Yeremia 16:6 - Eipomek

⁶ Weik sisi nang babye, mitik sisi nang babye, talye kankan nang babye, amutuku noutamuk weik tonun dipnamake. Sik adipnamak nang ati, kanye imun upliba, ‘Se, bicoeʼ tenen, ukirye ton kum engepnamake. Tonda, sik nong bobuka, tuku palibikirye, teleb kibuka kum weipnamake. Tonda, sik adipmakce nang, sik kayapu nang arye, ‘Se nun kayapu dipmaka ati, sikti, bouku peipnamapʼ tenen, malye kanye bobuka, nong bol deice, dila kum dopnamake. Tonda, sik Israel yala nang arye, sik kayapu dipmakce nang engebuka, bouku peina ati winilamlum touk, anggun kisok potong nirya ara, kobuka, delo dem kum unamlume.

Yeremia 16:6 Referans Kwoze

Ulangan 14:1

Musa birye, sik Israel nang ati, nyabuk. “Anggunce el si erelulum Allah Yahweh ara, elce wipdeiamsukce, el ‘Naʼ tenen, nang, el mapu koproba kipdeiamsuke. Allah mapu ululuma anya arye, ninye dipmalinye biti, ‘Se nun kwit dipmala anya arye, mambul kirikuka bouku peipnuyapʼ tenen, engepmunce, anggun nong bol deice dila dolana kume. Tonda, anggun asok dam potong kobuka, dilo kukuna kume. Ara, Allah el si kum biklamak nang arye, winilamaka atonun, kum wininamlume.

Yeremia 47:5

Winipnamne talak ara, sik Gasa mutuku noutam unyak nang nirya ara, weik imun kanye bobuka, alye dakalanamaka ati, sik kisok potong nirya, kobikcopura, delo nanguk unamake. Ara, yuk nang eipsikirye, ‘Se, sikda pia imun kanye bonmaka atia, tenenamsiak,’ tenena ati, wininamake. Aning atonun, sik Askelon mutuku nang babye, imun kanye boyakirye, ‘Seʼ tenen, yupu nyana kum, pia tunim abuka unamake. Winipnyeba, yupu pia kum nyanamake. Winipnyopura, anggun Pilistin nang, tuba mitik tonun aunamlum nang arye, adipnamak nang ati, ‘Bicoʼ tenen, engenamlum ning ara, ouku pia weik karin engenauk unamlum do?

Yeremia 41:5

Asum aryuk, Sikhem mutuku nang ap, Silo mutuku nang ap, tonda Samaria mutuku nang ap, yupa weik delapan puluh (80) nang arye, Mespa mutuku yayik. Sik anang nirya ara, sik bam potong nirya ara, akunum kobuka kipmikce, sik ongopmik baju nirya ara, akunum kwilikdobuk ongopmik. Sik nong bol deice ara, dila-dilauk upmok. Winibuka winipmekce, anang nirya arye, ‘Allah el si erebibirye, elti, teleb ning arepnamapʼ tenen, Allah el arena ati, din ning el si gandum ap, tonda nintong teleb ning el si kemenyan ap, libuka boyanmikce, amutuku domik Allah Yahweh, el si eren aik dam boyanmik.

Imamat 19:28

Aning atonun ton, akunum dipmace ninye arye, ‘Eipsikirye, kanye deipnamsiak’ tenen ati, engenmakirye, ‘Ining banamle’ tenen, anggun nong bol deice topnong arye touldana meme. Tonda tace ning arye, anggun nong bol deice puturulana meme. Tonda, tace ning arye, anggun nong bol deice sekdamunyeba, suse buksilirye, dila una meme. Maka do, ninye urasin do, aulye ning nirya urasin ato ning, anggun nong deice tace ning arye, lukuka kintinilana, pia kum wininamlulume. Aning ara, ‘Sik Allah diba tenena kum nang ulamak atonun, kum wininamlum’ tenen, nyapsine. Nara Yahweh, anggun ni Allah arye nyapsine,” nyabuk.

Yeremia 48:37

Wininamne talak ara, sik anang nirya ara, sik mal olan nang arye, ‘Alye dakanamakʼ tenen, sik kisok potong nirya kopnamake. Tonda, bam potong kopnamake. Tonda, sik taruk duk, parang arye sekikcopura, dila laka upnamle. Tonda, teleb baju ongolamik ning kwiriplobikirye, talye kain dobuka, sik deiyok dam kitibikirye, unamake.

Yesaya 22:12

Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Atalak ara, Allah arye anggunti nyapsuke. Ara, “Engepnulume, weik arye ngalukmunce, engepnamlume. Tonda, engepnamluma ati, anggun kisok potong koplulume! Koplopmunye ning ara, anggunce ikin kanye bopmunyakarye, malye baju el si karung koni ongopnamlume. “Aning nirya ara, ‘Se, nun babye malye ulamubuʼ tenen, bikilina ati aning winipnamlume,” Allah arye nyapdeipsuke.

Wahyu 6:15

Aning nirya winibukopura, tukwak mutuku weik ninye deiyok nang, Raja-Raja nang nirya ap, sik amu tam deiyok talibuka unyak nang ap, yin talin nang, sik deice tam deiyok nang ap, bona uto-uto talin ninye nirya ap, weik mikip nang nirya ap, dekna dolona kumce, talye pil melina ninye ap, talye daunyak ninye ayala-ayala nirya ap, tukwak mutuku ninye nirya, ilil pia weik ubukce, asok dama biyuk. Ilil weik ubukba, bai mutuku bik-bik abuka biyikce, ‘Ikin ning arye opsilyak’ tenen, keil deiya pum tam ap, weik keil deiyok ap, duknulbiyik.

Yeremia 16:4

Ara ani. Amutuku noutam unamak nang nirya ara, kanye imun weik uk dina deiyok ning yalirye, amutuku noutam unamak nang, pia weik tonun dipnamake. Adipnamak nang ara, sik kayapu nang arye, anang ati kum engenamake. Tonda, amutuku yuk nang ara, anggun mal olanmamunya ani, ninye on parang arye opnamsiake. Ton nang ara, sik din ning kum daliba, din patan deice arye, dipnamake. Tonda, sik dipnamak nang, sik tam nang arye sik nong dobuka, tuku palibuka, teleb kibuka kum weipnamake. Sik adipnamak nang nong ara, talye tuku deiceuk, dana-dana tam batakikiba, lyupnamle. Ara ninye arye, tuku deice talye oplomikiba saklamle touk, unamake. Ati ara, anang akunum dibikcopura, sik nong ara, talye tuku deiceuk bataksikiba, im tam lakuka balamle maka ap, bai mutuku talye daulamle kam ning aryuk, adipnamak nang, sik nong dobuka dinamake.

Yeremia 13:13

Ati ara, an Yeremia birye sikti, tamubuka nyapnulyame. ‘Allah el yupu ara ani. Dipkoprop, sik Yerusalem mutuku unyak nang ap, Yehuda yala nang ap, tonda amutuku talibuka, Raja kibikirye, Raja Daud bun ning, el si tahkta deice bunyaka deiyok nang ap, Allah el si eren aik pum tam, pil donyak nang, sik imam nang ap, Allah el yupu laka nyana deiyok nang, nabi nang ap nirya ara, yu anggur mek pia weik kwepdeipniba, langdiplyopura, sik amutuku noutam unyak nang nirya dibikceba, kisok birbir aplirye, kanye walwalapnamle.

Yeremia 7:29

Ati ara, na Allah arye nyapsine. Anggun Yerusalem mutuku ninye arye, ‘Se, nun malye unyabe,’ tenemunce, unamlume. Tonok ning ara, anggunce, ‘Nun malye wininyabe’ tenen, anggun kisok potong nirya, kobuka donoknamlume. Winipmunce, weik mutuku konak tikmunce, ngalukuka, malye nyapmunce, imun kanye bobuka, engena deice mot senamlume. Ara, urdem ati kume. Deiyok ara, anggun ni koprop Allah, el si Yahweh arye, anggun wini talak ululum ninye nirya ati, akunum bataknamasile. Anggunda, malye weik winiluluma deice arye, Allah el weik yu upliba, lik ati, anggun akunum bataknamasile. Anggun ti, tuba melibuka kum dinamsile. Anggun ti, akunum batakuka, luba kipnamsile.

Yesaya 24:2

Tukwak nang nirya ara, sisi nang babye tonda weik nang babye, talye nang babye, ikin weik unamake. Ara, imam nang babye, talye daunyak nang babye, atonun ikin kanye bobuka unamake. Tonda, pil talye dona ati, yo bok kum dolonyak nang babye, sik deiyok nang babye, atonun ikin unamake. Pil talye dobikirye, yo bok kum dolonyak kilapu babye, sik deiyok kibuka unyak kilapu babye, atonun ikin unamake. Bona patan nang babye, abona dekelyanganyak nang babye, atonun ikin unamake. Yo bok tia ati arinyak nang babye, yo bok pataplyeba tia ati yo bok dolonyak nang babye, atonun ikin unamake. Tonda, bona talinyak nang babye, bona talina kum ati talye kankan nang nirya babye, atonun ikin unamake. Allah elce tenebuk touk, winiplyeura, sik nirya atonun ikin ning yalyeba, doprobikirye, ikin kanya unamle.

Wahyu 20:12

Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.

Amos 6:11

Na dipkoprob nyapsine. Allah Yahweh arye nyapliba, weik asik dobuka unyak sukum ap, mitik asik dobuka unyak sukum ap nirya ara, ulubuka bataknamake. Allah arye, ‘Winiplulume,’ nyaplyopura, anyasik-anyasik nirya, ulubuka atu buklopnamake.

Matius 9:23

Sik nirya ila banmeka ani, el kilmu dipmoknye, aik akunum biyukopura, anyaik dam unmek nang, sik weik arye engena ap, weik arye ngalukuka malye nyana ap, weik yupu nyabuka kwelana ap, ninye dipneba bung-bung nyana nyalamak ning nyanmeka ap, anirya wininmekba, Yesus arye eibuk. Eibukce, anyaik wekukce, amalye nyabuka, kwelanmek nang ati, Yesus arye nyabuk.

2 Tawarikh 36:17

Ara Allah arye, Raja Babel el kanye noutam pil dobuk ati, anye birye, ‘Israel ninye ara, optinye,’ tenelamukba, Allah arye anye ati, lo arebukba, Raja Babel birye, Yehuda yala wel nang nirya ara, Allah el si eren aik dam arye, anang nirya obuka, sirya dakuk. Ara, wel nang ap, kilapu ap, wisi nang nirya ara, Allah arye bobuka, Raja Babel ati, lo arebukba, anye birye anang weik arye, parang ya arye oplobuk. Ara, Allah arye, anang nirya bobuka, Babel mutuku taleamuk deiyoknye, Raja Nabopolasar biti arebuk.

Imamat 19:27

“Atonun tonda, anggun ni koproba Allah dib tenena kum ninye potong kolamak touk, kum wininamlulume. Ara, anggun Israel nang ara, kisok potong, amul dam dana-dana potong ara, kum konamlulume. Tonda, anggun bam potong ara, pia kum konamlulume. Tonda, anggun bam potong cang uplyopura, mouse ning sekena babye, meme.

Yeremia 8:2

Aning ara, dipkoprob malye ning ninye pia winipman kum ning bukni, atalak ara sik mal olan nang arye, min arye akunum diamikak, tuku pum tam weiamik nang, sik yok bulubuka, tukwak deipnamak nang ara, tuku pum tam arye, lukuka kata deiplopnamake. Winibikceura, ila tamubuka, tuku pum tam kum weipnamake. Ara, ninye arye sik dei yalamak atonun, tuku deiceuk deiplopnamake. Ninye arye, talye bam ning do, yuk malye ning do, tukwak talye lubakibuka donoklamak atonun, anang yok nirya ara, talye tukwak, deice anyuk aupnamle. Deiyok ara, sik mal olan nang arye, amutuku akunum diamikba weilamik nang ati, pia malye kipdeibibyeba, ‘Sik yala nang, tuba kam unyak nang ara, alye weik dakdanamakʼ tenen, anang yok lukuka, tuku deice kata sukum bataknamake. Ton deiyok ara ani. Ara min talak, sik amutuku ulamik nang arye, na Allah ati bataknarye, keting ap, kurya ap, tonda wala ap ati, ‘Nun ni ani,’ nyabuka, aning ati, si erelamika winipnamake. Ati sirya talak ara, sik akunum diamik nang yok ara, talye lakak lukuka, tuku deice batakikceba, kata sukumuk bataknamle. ‘'Amutuku nang, sikda talye-talye ning dam, si erelulum ning ap, kanye deiplumce, aning amu tam pil domlum ning ap, talye ning ati, si erebuka pil melibuka domlum ning ap, tonda, ‘Se, nun wininamap ning ara, anggunce peterepsululume,’ nyabuka, morolulum ning ap, aulula ati, akunum diamikak, tuku pum tam weiamik nang, sik yoka nirya lukuka, kata sukum tuku deice bataknamake. Ara, sik mal olan nang arye, ‘Sik Yehuda mutuku tuba kam unyak nang nirya, alye weik dakdanuka unamakʼ tenen, akunum winibikceura, ayok ara, tamubuka tuku pum tam kum weipnamake.