“Na Habakuk birye, ance nyapnulum yupu, akunum kekepna arye, kanye talima pum tam arye, duk-duk apmanile. Tonda, na ilil ati, na si bam bol dam birbir apmanile. Winipmanilarye, na yok ara, kupmititing apmanil ati, tonok sukumuk tikmana arye, sirim talipnilarye, yok kum kum dakmanile. Pia ikin kanye bobuka unman bukni, ance amambul yupu nyapmanilam ning ati ara, talye tunim abuka, dinauk unamne. Ara, nun mal olan nang arye, nun mutuku noutam yanuka opsicopura, ance ‘Winipnamne,’ nyapmasilam touk, amalye nang, sik Kasdim mutuku ninye ati, ance wenebuka opnalam talak ara, ‘Dan talak yanamle do?’ tenen, dinauk unamne.”
Yeremia 4:19 - Eipomek19 Se, na imun kanye bobuka unamne! Nara namin asa arye kum uptinye ati, na kanye imun upnilyeba, pia ikin deice uk unune. Nara kanye darapdongobuka kum uptinye. Ara mal olalbinuca ati, terompet lelim nyabikce talak ara, kekepnirye, na talima duk-duk anulule. Na talima noutam ara, duk-duk anulule. Aning wininilya ara, ninye onyak nang arye, terompet deice lelim weik tonun yupu nyabikceba, na kekepnirye, talima uk dinulule. Gade chapit la |
Yeremia 4:19
48 Referans Kwoze
Aning ati ara, narye nyapsise. Anggunce na Yesaya biti, dinina kume. Nara, ikin kanye bopnirye, mikip weik arye engenamne. Anggunce nati, ‘Se, nun kwit bira, ikin kanye bopmala ati, nunce el kanye tamubuka teleb kib deipnune,’ tenena kume. Ara, na mutuku nang koproba nirya ara, weik arye bico tenenun bukni, yu nang arye anang akunum obuka kum kipdeipmaka ati, mambul kanye bopmane. Bukni, anggunce nati, ‘Se, nun ka el kanye baripnamabe,’ tenena kume.
Allah arye, na Yeremia biti, ayupu laka nyapdeipnukba, narye nyapsine. “Na yupu kekenululum nang nirya ara, engenauk umunce, ngalukunamlume. Ara, anggun umunyak weik bukuk mutuku nirya ap, bai mutuku ap, luh mutuku noutam palamle maning ap, mutmuta ap nirya ati tenepmunce, engenamlume. Ara, Allah arye anggun wenena ati, amutuku nirya malye kipdeipnamle. Winiplyopura, yata mutuku nang do nirya, sikce amutuku-amutuku noutam ton, kum banamake. Tonda, amutuku noutam nirya ara, ninye arye weilamak ning, sapi basam yupu ton nyanmaliba, kum kekenamake. Tonda, amutuku noutam nirya ara, maka yala-yala nirya babye, bai tam ulamle kam ning yala-yala nirya babye, bai sakuka pia yukak bidobikiba, kum upnamle. Ati anggun nirya arye, anggun mutuku ati tenipmunce, engenamlume,” nyapsine.
Na patapnil ning ara, ani. ‘Na kisok noutam ara, mek weik deibuka langdiptua deice arye, na asing maka mek durupna deibikiba, balamle touk kipnutueʼ tenen, patapnile. Aning atonun, ‘Na asing maka, mek pu dobuka balamle atonun kipnutuba, pia engeptinyeba, na asing maka pia saktueʼ tenen, patapnile. Winiptopura, lukunyan talak babye, keting noutam talak babye nirya, malye kanye bobuka, engena dem uptinye. Ara talye ati kum engenune. Bukni, nun olana nang ara, yuk mutuku yu nang arye, na mutuku nang yupa weik akunum obuka, sirya dakaca ati engenune.
Lengdar mangkau mapmasirye, aning nirya wininmokak eipse ning ap, kekepse ning ap ara, walwal kipnubukba, moubuka kum bikse. Winipse deice arye, nara kanye ikin upnukce, ilil upnuke. Winipmanto ara, mi bomlye kil mi deiya dilyeba kanye ikin ulamle touk upnuke. Winipnuka deice arye, kanye ikin upmanukba, yupu ton kum kekepmanto upse. Tonda, ‘Aning nirya ara, yata winipnamle do?’ tenen, mambul kanye bomse ati, teleb kibuka kum eipmanto upse.
Se, na kayapu, anggunda bico tenesununa anya arye, ‘Na mapu atonun ninye unyake,’ tenesunune. Kilapu arye, sik mi deipnuce talak, mi deiyok uk dilamle touk, narye anggunti, ‘Se, Galatia mutuku ululum ninye ara, Yesus Kristus el winilye ning nirya, kel biktingce, sik kanye talima wisiptue’ tenen, pia se tenenunce, ikin kanye bonune.
Atalak ara, na Daniel bira, na nong mikip kum upnuk talak ara, like bitinyeto, winilyeto, sum ton, uk weik dilamnuke. Winilamnukba ulamsa ani, tamubuka buksopura, ninye deiyoknye Raja arye, nati, ‘Apil dopnilyame,’ nyabuka, arepnuk ninguk donmase. Bukni, lengdar deice mapmasiba, awinimukba, na asing arye eipmase ning ati, ‘Se, aning ara, el nong ara, yata ati do? Yata winipnamle do?’ tenen, ilil upnukba, teniltonauk ulamsirye, pia moubuka, ‘Deiyok atiaʼ tenen, bikmanto kum uamse.
Se, na nabi Yesaya babye, sik Moab tam nang ati, bico tenepnarye, engenmane! Moab mutuku ulamice nang ara, sik mutuku batakuka, bai sakuka bikirye, Zoar mutuku ap, tonda Elgat-Selisia mutuku ap, ‘Duknupnamapʼ tenen, bikbik abuka binamake. Yuk Moab tam nang ara, Luhit mutuku lu bisik welebakirye, engepnin binamake. Ton nang ara, Horonaim mutuku welebacebuk, ikin ning, sik dam akunum yalyeba, sik mal olan nang arye, sik mutuku nirya akunum sice buklomica ati, weik arye malye nyabuka, ngaluknin binamake.
Winipmanto ning ara, sik weik kota mutuku unyak nang ara, mal opdanamatinga ati, pong-pong ana, el si terompet, lelim arye lak nyatingba, kekeptingopura, yok sirim kum taliptu do? Kume, terompet lelim kekebiceura, ‘Se, nun mal olan nang olyanmasiyake,’ tenen, ilil ulule. Tonda, weik asik dobuka ulamting mutuku ak, Allah Yahweh arye, ikin ning sik nong deice deiptu ura, imun kanye kum bopting do? Kume, Allah el si Yahweh arye, ‘Ikin ning aninye deice deipnun,’ tenen, kintinipturye, anang ati kum areptuopura, kanye imun ning, sik nong deice kum yatue. Ara, Allah el uka.
“Ayupu nirya ara, na Daniel lengdar mapsirye, dinmasiba, wininmokak eipse ning ap, anye birye laka nyapnuk ning ap ati, kanye imun upnuk. Winipnuka anya arye, akekepse yupu ara, narye ninye yuk nang dam kekena ati, kum laka nyapse. Aning eipse ning ap, kekepse ning ap nirya ara, akunum laka nyapne. Akunuma,” Daniel birye nyabuk.
Na Yeremia bira, kum batakanune. Tuba-tuba engenauk unune, na asing nenulule. Na talima uk dinilyeba, na talima dakalsanulule. Na mikip pia kum upnuke. Winipmanto, na talima ara, sekuka tukwak saklamle touk upnuke. Ara, talye ati kume. Deiyok ara, na mutuku nang nirya kum kibuka atia. Tonda, nun din ning kum ubsuka deice arye, nun mapu ap, mitik mapu nirya ap ara, sik mikip kum uplyeba, Yerusalem mutuku bisikak dipmanto unyakce, bobinuka sakanyake.
Yeremia birye ayupu nyabuk. “Nabi-nabi nang arye, tilila yupu nyan nang ati, na Yeremia birye nyapsine. Allah Yahweh arye, ‘Aminyan talak ara, anggun Israel ninye wenena ati, winibuka wenepnamsil ati, lak nyalbilyame,’ nyanulun yupu kekepnirye, ilil weik uniliba, talima uk dinulule. Tonda, ‘Se,’ tenen, na kanye talima ikin upniliba, ilil ati, na nong nirya sirim talenulule. Winipmanto ara, anggur mek weik arye dipmace nang, kanye wangabikiba, kum binmanto unyak atonun, kisok biribiri abuka, sirim talenulule. Ara, urdem ati kume. Deiyok ara, nun ni Allah, el si Yahweh arye, ‘Winipnamne,’ nyanulun yupu, pia teleb yupu, mambul weik yupu anya arye, ayupu kekepnyopura, ilil weik unulule.”
Winibicopura, na ni Allah ance, na dam nyapmaniminye yupu ati ara, ‘Akunuma, Allah el si deice yupu ton, yuk nang dam kum nyanamne. ‘El si ton, lak kum sisinamne,’ tenen, kanye talima noutamakuk tenenune. Winibuka tenenun bukni, weik uku buk dilamle atonun, ‘Ance nyaliniminye yupu, dungnupnamne’ tenen, laka kum nyapnyopura, na kanye talima noutamak, weik uk dinulule. Na kanye talima noutamak ikin weik uniliba, mikip kum unilye talak ara, ‘Pia tunim abuka kum uptinye,’ tenen, malye kanye bonune. Ati, ‘Ance nyaniminye yupu ara, kum dungnuptinye,’ tenenune.
Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.
Nun mal olan nang arye, sik ninye olban talak ati ara, weik bendera ikmakcak, eilinyaka ara, yata talak ton ap, aning epnamne do? Danto talak arye, aning kum dalyeba, kum eipnamne do? Tonda, ninye olyanukce talak arye, bung-bung ana el si terompet, lelim weik nyalamle ning ara, yata talak ton ap, aninguk kekepnamne do? Dan talak arye aning kum datuba, tuba kum kekepnamne do? Nabi Yeremia birye nyabuk.
‘'Amutuku noutam nirya ara, pong alamle ning, el si terompet bobuka, pung apmunyeba, leilim weik nyapnamle! Yehuda mutuku nang ap, Yerusalem mutuku unyak nang ap, anggunti, leilim weik nyana deice arye laka nyapnamlume. Winipmunyeba, sik adiparyuk, bikbik abuka minop, ‘Ninye yuk nang arye opsikcak’ tenen, ati, asik noutamuk wekuka kalikinamake.
Allah ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, yuk ninye batakikirye, yanibicopura, na eipnirye weik arye, engenmanye talak ara, na asing maka ara, mek pu dobuka balamle tonun unulule. Yuk ninye arye, an yupu yaninyaka anya arye, engena weik arye engenune. Ara, ‘Se, yata deiyok ati, Allah el nyalye yupu yaniltanyak do?’ tenen, engenune.
Na Daud arye aMazmur mot yupu nyabuka sekse. “Se, na ni koprop Allah Yahweh atibuk, anda pia telebuk ulyame,” nyabuka, an si erebuka kinamkine. Ati ara, diba, na kanye talima noutamak unerur ning nirya deice arye, Allah ati, ‘Telebeʼ nyakinune. Allah el malye winina ara, pia kum winirura ati, el ap, el si ap ara, pia teleb, dumsisikumuk ulula ati, “An si ara, pia teleb, pia lekuk ulyame,” nyakinune.
Winibikopura, mek si, Kison mek pu tam arye mek deibuka obukba, bental weik ubuka arye, sik kuda basam arye lipdakuka tuku deice balamuk ning ara, kum binmanto ubuka ati, anang obuka sirya dakik. Aning ati, nun kanye talima ara, ilil una kum diparyuk, mikip arye, ‘Nun mal olan nang ati dobolbinamabe,’ tenelamuburye, anang nirya dobolbinuka obuka sirya dakupu.
Winipmanto ara, anggun mutuku koproba noutamak bukni, yuk mutuku nang arye, anggun Israel ninye ati, ‘Anang obisibirye, ikin ning sik nong deice delinamabe,’ tenepsicopura, anang olbinumunye talak ara, cang pong-pong ana, el si terompet deice arye, weik arye nyapmunyopura, nara anggun ni koproba Allah Yahweh arye, kekepsinirye, anggun mal olan nang dam arye, melibuka lyenamsine.
Ati, sik ap, yuk nang ap yupu nyanamak talak ara, na ap melibuka bukibirye kum kekenamne. Sik ap, yuk nang ap bulubikce talak ara, na ap bukibirye sik ap neika kum unamabe. Deiyok ara, sik bitinye nang ara, yu weik ubukba ninye weik oplobrik. Sikce, ‘Winipnuname,’ tenedurak touk, yuk ninye sik weilamak sapi yan milmil sekeldongodurake.
Aning atonun, sik yin talin nang arye, bung-bung ana, el si ara, terompet deice arye, tonok mot nyakiba, kekebikirye, adiparyuk, ‘Ura, amot kekepmapa anya arye, malye nang olbinuyabe’ tenen, kel kinyake. Bukni, aterompet nyalinye birye, teleb ubuka kum nyalyopura, lelim talye kekepnamak bukni, yata wiribuka moubuka tenipting do? Kum bikmanto ning nyaplyeba, sikce, ‘E, winira olbinuyabe’ tenen, kel bikting do? Kume, talye lelimuk kekenamak bukni, lelim malye nyaplyeba, moubuka tenena kum ati, yin talin nang arye, kintinina kumce, talye kanye bobuka unamake.
Allah arye anyuk nyapdeibukba, Israel mutuku noutam ulamik ninye kekebikura, ayupu nyabik. “Se, ayupu nyabuk ning kekebibirye, Yerusalem mutuku unyap ninye ara, mikip kum unyabe. Nun nong ara, mikip kum, mitanguk unyaba anya arye, nun taruk erena kum diparyuk, talye lamapdongobuka tiknamabe. ‘Se, yu weik ninye olyanamsiyake’ tenen, ilil kanye uk usulule. Winipmasil deice arye, nun Yerusalem mutuku unyap ninye nirya ara, mi bomlye kil mi deiya donmalirye, mikip kum, mitang ulamle touk, usulule.
Nyabikopura, nabi Yeremia birye, nyabuk. Na kanye noutam ara, pia malye unulule. Ara, na mutuku ninye, sik talima uk weik dilula ati, na babye, imun kanye bopsirye, talima uk dinulule. Winipmanto ara, ninye dibikceba, anggun kayapu nang arye, baju koubukabikirye, aik bukikirye, weik arye engelamak touk, na babye pia imun kanye bobuka unune. Winilyeba, na talima daksaknilye, Ura, yata wiripnamsil do?’ tenena ati, na kanye tenen ning arye, kum tenenipmanto unune.
Ara, anggun Israel yala nang arye, “Kume, nunda amutuku tuba kum unamabe. Mesir mutuku uk, binuka unamabe. Mesir mutuku binuka upyopura, yuk mutuku nang arye nunti, kum olyanamsiyake. Tonda, yin talin nang arye, ‘Olbinamabʼ tenen, nun ap, yuk mutuku nang ap, opdanukca ati, ‘Kintininamakʼ tenen, terompet lelim nyanyak lelim babye, kum nyanyakba, nun ton kum kekenamabe. Tonda, din ton kum daliba, nun din babye, kum patanamsile. Ati, Mesir mutuku noutamuk pia aunamabe,” nyabuka, yanipnulumce, nyapnamnulum do?
Ati ara, na Allah Yahweh arye, ayupu dipkoprob nyapsine. Na tenepse sum akunum yalyopura, weik yupu arye nyapniba, Amon mutuku unyak nang, sik Amon yala nang ati yuk mutuku yu nang arye olyanamake. Narye lo arepniba, amutuku noutam, ‘Nun deiyok mutuku ani,’ tenenyak asik, el si Raba mutuku, weik mutuku obuka, sice buklopnamake. Tonda, amutuku noutam nirya, ninye aik nirya ap, desa-desa talibuka, unyak mutuku nirya ap, ayu nang arye, uku dabikiba, uku arye anyasik nirya dibuka, sirya daknamle. Winiplyopura, Amon yala nang unyak mutuku nirya ara, asik oldemuk upnamle. Winibikca deice arye, minop talak, yuk mutuku nang arye, Israel nang taleamik tuku alubuka dopromik touk, amutuku tuku nirya ara, Israel nang tuba tamubuka dopropnamake. Na Allah Yahweh arye, akunum nyapmasina ati, aning nirya ara, dipkoprob nong upnamlarya!
Aning lake nyabukba, Daniel el si ton Beltsasar, el ton akunum kekebuk. Kekebukce, nyapmok ning ara, kanye imun ning anya arye, ilil ubuk. Ilil ubukba, aninye deiyoknye birye, Daniel, ara el si ton Beltsasar biti nyabuk. “Na lengdar mapsa ning, nong lak lena ati, anda talima daksakuka, ilil una meme,” nyabuk. Nyabukba, Beltsasar birye tamubuka nyabuk, “Naio. Se, alengdar mapmalam ning, an mal olan nang deice upnamtu ning ati, mapmatumopura, ara teleb bukni, an bidamnye ati, lengdar mapdeipdanmalame. Ati, kanye ikin upnamkile.
Aning eipsirye, na kanye noutam ara, mambul upnuke. Tonda awinimukak eipse ning ati, na pia ilil upnuke. Sintam kiptuura, talye kanye bobuka, telebuk uptinye,’ tenepse bukni, alukunyan akunum yayukopura, na kanye teleb kum upnuke. Asum lukunyan noutam ara, ilil pia weik upnuk ati, yok sirim talipnuke.
Ura, Allah arye ayupu nirya laka nyapnukba, kekepsirye, na talima noutam arye, pia uk dinilye ning ara, min kum winiptue. Ati, na kanye delinulula ning ara, dipkoprob akunum kum kipnuke. Imun kanye weik bobuka ununa ati, na kanye talima noutam ara, uk weik dinulule. Winipmanto ara, ninye dibikceba, aning ati tenebuka, tuku luklamak atonun, na kanye arye, tuba tenenun ning ara, na talima uk dinulul ning ara, kum kwetepmanto unulule.
Allah Yahweh, elcuk na ati, pia moubuka kalikuka dinulule. Wininilirye, na nong noutamak nirya ara, bol teleb unulule. Tonda, na talima noutam ara, kanye nirya obinapna, ayanapna kibuka, na duk-duk noutamak welebinapna, kouluka yanapna kinulule. Ati nara, akunuma ninye ona atonun unune. Wininirye, ninye dibikirye, balamak aik dam atonun unune.
Piblisite