Yehuda yala nang, sik mal olan ati yanamak nang ara, winipmanto, Singa kus duknubuka ulamlya ani, ‘Din ton obuka diptinye’ tenen, elamle atonun, Yehuda nang, anggunti, yu tenesinyak nang ara, akunum kintinibuka yanamake. Ara, Yehuda mutuku nang, asik dobuka ulamikce mutuku nirya, daklobikba, asik oldemuk uplirye, tunim apnamle. Ninye ton amutuku pia kum unamake.
Yeremia 2:15 - Eipomek15 Israel ninye sik oldan nang arye sikti, weik yu ning, el si singa kus yalirye, bai tam kam ulul ning obuka dilamle touk, unyake. Ara, yuk pera mutuku ninye, yu ninye arye yanuka, sik olonyaka ati nyapne. Tonda, Israel ninye unyak mutuku ara, yuk nang arye, uluplobikirye, malye kilinyake. Tonda, sik asik dobuka unyak mutuku nirya ara, uku dongobikiba, uku arye dibuka sirya dakliba, amutuku noutamak ara, Israel ninye ton pia kum unyake. Lo uk ulule. Gade chapit la |
Yeremia 2:15
35 Referans Kwoze
Allah arye nyabuk. Winipmanto ara, anggun Israel nang nirya ara, domba basam ding tonok ulamik bukni, bai tam ulamle yu kam, el si singa arye, doplamukba, dabinuka wangapdanamik touk, ulamika ani, wini talak ara, yuk-yuk mutuku bindomika ati, yuk-yuk mutuku noutam arye daunyake. Aning atonun, min talak ara, Asyur mutuku taleamuk ninye deiyoknye Raja arye, minop deiyok kibuka, Israel nang dam yanuka, obukce dobolbinamuk. Winilamuka ani, dotalak ara, Babel mutuku taleamuka deiyoknye, Raja Nebukadnesar bira, elce aminyan talak, Israel nang nirya omukce, taleamuk. Winipmanto ara, Nebukadnesar bira, yu singa arye, yuk kam ning oplirye, tup diplyopura, aminyan talak aning yok nirya ara, si tolamle touk, ulamuk.
Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk.
Sik pera mutuku arye yanamak yin talin nang ara, sik yupu weik arye, nyapnamaka ara, yu gus atonun ning, singa kus, el dina oplirye, yupu weik kamulamle touk, yupu weik nyapnamake. Sik aninye arye, ninye tomopnamak ning ara, singa kus arye, el dina obuka dipnulye ning, oplirye weik yupu nyalamle atonun ubuka, anang arye Israel nang bobikirye, sikce abatakikce nang, adiparyuk bobuka bindopnamake. Winipnamak talak ara, yuk mutukunye tonoknye babye, sik Israel yala nang ati, yanuka kum lyepnamle. Ayu nang arye, tonoknye ton kum batakuka binamak. Sik nirya bobuka binamak.
Aning atonun, anggun mutuku nirya ara, yuk pera mutuku yu weik nang arye, akunum opsike. Anggun aik dolamlum ning nirya ara, akunum uku dongopsikba, uku dibuka sirya daksuke. Yuk pera mutuku ninye arye, anggun taleamlum mutuku dalubuka dopropsikce, anggun wa wibuka kouamlumba, palamuk ning nirya ara, alabuka dololanyake. Anggun mining dam dinmamunyak arye, malye winilisinyake. Anggun ning nirya dibuka sirya dakanyake. Winibikirye, anggun mutuku nirya obuka atu kiplopsike.
Nara, Allah Yahweh arye nyapsine. Narye, yata yala nang nirya do, narye sik malye winin ninguk, talinyak nang ton, yupu akunum seksirye, anang akunum kum kipdeipse. Sik ayala nang, amutuku noutam ulamik ninye arye, weik asik dobuka, ulamik mutuku nirya ara, aning nirya narye dakuka, sice buklopseba, oldemuk kibuk. Winipseba, sik anyasik noutam pala bisik yamik ning ara, minop talak ninye weik balamik bukni, narye abisik nirya, dakuka sice buklopseba, wini talak ara, tonoknye babye, abisik kum balule. Tunim abuka oldemuk ulule. Tonda, sik amutuku asik dobuka, ulamikak ara, ‘Yuk tam yu nang arye olyasicakʼ tenen, kalikna ati, dolamik cang keil aik ap, kat keil arye, cang poka domik ning nirya ara, narye akunum dakuka bataksiba, wini talak ara, oldem kibuke. Tonda, amutuku noutam ara, ninye tonok babye ton, amutuku noutam kum unyaka ati, amutuku noutam yamik bisik ara, kum banyaka ati, tunim abuka, oldemuk ulule.
Se, anggun Pilistin yala nang ara, bicoe! Anggunda, Kereti yala nang ululume. Anggunda, weik Laut Tengah mekwen kup-kup tam ululum nang ara, anggun nirya ati nyapsine. Allah Yahweh arye anggunti, ‘Winibuka-winibuka opnamne,’ akunum tenebuka ati, elce anggunti, malye yupu nyabuka, anggun deice wenena ning deipsilirye, supnamsile. Se, anggun Kanaan tam ululum Pilistin nang nirya ara, bicoe. Allah Yahweh arye, anggun wenena ati akunum kintinibuka deibuka ati, dipkoprob anggun nong deice ikin deipnamsile. Allah arye, anggun amutuku noutam ululum nang nirya opsilirye, kum kipdeipnamsile. Ati, anggun umunya mutuku arye, tonoknye babye, ton kam kum upnamle. Anggun mutuku nirya ara, asik oldemuk upnamle.
Allah Yahweh, el yu ulul ning ara, tukwak uplyeba, aweik ikin upnamle sum areplyopura, sik bona weik talin nang arye, talinyak dengna weik ning emas ap, perak ap arye, amutuku nang ati, pia kum melinamle. Abona weik talenyak nang ara, sikce sik dengna weik talenyak ning arye, pia kum lyepdanamake. Allah el yu ara, weik uku dilamle touk ulirye, tukwak mutuku nirya ap, tukwak mutuku nang ap, nirya wenepnamle deice arye, malye kiplirye, bataknamle. Aning ara, ninye arye kum tenipnamak buk, sik mangkau kibikce talak, Allah minopce tukwak mutuku kam unyak ning yala-yala nirya ap, tukwak nang im sirya, mutuku sirya nirya ap, opsilirye sirya daknamsile! Tonok ning babye, pia kum bataknamle.
Atalak ara, yuk-yuk mutuku unyak nang nirya ara, nyanamake. “Se, minop talak ara, Niniwe mutuku noutam ulamik nang ara, mandipna weik ulamik. Sikda, bai tam talye kam ulamle ning, yu weik pus, el si Singa pus, keil deiya pum tam ulamle atonun, sik amutuku noutam ulamik nang babye, atonun ulamik. Bukni, atalak ara, ilil weik unyak ati, minop talak mandipna kanye bobuka, ninye yupu kekelamik do? Kum do? Tonda, winipmanto ara, yu weik singa kus, el mapu ati, din arebikirye, sik unyakak, keil deiya pum tam binuka, talye tunim abuka uceura, yuk kam ulamle ning ara, asukum pia kum yanganyake. Ilil ati, ninye babye, akeil deiya dam kum yanganyake. Aning atonun, minop talak ara, ninye yuk mutuku nirya ara, Niniwe mutuku nang ati, ilil weik ulamikba, amutuku dam kum yangalamik bukni, wini talak ara, Niniwe mutuku nang, pia lamabuka unmaka do?
Winipmanto yupu ton nyapnusine. Domba weinanye birye, el domba basam ara, yu weik kus singa atonun ning arye, obuka akunum diplyopura, adomba weinanye birye, el domba ati dolbinmalye bukni, seklopmaliba, dololamle ning ara, yan bitinye ap, amul ap, singa kus arye seklopmaliba, bulubuka boyangalule. Adomba nong nirya kum lyeptue. Aning atonun, Samaria mutuku noutam unyak Israel ninye nirya ara, sik mal olan nang yakirye obuka, sirya daknamake. Akunum obikirye, Israel ninye akunum sirya dakmanto upnamak bukni, tuba kam unamak nang ara, mitik tonunuk unamake. Tonda, sik bona tuba upnamle ning ara, pia mitik tonun uka. Winipmanto ara, sik bulamak ning, tonok yan ap, sik amsuna, kwiliklobikirye, mitik anun batakmace ning ap, anyuk dopdopnamake. Yuk bona taleamik ning nirya ara, sik mal olan nang arye, dalubuka dopropnamake. Israel ninye nirya obikirye, bona ara, mitik anunuk batakmakibuk unamake.” Allah arye nyabuk.
Ara, winipmanto yupu, akunum nyapmasina anya arye, tenipdelulume. Yu weik kus atonun, el si singa kus weik yupu arye, kamunmatopura, yata tonye birye, ilil kum uptu do? Aning atonun, Allah Yahweh arye, weik mambul yupu akunum nyapdeipnuka ati, ‘Anggun Israel ninye kekenamlum’ tenen, ayupu kum laka nyapnamsil do? Allah Yahweh elda, Weik Erena Deiyoknye, aning-aning nirya talibuka, deice tam ululnye birye, yupu nyaplyopura, yatanye do, ilil kum arye, ayupu tana kumce, monoktu do? Allah arye nyaptu ning ara, batakturye, ayupu kum laka nyaptu do? Kume, na Amos birye, ayupu nirya ara, nyapnamsine. Aning ara, kum bataktinye nyapsine.” Amos birye nyabuk.
Amos ayupu kekebukopura, elce ayupu ton nyabuk. Israel ninye, tenipdelulume. Weik yu kus atonun ning, el si ara singa kus, bai tam kalikinmatua ani, kapang ton obuka, kum diptuopura, weik ngaluktu do? Kume, el talye malyopura, urdem ati weik kum ngalukulule. Aning atonun, weik yu kus atonun ning, el si ara singa kus, kam ulul ning min kum opmalye talak ara, ‘Na din ning ton dipnune’ tenen, kamupturye, weik ngaluktu do? Kume, el din ning min kum opmalye talak ara, talye yupu tunim abuka malule.
Allah arye, ayupu nyabukce, ayupu ton dukdongobuka nyabuk. ‘Na tenen ninye ara, tuba tamubuka, na damuk yanamak’ tenen, nara weik singa kuse arye, yupu weik nyalamle touk nyanamne. Yupu weik arye nyapnyopura, keting wekelban tam mutuku noutamak daukirye, na mapu malye kanye bobuka, ‘Se nun ni Allah Yahweh, el bira mambul weiknye ulule’ tenen, morobikirye, na damuk tuba tamubuka yanganamake. Sikce minop yakirye, yanuka nong kanupdongobuka, na damuk tamubuka yanganamake.
Aning ara, urdem ati kum nyapsine. Winipmanto ara, bai tam nong weik ulul kuse, yu kuse el si ara, singa kuse arye, kam ulamle ning oploplirye, dilamle atonun, narye anggun nirya ati, wenebuka opsinirye, sirya daknamsine. Winipsinya deice arye, lo arepneba, yuk pera mutuku ninye, yu ninye arye, anggun dam yakirye, malye kibikirye, tapu koubuka, sik mutuku tamubuka bobinamsiake. ‘Winipnamak’ tenen, na Allah arye, lo akunum arepneba, yuk mutuku ninye nirya arye, anggunti kum lyepsitinge. Narye akunum bataksinirye, pia memepdopniba, nara anggun dam kum unamne.”
Ati ara, na Allah arye, anggun Yerusalem mutuku noutam ululum nang nirya ati obuka, kum kipdeipnamsine. Winipnamsina deice arye, anggun mutuku antanap dongopsik mutuku nang nirya ara, anggun ap, anggun mutuku ap eipsikirye, ‘Se tenen, malye kanye bobuka nalinamsiyake. Sik dana-dana tam unyak nang nirya, anggun mutuku dam binuka eipnamsiyak nang arye, anggunti, ‘Se, anang ara, dipkoprob malye ulamika anya arye, Allah arye sikti, wenebuka, kum daneibuke,’ nyabuka eipsikirye, anggun dam arye, kisik dakuka yukak bindopnamake.
Dipkoprop ning ara nyapnusine. Isa mer si erena ati, anggunce domba ato ning obuka, arelbalamlumce, aning deice anggur mek dikilongolamlum ning ara, Allah arye eibuka bikamuka ati, aning kum bataksutue. Kume, anggun amalye winimunya deice arye, Allah elti, yu kililulume. Tonda, Allah arye sikti, ‘Kume, amutuku nang, pia malye wininyak ning ara, tuba kum eiptinye. Aning nirya ara, na lik weik unululule,’ tenyamuk. Ati, minop talak arye dipdongobuka, anoutam talak ap, wini talak ara, anggun mince ulamlum mutuku nirya ara, Allah arye akunum malye kibuka bataksuka ati, oldemuk ubuk. Ara, amutuku tuku pum tam arye, aning-aning ton tuba kum palamukce, tuba kum palule. Tonda, ninye ara, amutuku noutam tuba kum unyake. Tonda, yuk nang arye, sik mutuku malye winipnin balamuk ning eibikirye, ‘Se, amutuku noutam ara, Allah arye subuk nang, ikin weik ulamik touk, anggun babye atonun unamlume,’ nyabuka, yuk nang ati sunyake. Tonda, yuk nang arye eipsikcopura, anggunti nalinamsiyake.
Ara, na Allah Yahweh arye, ‘Winiplulume!’ nyabuka, yupu mikip arye nyapdeipnyopura, sik anang kekebikirye, anang ara, amutuku tamubuka yanamake. Ara, amutuku weik asik dolamlum ning, Yerusalem mutuku warikina ap, ninye ona ap, ukula dolona ap ati, tamubuka yanamake. Tonda, amutuku obuka doprobikirye, anyasik nirya uku dongopnamake. Aninguk kum bukni, na Allah arye, Yehuda mutuku noutam, weik asik dobuka unyakak nirya ara, mutuku kata atonun kiplopniba, oldem uplirye, ninye kum kum ulamne sukum atonun kipnamle. Na Allah Yahweh arye, ayupu akunum nyapmasina ati, aning ara, dipkoprob nong kipnamlarya, nyapsine!
Na Allah Yahweh arye nyapsine. Aminyan talak ara, yuk-yuk mutuku unyak nang arye, amutuku eibikirye, “Se, amutuku ara, oldemuk ulule. Ninye ap, ninye arye weilamak domba ato ning ap ara, pia kum ubuka ati, kam ton pia kum unyake. Tonda, Yehuda mutuku noutam dolamik asik nirya ara, akunum kum dayuke. Atonun, Yerusalem mutuku noutam bisikak nirya ara, ninye ton yanibuka, kum banyaka ati, louk ulule. Amutuku nirya ara oldemuk ulule,” nyanamake. Aning nyanamak bukni, aminyan doyanamle talak ara, narye aning nirya, tonap teleb kipdeipnamne.
Aninye arye, Yeremia tomobikce, mikip arye talibikopura, ayupu ton nyabik. “Anda weik mandipna kanye bopmalamce, Allah el si deice arye, ‘Yerusalem mutuku nirya ap, Israel yala ninye nirya ap, Allah el si eren aik ap ara, Allah arye malye ulinamsile. Ara, minop talak, Silo mutuku ulamik ninye wenebuka oplobuk touk, anggun amutuku ululum ninye babye, atonun upnamsile,’ nyapmasilam ning ara, yata deiyok ati do? Tonda ance, ‘Amutuku noutamak ara, yuk nang arye, obuka kum kipdeipsikiba, ninye ton kum unamake. Amutuku domunye asik nirya ara, asik oldemuk upnamsile,’ nyapmasilam ning ara, yata deiyok ati do? Nun kanye ara, ayupu nirya ara, talye nyamasilame, tenenyabe,” nyabik. Nyabikce, aunmek ninye nirya arye, yep-yep abuka malye nyanmekce, Yeremia el nong dana-dana tam bulubuka yayik. Ara, Yeremia unmokakuk, Allah el si eren aik dam, bulubuka yayik.
Nyabukce, ayupu ton dukdongobuka nyapnuke. “Yeremiao, an dam anyapmakin yupu nirya ara, sik tukwak mutuku, im sirya, mutuku sirya nirya unyak nang kekenak nyalbinulyame. Ara, aminyan talak winipnamle ning ati, laka nyalbinulyame. Abinuka nyapnin banamlam yupu ara, ani. Bai tam kam ulamle ning, el si singa kus, din pataplyeba, yuk talye kam ning obuka dipnulirye, yupu weik nyalamle touk, Allah arye ninye nirya opnamalye talak ara, yupu weik deice arye nyapnamle. Ara, pia mambul lek sukum, im deice tam ululak arye, el yupu ara, liman nyalamle touk uplirye, el mapu koproba bukni, malye wininyak nang nirya ati, wenebuka opnamle. Tonda, Allah el yupu weik nyapnamle talak ara, ninye arye, anggur tapu duk dakuka deibikirye, mek purunamaca ati, yupu weik panalamle touk ubuka, weik yupu arye nyapnamle. Ayupu nyapliba, mutuku sirya, im sirya nirya unyak nang arye, alelim kekepnamake.
Se, sikda bicoe! Mandipna kanye bobikirye, malye ninguk talibuka wininyaka ati ara, kanye imun ning, sik dam yanamlarya! Winipmanto ara, bai tam ulye kam ning, yu weik pus, el si ara Singa Pus, atonun yalirye, sik nong nirya opsilyeba dipnamle. Tonda, mek ap, ninye ap, pia kum mutuku ulye ning, el si ara Serigala kus do, pia yu kam do, aning yalirye, amutuku nang nirya obuka, sirya daknamle. Winipmanto ning ton, bai mutuku yu weik ulye ning, el si ara, Macan Tutul pus, amutuku noutam domik asik unyak nang ati, ‘Obuka dipnunʼ tenen, yanuka, kalikinamle. Ati ara, yata nang do nirya, anyasik noutam arye, ubuka bai tam balyopura, ayu ning arye, sik banamak nang onamle ati, moubuka kaliknamlarya! Aning winipnamle deiyok ara, sikce. Ara, sikda, malye ning weik talibuka wininyaka atia. Tonda, sikce Allah ati, “Naio, an tam nanguk unamabe. Ance nyasilyam yupu uk, moubuka talipnamabe,” nyalamik bukni, asum-asum nirya, Allah ati, kanupdobuka, Allah arye, ‘Wininamlume. Aning ara, pia kum wininamlume,’ nyadeipyamsuk yupu yaninyaka ati, ikin ning weik, sik dam yanamlarya! Na Yeremia birye nyapse.
Wini talak ara, Allah Yahweh arye tukwak mutuku nang nirya im sirya, mutuku sirya nirya ati, obuka sirya daklirye, sice buklopnamle. Tukwak mutuku nang nirya malye kipdeipnalamle. Winiplyeba, tukwak mutuku nang nirya ara, lo uk upnamle. Tonda, Allah elcuk, mutuku lulukna arepnamsil deice arye, tukwak mutuku urasin nirya ara, tamuplirye, malye-malye kipdeipnamle. Winiplirye, tukwak mutuku sirya, im sirya nirya unyak nang nirya ara, yakdonoklyeba yuk-yuk dabindopnamake. Teleb kibuka tonok mutuku noutam neika kum unamake.
Nyabukopura, narye tamubuka asipdese. “Se, na ni Allah, kum kekepmanto unamak talak ara, yata talak arye talima kat ninye uk unamak do?” nyabuka asipdese. Asipdesiba, Allah arye, tamubuka nyapnuk. Amul arye kekena kum ap, asing arye el lina kum ap, talima kat ap unamak ara, weik tonun tonap pia aunamake. Ilil kum asa winilamice buk, sik wenena ati, narye nyapniba, yuk mutuku yu nang arye yacopura, sik aik dolamikce ning nirya, dakuka atu kiplopnamake. Sik aik ulamikcak nirya ara, ninye una kum ati, asik oldemuk upnamle. Sik wa wilamik ning nirya ara, yu nang arye alapdobikirye, yaniptabikiba, tuku nirya babye, malyeuk upnamle. Sik koulamak ning tonok ning babye, teleb ton kum upnamle. Aning nirya ara, kum danamle.
Nara nabi Yesaya kekenmasibuk, aning-aning eitam erebuka, mikip weik ululnye Allah Yahweh arye, “Dipkoprob winipnamne,” nyabukak kekepse. Anyabuk yupu ara ani. “Narye Israel nang wenepnamne talak ara, teleb weik aik, akunum domik ning nirya ara, anyasik noutam ninye ton kum unamake. Sikce, urasin pia teleb aik, istana domik ning nirya babye, anyaik pum tam, ninye ton kum unamake. Narye anang ati wenepnirye, pia kum kipdeipniba, anyasik-anyasik nirya, ola dem upnamle.
Ati ara, Allah anda, im deice ulyamak arye, na melin ning dopkwetepnamnilame. Tonda, ance na melibuka lyepdopnamnilame. Yu nang arye, nati, ‘Anye opnuyap’ tenen, warikininyak nang nirya ara, an Allah arye, anang nirya wenepmince, obuka sirya daknalyame. Winipminyopura, sik nirya alye dakdanamake. Allah arye, ‘Winipnamne,’ tenesilirye, nyasilye touk, batakna kumce, aninguk dipkoprob winilule. Ati, na ni Allah arye, ‘Winibuka pia bico tenekununa ati, pia teleb kipdeipnamkine,’ nyalin yupu deice arye, nyapdeipnuk ning nirya ara, pia nati, dipkoprob melinamnile.
Bai kus atonun ning el si singa kus weik yakirye, yu uplye talak ara, weik yupu nyalamle touk, anang ara, weik yupu arye malye nyanyak bukni, Allah arye sikti, yupu sekelongolule. Weik singa kus, el si weik uptu babye, el si kuruktopura, kam ning kum obuka diptue. Aning atouk, malye unyak nang, mikip weik uptinga babye, Allah arye anang ati wenelule.
Atalak ara, Simson ap, el li ap, el lin ap nirya, ‘Timna mutuku neika binuyap’ tenen, bisik banmek. Banmik ani, abisik noutam ara, Timna ninye anggur wa wiamikak yanganmekba, talye karin arye, bai kam atonun ning ara, singa kam tonok, ‘Anye bira obuka dipnun’ tenen, el weik yupu ngalukukabukce, Simson dam bikbik abuka yayukba, Simson birye eibuk.
Ati ara, an Yehezkiel birye, na nyapkise yupu dobuka, aminyan winipnamle ning ati, laka nyalbinamlyame. Ara ani. Se, Allah Yahweh aning-aning nirya talibuka, deice tam Weik Erena Deiyok ululnye birye nyapsile. Sik dana-dana tam ulamik ninye arye, sik Israel yala ninye ati, batakna pia kumce, tuba-tuba olyangalamikce, anggun talilamlum ning, dalubuka dololamikce, anggunti malye kililamikce, anggun Israel yala nang ulamlum mutuku ap, asik nirya ap, dalubuka dololamik. Winilamsikba, yuk mutuku unyak ninye nirya arye, anggun Israel kili sal ati, akutusinyakce, malye yupu ap, minina yupu ap, anggunti nyalamik touk, tuba nyanyake.
Ati ara, sik deiyok talibuka unyak nang ap, sik domba basam weinyaka deiyok nang arye engenmaka ara, anggunce kekenamlume. Deiyok ara, sik deiyok nang arye kwalina deice arye, pia teleb ning talibuka ulamik ning nirya ara pia kum daliba engenamake. Atonun, sik domba basam weina deiyok nang ara, sik domba basam nirya kum dayuka ati, sik bidamnye engena uk unmake! Aning atonun, bai tam Yordan mek kup-kup yo kan-kan noutam ulamle kam ning, el si ara yu singa kus arye, weik yupu deice arye malye nyanamle ning ara, kekenamlume. Deiyok ara, sik unak nirya ara, ninye arye weltakanyak atia. Ara, Yordan mek kup-kup tam tiklamuk yo kan-kan nirya ara weltakana uk upnamake.
Se, anggun Yerusalem mutuku ululum nango, anggun kanye imun usulul ning ara, na Allah arye anggun wenena ati, aresunune. Winipsiniba, anggun pia malyeuk winilamunyopura, narye anggunti, bataksinirye, anggun ululum mutuku ara, tamubuka, pia kata mutuku uk kipdeipniba, anggun mutuku oldemuk kipdeipniba, sik yuk nang babye, amutuku ton yanuka kum unamake.
Allah arye, na Yeremia biti, ayupu laka nyapdeipnukba, narye nyapsine. “Na yupu kekenululum nang nirya ara, engenauk umunce, ngalukunamlume. Ara, anggun umunyak weik bukuk mutuku nirya ap, bai mutuku ap, luh mutuku noutam palamle maning ap, mutmuta ap nirya ati tenepmunce, engenamlume. Ara, Allah arye anggun wenena ati, amutuku nirya malye kipdeipnamle. Winiplyopura, yata mutuku nang do nirya, sikce amutuku-amutuku noutam ton, kum banamake. Tonda, amutuku noutam nirya ara, ninye arye weilamak ning, sapi basam yupu ton nyanmaliba, kum kekenamake. Tonda, amutuku noutam nirya ara, maka yala-yala nirya babye, bai tam ulamle kam ning yala-yala nirya babye, bai sakuka pia yukak bidobikiba, kum upnamle. Ati anggun nirya arye, anggun mutuku ati tenipmunce, engenamlume,” nyapsine.
Wini talak anggun kekeplulume! Moubuka kekepmunce, anggun ton biknamlume. Weik lelim nyanmalak, kekenamaba ara ani. “Dabu tam arye (arah utara) unyak nang ara, kintinipmakirye, lelim weik nyanamake. ‘'Amutuku unyak yin talin nang arye, nun Yehuda tam unyap nang dam yakirye, nun weik asik dobuka, deiamupurye, aunyab mutuku nirya ara, yanuka kum kipdeipsikceba, din bulung unamabe. Tonda, amutuku nang ton pia kum upnamake. Nun mutuku nirya ara, asik oldem upnamsile. Winipyeura, nun mutuku ara, bai tam yu ulamle kam yanuka aunamake. Israel nang arye nyapnamake.
Ati ara, narye outam unyak nang, yuk-yuk nirya ati, “Yehuda mutuku nang olyalulume,” nyabuka, yukupnamne. Tonda, na pil dopnamnilanye bira, Babel mutuku nang, sik ninye deiyoknye, Raja Nebukadnesar biti yukupnamne. Yukupnyeba, sik nirya neika yanamake. Narye lo arepnamna deice arye, olyakirye, Yehuda mutuku unyak nang nirya ap, Yerusalem weik asik noutam ululum Israel nang ap, sik ulumik dana-dana mutuku bukni, anggun dam unyak yuk-yuk yala nang nirya ap ara, yanuka, obuka sirya daknamsiake. Narye anggun nirya ati, lakakip deipsinyeba, anggun mal olan nang arye yanuka opsikirye, sice buklopnamsiake. Winibikceba, yuk nang nirya arye aning eipnamake. Eibikirye, ‘Se, yu nang arye anang obuka sice buklopmaka ara, ilil upsile,’ tenebikirye, yok kum-kum dakanamle. Atalak arye dipdongobuka, doyanamle talak nirya ara, yuk nang nirya arye, anggunti, akutubuka nalisikceba, anggun opnamsiak nang nirya ara, alye weik dakanamlume. Aning ara, pia kume kum danamsile. Na Allah Yahweh arye aning akunum nyapmasina ati, aning nirya ara, dipkoprob nong upnamle!
Piblisite