Aning atonun, Efraim yala ninye, sik mutuku deiyokak ara, Samaria ulule. Samaria mutuku talibuka ninye deiyoknye bira, Remalya birye deibuk mi, Pekah ulule. Samaria mutuku ninye ap, Pekah ap ara, mikip mitik tonunuk unyake. Sik mikip weik kum anya arye, anang ati ilil kum unamsulule. Ati, na dipkoprob yupu nyapkine. Kanye bokoltona kum diparyuk, anggunce, ‘Allah elcuk melibuka kalikinamsile’ tenen, pia pi dobuka, diba kum tenepnumumnyopura, teleb kibuka kum unamlume.” Allah arye, nabi Yesaya biti, nyapdeibukba, Yesaya birye, Raja Ahaz biti nyabuk.
Yeremia 43:2 - Eipomek2 Binuka laka nyapsiba, sik talima erebuka maknya kintinin nang ara, Hosaya elce deiamuknye Asarya ap, Kareah birye deiamuknye Yohanan ap, sik yuk maknya kintinin nang nirya ap, neika asinibuka, na Yeremia biti, ayupu nyapnike. “Anda, tilila yupu dem nyanmasilame. Nunce si erenyap Allah, el si Yahweh arye, ‘Anggunda, Mesir mutuku binuka kum unamlume,’ kum nyapmasil buk, ance talye yupu dem nyanmasilame,’ nyapnike. Gade chapit la |
Yeremia 43:2
31 Referans Kwoze
Aning diamuk kum bukni, Raja Nebukadnesar birye nyapdeiamuk yupu babye yanibuk. Ara, Raja Nebukadnesar birye Zedekia ati, “Allah dam, ‘Na winibuka unamne,’ nyapmince, anda na nyapdeipkin yupu uk kekebuka unalyame,” nyabuk. Nyabuk bukni, Zedekia birye, “Yo, winipnamnarya,” nyaplokbukce, anyalin yupu deice arye nyabuk bukni, dipkoprob aning nirya kum winilamuk. Elce, ‘Aning nirya ara, na kum winipnamne,’ tenelamukce batakuk. Tonda, Israel nang arye, si erelamik Allah, el si Yahweh ati, Zedekia birye, ‘Kume, Allah Yahweh arye nyalul yupu nirya ara, na kum kekebuka unamneʼ tenen, kanye pum tam kat kibuka, mandipna weik ulamukce, ayupu yaniltaknauk ulamuk. Zedekia el malye ulamuk ning ati ara, ‘Bataknirye, Allah dam tamubuka binune,’ pia kum tenelamuk.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Ura, Allah Yahweh arye, na Yeremia biti, “Yehuda mutuku tuba unmek Israel yala nang ati, ayupu bobinuka nyalbinamlume,” nyapdeipnuk yupu, narye anang ati, ayupu akunum binuka nyapse. Ara, Israel nang arye, si erenyak Allah, anggun ni, Allah Yahweh arye nati, laka nyapdeipnuk yupu, akunum laka nyapdeipse.
Yohanan ap, el ap neika banmek nang nirya ap, Yehuda mutuku ulamik yin talina deiyok nang nirya ara, bulubuka, na Yeremia ap eldana ati, na dam yayik. Sik anang ap Kareah el mi Yohanan ap, tonda ninye si Hosaya deiamuknye, el si Asarya ap, amutuku ulamik ninye weik nang babye, mitik nang babye nirya ara, bulubuka yayikce, na Yeremia biti nyapnike.
Kekebikopura, sik nirya arye, Gedalya dam biyik. Ara, ninye si Netanya, elce deibuknye Ismael ap, Kareah arye deibuknye Yohanan ap, Tanhumet arye deibuknye Seraya ap, Efai el mapu silip bukni, Netofa mutuku arye yayik nang ap, tonda Maaka arye deibuknye Yezanya ap, adeiyok nang ap, sik amu tam yin talin nang ap, sik nirya neika, Mizpa mutuku binuka, Gedalya ulamukakuk yayik.
Ninye nirya, sik kanya deilin erebuka ukirye, kwalinya nang ara, Allah Yahweh arye, ‘Anang ara na like,’ tenelule. Ara, dipkoprob elce, sik anang ati tenelye ning ara, ton pia luba kum kinamle. Nunda aning pia dipkoprob bikinyabe. Allah arye sik aninye ati, ‘Na like,’ tenelamlya ani, kum daneipnamle. Dipkoprop yuk talak ara, aninye ati weik arye wenebuka oplopnamle.
Akunum biyikura, Kareah el mi Yohanan ap, tonda el yin talin nang, sik deiyok-deiyok nang arye, Mispa mutuku tuba ulamikba, Netanya el mi Ismael birye, ‘Aninye dobuka, Amon yala nang unyak mutuku bobinamanʼ tenen, bobanmok nang nirya tamubuka boyayikce, ‘Mesir mutuku binuka unamapʼ tenen, bisik biyik. Ara, ninye si Ahakim birye deiamuknye Gedalya, Ismael birye Gedalya obukabukce, el taleamuk nang bobanmoka ani, Yohanan birye, anang dobuka bobukce, bobanmok. Yohanan birye, ‘Mesir mutuku binuka unamapʼ tenen, bobanmok nang ara, sal ap, kilapu ap, mapu ap, tonda yin talin nang ap, amutuku Raja el aik pil don nang ap, Gibeon mutuku arye tamubuka boyayuk.
Aning moropmakina ara, talye ati kume. Deiyok ara ani. Nara bona weik talinanye ulamtinye toura, narye anti, “Yo, Allah elda yatanye ulul do? Nara aning-aning ayala-yala nirya talinune anya arye, Allah elda kum patanulule,” nyabuka, mandipna arye nyapkitinye. Tonda, nara pia bona utotoa talina kum ninye ulamak touk ulamtinye toura, aning-aning nirya ara, na ton pia kum ununa anya arye, weik arye pataniliba, narye yuk ninye talinyak ning ubula dopra balamtinye. Winibuka balamtinye toura, yuk ninye eipnitingce, na ni Allah an pia teleb ulyamnye si deice arye, malye-malye yupu nyalinamkiyake. ‘Ati, na malye winipnyak’ tenen, na ni Allah, ancuk melibuka kalikinamnilyame. Na patanamnil touk, pia aninguk melibuka arepnamnilame.
Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.
Tonok ning ara, kanye talima erelakirye, ‘Yuk nang ara, nunti, sikda pia weik nang tenesinyake,’ tenelakirye, anang sik asing erebukabikirye, ninye kisok dup-dup diprebakiba, Allah el lik ulule. Bitinye ning ara, sitang deice arye tilila yupu nyanyak ninye ara, Allah el lik ulule. Winilye ning ara, deiyok ning ton kum upmalibuk, ninye sik taruk deice arye, oltakanyak ninye ara, Allah el lik ulule.
Yata karin talak arye, nun kanye talima noutam ara, ‘Se,’ tenen, lik weik akunum usulule. Se, yupa weik talak deice arye, ikinuk akunum ubupu ati, ara tuba kum winitibye na nio. Aning deiyok ara, ikin kum uplyeba, sik talye kanye bobuka, telebuk unyak nang arye, nunti, ‘Sikda malye nang unayake,’ tenesikirye, nyek-nyek nyabuka, malye yupu nyasinyake. Aning nirya ati, nunda akunum lik usulule. Diba, sik maknya kipdanuka, nun Israel nang ati, ‘Nun lik, anggunda mali nang uka,’ tenesikirye, malye yupu nyasinyak nang ati, nun akunum ‘Lik,’ tenenamabe na nio. Ati, ancuk, yanuka melipsilyame na nio.
Ance nyasiminye yupu kum kekebice ninye arye, kwalinyak deice malye wininamak ninye ati, ance wenepnamlyame. Ance, “Aning ara, wininamlulume. Aning ara, pia kum wininamlulume,” nyapdeiamsulum yupu nirya ara, amalye winin ninguk, talibuka wininyak ninye arye, yaniltanyake. Ance nyalisimin yupu yanibuka batakikirye, malye winipnin banyake. Winibuka unyak ninye ati ara, sik anang nong deice, sulongonamlyame.
Nyaprikba, Firaun birye tamubuka nyabuk. “Allah el si Yahweh nyapmarumnye bira, yatato mikipnye ati do? Tonda ‘Na yupu kekepturye Israel ninye bataktue’ tenen, nyanmanil do? Kume. Anggun nyapmarumnye Yahweh ara, na walwalnye. Ati ara, Israel ninye kum batakloptiniba bitinge. Aning kum winipnamne,” nyabuk.
Anang arye nyaprikba, Lot bira, bikbik abuka biyukce, el kilmapu arye, moun dilamik nang ati, “Amutuku batakuka buru bindoplulume. Allah el si Yahweh arye, amutuku nirya wenebuka kum daneiplirye, sirya daknamale,” nyabuk. Nyabuk bukni, anang sik kam nang anya arye, ‘Kume, nun kwit Lot bira, talye ati nyapmasile,’ teneprik.
Allah arye, Yeremia biti nyabuk yupu dobuka, sik un dam laka nyalbiyukopura, sik Israel ninye, Yudea mutuku noutamak ulamik ninye arye, ayupu talinmek. Sikce sik kayapu yuk nang ati, “Anggun nirya yangalulume. Nun nirya arye, Yeremia biti binuka wenebibirye, opnuyaba ati, yupu talinamabe,” nyabuka, yuk nang nirya yukubik. Tonda, ayupu ton nyabik. “Yeremia elcuk, Allah yupu laka nyalya ati do? Kume, nun dam ara, Allah el si eren aik pum tam, pil don deiyok nang, imam-iman ap, Allah yupu laka lena deiyok nang, nabi-nabi ap, tonda, nun mutuku weik kel bikamik nang ap, tuba aunyak nang aryuk, ‘Wininamsile,’ nyabuka, sik yupu yanuka nyapsitinge. Yeremia bira, el talinye bukni, nyasulula anya arye, nun mutuku yupu bokolina deiyok nang arye, ‘El nong dobuka, wenena aik dongolbinamak’ tenen, Yeremia biti, ‘El malye nyalul yupu ara, anye,’ nyabuka, malye yupu nyapnamabe. Ati, Yeremia birye nyasulul yupu, ton kum kekenamabe.” Sik Israel ninye arye, Yeremia biti, nyabik.
Sik Yohanan ap bisik banmik nang ara, utenebik. ‘Kume, Netanya el mi Ismael birye, Ahikam el mi Gedalya biti, oplopmuka ati, Babel mutuku ninye deiyoknye, el si Raja Nebudkadnesar birye, weik wabuka, opsilyak,’ tenebik. Deiyok ara, Nebukadnesar birye, ‘Anye bira, Gedalya, na amu tam bukni, Mispa mutuku talibuka, Gubenur tiknamle,’ tenebuka ati, anye bira erepdeibuk bukni, Ismael birye, anye akunum oplobuk. Winibuka ati, Yohanan ap banmik nang nirya arye, ‘Babel mutuku ninye deiyoknye birye, nun nirya ati, wabuka, opsilyak,’ tenenmeka ati, ilil ubukura, Mesir mutuku bisik banmek.
Nyapsopura, sik Yehuda yala nang mitik tonun tuba aunmek nang arye, nati nyapnike. “Kume, nunce anti, ‘Nun ni koproba Allah Yahweh ati, moropsilyame!’ nyabuka, moropmakiap ning ara, Allah arye nunti, ‘Wininamake,’ nyapsilye yupu ara, aninguk moubuka talibibirye, wininamabe. Ati, nun ni Allah Yahweh arye, nun unamap ning nirya dipdesiliba, elce nyapnamsil ning, dipkoprob kum winibipyopura, elce wenebuka opsilyake!
Anggunce ayupu kum kekepmunyopura, anggunda pia malye weik kipdeipdanamlume. Anggun bidamang arye, anggun bidam nang ati, oplanamlume. Deiyok ara ani. Ara, anggunce nati, ‘Nun ni koproba Allah, el si erenyabe. Nun ni koproba Allah Yahweh ati, moropsilyame!’ nyabuka, moropmanulumba, aning nyapdeipmanuluma atonun, narye Allah moropsise. Tonda, anggunce, ‘Kume na nio, nunda Allah ati moropsiminba, elce nunti, nyapdeipnamsil yupu ara, moubuka kekebibyak arye, aninguk talibuka wininamabe. Malye tenenyap ning babye, teleb tenenyap ning babye, Allah arye nyapdeipsilye touk, moubuka talibibirye wininamabe,’ nyamnulume.
Allah arye, aning-aning nirya talebuka, mikip weik ululnye arye, Yakub birye deibukba, dadeipdanin yangalamik nang ati, ayupu nyabuk. “Sik Israel mutuku unyak nang nirya ara, sik malye unyak ati, wenen ning akunum kintinipse,” nyabukba, sik Efraim mutuku unyak Israel yala nang nirya ap, tonda Samaria mutuku unyak nang nirya ap ara, ayupu kekebikce, ‘Allah arye, wenen yupu akunum nyapmasil,’ tenebuka, bikik bukni, sik anang ara, kanye erena ap, kwalina ap deice arye, ‘Yo, winipnamsila babye, daupmalye. Nunce winipnamabe,’ tenelamik.
Piblisite