Yeremia 30:10 - Eipomek

¹⁰ Ati ara, na mapu koproba Israel nango, anggun ilil una meme! Na amu tam pil donanye Yakub birye, deiamukba, dadeipdanin yangalamlum nang babye, anggun ilil asa una kumce, ‘Yata wiriptibye do?’ pia kum tenenamlume. Anggun ap, anggunce deiamlumba, dadeipdanin banyak nang ap, anggun mapsilip ap, anggun tam nang nirya ap ara, na Allah arye lyepdopnamsine. Ara, anggun mal olan nang arye opsikce, bobinuka, pia pere sukum deiamsikba, daululumak arye lyepdopnamsine. Winipsilyeba, anggun apu koproba, Yakub birye deiamukba, dadeipdanin yangalamlum nang ara, melibuka lyepropsinya deice arye, anggun tamubuka yamunyakarye, anggunti arepsise mutuku uk yanuka, pia telebuk unamlume. Aminyan talak ara, tonap ilil kum unamsil bukni, telebuk unamlume. Yuk-yuk mutuku nang nirya babye, anggunti, malye kum kipdeipnamsiake.

Yeremia 30:10 Referans Kwoze

Hosea 2:18

“Atalak ara, ‘Bai mutuku yo kan-kan unyak ning ap, maka im deice laklamle ning ap, tonda tukwak ulul ning aning-aning nirya ara, ton kum olyanganamsiyak’ tenen, narye akunum yupu seknamne. Aning ayala-yala nirya ara, talye kanye bobuka unamake. Tonda, sikti, yu kanye bobuka, opdanmanto ninye nirya ara, kum kipdeipnamne. Ati, anggun mal ap, yin ap, parang ya ap, yo taice ap nirya ara, kum daneipnamne. Ati ara, anggun Israel ninye ara, ‘Dan mutuku ninye arye olyanamsiyak do?’ pia ton kum teninamlulume. Teleb kanye bobuka, unamlulume.

Yeremia 29:14

Dipkoprob nyapsine. Dipkoprob epnumunyopura, narye anggunti, lo arepsinyeba, na unye ning eibuka biknamlume. Tonda, wini talak ara, anggun ikin weik ululum bukni, aminyan talak ara, narye anggun tamubuka pia teleb kipdeipnamsine. Tonda, wini talak ara, anggun malye winilamlum ning wenena ati, akunum bataksisirye, donoksiseba, yuk-yuk mutuku, dana-dana tam ulamikce nang yuk-yuk yala nang kan-kan, dabinuka winilamunya babye, aminyan talak, narye anggun boyanuka, anggun mutuku koproba, tonap tamubuka boyanuka deipnamsine. Ayupu ara, na Allah Yahweh arye akunum nyapmasina ati, aning ara dipkoprob kunupnamle!

Yesaya 43:5

Nyabukce ayupu ton nyabuk. Ati anggunda ilil una meme. Narye, anggunti pia kalikuka melinamsine. Na ap, anggun ap neika uk unamabe. Kum bataknamsine. Anggunda yu nang arye tomobuka dana-dana tam mutuku, pera mutuku bobinamsik bukni, na melilamsisa deice arye, keting yangan tam ap, keting wekelban tam ap arye, anggunce deiplumba dadeipdanin yanganamak nang weik tonun, lo arepneba bulubuka yanganamake.

Yesaya 44:2

Ara, nara Allah, na si Yahweh arye an nin min kum deiamkuk talak arye, mun pum tam tuba ulamlumbuk, kintinp deiamkisirye wiamkise. Winyamkisa ati, tuba melikunune. Ati, ance nati ilil una kume. Israel anda, ‘Na amu tam ulirye, na pil donanye unamle’ tenen, akunum wibuka kintinip deiamkise.

Yesaya 35:9

Abisik dam ara, bai kam yu ning do, bai singa kuse yu ning do, ninye olamle ning aning-aning nirya ara, pia kum unamake. Amalye ning nirya pia abisik noutamak kum unamak bukni, Allah arye lyepdeibuk ninye uk abisik banamake.

Yohanes 12:15

‘Yerusalem mutuku unyak ninye ara, ilil una meme. Anggun dilulume. Anggun Weik Ninye Deiyoknye, keledai basam winiryuk ning balye deice bukuka yanganmasile.’ (Zakaria 9:9) Zakaria arye minop talak nyalamuk touk, Yesus arye asum winibuk.

Yeremia 33:16

Atalak noutam ara, Yehuda mutuku noutam unyak nang, anggun mal olan nang oplopniba, anang ap, tonda, Yerusalem mutuku weik asik noutam unyak nang ara, lyepropniba, sik anang nirya ara, teleb kanye deibuka unamake. Sikce, ‘Se, nun mal olan nang arye olyasicakʼ tenen, tuba kum teninamake. Atalak ara, amutuku nang arye, Yerusalem mutuku weik asik ati, “Amutuku el si ati ara, ‘Allah Yahweh nunti lyepsilirye, pia melibuka kalikinamsile,’ “nyabuka, si erenamake.

Yeremia 23:8

Minop talak ara, ayupu nyalamik bukni, aminyan talak ara, aning batakuka winiryuk yupu nyanamake. Ara, “Sik Israel ninye arye, mapu deiamikba, dadeipdanin yangalamik Israel ninye nirya ara, yuk pera mutuku daulamik bukni, Allah el si Yahweh arye, aninye lyebukce, sik mutuku tamubuka boyayuke. Ara, minop talak malye winilamikba, sik wenena ati dopdeibukba, dana-dana tam pera mutuku noutamak ap, utam pera mutuku noutamak ap, daulamik bukni, Allah lyebukce boyayukura, sik mutuku noutamakuk, teleb ubuka, pia aunamake. Allah ara, pia Kam Una Deiyoknye ulule.” Aninguk nyanamake. Tuba tonap, ‘Allah arye Israel ninye lyebuka, Mesir mutuku noutamak arye boyanamsuke,’ tenebuka kum nyanamake.

Yeremia 23:3

Narye anggun deiyok-deiyok nang nirya, akunum wenepsinyopura, naryuk na mapu yuk pera mutuku-mutuku nirya, daunyaka noutamak arye dobuka, na dam tamubuka boyanamsine. Ara, sik malye weik winilamikba, sik wenena ati, lo arepsiba, yu mutuku ninye arye bisibuka, tapu koubuka bobinamikce, dabobinuka bataklobikba, yuk-yuk mutuku daunyake. Sik Israel ninye nirya tamubuka, sik mince ulamik mutuku uk, bulubuka boyaniba, amutuku unamake. Winipnyopura, amutuku uk yanuka ukirye, sik mapu deibikirye, dadeipdanin bakiba, ninye pia weik upnin banamake. Na Allah aryuk, aninye bulubuka deipnamne.

Yeremia 3:18

Atalak ara, Yehuda yala nang ap, Israel yala nang ap, epdanuka neika tonok unamake. Tonda, outam dabu mutuku bobuka donokamik nang babye, tamubuka yakceura, neika tonok unamake. Sik anang nirya ara, narye sik apu yapu ati, areamse mutuku uk tamuyanuka deipnyeba, sikce amutuku pia talibuka, sik mutuku koproba, kibuka unamake.

Zakaria 3:10

Anggun malye ululum ning nirya, kum kipdeipnirye, teleb kipdeipnamsin talak, akunum yalyopura, anggun amutuku unamlum nang nirya arye, sik dana-dana tam unyak nang, anggun kwitcapu ati, yukupmunyeba, anggun dam yanganamake. Yakirye, kanye deibuka ansinipnamlume. Tonda, pia teleb kibuka, dakeiam asa unamlum talak ara, ‘Pia telebe,’ tenepramunce, amutuku noutam, anggun bidamnye arye, kouamlum anggur tapu duk, wa wiamlumak yakirye, kanye deibuka unamlume. Tonda, anggun bidamnye arye, arah yo wa wibuka kouamunye noutam anyuk, anggun kayapu nang ap, ansinipmunce, kanye deibuka, teleb tenelamunce, telebuk unamlume. Na Allah Yahweh arye, ayupu nyapmasina ati, aning nirya ara, dipkoprob nong upnamlarya!

Yehezkiel 38:11

An talima noutam arye nyapnamlame. “Ara, yuk mutuku nang ara, weik asik domikce, daunyak mutuku bukni, ‘Nun mal olan nang yanuka opsicakʼ tenen, sik weik asik domik sukum antanapdongobuka dana-dana tam, cang keil poka kum dobuka unyak mutuku ara, nara binuka weknirye oplopnamne,” nyabuka, laka nyalanamlame. Utenepmince, ayupu ton nyalanamlame. “Ura amutuku ara, keil poka dobuka una ap, bublan tirikdongobuka una ap, pia kum unyaka ati, sik ning ara, ‘Kume nunda teleb diparyuk tunim nyabuka unyabe. Tonda nun ninye on ning nirya ara, akunum kintinibuka unyabe,’ tenenyake. Bukni, ance anang ara, sik dam binuka opnamlame.

Yehezkiel 16:52

Anda, pia malye weik ulyama ati, anda pia ilil tenena ap, alye una ap, unamlyame. Anggunce pia malye weik winilamlum ning ara, pia weik ati, yuk nang arye eibikcopura, adeice arye, ‘Se, sik Samaria mutuku nang arye, malye winilamik ning ara, mitik tonun uka,’ tenenyake. Ati, diba, anggun Israel nang ara, alye weik dakdanalume! Yuk nang nirya arye, anggunti, ‘Sikda pia malye weik wininyake,’ tenebikirye, nyek-nyek anamaka ara, talye kekepmunce, tunim abuka unamlume! Yupu tamubuka nyana kume. Allah arye nyabuk.

Yeremia 30:3

Aning nyapmakina deiyok ara ani. Ara, dipkoprob doyanamle talak ara, na mapu koproba Israel nang ap, Yehuda yala nang ap ara, narye sikti, tuba tamubuka teleb kipdeipnamne. Ara, wini talak sikda, yuk pera mutuku noutam unyak bukni, narye sik apu yapu nang ati areamse mutuku uk, sik wini talak kam unyak nang babye, tamubuka boyanirye, amutuku noutamuk deipnamsine. Boyaniba, sikce amutuku tuku uk talibuka unamake. Ayupu ara, na Allah Yahweh arye akunum nyapdeipsine.” Allah arye nyabuk.

Yeremia 23:6

Narye wibuka deipnamne Diksukum Una Deiyoknye birye, amutuku talinamle talak ara, Yehuda yala ninye nirya lyepnamle. Tonda, Israel ninye ayala-yala nirya ara, ‘Nun oldan nang arye olyanamsiyak do?’ tenena pia kum diparyuk, talye kanye bobuka, kanye deibikirye, teleb ubuka neika unamake. Ilil una ap, oldana ap, kum unamake. Ninye deiyok kipnamlanye biti ara, nyanamaka ara, ani. Ara, ‘Allah Yahweh ara, nun Diksukum Ulisulul Deiyoknye ulule,’ nyanamake.” Allah arye nyabuk.

Yesaya 54:4

Ati, anggunda ‘Yuk ninye arye, nalibuka malye nyapsikiba, alye upsilirye ilil unamsil do?’ kum tenenamlume. Imun kanye bobuka mitang asa kum unamlume. Alye kum dakalanamluma ati nyapsine. Atenen ning ara, adiparyuk bataknamlume. Winipmanto ara, anggun wel ulamlum talak arye, malye ulamlumba, alye ulamsuk ning ara, kekebuka kum dukdongobuka ulamlum ning ara, tuba tonap kum teninamlume. Tonda, sal arye kilapu domica ani, youwak batakiceba, mambul kanye bobuka ulamak touk, kum unamlume. Aning atonun ulamlum bukni, aning babye tonap tuba kum teninamlume. ‘Nun biyuk unyabe,’ kum tenenamlume.

Yesaya 46:13

Narye, anggun ikin kanye bobuka umunye noutam arye lopdeipsinirye, anggun lyen talak ara, dam kipdeipnamsine. Anggun lyepnamsin talak ara, ‘Aminyan dotalak uk yanamle do?’ kum tenenamlulume. Ara, dipkoprob dam uple ati nyapsine. Anggun lyena ati yanyopura, yatanye birye ton, ‘Aning ara kum winiptue,’ tenen, yupu seknutu do? Ara, pia kum winipmantoe. Na Allah arye Yerusalem mutuku umunye ninye nirya ati, dipkoprob lyepnamsine. Tonda, nara pia teleb unye touk, Israel ninye ati, teleb kipdeipnamsine. Winipnirye, yupu laka kipdeipniba, yuk mutuku ninye arye, Israel ninye ati, ‘Se sikda mambul weik ninye,’ nyabuka si erenamsiake.” Allah Yahweh arye nyabuk.

Yesaya 46:11

“Narye, ninye deiyoknye keting yangan tam arye yukupniba, yanamle. Ayanamle talak ara, na tenipsirye nyapse touk yanuka winipnamle. Winipmanto ara, somnyo maka minopce lakuka yalirye, el teneplye touk, mitik tonun kam ning obuka dilamle touk, narye wipdeipnamnanye bira, amaka atonun kibuka, minopce yalirye wininamle. Ati, dipkoprob narye, ‘Wininamle,’ tenen, nyapdeiamse ning ap, tenyamse ning ap nirya ara, dipkoprob nong upnamle. Aning nirya ara, kume kum danamle. Anirya dukulongona uk unamne.”

Kejadian 15:1

Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.

Yesaya 49:25

Bukni, na Allah Yahweh arye nyapsine. Asipdenulum ning ara, diba narye winipnamne. Mal olana deiyok nang arye, anggun Israel ninye obuka sirya daksikce, tapu koubuka bobinamsik bukni, amikip nang awininmaki buk, narye sik Israel ninye ati dopropnamne. Tonda yu nang arye kalikmakibuk, narye sik dam binuka dopropnamne. Ara, dipkoprob na Allah aryuk, sik mal olan nang arye, anggun Israel yala ninye obuka sirya daksik nang ati, narye kwang dakna ati, sik dam binuka obuka sirya daknirye, Israel ninye sik mapu nirya lyepnirye tamubuka boyanamne.

Yesaya 14:3

Anggun Israel nang nirya ara, kekeplulume! Dipkoprob minop talak ara, Babel nang arye opsikce, weik ikin ning dobuka, anggun nong deice delilamsikce ati, imun weik kanye bobuka, ikin pil weik donamlum bukni, aminyan talak ara, Allah arye akunum teleb kipdeipsilyeba, kanamuk unamlume. Min talak ara, yuk mutuku nang arye, anggun Israel nang ati, anggun deice ikin pil deiamsikca ati, weik ikin kanye bobuka ulamlum bukni, aminyan talak ara, anggun ni Allah Yahweh arye, aning kum kipdeiplyeba, anggunda dikdik sebuka, telebuk unamlume.

Yesaya 44:1

Allah el si Yahweh arye el pil donanye, Yakub biti nyabuk. “Se, anti ‘Na tenenanye unamle’ tenen, wipdeipkisiba, an si Israel nyabuka si dopkise. Ati, na yupu uk kekenamnilame.

Yeremia 23:4

Anggun malye winilamlum deiyok nang ara, Israel ninye ton kum kalikinamlulume. Narye, winiryuk nang wipdeipnirye, sik deiyok kibika talipnamak nang deipniba, sikce Israel ninye talibikirye, kalikinamake. Ara, domba weina deiyok nang arye, sik domba basam ati, teleb ubuka weilamak touk, anang arye Israel ninye ati, teleb ubuka kalikikirye melinamake. Atalak ara, na mapu tonoknye babye, kum wangapnamake. Tonda, ‘Se, yata wiriptibye do?’ tenen, ilil kum unamle. Aning ara, dipkoprob winipnamne. Na Allah Yahweh arye nyapsine anya arye, aning ara nong upnamle.” Allah arye nyabuk.

Yeremia 29:11

Ayupu ara, talye ati kum nyapsine. Deiyok ara, na Allah Yahweh arye, anggun teleb kilina ati, ‘Aning-aning winipnamne,’ tenepse ning ara, pia kum lubakiptinye. Tonda, narye anggunti, tenyamsise ning ara, ‘Winibuka-winibuka pia teleb kipdeipsinyopura, pia telebuk unamlume,’ tenyamsise. Narye, ‘Anang ara, malye kipdeipnirye, bataktiniba, pia ikinuk unamake,’ kum tenepsise. Narye anggunti tenyamsise ning ara, ‘E, ‘Naʼ tenen nang ara, pia teleb kipdeipniba, pia moubuka telebuk unamake,’ tenepsisa ati, anggun Israel nang arye, aninguk tenepmunyopura, anggunce, ‘E, diba, doupnamle talak ati, Allah arye teleb ninguk arenamsileʼ teneplumce, na deiceuk, anggun kanye talima deipnuluma deice arye, teniltona kumce, kanye deibuka, telebuk unamlume.

Yeremia 30:7

Se, sikda bicoe! Dipkoprop kanye imun weik sum kipnamle ning ara, ato sum ara, min ton pia kum winilule. Asum noutam ara, na mapu koproba, anggun Israel nang ara, imun kanye bonamaka ati, ilil weik unamak bukni, narye anggunda, atalak noutam arye lyepropnamsine.

Yoel 2:21

“Ati ara, anggun ilil una pia meme. Anggun wa wimunyak nirya ara, anggun kanye talima teleb deice aryuk, darapdongobuka unamlulume. Wininamlum talak nirya ara, ‘Se, Allah Yahweh arye, weik mambul pil dopsuke,’ tenepmunce, kanye deibuka unamlume.

Yesaya 49:12

Winipnyopura, na mapu ara pera mutuku arye, Yerusalem mutuku uk tamubuka yanganamake. Ara, outam arye yanganamake. Tonda, keting kulamle tam arye yanganamake. Tonda eitam arye, mutuku si Sinim mutuku arye Yerusalem mutuku tamubuka yanganamake.

Daniel 12:1

Daniel birye nyabuk, “Malaikat arye, ayupu nyapnukopura, ayupu ton dukdongobuka nyapnuke.” Anyabuk yupu ara, ani. “Siria mutuku taleamuknye, akunum diplyopura, atalak noutam ara, Allah el pil donanye malaikat, el si Mikael, laka kipnamlarya. Mikael bira, sik Israel yala nang ati, melibuka kalikilule. Atalak ara, Daniel an mutuku nang, sik Israel nang kalikinamle bukni, atalak noutam ara, kanye imun weik talak ton yanamle. Aning ara, minop talak ara, kanye imun weik ning ton yangalamuk bukni, aning nirya ara, mitik ikin uka. Asirya talak yanamle ning ara, pia ikin weik upnamle. Minop talak ulamik nang arye dipdongobuka, wini talak unyak nang babye, aning atonun ikin ning ton yanamukba, kum dopromik ning yanamle. Bukni, an mutuku nang, Israel nang kan-kan noutam arye, ninye weik ton, Allah arye lyepropnamlarya. Ara, yata nang do nirya, sik si Allah kam deiyoknye, el buku noutam si sekuka deiamlye nang nirya ara, dipkoprob lyepropnamle.

Hosea 2:20

Na Allah arye anggunti, na kil atonun dopsinirye, tuba melinamsine. Winisiniba, anggunce na Allah Yahweh ati, dipkoprob teleb kibuka, na ap, na wininye ning ap, moubuka kel bikinamlume.” Allah arye, Israel ninye ati nyabuk.

Hosea 6:11

Ati ara, anggun Yehuda tam ululum Israel nang ara, anggun malye winilulum ning dengna ati, na tenepse talak akunum kintinipsise. Atalak ara, anggun malye winilulum ning ati, weik tonun wenepnamsine. Allah arye nyabuk.

Mika 4:9

Bukni, wini talak ara, anggun yata deiyok ati, weik arye engebuka, malye yupu nyalulum do? Tonda, yata ning ati, anggunda mi bomlye kil mi deipnulya ati, uk weik dinmaliba, malye nyabuka dolamle touk winimunce, malye yupu nyabuka engelulum do? Tonda, anggun ninye deiyoknye, Raja elce anggun asik dobuka umunya noutamak, tuba kum ulul do? Anggun melina ati, weik kel nang arye, ‘Teleb una ara ani, malye una ara, ani,’ nyabuka nyasikirye, yupu lipsisikilin nang ap nirya ara, akunum dipsika ati, anggun malye nyabuka engelulum do?