Diksukum kanye bobuka, teleb winin ninguk talibuka ulamice nang ara, “Winipnamabe,” nyabikirye, aning batakana kumce, dipkoprob nyapmace touk wininyak nang ap, aminyan talak Allah arye sikti, dekne ning melibuka arenamle. Bukni, ‘Kume, nara minopce bona weik talinanye uptinye’ tenen, minopce pirilulnye bira, malyeuk ulula anya arye, aminyan talak ikin ning weik, el damak yanganamle.
Yeremia 17:11 - Eipomek11 Winipmanto ara, maka arye, el duk deiamlya ani, yuk maka arye yanuka, aduk alabuka irilamle touk, el diksukum winina kumnye birye, talye yupu nyalamle deice arye, bona weik talibuka, tia talak ati, bona talinanye ulule. Abona talibuka ulamlya ani, akunum wisi dalyopura, el anye talilamlye ning nirya ara, kum danalule. Winibuka kum dalyopura, sirya talak ara, elda malye winin ning ap, pia walwal arye winilamlye ning ap ara, lake upliba, yuk nang arye biknamakca! Allah arye nyabuk Gade chapit la |
Yeremia 17:11
39 Referans Kwoze
Tonda talye bon-bona atibuk, ‘Aning dobukapnerye, bona utotoa talinanye kipnamne,’ nyabuka tilila yupu nyalulnye bira, aning-aning weika arye dololul bukni, el dololul ning nirya ara, kum kipnin banamle. Winipmanto ara, tuku mikip keting buppu arye weleplirye, minopce kum balamle touk, tilila yupu deice dololamle ning babye, kum kipnin danamle. Tonda, ninye arye wena tapu wemikiba, bai tam kam ulul ning mangkau arye banmalebuk, youbuka olamle atonun, tilila yupu nyanyakce, bon ning dolonyaka deice arye, dipna dam bisikuk banyake.
Bukni, anda Raja Yoyakimo! An winiminye ning ara, pia urasin yuk ulule. Ance teniminya ara, ‘Kume, tilila yupu nyaptinya deice arye, aning-aning nirya ara, naryuk bona weik doproptinirye, bona talinanye uptinye,’ tenelyame. Tonda, ninye malye kum winipmakibuk, talye olyame. Winibuka ance talilyam mutuku nang nirya ati, sik deice ikin ning ap, yu weik ning ap, malye kililyame. Yuk daunyak nang ati, yaninauk winilyame!
Raja Yoahas, el weit koproba Raja Yoyakim, el babye malye weik winilamuk. Ati, anye bira bicoe. Ikin ning, el dam yanamlarya! Yoyakim el aik tonap, aik tabakuka dobuk talak ara, weik aik, pia urasin teleb ubuka dobuk bukni, el dana-dana tam ulamik nang ati, sik pil dona ati, arena kumce, anang ati pia mikip arye, ikin pil dilamukba, pil dolamik. Yoyakim el alip aik, tabakuka domuk ning babye, elce apil dolamik nang, sik dengna ara, kum arebuk. Elce sikti, ‘Pil talye dopnululume!’ nyabuka, ikin ning, sik deice deiamukba, el pil ara, talyeuk pil dolamika ati, Yoyakim birye, winilamuka deice arye, pia malye winibuk.
Yatanye do nirya, ‘Bona talina ninguk taliptinye,’ tenebuka ulamlinye bira, malye winin ninguk ulule. Anye birye, yuk nang ati, ‘Yo bok arepkiniba, tia talak noutamak taleamniminye ani, aminyan talak ayo bok tamubuka arepnamnilame,’ nyanyak bukni, ayo bok tamubuka arepnamak talak ara, “Uang yo bok weik tonap tabakuka arepnululume,” nyabuka, ikin weik ning anang nong deice delinyake. Wininyak ninye ara, ‘Weik arye tabakuka doproptinye,’ tenenyak bukni, aminyan talak ara sikce dopropnamaka yo bok ap, yuk bona weik talin ning ap nirya ara, kum danin banamle. Allah arye, ikin ning sik nong deice deipliba, ‘Bona weik talinye uptinye,’ tenelulnye bira, aminyan saknamle. Bukni, Allah arye melipliba, ninye bona utotoa talina kum ninye ap, mikip pia kum ulamice ninye ap ati, bico tenebikirye, teleb ubuka melinyak ninye ara, Allah arye erepdeipnamle. Aminyan sirya talak ara, sikcuk bona weik talin ning dopdopnamake.
Yatanye do, ‘Yo bok weik arye koproptinirye, bona weik talinanye kiptinye’ tenen, tilila yupu nyabuka ubula dololulnye bira, aning-aning nirya, winibuka dololya deice arye, el ap, el mapu silip nirya ap ati, malye kililule. El malye ulya deice arye, bona ning weik dolonamle bukni, adeice arye, el mapu silip nirya malye winililulba, ikin ning weik unamake. Ton nang ara, ‘Ubula dopropnamne’ tenen, mambul ning bokuka arepmantonye ati, morolbalule. ‘Anye bira kanye deipnilirye, kum arepnamnutu ning bukni, dungnubuka arepnamnil’ tenen, amorolbalulnye birye, teleb ning dobuka, weik deiyoknye ati dungnubuka arelbalule. Winilul bukni, Allah arye amalye ululnye ati, aminyan sirya talak, wenebuka oplopnamle. Ati ara, yatanye do, ‘Ayo bok ara dungnubuka dolona na like,’ teneplirye, binuka moroplirye, kum dolbalulnye bira, teleb ubuka kam pia unamle.
Sikti lila yupu peteren nang arye, yuk nang kilapu eibikirye, ‘Se, akilapu ara, dalubuka yoptibye’ tenen, pataplibuk, pia tenenauk unyake. Malye winina pia tuba-tuba wininyakce, sik kanye teniltonauk unyak ninye ara, ‘Nun tam kipropsiting’ tenen, sik nyanyak yupu deice arye, benbenepdongbuka lilonyake. Atilila yupu nyanyak nang ara, ‘Yuk ninye, sik ning weika arye dalubuka doproptibye’ tenena ning ara, weik arye kel kiyamik bikamik. Anang atonun wininyak ninye nirya ara, Allah arye dipkoprop wenebuka oplopnamle.
Atilila yupu nyanyak nang ara, sik malye yupu peterenyaka deice arye, anyasik-anyasik ninye akunum diba tenelamik bukni, tonok-tonok ton kum, sik nirya arye, dib tenebik ning, Allah yupu batakuka, weik kanye mambul kilinyake. Ara, atalye yupu nyanyak nang arye, yuk nang ati, peterenyaka deice arye, tonok-tonok kum bukni, anang weika arye minop talak kunum diba tenelamik ning, bataknamyak ati, atilila yupu nyanyak nang arye, yuk nang ati, weik kanye mambul kilinyake. Aning ati ara, atilila yupu, tenepce arye nyanyak ninye ati, “Amalye winin ning ap, tilila yupu nyanmalum ning ap, adiparyuk bataklulume,” nyabuka, yupu sekenamlyame. Amalye nang talye yupu peterenyaka deiyok ara, ‘Yo bok weik arye dolonamap’ tenen, tilila yupu tenepce arye, nyanyake.
Ara, talye ati kume. Sik anang arye, ‘Nun talipsukba, si erenyapnye birye, el kanye teleb kilinamsilʼ tenen, sik tilila yupu nyabikirye, talye bona talina kum nang, sik aik pum tam, mikip arye wekelbikirye, anang sik talinyak ning, alubuka dolonyake. Doprobikirye, sik deiyok nang ati, abona ubula doprobikcopura, sik aik weknukce talak ara, abisik bublan noutam ara, kum yanipnamapʼ tenen, kaplibuka poulbikirye, anyaik pum moubuka wekelbanyake. Anang arye, yuk nang talinyak ning ara, mikip arye alubuka dolonyake. Tonda, tenebuka tilila yupu weik nyanyake. Yuk nang ning duknubuka ubula doprobikirye, abona bulubuka, sik isa si eren aik dam yanuka, arebikcopura, anyaik langdilule. Sikda, tilila yupu nyana ap, ubula dolona ap, deice arye, malye weik winiyaka ati ara, na Allah arye, amalye wininyak nang nirya ara, wenebuka opnirye, sirya daknamne!
Ninye ton, ‘Nunda aning-aning nirya weik arye dopropbibirye, minopce bona weik talin nang unamabe,’ tenekirye, sik kayapu nang pataple ning kum melipmanto unyakce, malye un ning ap, tilila un ning anyuk winipnin banyake. ‘Nunda minopce bona weik talin nang unamabe,’ tenenyak bukni, sik malye-malye unyaka deice arye, aminyan talak sik talinyak ning nirya kum danin baliba, pia bona talina kum ninye uk unamake. Ati, ‘Minop bona weik talin nang kiptinye,’ tenena kume.
Ninye arye, “E, aning-aning nirya ton, winibipyopura, minopce bona utotoa talin weik nanguk unamabe. Ati sikce, ‘Winipnamlulume,’ nyabuka nyasinyak yupu, kekepmunce, adiparyuk winipmunyopura, minopce bona utotoa talin weik nanguk unamlume,” nyanamsiyake. Winibuka nyanamsiak bukni, ayupu atonun yupu nirya ara, pia kum kekenamlulume. Sik nyanyak yupu winipmunce, yo bok weik doproptuma babye, aminyan talak aning nirya minopce kum dananamsile. Bukni, pia pi dobuka mikip arye pil donmamunya ani, adeice arye yo bok weik dopropmunyopura, aning ara minopce min kum danapnamle. Pil teleb kibuka donmamunya deice arye dolonalum ning ara, min pola kume kum dananamsile. Pia aulirye, weik upra banamsile.
Na kayapu nang, anggun nirya ara, kekepnululume! Anggun ikin usulul ning nirya dobuka, nun ni Allah Yahweh, el deice deipnamlume! Winipmunyeura, bico tenepsilirye, el mikip deice arye, melibuka lyelonamsile. Pia dipkoprob nyapsine. Allah arye, ‘Aning ara, wininamlume, aning ara, pia kum wininamlume,’ nyabuka, yupu talibikirye, pia diksukum kibuka wininyak nang ara, pia kum bataknamsile. Elce melisilya deice arye, nunce elti, ‘Diba,’ tenenyap ning ara, min kum upsutue. Tuba diba tenenauk unamabe.
Anye bira, utenebuk bukni, Allah arye anye biti nyabuk. ‘Kume, awinilyam ning ara, pia walwal winilyame. Alukunyan aryuk an kam una deiyok ning tamubuka dopropkinyeura, dipnalame. Dorketing tamun ati ‘Na mutan’ tenen, aning-aning nirya bulubuka deiplum ara, akunum dipminyopura, yatanye birye dopropnamle do?’ Allah arye anye biti nyabuk. Yesus arye nyabuk.
Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.
Bukni, ‘Se, nunda bona weik talin nang mapu uptibye’ tenen, pia pataplye ninye ara, atenen deice arye, Isa Mutuku Dongonye arye, ‘Sik malye upting’ tenen, sik kanye talima lilolibuk, malye un ning patalulbuk, malye weik wininyake. Tonda, nong kum upnamle ning bukni, talye-talye ning patana weik ap, malye usilye ning patana ap, akunum winiplibuk, malye weik wininyake. Wininyakopura, winipmanto ara, anoutamak arye, ikne pum bisik kabang balyebuk youlamle atonun, weik ikin ning pia malye ulisulule. Aning ara, kum lipsisikmanto.
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Allah Yahweh, im deice unyak yin talen malaikat nirya, sik deiyoknye unirye, na nyapdeipse yupu ara, asulongon yupu nirya ara, sik malye wininyak nang, aik wekelbinamle. Ara, sik talye ubula donyak nang, sik aik ap tonda, talye yupu deice arye, ‘Na dipkoprob Allah, el si deice nyapsine,’ nyabuka talye tilila yupu nyanyak nang, sik aik nirya ara, ikin weik ning, dobuka deipnamle. Winipnamle ning nirya ara, amutuku noutam malye wininyak nang arye, dobuka unyak asik nirya ara, ayupu pia sulongon ninguk bol pipnamle. Winipliba, anyasik-anyasik ap, anyasik keil ap, yo ap, anyasik pum tam unyak nang nirya ap ara, Allah arye kum kipdeiplirye, oldiamuk upnamle.” Malaikat arye, na Zakaria biti, laka nyapdeipnukba, kekepse.
Aning wininyaka deice arye, malye winin ninguk, kel kibikirye talinyake. Ara, ninye deiyok nang kibikirye, talibuka unyak ninye ap, malye winibikiba yupu lipsisikuka, bokolina deiyok nang ap, sik nirya arye, “Nun mapu anggun malye winipmalum nang ara, nunti, ‘Ninye opdeipsululume,’ nyabuka arin yo bok arepsilyame,” nyanyakba, Israel ninye arye, arenyakba, adeiyok nang arye dolonyake. Tonda ninye deiyok talibuka, unyak nang arye, ‘Nun tenepmap ning ara, adiparyuk doproptibye’ tenen, mikip arye nyanyakba, sik tenepmakce touk, dalubuka dolonyake. Winibikca deice arye, pia tuba-tuba malye yupu nyalanyake. Diksukum ubuka, ninye yupu kum bokolinyake.
Tonda aning atonun, ‘Na mapu koproba unyaka nang kan-kan unamak’ tenen, wipdeipse kilapu ara, anggunce yanuka yakalulume. Sik akilapu arye kanye deibuka unyak aik nirya, anggunce dalubuka dololulume. Tonda akilapu arye delinyak mapu ara, ‘Nun mapu ati, nun talenyap ning arenamabe’ tenen, kintinibuka deiamik ning nirya babye, anggun malye ululum ninye arye, ubula dalubuka dololulume.
Allah Yahweh arye nyalule. Sik Israel ninye ara, pia dipkoprob teleb ton kum unyake. Teleb winin ning ara, akunum luba kibik. Bukni yu weik upliba, sik yuk nang ning nirya dalubuka dolonyake. Yu upliba, ninye ona ap, sik ning ubula dolona ap, ulamika deice arye, yuk mutuku ninye taleamik ning weik dopromik. Winilamikce, abona-bona nirya, sik keil arye deibuka, domik aik pum tam dongolamik. Ati, sik Israel ninye ara, pia diksukum winin ning ara, ton kum wininyake. Sikda pia malye-malye ninguk wininyake.” Allah arye nyabukba, Amos kekebukce sekuk.
Ninye deiyoknye, el mapu arye do, yuk ninye deiyok talibuka ulamice nang arye do, sik amu tam ulamice ninye ati, yaniltalamaka deiyok nang ara, dipkoprob pia walwal aryuk unyake. Bukni, yata weik deiyok Raja nang do, sik tenepce yupu nyana ap, tilila yupu nyana ap, uang yo bok ubula dolona ap, pia kum ubikirye, diksukumuk ubicopura, sik talinamak mutuku ap, sik ap telebuk upnin banamake. Sik diksukumuk unyaka deiyok nang arye, ‘Kume, malye una ap, tilila ninguk winina ap nirya ara, nun like,’ tenenyaka anya arye, yuk nang arye, ‘Nun deiyoknye duknubuka melinamsil’ tenen, yo bok dungnubuka arepdetinga babye, teleb ubuka unyaka deiyok nang arye, “Kume, aning ara kum dopropnamabe,” nyabuka, amalye winin nang ati wenenyake. Wininyaka ati ara, sik ninye deiyok nang talibuka unamak talak ara, lo pia weik arye unamake. Yuk deiyok nang arye minopce kum punupnamake.
Yo bok ap, bona ning ap nirya ara, asing elimunce umunye ning nirya ara, tuba elinmamunye talak noutamak aryuk, kum upnamlarya. Winipmanto ara, bip maka eipmunba, adiparyuk minopce im noutamak lakuka balamle atonun, bona weik talin ning babye, minopce kum danin banamle. Winipmanto ara, bip maka pol laklirye, talye karin arye lakuka balule. Winilamle atonun aning nirya ara, pia kum upnamlarya.
Ura, tukwak mutuku noutam unyak nang nirya ara, bona weik talibikirye, maknya kintinibuka, pia teleb kibuka winilamak nang babye, kam pia kum unamake. Sik babye dipnamake. Winipmanto ara, bai tam talye kam ulye ning, yuk-yuk ning nirya dibilamak touk, sik bona talin nang babye, aminyan talak atonun, dipnamake.
Amutuku unyak nang nirya ara, weik nang babye, mitik nang babye atonun, ‘Nun ton yo bok uang weik dobuka, bona talin nang uptibyeʼ tenen, eibuka dolonyak ning ara, diksukum pil dona deice arye, kum dolonyake. Aninguk kum bukni, tonda, sik imam nang babye, nabi nang babye, sik nirya arye, yuk nang ati, tilila yupu nyabikca deice arye, yuk nang, sik yo bok uang ubula dolonyake.
Sik mutuku noutam uceba, anggunce, ‘Se aning ara, weik kel nang unyake,’ nyalulum nang ati ara, wenepnirye, narye lo arepnyeba, yuk nang arye, sik akunum domik kilapu nirya, narye yuk nang ati arepyeura, anang arye akilapu alubuka dopropnamake. Aning atonun, sikce wa tuku wilamice mutuku ara, na Allah arye dobuka, yuk nang ati arepnamnarya! Winibuka wenepnamsina deiyok ara, ani. Ara, anggun amutuku noutam ululum nang nirya ara, weik bona talin nang babye, amu tamuk mitikto unyak nang babye, ‘Se, aning-aning nirya, nun ton weika arye doproptibye,’ tenen, pia patasilyeba, enauk ululume. Tonda, anggunce, tenebuka aryuk nyabibyeba, ‘Yuk nang ning pia weika arye alubuka doprobibyeba, bona talin nang uptibyeʼ tenen, tilila yupu nyalulume. Ara talye daunyak nanguk kum bukni, anggun mutuku noutam, Allah si eren aik pum tam pil donyak nang, sik imam-imam nang babye, na yupu ap, aminyan upnamle ning ap ati, laka nyana deiyok nang, sik nabi-nabi nang babye, tilila yupu deice aryuk, nyabikirye, enyake.
Winipmanto ara, anang arye, ‘Din ning dipnuyabe,’ tenebikirye, dinyak talak ara, aning nirya dibuka sirya dakanyake. Aning atonun, malye unyak nang arye, yuk nang ning nirya alubuka doprobikcopura, tonok ning babye, tuba kum uamuk. Aning nirya dolona uk ulamik. Ati ara, tia talak ara, bona weik talin nang unyak bukni, sirya talak ara, Allah arye sikti, wenepnamle deice arye, sikce talilamik ning yala-yala nirya ara, kum kipdeipnamlarya! Teleb uk kum unamake.
Piblisite