Aninguk kume. Tonda, anggun ongolulum baju ara, aning nirya talina kumce, talye bona utotoa talina kum nang, sik ining ap, malye kum ulamice nang, sik ining ap arye, anggun baju palisulule. Anggun baju deice, ninye ining palisulul ning ara, ubula don nang tomobuka, oplum nang ining kum palisulule. Deiyok kum uamukbuk, talye nang oploplumba, sik ining palisulule. Anggun malye ululum ning ara, nukmanto kume.
Yeremia 19:4 - Eipomek4 Awinipnamne ning ara, talye ati kume. Deiyok weik aupmale anya arye, ayupu ton laka nyapnusine. Tonok ning ara, anggun mutuku ululum ninye arye, na batakanululuma ati, wenepnamsine. Tonda, na si eren aik ap, ‘Naʼ tenen, mutuku Yerusalem ap ara, anggunce pia malye ulilulume. Ara, anggun wini talak ululum ninye ap, anggun apu yapu ap, Yehuda mutuku ninye, anggun weik deiyok Raja nang ap arye, anggun si kel bikna kumce, Isa Mutuku Dongonye si talye erena ati, kam ning obuka, arelyangalulume. Winiluluma deice arye, amutuku noutamak ara, akunum malye kipdeiplulume. Aning atouk, amutuku unyak ninye ton, malye kum winipmake buk, anggun deiyok nang arye, aninye weik arye talyeuk oltakalulume. Winipmanto ara, mek kwebikirye, weik mek makau pum bisik dikdongobikiba, mek langdiplirye, balamle atonun, ‘Naʼ tenen, mutuku noutamak ara, ninye weik olamikba, ining pia weik saklamukce, aulule. Gade chapit la |
Yeremia 19:4
49 Referans Kwoze
“Bukni, na Allah Yahweh ati batakuka malye ululum ninye arye, ‘Na si amutuku deice erenamniyak’ tenen, wipdeiamse mutuku, Sion mutuku pia teleb ak. ‘Amutuku ara weik mambule,’ kum tenemunce batakalum nang anya arye, na si eren aik batakuka kum wekelulum nang ara, narye wenepsiniba ikin weik unamsile. Anggunce winilulume. ‘Aminyan nun unamap ning ap, talinap ning ap, teleb kilinamsil ning’ tenen, isa si bitinye sik si ara, Gad ap, Meni ap ati, din ning aning-aning nirya ap, anggur mek ap, kintinibuka delilulume. Aisa si erelulum ninye nirya ara, wenebuka onamsine.
Aning kum bukni, tonda yuk nang arye, malye un ning benelamikba, Yehuda yala ninye nirya ara, isa siuk erelamikce, sik ni Allah dam malye winilamnik. Atonun, tonda Raja Manasye birye, malye winin ning, pia kum ulamik nang ton, weik tonun olamukopura, weik mek balamle touk, Yerusalem mutuku noutam nirya ara, ninye ininguk pia weik tonun uamuk. Ati, sik dam arye wenebuka, kanye imun weik ning deipnamne. Allah arye nyabuk.
Anggunce, el yupu moubuka kum talimunce, aning yanibuka, kum dobolbamunyopura, anggunda malye winin ninguk, talibuka winilamunce, anggun ni koproba Allah ati, “Nun like,” nyabuka batakmunyopura, anggun dam ara, dipkoprob teleb una deiyok ning ton, kum unamsile. Winipsilirye, anggun dam ara, kanye imun una deiyok ninguk, talibuka ulamunba, ikin ninguk yanganamsile. Ara, ‘Se, yata wiriptibye doʼ tenen, ilil weik unamlume. Tonda, yata pil don ning do nirya, ‘Aning winipnuyabeʼ tenen, apil-apil nirya piripdemunba, winipmanto kum uplyopura, pia kanye teniltonauk unamlume. Tonda, anggun kam una ati, lo ton weik tonun kum arepnamsile. Adeice arye, anggun nirya ara, kum daneipnamsile. Yu nang arye, anggun nirya ati, obuka kum daneipnamsiyaka atia. Aning nirya winipnamsila deiyok ara, anggun deice auple. Ara, anggunce na Allah ati, ‘Nun likeʼ tenen, akunum yaniplopmanuluma ati, nyapsine.
Utenemunya deice arye, anggun tuba malye winilamlum ning ara ani. Anggunda, ubula dona ap, ninye talye ona ap, kilapu talye yolana ap, tilila yupu lena ap, minina yupu lena ap deice arye, ‘Dib nyapmabe,’ nyana ap, tonda, Isa Mutuku Dongonye si, Bahal ati, kam ning obuka uku dalbana ap, tonda sik deiyok ning kel bikna kum diparyuk, talye kwemdina ning ati, ‘Nun ni,’ nyabuka, si erena ap, winimunce, malyeuk tuba winilulume.
Se, Allah anti, an mapu Israel nang, nun nirya arye, ‘Nun ni Allah Yahweh el dem melibuka lyepropnamsile,’ tuba tenenamabe. Nun kanye pum tam nirya ara, an deiceuk deilinyabe. Ton nang ara, anti, batakanamkiak nang ara, ikin ning, sik dam yalyeba, dipkoprob alye upnamle. An Allah ati, ‘Nun likʼ tenen, batakikirye, yuk bisikuk banamak nang nirya ara, dibikcopura, sik akunum dibikce, unyak nang unyak mutuku uk, tuku amu tam, sik dam wekelbinamake. Ara, talye ati kum bukni, sik anang arye, an Allah ati akunum batakikce, donga tam kilongokinyaka ati, dibikcopura, akunum diamik nang dam binuka unamake. Na nio, anda Allah Yahweh, Kam Una Deiyoknye ulyame. Winipmanto ara, anda tukwak mutuku nang nirya ati, kam mek pu atonunye, Allah Yahweh ulyame. Bukni, sik malye wininyak nang arye anti, batakinyake.
Aning ara, talye ati kum nyapsine. Anggun Yehuda tam ululum nang arye, ‘Nun deiyok ning, nun ni koproba ani,’ nyabuka, isa si erelulum yala ning nirya ara, weik aulule. Ara, Yehuda tam unyak nang, sik asik weik dobuka, daunyak atonun, sikce isa si erenyak ning babye, pia weik aulule. Tonda, aning atonun, anggun Yerusalem mutuku ululum nang ara, Yerusalem mutuku noutam talye bisikak, pia weik auplye touk, anggun amutuku ululum nang arye, sik isa si erena ati, mesba weik, kum nukmanto, moubuka kintinililule. Ara anggunce, ‘Nun ni koproba, el si Bahal, isa pia malye ning, el si erena ati, domba basam ato ning obuka, arelbanamabʼ tenen, memelilulume. Amalye winilulum ati ara, alye weik dakalanalume. Allah arye nyabuk.
Tonda anggun malye un ninguk, talibuka winimunya deice arye, anggun dam wenen ning yanmasile. Aikin ning anggun dam yanmasil ning ara, anggunce na Allah ati bataknuluma deice arye dopropmalume. Ati wini talak ara, ikin doproplumce, kanye imun upmasile deiyok ara, anggunce na Allah Yahweh ati, kibuka si erena kum deice arye, ikin doproplume. Na kele, anggun Israel ninye nirya arye, na Allah ati, ‘Se Allah ara nun weik deiyoknye ulula ati, malyeuk ubibyopura, weik arye wenepnamsile,’ tenena kumce, nati si erebuka, ilil kum ulule. Ayupu nirya nyapmasin ning ara, na Allah Yahweh aning-aning nirya talibuka deice tam unune. Na Allah Yahweh ara, aning-aning nirya talinirye, im deice yin talin malaikat nirya, sik weik deiyoknye kibuka ununye birye nyapsine. Allah arye nyabuk.
Awinipmasil ning ara, urdem ati kum winipsile. Anggun kele. Anggunce, malye winimunya dekna arye, anggun dam ikin ning nirya yalaba dopropmalume. Deiyok ara, na Allah arye anggun bisik balalum talak ara, melibuka bobalamsise bukni, anggunce nati balye tam kipnulumce, bataknuluma deice arye, wini talak ikin ning anggun dam akunum yale.
Aning ara, urdem ati kum nyapsine. Na mapu koprop Israel ninye arye, pia malye un ning bitinye talibikirye, malye weik unyake. Tonok ning ara, malye unyaka deice arye, sikda na bataknikirye, balye tam kilongoninyake. Nara ninye nirya ati, kam un mek pu atonunye unune. Bukni, sikce nati batakaninyake. Bitinye ning ara, mekwen lukamiki bukni, delilamlye ani, tuku dilikamlye bisik arye, mek weklamlya ani, amek nirya celdolamle. Aning atonun, sik bidamnye kanye aryuk tenebuka si erenyak ning ara, talye ninguk talibuka si erenyak bukni, aning arye sikti, kum meliptue. Yuk talye ning ati si erebikirye, nara bataknikirye, si kum ereninyake, Allah arye nyabuk.
Anggunce malye un ning atibuk, ‘Aning ara, winipnamabe,’ tenebuka, yupu sisikimunce, tuba-tuba tenelulum ning ara, anggun aning tenyamlum touk, adiparyuk minop winin balulume. Ara, anggunce, ‘Winibipyopura, aminyan talak yata unamsil do? Ikin ning nun dam yanamsil do? Yuk nang ati, malye kipdeipnamap do?’ moubuka tenina kumce, malye ninguk talye kanye bobuka winilulume. Anggun kanye talima noutam tenelulum ning nirya ara, malye un ninguk ulule. Tonda, yuk nang ati, ‘Opnamap,’ tenepmamunye ning ara, adiparyuk mangkau onauk ululume. Anggunda, dan mutuku do nirya, anggun bisik balulumak ap, yuk mutuku binuka unamlumak nirya ara, ninye obuka, aning nirya kum danalinauk ululume. Anggun aik oldemuk unamsile.
Tonda, Raja Manasye birye, weik malye uamuk ning ara, sik malye kum ulamikce, talye kanye bobuka ulamik ninye, Yerusalem mutuku noutam daulamik ninye, weik tonun obuka, batakamuk ning, deken ati ara, Allah arye, lo arebukba, sik pera mutuku yu nang arye yanuka, Yehuda tam ulamik ninye yakuka, dokwetebik. Allah Yahweh arye, Raja Manasye birye, Raja kiamuk talak noutam arye, malye ulamukopura, ‘Luba kipnirye, kum lyepnamne,’ tenebuka ati, Yehuda tam ulamik ninye nirya ara, adiparyuk batakuk.
“Aning ara, talye ati kum nyapne. Deiyok ara, amalye winin ninye arye an mapu weik oltakalamik. Ara, ance, ‘Aninye ara na mapu unamak’ tenen, wiamlumba, anti diba tenelamik ninye ap, an yupu lake nyana deiyok nang nabi-nabi nang ap, weika arye oltakalamik. Winibuka malye ulamika ati ara, ance nyapdeipmalamba, sik mek nirya ining mekwen danmalabuk, ining mekuk dinamake. Sikda malye ninye ati, ‘Bita merekuka wenepmalume,’ nyapne.” Mek deiyok talibuka ulamuk malaikat arye nyabukba, kekepse.
Winiplum ning ap, wininamlum ning ap ati ara, Allah arye wenebuka opnamsile. Ara yata nang do nirya, Allah arye tukwak mutuku kwepdeiyamuk talak arye dipdongobuka, minop talak arye dipdongobuka, danoutam talak arye oltakalamik nabi-nabi nang nirya, sik ining ara, anggun wini talak malye winilulum nang anggun deice upnamsile.
Utenelamik bukni, Allah elcuk lo arebukba, aning ara, dipkoprob akunum winibuk. Allah arye amutuku nirya, sirya dakuk ning deiyok ara, ani. Ara, sik imam-imam nang ap, Allah yupu laka nyalamik nang, sik nabi-nabi nang ap, sik pia malye weik ulamik deice arye winibuk. Sik amambul pil talibuka ulamik nang arye, malye kum winipman ning bukni, diksukum teleb winin nang ton, Yerusalem asik noutam arye, talye lupabuka olamika atia. Sik ateleb nang, sik ining balamuka ning ati, Allah arye amutuku sirya obuka dakukba, akanye imun ning nirya ara, winibuk.
Nyapmasin bukni, anggunce moubuka tenepnamlulume. Na dipkoprob nyapsine. Anggunce, na malye ton kum winipmanbuk, opnulum ati ara, anggun deiyok nang ap, anggun amutuku noutamak ululum ninye ap nirya ara, ikin ning dopropnamlume. Ara, malye winina kumnye opmunyopura, na ining, anggun kisok deice upnamsile. Deiyok ara, anyapmasin yupu ara, na kanye aryuk kum nyapsine. Nara, Allah Yahweh arye, ‘Na yupu, sik aninye dam laka nyapminba, sik malye wininyak ning bataknamak do, kum do?’ tenen, Allah arye nyapnuk touk, anggun dam yanuka nyapmasina. Ara, anggun bidamnye, malye winimunya ati, nyapdeibukba, yanuka nyapmasine. Ayupu nirya ara, Yeremia birye nyabuk.
Bukni, anda Raja Yoyakimo! An winiminye ning ara, pia urasin yuk ulule. Ance teniminya ara, ‘Kume, tilila yupu nyaptinya deice arye, aning-aning nirya ara, naryuk bona weik doproptinirye, bona talinanye uptinye,’ tenelyame. Tonda, ninye malye kum winipmakibuk, talye olyame. Winibuka ance talilyam mutuku nang nirya ati, sik deice ikin ning ap, yu weik ning ap, malye kililyame. Yuk daunyak nang ati, yaninauk winilyame!
Ara, na Allah arye wipdeiamse ninye, ‘Naʼ tenen nang, Israel ninye nirya arye, nati akunum batakalongoninyake. Wininyakce, talye ning ati, ‘Nun ni koproba anye,’ nyabuka, dipkoprob kum melipmanto ning bukni, sik nirya arye, Isa Mutuku Dongonye siuk kibuka, si erenyakce, siltong teleb ning ap, kam ning ap dobuka, uku danyake. Minop talak, narye sikti, ‘Abisik teleb ubuka banalyame,’ nyabuka, peterelamse bisik ara, batakuka, talye malye winin bisikuk banyake. Winipmanto ara, weik karayong bisik, diksukumuk una ati, teleb bisik yabuka deiamse ning batakuka, talye bai tam kwalin bisikuk banyake.
Asipkikcopura, an Yeremia birye, tamubuka sik Israel yala nang ati, nyapnulyame. Allah arye nyapsile. “Ara, anggun wini talak ululum nang, anggun apu yapu nang arye, na Allah ati akunum bataknikce, talye ning ati melibuka balamikce, ‘Nun ni,’ nyabuka, isa si erelamikce, atalye ning atibuk, si erelamika ati wenepnamsine. Winilamik bukni, narye, “Aning ara, wininamlume. Aning ara, pia kum wininamlume,” nyapdeipsiba, Musa birye sekamuk yupu ara, moubuka kum taleamikce, nati akunum donga tamubuka batakamnika atia. Aning nirya ara, anggun wenena ati, anggun nong deice, ikin ning deipnamsine. Anirya ara, Israel nang, sik kekenak laka nyapmince, ‘Allah arye nyapdeipmasile,’ nyabuka, laka nyapnalyame.
Na Allah Yahweh arye nyapsine. Anggunce nati, akunum bataknulume. Anggunce, ‘Kume, aminyan talak nun malye winin ning batakuka, telebuk wininamabe’ nyanululum bukni, tuba malyeuk winiluluma anya arye, dipkoprob wenepnamsine. Minopce, ‘Namin kipniba, aminyan teleb winipnamak do?’ tenen, dinauk ulamsise bukni, wini talak ara, na lik unulula ati, tunim abuka kum unamne. Narye, ‘Anggun wenena ati, anggun opnamsin’ tenen, kintinyamsise ning ara, kum bataknamne. Wini talak arepnamsine.
Se, sikda bicoe! Mandipna kanye bobikirye, malye ninguk talibuka wininyaka ati ara, kanye imun ning, sik dam yanamlarya! Winipmanto ara, bai tam ulye kam ning, yu weik pus, el si ara Singa Pus, atonun yalirye, sik nong nirya opsilyeba dipnamle. Tonda, mek ap, ninye ap, pia kum mutuku ulye ning, el si ara Serigala kus do, pia yu kam do, aning yalirye, amutuku nang nirya obuka, sirya daknamle. Winipmanto ning ton, bai mutuku yu weik ulye ning, el si ara, Macan Tutul pus, amutuku noutam domik asik unyak nang ati, ‘Obuka dipnunʼ tenen, yanuka, kalikinamle. Ati ara, yata nang do nirya, anyasik noutam arye, ubuka bai tam balyopura, ayu ning arye, sik banamak nang onamle ati, moubuka kaliknamlarya! Aning winipnamle deiyok ara, sikce. Ara, sikda, malye ning weik talibuka wininyaka atia. Tonda, sikce Allah ati, “Naio, an tam nanguk unamabe. Ance nyasilyam yupu uk, moubuka talipnamabe,” nyalamik bukni, asum-asum nirya, Allah ati, kanupdobuka, Allah arye, ‘Wininamlume. Aning ara, pia kum wininamlume,’ nyadeipyamsuk yupu yaninyaka ati, ikin ning weik, sik dam yanamlarya! Na Yeremia birye nyapse.
Anggun ap, anggunce delilalum mapu ap ati, ‘Na yupu kekepnamak’ tenen, anggun wenena ati, anggun dam ikin deilisilye ning ara, anggun kel kum bikilulume. Ati, anggun wenesinye ning ara, talye atibuk wenelamsise do? Anggunce, ‘Se, nun malye unyaba ati, wenepmasile,’ kum tenelulume. Ara, winipmanto ara, bai tam ulamle yu kus, el si singa kus, weik yu kus arye, yu nguru-nguru alamlirye, talye daulamle kam ning obuka, dilamle touk ululume. Ara, na yupu nyaipneba, laka nyana deiyok nang nabi-nabi nang dopdeipsiseba, anggunce anabi nang nirya oltakalulume.
Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Anggun ap, anggun deiyoknye ap ara, Allah Yahweh arye bobuka, yuk mutuku nang unyakak ara, anggun walwal mutuku bobinamsiake. Tonda, anggun apu yapu nang babye, sik bikina kum mutuku bobinamsiake. Winipsiliba, amutuku noutam binuka umunce, amutuku nang sikce, keil ap, yo ap dobuka, ninye urasin atouk kibuka, ‘Nun ni aniʼ tenen, talye ning, isa si erelamik touk, anggun babye, atalye ning, isa si erenamlume.
Ara, anggun unamlum mutuku noutam arye, ninye yata barye nang do, ton kutukuka tikikirye, tilila yupu nyabikirye, yukuprobikiba, anyasik dobuka ulamikce nang nirya, sik anang yupu kekebikirye, malye winin bisikuk melibuka dobolbanamake. Sik anang arye nyapnamak yupu ara, ani. “Anggun nirya, yangalulume. Yamunyopura, anggun si bikina kum allah, ‘El siuk neika erepnuyabe,’ nyabuka, yukupnamsiake. Tonda, sik anang nirya ara, ayupu kekepmace nang, ‘Sik anang nirya ara, dobolbinamake,’ nyabikiba, kekenamlame.
Musa birye Israel ninye ati, nyabuk. Arup nyapmasin touk, yupu ton nyapnusine. Ara, anggun weit koproba do, anggun du yapu koproba do, anggun kilapu do, anggun kanye talima delilalum nang do, anggun kwit capu koproba, tonok ulamlinye birye ap, anang arye, ‘Nun ap, nun apu yapu ap, kum kel bikamupu ning, yuk allah-allah si erenamabe,’ nyabikirye, duknubuka, tilila yupu nyapsicopura, anggun kekena pia meme. Aning atonun, anggun mapu do, anggun kilmapu do, anggunce dolulum kilapu do, anggun akanye yapu do, anggun kwit koproba do, yata nang do nirya, anggun kanye lamapdongobuka, ulamunyak yakirye, ayupu uk, yanuka nyapsikcopura, pia kum kekenamlulume.
Tonda Raja Yosia birye, winibuk ning ton ani. Elce, isa si Molek, el si erena ati, domik ning babye, daklobukce malye kipdeibuk. Winibuka deiyok ara, ‘Ninye arye, delilamak mapu bobuka, uku dongolamikba, uku dipnopura, winina deice arye, isa si Molek erelamik ning ara, bataknamak’ tenen, winibuk. Ara, ‘Amalye winin ning nirya ap, akintinibik mutuku ap, kum danamle’ tenen, aning ton uluplobuk. Amutuku si ara, Topet bukni, mutuku si ton Ben-Hinom mutuku dam winibuke. Amutuku ara isa si Molek, el si erena ati domik ning ati daklobukce malye kipdeibuk.
Ara talye ati, kume. Na mapu, sik Yerusalem unyak ninye ara, sik malyeukirye, na batakaninyaka dekna ati, na Allah arye aninye wenepnamne. Ara, sik malye ninguk unyakce, na aminyan kibuka yanininyake ap, tonda, sikce kam ning obuka bobikirye, talye kwemdina daunyak isa ati, arinyak ning ap, talye ning bukni, sikce isa urasin atonun ubuka, memelinyak ning deibikirye, si erenyak ning ap, aning nirya wininyaka ati, sik deice ikin ning deipnirye, mikip arye wenepnamne.”
Tonda, anggun amutuku ululum ninye arye, ninye asik nang ap, yuk pera mutuku arye amutuku yanganamak ninye ap, kwaknan mapu ap, youwak kilapu ap, sik nong deice, ikin ning kum delinamlume. Aninye nirya ati, diksukumuk wininamlume. Tonda, malye winin ning kum winipmakibuk, ‘Anye bira malye winipmale,’ nyabuka, minina yupu nyapmunce, anang kum onamlume. Yuk ninye talye oltakana pia meme. Tonda kwemdina ara, Isa Mutuku Dongonye ap, ninye arye puturubuka delinyak ning ap, talye-talye ning nirya ap ati, ‘Nun deiyok ning ulula anya arye, aning si erenamabe,’ nyabuka, amutuku noutamak umunce, si kum erenamlume. Awinimunya deice arye, anggunce, anggun bidamnye ati, malye kililalulume.
Abisik bublan dam biminyopura, sik Israel nang nirya ati, ayupu nyapnulyame. Ara, na Allah arye nyapdeipnukin yupu ara, abisik bublan dam bimince, sik Israel yala nang nirya ati, ayupu nyapnulyame. Ara abisik bublan dam yanuka, binuka kinyak nang ara, sik ninye deiyok nang, Raja-Raja nang ap, Yehuda yala nang nirya ap, tonda Yerusalem mutuku weik asik domikba, daunyak nang ap, sik dam binuka, ayupu nyapnulyame.
Na Allah Yahweh arye, anggun nirya ati nyapsine. Anggunce, yuk nang sik dam ara, diksukum teleb piluk donamlume. Ara, narye, ‘Aning wininamlum. Aning ara, pia kum wininamlume,’ nyapdeipsise yupu atouk winibuka, pia diksukumuk wininamlume. Tonda, ninye yupu bokolin talak ara, dipkoprob sik winilamak touk bikmunce, teleb kibuka yupu nyapmunce, wenepnamlume. Talye-talye winina kume. Mikip unyak nang arye, anggun amu tamuk unyak nang ati, ikin ning, sik nong deice deibikcopura, anggun deiyok nang arye, aikin unyak nang ati, lobuka melipmunce, lyelinamlume. ‘Teleb mutuku noutamuk uptibyeʼ tenen, yuk mutuku arye, anggun mutuku yanuka, tikilyangan nang ap, tonda winiryuk nenmace nang ap, yuwak kilapu ati, ‘Sik ning alubuka doproptibyeʼ tenen, pia kum moronamlume. Tonda, ‘Anang ati, yanipdongobuka optibyeʼ tenen, sik dam ikin ning kum delinamlume. Tonda, yata nang do nirya, sikce deiyok kum ati, malye kum winipmace buk, anggun deiyok nang arye, anang ati, talye lukparabuka, kum opnamlume. Sikda, malye kum wininyak nang ati, amutuku noutam arye, ninye kum onamlume.
Aning winipsa deiyok ara, talye ati kuma. Deiyok ara, sik amutuku ulamik nang arye, malye weik tuba-tuba winilamika ati, na yu ulamnuka deice arye winipse. Sik amutuku ulamik nang arye, sik si bikina kum ning bukni, talye isa ap, anye atonun, talye dewa ning ap, si erena ati, domba ato ning obuka arelyangalamikce, atalye ning ati, si erelamike. Atalye ning ap, isa ap ara, sik atalak Yehuda mutuku noutam ulamik nang babye, anggun atalak unmalum nang babye, anggun apu yapu min talak ulamik nang babye, aning nirya ara, anggun si kum bikamlume.
Atalak ara, sik yuk mutuku arye olyanamsiyak yin talin nang ara, malye pia weik unamak bukni, narye, ‘Daupmalye, dawinipnamakʼ tenen, bataknirya, sikti kum wenepnamne. Winipyopura, amalye wininyak nang arye, na si erena ati, Pia Teleb Aik nirya babye, talye wekikirye, anyaik noutam ubuk ning nirya, pia malye kipdeipnamake.
Tonda, sik anang ati, ‘Dauplye,’ tenyamsirye, batakse deice arye, sik babye, ‘Winipnamabe,’ tenebik ning talibuka ulamik. Winilamika deice arye, sikti, malye kililalamik. Ara, sik babye, min talak deiamik mapu dobuka, talye isa si erena ati, obikce, uku dongolamik. Narye lo arepsiba, apia malye ning talibuka ulamik deiyok ara, ani. Ara, ‘Narye kanye imun weik ning dobuka, sik nong deice deipnirye, yu weik arye, anang wenebuka oplopnamne,’ tenyamsa ati, winipse. Winipse ning nirya deiyok ara, ani. Ara, ‘Weik tonun sik anang wenebuka oplyeura, sik tuba kam unamak nang arye, ‘Se, Allah ara, dipkoprob, Yahweh ululeʼ tenen, ‘Biknamakʼ tenen ati, anang bataksirye, lo arepsiba, sik bidamnye aryuk, malye weik winilamik. Allah arye Yeheskiel biti, lak nyabuk.
Raja birye winyamlya ani, Allah el si eren aik, pia lek aik ara, malye kilina ati, elce yin talin nang weik dopdeipnamle. Allah el si eren ati, Israel nang arye kam ning boyakiba, asum-asum nirya, imam nang arye, aning obikirye, uku dongonyakak ara, sik ayin talin nang arye, aning nirya kum kipdeipnamake. Winibikiba, Raja birye, Allah el si eren aik pum tam ara, pia malye weik un ning boyanuka deipnamle. Winipnamla ara, Allah elce, ‘Se, wini talak ara, ‘Naʼ tenen nang, Israel nang ap, na ap ara, anyaik ara, tonap kum bitibye. Anyaik ara, na akunum batakne,’ teneplirye, anyaik ati, lik upliba bataknamle. Anyaik bataklyopura, oldiamuk upnamle.
Israel ninye arye, Allah si batakuka, isa si erelamik bukni, amutuku noutam nirya ara, mal olana deiyok kouamikba, sirya ara sik aik dana-dana poka bublan dam, sik mal olan nang ton kum yangalamik. Atalak noutamak ara, Israel nang yupa ara empat puluh ribu (40.000) nang ulamik bukni, tonoknye babye yin ap, mal ap, ting ap, kum talibuka ulamik. ‘Yu nang arye opsicak’ tenen, ati mangkau asa ulamik.
Israel nang arye delilamik mapu ap, kilmapu ap ara, malye kum winilamik bukni, sik ni yapu arye, amapu weik tonun olamikba, ining weik balamuk. Ara, talye ining kum bukni, sikce delilamik mapu ap, kilmapu ap olamikba, sik ining weik balamuk. Ara, talye ati kum olamik bukni, deiyok ara, ‘Kanaan mutuku noutam unyak nang arye, isa si erenyak ning ati, nun ton aisa si erenamap’ tenen, sik mapu weik tonun olamikce, aisa ati, arelamikce, uku dongolamik. Winilamika deice arye, Allah arye sikti, areamuk mutuku nirya ara, pia malye kipdeiamika ati, Allah arye amutuku nirya, ‘Na like,’ tenelamuk.
Tonda, sikce amalye weik ning urasin atonun sekuka deiamik ning dam ara, Israel mutuku noutam talibuka, ninye deiyok-deiyok kibuka, sik taleamik nang ara, tujuhpuluh (70) nang, asukum tikmekba eipse. Tonda, Safan elce deiamuknye Yaazanya babye, asukum unmok. El ap, aunmek deiyok-deiyok nang nirya ara, siltong pia teleb lelamle ning, boyanmek makau ara, uku dinmokce, tulum welemok ning ara, sik aninye deiyok nang arye boyanmekba, siltong teleb tulum welemokba eipse.
Piblisite