Sik amutuku unyak nang arye, kanye erebuka kwalinyak deice arye, tukwak aryuk malye unyake. Sik anang nirya ara, dipkoprob laka deice arye, pia malye unyak talak ara, yuk nang ton, sik urasin eibikcopura, sik malye wininyak ning nirya bikinyake. Ara, ‘Nun malye wininyap ning duknubupe,’ tenena kumce, minop talak Sodom mutuku ulamik nang ara, lak deice noutam arye malye winilamik touk, wininyake. Ati ara, sikda bico! Ikin weik ning, sik nong deice yanamlarya! Ara, sik Yerusalem mutuku unyak nang ap, Yehuda mutuku unyak nang ap ara, sik deiceuk, kanye imun weik ning dobuka deipdayikba, ikin weik unyake.
Yeremia 2:19 - Eipomek19 Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk. Gade chapit la |
Yeremia 2:19
40 Referans Kwoze
Awinipmasil ning ara, urdem ati kum winipsile. Anggun kele. Anggunce, malye winimunya dekna arye, anggun dam ikin ning nirya yalaba dopropmalume. Deiyok ara, na Allah arye anggun bisik balalum talak ara, melibuka bobalamsise bukni, anggunce nati balye tam kipnulumce, bataknuluma deice arye, wini talak ikin ning anggun dam akunum yale.
Nyabukce, ayupu ton nyabuk. “Tonda Israel ninye ap, Yehuda tam unyak ninye ap, sik nirya arye sik talima erelakirye, ‘Nunda pia teleb ninye,’ tenebikirye, kim-kimipdanuka kwalinyake. Wininyaka ara, na elinuna anya arye, anggunti wenepnamsine deiyok ara, akunum laka ulule. Kanye talima erepdanuka unyaka anya arye, sik Israel ninye babye, Yehuda tam unyak ninye babye, teleb kibuka kum banyake. Sikda, kwepdanin bakibuk, yan dum duklyopura, punyake.
“Tonda anggun talima malye ning, tuba upmasilibuk, kwalina kwalibuka dipmunce, na si erenululum talak nirya ara, na lik ati, narye aweik sum nirya kum kipdeipnamne. Winipnirye asum ara, anggun engen sumuk kipdeipnamsine. Tonda, kanye teleb mot, teleb-teleb selulum ning nirya ara, tamubuka engelamak ning atonun kipdeipnamsine. Aning atonun, narye anggun kisok potong nirya kobuka, kum kipdeipsiniba, kisok delo ninyeuk unamlume. Ikin ning weik, anggun nong deice deipsiniba, anggun nirya arye, imun kanye bobuka unamluma anya arye, malye baju arye, pakupdanuka bukmunce, engenamlume. Winipmanto ara, el lin ap, el li ap arye, sik min yuma deiamdice mi ati, dipliba engelamak tonun, ikin ning weik, anggun nong deice deipsinyopura, engenamlume. Atalak ara, kanye imun deiceuk unmamunba, akunum sirya daknamle.” Allah arye, sik Israel ninye ati nyabuk.
Na kele. Na mapu koprop arye, sik bidamnye winin ning atibuk tenebuka wininyakce, na batakaninyake. Sikce, ‘Kume, nun ni koprop Allah arye nyasilye yupu kum kekenamabe. Nun bidamnye tenenyap ninguk, ubuka wininamabe,’ tenenyake. Ati ara, anggun dam ikin ning weik yalyopura, anggunce nati, ‘Se nun ni koprop Allah, anda aning-aning deice tam umince, Weik Erenanye ulyama anya arye, nunti melipsilyame,’ nyabuka moropnice babye, pia kum kekenamne. Sikda pia malye winin ninguk, talibuka unyaka anya arye, na Allah arye sikti, lyepnirye, tuba tonap kum erepdeipnamne. Sikda yuk ninye amu tamuk unamake. Allah arye Israel ninye, sik wenena ati nyabuk.
Se, sikda bicoe! Mandipna kanye bobikirye, malye ninguk talibuka wininyaka ati ara, kanye imun ning, sik dam yanamlarya! Winipmanto ara, bai tam ulye kam ning, yu weik pus, el si ara Singa Pus, atonun yalirye, sik nong nirya opsilyeba dipnamle. Tonda, mek ap, ninye ap, pia kum mutuku ulye ning, el si ara Serigala kus do, pia yu kam do, aning yalirye, amutuku nang nirya obuka, sirya daknamle. Winipmanto ning ton, bai mutuku yu weik ulye ning, el si ara, Macan Tutul pus, amutuku noutam domik asik unyak nang ati, ‘Obuka dipnunʼ tenen, yanuka, kalikinamle. Ati ara, yata nang do nirya, anyasik noutam arye, ubuka bai tam balyopura, ayu ning arye, sik banamak nang onamle ati, moubuka kaliknamlarya! Aning winipnamle deiyok ara, sikce. Ara, sikda, malye ning weik talibuka wininyaka atia. Tonda, sikce Allah ati, “Naio, an tam nanguk unamabe. Ance nyasilyam yupu uk, moubuka talipnamabe,” nyalamik bukni, asum-asum nirya, Allah ati, kanupdobuka, Allah arye, ‘Wininamlume. Aning ara, pia kum wininamlume,’ nyadeipyamsuk yupu yaninyaka ati, ikin ning weik, sik dam yanamlarya! Na Yeremia birye nyapse.
Allah arye, nun apu yapu ati nyapdeiamsuk bukni, sik atalak ulamik nang ara, sik kanye tenina nirya ara, kisok kat kanye bobuka ulamikce, dipkoprob pia kum kekepmanto nanguk ulamik. Sik anang ara, ‘Allah arye nyapsilye yupu, kum kekepnamapʼ tenen, sik balye tamubuka, sik amul ara, kunukdongobikba, nabi nang arye, nyalamik yupu ap, Allah elce nyalamuk yupu ap ara, pia kum kekelamik.
Aning ati ara, anggunda na mapu koproba, sik Israel nang ara, yata ati, asum-asum nirya, mania kanye bopmunce, malye winin ninguk, pia talibuka winilamunya ani, na dam batakuka banululum bukni, ila tamubuka, na dam pia kum yangalulum do? Anggunda, talye ning ati bukni, ‘Aninguk diba tenebuka, pia kalinamapʼ tenen, tilila yupu uk, tuba talinyake. Sikda, na Allah dam, tamubuka kum yanganyake.
Nyabukce, ayupu ton dukdongobuka nyabuk. Se, sik Israel ninye ara, sapi kil basam arye, weilamak nang yupu kekena kumce, bisilamle atonun ninye unyake. Sikda, na yupu pia kum kekeninyake. Wininyaka anya arye, na Allah Yahweh arye, Israel ninye sik wenena ati winipnamne. Winipmanto ara, domba basam weina deiyok nang arye, domba mapu, lyu weik mutuku maning teleb ubuka palamlak, talye deiplopliba, bai kam do, singa kuse do, adomba opmanto ulamle touk, na Allah arye Israel ninye wenena ati, bataknamne. Deiyok ara, sik Israel ninye ara, kekena kumce, malyeuk wininyaka ati, nyapsine.
Anggun nirya moubuka teneipdelulume! Nara, Allah Yahweh ununa ati, yata deiyok ati, anggunce nati, ilil kum usulul do? Dipkoprop ning ara, anggunce na dam yamunce, nati ilil upsutuba, ‘Se, adiparyuk nun wenebuka opsilyakʼ tenen, anggun nong nirya memepdopnamtume! Tonda, moubuka teneplulume! Na mikip weik aryuk, weik laut mekwen delinak kwepdeipsirye, ‘Amekwen ara, talye balulʼ tenen, amekwen wililona ati, laut mekwen kup-kup outam ara, keil wininga el si pasir, akunum kintinip deipse. Akintinibuka deipsak ara, laut mekwen arye deiplirye, pia unamle. Ati ara, laut mekwen weik arye deiplirye, mekwen mikip mek ombak, kibuka welepnamle bukni, pasir kup-kup, kum bisipmanto ulule. Tonda, ‘Laut mekwen deiamlyak, binuka sukulbinamleʼ tenen, wilipdopse sukum ara, kum deibisipnamle. Asukumuk pia aunamle.
Se, anggun nirya, Allah dam akunum bataklum nang ara, tuba tamubuka, el damuk yanamlume. Elce anggun teleb kipdeipsilirye, malye ning nirya ara, lyepdosilirye, kum kipdeipsilyeba, el yupu moubuka talipmunce unamlume. Winipmunyopura, anggunce nyanamlume. “Diba, winida nun akunum tamubuka, Allah Yahweh, el dam yayabe. Ati, dipkoprob elda nun ni koproba Allah,” nyanamlume.
Na Allah Yahweh arye anggun Israel ninye, na mapu ati, nyapsine. Se, Israel ninyeo, anggunda na mapu koproba ululum bukni, anggunce tenemunya ara, ‘Allah arye nun akunum bataksuke,’ tenelulume. Ati winipmanto yupu deice nyapnune. Ara, el akanye birye, el domlye kil bataknulye ati, laka nyabuka sekelin surat, sekuka areplirye talye bataklamle touk, anggunti bataklamsise do? Winibuka batakamsitinye toura, domice kil bataknukca ati laka nyabuka sekelin surat sekuka delilamakto ning ara, dan sukum do? Aning kum ulule. Yuk domon yupu ton nyapnune. Ara, el li birye, ‘Yuk nang ning arepnamsinca,’ nyapdeipliba, aning deiyoknye birye, ‘Minopce arepnilyame,’ nyabuka moropliba, el yo bok kum anya arye, aning pununa ati, el mi uk dobuka arelbalamak touk, anggunti winilamsise do? Aning ara dipkoprob kum winilamsise. Bukni, anggun bidamang malye ulamluma deice, narye nyapsiba, yu nang arye anggunti obuka sirya daksikba, ikin ning dololamlume. Anggun minop talak malye ulamluma deice, yu nang arye anggun Israel ninye tapu koubuka bobinamsike. Ara, urdem ati kume. Anggun malye ulamluma deice arye dekna arelamsise.
Anggur duk malye ninguk moulamnuka ati, winipnamak ning ara, nyapnusine. Ara, anggur wa wiamsak dana-dana tam nirya, keil poka dobuka denepse ning ara, dakuka uluplonamne. Winipnyopura, anggur wa malye upnamle. Keil poka dobuka denepse ning ara, dakuka daluplopnyopura, yuk malye nang wekikirye, amutuku nirya yanuka yanipnamake. Winibuka yanibikirye, uku sice kiplopnamake.
Aning ati ara, anggunce winilamluma dekna ara ikin ning dopropnamlume. Tonda anggunce, ‘Winibuka malye wininamabe,’ tenepce arye, ‘Malye winin ninguk talibuka unamabe’ tenen, malye piluk dolamluma deice arye, dekna dopropnamlume. Aning deiyok ara, talye ati kume. Anggun bidamnye arye, anggun bidamnye ati, malye winililalulume.
Aning ara, talye ati kum nyapsine. Teleb un ning nirya ati, moubuka tenina kumce, walwal arye malye winin ninguk, talibuka unamak ninye nirya ara, sik bidamnye arye, malye wininyaka deice arye, olana atonun unamake. Sik bidamnye arye, sik bidamnye ati malye unyaka deice arye olanamake. Aning atonun, sik pia walwal uk unyak ninye ara, aning-aning nirya kel bikna kumce, ‘Weik kel bikna deiyok ning ara, nun like. Ayupu ara, talye yupu ati, dauplye’ tenen, unyak ninye nirya ara, sik walwal arye unyaka deice arye, opdanamake. Sik malye wininyak ning dekna arye, sik bidamang nanguk, malye kililanamake.
Anggun awinilulum nang arye, anggun kanye talima namin upsutuba, anggunce, “Se, nun ni koproba Allah ati, dipkoprob ilil asa unamabe. El yupu uk kekebikirye, aninguk talibuka wininamabe,” nyaptum bukni, aning kum tenebuka nyalulume. Tonda, anggunce, “Se, nun ni koproba Allah aryuk, mok li talak ara, mok aresilyeba, mok celule. Tonda, aketing tamun, aketing tamun nirya, mok li ap, dou man ning deiyok koun talak ap, mok li sirya daklyeura, wa wibuka koumice ning, lin talak ap ara, Allah arye teneplirye, elcuk asum-asum nirya, teleb kibuka arisulule,” nyapmatume. Allah arye, ‘Winipnamakeʼ tenen, ‘Akunum kintinip deiamuk touk, tuba aresululʼ tenen, na Allah ati, si erebuka dopnutum bukni, aning babye, pia kum tenelulume.
Wininyak bukni, sikce moubuka kum teninyaka ara, ani. Ara, na Allah arye, sik Israel nang nirya ara, sik kanye talima noutam malye un ning nirya uamlya ara, pia lak elinirye, bikinune. Akunum biknyopura, tuba teninauk unune. Ati ara, winipmanto, sik dana-dana tam nirya ara, sik malye weik wininyak ning ara, antanap dongobuka ulyeba, atuba el linauk unune. Malye wininyak ning ara, na urasin dam tuba ulula ati, aning tuba elinune, nyapsine. Allah arye nyabuk.
Winipnamsina ati ara, anggun Israel ninye nirya ara, moubuka tenenamlulume. Se, Israel ninye ara, narye anggun nirya yanuka opnamsin talak ara, yata nang arye ton, anggunti yanuka melipnamsiyak do? Kume, yuk ninye arye anggunti, kum melipsitinge. Wenebuka opnamsina ara, talye ati kume. Deiyok ara, narye anggunti, weik arye melilamsise bukni, anggunce nati yanipnulumce, batakanululuma ati, narye opnamsine.
Akanye imun ning nirya, winipnamla deiyok ara, talye ati kume. Deiyok ara, anggun Israel yala ninye ap, Yehuda yala ninye ap arye, Allah el yupu bisibuka yanimunce, el dam malye winimunye nang ati, dipkoprob anggunti, wenepnamsile. Ara, wini talak ara, yata nang arye, Israel yala ninye dam malye winipdeibikiba, opmanto unyak do? Ara, Israel yala ninye, sik deiyok mutuku, ibu kota Samaria unyak ninye arye, malye weik wininyakba, Israel ninye nirya eibikirye, sik babye malyeuk wininyake. Aning atonun, Yehuda yala ninye babye, yata nang arye, sik benepdeibikba, Isa Mutuku Dongonye siuk erenyak do? Ara, yuk mutuku arye kume. Yehuda yala ninye unyakak nirya, sik weik deiyok mutuku, ibu kota Yerusalem noutamak arye, isa siuk erenyakba, yuk Yehuda yala ninye nirya babye eibikirye, atonun isa si erenyake. Ati, sik Yerusalem mutuku unyak ninye ap, Samaria mutuku unyak ninye ap ati, weik arye wenepnamne.
Nyabuk bukni, Elia birye tamubuka Ahab biti, “Kume, narye Israel ninye ati malye kum kililamse. Bukni, Ahab an ap, an mapu ap, angguncuk malye kililulumba, Israel ninye ikin kanye weik bobuka unyake. Ara, an ap, an mapu ap arye, isa el si Bahal ati, el si eremunya deice arye, Israel ninye ati pia malye kipdeiplume. Tonda, Allah el si Yahweh arye, ‘Aning ara wininalum, aning ara kum wininalume,’ nyapdeiamuk ning ara batakuka, pia malye ninguk winilyame.
Atalak ara, Yehuda tam ninye deiyoknye Raja Rehabeam ap, Yehuda mutuku noutam ulamikce, ninye deiyok kibuka ulamik nang ap, Mesir mutukunye birye, oplopsilyak tenen, Yerusalem mutuku noutam bulubuka tonokak yanuka ulamik. Winilamik talak ara, Allah el yupu lak nyalamuknye, el si nabi Semaya bira, sik anang dam yayukce nyabuk. “Allah el si Yahweh arye nyabuk yupu ara ani. ‘Anggunda adiparyuk nati kunum batakanulume. Winipnuluma ati ara, narye anggun babye bataknamsine. Winibuka bataksiniba, Mesir mutuku ninye deiyoknye Sisak birye opsilirye, anggun Yehuda tam ululum nang nirya talinamsile Allah arye nyapsile.” Nabi Semaya birye nyabukba kekebik.
Atalak ara winilamika ati, atalak arye deiyok koubuka, anyapce dipdongobuka, atalak noutam nirya bukni, wini talak babye, sik Edom tam unyak nang ara, sik Yehuda nang amu tam kipnirye, Yehuda mutuku tam taleamik ninye deiyok nang arye nyanyak yupu, pia moubuka kum kekenyake. Sikce, ‘Kume, nun yuk unamabe,’ tenebuka unyake. Yehuda mutuku tam talibika deiyok nang, amu tam pia kum unyake. Tonda, atalak deice aryuk, sik Libna mutuku noutam ulamik nang babye, malye kibuka ulamikce, ‘Kume, nun babye Yehuda mutuku tam talinyak deiyok nang, sik Raja nang arye nyanyak yupu, pia kum kekenamabe,’ tenepnarye, aRaja nang ati bataklamik. Aning nirya winilamika deiyok ara, Yehuda mutuku tam taleamuk ninye deiyoknye, Raja Yehoram birye, el apu yapu nirya arye si erelamik Allah, el si Yahweh ati, pia batakuka, Allah el yupu yanilamukce, malye winin ninguk winilamuka deice aryuk, aikin ning el dam yangalamuk. Ara, el apu yapu arye si erelamik Allah, el si Yahweh ara, Yehoram batakuka atia.
Nyabuka asipdeyukce, yupu tuba nyamuk talak noutam ara, Raja Amazia birye, adiparyuk anabi biti, “Se, ayupu nyaplam touk, tonap nyana meme! Kumopura, nunce anti opnukiyabe! Tonda nunce anti, ‘Raja yupu lipsisikilina deiyoknye unamleʼ tenen, anti kum wibuka deipkubu,” nyabukba, anabinye adiparyuk yupu weik tonun ton kum nyabuk. Bukni, min talak ara, anabi birye nyabuk, “Wini talak anda na akunum kel kipkine. Allah arye anti, ‘Kume anye bira, isa si erenmala ara, pia malye un ning akunum winipmala ati, narye el obuka, kum kibuka deipnamane,’ akunum tenepmale. Tonda, Allah arye na bobuka, an dam dopdeipmanilba, an dam yanuka nyanmakin yupu nirya, ance pia kum kekepmanilamce, batakmanila ati, ‘Allah arye anti dipkoprob oplopnamkilʼ tenen, akunum bikmakine,” nyabuk. Nyabuk bukni, Amazia bira, mandipna kanye bubukce, ayupu babye kum kekebuk.
Ara talye ati, kume. Na mapu, sik Yerusalem unyak ninye ara, sik malyeukirye, na batakaninyaka dekna ati, na Allah arye aninye wenepnamne. Ara, sik malye ninguk unyakce, na aminyan kibuka yanininyake ap, tonda, sikce kam ning obuka bobikirye, talye kwemdina daunyak isa ati, arinyak ning ap, talye ning bukni, sikce isa urasin atonun ubuka, memelinyak ning deibikirye, si erenyak ning ap, aning nirya wininyaka ati, sik deice ikin ning deipnirye, mikip arye wenepnamne.”
Dipkoprop, Isa Mutuku Dongonye si erenyaka deice arye, na pia lik unilirye, yu weik unulule. Bukni, dipkoprob ning ara, na Allah Yahweh, na dam malye kum kipdeipnitinge. Dipkoprop ning ara, sikce sik bidamang ati, weik malye winililanyake. Sik malye wininyaka deice arye, kanye imun ning, sik nong deice uk yanamle. Ati sik diamuk malye winilildanyaka anya arye, aminyan ara, alye dakaldanamake.
Tonda, aminyan talak anggun kanye noutam aryuk tenepmunce, asilanamlulume. Ara, ‘Se, yata deiyok ati, aikin ning nirya ara, nun deice yasukba, doprobupu do?’ tenamlume. Atenamluma ara, anggun malye winin ning weik winina deice arye, akanye imun ning, anggun dam akunum yanganmal atia. Anggun malye weik winiluluma ati, anggun wenena ati, anggun mal olan nang arye, anggun mutuku noutam unyak kilapu alubuka doprobikirye, yonamake. Sik ongonyak baju kain sirik dopdobikirye, malye kiplinamsiake.
Se, anggun Israel mutuku noutam ululum nango, yuk mutuku noutam nirya unyak nang arye, kanye deibuka ulamak touk, anggunce aning kum wininamlume. Deiyok ara, ani. Na Allah arye anggunti, pia kalekuka melisunun bukni, anggunce nati, ‘Elda nun like,’ tenemunce, batakanululume. Winipmanto ara, ninye arye, sik akunum domice kilapu batakuka, yuk talye yolan kilapu neika ulamak touk, anggunce anggun ni Allah ati, akunum bataknulumce, talye isa ati si erelulume. Tonda, anggun mutuku noutam, ninye arye gandum duk teiklamakak arye, isa el si Bahal dewa uk erelulume. Winiluluma deice arye, sik talye yolan kilapu arye, sik nonguk dekelalamak touk ululume.
Piblisite