bukni, moubuka kum bikilyam do?
Ara, na Allah Yahweh arye, ‘Winiplulume!’ nyabuka, yupu mikip arye nyapdeipnyopura, sik anang kekebikirye, anang ara, amutuku tamubuka yanamake. Ara, amutuku weik asik dolamlum ning, Yerusalem mutuku warikina ap, ninye ona ap, ukula dolona ap ati, tamubuka yanamake. Tonda, amutuku obuka doprobikirye, anyasik nirya uku dongopnamake. Aninguk kum bukni, na Allah arye, Yehuda mutuku noutam, weik asik dobuka unyakak nirya ara, mutuku kata atonun kiplopniba, oldem uplirye, ninye kum kum ulamne sukum atonun kipnamle. Na Allah Yahweh arye, ayupu akunum nyapmasina ati, aning ara, dipkoprob nong kipnamlarya, nyapsine!
Anya arepnuk ning nirya ara, uku buk im deice arye, dopkwetebukba sakukce, aning nirya dibuka, sirya dakukce, ninye tenelamak ning nirya kum kipdeibuk. Tonda na sakana ati, kintinip deipnuk ning ara, kapang bisik banak mangkau tapu welamak touk, na bisik banak kintinibuka deipnukce, ‘Aminyan talak ara, abisik noutamak saknamle’ tenen, kalikuka dinauk unulule. Tonda, asum-asum nirya talima uk dilule.
Wini talak ara, anggun Israel nang ara, yuk-yuk mutuku nang noutam ansinibuka ululum bukni, aminyan talak ara, na pia mikip deice arye winipnyeba, anggun nirya bulubuka boyanamsine. Ara, na taruk mikip ap, na yu weik upmanilye deice arye, anggun nirya bulubuka deipsinirye, ila tamubuka bobuka, anggun mutuku koproba yanuka, bulubuka deipnamsine.
Ura, sikce na yupu nyapdeiamse ning nirya ati, kum kekelamnika ati, sik dekna wenena ati winipse. Winipmanto ara, weik kumanya mikip yalirye, pu aplyeba, aning-aning bobuka, yuk mutuku dana-dana tam bobalamle touk, na mikip weik arye, sik Israel nang nirya ara, dobuka, yuk pera mutuku dopkwetepsiba, yu nang yanuka obikce, tapu koubukabikce, yuk pera mutuku noutam dabinuka deiamikba, ikinuk daulamike. Sikda, ninye asik nang atonun ulamika ati, sik mince kum bikamik mutuku nang kan-kan noutamuk, ikin kibuka daulamike. Narye winilamsa deice arye, anggun mutuku ara, min talak, pia telebuk ulamuk bukni, atalak noutam ara, yuk amutuku tuku noutam, pia teleb sukum tuku uamuk bukni, narye aning nirya ara, kum kipdeipsiba, anggun mutuku ara oldiamuk uamukba, amutuku noutam ara, ninye ton kum ulamikce, abinuka, oyanuka kum winilamikba, amutuku noutam nirya ara, pia malye dem upnin balamuk. Aning nirya ara, na Allah deice uka! Allah arye nyabuk. Allah arye nyabukba, nabi Zakaria kekebukce, sekdeibuk
Tonda, sirya talak weik arye wenepnamsin talak ara, na Allah arye, min talak, ton tam nang yakuka, yuk pera mutuku nirya akunum donokse nang bukni, wini talak tuba kam unamak nang ara, ikin weik unamake. Sik anang arye, imun kanye bobikirye, ‘Se, teleb ning ara, nunda dipnauk uptibye. Pia ikin weik unyaba ati, kam una ara, nun like,’ tenenamake. Nara Allah Yahweh, im deice unyak yin talin malaikat nirya, sik deiyoknye ununa ati, mikip weiknye unune. Ati, naryuk ayupu akunum nyapmasina ati, aning nirya nong upnamlarya! Allah arye, sik Israel nang upnamuk ning ati nyabuk.
Dipkoprop ning ara nyapnusine. Isa mer si erena ati, anggunce domba ato ning obuka, arelbalamlumce, aning deice anggur mek dikilongolamlum ning ara, Allah arye eibuka bikamuka ati, aning kum bataksutue. Kume, anggun amalye winimunya deice arye, Allah elti, yu kililulume. Tonda, Allah arye sikti, ‘Kume, amutuku nang, pia malye wininyak ning ara, tuba kum eiptinye. Aning nirya ara, na lik weik unululule,’ tenyamuk. Ati, minop talak arye dipdongobuka, anoutam talak ap, wini talak ara, anggun mince ulamlum mutuku nirya ara, Allah arye akunum malye kibuka bataksuka ati, oldemuk ubuk. Ara, amutuku tuku pum tam arye, aning-aning ton tuba kum palamukce, tuba kum palule. Tonda, ninye ara, amutuku noutam tuba kum unyake. Tonda, yuk nang arye, sik mutuku malye winipnin balamuk ning eibikirye, ‘Se, amutuku noutam ara, Allah arye subuk nang, ikin weik ulamik touk, anggun babye atonun unamlume,’ nyabuka, yuk nang ati sunyake. Tonda, yuk nang arye eipsikcopura, anggunti nalinamsiyake.
Minop talak ulamik mutuku nirya ara, kanye deibuka, kil-kil asa arye teleb ubuka ulamik. Bukni, wini talak unyap Yerusalem mutuku ara, asik ol dem ubuku ati, wini talak ara, langapdongobuka, namin asa arye unyabe. Minop talak ara, mutuku nirya teleb asauk ulamik bukni, wini talak ara, youwak kilapu ulamak touk unyake. Minop dorapce, dib dongobuka, upra yangalamupu nirya ara, pia teleb bukni, wini talak tuba malye updeibik.
Sik nabi nang deice ap, na yupu peteren nang deice ap ara, narye, ‘Aning ara, wininamlume. Aning ara, pia kum wininamlume,’ nyapsise ning ap, ‘Teleb una ara, ani. Malye una ara, ani. Aning ara, pia mem nyan yupu ap, tonda narye, ‘Pia moubuka tenepnirye wininamak,’ tenyamse ning nirya ara, na amu tam pil don nang yupu nyapdeiamika deice arye, anggun apu yapu nang dam nyapdeiamse. Ayupu nirya nyapdeiamse bukni, sikce ayupu ara, diba kum tenyamika deice arye, ikin ning dopromike. Narye, ‘Winipnamsile,’ nyapdeiamse touk, aminyan talak dipkoprob winibuke. Winyamuka ati, sikce, ‘Seʼ tenen, sikce tenipdeyikce, sik malye ning batakikce, nyabik. Ara, ‘Se, im deice unyak yin talen malaikat, sik weik deiyok ululnye birye, ‘Winipnamne,’ nyapdeiamsuk touk, akunum winipmasila atia,’ nyalamik. Allah Yahweh aning-aning nirya talibuka, deice tam erebuka mikip weik ululnye birye, ‘Winipnamne,’ tenyamuk touk, nunti akunum winipmasile. Ara, nunda malye winilamupu touk, elce atonunuk, kanye imun weik ning, dekna arenmasil deice arye, wenesulule. Ara elce akunum, ‘Winipnamsine,’ nyapdeipsuk touk, winipmasila ati, merekuka wininmale!