Biblia Todo Logo
Bib sou entènèt

- Piblisite -




Yeremia 20:11 - Eipomek

11 Nyaninyak bukni, na ni Allah Yahweh, mikip weiknye umince, nati kalikuka melinilyame. Winipmanto ara, Allah elda, mikip weik yin talinanye atonun ulula ati, ninye nirya arye elti, ilil asa unyake. Aning ati ara, nati, ‘Ikin ning el nong deice delinamabe,’ tenenyak ninye sik nirya ara, mikip kum mitang kipliba, nati kum malye kipnamniyake. Ati, sik aninye arye, ‘Winipnamepe,’ tenenyak ning ara, kum upliba, aning eibikirye, tuba tamubuka tenekirye, pia alye unamle. Tonda, sik alye unamle ning ara, pia aupnamle. Min kum upnamle ati, ninye nirya arye kum lopdeipnamake. Tuba tenenauk unamake.

Gade chapit la Kopi




Yeremia 20:11
25 Referans Kwoze  

Sik amutuku ninye arye, ‘Yeremia nyalul yupu nun like,’ nyabuka anti malye kibuka bataknamkiyak bukni, anyapmakin ning ara, talye kume. Narye an melipkenepa, aning nirya ara na minop talak arye tenelamse touk winipnalama ati, nyapkine. Aning nirya naryuk anti, kalikuka melipnamkine. Ara, na Allah Yahweh arye, akunum nyapkine ati, ayupu ara dipkoprob nong upnamle,” Allah arye na Yeremia biti nyapnuke.


Sik ayupu kekenamak ninye ati, anda ilil una kume. Ara, urdem ati kum nyapkine. Deiyok ara, narye anti melibuka kalikiniba, yuk ninye arye, opnamkiyaka babye, narye lyepropnamkine. Na yupu laka nyalbinamlame. Anyapkin ning ara, talye kum nyapkine. Na Allah Yahweh arye dipkoprob nyapkine,” Allah arye, na Yeremia biti nyapnuk.


Sik aninye noutamak, narye wibuka deipkinirye, talibuka melikiniba, mikip arye unalame. Winipmanto ara, pia kat ning, el si perunggu arye, cang poka dobikiba, kat ulamle atonun, anda sik aninye noutamak mandipna ilil kum asa unalame. Winipminba, sik aninye arye, ‘Anye bira, nun lik’ tenen, warikil yanganamkiyak bukni, kum opnamkiyake. Ara, talye ati kum nyapkine. Narye an damak unirye, anti melibuka lyepropkiniba, na amu tam unalame ati nyapkine. Na Allah Yahweh arye nyapkine ati, dipkoprob nong upnamle.


Morobukopura, ayupu ton morobuk. Na nie, teleb ning ara, ani. Sikce nati doboninyakce, ikin ning, na deice delininyak nang ara, Allah ance sik dam alye un ning ap, ilil un ning ap, arepnamlyame. Bukni, ‘Ance na dam ara, aning nirya arepniminyakʼ tenen, moropkine. Na nio, ance sik damuk, kanye imun weik ning ara, sik deice dobuka deipmin buk, yalirye obuka bataklirye, nirya sice bukloplirye, kum danamake. Bukni, ‘Ance na dam ara, aning nirya, arepniminyakʼ tenen, moropkine.


Ati ara, narye nyapsise. Anggunda ilil una meme. Nara anggun dam unirye, pia melinamsine. Nara, anggun ni koproba Allah ununa ati, anggun kanye teniltona kum unamlume, Imun kanye bobuka kum unamlume. Nara anggun ni Allah unirye melinamsine. Na aryuk mikip arenamsine. Tonda nara, malye ning tonok ning babye ton kum ununye birye, na sirik taruk deice arye, pia talinamsine. Winibuka melipsinya deice arye, aning-aning nirya malye kum kipnamsine.


Narye, “Se, na ni Allah, ance melibuka lyepdopnilyame!” nyabuka moronun yupu ara, Yahweh arye akunum kekenulule. Tonda, narye Allah ati moronun ning nirya ara, Yahweh arye akunum kekeplirye, melipnamnile.


Aning ati ara, na ni Allah Yahweh, kanye deipnutumce, ‘Na ikin unilye ning noutamak arye, lyepnimince, teleb sukumuk deipnamnilyame’ tenen, moropkine. Na ni Allah Yahweh, ‘Ance minopce, na dam yanuka melinamnilam’ tenen, moropkine.


Diba na ni Allah, yata nang do nirya, sikce nati, “El ikin weik unmala ara, nunce kanye deipmabe,” nyabuka, akutuninyak nang nirya ara, ‘Ance anang wenebuka opminyopura, sikda kanye teninauk ukirye, alye weik dakanamak’ tenen, moropkine na nio. Tonda na ni Allah, yata nang do nirya, sikce nati, “Anye obuka, nun amu tam kipdeiptibirye, nunuk ara, erepdabirye, amutuku nirya nuncuk talibuka, ninye deiyok nang unamabe,” nyabuka, nati, ‘Lik’ teneninyak nang nirya ara, ‘Ance anang wenebuka opminyopura, sikda alye weik dakikiba, yuk nang nirya eibikirye, anang ati, ‘Dauaplye, sikda pia malye nang uka,’ tenebikirye, ‘Anang ati, tonap si erebuka, kum kinamak’ tenen, moropkine na nio.


Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.


Na Allah arye, Yerusalem mutuku unyak ninye nirya ara, weik ikin ning arepneba, yuk-yuk mutuku nang arye, sikti, nalibuka akutunamake. Atalak ara, yuk pera mutuku unyak ninye nirya arye, anggun Israel ninye ati, ‘Se, aninye ara, pia malye ninguk talibuka winilamikba, sik ni koprop Allah arye, sik wenena ati, weik ikin ning arebuka anya arye, anang ara nun like,’ tenenamsiyake. Aning kum bataknamsiyak bukni, aketing tamun, aketing tamun nirya, doyanamle talak noutamak nirya, aning pia tenibuka nyanamsiake.” Allah Yahweh arye, Israel ninye ati, Yeremia dam yanuka nyapdeibukba, ayupu sekdeibuk.


Anang nirya bataknik bukni, nun deiyoknye Yesus, na dam yanuka melipnuka deice arye, el mikip arepnukbuk, na yupu teleb ubuka nyapse deice arye, atalak bulupmek Yahudi yala kum ninye nirya arye, Allah el ninye lyen yupu kekebik. Atalak ara, aninye arye talye merekukua oplopmanitinge. Bukni, Yesus arye lobuka lyepnuka ati, sikce kum opnike.


Winilirye, ninye taruk deice arye, kintinibuka deibikirye, ‘Nun ni koproba,’ nyabuka aning ati si erenyak ninye ati, sikda talye ning si erenyake. Aminyan talak ara, ninye nirya arye aninye ati nalibikiba, sik anang alye upnamlarya. Winiplyopura, sik nirya ansinibuka bindopnamake.


Ati ara, anggun tukwak mutuku ululum nang nirya yanuka, Allah arye, el akunum pil dolamuk ning ati, eipmunce, kel biknamlume! Allah arye, tukwak mutuku unyak nang kan-kan arye, ninye kum winipmanto pil dolamlye talak ara, ninye nirya arye, ‘Se,’ tenen, kanye lopliba, ilil pia weik ulule.


Tonda, atalak noutam aryuk, ninye weik tonun akunum diamikce nang babye, tamubuka kam buknamake. Ara diamikba, tuku palyamik nang ara, tuku pum tam arye kam buknamake. Kam bukikirye, ton tam nang ara, pia bola koplobuka, kam una deiyok ning dopropbikirye, tuba tamubuka bukikirye, kam kipman pia telebuk unamake. Bukni, ton tam nang ara, kanye imun weik ning doprobikirye, alye dakdanamake. Sikda, kanye imun weik ning doprobikirye, uku bisik bikirye, malye nyabuka ngalukikirye, pia engenauk unamake.


Ati ara, Allah ance, ‘Na si eren aik dam yanganamak’ tenen, wipdeipsulum ninye nirya ara, pia weik arye, kanye deibuka unamake. ‘Na dam yakirye, na siuk erebuka unamak’ tenen, akunum welisilyam ninye nirya, nun an dam yabirye, aning-aning nirya, kintinip deipsulum ninguk, talibuka ubirye, weik kanye deibuka unamabe. Ara, Allah an si eren aik, an uminyak, pia teleb sukum yanuka unamabe. Ati nun nirya arye, pin-pin kanye bobuka unamabe.


Tukwak mutuku-mutuku nirya ululum ninye nirya ara, kanye deibuka, taruk bokmunce, Allah atibuk si erenamlulume.


Anggun apu koproba Yakub birye deibukba, dadeipdanin yangalamik ninye, anggunda el yala nang ara, anggun ilil una meme. Yuk yala ninye arye anggunti, ‘Sik Israel ninye ara, mitik ap, mikip kum ap unyaka anya arye, sikda, talye kwising ap, kuluma ap atonun ninye unyake. Sikda mambule pia kume,’ nyabuka nalinamsiyake. Nyapsica babye, aning tenena meme. Deiyok ara, nara Allah Yahweh arye nyapsine. Narye anggun Lyena Deiyoknye unune. Nara Allah Pia Telebnye unirye Israel ninye ati, lyelona ap, kalikuka melina ap deiyoknye usunune.


Se, na ni Allah, nun mitikop ulamupu talak arye, dipdongobuka, nun nebuka unyap talak nirya ara, ayu nang arye, tuba-tuba olyanganauk winisinyake. Ayu nang arye, olyanganauk winisinyak bukni, min kum obuka, sirya daksike.


Nyabukba, na Yeremia birye Allah ati, tamubuka nyapse. Se, na ni koproba, anda Allah Yahweh ulyame. Na ikin weik unilye ning ara, an akunum bikinilyame. Ati, na ikin unilye ning, pia tenepnimince, melipnilyame. Amutuku ninye arye, nati dobolkirikinikirye, malye yupu nyaninyaka anya arye, aninye ati, wenepnamlyame. ‘Ance sikti, kwang dakmince, na nong deice ikin ning delininyaka ati, ance sikti, wenepnalam’ tenen, moropkine. Ara, ance yupu nyapdeipnulumba, anyapnulum touk aninye ati, nyalbanune. Wininuna ati ara, aninye nirya arye nati, malye yupu nyanikirye, nati opmanto uninyaka ati, nyapkine. Ati, ‘Ance nati melibuka kaliknimince, lyepdopnamnilame’ tenen, moropkine.


Ati ara, narye anggun deiyok-deiyok nang nirya ati, wenebuka opnamne. Ara, na Allah arye kum dopnarye, yangalamle touk ubuka yanirye, anggun deiyok kibuka, talisinyak nang nirya ara, obuka, sirya daknamne. Tonda, ‘Anang arye yanuka melipnamsiakʼ tenen, diba tenyamlum nang, anggun kayapu nang ap, anggun tam nang ap, yuk tam arye meliamsik nang ap nirya ara, narye lo arepnyeba, anggun mal olan nang yakirye, obikirye, kam tuba unamak nang bobinuka, pia yuk mutuku bobinuka, wenen aik dongolbinamake. Anyapmasin ning nirya upnamle talak ara, anggun Yerusalem mutuku ululum nang nirya ara, alye weik upnamsile. Tonda, anggun bidamang, malye weik winilamlum ning ara, tenipmunce, ‘Se, nunda yata deiyok ati pia malye-malyeuk winilamupu do? Wini talak ara, yata upnamsil do?’ tenen, teninauk upsilyeba, malye nyabuka ngalukunamlume. Ara, anggunce pia malye winilamlum ning atibuk, malye kanye bobuka, engenamluma ati, nyapsine.


Na ni Allah, ancuk ninye yupa weik, beribu-ribu nukman kumto unyap nang nirya ati, batakna kumce, pia bico tenesimince, ance, ‘Winibuka teleb kipdeipnamsine,’ nyalin yupu deice nyapdeipsulum touk, tuba pia telebuk kilinamsilame. Bukni, wisi nang arye, malye winilamikca dengna ara, sikce deibikce mapu deice, ance ikin ning dobuka, sik mapu deice deibuka wenamsilame. Anda dipkoprob pia mikip weik ulyamce, aning-aning nirya, deice tam erebuka ulyame. Allah Yahweh, anda im deice yin talin malaikat nirya talilyamce, sik deiyoknye ulyama ati, ance mikip weiknye ulyame.


Anyapnukin ning ara, Yeremia anda, pia moubuka kekeplyame. Narye an deice mikip weik akunum arepmakine anya arye, sik amutuku ninye arye, anti, malye yupu nyapkikirye, ‘Anye optibye’ tenen, piridenamkiyaka babye, kum opnamkiyake. Ati yata weik nang do nirya, amutuku noutamak unyak nang, sik ninye deiyok talibuka Raja unyak nang ap, Raja nang, sik amu tamukirye, weik deiyok nang nirya ap, yuk-yuk deiyok talibuka pil donyak nang ap, tonda na Allah si erenyak aik pum tam pil dona deiyok nang ap, sik anang amu tam talye daunyak ninye nirya ap, anti bisibuka kum opnamkiyake. Ance sikti, malye kibuka bisipnalame. Ati asum ara, an deice mikip weik ning arepmakina anya arye, winipmanto yupu nyapnukine. Anda aik dobikirye, weik kat ning arye, poka dobuka antanaldongolamak atonun kipdeipkine. Tonda pia weik kat besi ning arye, ikuka dolamak aik ayukumna yo kintinibuka deibikirye, dobikiba, mikip weik ulamle touk, na mikip dobuka, an deice deipkine. Tonda, kat ning, el si tembaga dobuka, keil poka dobikiba, yuk mutuku nang arye, apoka fakuka, wekmanto kum ulamak touk, an deice mikip weik arepkine. Ati, sik amutuku unyak ninye arye, an nyapnamalam yupu bisibuka kum opnamkiyake.


Swiv nou:

Piblisite


Piblisite