Yeremia 13:16 - Eipomek

¹⁶ Anggun ni koproba Allah Yahweh, elce nyamuk sum, tamubuka kunukna arepnamle talak aryuk, Allah el tibuk, si erenalume. Kunukmiting aplyeba, anggun weik mutuku kon deice kwepmunyak arye, anggun yan dum min kum dukmasilye talak aryuk, anggun si erelulum Allah ara, el si erepmunce, ‘Elda pia telebe,’ nyanamlulume. Anggunce, ‘Nun dirina ara, dan tam arye yanamle do?’ tenen, kintinibuka dinamlum bukni, Allah elce tamubuka, “Asum ara, kunukna deipnamle. Malye uplye ati, asum noutam ara, pia kunukmiting,” apnamle.

Yeremia 13:16 Referans Kwoze

Yesaya 59:9

Sik Yudea nang arye, Allah ati nyabik. Winida, an Yesaya birye lak nyapdeiamsuk ning arye, nun akunum kel bikmabe. Allah ara, nunti kum lopdeipsukce, bataksukba, nun deice arye, ikin ning deilisiliba tuba dolonyabe. Tonda, Allah arye, nun mal olan nang dam arye, kum lobuka lyepdopsuka ara, nun malye un ning atia. Lyen ning ara, nun dam kanam kum yayuke. Wini talak ara, winipmanto ara, nunda, ‘Beren tam dirina yangalamliba, keting delilamle touk, weik tonun patasiliba, dan talak yanamsil doʼ tenen, pia dinauk unyabe. Bukni, nun dam ara, dirina kumce, pia kunukulongauk upsukba, kunuknauk unyabe. ‘Dirina arye bisik eibuka teleb kibuka banamapʼ tenen, dinauk unyap bukni, tuba kunukunauk usulule.

Yesaya 8:22

Sik urasin erebuka, im deice dipdenamak bukni, Allah arye kum meliplyopura, ila tamubuka tukwak mutuku tam ton, ‘Yatanye birye melipsutu do?’ tenen, dilbinamake. Dilbinamaka babye, tukwak tam nirya ara, din patana ap, yuk kanye imun ning ayala-ayala nirya ap, kunukne ninguk upliba, eibikirye, ilil weik asa unamake. Aminyan talak ara, Allah arye aninye nirya dobuka, pia kunuknakuk, yakwetepnamle.

Yesaya 60:2

Tukwak mutuku kunukna uk uamukce, inipdongabukba, ninye mutuku-mutuku nirya, pia weik kunuknak uk unyake. Bukni Allah el si Yahweh ara, sik dam arye, akunum yanganamle. Tonda Allah el weik dirina ara, anggun deice deipsilirye, lak koprop upnamle.

Yesaya 5:30

Tonda, winipmanto ara, sik yin talin nang, yu weik arye, Israel nang ati olyanamak talak ara, singa kus arye, weik yupu nyalamle touk, sikce weik yupu deice arye nyanamake. Yehuda mutuku unyak nang arye, kekelamikcak, mal olanmakirye, ngaluklamak ning ara, winipmanto ara, weik mek laut mekwen ombak weleplirye, lelim weik lelamle atonun kibuka, ngaluknamake. Tonda, yata nang do nirya, sikce amutuku noutam nirya, singa kus yupu kamuna arye, inipnamlya ati kunuklamle atonun, winipnamle. Ara, keting kumuplye talak bukni, kunuknamle. Tonda, amutuku unamak nang nirya ara, imun kanye bobikirye, ikin weik unmacak eipnamake. Keting deiplyeba, dirina weik upnamle bukni, asum ara, weik mutuku dup, kunuklirye dua palibuka winilamle touk kibuka, amutuku nirya ara, kunuknamle. (Ara kereta ap, kuda ap deice bukuka banmaceba, tuku butbuta arye, weleplye deice arye, dua winilamle touk kibuka, tuku butbuta arye lipdongopliba, amutuku nirya kunuknamle. Winiplyeura, Yehuda mutuku nang nirya ara, imun kanye bopnamake.)

Amsal 4:19

Unyak bukni, sik amalye yu kanye bonyak ninye, sik banyak bisik ara, lukunyan bisikuk banyake. Ati, sik anang ara, ninye mangkau bisik bakiba, yan dum dukliba kote sakikirye, sik kel kum kilamak touk unyake. Aninye ara, ‘Nun yan dum dukusila ara, ani,’ kum tenenyake.

Yosua 7:19

Winibuk ati, Yosua birye Akan binyak yabuk, “Se, na mi anda, moubuka tenipdeminyak arye, Allah Yahweh nun dam ulirye, kekenmasila ati, asukum arye adiparyuk, laka nyapnunilyame. Ara, anggun ni Allah si Yahweh, Israel nang ati, pia moubuka kalikisulule Allah ati, el si erepnulyame. Tonda, ance malye kiyamlum ning nirya, asukum arye laka nyapnunilyame. Nati, nyapdeipnunilyame. Tonda, aning ara, ‘Naʼ tenen pia dungnulongona kume. Asukum aryuk laka nyapnunilyame,” Yosua birye, Akan biti nyabuk.

Yeremia 23:12

Wininyaka ati ara, sik banyak bisik ara, kunuknak atonun ap, alap bisik atonun ap, opmanto bisikuk banamake. Ara, sik tuba malye wininyaka deice, narye sikti, malye ak dopkwetepniba, sakuka opnamle. Winipmanto ara, ninye arye, malye bisik bakibuk, sik yan dum dukliba saklamak touk, aninye babye, wenepnirye opnamne. Ara, urdem ati kum nyapne. Winibuka malyeuk wininyaka ati ara, na tenyamse talak akunum uplyopura, sik deice ikin ning weik deipnamne. Ara, na tenyamse keting tamun akunum yalyopura, sikti, weik wenena ning arepnamne. Anang ara, opnamna atia. Na Allah Yahweh arye nyapsine ati, aning ara dipkoprob winipnamle.” Allah arye nyabuk.

Yeremia 4:23

Nabi Yeremia birye nyabuk. Lengdar mapninto upmasirye, tukwak mutuku tam dinmase ara, urasin ton kum kintinibukce, aning-aning nirya kum kibukba, pia lo uk ubukak eipse. Tonda, im deice tam erebuka dipdese ara, se, dirina kum ubukce, kunukna uk kibukak eipse.

Mazmur 44:19

Tonda, nun kanye talima noutam ara, anti tenebibirye, nun amyok kanudongobuka, yuk tam kum banyabe. An tonok ati, diba tuba tenekinyabe. Tonda, an Allah arye, “Aning wininamlume, aning ara, pia kum wininamlume. Teleb diksukum winina ara ani, malye winin ning ara, ani,” nyapdeiamsulum yupu ara, nunce kum batakanyabe. An bisik ara batakuka, yuk talye bisik parapkabuka, kum banyabe.

1 Samuel 6:5

Ati, sik Pilistin nang ara, suse weik tonun nelamukce, bukuka dilamuk suse ap, tonda, kub mana anggun mutuku noutam koulamik ning, weik tonun dilamuk ning ara, akub ap, asuse ap, urasin atonun ubuka, kat ning emas deice arye, puturubuka deipmunce, kintinip deipnamlume. Anggun nirya arye, anggun ninye deiyok nang ara, aning weik uamukba, imun kanye bobuka, ikin asa ulamluma anya arye, aning dobuka, Allah ati arenamlume. Winipmunyeba, Israel ninye arye, si erenyak Allah ati, ‘El si erepnamapʼ tenen, el si erepmunce, el dam binuka, kibuka si erenamlume. Winipmunyopura, elce anggun wenena ati, ikin ning weik aresulul ning ara, ‘Tuba tamubuka doproplirye, aning kum kipdeipnamle do, kum do?’ tenen, dinamabe. Ara, anggun nong ap, anggunce talibuka ululum mutuku ap, anggunce si erelulum ning ap ara, ‘Wenen ning ara, kum daneiplirye, bataknamle do, kum do?’ tenen, dinauk unamabe.

Keluaran 10:21

Allah el si ara, Yahweh arye Musa biti nyabuk. “An taruk im deice pukminba, Mesir mutuku noutamak nirya inipnule,” nyabuk. “Winibuka pia inipnamla anya arye, dirina ara, mitik tonun babye kum upliba, ninye arye kum eipdanmanto ubikirye, ilil weik upnuyake,” Allah arye Musa biti nyabuk.

1 Peterus 2:8

Tonda ayupu dipdelulume. Yesaya arye ayupu sekeipsuke. ‘Akeil ara, ninye balelamice anyak, yan dum duklyopura, kwelanyake. Tonda akeil arye, yan dum duklyopura, sakanyake.’ (Yesaya 8:14) Sik diba tenena kum nang arye, Yesus el yupu kum kekenyakce, talibuka kum dobolbanyak anya arye, ninye arye yan dum duklyopura, sakalamak atonun, malyeuk unyake. Ara, talya ati kume. Allah arye aninye ati, ‘Wininamak,’ tenyamuk touk unyake.

Yohanes 12:35

Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.

Ratapan 4:17

Imun kanye bobuka ulamupu talak ara, nun tuba kam ulamupu Israel yala nang arye, ‘Yuk mutuku nang ati, nun melipnamsiak do?’ tenen, tuba-tuba kalikuka dinauk ulamupubuk, nun asinguk dilamsuke. Bukni, talye atibuk kalikuka dilamupu. Deiyok ara, ‘Sik melibuka lyepropnamsik ca,’ tenelamupu mutuku nang nirya ara, nunti kum yanuka melilamsike. Yuk-yuk mutuku nang, tonok nang babye, “Tonda yuk nang arye, nunti yanuka melipnamsiak ca,” nyanyap bukni, sikce ton kum yanuka melilamsike.

Yeremia 14:19

Israel ninye arye, Allah ati nyabik. “Se, nun ni Allah, ance Yehuda yala ninye nirya ati, pia bataksulum do? Tonda Sion mutuku unyak ninye ati, lik upkiliba yu tenesilyam do? Yata ning deiyok ati, ance nunti, weik yu deice arye oplopsiminba, kam kum buktibye do? Imun kanye bobuka unyaba ati ara, ‘Olana kum aryuk, yuk ninye ap, Allah ap dukdongobuka, teleb una ara, yata wiribuka deice arye winiptibye do?’ tenen, enyak bukni, talye ati enyabe. Tonda, ‘Allah arye nunti, lyepnamsilamca’ tenenyap ning ara, talye atibuk tenenamabe. Ati nun dam winisilyam ning ara, yu ninguk arisilyame.

Yeremia 8:15

Wini talak ara, nun amutuku unyap nang arye, ‘Se, teleb kipdeipsutuba, talye kanye bobuka telebuk wininamabeʼ tenen, patasulul bukni, min teleb kipdeipsilyeba, aning kum dinyabe. Aning atonun ton, nunce, ‘Se, nun imun kanye usulul ning ara, kum kipdeipsutuba, nun suse disulul ning ara, kwetepsutuba, lopsuturye, tonap teleb uptibyeʼ tenen, patasulul bukni, Allah arye teleb kum kipdeipsilya ati, aning babye, kum dinyabe. Allah arye, el yu nun deice deipsilyeba, ikin ninguk, nun dam yanuka tuba usilirye, weik imun kanye bobuka, unyabe. Israel nang arye nyapnamake.

Penghotbah 11:8

Yata nang do, sik nirya arye, pia kanye deibuka ukirye, ‘Telebe,’ nyanamake. Tonda, sik anang kan-kan arye, sik kam un talak, lo ton ap tabakuka arelula deice arye, keting tamun weik tonun unyak nang babye, sik kanye pia delinyake. Bukni, sik babye moubuka teninamake. Ara, anggun amutuku noutam kam tuba unamlum talak ara, yambul anun ton tupa aupmal bukni, dibikcopura, aminyan talak pia kunuknak unamlum talak ara, yupa pia weik, nukmanto kum unamle. Tonda, tuba kam unamlum talak anggun dam yanganamle ning nirya ara, talye nong kum upnamle ninguk yanganamsile. Winipmanto ara, kumanya mikip arye donmalirye baliba, tonoknye birye, ‘Akumanya talipnamneʼ tenen, mikip arye bikbik abuka bitua babye, akumanya ara, kum talipmanto ning ati, aning ara, nong pia kum upnamle. Talyeuk winilule.

Ayub 3:5

Winiptuba, keting dirina ap, wala dirina ap ara, dua bum arye kitipdongoptuba, na deipnik sum ara, kunukna uk danamturya.

Mazmur 107:10

Ton ninye ara, yu nang arye, malye kibuka bisibikce, aninye tomobuka, wenena aik noutamak dabinuka deiamikce, weik kat tapu, rantai besi arye, tapu koupdongamikba, imun kanye bobuka daulamik. Aninye nirya ara, kuna noutamakuk daulamikce, pia ikin kanye bobuka ulamik.

Mazmur 107:14

Allah ati morobikopura, kunukne noutam ulamik ning ap, kat tapu arye koupdongamik ning ap, ulamika ara, Allah aniryuk, atapu loplobuka, lyeprobukce, tuba tonap, aninye teleb kipdeibuk.

Yeremia 2:6

Atalak ara sikce nati, ‘Se, nun ni koproba Allah Yahweh ara dan do?’ nyabuka kum asilelamnike. Ara, ‘Nun ni Allah ara, Mesir mutuku noutamak arye, nun nong dobuka, mok ap, mek ap kum ati, buppu weik arye ninye kum ulamik mutuku bisik melibuka boyanamsuk. Amutuku noutamak boyangalamsuk talak ara, mek ton pia kum uamuk. Tonda, amutuku noutamak ara, weik tilinga pum uamukak ara, ninye kot sakuka opmanto ak uamuk. Winyamuk mutuku noutamak ara, mok pia kum celule. Atonun, lukunyan talak noutamak babye, pia kuna uk dakalule. Amutuku noutamak ara, ninye ton pia kum ulamika ati, bisik ton kum balamik. Tonda amutuku noutamak ara, yuk ninye ton pia kum ulamik, nun uk balamupu. Amutuku ninye una ati, ikin weik ulamsuk mutuku bukni, nun ni koprop Allah arye, amutuku noutam arye, dobuka boyanamsuknye bira, wini talak ara, dan tam ulul do?’ nyabuka kum asilamnike.

Yeremia 6:21

Malyeuk wininyaka ati ara, na Allah Yahweh arye nyapsine. Ninye arye, bisik balamikirye, yanilamak keil, awamlya ara, el lina kumce, talye bakibuk, sik yan dum dukliba, kot sakuka poulbalamak atonun, na Allah arye, sik Israel ninye ati, keil yan dum duklamle atonun ning arepneba, sik nirya kote saknamake. Ara, sik ni yapu ap, sik nin yapu ap, sik mapu ap, neika saknamake. Tonda, sik ap, sik mining dam unyak ninye ap, sik kayapu nang ap, sik tam nang ap nirya, neika opnirye, kum kipdeipnamne. Allah arye Israel ninye ati, wenebukce, nyabuk.

Yeremia 50:6

Yata barye keting tamun deice arye, na mapu koproba ara, ‘Teleb bisik ara, ani. Dipkoprop winina ara, ani,’ tenen tenipmanto nang kum ulamik. Winipmanto yupu deice arye, domba basam talye dabatakamiki buk, ‘Nun binamap bisik ani,’ tenena kumce, talye banmakirye, wangaldalamaka atonun, na mapu sikda akunum wangaldalamike. Winilamika deiyok ara, Israel yala nang, sik deiyok arye talilamik talak nirya ara, ‘Teleb winina ara ani, malye winina ara, ani,’ nyana kumce, sik amu tam ulamik nang nirya ara, pia malye weik ulamik. Winipmanto ara, domba basam talibuka, weina deiyok nang arye, sik domba basam akunum batakiceba, teleb bisik batakuka, talye bai mutuku noutam, mangkau kanye bobuka, talye-talye balamikirye, amutuku kon omutuku kon, amutuku dup, omutuku dup ayanuka, obinuka yuk-yuk balanyaka atonun ulamik. Winilamika ati, sik Israel nang arye, ‘Nun binamaba ati, asik ara, asukumʼ tenen, pia moubuka bikina kumce, akunum lubakiamik Ara, na Allah dam ton kum yangalamnike.

Yehezkiel 21:15

Ninye on nang arye, sik warikdongobuka yakceura, aparang ya arye, na mapu koproba, deiyok koubuka, opnin banmaceura, sik Israel mutuku unyak nang mikip-mikip unyak nang ara, mitang kipdeiplyeba, talima daksaknamle. Atalak ara, ninye weika arye obikceba, tukwak sakuka poulbikirye, dipnamake. Anggun nirya eipnalume! Anggun ululum mutuku nirya ara, anggun weik asik wekelbana ati bisik, cang keil poka bublan dam ara, narye yu yin nang deipnyeba, ninye on nang kintinipnamake. Amutuku nang, weika arye opnamak ati, sik yin nang arye, na ninye on ya erebuka talibiceba, aya si ara, perereng alamle touk upnamle. Ara, aparang ya, narye kintinip deiamseba, pereng-pereng alul ning ara, ninye opnamak ati, winipse.

Yehezkiel 34:12

Winipmanto ara, domba basam deiyoknye birye, el domba basam bai tam sakuka, dabinuka wangamlirye, tunim nyaplipa ani, ‘Dan sukum banmak do?’ tenen, ebukaplirye, bulupdeiplirye, tuba tamubukaplirye, teleb ubuka weilamle touk, narye, ‘Naʼ tenen, nang, Israel nang ati, winipnamne. Domba basam atonun, naryuk sikti, weinamne. Sik na domba basam atonun nang ara, sik dana-dana tam balamikce, sik bisik kirikamikba, daunyak mutuku noutam, daunyakak nirya arye, tamubuka boyanirye, tonok telebakuk dobuka deipnamne. Sik kirikamikce, dana-dana tam tunim apnik talak ara, weik dua ap, weik kunukna talak noutam ara, weik imun kanye talak arye, kirikuka tunim apnika ati, nyapne.

Yehezkiel 36:15

Wini talak arye, dipdongobuka doryanamle talak noutamak nirya ara, sik yuk mutuku nang arye, amutuku unamlum ninye ati, akutubuka kum yep-yep anamsiyake. Yuk mutuku ninye arye, ‘Se, sik Israel ninye ap, sik unyak mutuku ap ara, talye mutuku uk ulule,’ nyabuka kum nalinamsiyake. Atonun yupu tuba nyapsikiba, kum kekenamlume. Amutuku noutamak unamle ning deice arye, Israel ninye ati, malye kum ulinamsile. Tonda, melipsiniba, malye unyak nang arye amutuku noutamak unamlum ninye ati, ton yanuka kum onamsiake. Ayupu nirya ara, na Allah Yahweh, aning-aning nirya deice tam, talibuka Weik Erena Deiyok ununye, narye tenenye touk dipkoprob wininune. Aning ara, dipkoprob nong upnamle ati, nyapsine.

Amos 4:13

Aning nirya ara, talye kum nyapsine. Mutuku-mutuku nirya ap, kumanya nirya ap ara, Allah elcuk kwepdeibuke. Tonda, na Allah Yahweh arye, ‘Winipnamne,’ teninun ning nirya ara, talye tukwak ninye ati, laka nyalisunune. Tonda keting noutam babye, lukunyan babye, na Allah aryuk kintinibuka delinune. Winibuka unirye, tukwak mutuku noutamak, weik mutuku deice yanipdongobuka, banune. Na si ara, Allah Yahweh unune. Nara, im deice yin talin ninye nirya talibuka unune. Nara aning-aning nirya talibuka deice tam Pia Mikip Weiknye unune. Allah arye, sik Israel ninye ati nyabuk.

Amos 5:18

‘Allah Yahweh arye, malye unyak nang wenepnamle sum ara, nun kanye deibabe,’ talye ati nyaltakalulum ninye ara, bicoe. Dipkoprop, anggun malye winilulum diparyuk, na Allah arye opnamsinarya. Anggun malyeuk winilulum bukni, yata deiyok ati, ‘Se, Allah Yahweh arye, dan sum yalirye, malye ninye wenepnamle do?’ tenen, kanye deibuka dilulum do? Anggun walwal aryuk winilulume. Asum ara, dirina sum kuma. Pia kunukna sum ati, anggunda, ‘Asum ara, minop yatue,’ tenena meme.

Mazmur 29:2

Aning nirya arye, Allah Yahweh ati, “Se, an ap, an si ap ara, pia teleb ulule. Anda, malye un ning ara, tonok babye ton, kum ukulula ati, Pia Teleb Leknye ulyama ati, nunce an siuk pia erekinyabe,” nyanamlume.

Yesaya 59:10

Tonda, winipmanto, nunda asing kulamle nang arye, talil busulamak atouk unyabe. Asing akunum yum ubuk nang arye, keting duk-duk noutam banmapya babye, lukunyan noutam banmakiba, yan dum duklamle touk usulule. Tonda, nunda kam nang unyakak unmap bukni, nunda akunum diplamak nang atonun unyabe.

Yoel 2:2

Asum ara, dua kunukmiting abuka, inipdopnamle. Dirina ton pia kum upnamle. Tonda yuk karin mutuku yin talin nang arye, sul kwising yupa weik ulamle atonun, yin talin nang babye atonun, yupa pia weika arye, mal olan dam bikirye, amutuku-amutuku nirya singipdongopnamake. Ara, winipmanto ning ara, dua sekdoba bobalirye, mutuku deice palilamla touk upnamake. Aning ara, minop talak arye, aning atonun ton kum winibukba, ninye arye eibuka, kum bikinyak ning winipnamle. Awinipnamle ning ara, yuk dotalak babye, pia tonap tamubuka kum winipnamle. Allah tenebuk talakuk, winipnamle.

Maleaki 2:2

Anggun nirya ara, moubuka kekepnululume. Kekepmunce, anyapdeipnusin yupu ati, mambul kanye bobuka, pia moubuka talipmunce, unamlume. Na ap, na si ap ati, ‘Allah Yahweh ara, pia mambule’ tenen, teleb kibuka, si erenamnululume. Na Allah Yahweh im deice yin talin malaikat nirya, sik weik deiyoknye ununa ati ara, narye nyapsin yupu ara, moubuka kekepnululume. Anggunce na kibuka, si kum erepnumunyopura, narye anggun deice, malye yupu nyabuka sunamsine. Aninguk kum bukni, tonda narye anggunti, teleb ning ton arisinye ning babye, malye nyabuka sunamsine. Aning nirya malye ninguk arepsinyopura, dolonamlulume. Narye anggunti, ‘Wininamlulume, aning kum winipmunyopura, ikin ning arenamsine,’ nyapsise yupu nirya ara, anggunce, ‘Aning ara, mambul kum ati ara, daupmalye’ tenen, batakanululuma ati, dipkoprob narye anggunti, akunum deiyok koubuka sunamsine. Winisununa deiyok ara, anggunce na nyapdeiamse ning ara, batakluma ati susunune.