Tonda ance, yuk pera mutuku yu ninye nyapminba, talye karin arye, sik aik dam yakibuk eibikirye, sik amutuku ninye nirya, ilil upnamle. Winipmanto ara, ‘Yu weik nang, ubula dona ati yakibuk, sik aik unmace ninye eibikirye, ilil weik upliba, engelamak touk, winipnamak’ tenen, nyapne. Ara, amutuku ninye arye, ‘Anye biti opnuyap’ tenen, yupu talinyaka ati nyapne. Winipmanto ara, na sakuka bulyanganyaka ati, sikce akunum tuku palibuka kintinipnik. Aning atonun, sikce nati, wena pum bisik wekna ati, akunum kintinibuka delininyake. Ati ara, aninye nirya ara, ance wenepnalame, na nio.
Yeremia 20:16 - Eipomek16 Atalak nyalbiyuknye bira, ninye asik dolamikak, Allah arye sik anang ati, bico tenena kum arye, obuka sirya dakamuk touk, winyamnutue. Winiptopura, lukunyan talak ap, keting duk-duk talak ap ara, yuk nang arye, anye biti, ‘An mal olan nang arye olyanmakiyake,’ nyabuka, nyaptingba, kekamtue. Gade chapit la |
Yeremia 20:16
25 Referans Kwoze
Allah arye ikin ning weik areplyopura, amutuku noutam unamak nang, sik wa winak teleb tuku nirya ara, tuku miklirye, kata dem kipnamle. Tonda, tong weik nyalamle ning, el si belerang ap, garam ap, weik tonun arenamle. Adeice arye, anggun wa tuku nirya ara, sice butbuta arye, atuku deice lipdongoplyeura, malye kinamsile. Aning deice arye, tuku malye uplye ning ara, atuku deice koupnamak ning nirya, kum papnamle. Tonda, tuku deice papmanto mutmuta babye, kum papnamle. Ara min talak Allah el yu weik ubukba, Sodom ap, Gomora mutuku ap, Adma mutuku ap, tonda Seboim mutuku ap nirya ara, kum kipdeiamuk touk, anggun unamlum mutuku babye, kum kipdeipnamsile.
Im deice ulamik pil don nang, amalaikat malye-malye winibik touk, Sodom mutuku ap, Gomora mutuku ap, amutuku dana-dana ulamik mutuku ninye ap, aninye nirya arye, pia malye winilamik. Sik malye winilamik ara, ani. Sik kanye nong nirya, aninguk tenyamikce, Allah arye, ‘Sal arye kilapu uk, dobuka neika unamake,’ tenyamsuk ning atonun kum bukni, aning batakuka, sal arye sal mamun dolalamikce, yolalamik. Amalye winin ning atonun ning, weik ton winilamika ati, Allah im deice arye, uku buk dopkwetebukura, aninye nirya uku dibuka, sirya dakuk atonun, aminyan ara, malye winilamice ninye nirya, uku dil ban dopkweteplibuk, uku arye diplyopura, pia dipnamake. ‘Allah arye Sodom mutuku ap, Gomora mutuku ap, winibuka atonun winipnamle ati, biknamap’ tenen, nyapne.
Tonda, sik asik domikce, si nyalamik mutuku Sodom mutuku ap, Gomora mutuku ap ulamik ninye ara, pia malye ulamika anya arye, Allah arye nyapdeibukura, im deice arye uku sakukce, amutuku nirya dibukura, atu uka bukuk. Amutuku nirya malye kibuka oplobuka obuka deiyok, ara sik wenena ap, tonda yuk nang laka kilina ap ati obuk. Ara, Allah ati diba kum tenebikirye, pia malye unyak ninye ara, ‘Sodom mutuku ninye ap, Gomora mutuku ninye ap, opnyopura, adeice arye, bikilina ning atonun kipnyopura, yuk malye un winin ninye kel kipnamak’ tenen, obuke. Ara, tukwak mutuku unyak ninye nirya ara, ‘Allah arye malye un ninye ara, dipkoprop wenebuka oplopnamle, tenebuka kel kipnamak’ tenen, minop talak ulamik ninye obuke.
Na Allah Yahweh, aning-aning talibuka, deice tam erebuka, Pia Mikip Weik Deiyoknye ununye birye, im deice yin talin malaikat nirya ara, sik deiyoknye unune. Narye dipkoprob nyapsine. Nara Allah, anggun Israel nang yala-yala nirya talinirye, anggun deiyoknye unune. Narye anggunti, melibuka kalikisiniba, anggunce, nati si erenululume. Nara dipkoprob kam pia ununye. Na si deice arye dipkoprob nyapsine. Moab mutuku unyak nang ap, Amon mutuku unyak nang ap, narye obuka, pia kum kipdeipnamne. Ara, minop talak, Sodom mutuku ap, Gomora mutuku ap, amutuku pia malye weik ulamik nang, sik wenena ati, obuka kum kipdeiamse touk, winipnamne. Sik mutuku noutam unyak nang nirya ap, aik ap, akunum wenebuka kum kipdeipnyeura, oldemuk upnamle. Aminyan talak ara, talye garam ulamla atonun upnamle. Tonda, bai tam talye palamle taice palamle atonun kibuka upnamle. Amutuku nirya ara, dakuka bataknyeba, pia malye mutuku upnamle. Winiplyopura, na mapu koproba, sik Israel nang ara, mitik tonun tuba kam aunamak nang ara, sik Pilistin nang taleamik mutuku nirya, alubuka doprobikirye, asukum unamake.
Atonok sum noutam ara, pia yu nang yakirye, weik pong-pong nyan ning, el si terompet lelimuk nyabikcopura, weik lelim deice arye, “Yehuda noutam unyak nang ap, Yerusalem mutuku weik asik noutam unyak nang ap, olyanuyabe,” nyabikirye, adiparyuk minopce olyanamake. Ura, sik mutuku dana-dana tam nirya ara, ‘Nun mal olan nang arye olyasicakʼ tenen, sik kalikna ati, weik cang keil poka dukdongobuka dobik ning babye, cang keil aik donyaka babye, ayu nang arye, kum bataknamake. Sikda, ninye mal olan kel weik nang yakirye, weik yupu nyabuka, warikmasikirye, opnamsiake. Allah Yahweh arye nyabuk.
Derebukce, Allah el si Yahweh ati, morobukce nyabuk. “Ance Niniwe mutuku ninye kum opmalam ara, yata ati do? Na ni Allah, an si Yahweh ati nyapkine. Aning ara, na asik batakuka, amutuku yanuse talak ara, ‘Allah arye dipkoprob Niniwe mutuku ninye kum opnamle,’ tenebuka, kum nyalamse do? Adeiyok ati ara, na adiparyuk, bai sakuka, Tarsis mutuku minopce binamse. Nara, an winilyam ning, akunum kel bikamkise. Ara, Allah anda ninye malye ubica babye, adiparyuk kum oltakalyame. An kanye aniryuk, bico tenebuka lyesilyame. Tonda, minopce yu kum ukulul bukni, ninye malye winilamice ning ara, namin kisilyamce, weik arye bico tenesilyame. Anda ninye nirya ati, weik arye bico tenesilyame. Ati ara, malye wininyak nang arye, sik malye winin ning batakicopura, anda, ‘Ninye opnaman,’ tenepmanan ning ara, aning batakuka, teleb ulinanye usilyame,” Yunus birye Allah ati, nyabuk.
Inina winilye, mapna arye balamik mutuku bukni, Yunus bira, lik tonok sum aniryuk, Niniwe mutuku atam arye otam bana ati, tonok sum aniryuk biyuk. Niniwe mutuku noutamak banmok talak ara, ayupu nyanmok. “Allah arye nyapsile. Yupa tonok kepdopnye, koklom dikin empat puluh (40) sum akunum uplyopura, Allah arye, Niniwe mutuku kili sal wenena ati, amutuku ninye nirya oplirye, kum kipdeipnamle,” nyanmok.
Anggun kan-kan arye dopropsirye, ton tam nang ara, oplopse. Ara, Sodom mutuku ap, Gomora mutuku ap, malye weik winilamik ninye oplomse touk, anggun Israel yala ninye babye, weik arye opsise. Winibuka wenebuka olamsisirye, Israel ninye mitik anun bataksise. Winipmanto ara, uku yo dapmakiba, uku dinmalya ani, sirika batakliba, lukuka delilamak touk, narye anggun Israel yala nang ara, mitik anunuk lyepromsise. Winibuka lyepromsise bukni, anggunce tamubuka, na dam ton kum yangalamlume. Na Allah Yahweh arye nyapsine.
Sikce malye weik winilamik ning ati ara, na Allah arye, uku dopkwetepniba, Moab mutuku ap, Moab ninye ap, uku arye dibuka, sirya daknamle. Tonda, sik mutuku si, Keriot mutuku nang arye, ‘Nun olan ninye arye yanuka opsicak’ tenen, weik keil poka dobuka, antanap dongobik ning nirya ara, uku dopkwetepniba, sikce domik aik nirya, uku arye dibuka, sirya daknamle. Tonda, Moab mutuku unyak ninye ara, talye kanye lamapdongobuka una kumce, malye yupu nyabuka, ngalukunmakibuk, narye sik opnyopura, dipnamake. Ara, yuk ninye arye, sik mutuku yanuka opnamak talak ara, lelim weik arye nyana ap, tonda, cang pong-pong ana, el si ara terompet, lelim arye lak nyapnamle talak dipnamake. Alelim nyan talak ara, mal olana deiyok koubikiba, Moab mutuku ninye ara, alelim kekenamak talak, aniryuk dipnamake.
Ati, na Allah arye, mutuku si Raba mutuku poka domika ap, weik cang poka dobuka antanap dongobik ning ap, uku dopkwetepniba, diplirye kum danamle. Tonda, sik Raba mutuku nang arye, ‘Nun olan ninye arye yanuka opsicak’ tenen, weik keil poka dobuka, antanap dongamik ning nirya ara, uku dopkwetepniba, sikce domik aik nirya, uku arye dipnamle. Winibuka aninye opnamne talak ara, mal olan talak, weik lelim nyalamle touk, nyanmaliba kekepnamake. Tonda, mal olan talak ara, like tonok uku buk dingaplirye, dilamle touk winipnamle. Tonda, weik kumanya mikip arye dopliba, aik ap, aning-aning nirya ap, ulubuka, sirya daklamle touk winipnamle.
Nyabukopura, ayupu tonap dukdongobuka nyabuk. Allah arye, ‘Se, anggun malye winimunye ning ati, wenenamsine,’ tenesunun bukni, na kanye mitik anun teniltona tuba unulule. Ara, narye anggunti utenesunune. Se, Efraim yala ninye ara, yata wiribuka narye sikti, bataktinye do? Bataksineba, yuk pera mutuku unyak yu nang arye obuka, sirya daknamsiyak do? Aning atouk, anggun Israel yala ninye babye, yu arye bataksineba, yu nang arye obuka, sirya daknamsiyak do? Tuba bico tenesununa ati nyapsine. Tonda, sik wenena ati, Adma mutuku ulamik ninye ap, Zeboim mutuku ulamik ninye ap ati, weik arye wenebuka oplopse touk, anggun babye aning batakuka wenepnamsin do? Narye, ‘Diba malye weik wininyaka anya arye, weik arye wenepnamne,’ tenenye deice arye, na kanye bokoltonulule. ‘Aning winipnamne do, kum do?’ tenen, kanye bokoltonulule. Ara, urdem ati kume. Na Allah arye, anggun Israel ninye ayala-yala nirya ati, weik arye bico tenesununa ati, nyapsine. Bico tenesununa deice arye, na talima noutamak ara, tamunulule. ‘Malye weik winibikirye, anggun ati batakuka wenepnamsine,’ tenepse bukni, weik arye bico tenesununa anya arye, wini talak ara, na kanye tuba ton yuk tenepne.
Anggun mikip tenebuka, maknya kintinipnarye ululuma ati, na Allah arye, lo arepniba, yuk mutuku nang arye, yanuka opnamsiake. Na arepniba, anggun mutuku dana-dana tam nirya unyak nang dam ara, mal olana ap, walana ap, yanamsile. Winipnyopura, anggunce doplum cang weik kat aik dolamluma nirya ara, ulubikirye, sice buklopnamake. Tonda, anggunce cang kel poka antanap dongoplum ning nirya babye, sice buklopnamake. Pia kanye imun upnamsile. Ara, deiyoknye Salman birye, Bet-Arbel mutuku noutam ninye weik tonun, obuka kum daneiamukce, amutuku kilapu arye, deiamik winiryuk mapu dobuka, keil deice donokuka, olamika atonun, ikin weik unamsile.
Adeice arye, Yerusalem mutuku tam ati, sirik taruk arye bokuka, talipmalye ning deice lakakipnamle! Awinipnamle ning ara, Raja Babel birye, Yerusalem mutuku olbinulya atia. Winiplyeba, Raja birye, “Mal olalbinuyabe,” nyaplyeba, sik yanganamaka, yan lelim ara, weik nyabice kekepnamake. Atalak ara, Raja birye, el yin talin nang ati, sikda, anyaik dobuka ukirye, bai tam bisik arye domik bublan (pintu gerbang), tirikdongobik ning, binuka dakuka donokon ning ap, cang poka deice welena ati, cang yo moromna welen ning ap, poka dam tuku palibuka delinamak ning ap ati, “Anggunda aning-aning moubuka kintinip deipnululume,” nyapnamle. Winiplyeba, sik anang arye, anyasik domikirye, cang keil poka dopdongomikce ning ara, tuba libuka yan deibikiba, langdiplye deice arye, akeil poka deice welebuka bikirye, ninye olbinamake.
Ati ara, anggun nirya arye, malye-malye winilulum ning ap, anggun malye tenelulum ning ap, nirya batakmunce, tamubuka Allah el dam yanamlulume. Ara, nun ni Allah Yahweh arye, ‘Aninguk wininamlulume. Aning ara, kum wininamlume,’ nyapdeiamsuk yupu uk, kekebuka talipmunce, moubuka wininamlume. Nukmunba, Allah arye sik wenena ati, ‘Sik deice ikin weik ning deipnamne,’ tenepsuk ning ara, ‘Bataknamsil do, kum do?’ tenen, unamabe. Anggun malye winilulum ning batakmunyopura, Allah arye wenebuka kum opnamsile. Bukni, anggun malye winilamlum ning, kum batakmunyopura, wenepnamsile.
Se, na imun kanye bobuka unamne! Nara namin asa arye kum uptinye ati, na kanye imun upnilyeba, pia ikin deice uk unune. Nara kanye darapdongobuka kum uptinye. Ara mal olalbinuca ati, terompet lelim nyabikce talak ara, kekepnirye, na talima duk-duk anulule. Na talima noutam ara, duk-duk anulule. Aning wininilya ara, ninye onyak nang arye, terompet deice lelim weik tonun yupu nyabikceba, na kekepnirye, talima uk dinulule.
Sik Samaria mutuku unyak nabi-nabi nang arye, malye wininyak bukni, Yerusalem mutuku unyak nabi-nabi ara, pia weik malye winikiba elinune. Ara, sikce tilila yupu deice nyanyake. Tonda dopdanamikce kilapu batakikirye, yuk kilapu talye-talye yolanyake. Atonun ton, malye ning winilamice nang ati, wenena kum diparyuk, anang ati melibikibuk, amalye wininyak nang ara, weik arye tonap tabakuka malyeuk wininyake. Nabi nang arye, sik pil teleb ubuka kum donyaka ati ara, amutuku malye wininyak ninye nirya ara, sik malye ning kum batakanyake. Tuba malyeuk wininyake. Wininyaka deice, tonoknye babye diksukum ton kum wininyake. Wininyaka anya arye, na Allah arye tenenya ara, pia malye wininyake. Sikda Sodom mutuku ulamik ninye ap, Gomora mutuku ulamik ninye ap, pia malyeuk winilamik atonun wininyake. Aning ara, na pia like.” Allah arye nyabuk.
Aning nirya deiyok ara, ani. Ara, sik Israel nang malye weik ulamik bukni, sirya ara, Allah arye yu ubukura, sik menenga ati, el mapu deice ara, weik ikin ning deibukba doprobik. Ara talye ati kume. Min talak ara, Sodom mutuku ulamik nang arye, pia malye weik ulamikba, sik deice ara, ikin ning sik dam deibukba, dopromika deice arye, obuka batakupu, sik nirya sirya dakuk. Like tonok sum aryuk, Sodom mutuku ulamik nang nirya obuka batakuk. Atalak ara, sik Sodom mutuku nang ona ati ara, ninye sik taruk deice arye, anang ati ikin ning kum arebik. Aning nirya ara, ninye arye winina kum bukni, Allah el taruk arye, amutuku nang wenebuka oplobuk. Bukni, min talak Sodom nang wenebuk ning ara, mitikto ikin uka. Wini talak ara, Israel nang ati, Allah arye wenepnamle ning ara, dipkoprob ikin weik ning upnamle.
Anggunda, pia malye-malyeuk winilulum ninye ati, ‘Aninye dibikiba, tuku pum tam weipnamak’ tenen, narye anggunti lyepnamsin do, kum do? Kume, narye amalye winimunye ninye ati, kum lyepnamsine. Anggunda, tukwak mutuku ninye dibinyak ninye unyakakuk, talibuka unamlume. Se, uk din ning, weik arye weleplirye, dilamle bukni, ninye weik tonun dibinamake. Tonda, narye amutuku nirya ara, obukapnirye nirya opneba, dipnamlume. Dipmunyeba, weipsikcopura, anggun nong lyupnamsile. Dipkoprop, anggun malye winilulum ninye ati ara, narye anggunti, bico pia kum tenenamsine. Wenen ninguk arenamsine.
Aning winipnya ati, doryanamle talak ara, anggunce deimunyeba, deipdanin banamak nang arye deipnamak nang ap, tonda yuk pera mutuku arye, anggun mutuku noutam dayanganamak nang ap nirya arye, Allah elce ikin weik ning ap, kanye imun ning ap, anggun malye winipmunya ati, anang dam arepsiliba dopnalum ning ara, sikce eibikirye, biknamake.
Piblisite