Wininyaka ati ara, nara, na yu weik tuba unilya ati, sik nong deice, ikin weik ning deipnamne. Tonda, narye sik anang ati, ‘Se sikda bicoe, ‘Naʼ tenen, nang unyaka ati, sik malye wininyaka ara dauaplye’ tenen, talye kanye bobuka, namin kipnamane, kum nyapnamne. Tonda, narye sik anang ati, kum namin kipnamne. Sikti, weik tonun wenepnamne. Tonok nang babye, kum bataknamne, sik nirya ati, pia ikin weik ning, sik deice deipnirye, wenepnamne. Wenebuka opnyopura, sik Israel nang arye, yupu weik tonun, nati moronmaniyak talak ara, mikip arye yukubuka, engenamaka babye, dipkoprob na pia kum kekepnamne! Allah arye, na Yeheskiel biti, nyapnukba, kekepse.
Yeremia 11:11 - Eipomek11 Aning ati ara, na Allah Yahweh arye, anggunti ayupu nyapsine. Ara, sik malye weik wininyak ning ati, menenga deknirye, ikin ning dobuka, sik deice deipyeba doropnamake. Winipnirye, sik deice aikin ning deipnamaka ara, kum lyepdanmanto upnamake. Aikin ning ara dipkoprob, sik nong deice yanuka dopropnamake. Sikce, nati, ‘Se, nun ni Allaho, ance nun dam yanuka lyepsutume,’ nyabuka moropnitingce, engeptinga babye, ayupu kum kekepnamsine. Anggun ti, kum lyepropnamsine. Gade chapit la |
Yeremia 11:11
35 Referans Kwoze
Aminyan talak, ikin ning weik anggun dam yalyopura, anggunce nati, “Se, nun melibuka lyepsilyame,” nyabuka moronamnulum bukni, nara, “Aunmana ati ara, melipnusine,” kum nyanamsine. Anggunce moropnamnulum yupu ati, kekepnirye tamubuka kum nyapnamsine. Tonda, anggunce nati, ‘Se, nunda pia weik kel bikna deiyok ning patasulula ati ara, dobuka kel kiptibye’ tenen, epra banamnulum bukni, pia kum eipnamnulume.
Nyabukba, Allah Yahweh arye, ayupu ton dukdongobuka nyabuk. Israel nang nirya ara, na yupu pia kum kekelamikce, aninguk talibuka, kum ulamika ati ara, na Allah arye, ‘Anggunda, na yupu kekepnululume!’ nyapdeiamsise talak ara, sikce na yupu kum kekelamnik touk, sikce nati, ‘Se, nun ni Allah melibuka lyepsilyame!’ nyabuka, morolamnik talak babye, narye anggun yupu pia kum kekelamsise. Na, Allah Yahweh, im deice yin talen malaikat nirya talibuka, sik weik deiyoknye ununye birye, nyapsine.
Winibuka winilulum bukni, Allah arye ikin ning arepsiliba, anggun nong deice ikin ning yalyopura, anggun malye nyamunce, ‘Se, nun ni koproba Allah Yahweh, ance lyepsilyame,’ nyabuka morolulume. Malye nyamunce, “Se, na ni ance melibuka lyepsilyame,” nyabuka moronamlum bukni, Allah Yahweh arye, anggun moropnamlum ning ati, kekebuka kum lyepdopnamsile. Anggunce, Allah ati moropnamlum babye, pia kum kekenamsile. Deiyok ara, anggun malye winin ninguk, talibuka winimunya deice arye, pia bataknamsile. Winipnamsil talak ara, anggunce Allah ati, moronamlum ning nirya babye, pia kum kekenamsile.
Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.
Allah el si Yahweh arye, nyapdeipmasil yupu ara, ani. Na Allah arye, dipkoprob nyapsine. Yerusalem mutuku ap, amutuku unyak ninye nirya ara, narye, piripnirya weik arye, wenepnamsine. Weik kanye imun ning arepnamsine. Ara, minop talak arye, narye nyapdeiamsiba, abuku noutam sekuka deiamik bukni, wini talak ara, Yehuda yala ninye talibuka ninye deiyoknye Raja Yosia birye, winiryuk eibukce yinibuka nyapmok yupu, abuku noutam nyalye touk, narye, dipkoprob winipnamsine.
Nara, Allah Yahweh, im deice yin talin malaikat nirya ara, sik deiyoknye ununa ati, na mikip weiknye unune. Ati, narye Israel yala nang ap, Yehuda tam ululum nang ap, moubuka deiamsisirye, teleb kipdeipsise. Bukni, narye, ‘Winibuka wenepnirye, malye kipdeipnamsinʼ tenen, akunum kintinipse ning ara, arepnamsine. Ara, narye anggun deice, ikin ning deipyeba, kanye imun upnamle. Ikin ning, sik deice areplyeba, dopropnamlum nang ara, anggun malye winilulum ning, menenga ati dopropnalume. Ara, anggun atam ululum nang nirya arye, Bahal isa, pia malye ning ati, ‘Nun deiyoknye,’ nyabuka, si erelulumce, kam ning obuka, arelbalamluma deice arye, narye anggunti, yu upnilyeba wenepnamsine. Allah arye, na Yeremia ati nyapnuke.
Se, anggun tukwak mutuku ululum ninye nirya kekeplumce, kel biklulume. Ara, na wepdeipse ninye, na mapu koprop Israel ninye ati, wenena ning arepnamne ning ara, kekepnululume. Ara, urdem ati kum bukni, aninye ara, ‘Allah arye nyasilye yupu, pia kum kekenamabe,’ tenelamikce, nati bataklamnik. Tonda, narye sikti, petelamse ning nirya, batakalamnik. Winibuka batakalamnikce, sikce tenelamik ninguk winilamikce, ‘Nunda, yuk winin ninguk wininamabe,’ tenelamika deice arye, sik damak, weik ikin ning arepnamne.
Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.
Ninye nirya arye, “Kume, wini talak ara, ikin una ap, oldana ap kum aryuk, kanye deibuka, pia teleb kanye lamabuka unyabe,” nyanyak talak aniryuk, kilapu mi deiyok, ‘Atalak dipnusile,’ kum tenepmace talakuk, talye karin arye mi deiyok dilamle touk, Allah arye sikti, weik arye wenebuka opnamle. Winiplye talak ara, sik adiparyuk kum lyepdatinge.
Asum elti, tenena ara, pia ikin weik anya arye, winipmanto yupu ton nyapnusine. Weik yu kus atonun ning, el si ara, singa kus mapmaliba, eibikirye, ‘Obuka dipsilyak’ tenen, ilil upliba, bikbik abuka banmaki bukni, mangkau arye, yuk bai tam ulul yu ning, el si ara beruang mapmalyak, bikiba beruang arye, ‘Aninye obuka dipnun’ tenen, dobolamle touk, winipnamsile. Winipmanto yupu ton nyapnusine. Ninye tonoknye, ‘Na asik binuka dikdik sepnune’ tenen, banmale bukni, inipmaliba mangkau asa arye pola-pola banmalya arye, kwatima mapmalyak talipliba, adiparyuk el taruk si topliba, diplamaka atonun winipnalume. Ara, ‘Ikin upsilyak ati, bikbik abuka, bibirye lyepdatibye’ tenen, bikbik abuka bindenamlum bukni, na Allah arye, anggun wenena ati, weik ikin ning ara, anggun nong deice deipnamsina ati nyapsine.
Nara, Allah Yahweh, aning-aning nirya deice tam erebuka, Pia Mikip Weik ununye birye, anggun Israel tam ululum nang nirya ati, nyapsine. Kanye imun weik ning yanamle! Ara, minop talak ulamik nang arye, akanye imun ning ato ning ton, kum eiyamikce, kum biklamike. Tonda, yukak ton winyamukak, anggun ton kum kekelamlume. Bukni, wini talak ara, anggun dam yanuka, upnamsile.
Aninguk kum bukni, an ap, ance deipminba, dadeipdanin banamak mapu ap, tonda an taliplumba, an amu tam pil yuk-yuk talibuka donyak ninye ap, anggun nirya ara, malye winimunya anya arye, wenebuka opnamsine. Ara, anggun deiyok kibuka, amutuku taliplum nang arye, malye winimunyeba, Yerusalem mutuku unyak ninye ap, Yehuda mutuku noutamak daunyak ninye ap, malyeuk wininyaka ati, narye amutuku noutamak, ikin weik ning, anggun nong deice deipnamsine. Winipnamne ning ara, yata talak arye, “Anggunce tuba malyeuk winipmunyopura, anggun malye winilulum ning dekna ati, kanye weik imun ning arepsinirye, mikip arye wenepnamsine,” nyalamsise. Bukni, amutuku ninye nirya arye, na nyalamse yupu kum kekelamnik. Ati, ‘Aikin ning nirya ara, dipkoprob anggun nong deice deipnamsine,’ nyapne. Allah arye nyabukba, Yeremia birye, kekebuk.
Nyapnukaura, ayupu ton dukdongobuka nyabuk. “Ati ara, na Allah Yahweh, im deice yin talin malaikat nirya, sik deiyoknye unune. Nara, anggun Israel nang arye, ‘Nun ni koproba, ani,’ nyabuka, si erenululumba, narye anggunti melibuka kalikisunun Allah, narye nyapsine. Narye anggun Yehuda tam ululum nang ap, weik asik domik mutuku, Yerusalem mutuku ululum Israel nang ap, anggun wenena ati, weik kanye imun bon ning, anggun mutuku dobuka deipniba, yanamale. Ara, anggun amutuku ululum nang wenena ati, aning nirya akunum kintinibuka deiamsirye, ‘Anggunda anggun malye winilulume ning, kum batakmunyeura, wenepnamsine,’ nyapdeiamsise ning nirya, wini talak dopdeipnamsine. Narye aning winipnamne deiyok ara, anggun Israel nang arye, na nyapdeisise yupu kum kekenululumce, aning moubuka kum taliluluma ati, narye anggunti, ‘Na dam tamubuka yanamlume,’ nyabuka, yukamsise bukni, aning babye kum kekeluluma ati, wini talak ara, anggun deice imun kanye bon ning deipnamsine.” Allah arye na Yeremia biti, laka nyapnuke.
Wininyaka ati ara, sik banyak bisik ara, kunuknak atonun ap, alap bisik atonun ap, opmanto bisikuk banamake. Ara, sik tuba malye wininyaka deice, narye sikti, malye ak dopkwetepniba, sakuka opnamle. Winipmanto ara, ninye arye, malye bisik bakibuk, sik yan dum dukliba saklamak touk, aninye babye, wenepnirye opnamne. Ara, urdem ati kum nyapne. Winibuka malyeuk wininyaka ati ara, na tenyamse talak akunum uplyopura, sik deice ikin ning weik deipnamne. Ara, na tenyamse keting tamun akunum yalyopura, sikti, weik wenena ning arepnamne. Anang ara, opnamna atia. Na Allah Yahweh arye nyapsine ati, aning ara dipkoprob winipnamle.” Allah arye nyabuk.
“Allah el si Yahweh ara, aning-aning nirya talilule, im deice yin talin malaikat nirya, sik weik deiyoknye ulule. Allah arye, nun Israel ninye ati, pia kalikuka melisululnye birye, ayupu nyasulule. “Na Allah Yahweh arye, Yerusalem mutuku ap, amutuku noutamak ululum ninye nirya ap ati, ‘Anggun malye winilulum ning dekna ati, weik arye wenepnamsine,’ nyapdeiamsise yupu ara, wini talak, dipkoprob winipnamasile. Ara, urdem ati kume. Anggunce, na nyasinye yupu kum kekemunce, pia mandipna kanye bobuka, batakalulume. Batakmunce, anggun malye winin ninguk, winimunya ati, na Allah arye, anggun damak weik ikin ning arepnamsine. Ara, anggun umunye mutuku noutamak ara, weik kanye imun ning arepnamasine. Na Allah Yahweh arye, akunum nyapsine ati, nong upnamale.” “Allah arye nyapsile,” Yeremia arye, akekenmek ninye ati, nyabuk.
Ance anang ati nyapnamalam yupu ara, ani. Se kekeplulume. Sik Yerusalem mutuku, ninye deiyok kibuka, taliplum nang ap, Yerusalem mutuku unyak ninye nirya ap ati, na Allah Yahweh arye, nyapnusin yupu kekepnuse. Nara, aning-aning ap, im deice unyak yin talin malaikat nirya ap talibuka, sik weik deiyoknye unune. Tonda, Israel ninye, sik kalikuka melinunye, na Allah Yahweh arye nyapnusine. Ara, na Allah arye, anggun umunye mutuku noutamak nirya ara, weik ikin ning arepsiniba, anggun nirya imun kanye bobuka, ilil weik upnamsile. Yata mutuku ninye do nirya, aikin ning arepsiniba, akunum uplyopura, yuk ninye kekebikirye, ‘Se, aning ara, dipkoprob weik mambule. Ato ikin ning ara, nun ton pia kum kekelamupu,’ nyanamake.
Nyapminba, sik aninye arye anti, “Se, nunda dan mutuku binamaba ati, nyapmasil do?” nyabuka asipdekicopura, ance tamubuka nyapnulyame. Allah arye nyapmasila ara ani. Narye, tenelamse touk unamake. Narye, ‘Aninye weik kanye imun uk dilya deice arye dipnamake,’ tenepse. Aninye ara, weik uk dilamlibuk, dipkoprob dipnamake. Tonda, narye tenepse touk, ‘Mal olanak bikiba, ya deice arye, obikiba dipnamake,’ tenepse. Tonda, aninye ara, mal olanmacak bikiba, ya sekna deice arye dipnamake. Tonda, narye, ‘Din ning patana deice arye dipnamake,’ tenepse. Ninye ara, dina nirya patalye deice arye dibinamake. Winibikce deice arye, sik nirya ara, dipna bisikuk banamake. Tonda narye, ‘Wenena aik binuka deibikiba, bulamica deice arye dibinamake,’ tenepse ninye ara, tapu koubikirye, wenena aik dongobikiba, aulamica deice arye dipnamake. Narye, sik Israel ninye tenyamse touk, sik nirya ara, dipna bisikuk banamake.
Allah arye nyabukura, na nabi Yeremia ati, ayupu ton nyapdeipnuke. Ati ara, Yeremiao, ance sikti, winipmince, na Allah ati, kum moronamnilyame. Tonda, ance na Allah ati, ‘Se na ni Allaho, sik Israel nang ati melipsilyame,’ nyabuka, morona ap, engena ap kume. Deiyok ara, sikce talye isa ati, ‘Nun deiyok ning ani,’ nyabuka, si erenyaka deice arye, narye arepnyeba, weik ikin ning, sik nong deice areplyeba, dopropnamaka talak ara, ance nati, ‘Naio, melipnilyame,’ nyabuka, kum moronamnululume. Moropnutuma babye, kum kekenamne.
Yatanye do, malye uplye talak ara, ninye deiyok nang arye, “An malye unmalam ning ara, bataklyame, winina meme,” nyabuka wenenyak bukni, el mandipna kanye uplirye, ‘Kume, sik deiyok nang arye nyaninyak yupu ara, pia kum kekenamne’ tenen, sik yupu yaniltalulnye bira, aminyan ara Allah arye elti, tonok talak aryuk wenepliba, kum upra deipnamle. Akunum weneplirye, kum kipdeiplyopura, anye bira, yata wiribuka lipsisikuka deiptingba, tamubuka teleb uptu do? Ara, pia kum winipmanto.
Ara ani, Allah Yahweh arye nyapsile. ‘Israel nang, sik apu yapu nang arye, si erelyangalamiknye, nara Allah arye winipnamne. Yerusalem mutuku ap, amutuku noutam tuba unyak nang ap, ati supnirye, sik nirya ara, weik imun kanye bon ning, sik dam deipnamne. Ara, narye minop talak nyamsiba, abuku sekeiamik noutam arye, ‘Allah nyalye yupu kum talebuka ubicopura, supniba, weik imun kanye bon ning, ayala-yala nirya, sik deice yanamlarya,’ nyamse. Ayupu nirya ara, anggunce abuku dobuka, sik Yehuda tam talibuka deiyoknye dam nyapdeipmalumba, anggun Raja Yosia akunum kekemoke.
Sik anang ara, yupu mikip arye ngalukuka, Allah ati moronyaka babye, talye ati moronyake. Deiyok ara ani. Ara, Allah pia deice tam erebuka, aning-aning nirya talibuka, mikip weik deiyoknye birye, sikti, eibuka batakalule. Tonda kekebuka batakalule. Ara, sikce pia malye winin ning talibuka unyak atia.
Weik kanye imun dou li maplirye, mek nirya kum uplye talak ara, Yehuda yala ninye, asik dobuka unyak mutuku nirya ara, dipmanto upnamake. Winipnyopura, amutuku unyak ninye nirya, weik kanye imun upliba, ikin kanye bobuka, tuku deice mabuka, ngalukunamake. Tonda, Yerusalem mutuku unyak ninye nirya arye, mambul kanye bobikirye, ‘Se, nun yanuka melipsilyame,’ nyabuka, malye nyanamake.
Ati ara, an Yeremia birye, sik Israel ninye ati, nyapnalyame. Wini talak ara, ‘Yehuda yala ninye ap, Yerusalem mutuku unyak ninye nirya ap ati, binuka obisipnamne,’ tenenyak ning ara, binuka laka nyapnulyame. ‘Ara, kiri tuku dobuka ngolol makau teleb uka memelinye ulye touk, sik amutuku unyak ninye wenena ap, ona ati, nun ni Allah, el si Yahweh arye, sik wenen ning akunum memelule. Anggun nong deice, weik ikin ning delinamsil ning ara, akunum memepdeipsuke.’ Ati, ance, sik Israel ninye ati, ‘Anggun malye winilulum ning nirya ara, batakmunce, diksukumuk teleb ubuka wininamlume,’ nyabuka, aninye dam binuka, laka nyapnulyame,” Allah arye, Yeremia biti nyabuk.
Allah el ‘Naʼ tenen nang ati, deiyok kibuka ululum nang ati, wenepnamsil talak ara, ‘Wenebuka opsilyakʼ tenen, dungnubuka kum bitume. Tonda yuk tam bikbik abuka kum duknulbitume. Sik Yehuda mutuku tam unyak nang kalikina ap, peterena ap, deiyok-deiyok nang nirya ara, wenebuka opsilyopura, dibinauk upnamlume.
Se nun ni koproba Allaho, ance nun ilil tenenyap ning, nun mal olan nanguk nyapmimba, “Weik kwalya kwalibikirye, din ning neika dinyaka atonun winipnuyabe,” nyabuka, yukulamak touk kibuka, ance nun mal olan nang yukupminyeba, sik nirya dana-dana arye yangakirye, nunce deiamupu mapu, nunce kalikinyap mapu ap, bico tenenyap mapu ap nirya ara, yanuka obuka batakasinyake. Nun ni Allaho, an yu upkukba, uminye sum ara, tonoknye babye, bai sakuka bikbik abuka, kum bitue. Nun mal olan nang arye, nun mapu silip nirya ara, akunum obuka, sirya daknamake.
“Se, Yeheskiel, anda ninye sirika arye deipkikba ulyame. Anda, sik ayanuka asipmakiyak nang ara, sik talima noutam nirya ara, talye ning isa si erenyak nang unyake. Anang ara, sik si erenyak ning dobuka, sik asing dinak deibikirye, tuba-tuba si erenyake. Amalye unyak ning deice arye, tuba malye winilinauk unyake. Winipmanto ara, ninye arye bisik banmanbuk, keil arye yan kisok duklyeba, sakuka poulbalamak touk unyake. Wininyaka ati, sikce nati yanuka asipdenetinga babye, yata deiyok ati, sik anang arye moropnamak yupu, kekepnamne do?
Piblisite