Yeremia 13:11 - Eipomek

¹¹ Winipmanto ara, ninye baju bumang celana ongobikirye, deiyok deice delilamak touk, Yehuda yala nang ap, Yerusalem mutuku nang ap ara, ninye arye bumang celana deiatinga deibuka, nong kitipdongobuka, koulongolamak touk, ‘Sikda na deiceuk unamakʼ tenen, patanulule. Adeice arye sikda, na mapu unyak nang nirya arye, na si bikina ap, na si erena ap, wininamaniake,’ tenenune. Bukni, na mapu sikce, na yupu kum kekeninyake. Allah arye nyabuk.

Yeremia 13:11 Referans Kwoze

Yeremia 33:9

Teleb kipdeipsinyopura, amutuku weik asik dolamlum ning, Yerusalem mutuku ati, narye ‘Pia telebe,’ tenepnirye kanye deipnamsine. Winipnyopura, amutuku ap, amutuku unamlum nang ara, sik yuk-yuk mutuku im sirya, mutuku sirya nirya unamak nang arye eibikirye, ‘Seʼ tenen, ilil upliba, sik nong sirim talipnamake. Tonda, na Allah ati, sikce si erenamniake. Deiyok ara, aminyan talak, sik Yerusalem mutuku unamak nang ati, narye teleb kipdeipnirye, sik amutuku noutam unamak nang ati, tuba tamubuka, pia teleb kipdeipnyopura, sikce talibuka wininamak ning ara, pia telebuk unamle.

Yesaya 43:21

Aninye ara, kwepdeipsirye, ‘Narye sikti, kanye deipniba, sikce na si erebuka mot senamniyake. Winibuka nyalamikiba, yuk mutuku ninye kel biknamak’ tenen, Israel ninye kwepdeipse. Allah arye nyabuk.

Mazmur 81:11

Nara, anggun ni koproba Allah, na si Yahweh unune. Na siuk erenululume. Anggun Mesir mutuku noutam, ikin weik ulamlum talak ara, na Allah aryuk lopdeipsiseura, yuk teleb mutuku bobinamsise. Ati, aminyan talak nirya babye, anggun patapsilye ning ati, din ning do, yuk ning do nirya ara, ‘Melibuka arepsilyame,’ nyabuka, moropnumunyopura, narye anggun patapmasilye ning nirya arenamsine.

1 Peterus 2:9

Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.

Yeremia 32:20

Minop talak, ancuk ninye dopmanto kum pil dolamlume. Ara, ancuk Mesir mutuku noutam, ninye kum winipmanto pil ap, ninye arye winipmanto kum ning ap, dolamlume. Winilamluma atonun, wini talak babye, ancuk nun Israel nang kan-kan ap, tonda mutuku sirya, im sirya nirya unyak nang kan-kan nirya ara, Ance tuba pia winipmanto kum pil melibuka dosilyame. Winiminya deice arye, wini talak ara, ninye tukwak mutuku unyak nang, nun nirya arye, an si akunum kel bikikinyapce, pia tuba-tuba an siuk erekinyapce, ‘Anda pia telebe,’ nyabuka, anti si erebuka kikinyabe.

Yeremia 13:10

Amalye unyak nang ara, pia mandipna nang unyak ati, narye sikti, nyalinun yupu nirya ara, kum kekenyake. Sikda, talye ning atibuk dobolbakirye, isa siuk erebuka unyake. Ati, narye sikda bumang celana malye kibukba batakik touk, sik amalye nang ati, aning babye, bataknamne.

Yeremia 7:26

Bukni, anggun Israel ninye arye, anabi nyalamik yupu ton, kum kekelamlume. Anggun apu yapu arye, sik nabi nyalamik yupu, kum kekelamik touk, anggun atalak ululum ninye babye, tuba kum kekelulume. Sik nabi-nabi nang arye, na yupu anggun dam nyalilamikba, anggun deiyok nang arye, mandipna kanye bobuka lamikce, kat kanye bobuka winilamik touk, anggun wini talak ululum ninye babye, pia weik arye malye winibuka, mandipna kanye bobuka, ulamaka atonun, anggun babye mandipna kanye bobuka ululume. Sik minop talak ulamik ninye ara, malye winilamik bukni, anggun wini talak ululum Israel ninye ara, pia weik arye tabakuka malye-malye ninguk winilulume. Anggun deiyok nang arye, malye winilamik ning ara, mitik anun uka. Anggun wini talak ululum ninye, malye winilulum ning ara, pia weik, nyabuk. Ara, Allah arye, sik Israel ninye ati, wenebukce nyabuk.

Yeremia 6:17

Tonda, na Allah arye sik melina ati, kalikina deiyok nang wibuka dopdeiamsiba, sik dam yangalamik. Sik akalekna nang arye, cang pong-pong ana, el si ara terompet bobuka, nyalamikba, lelim kekelamikce, ‘E opnamsil ning yanuka opsilyak, tenen, nyanmasiyake,’ tenelamik bukni, na mapu koprop Israel ninye sikda, ‘Kume, ara talye nyanmaka anya arye, kum kekepnamabe,’ nyalamik.”

Yesaya 62:12

Na Allah arye nyapsine. Yerusalem mutuku tamubuka yanamak nang ara, narye winiryuk si arepniba, anang mutuku sirya, im sirya nirya ara, sik si ati nyanamake. “Allah arye akunum Lyepdobuk Nang, ‘Sikda ‘Naʼ tenen, nang unamakʼ tenen, akunum wipdeibuka ati, sikda, ‘Pia Lek Nang,’ nyabuka, si sinamsiake. Tonda, ‘Allah Yahweh arye, ikin noutam arye, Lobukabukce Lyepdobuk Nang,’ nyabuka, si kum sinamsiake. Dipkoprob, anggun Yudea tam nang ati nyapsine. Ninye mutuku sirya, im sirya nirya ara, anggun winiryuk si ati, ‘Anggunda, Allah arye pia epsukce, Eibuka Lyepdopsuk Nang,’ nyabuka, si kum sinamsiake. Tonda, Yerusalem mutuku ati ara, ninye nirya ara, amutuku ati, Allah arye, ‘Min batakuk mutuku,’ nyabuka, si sinamake. Allah arye, anggun Yudea tam Israel yala nang ati, aminyan winipnamuk ning ati, nyabuk.

Mazmur 147:20

Allah arye, nun Israel nang ati, ‘Na tenen nang, na mapu unamak,’ tenen, wipdeiamsukce, teleb kibuka meliamsuk touk, yuk yala nang nirya ati, aning atonun pia kum winilamuke. Sik yuk-yuk daunyak yala nang nirya ara, Allah arye, “Aning wininamlume. Aning ara, pia kum wininamlume,” nyabuka, areamsuk mem yupu ara, sik ton kum kekelamik ati, bita kum bikamike. Ati nun ni Allah Yahweh biti, “Se, Yahweh, anda pia telebuk ulyame,” nyabuka, el si pia erenamabe.

Mazmur 135:4

Ara, Yakub birye deiamukba, dadeipdanin yanganyap nang nirya ara, Yahweh arye, ‘Ayala nang ara, ‘Naʼ tenen nang unamake,’ tenepsukce, wibuka deipsuke. Diba, nun Israel yala nang nirya ara, akunum wibuka erepdeipsuka ati, “Anggun nirya ara, na ninguk ululuma ati, pia ati talipnamsine,” nyasulule.

Ulangan 26:18

Nyaplumba, Allah akunum kekepmasilce, anggun Israel ninye ati, arup arye nyapmasile. “Ura ‘Naʼ tenen, ninye ara, Israel ninye uka. Na mapu atonun unamak,” nyapmasile. Aning ara, min arye, Allah el si Yahweh, akunum anggunak nyapdeiamsuk touk, tuba tonap nyapmasile. Tonda, elce, “Aning ara, wininamlulume. Aning ara, ton pia kum wininamlulume,” nyapdeiamsuk yupu nirya, ‘Kekebuka wininamlum’ tenen, nyapmasile.

Ulangan 4:7

Nyabukce, ayupu ton dukdongobuka nyabuk. “Ati ara, teneipdelulume. Yuk ninye im sirya, mutuku sirya nirya weik aunyak bukni, sikda nun Israel ninye atonun kum unyake. Nun ni koproba Allah ara, mining dam usulula anya arye, nunce, Yahweh ati morobibyopura, el dam ulirye kekesulule. Sik yuk mutuku ninye ara, aning atonun kum winiptinge. Sikda talye Isa Mutuku Dongonye siuk erenyake.”

Lukas 10:11

Tonda, nyabuk. “Ara, ‘Anang kekepnyak’ tenen, ayupu ton nyapnamlulume. ‘Amutuku tuku nun yan tatang palipmasil ning ara miningdam anyuk kilibuka batakmabe. Aning atouk anggunce, ‘Allah el yupu nun like,’ nyapmasulum ati, Allah arye anggun babye, bataknamsile. Ati amutuku batakuka yuk mutuku banamabe. Anggun batakmasulum ati binuyap bukni, anggun dipkoprop moubuka tenenululume. Allah arye ninye weik lyeplirye, kanye talima talinamsil talak ara, akunum dam upsile,’ nyapnamlulume,” Yesus arye nyabuk.

Yeremia 7:13

Anggunce tuba malye-malyeuk winiluluma ati ara, na Allah Yahweh arye nyapsine. Narye anggun malye winilamlum ning ati, “Aning ara, winina meme, bataklulume,” nyabuka, tuba-tuba ayupu nyalamsise bukni, anggunda tuba na yupu kum kekenululume. Narye anggunti, “Malye winilulum ning nirya ara, batakmunce, na dam tamubuka yangamunce, telebuk wininamlume,” nyabuka yukupsisirye, tuba nyasini bukni, anggun kekena kumce, talye kanye bobuka, na dam tamubuka kum yangamunce, na yupu kum kekenululume.

Yeremia 7:23

Atalak ara, narye anggun apu yapu melibuka boyangalamsirye, nyapse yupu ara, ani. Nara, anggun ni koproba Allah ununa anya arye, narye nyasinye yupu uk kekepmunce, moubuka talinamlume. Narye nyasinye yupu talibuka winimunyeura, narye anggunti, pia melinamsine. Adeice arye, ‘Anggunda, na mapu koprop unamlume,’ nyalamse. Tonda, narye anggunti, “Abisik binamlume, abisik kum binamlume. Aninguk wininamlulume. Aning ara, pia kum wininamlume,” nyabuka nyalilamse yupu, ‘Dipkoprop ninguk winipmunyopura, anggun wininamlum ning nirya ara, telebuk unamsile,’ nyalamse. Na Allah arye, anggun apu yapu ati, ayupu uk nyalamse. Winilamsi buk, ayupu kekebuka yangalamik talak ara, pia telebuk winipnin yangalamik.

Yeremia 7:24

Bukni, anggun apu yapu arye, na nyalamse yupu kekebuka, kum dobolbalamik. Narye nyapdeiamse touk, kum winilamik. Narye nyalamse yupu talibuka, yangalamting toura, pia telebuk winipnin yangalamting bukni, sikce sik bidamang kanye tenepman touk, winipnin yangalamik. Sikda pia mandipna kanye dobuka, kekena kumce, kat kanya bon nang winilamikce, malye-malyeuk winipnin yangalamik. ‘Sik anang ara, telebuk wininamak,’ tenelamse bukni, tuba tamubuka, malye winin ninguk tenelamikce, malye winin ninguk talibuka, malye winipnin yangalamik. Aminyan teleb upnamle ninguk tenipting bukni, aning batakuka minop talak malye ninguk winipnin yangalamik. Winibuka winilamika ati, aminyan talakuk, “Aning wininamlulume. Aning ara, pia kum wininamlume,” nyabuka, mem yupu ton tabakuka, sik deice deiamse.

Yeremia 13:1

Allah Yahweh arye, na Yeremia biti nyapnuk. “Anda biminyakarye, deiyok deice deibuka, nong ongona ati, kain lenan arye bumang celana wibuka deibik ning ara, dekuka ongopnulyame. Bukni, nong deice deiatinga delina ati bumang celana ara, mek kum bolpipnamlule.”

Yeremia 13:12

Allah Yahweh arye, na Yeremia biti nyapnuke. Ayupu ara, sik Israel nang ati nyapnulyame. “Nara, anggun Israel nang, anggun ni koproba Allah Yahweh arye, akunum nyapdeipmane. Anggur mek lina ati, domba obuka, bola kobik ning arye wibuka deibik ning ara, anggur mek libibeura, langdipnamle,” nyapnulyame. Nyapminyopura, sikce tamubuka, anti nyapnamkiake. “Kume, nun moubuka akunum bikupu. Nunce anggur mek lina ati, moubuka deibupu ning ara, anggur mek libibiba langdipnamle. Ance, ‘Anang ara, aning kum kel bikikʼ tenepmasilama ati, ayupu nyapmasilam do?” nyapnamkiake.

Amos 3:1

Allah arye Israel ninye ati nyapdeibukba, Amos kekebukce, sekuk yupu ara ani. “Na Allah Yahweh arye, ‘Anggun Israel ninye ati wenepnamsin’ tenen, nyapsin yupu ara, moubuka kekeplulume. Se, Israel ninye anggunda, Mesir mutuku ulalumba, na Allah Yahweh arye dobuka boyanamsise. Ati, na Allah Yahweh arye, anggun Israel ninye nirya ati, awenen yupu nyapsine.

Ulangan 26:19

Anggunce el nyapdeiamsuk yupu moubuka kekepmunce, pia winipmunyopura, anggun Israel ninye ati ereipsiliba, ninye nirya arye, ‘Se, anang ara, sik mambul weike. Allah elda pia telebe,’ nyabuka, Allah el si erenamake. Allah arye, ninye ayala-yala nirya, weika arye kwepdeibuk bukni, yuk yala ninye im sirya, mutuku sirya nirya ara, mitik mambul unyak bukni, anggun Israel ninye ara, Allah arye ereipsiliba, weik mambul ninye unamlume. Wininamla ara, talye ati kume. Ara, ‘Israel ninye, ‘Naʼ tenena ninye unamaka ati, sikti, wipdeipnamne. Sik ti konop nang nyanamake. ‘Sik ti, yuk mutuku nang arye si dopnamake’ tenen, Allah el si Yahweh arye wiamsuke. Aning nirya ara, Allah arye, anggun apu yapu ati kunum, “Wininamne,” nyabuka, nyapdeiamuk touk, winipnamsile. Musa birye Israel ninye ati laka nyabuk.

Yeremia 19:15

“Allah el si Yahweh ara, aning-aning nirya talilule, im deice yin talin malaikat nirya, sik weik deiyoknye ulule. Allah arye, nun Israel ninye ati, pia kalikuka melisululnye birye, ayupu nyasulule. “Na Allah Yahweh arye, Yerusalem mutuku ap, amutuku noutamak ululum ninye nirya ap ati, ‘Anggun malye winilulum ning dekna ati, weik arye wenepnamsine,’ nyapdeiamsise yupu ara, wini talak, dipkoprob winipnamasile. Ara, urdem ati kume. Anggunce, na nyasinye yupu kum kekemunce, pia mandipna kanye bobuka, batakalulume. Batakmunce, anggun malye winin ninguk, winimunya ati, na Allah arye, anggun damak weik ikin ning arepnamsine. Ara, anggun umunye mutuku noutamak ara, weik kanye imun ning arepnamasine. Na Allah Yahweh arye, akunum nyapsine ati, nong upnamale.” “Allah arye nyapsile,” Yeremia arye, akekenmek ninye ati, nyabuk.