Anggun deice ara, kanye imun weik ning deiyok bitinye ara, akunum anggun dam yanuka, anggunti weik ikin arye teiknamsile. Ara, mal olan deice arye, anggun Yerusalem mutuku nang ara, akunum malye kibuka, sung-sunga buklopnamsiyake. Tonda, anggun mutuku noutam unyak nang ara, din patana weik talak kibukba, dopropmalume. Winibuka ikin weik ulamlum bukni, yata mutuku nang arye, anggunti, bico upliba, yanuka melipnamsiyak do? Yata mutuku nang arye yanuka, anggun melipnamsiyak do? Kume, narye yuk mutuku nang dopropniba, anggun dam kum yanuka melipnamsiyake.
Yeremia 24:10 - Eipomek10 Aninguk kum bukni, narye, sik Yehuda mutuku ulamik nang, yuk-yuk mutuku binuka unamak mutuku noutam nirya ara, na Allah arye ninye olan ning deiyokuk arepnyeba, yuk nang ap olanauk wininamake. Tonda, din patan ning arepnyeba, din patana deiceuk unamake. Tonda, ‘Ninye weik tonun diptingʼ tenen, wenen ning, sik dam deipnyopura, sik weik tonun dipnamake. Winipnamne bukni, akunum winipnyopura, yuk-yuk mutuku noutam bukni, sik Yehuda mutuku unamak nang nirya ara, dibuka sirya daknamake. Winibikceba, minop talak, narye sik apu yapu nang ati, ‘Amutuku arepnamsine,’ nyalin yupu deice arye nyalamsa ani, amutuku anggunti arepsise mutuku ara, Yehuda yala nang, ninye tonok babye, tuba kum unamake. Sik nirya kum kipdeipnamnarya! Allah arye nyabukba, na Yeremia birye kekepsirye, asukum sekeipse. Gade chapit la |
Yeremia 24:10
27 Referans Kwoze
Ati ara, anda Yeheskiel birye, sik Israel nang ati nyapnamlame. “Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Nara Allah, dipkoprob kam pia unune. Aning dip ulamle touk, narye nyapnusin yupu ara, ‘Se, dipkoprob yupu nyapmasileʼ tenen, kekepnululume. Ara, dan mutuku do nirya, pia weik asik ap, mitik asik ap dolamika ara, wini talak oldem mutuku unyak nang nirya ara, yu nang arye olyakirye, opsikiba, dipnamake. Tonda, ninye weikak kum bukni, pera pata mutuku noutam unyak nang nirya ara, bai tam talye kam ulye yu ning dopdeipniba, anggun dam yanuka, anggun nirya obuka dipnamsile. Tonda, mutuku dup bukukak ap, keil deiya pum tam duknulbiyik nang ap nirya ara, narye kanye imun weikuk dina deiyok ning arepnyeba, anang diplyopura, sik nirya dipnamake.
Yerusalem mutuku weik asik domikce, cang poka keil arye, antapdongobuka domik ning bai tam ara, yuk mutuku yin talin nang arye, parang ya bobikirye, ‘Amutuku nang nirya opnuyabeʼ tenen, kintinibuka warikilyanamake. Tonda, Yerusalem weik asik domik noutam ara, ikin ning arepniba, kanye imun weik uk dinamle. Tonda, din ning kum kipdeipniba, din patana weik unamle. Yata nang do nirya, amutuku noutam unyak nang, pia weik tonun dipnamake.
Ati ara, na Allah Yahweh arye, anggunti nyapsine. Narye anggunti, ‘Sik talye pil don nang, Ibrani nang nirya ara, batakdongoplulume,’ nyapsise touk, kum winiplume. Ati, wini talak ara, na Allah arye, anggun Israel yala nang ati, lopdeipnusine. Ara, talye kanye bobuka, yukak binuka, teleb kum unamlum bukni, narye bataksinyopura, anggun mal olan nang arye, ninye on ya arye opnamsiake. Tonda, imun kanye bon uk weik dipsilyopura, anggun nong dibina ap, tonda din ning kum dalyopura, din patana ap deice arye, anggun dibinauk unamlume. Akanye imun ning akunum arepsinyeba, ikin weik umunyopura, sik dana-dana tam, yuk-yuk mutuku nang ap, yuk mutuku im sirya, mutuku sirya nirya unyak nang arye, eipsikirye, ‘Se, sik Israel nang ara, yatato ning ubukba, pia ikin weik unyak doʼ tenen, ilil weik upnamle.
Bukni, winipmanto ara, ninye arye weik ikin yo dobuka, sapi basam un dam kirikiceba, tapu libuka, ikin pil dolamle touk, wini talak ara, winipnamsine. Ara, yata mutuku nang do nirya, tukwak mutuku nirya unyak nang nirya ap, sik talibuka unyak ninye deiyok nang nirya ap ati, Raja Nebukadnesar yanuka oplirye, ‘Na pil talye dopnululume!’ nyabuka, dinamle pil areplyeba, sikce yuk mutuku nang, el yupu kekena kum arye, ‘El pil kum donamabe,’ tenenamak nang nirya ara, na Allah aryuk, sik wenena ati, kum kipdeipnamsine. Ara, narye amutuku nang dam mal olan nang dobuka delina ap, din patan ning arena ap, kanye imun uk talipsilye, nang weika arye dina ap arepnyeura, aikin ning nirya deice arye, amutuku nang nirya kum kipdeipnamne. Winibuka pia winipnyebuk, sik bikikirye, sik nirya ara, Raja Nebukadnesar el amu tamuk unamake. Kumopura, narye lo arepnyeba, Raja Nebukadnesar birye, sik yuk mutuku nang nirya, obuka sirya daknamnarya.
Aninguk kume. Yehuda yala ninye ap, Yerusalem mutuku ululum ninye ap, anggun nirya arye, ‘Amutuku noutamak ara, winipnamabe,’ tenelulum ning nirya ara, kum kipdeipnamne. Ara, narye sik yuk mutuku unyak nang, mikip arepneba, anggun Yehuda tam noutamak ululum ninye ap, Yerusalem mutuku ululum ninye ap nirya ara, obuka sirya daknamsiake. Atalak ara, narye anggun kum lyepnamsine. Anggunda, bataknamsine. Winipniba, anggun oldan ninye arye, ya dobuka anggunti opsice talak ara, eipnamake. Anggun ti, ‘Nun like,’ tenenyak ninye arye, anggun Israel yala ninye dipnamlum talak eipnamsiyake. Anggun opsicopura, yuk nang arye anggun nong nirya ara, kum weipnamsiyake. Kume, oplopsikiba, talye bai tam unyak ning ap, talye maka ap yakirye, yanuka dipnamsiyake.
Ara ani. Amutuku noutam unamak nang nirya ara, kanye imun weik uk dina deiyok ning yalirye, amutuku noutam unamak nang, pia weik tonun dipnamake. Adipnamak nang ara, sik kayapu nang arye, anang ati kum engenamake. Tonda, amutuku yuk nang ara, anggun mal olanmamunya ani, ninye on parang arye opnamsiake. Ton nang ara, sik din ning kum daliba, din patan deice arye, dipnamake. Tonda, sik dipnamak nang, sik tam nang arye sik nong dobuka, tuku palibuka, teleb kibuka kum weipnamake. Sik adipnamak nang nong ara, talye tuku deiceuk, dana-dana tam batakikiba, lyupnamle. Ara ninye arye, tuku deice talye oplomikiba saklamle touk, unamake. Ati ara, anang akunum dibikcopura, sik nong ara, talye tuku deiceuk bataksikiba, im tam lakuka balamle maka ap, bai mutuku talye daulamle kam ning aryuk, adipnamak nang, sik nong dobuka dinamake.
Nyapminba, sik aninye arye anti, “Se, nunda dan mutuku binamaba ati, nyapmasil do?” nyabuka asipdekicopura, ance tamubuka nyapnulyame. Allah arye nyapmasila ara ani. Narye, tenelamse touk unamake. Narye, ‘Aninye weik kanye imun uk dilya deice arye dipnamake,’ tenepse. Aninye ara, weik uk dilamlibuk, dipkoprob dipnamake. Tonda, narye tenepse touk, ‘Mal olanak bikiba, ya deice arye, obikiba dipnamake,’ tenepse. Tonda, aninye ara, mal olanmacak bikiba, ya sekna deice arye dipnamake. Tonda, narye, ‘Din ning patana deice arye dipnamake,’ tenepse. Ninye ara, dina nirya patalye deice arye dibinamake. Winibikce deice arye, sik nirya ara, dipna bisikuk banamake. Tonda narye, ‘Wenena aik binuka deibikiba, bulamica deice arye dibinamake,’ tenepse ninye ara, tapu koubikirye, wenena aik dongobikiba, aulamica deice arye dipnamake. Narye, sik Israel ninye tenyamse touk, sik nirya ara, dipna bisikuk banamake.
Dipkoprob anggun Israel nang ati, wenepnamsina ara, ani. Narye sik amutuku unyak nang ara, dobukapnirye, sik apu yapu nang babye, pia kum bikamik mutuku nang, yuk pera mutuku nang deice deipnamne. Ara, narye yuk pera mutuku nang ati, lo arepnyopura, anang arye, sik Israel nang dam yanuka obikirye, dobuka tapu koubikirye, sik yuk pera mutuku tamubuka bobinamake. Tonda, mal olan talak arye, ‘Se, nun nirya obuka, sice buklopnamsiak’ tenen, ilil weik upliba, bai sakuka bindobikirye, bokdanuka mutuku yuk-yuk balona ati, bikbik abuka banamake. Bukni, narye yin talin nang ton, tuba dobuka deipniba, Israel nang yuk pera mutuku dabinamak nang nirya ara, ninye on parang ya arye, obuka sirya daknamake. Ara, yin nang dopdeipniba, yanuka opnamaka ara, sik asa arye kum wininamake. Ara, Israel nang, sik wenena ati, na Allah arye mikip weik arepniba, adeice yuk mutuku yin talen nang arye, yanuka obuka sirya daknamake. Allah arye nyabuk.
Na mapu koproba, Israel nang arye, na Allah Yahweh ati, tilila yupu ton, na dam nyanyake. Sikce nyaniyaka ara, ani. Sikce, “Kume, nunce malye winibibya babye, Allah arye nun dam ton, wenen ning yala-yala nirya ara, kum arepnamsile,” nyabik. Allah arye yata winipnamsil do? Kume, nun dam, weik kanye imun uk, ninye diplyeba dakdongopdanin balamak uk ap, tonda din patana ap, tonda mal olan nang arye yanuka, osikce ning ap, aning nirya kum kipnamsile.
Dinmasiba, tonok kuda basam tonap yayukba, el urasin ara, bol ekamuk kuda basam unmokba, eipse. Akuda deice bukmoknye, el si ara Ninye Dipna Deiyoknye bukmok. El menekuka banmokba, el aminyan tam meneng dam yanganmok ning ara, akunum diblamice ninye unyak aik talibuka, ulye deiyoknye yanganmok. Ayanganmarik nang bitinye ara, Allah arye, ninye dipna deiyok ning aribukba, doproprik. Ara tukwak mutuku im sirya, mutuku sirya nirya unyak ninye noutamak bukni, anirya dobuka yupa dumbarye wilibuka deiprikirye, yupa winilye batakuka, ‘Tukwak ninye yupa tonok weik arye oplopnamrak’ tenen, dipna deiyok ning aribukba, doproprik. Dipna deiyok ning doproprikce, sik mikip deice arye pil dopricopura, ninye weika arye dipnamak ara, ani. Ton tam nang arye, ton tam nang ati ya ap, yin ap arye pia olanamaka deice arye, ninye weik dibinamake. Tonda din ning aning-aning nirya kum daliba, din patapliba, din dina kum deice arye, ninye weik dibinamake. Tonda, kanye imun uk, weika arye dilamlyani, ninye weik tonap sakdanin balirye, weika arye dibinamake. Ton ning ara, ninye kum unyakak, bai mutuku noutamak kam ulul ning nirya arye, yu weik upliba, ninye weik olyanganamake.
Allah Yahweh arye, anggun wenena ati, kanye imun uk, anggun dam deipsiliba, uk talepsilirye, anggunce dakdongopdanin banamlume. Anggun unamlumak ara, kanye imun weikuk, yala-yala nirya, deiyok tuba-tuba yalyeura, dopropmunce, ikin weik deiceuk unamlume. Winibuka ulamunya deice aryuk, anggunce, ‘Amutuku dopropnuyabe, asukumuk unamabeʼ tenen, bimunye noutam ara, dibinamlume. Adeice arye tonoknye babye, anggun unamlum mutuku noutam arye, ton kam kum unamlume. Auk dilamsilya deice arye, anggun nirya ara, dibina dem unamlume.
Weik asik domik mutuku, Yerusalem mutuku tuba unamak nang nirya ara, narye sik wenena ati arepniba, kanye imun weik deice arye dipnamlume. Ara, ton nang ara, din patana weik deice arye, ninye weik tonun dipnamlume. Ton nang ara, imun kanye weik bon uk, naryuk arepniba, kanye imun weik ulamle uk ara, tonye talipliba, tonye babye dakalongolamak uk deiyok ning ara, anggun dam yalyopura, uk dipnamla deice arye, ninye weik tonun ton dipnamake. Aning deice arye, kum dipnamlum nang, kam tuba unamak nang ara, mal olan deice arye, ninye weik tonun ton dipnamlume. Bukni, anggun aweik asik domumnye sukum, uk tuba unyak nang kan-kan arye, Yerusalem mutuku asik batakuka bikirye, anggun mal olan nang, Raja Babel biti, “Nunda, anggun ap kum olanamaba ati, anggunce datalipsululume. Anggun amu tamuk unamabe!” nyabikce nang ara, el yin nang arye obikiba, kum dipnamake. Raja Babel birye tomopnamsil bukni, anggun tuba kam unamluma ara, teleb uka. Winipmanto ara, yin nang arye, yuk mutuku nang obikirye, sirya dakikcopura, sik atam nang talilamik bona nirya, alubuka dololamak touk, Babel nang arye, kum opsikiba, anggun tuba kam unamlum nang ara, sikce bobuka, sik mutuku bobinamsiake.
Yata nang do nirya, anggun kan-kan noutam ara, malye kibuka, ‘Kume, nunda Mesir mutuku uk, binuka unamapʼ tenen, bilumce, Mesir mutuku binuka, unamlum nang nirya ara, olan deice arye opsikiba dipnamlume. Tonda, din patan deice arye dipnamlume. Tonda, tonye talipman uk buk, tonye dakalongon uk weik disilya deice arye, dipnamlume. Dipkoprop nyapsine, na Allah arye, ikin ning dobuka, anggun malye winilulum nang deice deipnamsin ning ara, tonoknye babye, kum bataknamsile. Aikin ning nirya ara, dopropnamlume. Aikin ning dopropmunya deice arye, anggun nirya ara, dipnamlume. Tonoknye babye, kam kum unamle. Sirya obuka daknamsine.
Nyabukce, ayupu ton nyabuk. “Allah el si Yahweh arye, Israel ninye ati wenen ning sik deice deiplyopura, mekwen amu tam ulul ning nirya ara, lu tamulamla atonun, Israel ninye babye wininamake. Tonda Allah arye, Israel ninye sik apu yapu punun nang ati, ‘Teleb mutuku talinamake’ tenen, areamuk mutuku ara, tamubuka dopropnamle. Akunum tamubuka doproplyopura, ninye arye talye palamle ning kwinibuka donoklamak touk, Israel ninye nirya dobuka Efrat mek koubuka otam donoknamle. Yuk mutuku yu nang arye sirya obuka dakikirye, bobuka yuk mutuku bobinamake. Winipnamla deiyok ara, ani. Israel ninye arye, Isa Mutuku Dongonye si Asyera si erena ati, cang yo ikukabice, aning si erelamik. Asyera Isa Mutuku Dongonye sisibuka, si erelamika ati, Allah el si Yahweh arye, yu ning sik deice deipnamle.
Israel nang arye, amalye winin ning nirya tuba-tuba wininyaka ati ara, na Allah Yahweh, im deice yin talin malaikat nirya, sik deiyoknye ununa ati, na mikip weiknye unune. Tonda, narye anggun Israel nang nirya, melibuka kaliklamsiba, sikce nati, ‘Nun ni ani,’ nyabuka, na siuk erelamnik. Naryuk ayupu nyapsine. Nara, Israel nang, na mapu koproba, sik malye wininyak ning ara, mikip deice arye wenepnamne. Winipmanto ara, anggun din ning ara, pia mitang ulamle ninguk arenamsine. Tonda, ninye dibina ati, pia yu mek, el si racun arepniba, dibikirye dibinamake. Akanye imun ning nirya ara, narye arepsiniba, ikin weik unamsile.
Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.
Na Allah Yahweh arye, im deice unyak yin talin malaikat nirya sik deiyoknye unirye, anggunti ayupu nyapnusine. Dipkoprob amutuku tuba ululum nang nirya ati, ninye mal olan ning ap, din patan ning ap, tonda uk dina deiyok ning weik arepnyeba, uk yala dakdongopdanin ban ning ap, anggun Yehuda mutuku ululum nang deice deipnamsine. Narye akanye imun ning nirya dobuka, anggun nong deice deipyopura, anggun ikin weik asa unamluma ati winipmanto yupu ton nyapnusine. Ara, ninye arye kwarang duk dakuka, ‘Dipnuyapʼ tenen, dakikirye, deipmake bukni, lyubuka tong pia weik nyaliba, dipmanto kum upliba, anang arye ayo duk batakuka donoklamak touk, na Allah arye anggunti atonun winipnamsine.”
Anggun amutuku ululum nang banamlumak nirya ara, na Allah arye eibuka biknirye, mal olan ning ap, din patan ning ap, tonda uk dilirye dakdongopdanin balamak nakina deiyok ning ap, arepnamsine. Narye anggun amutuku ululum nang deice, kanye imun weik ning arepniba, yuk-yuk mutuku nang nirya eibikirye, ilil upnamle. Tonda, anggun wenena ati malye kipdeipsiniba, yuk mutuku ninye, im sirya, mutuku sirya nirya unyak nang nirya arye, “Se, anango, Yerusalem mutuku ara, malyeuk ulamikba, Allah arye malye nyabuka supbuk mutuku ani,” nyabuka, malye nyanamsiake. Tonda, eipsikirye, ‘Se, yu nang arye, anang obuka, sice buklopmaka ara, ilil upsile,’ tenebikirye, duk-duk nyabikirye, kum-kum dakanamake. Tonda, anggun malye-malye winilamlumba, narye anggun namin kipsisirye, yuk-yuk pera mutuku inibuka bobisisak arye dopkwetepsisiba, yuk mutuku ninye yuk yala nirya ap, neika unamlumak nirya, anang arye anggunti, akutubuka nalisikceba, anggun malye kipdeipnamsin nang nirya ara, alye weik dakdanamlume.
Babel mutuku yin talin nang yayikce, nun weik asik dana-dana tam, keil poka dobuka antanap dongamupu dam ara, tuku weik tonun, lukuka deipmaka deice arye, aning deice welebuka, nun mutuku noutam wekikirye, opnamsiake. Apil ara, akunum kintinibuka dobik. Ati sik Babel mutuku nang arye, nun mutuku ara, malye kibikcak arye, alubuka dopropnamake. Wini talak ara, sikce amutuku akunum warekdongopmake. Winibikiba, din patana deice ap, dakdanin ban uk dina deice ap arye, nunda mitang nang unyaba ati, sik Babel nang taruk deice, amutuku asik dopropnamake. Ati na ni Allah, ance, ‘Winipnamne,’ tenyamlumce, nyamsulum yupu nirya ara, atalak akunum lak upmalba, eipmabe. An babye, akunum eibuka bikmalame.
Bukni, na ni Allah, nara mitik tonun walwal upnile. Deiyok ara, ance nati, “Hanameel taleamuk tuku deknulyame. Tonda, atuku deknuminye talak ara, keil uang arepnuminye talak el lina ati, ninye ton bulupdeipminba, eipnamake,” nyapdeipnulumba, atuku akunum deksiba, ninye nirya arye, ‘Akunum dekmaleʼ tenen, eibuka bikike. Winibuka, atuku akunum dekmasa ani, Babel mutuku nang arye, amutuku tuku ara, yanuka alubuka dopropnamaka ati, nara walwal upnile na nio. Ura, na ni Allaho, anda Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyama ati, ance, ‘Winipnulyame,’ nyapnulum touk, akunum winipse. Nabi Yeremia birye, Allah ati nyabuka morobuk.
Ati ara, anggun moubuka tenipnamlume. Anggunce, ‘Nun amutuku, Mesir mutuku binuka teleb unamapʼ tenen, patapsiliba, tenipnamlum mutuku ara, dipkoprob amutuku binuka unamlum talak ara, anggun nirya dipnamlume. Ara, yuk mutuku yu nang arye, ninye on parang dobikirye, olyanamsiake. Tonda, din patana deice arye, dipnamlume. Tonda, ninye dakdanin balamak uk talina ap, imun weik ulamle uk talipsilya deice arye, dipnamlume. Aning ara, akunum nyapmasine,” Yeremia birye nyabuk. Ara Yeremia birye, sik Israel yala nang bukni, Yudea mutuku mitik tonun tuba kam unmekce, ‘Mesir mutuku binuka unamabe,’ tenyamik nang ati, ayupu nyabuk.
Tonda, na Allah Yahweh, aning-aning nirya talibuka, deice tam erebuka, Pia Mikip Weik Ununye birye nyapkine. Yeheskiel anda, adiparyuk, an taruk bokmince, an yan ara, tuku deice mikip arye yanipnulyame. Winipminyopura, engepmince, weik yupu deice arye nyapnulyame. ‘Se, anggun nirya moubuka teniplulume! Israel yala nang arye, anggun malye una ap, narye, ‘Aning ara, pia malye aning ara, winina telebe nyapsa ati, aning ara, pia kum wininamlume,’ nyabuka, lak nyapse ning bukni, sikce amalye winin ninguk, talibuka winilamik. Ati ara, narye, ninye oldana ap, kanye imun weik uk, yala-yala arepnamne ning ap, kanye imun weik din patana arepnamne ning ap deice arye, Israel nang, pia weik tonun dibinamake.
Piblisite