Yeremia 20:9 - Eipomek

⁹ Winibicopura, na ni Allah ance, na dam nyapmaniminye yupu ati ara, ‘Akunuma, Allah el si deice yupu ton, yuk nang dam kum nyanamne. ‘El si ton, lak kum sisinamne,’ tenen, kanye talima noutamakuk tenenune. Winibuka tenenun bukni, weik uku buk dilamle atonun, ‘Ance nyaliniminye yupu, dungnupnamne’ tenen, laka kum nyapnyopura, na kanye talima noutamak, weik uk dinulule. Na kanye talima noutamak ikin weik uniliba, mikip kum unilye talak ara, ‘Pia tunim abuka kum uptinye,’ tenen, malye kanye bonune. Ati, ‘Ance nyaniminye yupu ara, kum dungnuptinye,’ tenenune.

Yeremia 20:9 Referans Kwoze

Mazmur 39:3

Min talak ara, yupu nirya nyana kumce, talye tunim abuka unmase. Atalak noutam ara, narye teleb winin ning babye, pil kum dolamse. Talya tunim abuka ulamsirye, yupu babye kum nyalamse. Winilamsa ati ara, ikin upnukba, imun kanye bobuka, minop talak ulamase.

Rasul 4:20

Ara, nun eibupe ning ap, kekebupe ning ap, peterenamne ning ap ara, kum batakdongoptinimnye. Ara, kum winipmanto. Pia peterenamnam atia,” Peterus ap, Yohanes ap arye sik Sandeheren deiyok nang ati nyaprik.

Yehezkiel 3:14

Lelim weik kekepse talak ara, Allah el Dib Kanye arye na dobuka, welebinukce, yukak binuka deipnukopura, adiparyuk Allah Yahweh, el mikip, na kanye talima pumak moubuka talipnuke. Winipnuk talak ara, na kanye pun tam ara, ‘Yata deiyok ati do?’ tenen, na kanye boktopnukce, malye kanye bobuka engepsirye, mitik anun ton, teniltonauk tuba upnuk.

Rasul 17:16

Ura, Paulus arye, ‘Silas ap, Timotius ap, na ak yanamdak’ tenen, dinmok talak ara, Atena mutuku ninye arye sik taruk deice arye ninye urasin atonun kibuka puturup deipnarye, talye ning bukni, si erelamik ning, anyasik noutamak weik deiamik ning ara, eibuk. Eibukce, ‘Se,’ tenebuka pia malye kanye bobuk.

Yeremia 6:11

Na ni Allah, an yu tenipminye touk, na babye sik anang ati, yu uniliba derenune. ‘Na yu unulul ning ara, tuba pia kum darapdongobuka utinye,’ nyabuka, Allah dam lak nyapse. Nyapsiba, Allah arye tamubuka, na dam yanuka nyapnuk. “Ayu ukilye ning ara, ance ayu bobinuka, amutuku nang, sik mapu bisik banmakca noutam ap, tonda amutuku wel nang, bulubuka unamakak ap, na yupu bobinuka, laka nyapnulyame. Tonda, sal babye, sikce domik kilapu babye, tonda wisi nang babye nirya ara, sik deice ayu yupu bobinuka, lak nyapminyeba, dopropnamake.” Allah arye, ayupu nyapdeipnuke.

Lukas 9:62

Nyabukura, Yesus arye winipmanto yupu tamubuka nyabuk. “Yata ninye do nirya, weik yo kan-kan wa deiyok koubuka wipnin balamikirye, ikin uplyeura, ‘Se apil tuba kum doptinye ati, bataknun do?’ tenen, tamubuka wa min arye wiamikcak caknam ati tenebikirye, tamubuka dilbanyak nang ara, atonun ninye ara na pil kum doptinge. Tonda, ‘Allah arye ninye weik lyeplirye, sik kanye talima talinamsil’ tenen, Allah el pil kum doptinge.” Yesus arye ayupu nyabuk.

Rasul 18:5

Ara, Silas ap, Timotius ap, Provinsi Makedonia mutuku arye Korintus mutuku yarikopura, Paulus ara, yuk pil nirya batakukce, Yesus yupu uk peterelamuk. Paulus peterelamukce, Yahudi yala nang ati, “Allah arye ninye nirya lyena ati, wibuka dopkwetepsuknye bira, ‘Nun Mesias bira anye,’ nyanyapnye bira, yuknye kume, Yesus el uka,” Paulus arye ayupu nyabuka peterelamuk.

Yeremia 4:19

Se, na imun kanye bobuka unamne! Nara namin asa arye kum uptinye ati, na kanye imun upnilyeba, pia ikin deice uk unune. Nara kanye darapdongobuka kum uptinye. Ara mal olalbinuca ati, terompet lelim nyabikce talak ara, kekepnirye, na talima duk-duk anulule. Na talima noutam ara, duk-duk anulule. Aning wininilya ara, ninye onyak nang arye, terompet deice lelim weik tonun yupu nyabikceba, na kekepnirye, talima uk dinulule.

Yeremia 23:9

Yeremia birye ayupu nyabuk. “Nabi-nabi nang arye, tilila yupu nyan nang ati, na Yeremia birye nyapsine. Allah Yahweh arye, ‘Aminyan talak ara, anggun Israel ninye wenena ati, winibuka wenepnamsil ati, lak nyalbilyame,’ nyanulun yupu kekepnirye, ilil weik uniliba, talima uk dinulule. Tonda, ‘Se,’ tenen, na kanye talima ikin upniliba, ilil ati, na nong nirya sirim talenulule. Winipmanto ara, anggur mek weik arye dipmace nang, kanye wangabikiba, kum binmanto unyak atonun, kisok biribiri abuka, sirim talenulule. Ara, urdem ati kume. Deiyok ara, nun ni Allah, el si Yahweh arye, ‘Winipnamne,’ nyanulun yupu, pia teleb yupu, mambul weik yupu anya arye, ayupu kekepnyopura, ilil weik unulule.”

Yeremia 23:29

Anggun kele, na Allah Yahweh arye nyalisunun yupu ati, winipmanto yupu nyapsine. Ara, narye nyasinye yupu ara, uku dilamle atonun ulule. Tonda, narye nyasinye yupu ara, kat besi ning, el si martalok dobuka, weik keil sibikiba, teleb uka poulamle atonun ulule. Na yupu ara, dipkoprob mikip weik ulula ati, nyapsine.

Yehezkiel 3:3

Abuku arepnamanuk talak ara, ayupu tonap dukdongobuka nyapnuk. “Se, anda tukwak mutukunye ulyama anya arye, abuku dobuka diplyame,” nyapnuk. Nyapnuk talak ara, ‘Aning ara, kum dipnun do?’ tenepse bukni, aning dobuka dinmase talak ara, mong yung mekto teleb lelamle atonun lepnuke. Na mun pum tam, akunum malbinuk talak ara, boupnuke. Abuku dobuka dipsopura, mong mek yung teleb lelamle atonun lepnuke.

Amos 3:8

Ara, winipmanto yupu, akunum nyapmasina anya arye, tenipdelulume. Yu weik kus atonun, el si singa kus weik yupu arye, kamunmatopura, yata tonye birye, ilil kum uptu do? Aning atonun, Allah Yahweh arye, weik mambul yupu akunum nyapdeipnuka ati, ‘Anggun Israel ninye kekenamlum’ tenen, ayupu kum laka nyapnamsil do? Allah Yahweh elda, Weik Erena Deiyoknye, aning-aning nirya talibuka, deice tam ululnye birye, yupu nyaplyopura, yatanye do, ilil kum arye, ayupu tana kumce, monoktu do? Allah arye nyaptu ning ara, batakturye, ayupu kum laka nyaptu do? Kume, na Amos birye, ayupu nirya ara, nyapnamsine. Aning ara, kum bataktinye nyapsine.” Amos birye nyabuk.

Yunus 1:2

“Weik asik mutuku si, Niniwe binulyame. Niniwe mutuku unyak ninye nirya ara, pia malye-malyeuk winiceba, na elinunce bikinune. Malye wininyakba elinune ati, anda amutuku bimince, nyapnamlame. ‘Anggunda, malye ning tuba-tuba winilamunyeba, Allah arye wenepnamsile,’ nyabuka, laka nyalbinamlyame.” Allah arye, Yunus biti nyabuk.

Yunus 1:3

Nyabuk bukni, Yunus bira, Allah el si Yahweh arye nyapmok yupu batakuka, ‘Allah dinmanil sukum ara, kum unune. Tarsis mutuku uk binune,’ tenebuka, yuk bisik banmok. Bisik banmoka ani, laut kup-kup mutuku si, Yopa mutuku biyukce, ‘Laut mekwen deice bana ati, kintinyamik mek lia yo weknirye, Tarsis mutuku binun’ tenen, el bana ati, yo bok akunum dekukopura, Yunusda laut mekwen deice bana ati, el si kapal, amek liya yo aik welebuka bukuk. Bukukopura, amek liya yo deice, el ap yuk nang ap, laut mekwen deice biyik. Yunus bira, Allah arye nyapmok yupu kum kekebukce, ‘Allah dam ara, kum unamne,’ tenebukce, ‘Tarsis mutuku binuka unamne’ tenen, biyuk.