Allah arye mambul kanye arisilya deice arye, engenyap bukni, aning deice arye malye unyap ning nirya batakibirye, lyena ning ati dib tenebibyeura, Allah arye lyesulule. Lyepsilyopura, nun aminyan talak ara, “Se, aning kum winipmatibye,” tenebuka malye kanye pia kum bonyabe. Allah arye wenesilya babye, aminyan ara malye ning batakibirye, telebuk ubirye, kam unamabe. Bukni, sik talye unyak ninye, Allah dib tenena kum ninye ara, sik mambul kanye bobuka engelamikca ani, aminyan talak ara, sik bouku sukuplirye, dipnauk unyake.
Yeremia 3:21 - Eipomek21 Kekelanamlume, Israel nang sik mapu, Weik mutuku kon kumamlyak tukwak bukmakirye, “Melipsilyame,” nyabuka, engebikirye moronamake. Wininamaka deiyok ara, sikce, malye un bisikuk eibuka banyaka deice arye, Allah Yahweh si ati, lubakinyaka deice arye engenamake. Gade chapit la |
Yeremia 3:21
24 Referans Kwoze
Sik bisik yanganamak talak ara, pia teleb ubuka melipniba, kanye deibuka engepnin yanamake. Pin-pin kanye bobuka, engepnin yanamak talak ara, narye sikti, melipnirye, lyu teleb bisikuk bobuka yanamne. Winipniba, sik yan dum keil kum duknamle bisikuk yanganamake. Tonda, pia teleb mek weik ubukakuk boyanamne. Winipniba, Israel ninye ara, teleb kibuka yanganamake. Ara, urdem ati kume. Nara, sik ni koprop Allah ununa anya arye, Israel yala ninye ati ara, ‘Na mapu koprop,’ tenenune. Tonda, Efraim yala ninye ati ara, narye, ‘Sikda, na minop talak deipse mi atonun, weik mambul mi ululume,’ tenesunune. Ati, na mapu du nang atonun unamake. Allah arye nyabuk. Nyabukba, Yeremia birye nyabuk.
Nyabuk ura, ayupu ton dukdongobuka nyabuk. An asing ara, mutuku kon tam ton erebuka dipdelyame! Dan mutuku ton, an kum binmalum talak, yuk nang domik kil ap, neika kum mamdum do? Winipmanto anda, Arab nang pata mutuku ulamikce elilamik atonun, an babye bisik lilun tam bukminyak arye, ‘yata kil ton yalyeba, neika unamnam do?’ tenen, kalikuka dilyame. Winiminya deice arye, amutuku nirya ati malye kililyame. Anyapmana ara, anggun Israel yala nang nirya, amalye winiluluma ati, akunum nyapmasine.
Winipmanto ara, wel kil el kweirya dopmalye luba kilul do? Atonun, taruk morupnamace kilapu, ongolamak teleb baju ap, kweirya ning ap, taruk morupnuce talak ara, luba kiplirye kum ongolul do? Kume, ara kum winipmanto. Bukni, ‘Anggunda, ‘Naʼ tenen, ninye’ tenen, wipdeiamsise ninye arye, na Allah ati, pia akunum luba kipnulum talak nirya ara, keting tamun kum nukmanto, pia weik ubuk.
Israel nango, anggun nirya kekeplulume! Na Allah arye, aning nirya winipnamsina ara, talye ati kuma. Deiyok ara, ani. Allah arye anggun nirya lyepromsuk deiyoknye bira na uka. Tonda, na Allah arye anggunti tuba melilamsirye, nara weik keil mutuku dup erebuka buklyeba, ninye arye, ‘Yu nang arye opsicakʼ tenen, akeil deice welebikirye duknulamak touk, ulamsise. Naryuk anggunti, pia melibuka kaleklamsise. Bukni anggunce nati akunum lubakipnulume. Aning ati ara, anggunce sik isa si erena ati, ‘Nun isa arye melipnamsiakʼ tenen, urasin teleb yala ning dobuka, wa wibuka koululume. Aning atonun, teleb pamlye ning taruk ton sekmunce, aning isa si erena ati tuba koululume.
Dibon weik asik unyak nang ara, sik isa si erenyak mutuku kon deice welebikirye, weik arye engenmake. Sik Moab mutuku unyak nang ara, sik mal olan nang arye, Nebo mutuku ap, Medeba mutuku ap, kum kipdeipmaka ati, pia bico uplyeba, ‘Seʼ tenen, weik yupu arye nyabuka, engenauk unamake. Tonda, sik kisok potong, delo kuknamake. Aning atonun, sik cang bam potong, akunum kopnamake. Ara, amutuku bitinye tenebikirye, bico uplyeba, tonap engenauk unmaka ati, bikilina ati, amutuku ninye nirya arye, sik potong kopnamake.
Anggun Israel ninye nirya, talibuka umunye ninye weik deiyok nang ap, Yakub birye deibukba, dadeipdanin yangalamik ani, wini talak amutuku noutam weik deiyok nang kibuka ululum ninye, anggun nirya ara, narye nyapsine yupu uk, moubuka kekeplulume. Ara, sikce teleb kibuka diksukum winin ning, aupmalebuk batakalulumce, kirikuka malye un ninguk winimunya ati, laka nyapsine.
Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.
Winipnamna deiyok ton, ani. Pia ouku weikto talak ara, sik Israel yala nang nirya arye, sik kwepdeiamuka deiyoknye biti, tenina kumce, akunum luba kipnarye, malyeuk unyake. Winibuka ukirye, sik unaka ati, pia teleb weik aik dokirye, anyaik noutamuk kanye deibuka unyake. Tonda, aning atonun, sik Yehuda mutuku noutam unyak nang arye, ‘Nun mal olan nang arye yanuka opsicakʼ tenen, kat weik keil arye deibuka, pia mikip weik asik donyake. Bukni, winilamika babye, narye uku dopkwetepnyopura, aweik asik ap, kat keil arye domik aik ap, urasin pia teleb istana aik domik ning nirya ara, uku buk arye dibuka, sirya daknamle. Tonda, sik unyak mutuku noutam dauamlye ning nirya babye, adopkwetepnamne uku arye diplirye, sirya daknamle. Na Allah arye nyapne.
Ati, na Allah Yahweh, aning-aning nirya deice tam erebuka, Pia Mikip Weik Deiyoknye ununye birye, nyapne. Ance na ap, na si ap ati, aminyan kipdeipnulumce, batakuka lubakipnulume. Ance akunum batanuluma ati, anda, ‘Sal ap maptibyeʼ tenena ap, pia malye-malye weik una ap, malye un ning patana ap ulamluma ati, adeice arye, an yuk ikin deipdalume.
Anyasik noutamaik ara, weik uk ap, din patana ap, ninye bai tam arye daunyak nang arye, olanamaka deice arye, ninye weik tam ara, dibinamake. Bukni, mitikto tam nang arye, bai sakuka, mutuku-mutuku kon bukuk noutam, bikbik abuka bindopnamake. Abinuka unamakak ara, sum maka ara, weik mutuku amu tam, lu ubukak bukuka engelamaka atonun, binuka engenamake. Winipnamaka deiyok ara, sik anang nirya ara, ‘Se, nun bidamnye malye ulamupa deice arye, wenepsukba, dibinauk unyabe,’ tenebikirye, malye yupu nyabuka, malye kanye bonamake.
Ninye sik bidamang aniryuk, ititildanyaka deiyok ara, talye arye kume. Sik bidamang arye, walwal unyaka deice arye, ititildanyake. Malye ulilanyak bukni, sik bidamang tenenyaka deice arye, ‘Kume nun ikin weik usilye ning arisilya deiyoknye bira, Allah elca,’ nyabuka, Allah Yahweh ati, malye yupu nyanyake. Bukni, dipkoprob sik ikin ning dolonyaka deiyok ara, sik deice uk ulule.
Ninye ton, tilila yupu nyana kumce, diksukum ninguk talibuka ululnye bira, kanye lamapdongobuka teleb bisikuk banamle. Elda telebuk unamle. Bukni, yata nang do nirya, tenepce arye minina yupu uk nyanyakce, kirikuka yuk malye un nang ban bisik banyak ninye ara, wini talak sik malye un ning kunusa donyak bukni, aminyan talak ara, yuk ninye nirya arye, sik malye un ning ati, kel kibikirye, lakak arye laka nyanamake.
Allah arye anye akunum ila tamubuka teleb kipdeiplyeura, anang nirya wekuka kekenmacak aryuk, el anye birye nyapnamle. “Narye teleb ning ara, malye kilamsirye, malye ning ara, ‘Aning telebe,’ nyabuka, talye yupu nyalamsirye, pia malye ulamse. Bukni, Allah elce nati kum wenebuka opnuke. Bico tenepnukce, na malye ulamse ning nirya ara, biknukce winipnuke,” nyabuka, laka nyanamle.
Winibukopura, Yahweh arye dopreipmok malaikat arye, Bileam biti asipdeyuk. “Anda yata ati, akeledai basam ara, like winilye yo kama arye, debuka opmalam do? Na kanye ara, ance, ‘Balak dam binirye, winipnamane,’ tenepmalam ara, ‘Dipkoprop malye winipminyak’ tenen, ati ara, na yanmance an binmanto bisik nirya, sekdongopmakine. Abisik noutamak tikmana deiyok ara, ‘El bisik sekniba kum binule’ tenen, winipmakine. Malye winipmanto upmalama deice arye, nati winilenmanilame.
Allah arye nyabuk. “Se, anggun Israel yala nango. Anggunda, yata isa ati, ilil weik upsuka deice arye, nati minin yupu ap, tilila yupu ap nyalamlumce, nati akunum bataknulum do? Sik aisa ara, yatato wininyaka ati, anggun nirya arye, ilil upsukba, anggunce, nati tilila yupu nyalamnulum do? Winilamluma deice, na Allah arye anggunti weik tonun melilamsise ning nirya ara, pia luba kipnulumce, nati diba tenebuka, pia tuba kum tenenululume do? Tonda, narye anggunti, wenen yupu weik tonun ton kum nyalamsise. Kum wenelamsirye, anggun malye ululum ning ati el lina kumce, biklamsesa ati, anggun ning ara, ‘Elda yata ton winipsutu do? Elce yata wiripnamsil do, kume?’ tenelamlumce, nati tonap ilil kum usulul do? Anggunda, ‘Kume, nunce yuk talye si erenyaba ara, tuba wininamap,’ tenelulum do?
Ati ara, na Allah arye nyapsine. Anggun Yerusalem mutuku ninye arye, ‘Se, nun malye unyabe,’ tenemunce, unamlume. Tonok ning ara, anggunce, ‘Nun malye wininyabe’ tenen, anggun kisok potong nirya, kobuka donoknamlume. Winipmunce, weik mutuku konak tikmunce, ngalukuka, malye nyapmunce, imun kanye bobuka, engena deice mot senamlume. Ara, urdem ati kume. Deiyok ara, anggun ni koprop Allah, el si Yahweh arye, anggun wini talak ululum ninye nirya ati, akunum bataknamasile. Anggunda, malye weik winiluluma deice arye, Allah el weik yu upliba, lik ati, anggun akunum bataknamasile. Anggun ti, tuba melibuka kum dinamsile. Anggun ti, akunum batakuka, luba kipnamsile.
Narye sik yuk pera mutuku mal olan nang ati, lo arepnirye, dopdeipniba, ninye una kum, pia kata ubuk mutuku kon deice ara, yanibuka banmakirye, ‘Naʼ tenen nang ati olyanamake. Narye sik mal olan nang dopdeipniba, amutuku nirya ara, yanuka malye kipdeipnamsiake. Winipniba, ninye tonok nang babye, teleb ton kum unamle. Winipmanto ara, na Allah Yahweh arye, na ninye on ya dobuka, Israel nang unyak mutuku noutam nirya, omutuku sirya, atam sirya, anoutam nirya babye, Israel nang weik tonun obuka, sirya dakanamake! Ninye tonoknye babye, talye kanye bobuka, kum unamake.
Aning ara, anggun dengna ati dopropnamlume. Tonda, anggunce aning dopropnamluma ati ara, na Allah arye anggunti, ‘Akunuma, aning dopropnamakʼ tenen, “Akunum kiklipdeibuka deipse,” nyabuka, na Allah arye akunum nyapdeipsise. Deiyok ara, anggunce na Allah ati, akunum bataknulumce, tilila yupu atibuk diba tenepluma ati, ayupu akunum nyapdeipsise.
Ara, na Allah arye wipdeiamse ninye, ‘Naʼ tenen nang, Israel ninye nirya arye, nati akunum batakalongoninyake. Wininyakce, talye ning ati, ‘Nun ni koproba anye,’ nyabuka, dipkoprob kum melipmanto ning bukni, sik nirya arye, Isa Mutuku Dongonye siuk kibuka, si erenyakce, siltong teleb ning ap, kam ning ap dobuka, uku danyake. Minop talak, narye sikti, ‘Abisik teleb ubuka banalyame,’ nyabuka, peterelamse bisik ara, batakuka, talye malye winin bisikuk banyake. Winipmanto ara, weik karayong bisik, diksukumuk una ati, teleb bisik yabuka deiamse ning batakuka, talye bai tam kwalin bisikuk banyake.
Piblisite